ԵԱՔԴ/0003/01/13

Դ Ա Տ Ա Վ Ճ Ի Ռ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանը`

նախագահող դատավոր Լ. Ավետիսյան
քարտուղարությամբ` Ն. Ղազարյանի
մասնակցությամբ
մեղադրող` Ա. Քալաշյանի
պաշտպան` Ա. Քալաշյանի


2013 թվականի փետրվարի 11-ին, Երևան քաղաքում, դռնբաց դատական նիստում, դատական քննության արագացված կարգով քննեց քրեական գործն ըստ մեղադրանքի Վահան Ամիրի Ենգիբարյանի, ծնված 1970 թվականի դեկտեմբերի 4-ին, Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ֆիզիկապես վատառողջ, ամուրի, խնամքին մեկ անձ, դատվածություն չունեցող, չի աշխատել, հաշվառված և բնակվել է ք.Երևան, Զ.Քանաքեռցու փողոց 129 շենք թիվ 57 բնակարան հասցեում, մեղադրվում է ՀՀ քրեական օրենսգրքի 268 հոդվածի 2-րդ մասի 2-րդ կետով և ՀՀ քրեական օրենսգրքի 273 հոդվածի 1-ին մասով, կալանքի տակ է 2012 թվականի օգոստոսի 1-ից,

