ԵԱՔԴ/0012/01/13

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանը

նախագահող դատավոր Լ. Ավետիսյան
քարտուղարությամբ Ն.Ղազարյանի
մասնակցությամբ`
մեղադրող Ա. Ամիրյանի
պաշտպան Ս. Գևորգյանի

2013 թվականի փետրվարի 15-ին, Երևան քաղաքում, դռնբաց դատական նիստում, դատական քննության արագացված կարգով, քննեց քրեական գործն ըստ մեղադրանքի Նարեկ Վռամի Մնացականյանի, ծնված 1993 թվականի հունվարի 27-ին, Արմավիրի մարզի Ամբերդ գյուղում, ազգությամբ հայ, ՀՀ քաղաքացի, միջնակարգ կրթությամբ, ամուրի, խնամքին ոչ ոք, ՀՀ ՊՆ 31549 զորամասի ժամկետային զինծառայող, կոչումով շարքային, նախկինում չդատված, հաշվառված և բնակվել է Արմավիրի մարզ, գյուղ Ամբերդ Վ.Մնացականյան փողոց 16 տուն հասցեում, մեղադրվում է ՀՀ քրեական օրենսգրքի 364 հոդվածի 1-ին մասով, որպես խափանման միջոց է ընտրվել զորամասի հրամանատարության հսկողությանը հանձնելը,

Պ Ա Ր Զ Ե Ց

1.Գործի դատավարական նախապատմությունը.
2012 թվականի դեկտեմբերի 10-ին Երևանի կայազորի զինվորական դատախազությունում ՀՀ քրեական օրենսգրքի 364 հոդվածի 1-ին մասով նախատեսված հանցագործության հատկանիշներով հարուցվել է թիվ 90208812 քրեական գործը և ուղարկվել ՀՀ ՊՆ ՔԾ չորրորդ կայազորային քննչական բաժին` նախաքննություն կատարելու համար:
Նախաքննության մարմնի 2013 թվականի հունվարի 23-ի որոշմամբ Նարեկ Վռամի Մնացականյանը ներգրավվել է որպես մեղադրյալ և նրան մեղադրանք է առաջադրվել ՀՀ քրեական օրենսգրքի 364 հոդվածի 1-ին մասով: Նրա նկատմամբ որպես խափանման միջոց ընտրվել է զորամասի հրամանատարության հսկողությանը հանձնելը:
2012 թվականի հունվարի 30-ին թիվ 90208812 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան:
2.Գործի փաստական հանգամանքները.
Նախնական քննության մարմինն ամբաստանյալ Նարեկ Վռամի Մնացականյանին ՀՀ քրեական օրենսգրքի 364 հոդվածի 1-ին մասով մեղադրանք է առաջադրել այն արարքի կատարման համար, որ նա զինվորական ծառայության մեջ գտնվելով ՀՀ ՊՆ 31549 զորամասում, որպես 1-ին գումարտակի 1-ին վաշտի 3-րդ դասակի վարորդ-էլեկտրիկ, կոչումով շարքային, 2012 թվականի նոյեմբերի 30-ին, ժամը 1800-ից մինչև 2012 թվականի դեկտեմբերի 1-ը, ժամը 1800-ն սահմանված կարգով ընդգրկված լինելով վերակարգում, որպես զորամասի շտաբի սուրհանդակ, սահմանված կարգի համաձայն հրահանգավորվելով սուրհանդակի պարտականությունների կատարման վերաբերյալ, 2012 թվականի դեկտեմբերի 1-ին, ժամը 0700-ից մինչև նույն օրը, ժամը 1000-ն պարտավոր լինելով գտնվել զորամասի շտաբում և կատարել որպես սուրհանդակի իր պարտականությունները, հրաժարվել է վերակարգի զինվորական ծառայության պարտականությունները կատարելուց, որը զուգորդվել է դրանց փաստացի դադարեցմամբ` զորամասի տարածքն ինքնակամ թողնելով:
3. Արագացված դատական քննություն.
Մինչև դատաքննությունն սկսելն ամբաստանյալ Նարեկ Վռամի Մնացականյանը միջնորդեց դատական քննությունն անցկացնել արագացված կարգով և հայտարարեց, որ առաջադրված մեղադրանքն իրեն պարզ է, համաձայն է իրեն առաջադրված մեղադրանքին, գիտակցում է արագացված կարգով դատական քննություն անցկացնելու բնույթն ու հետևանքները, միջնորդությունը ներկայացրել է կամավոր` պաշտպանի հետ խորհրդակցելուց հետո: Միջնորդությունը հաստատեց նաև ամբաստանյալի պաշտպան Սիլվա Գևորգյանը:
Մեղադրող Ա.Ամիրյանը դատական քննության արագացված կարգ կիրառելուն չի առարկել:
Դատարանը համոզվելով, որ առկա են ՀՀ քրեական դատավարության օրենսգրքի 3751 և 3752 հոդվածներով նախատեսված պայմանները, որոշում է կայացրել դատական քննության արագացված կարգ կիրառելու մասին:
4.Դատարանի իրավական վերլուծությունները.
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Նարեկ Վռամի Մնացականյանին առաջադրված մեղադրանքը ՀՀ քրեական օրենսգրքի 364 հոդվածի 1-ին մասով հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 364 հոդվածի 1-ին մասի հատկանիշներին և արարքի որակումը ճիշտ է:
Ամբաստանյալ Նարեկ Մնացականյանի նկատմամբ պատիժ նշանակելիս, դատարանը հաշվի է առնում նրա կատարած արարքի հանրության համար վտանգավորության աստիճանը և բնույթը, ինչպես նաև հանցավորի անձը:
Որպես ամբաստանյալի անձը դրականորեն բնութագրող, պատասխանատվությունը և պատիժը մեղմացնող հանգամանքներ դատարանը հաշվի է առնում այն, որ նա հանցանքն ընդունել և զղջում է կատարածի համար, նախկինում դատված չի եղել, երիտասարդ է, բնութագրվում է դրական, հայրը մասնակցել է ՀՀ սահմանների պաշտպանության մարտական գործողություններին և մահացել է ծառայողական պարտականությունները կատարելիս, մայրը հիվանդ է և նրանց ընտանիքը գտնվում է սոցիալապես անապահով վիճակում:
Ամբաստանյալի պատասխանատվությունը և պատիժը ծանրացնող հանգամանքներ առկա չեն:
Կատարած արարքի համար ամբաստանյալ Նարեկ Վռամի Մնացականյանը ենթակա է քրեական պատասխանատվության և պատժի:
Հաշվի առնելով Նարեկ Մնացականյանի կատարած արարքի հանրության համար վտանգավորության աստիճանը և բնույթը, նրա անձը, ինչպես նաև այն, որ ՀՀ քրեական օրենսգրքի 364 հոդվածի 1-ին մասի սանկցիայով նախատեսված է պատիժ նաև կալանքի ձևով, դատարանը գտնում է, որ ամբաստանյալ Նարեկ Վռամի Մնացականյանի նկատմամբ ՀՀ քրեական օրենսգրքի 364 հոդվածի 1-ին մասով նախատեսված հանցանք կատարելու համար պատիժ պետք է նշանակել կալանքի ձևով, որը նա պետք է կրի, իսկ նրա նկատմամբ կիրառված խափանման միջոցը պետք է թողնել անփոփոխ, մինչև դատավճռի օրինական ուժի մեջ մտնելը:
Դատարանը գտնում է, որ դատավճիռն օրինական ուժի մեջ մտնելուց հետո ՀՀ ՊՆ քննչական ծառայության չորրորդ կայազորային քննչական բաժնի քննիչի 23.01.2013թ.-ի որոշմամբ այլ ապացույց ճանաչված և քրեական գործին կցված հեռախոսագրերը և հրամանի քաղվածքը պետք է պահել քրեական գործի հետ միասին:

Ելնելով վերոգրյալից և ղեկավարվելով ՀՀ քրեական դատավարության օրենսգրքի 357-360, 3753 և 3754 հոդվածներով, դատարանը

Վ Ճ Ռ Ե Ց

Նարեկ Վռամի Մնացականյանին մեղավոր ճանաչել ՀՀ քրեական օրենսգրքի 364 հոդվածի 1-ին մասով նախատեսված հանցանք կատարելու մեջ և նրան դատապարտել կալանքի մեկ (1) ամիս ժամկետով:
Պատժի սկիզբը հաշվել Նարեկ Վռամի Մնացականյանին արգելանքի վերցնելու օրվանից:
Պատիժը պետք է կրի կայազորային կարգապահական մեկուսարանում:
Նարեկ Վռամի Մնացականյանի նկատմամբ որպես խափանման միջոց ընտրված զորամասի հրամանատարության հսկողությանը հանձնելը թողնել անփոփոխ, մինչև դատավճռի օրինական ուժի մեջ մտնելը:
Դատավճիռն օրինական ուժի մեջ մտնելուց հետո այլ ապացույց ճանաչված և քրեական գործին կցված հեռախոսագրերը և հրամանի քաղվածքը պահել քրեական գործի հետ միասին:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակվելու օրվանից հետո մեկամսյա ժամկետում:
Դատավճիռը չի կարող բողոքարկվել ՀՀ քրեական դատավարության օրենսգրքի 395 հոդվածի 1-ին կետով նախատեսված հիմքով:

Դատավոր` ստորագրություն
Բնագրի հետ ճիշտ է
Դատավոր Լ. Ավետիսյան