ԵԱՔԴ/0014/01/13

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանը`

նախագահող դատավոր` Լ. Ավետիսյան
քարտուղարությամբ` Ն. Ղազարյանի, Հ. Թադևոսյանի
մասնակցությամբ
մեղադրող` Է. Պետրոսյանի
պաշտպան` Ն. Մկրտչյանի
տուժողներ` Ս. Արաբյանի, Ա. Արաբյանի,
Ա. Բաղդասարյանի

2013 թվականի հունիսի 14-ին, Երևան քաղաքում, դռնբաց դատական նիստում, քննեց քրեական գործն ըստ մեղադրանքի Դավիթ Արթուրի Գասպարյանի, ծնված 1991 թվականի սեպտեմբերի 24-ին, Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ֆիզիկապես վատառողջ, ամուրի, խնամքին ոչ ոք, նախկինում դատված` Երևան քաղաքի Աջափնյակ և Դավիթաշեն վարչական շրջանների ընդհանուր իրավասության դատարանի 15.12.2009 թվականի դատավճռով ՀՀ քրեական օրենսգրքի 113 հոդվածի 2-րդ մասի 1-ին կետով դատապարտվել է 6 ամիս ժամկետով ազատազրկման, ազատվել է 30.12.2009թ., չի աշխատել, հաշվառված և բնակվել է Երևան քաղաքի Դավիթաշենի 1-ին թաղամասի 37 շենքի թիվ 2 բնակարան հասցեում, մեղադրվում է ՀՀ քրեական օրենսգրքի 113 հոդվածի 2-րդ մասի 6-րդ կետով, ՀՀ քրեական օրենսգրքի 258 հոդվածի 3-րդ մասի 1-ին կետով, կալանքի տակ է 2012 թվականի դեկտեմբերի 15-ից,

Պ Ա Ր Զ Ե Ց

1.Գործի դատավարական նախապատմությունը.
2012 թվականի հոկտեմբերի 11-ին ՀՀ ոստիկանության ՔԳՎ Երևան քաղաքի քննչական վարչության Արաբկիրի քննչական բաժնում ՀՀ քրեական օրենսգրքի 113 հոդվածի 2-րդ մասի 6-րդ կետով նախատեսված հանցագործության հատկանիշներով հարուցվել է թիվ 14131512 քրեական գործը:
2012 թվականի դեկտեմբերի 15-ին Դավիթ Արթուրի Գասպարյանը ձերբակալվել է:
2012 թվականի դեկտեմբերի 18-ին Դավիթ Արթուրի Գասպարյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 113 հոդվածի 2-րդ մասի 6-րդ կետով, ՀՀ քրեական օրենսգրքի 118 հոդվածով և ՀՀ քրեական օրենսգրքի 258 հոդվածի 3-րդ մասի 1-ին կետով նախատեսված հանցագործության հատկանիշներով: Դատարանի որոշմամբ նրա նկատմամբ որպես խափանման միջոց է կիրառվել կալանավորումը:
2013 թվականի փետրվարի 1-ի որոշմամբ թիվ 14131512 քրեական գործի նյութերով գործով չպարզված ոմն ՙԿարենի՚ կողմից տուժողներ Սուրեն և Անդրանիկ Արաբյաններին ծեծի ենթարկելու և մեղադրյալ Դավիթ Արթուրի Գասպարյանի հետ տուժող Ա.Բաղդասարյանի նկատմամբ բռնություն գործադրելու հետ զուգորդված խուլիգանություն` ՀՀ քրեական օրենսգրքի 118 հոդվածով և ՀՀ քրեական օրենսգրքի 258 հոդվածի 3-րդ մասի 1-ին կետով նախատեսված հանցագործության դեպքով մասն անջատվել և քննությունը շարունակվել է առանձին վարույթում` քրեական գործին շնորհելով 14105613 համարը:
2013թ. փետրվարի 5-ին Դավիթ Արթուրի Գասպարյանի վերաբերյալ ՀՀ քրեական օրենսգրքի 113 հոդվածի 2-րդ մասի 6-րդ կետով, ՀՀ քրեական օրենսգրքի 118 հոդվածով և ՀՀ քրեական օրենսգրքի 258 հոդվածի 3-րդ մասի 1-ին կետով թիվ 14131512 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի 2013 թվականի մայիսի 3-ի որոշմամբ Դավիթ Արթուրի Գասպարյանի նկատմամբ ՀՀ քրեական օրենսգքրի 118 հոդվածով` Սուրեն Արաբյանին ծեծի ենթարկելու դրվագով, քրեական հետապնդումը դադարեցվել է` ամբաստանյալի հետ տուժող Սուրեն Արաբյանի հետ հաշտվելու հիմքով:
2.Գործի փաստական հանգամանքները.