Պ Ա Ր Զ Ե Ց

1.Գործի դատավարական նախապատմությունը.
2012 թվականի օգոստոսի 1-ին ՀՀ ոստիկանության ՔԳՎ Երևան քաղաքի քննչական վարչության Քանաքեռ-Զեյթուն քննչական բաժնում թիվ 09124910 քրեական գործի նյութերով, Վահան Ամիրի Ենգիբարյանի կողմից, առանց իրացնելու նպատակի ապօրինի, խոշոր չափերի հասնող թմրամիջոց պահելու, ինչպես նաև մշակումն արգելված թմրամիջոց պարունակող առանձնապես խոշոր չափերի հասնող, բույսեր ապօրինի ցանելու և աճեցնելու փաստի առթիվ ՀՀ քրեական օրենսգրքի 268 հոդվածի 2-րդ մասի 2-րդ կետով և ՀՀ քրեական օրենսգրքի 273 հոդվածի 2-րդ մասի 3-րդ կետով նախատեսված հանցագործության հատկանիշներով հարուցվել է նոր քրեական գործ, որին շնորհվել է թիվ 09108312 համարը:
2012 թվականի օգոստոսի 1-ին Վահան Ամիրի Ենգիբարյանը ձերբակալվել է:
Նախաքննության մարմնի 2012 թվականի օգոստոսի 3-ի որոշմամբ Վահան Ամիրի Ենգիբարյանը ներգրավվել է որպես մեղադրյալ ՀՀ քրեական օրենսգրքի 268 հոդվածի 2-րդ մասի 2-րդ կետով և ՀՀ քրեական օրենսգրքի 273 հոդվածի 2-րդ մասի 3-րդ կետով: Դատարանի որոշմամբ նրա նկատմամբ որպես խափանման միջոց է ընտրվել կալանավորումը:
Նախաքննության մարմնի 2012 թվականի դեկտեմբերի 27-ի որոշմամբ Վահան Ամիրի Ենգիբարյանին առաջադրված մեղադրանքը փոփոխվել և նրան նոր մեղադրանք է առաջադրվել ՀՀ քրեական օրենսգրքի 268 հոդվածի 2-րդ մասի 2-րդ կետով և ՀՀ քրեական օրենսգրքի 273 հոդվածի 1-ին մասով:
2012 թվականի դեկտեմբերի 28-ին թիվ 09108312 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
2.Գործի փաստական հանգամանքները.
Նախնական քննության մարմինն ամբաստանյալ Վահան Ամիրի Ենգիբարյանին ՀՀ քրեական օրենսգրքի 268 հոդվածի 2-րդ մասի 2-րդ կետով և ՀՀ քրեական օրենսգրքի 273 հոդվածի 1-ին մասով մեղադրանք է առաջադրել այն արարքների կատարման համար, որ նա իր` Երևան քաղաքի Զ.Քանաքեռցու փողոցի թիվ 129 շենքի դիմաց` Քանաքեռի երկաթգծերի մոտ գտնվող հողատարածքում 2012 թվականի մայիս ամսին ապօրինի ցանել և աճեցրել է մշակումն արգելված թմրանյութեր պարունակող բույսեր` այն է հարավային կրասնոդարյան, հարավային չուական, հարավային արխոնյան սորտերից որևէ մեկի շարքին դասվող խոշոր չափերի` 8100 գրամ ընդհանուր քաշով թվով 68 մշակովի կանեփ, որոնք 2012 թվականի օգոստոսի 01-ին կատարված խուզարկություններով հայտնաբերվել և առգրավվել են վերը նշված հողատարածքից և Վ.Ենգիբարյանի Երևան քաղաքի Զ.Քանաքեռցու փողոցի 129 շենքի թիվ 57 բնակարանից:
Վ.Ենգիբարյանը 2012 թվականի հուլիսի վերջերին, իր կողմից աճեցրած կանեփ տեսակի բույսերի տերևները պոկելով, դրանք չորացնելու և մանրացնելու եղանակով, առանց իրացնելու նպատակի` իր օգտագործման համար, ապօրինի պատրաստել և իր` Երևան քաղաքի Զ.Քանաքեռցու փողոցի թիվ 129 շենքի թիվ 57 բնակարանում պահել է խոշոր չափերի 163,8 գրամ հաստատուն քաշով չորացված մարիխուանա տեսակի թմրամիջոց, որը 2012 թվականի օգոստոսի 01-ին հայտնաբերվել և առգարվվել է նրա բնակարանում և հողատարածքում գտնվող երկաթյա տնակում կատարված խուզարկությամբ:
3. Արագացված դատական քննություն.
Մինչև դատաքննությունն սկսելն ամբաստանյալ Վահան Ամիրի Ենգիբարյանը միջնորդեց դատական քննությունն անցկացնել արագացված կարգով և հայտարարեց, որ առաջադրված մեղադրանքն իրեն պարզ է, համաձայն է իրեն առաջադրված մեղադրանքին, գիտակցում է արագացված կարգով դատական քննություն անցկացնելու բնույթն ու հետևանքները, միջնորդությունը ներկայացրել է կամավոր` պաշտպանի հետ խորհրդակցելուց հետո: Միջնորդությունը հաստատեց նաև ամբաստանյալի պաշտպան Ավետիս Քալաշյանը:
Մեղադրող Ա.Քալաշյանը մեղադրական եզրակացությունը հաստատելիս դատական քննության արագացված կարգ կիրառելուն առարկել է, սակայն դատարանում փոխելով դիրքորոշումը, հայտարարեց, որ դատական քննության արագացված կարգ կիրառելուն չի առարկում:
Դատարանը համոզվելով, որ առկա են ՀՀ քրեական դատավարության օրենսգրքի 3751 և 3752 հոդվածներով նախատեսված պայմանները, որոշում է կայացրել դատական քննության արագացված կարգ կիրառելու մասին:
4.Դատարանի իրավական վերլուծությունները.
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Վահան Ամիրի Ենգիբարյանին առաջադրված մեղադրանքը ՀՀ քրեական օրենսգրքի 268 հոդվածի 2-րդ մասի 2-րդ կետով և ՀՀ քրեական օրենսգրքի 273 հոդվածի 1-ին մասով հիմնավորված է: Նրա կողմից կատարված արարքները համապատասխանում են ՀՀ քրեական օրենսգրքի 268 հոդվածի 2-րդ մասի 2-րդ կետի և ՀՀ քրեական օրենսգրքի 273 հոդվածի 1-ին մասի հատկանիշներին և արարքների որակումը ճիշտ է:
Ամբաստանյալ Վահան Ենգիբարյանի նկատմամբ պատիժ նշանակելիս, դատարանը հաշվի է առնում նրա կատարած արարքների հանրության համար վտանգավորության աստիճանը, ինչպես նաև հանցավորի անձը:
Որպես ամբաստանյալ Վահան Ենգիբարյանի անձը բնութագրող, պատասխանատվությունը և պատիժը մեղմացնող հանգամանքներ դատարանը հաշվի է առնում այն, որ նա հանցանքն ընդունել և զղջում է կատարածի համար, նրա խնամքին է գտնվում կույր մայրը, բնութագրվում է դրական, վատառողջ է` հանդիսանում է ՙԱնձի խառը խանգարում` բարդացած թմրանյութերի գործածումով՚ ախտորոշմամբ փսիխոպաթ անձնավորություն:
Ամբաստանյալի պատասխանատվությունը և պատիժը ծանրացնող հանգամանքներ առկա չեն:
Կատարած արարքների համար ամբաստանյալ Վահան Ամիրի Ենգիբարյանը ենթակա է քրեական պատասխանատվության և պատժի:
Հաշվի առնելով Վահան Ենգիբարյանի կատարած արարքների հանրության համար վտանգավորության աստիճանը և բնույթը, նրա անձը, նրան բնութագրող տվյալները, պատասխանատվությունը և պատիժը մեղմացնող հանգամանքները, պատասխանատվությունը և պատիժը ծանրացնող հանգամանքների բացակայությունը, ինչպես նաև այն, որ ՀՀ քրեական օրենսգրքի 268 հոդվածի 2-րդ մասի սանկցիայով նախատեսված է պատիժ միայն ազատազրկման ձևով, իսկ ՀՀ քրեական օրենսգրքի 273 հոդվածի 1-ին մասի սանկցիայով նախատեսված է պատիժ նաև ազատազրկման ձևով, դատարանը գտնում է, որ պատժի նպատակներին հասնելու համար ամբաստանյալ Վահան Ամիրի Ենգիբարյանի նկատմամբ ՀՀ քրեական օրենսգրքի 268 հոդվածի 2-րդ մասի 2-րդ կետով և ՀՀ քրեական օրենսգրքի 273 հոդվածի 1-ին մասով նախատեսված հանցանքներ կատարելու համար պատիժ պետք է նշանակել ազատազրկման ձևով, որը նա պետք է կրի:
Նկատի ունենալով, որ ամբաստանյալ Վահան Ենգիբարյանը կատարել է մեկից ավելի հանցագործություն, դատարանը գտնում է, որ նրա նկատմամբ պատիժ պետք է նշանակվի ՀՀ քրեական օրենսգրքի 66 հոդվածով նախատեսված կարգով` հանցանքների համակցությամբ, ազատազրկման ձևով նշանակված պատիժները մասնակիորեն գումարելու սկզբունքով։
Անդրադառնալով ամբաստանյալի նկատմամբ ընտրված խափանման միջոցի հարցին, դատարանը գտնում է, որ ընտրված խափանման միջոցը` կալանավորումը, պետք է թողնել անփոփոխ, մինչև դատավճռի օրինական ուժի մեջ մտնելը։
Անդրադառնալով իրեղեն ապացույցների տնօրինման հարցին, դատարանը գտնում է, որ դատավճիռն օրինական ուժի մեջ մտնելուց հետո, ՀՀ ոստիկանության ՔԳՎ Երևան քաղաքի քննչական վարչության Քանաքեռ-Զեյթունի քննչական բաժնի քննիչի 05.09.2012թ.-ի որոշումով իրեղեն ապացույց ճանաչված և քննչական բաժնի իրեղեն ապացույցների պահման սենյակում գտնվող, թիվ 09108312 քրեական գործով դեպքի խուզարկության ժամանակ հայտնաբերված առանձնապես խոշոր չափի` 14434,1 գրամ հաստատուն քաշով մշակումն արգելված կանեփի թփերը, խոշոր չափի` 163,8 գրամ հաստատուն քաշով չարացված մարիխուանա տեսակի թմրամիջոցը և երկու պլաստմասե շշերը պետք է ոչնչացնել:
Դատարանը գտնում է, որ դատական ծախսերն ամբաստանյալ Վահան Ենգիբարյանից ենթակա չեն բռնագանձման, նկատի ունենալով, որ ՀՀ քրեական դատավարության օրենսգրքի 168 հոդվածի 1-ին մասի 1-ին կետով նախատեսված դատական ծախս սույն քրեական գործով չկա, իսկ 2-8-րդ կետերով նախատեսված դատական ծախսերն արագացված դատական քննության կարգ կիրառելու դեպքում, համաձայն նույն օրենսգրքի 3753 հոդվածի 8-րդ մասի, ամբաստանյալից բռնագանձման ենթակա չեն:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 357-360, 3753 և 3754 հոդվածներով, դատարանը

