Գործ Nօ ԵԱՔԴ/0020/01/13

ՈՐՈՇՈՒՄ

ՔՐԵԱԿԱՆ ԳՈՐԾԻ ՎԱՐՈՒՅԹԸ ԿԱՐՃԵԼՈՒ ԵՎ ՔՐԵԱԿԱՆ
ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ՄԱՍԻՆ

13 մայիսի 2013թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը`

նախագահությամբ` դատավոր Ա.Մկրտչյանի
քարտուղարությամբ` Օ.Կիրակոսյանի
մասնակցությամբ`
մեղադրող Ռ.Խաչատրյանի
պաշտպան Ի.Գազարովայի
օրինական ներկայացուցիչ Գ.Թարխանյանի
տուժող Ա.Նավասարդյանի

Դատարանում, դռնբաց դատական նիստում քննության առնելով քրեական գործն ըստ մեղադրանքի` Գևորգ Անդրանիկի Գոյումջյանի /ծնված 02.08.1995թ. ք.Երևան, ազգությամբ հայ, ՀՀ քաղաքացի, սովորում է թիվ 148 դպրոցի 12-րդ դասարանում, չամուսնացած, չի աշխատում, նախկինում չդատված, հաշվառված ք.Երևան, Վ.Համբարձումյան փողոց, 61 տուն, բնակվում է ծնողների հետ/:
Մեղադրվում է ՀՀ քրեական օրենսգրքի 116-րդ հոդվածի 2-րդ մասով:

Պ Ա Ր Զ Ե Ց

Նախաքննության մարմինն անչափահաս ամբաստանյալ Գևորգ Գոյումջյանին ՀՀ քրեական օրենսգրքի 116-րդ հոդվածի 2-րդ մասով մեղադրանք է առաջադրել այն արարքի համար, որ ՙնա 2012թ. մայիսի 12-ին` ժամը 15:00-ի սահմաններում, Երևանի Հր.Քոչար փող. 29 հասցեում գտնվող Գայի անվան թիվ 129 միջնակարգ դպրոցի մարզահրապարակի մոտ, մի խումբ անչափահասների միջև անձնական փոխհարաբերությունների շուրջ տեղի ունեցած վիճաբանության ընթացքում, պաշտպանվելով իրեն ծեծի ենթարկող անչափահասներ Հրաչ Արևշատյանի, Արթուր Նավասարդյանի, Վահրամ Տեր-Վարդանյանի, Էդմոնդ Ավդալյանի և գործով չպարզված մի քանի այլ մասնակիցների հարվածներից, իր մոտ եղած դանակով անհրաժեշտ պաշտպանության սահմանազանցմամբ հարվածել է անչափահասներ Արթուր Նավասարդյանին և Հրաչ Արևշատյանին` Ա.Նավասարդյանին պատճառելով որովայնի շրջանում` կյանքի համար վտանգավոր ծանր վնաս հանդիսացող թափանցող վնասվածք և ձախ ազդրի շրջանում` կտրող-ծակող վնասվածք, իսկ Հրաչ Արևշատյանին աջ աճուկային շրջանին` պատճառելով առողջությանը միջին ծանրության վնաս՚:
Դատական քննության ընթացքում մեղադրող Ռ.Խաչատրյանը և ամբաստանյալ Գևորգ Գոյումջյանի շահերի պաշտպան Ի.Գազարովան միջնորդություն են ներկայացրել` Գ.Գոյումջյանի նկատմամբ քրեական հետապնդումը դադարեցնելու և քրեական գործի վարույթը կարճելու մասին այն պատճառաբանությամբ, որ ՀՀ քրեական օրենսգրքի 75-րդ և 95-րդ հոդվածների համաձայն անցել են քրեական պատասխանատվության ենթարկելու վաղեմության ժամկետները, քանի որ Գ.Գոյումջյանը հանցանքը կատարել է անչափահաս տարիքում:
Ամբաստանյալ Գևորգ Գոյումջյանը չառարկեց վաղեմության ժամկետներն անցնելու հիմքով քրեական գործի վարույթը կարճելու և քրեական հետապնդումը դադարեցնելու միջնորդության դեմ:
Դատարանը գտնում է, որ նշված պայմաններում քրեական գործի վարույթը ենթակա է կարճման, իսկ քրեական հետապնդումը` դադարեցման հետևյալ պատճառաբանությամբ.
ՀՀ քրեական օրենսգրքի 35-րդ հոդվածի 1-ին մաիս 6-րդ կետի համաձայն` քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե անցել են վաղեմության ժամկետները:
ՀՀ քրեական օրենսգրքի 19-րդ հոդվածի 2-րդ մասի համաձայն` ՀՀ քրեական օրենսգրքի 116-րդ հոդվածը դասվում է ոչ մեծ ծանրության հանցագործությունների շարքին:
ՀՀ քրեական օրենսգրքի 75-րդ հոդվածի 1-ին մասի 1-ին կետի համաձայն` անձն ազատվում է քրեական պատասխանատվությունից, եթե ոչ մեծ ծանրության հանցանքն ավարտված համարելու օրվանից անցել է երկու տարի:
ՀՀ քրեական օրենսգրքի 75-րդ հոդվածի 1-ին մասի 2-րդ կետի համաձայն` վաղեմության ժամկետը հաշվարկվում է հանցանքն ավարտված համարելու օրվանից մինչև դատավճռի օրինական ուժի մեջ մտնելու պահը:
ՀՀ քրեական օրենսգրքի 95-րդ հոդվածի համաձայն` մինչև տասնութ տարին լրանալը հանցանք կատարած անձին վաղեմության ժամկետներն անցնելու հետևանքով քրեական պատասխանատվությունից կամ պատժից ազատելիս սույն օրենսգրքի 75-րդ հոդվածով նախատեսված վաղեմության ժամկետները համապատասխանաբար կրճատվում են կիսով չափ:
Գևորգ Գոյումջյանի կողմից հանցանքը կատարվել և ավարտվել է 2012 թվականի մայիսի 12-ին, հետևաբար` հենց այդ պահից սկսվում է վաղեմության ժամկետի հաշվարկը, ընդ որում, սույն գործով վաղեմության ժամկետի ընթացքը կասեցված չի եղել, Գ.Գոյումջյանը քննությունից կամ դատից չի խուսափել:
Ղեկավարվելով ՀՀ քրեական դատավարության օրենսգրքի 35-րդ հոդվածի 1-ին մասի 6-րդ կետով, 313-րդ, 379-րդ հոդվածներով դատարանը`

Ո Ր Ո Շ Ե Ց

ՀՀ քրեական օրենսգրքի 116-րդ հոդվածի 2-րդ մասի հատկանիշներով հարուցված թիվ 14112112 քրեական գործի վարույթը կարճել և Գևորգ Անդրանիկի Գոյումջյանի նկատմամբ քրեական հետապնդումը դադարեցնել` վաղեմության ժամկետներն անցնելու հիմքով:
Գևորգ Գոյումջյանի նկատմամբ ընտրված խափանման միջոցը` ստորագրություն չհեռանալու մասին, վերացնել:

Որոշումը մեկամսյա ժամկետում կարող է բողոքարկվել ՀՀ վերաքննիչ քրեական դատարան:





ԴԱՏԱՎՈՐ Ա.ՄԿՐՏՉՅԱՆ