Նախնական քննության մարմինն ամբաստանյալ Դավիթ Արթուրի Գասպարյանին ՀՀ քրեական օրենսգրքի 113 հոդվածի 2-րդ մասի 6-րդ կետով և ՀՀ քրեական օրենսգրքի 258 հոդվածի 3-րդ մասի 1-ին կետով մեղադրանք է առաջադրել այն արարքների կատարման համար, որ նա, 2012թ. հոկտեմբերի լույս 4-ի գիշերը, ժամը 0120-ի սահմաններում Երևան քաղաքի Կոմիտասի պողոտայի 1 հասցեում գործող ՙՍթար՚ սուպերմարկետի դիմացի հատվածում սեփական անձը կարևորելու, հասարակության նկատմամբ իր բարձր դիրքն ընդգծելու նպատակով անհիմն վիճաբանության մեջ է մտել նույն պահին սուպերմարկետից դուրս եկած Երևան քաղաքի բնակիչ Անդրանիկ Արաբյանի հետ, որի ընթացքում դիտավորությամբ բռունցքով հարվածել է նրա դեմքի աջ հատվածին` վերջինիս առողջությանը պատճառելով միջին վնաս` առողջության տևական քայքայումով:
Դրանից հետո, իր ընկեր, գործով չպարզված ոմն ՙԿարեն՚-ի հետ ՙՍթար՚ սուպերմարկետի մուտքի դիմաց, սուպերմարկետի աշխատակիցների ներկայությամբ, սեփական անձը կարևորելու, հասարակության նկատմամբ իր բարձր դիրքն ընդգծելու նպատակով անհիմն վիճաբանության և կռվի մեջ է մտել սուպերմարկետի մենեջեր Արմեն Բաղդասարյանի հետ, որի ընթացքում, նաև սուպերմարկետի սրահում, ոտքերով ու բռունցքներով բազմաթիվ հարվածներ հասցնելով Ա. Բաղդասարյանին և տալով հայհոյանքներ, դիտավությամբ կոպիտ կերպով խախտել է հասարակական կարգը` ցուցաբերելով բացահայտ անհարգալից վերաբերմունք հասարակության նկատմամբ և խաթարել է սուպերմարկետի բնականոն աշխատանքը:
3.Ապացույցների հետազոտում.
Առաջադրված մեղադրանքում ամբաստանյալ Դավիթ Գասպարյանն իրեն մեղավոր ճանաչեց մասնակի` ՀՀ քրեական օրենսգրքի 258 հոդվածով առաջադրված մեղադրանքը չընդունեց և հրաժարվեց ցուցմունք տալ, պնդեց նախաքննության ընթացքում տված իր ցուցմունքները:
Նախաքննության ժամանակ Դավիթ Արթուրի Գասպարյանը որպես վկա հարցաքննվելիս ցուցմունք է տվել այն մասին, որ 03.10.2012թ. երեկոյան, իր անձնական օգտագործման ՙԲՄՎ՚ մակնիշի 16 ԼՍ 265 պ/հ ավտոմեքենայով Երևան քաղաքի Սայաթ Նովա փողոցում, ՙՕպերայի՚ մոտ հանդիպել է իր ծանոթ Կարենին և վերջինիս հետ գնացել դեպի Կոմիտասի պողոտա: Ճանապարհին որոշել է ծխախոտ գնել: Այդ նպատակով մեքենան կայանել է Կոմիտաս 1 հասցեում գործող ՙՍԹԱՐ՚ սուպերմարկետի դիմացի ավտոկանգառում, ՙԿարեն՚-ի հետ դուրս եկել մեքենայից և մոտեցել սուպերմարկետի մուտքին: Նույն պահին մուտքի դիմաց հանդիպել են դեպի իրենց քայլող երկու քաղաքացիների, որոնցից մեկին ինքն ուշադիր հայացքով նայել է: Վերջինս նույն կերպ նայել է իրեն: Ինքը հարցրել է, թե ինչու է նա ուշադիր նայում իրեն, որին նույն կերպ է պատասխանել նաև զրուցակիցը, որի հետևանքով իրենց միջև վիճաբանություն է ծագել ու այդ ընթացքում ինքը բռունցքով մեկ անգամ դիտավորությամբ հարվածել է զրուցակցի դեմքին, որից վերջինս կորցրել է հավասարակշռությունն ու վայր ընկել: Դրանից հետո նշված քաղաքացիները հեռացել են: Քիչ անց իրենք մոտեցել են խանութի դիմացը կանգնած խանութի աշխատակիցներին, որոնցից մեկից ինքը պահանջել է ջնջել տեսագրությունը, սակայն, երբ վերջինս մերժել է իրեն, ինքը զգացել է, որ նա ստում է և երկու ապտակ է հասցրել նշված անձի դեմքին: Վիճաբանությանը միջամտել են խանութի մյուս աշխատակիցներն ու հանդարտեցրել իրենց, որից հետո իրենք հեռացել են: Վիճաբանության ողջ ընթացքում ՙԿարեն՚-ը որևէ մեկի չի հարվածել, այլ միայն փորձել է իրեն հանդարտեցնել:
Ամբաստանյալին մեղսագրված հանցանքները հիմնավորվել են նաև հետևյալ ապացույցներով.
Տուժող Սուրեն Արաբյանի ցուցմունքով այն մասին, որ 03.10.2012թ. գիշերը եղբոր` Անդրանիկ Արաբյանի հետ գնացել է Երևան քաղաքի Կոմիտասի պողոտայի 1 հասցեում գործող ՙՍթար՚ սուպերմարկետ` գնումներ կատարելու: Դուրս գալով խանութից` մուտքի դիմաց հանդիպել են երկու երիտասարդի, որոնցից մեկը եղբորն ասել է. ՙերկար ես նայում այ ջահել՚: Սկսել են վիճել: Այնուհետև նույն անձը ձեռքով հարվածել է իր եղբոր դեմքի ձախ հատվածին, որից հետո նրա դեմքի աջ հատվածին բռունցքով հարվածել է Դ.Գասպարյանը, ինչից եղբայրը վայր է ընկել: Երբ ինքը միջամտել է և տեսնելով եղբոր վնասվածքը, փորձել է նրան հեռացնել այդտեղից, նրանք հարձակվել են իրենց վրա, հահոյել և հարվածներ են հասցրել ինչպես իր, այնպես էլ իր եղբոր մարմնի տարբեր մասերին: Նստելով ավտոմեքենան նկատել է, որ այդ երկու երիտասարդները խանութի դիմաց վիճաբանության մեջ են մտել նաև այլ երկու անձանց հետ, հետո մտել են խանութ: Նկատել է, որ իր ակնոցները չկան: Դուրս գալով ավտոմեքենայից, գետնից վերցրել է ակնոցները և մոտենալով խանութի անվտանգության աշխատակցին, հարցրել` թե ճանաչում է այդ տղաներին, ինչին վերջինս պատասխանել է, որ չի ճանաչում: Տուն գնալուց հետո գնացել են հիվանդանոց և ստացել բուժօգնություն:
Տուժող Անդրանիկ Արաբյանի ցուցմունքով այն մասին, որ 03.10.2012թ. գիշերը եղբոր` Սուրեն Արաբյանի հետ, իր անձնական օգտագործման ՙՆիսսան Տիդա՚ մակնիշի 99 ԼՈ 991 պ/հ ավտոմեքենայով գնացել են Երևան քաղաքի Կոմիտասի պողոտայի 1 հասցեում գործող ՙՍթար՚ սուպերմարկետ` գնումներ կատարելու: Գնումները կատարելուց հետո միասին դուրս են եկել խանութից և մուտքի դիմաց հանդիպել երկու երիտասարդների, որոնցից մեկն իրեն ասել է. ՙերկար չես նայում այ ջահել՚: Ինքը պատասխանել է, որ կարծել է, թե ծանոթ են, այդ պատճառով է նայել, որից հետո այդ անձը անպատվել է իրեն: Ինքը նույն կերպ է պատասխանել վերջինիս, որից հետո նա ձեռքով հարվածել է իր դեմքի ձախ հատվածին: Դրանից անմիջապես հետո Դ.Գասպարյանը բռունցքով ուժեղ հարվածել է իր դեմքի աջ հատվածին, որի հետևանքով ինքը կորցրել է հավասարակշռությունն ու վայր ընկել: Մի քանի վայրկյան ընկած մնացել է գետին: Եղբոր օգնությամբ բարձրացել է և փորձել հեռանալ: Քանի որ երկրորդ հարվածից ստացած վնասվածքից ընկել է շոկային վիճակի մեջ, ուրիշ ոչինչ չի հիշում: Հիշում է միայն, որ եղբոր օգնությամբ նստել է մեքենան, մի կերպ վարել և գնացել են տուն, ապա դիմել բուժօգնության և վիրահատվել է: Մինչև հարվածը հայհոյանքներ չեն եղել: Վիճաբանել է մյուս երիտասարդի հետ:
ՙՍթար՚ սուպերմարկետի մենեջեր, տուժող Արմեն Բաղդասարյանի ցուցմունքով այն մասին, որ 2012թ. հոկտեմբերի 4-ի գիշերը` ժամը 0100-ի սահմաններում, երբ ավարտելով աշխատանքը ցանկացել է տուն գնալ, սուպերմարկետի մուտքի դիմաց նկատել է վիճաբանող 4 անձանց: Դուրս գալով սրահից, տեսել է, որ նրանք միմյանց հարվածում են: Քիչ անց երկուսը հեռացել են, իսկ մյուս երկուսը մոտեցել են իրեն ու պահանջել տեսախցիկների տեսագրությունը: Ինքը հայտնել է, որ նման իրավասություն չունի: Տղաներից մեկն իրեն դիմել է ՙարա՚-ով, ինչին ինքը պատասխանել է, որ ՙարա՚-ն նա է, որից հետո վիճաբանություն է տեղի ունեցել: Նրանք ոտքերով ու ձեռքերով հարվածել են իրեն, ինքն էլ հարվածել է նրանց: Վիճաբանությանը միջամտել է անվտանգության աշխատակից Ս.Գյոզալյանը: Հետո նրանք հեռացել են: Միջադեպը տեղի է ունեցել խանութի մուտքի մոտ և ներսում: Մի քիչ սպասելուց հետո, 0130-ի սահմաններում ինքը գնացել է տուն: Ինքը հայհոյանքներ չի լսել: Ընդհանուր վիճաբանությունը տևել է մոտ 5-10 րոպե: Բացի անվտանգության աշխատակից Սուրենից ներկա են գտնվել նաև բանվոր Հովհաննեսը, գանձապահ Դիանան, հավաքարար Աղավնին:
Տուժող Արմեն Բաղդասարյանի նախաքննության ժամանակ տված ցուցմունքով այն մասին, որ որ 2012թ. հոկտեմբերի լույս 4-ի գիշերը` ժամը 0100-ի սահմաններում, երբ ավարտելով աշխատանքը ցանկացել է տուն գնալ, սուպերմարկետի մուտքի դիմաց նկատել է վիճաբանող 4 անձանց: Դուրս գալով սրահից, նկատել է, որ իրեն անծանոթ երկու երիտասարդներ բռունցքներով հարվածում են քիչ առաջ սուպերմարկետից դուրս եկած երկու տղաներին: Քիչ անց ծեծվողները հեռացել են, իսկ մյուս երկուսը մոտեցել են իրեն ու պահանջել ջնջել տեսախցիկների տեսագրությունը: Ինքը մերժել է, հայտնելով, որ նման հարցով առավոտյան կարող են դիմել տնօրենին, որից հետո վերջիններս պահանջել են ասել տնօրենի հասցեն: Երբ ինքը պատասխանել է, որ չգիտի`տղաներից մեկը ասել է. ՙսուտ ես ասում արա՚: Ինքը պատասխանել է, որ ՙարա՚-ն նա է, որից հետո իր հետ վիճող տղան բռունցքով հարվածել է իր աջ ուսային հատվածին, ապա նրանք երկուսով սկսել են ոտքերով և ձեռքերով հարվածել իր մարմնի տարբեր մասերին և տալ հայհոյանքներ: Ինքը կռվից խուսափելու նպատակով մտել է խանութի սրահ, որի ժամանակ տղաներից մեկը ոտքերով հարվածել է սրահի մուտքի դռան մոտ դրված աղբարկղին և այն գցել սրահ, որից հետո նրանցից մեկը աղբարկղի կափարիչով հարվածել է իր ձեռքին: Այնուհետև սուպերմարկետի աշխատակիցների ներկայությամբ շարունակել են ոտքերով և բռունցքներով հարվածներ հասցնել իր մարմնի տարբեր հատվածներին` շարունակելով տալ սեռական բնույթի հայհոյանքներ: Վիճաբանությանը և կռվին միջամտել է անվտանգության աշխատակից Ս.Գյոզալյանը և մի քանի անգամ դուրս հրավիրել տվյալ անձանց, սակայն վերջիններս դուրս գալուց հետո մի քանի անգամ վազելով կրկին ներս են մտել և շարունակել հարվածել ու հայհոյել: Քիչ անց անվտանգության աշխատակցի միջամտությամբ վիճաբանությունը դադարել է: Վիճաբանության և կռվի հետևանքով ինքը մարմնական վնասվածքներ չի ստացել: Վիճաբանության պատճառով վախեցել են խանութի կին աշխատողները և խաթարվել է սուպերմարկետի բնականոն աշխատանքը:
Վկա Հռիփսիմե Հովհաննեսի Մելքոնյանի նախաքննության ժամանակ տված ցուցմունքով այն մասին, որ աշխատել է ՙՍթար՚ սուպերմարկետի Կոմիտաս 1 հասցեում գործող մասնաճյուղում, որպես վաճառողուհի: 2012թ. հոկտեմբերի 4-ի գիշերը` ժամը 0120-ի սահմաններում, երբ գտնվել է դրամարկղի մոտ, խանութի մուտքի մոտից աղմուկի ձայներ է լսել և նկատել, որ երկու անծանոթ երիտասարդներ վիճաբանում են սուպերմարկետի մենեջեր Արմեն Բաղդասարյանի հետ և փոխարդարձ հարվածներ հասցնում միմյանց: Այդ ժամանակ Ա. Բաղդասարյանը ներս է մտել սրահ, ում հետևից սրահ են մտել նաև նշված երկու երիտասարդները և սեռական բնույթի հայհոյանքներ տալով շարունակել են ձեռքերով և ոտքերով հարվածներ հասցնել նրան, իսկ Արմենը պաշտպանվելու նպատակով ոտքերով հարվածել է նրանց: Հայհոյանքները լսելով` ինքը հեռացել է դրամարկղի մոտից դեպի սրահի խորքերը, որպեսզի չլսի դրանք: Վիճաբանության ընթացքում սրահում են գտնվել անվտանգության աշխատակից Սուրենը, բանվոր Հովհաննեսը, հավաքարար Աղավնին, գանձապահ Դիանան և երեք հաճախորդներ, որոնց չի ճանաչում: Ինքը չի ցանկացել միջամտել և քանի որ սրահում է եղել նաև անվտանգության աշխատակիցը, ոստիկանություն չի դիմել: Քիչ անց վիճաբանությունը դադարել է: Ինքը Ա.Բաղդասարյանին այդ օրն այլևս չի տեսել: Վիճաբանության ընթացքում հնչած հայհոյանքների, տեղի ունեցած կռվի պատճառով մոտ հինգ րոպե խաթարվել է խանութի բնականոն աշխատանքը: 2012թ.-ի հոկտեմբերի 4-ի առավոտյան ինքը գնացել է տուն:
Վկա Սուրեն Լևոնի Գյոզալյանի ցուցմունքով այն մասին, որ աշխատել է ՙՍթար՚ սուպերմարկետի Կոմիտաս 1 հասցեում գործող մասնաճյուղում, որպես անվտանգության աշխատակից: 2012թ. հոկտեմբերի 4-ի գիշերը` ժամը 0100-ի սահմաններում գտնվել է խանութի սրահում, երբ Ա.Բաղդասարյանն ասել է, որ խանութի մուտքի մոտ վիճաբանություն է տեղի ունենում: Ինքը դուրս գալով սրահից փորձել է հանդարտեցնել վիճողներին: Ինքն անձամբ չի տեսել, թե ով ում է հարվածել: Նրանք պարզապես իրար հրում էին: Ըստ տեսագրության Դավիթ Գասպարյանն է հարվածել Անդրանիկ Արաբյանին, որից հետո նա վայր է ընկել: Վնասվածք նկատել է միայն Անդրանիկի աջ հոնքի շրջանում` պատռվածքի տեսքով: Հետո տուժողները նստել են իրենց մեքենան և հեռացել: Ամբաստանյալը և նրա ընկերը մտել են խանութ: Մուտքի մոտ խանութի մենեջեր Ա.Բաղդասարյանի հետ վեճի են բռնվել և սկսել են քաշքշել միմյանց: Վեճը ծագել է Դավիթի ընկերոջ կողմից Արմենին դիմելաձևի պատճառով: Նրանք ցանկացել են խոսել տնօրենի հետ: Բայց տնօրենն այդ ժամանակ տեղում չի եղել: Ինքը միջամտել է վիճաբանությանը և փորձել սրահից դուրս բերել Դ.Գասպարյանին ու նրա ընկերոջը: Մի քանի րոպե անց իրեն հաջողվել է դուրս բերել նրանց ու վիճաբանությունը դադարել է: Վիճաբանության ժամանակ սուպերմարկետի սրահում են գտնվել հավաքարարը, դրամարկղի և սրահի աշխատակիցները: Սրահի ներսում հայհոյանքներ չեն եղել, իսկ դրսում թե ով է հայհոյել չի հիշում:
Վկա Սուրեն Լևոնի Գյոզալյանի նախաքննության ընթացում տված ցուցմունքով այն մասին, որ 2010թ. դեկտեմբերի 15-ից աշխատում է ՙՍԹԱՐ՚ սուպերմարկետի ցանցի Կոմիտաս 1 հասցեում գործող մասնաճյուղում որպես անվտանգության աշխատակից: 2012թ. հոկտեմբերի 4-ի գիշերը` ժամը 0120-ի սահմաններում գտնվել է խանութի սրահում և նկատել է, որ սուպերմարկետին մոտեցող իրեն անծանոթ երկու երիտասարդներ զրույցի են բռնվել նույն պահին սուպերմարկետից դուրս եկած երկու տղաների հետ, որի ժամանակ խանութին մոտեցող տղանները սկսել են բռունցքներով հարվածել մյուս երկու տղաներին: Ինքը դուրս է եկել սրահից և ընդհուպ չմոտենալով վերջիններիս` պահանջել է դադարեցնել վիճաբանությունը: Այդ պահին նկատել է, որ ծեծվող տղաներից մեկի դեմքի աջ հատվածը արնաշաղախ է: Քիչ անց խանութից դուրս եկած տղաները հեռացել են, որոնք վիճաբանության ժամանակ որևէ հարված մյուսներին չեն հասցրել: Դրանից հետո մյուս երկու երիտասարդները փոքր-ինչ հանդարտվել են: Մեկ-երկու րոպե անց նրանք մոտեցել են այդ պահին մուտքի դիմաց կանգնած սուպերմարկետի մենեջեր Արմեն Բաղդասարյանին ու պահանջել ջնջել խանութի տեսախցիկների տեսագրությունը: Ա.Բաղդասարյանը մերժել է` հայտնելով, որ նման հարցով առավոտյան կարող են դիմել տնօրենին, որից հետո վերջիններս պահանջել են ասել տնօրենի հասցեն: Երբ Ա.Բաղդասարյանը պատասխանել է, որ տնօրենի հասցեն չգիտի, տղաներից մեկը ասել է.ՙսուտ ես ասում արա՚, որին Ա.Բաղդասարյանը պատասխանել է նույն կերպ: Այնուհետև վիճող երիտասարդը բռունցքով հարվածել է Ա.Բաղդասարյանին, որից հետո նրանք երկուսով ձեռքերով ու ոտքերով հարվածել են Ա.Բաղդասարյանի մարմնի տարբեր հատվածներին ու տալ սեռական բնույթի հայհոյանքներ: Հարվածներից խուսափելու համար Ա.Բաղդասարյանը մտել է սուպերմարկետի սրահ, ուր մտել են նաև այդ երիտասարդներն ու շարունակել հարվածել և հայհոյել: Ինքը միջամտել է վիճաբանությանը և փորձել սրահից դուրս բերել երիտասարդներին, սակայն վերջիններս մի քանի անգամ վազելով կրկին ներս են մտել ու շարունակել հարվածել ու սեռական բնույթի հայհոյանքներ տալ Ա. Բաղդասարյանին: Մի քանի րոպե անց իրեն հաջողվել է սրահից դուրս բերել այդ երիտասարդներին և վիճաբանությունը դադարել է: Կռվի արդյունքում Ա. Բաղդասարյանը վնասվածքներ չի ստացել: Վիճաբանության և կռվի ժամանակ սուպերմարկետի սրահում են գտնվել բոլոր աշխատողները, ովքեր վախեցել և ՙիրար էին խառնվել՚, որի պատճառով խաթարվել է սուպերմարկետի բնականոն աշխատանքը:
Վկա Դիանա Արզումանյանի ցուցմունքով այն մասին, որ աշխատում է ՙՍԹԱՐ՚ սուպերմարկետում, որպես գանձապահ: 2012թ. հոկտեմբերի 4-ի գիշերը` ժամը 01-ի սահմաններում, երբ գտնվել է դրամարկղի մոտ, խանութի մուտքի մոտից, դեպի դուրս, աղմուկի ձայներ է լսել և նկատել, որ երկու անծանոթ երիտասարդներ դրսում վիճաբանել են տուժողների` իրենց մշտական հաճախորդների հետ, հարվածում են նրանց: Հետո այդ երիտասարդները վիճաբանել են սուպերմարկետի մենեջեր Արմեն Բաղդասարյանի հետ: Քաշքշուկ և հարվածներ են եղել: Տվել է մոտ 10 րոպե: Անվտանգության աշխատակից Սուրենը եղել է Արմենի հետ, փորձել է հարթել ստեղծված իրավիճակը: Ինքը չի տեսել, թե վիճաբանությունը խանութի սրահ տեղափոխվել է, թե` ոչ: Հայհոյանքներ չի լսել:
Վկա Աղավնի Գրիգորյանի ցուցմունքով այն մասին, որ աշխատում է ՙՍԹԱՐ՚ սուպերմարկետում, որպես հավաքարար: 2012թ. հոկտեմբերի լույս 4-ի գիշերը գտնվել է աշխատանքի վայրում: Նկուղում աշխատելիս է եղել և աղմուկի ձայներ լսելով բարձրացել է խանութի սրահ: Տեսել է, որ խանութի մուտքի դիմաց, իրենց մենեջեր Արմեն Բաղդասարյանի հետ վիճում է Դավիթ Գասպարյանը, ուրիշ մարդ չի տեսել: Վեճին միջամտել է իրենց անվտանգության աշխատակիցը և փորձել հանդարտեցնել: Ինքը մոտեցել է, որ Արմենին մի կողմ քաշի, բայց իրեն խանութից կանչել են և գնացել է ներս: Հետո տեղյակ չէ, թե ինչ է եղել, բայց վեճը չի շարունակվել: Լսել է հայհոյանքներ, բայց չգիտի թե ով է տվել: Ինքը չի իմացել, որ դրսում այլ երիտասարդների հետ վեճ է եղել: Հայտնեց նաև, որ իր նախաքննական ցուցմունքը ճիշտ է, քանի որ այն ժամանակ դեպքն ավելի թարմ է եղել:
Վկա Աղավնի Գրիգորյանի նախաքննության ընթացում տված ցուցմունքով այն մասին, որ աշխատում է ՙՍԹԱՐ՚ սուպերմարկետների ցանցի Կոմիտաս 1 հասցեում գործող մասնաճյուղում, որպես հավաքարար: 2012թ. հոկտեմբերի 4-ի գիշերը գտնվել է աշխատանքի վայրում և զբաղված է եղել սրահի մաքրման աշխատանքներ կատարելով: Երբ մաքրել է սուպերմարկետի սրահի մուտքի դռան մոտակա հատվածը, նկատել է, որ սրահի մուտքի դիմաց` դրսում, սուպերմարկետի մենեջեր Արմեն Բաղդասարյանը զրուցում է իրեն անծանոթ երկու երիտասարդների հետ: Այնուհետև նկատել է, որ նշված երկու երիտասարդները սկսել են ոտքերով և ձեռքերով հարվածել Ա.Բաղդասարյանին: Ա.Բաղդասարյանը մտել է սրահ` վիճաբանությունից և կռվից խուսափելու նպատակով: Նույն պահին երիտասարդներից մեկը ոտքով հարվածել է մուտքի դռան կողքին դրված աղբարկղկին և այն գցել սրահ, որից հետո երիտասարդները մտել են սրահ ու շարունակել ձեռքերով և ոտքերով հարվածել Ա.Բաղդասարյանի մարմնի տարբեր հատվածներին` տալով սեռական բնույթի հայհոյանքներ: Ինքը վախեցել է և մոտենալով նրանց պահանջել է դադարեցնել հայհոյանքները և վիճաբանությունը, քանի որ այդ ժամանակ սրահում են գտնվել նաև խանութի աշխատող երիտասարդ աղջիկներ, սակայն այդ երիտասարդները ուշադրություն չեն դարձրել և շարունակել են հարվածել ու հայհոյել Ա.Բաղդասարյանին: Վիճաբանությանը միջամտել է սուպերմարկետի անվտանգության աշխատակից Ս.Գյոզալյանը և փորձել բաժանել ու խանութից դուրս բերել նրանց, սակայն երիտասարդները մի քանի անգամ վազելով կրկին մտել են սրահ ու շարունակել հարվածել ու հայհոյել Ա.Բաղդասարյանին: Որոշ ժամանակ անց Ս.Գյոզալյանին հաջողվել է սրահից վերջնականապես դուրս բերել երիտասարդներին ու դադարեցնել կռիվը: Վիճաբանությունից և կռվից վախեցել են ինչպես ինքը, այնպես էլ խանութի աշխատող մյուս աղջիկները և վիճաբանության ողջ ընթացքում խաթարվել է սուպերմարկետի բնականոն աշխատանքը:
Դատարանը գնահատելով տուժող Արմեն Բաղդասարյանի, վկաներ Սուրեն Գյոզալյանի, Աղավնի Գրիգորյանի նախաքննության և դատաքննության ժամանակ տված ցուցմունքները, գտնում է, որ արժանահավատ պետք է համարել նրանց նախաքննության ժամանակ տված ցուցմունքները:
Ամբաստանյալի կատարած հանցանքը հիմնավորվել է նաև քրեական գործով ձեռք բերված հետևյալ ապացույցներով.
Տուժող Անդրանիկ Գագիկի Արաբյանի և մեղադրյալ Դավիթ Արթուրի Գասպարյանի առերես հարցաքննության մասին արձանագրությամբ այն մասին, որ տուժող Ա. Արաբյանը պնդել է նախաքննության ընթացքում տրված իր ցուցմունքները:
Տուժող Սուրեն Գագիկի Արաբյանի և մեղադրյալ Դավիթ Արթուրի Գասպարյանի առերես հարցաքննության մասին արձանագրությամբ այն մասին, որ տուժող Ս. Արաբյանը պնդել է նախաքննության ընթացքում տրված իր ցուցմունքները:
Դատաբժշկական փորձաքննության թիվ 1412/հ եզրակացությամբ, համաձայն որի Ա.Արաբյանի ստացված մարմնական վնասվածքները` աջից հայմորյան ծոցի առաջնային և վերին պատերի, աջ ակնակապճի կողմնային, ստորին և միջային պատերի բերկորային փակ կոտրվածքների, աջ աչքի կոպերի և սպիտակուցաթաղանթի արյունազեղումների ձևերով հասցվել են բութ, կոշտ առարկաներով, հնարավոր է նշված ժամկետում, չի բացառվում որոշման մեջ նկարագրված գործի հանգամանքներին և պատճառել են առողջությանը միջին ծանրության վնաս` առողջության տևական քայքայումով, նկատի ունենալով վնասվածքների հետ անմիջական պատճառական կապի մեջ եղած հետևանքների տևողությունը` 21 օրից ավելի:
Դատաքննության ընթացքում, իրեղեն ապացույց հանդիսացող ՙՍթար՚ սուպերմարկետից առգրավված 2 կոշտ տեսասկավառակների տեսագրության արդյունքների հետազոտմամբ, համաձայն որի Դավիթ Գասպարյանն ու գործով չպարզված ոմն ՙԿարեն՚-ը կռվում են տուժողներ Անդրանիկ և Սուրեն Արաբյանների հետ և հարվածում նրանց, ապա կռվի են բռնվում մյուս տուժող Ա. Բաղդասարյանի հետ և ինչպես սուպերմարկետի դիմացի հատվածում, այնպես էլ սրահի ներսում ձեռքերով և ոտքերով բազմաթիվ հարվածներ հասցնում վերջինիս:
ՙՍթար՚ սուպերմարկետից առգրավված տեսասկավառակների զննության մասին արձանագրությամբ այն մասին, որ տեսագրությունում պատկերված է, թե ինչպես են գործով մեղադրյալ Դ. Գասպարյանն ու գործով դեռևս չպարզված ոմն ՙԿարեն՚-ը կռվում տուժողներ Անդրանիկ և Սուրեն Գագիկի Արաբյանների հետ և հարվածում նրանց, ապա կռվի մեջ են մտնում գործով մյուս տուժող Ա. Բաղդասարյանի հետ և ինչպես սուպերմարկետի դիմացի հատվածում, այնպես էլ սրահի ներսում ձեռքերով և ոտքերով բազմաթիվ հարվածներ հասցնում վերջինիս:
ՙՍթար՚ սուպերմարկետից առգրավված 2 կոշտ տեսասկավառակներն իրեղեն ապացույց ճանաչելու մասին որոշմամբ:
Հաղորդում ընդունելու մասին թիվ 009317 արձանագրությամբ այն մասին, որ 04.10.2012թ. տուժող Սուրեն Գագիկի Արաբյանը հաղորդում է տվել ոստիկանության Արաբկիրի բաժին, որ 2012թ. հոկտեմբերի 3-ին` ժամը 2300-ի սահմաններում Կոմիտաս 1 հասցեում գործող ՙՍթար՚ սուպերմարկետի դիմաց երկու անծանոթ անձինք ծեծի են ենթարկել իրեն և եղբորը` Անդրանիկ Գագիկի Արաբյանին` պատճառելով մարմնական վնասվածք:
4.Դատարանի իրավական վերլուծությունները.
Վերլուծելով և գնահատելով դատական քննության ժամանակ հետազոտված ապացույցներն իրենց համակցության մեջ, դատարանը ձեռք բերված ապացույցները բավարար է գտնում և գործի փաստական հանգամանքներով հաստատված է համարում, որ ամբաստանյալ Դավիթ Գասպարյանը կատարել է հանցավոր արարքներ, որոնք համապատասխանում են ՀՀ քրեական օրենսգրքի 113 հոդվածի 2-րդ մասի 6-րդ կետի և ՀՀ քրեական օրենսգրքի 258 հոդվածի 3-րդ մասի 1-ին կետի հատկանիշներին:
Կատարած արարքների համար ամբաստանյալ Դավիթ Արթուրի Գասպարյանը ենթակա է քրեական պատասխանատվության և պատժի:
Ամբաստանյալներ Դավիթ Արթուրի Գասպարյանի նկատմամբ պատիժ նշանակելիս, դատարանը հաշվի է առնում նրա կատարած արարքների հանրության համար վտանգավորության աստիճանը, ինչպես նաև հանցավորի անձը:
Որպես ամբաստանյալ Դավիթ Գասպարյանի պատասխանատվությունը և պատիժը մեղմացնող հանգամանք դատարանը հաշվի է առնում այն, որ նա ֆիզիկապես վատառողջ է` տառապում է ՙօրգանական ծագման էմոցիոնալ անկայուն խանգարում՚ ախտորոշմամբ:
Որպես ամբաստանյալի պատասխանատվությունը և պատիժը ծանրացնող հանգամանք դատարանը դիտում է հանցանքը կատարելու ռեցիդիվը, նկատի ունենալով, որ ամբաստանյալ Դավիթ Գասպարյանը դիտավորյալ միջին ծանրության հանցագործություն (դիտավորությամբ առողջությանը միջին ծանրության վնաս պատճառելը` ՀՀ քրեական օրենսգրքի 113 հոդվածի 2-րդ մաս) կատարելու համար ազատազրկման դատապարտված լինելով և դատվածությունը չմարված, կրկին կատարել է միջին ծանրության դիտավորյալ հանցագործություններ:
ՀՀ քրեական օրենսգրքի 22 հոդվածը 1-ին մասի համաձայն ՙՀանցագործությունների ռեցիդիվ է համարվում դիտավորությամբ հանցանք կատարելն այն անձի կողմից, ով դատվածություն ունի նախկինում դիտավորությամբ կատարված հանցանքի համար՚:
Հաշվի առնելով Դավիթ Արթուրի Գասպարյանի կատարած արարքների հանրության համար վտանգավորության աստիճանը և բնույթը, նրա անձը, նրան բնութագրող տվյալները, պատասխանատվությունը և պատիժը մեղմացնող ու ծանրացնող հանգամանքները, ինչպես նաև այն, որ ՀՀ քրեական օրենսգրքի 113 հոդվածի 2-րդ մասի սանկցիայով նախատեսված է պատիժ միայն ազատազրկում առավելագույնը հինգ տարի ժամկետով, իսկ ՀՀ քրեական օրենսգրքի 258 հոդվածի 3-րդ մասի սանկցիայով նախատեսված է պատիժ նաև նաև ազատազրկում առավելագույնը հինգ տարի ժամկետով, դատարանը գտնում է, որ պատժի նպատակներին հասնելու համար Դավիթ Գասպարյանի նկատմամբ ՀՀ քրեական օրենսգրքի 113 հոդվածի 2-րդ մասի 6-րդ կետով և ՀՀ քրեական օրենսգրքի 258 հոդվածի 3-րդ մասի 1-ին կետով նախատեսված հանցանքներ կատարելու համար պատիժ պետք է նշանակել ազատազրկման ձևով, որը նա պետք է կրի:
Դատարանը գտնում է, որ ամբաստանյալ Դավիթ Գասպարյանի նկատմամբ պատիժ նշանակելիս պետք է ղեկավարվել ՀՀ քրեական օրենսգրքի 67.1 հոդվածի 2-րդ մասով, համաձայն որի ՙ … Հանցագործությունների ռեցիդիվի համար նշանակված պատիժը չի կարող պակաս լինել քրեական օրենսգրքի Հատուկ մասի համապատասխան հոդվածի սանկցիայով նախատեսված առավելագույն պատժի կեսից՚:
Դատարանը գտնում է, որ Դավիթ Գասպարյանի նկատմամբ որպես խափանման միջոց կիրառված կալանավորումը պետք է թողնել անփոփոխ, մինչև դատավճռի օրինական ուժի մեջ մտնելը:
ՀՀ քրեական դատավարության օրենսգրքի 155 հոդվածի 2-րդ մասի համաձայն` քրեական դատավարությունում քաղաքացիական հայց չհարուցելու դեպքում անձն իրավունք ունի քաղաքացիական հայց հարուցել քաղաքացիական դատավարության կարգով:
Անդրադառնալով տուժող Անդրանիկ Արաբյանի քաղաքացիական հայցի հարցին և հաշվի առնելով, որ գործի դատաքննության ընթացքում տուժող Անդրանիկ Արաբյանը հայց չի ներկայացրել, հայտնելով, որ ինքը նման պահանջ կներկայացնի հետագայում, դատարանը գտնում է, որ նրան պետք է իրավունք վերապահել քաղաքացիական հայց հարուցել քաղաքացիական դատավարության կարգով:
Դատարանը գտնում է, որ տուժող Արմեն Բաղդասարյանի քաղաքացիական հայցի հարցը պետք է համարել լուծված, նկատի ունենալով, որ նա ամբաստանյալից որևէ նյութական պահանջ չունի, որի մասին տուժողը հայտնել է դատական քննության ժամանակ:
Անդրադառնալով իրեղեն ապացույցների տնօրինման հարցին, դատարանը գտնում է, որ դատավճիռն օրինական ուժի մեջ մտնելուց հետո 2012թ. նոյեմբերի 29-ի որոշմամբ իրեղեն ապացույց ճանաչված և քրեական գործին կցված, ՙՍթար՚ սուպերմարկետից ստացված 2 կոշտ սկավառակները պետք է պահել քրեական գործի հետ միասին:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 357-360, 365, 369-372 հոդվածներով, դատարանը

Վ Ճ Ռ Ե Ց

Դավիթ Արթուրի Գասպարյանին մեղավոր ճանաչել ՀՀ քրեական օրենսգրքի 113 հոդվածի 2-րդ մասի 6-րդ կետով և ՀՀ քրեական օրենսգրքի 258 հոդվածի 3-րդ մասի 1-ին կետով նախատեսված հանցանքներ կատարելու մեջ:
Դավիթ Արթուրի Գասպարյանին ՀՀ քրեական օրենսգրքի 113 հոդվածի 2-րդ մասի 6-րդ կետով դատապարտել ազատազրկման երեք (3) տարի ժամկետով: ՀՀ քրեական օրենսգրքի 258 հոդվածի 3-րդ մասի 1-ին կետով նրան դատապարտել ազատազրկման երկու (2) տարի վեց (6) ամիս ժամկետով:
ՀՀ քրեական օրենսգրքի 66 հոդվածի համաձայն` հանցանքների համակցությամբ պատիժները մասնակիորեն գումարելու միջոցով Դավիթ Արթուրի Գասպարյանի նկատմամբ վերջնական պատիժ նշանակել ազատազրկում երեք (3) տարի վեց (6) ամիս ժամկետով:
Դավիթ Արթուրի Գասպարյանի նկատմամբ նշանակված պատժի սկիզբը հաշվել 2012 թվականի դեկտեմբերի 15-ից: Պատիժը պետք է կրի ՀՀ ԱՆ համապատասխան քրեակատարողական հիմնարկում:
Դավիթ Արթուրի Գասպարյանի նկատմամբ կիրառված խափանման միջոցը` կալանավորումը թողնել անփոփոխ, մինչև դատավճռի օրինական ուժի մեջ մտնելը:
Տուժող Անդրանիկ Արաբյանին իրավունք վերապահել քաղաքացիական հայց հարուցել քաղաքացիական դատավարության կարգով:
Տուժող Արմեն Բաղդասարյանի քաղաքացիական հայցի հարցը համարել լուծված:
Դատավճիռն օրինական ուժի մեջ մտնելուց հետո, իրեղեն ապացույց հանդիսացող և քրեական գործին կցված ՙՍթար՚ սուպերմարկետից առգրավված 2 կոշտ տեսասկավառակները պահել քրեական գործի հետ միասին:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակվելու օրվանից հետո մեկամսյա ժամկետում:

Դատավոր` ստորագրություն
Բնագրի հետ ճիշտ է
Դատավոր Լ. Ավետիսյան