Վ Ճ Ռ Ե Ց

Վահան Ամիրի Ենգիբարյանին մեղավոր ճանաչել ՀՀ քրեական օրենսգրքի 268 հոդվածի 2-րդ մասի 2-րդ կետով և ՀՀ քրեական օրենսգրքի 273 հոդվածի 1-ին մասով նախատեսված հանցանքներ կատարելու մեջ:
ՀՀ քրեական օրենսգրքի 268 հոդվածի 2-րդ մասի 2-րդ կետով Վահան Ամիրի Ենգիբարյանին դատապարտել ազատազրկման տաս (10) ամիս ժամկետով: ՀՀ քրեական օրենսգրքի 273 հոդվածի 1-ին մասով դատապարտել ազատազրկման վեց (6) ամիս ժամկետով:
ՀՀ քրեական օրենսգրքի 66 հոդվածի հիման վրա` հանցանքների համակցությամբ պատիժները մասնակիորեն գումարելու միջոցով Վահան Ամիրի Ենգիբարյանի նկատմամբ վերջնական պատիժ նշանակել ազատազրկում մեկ (1) տարի ժամկետով:
Վահան Ամիրի Ենգիբարյանի նկատմամբ նշանակված պատժի սկիզբը հաշվել 2012 թվականի օգոստոսի 1-ից:
Պատիժը պետք է կրի ՀՀ ԱՆ համապատասխան քրեակատարողական հիմնարկում:
Վահան Ամիրի Ենգիբարյանի նկատմամբ որպես խափանման միջոց կիրառված կալանավորումը թողնել անփոփոխ, մինչև դատավճռի օրինական ուժի մեջ մտնելը:
Դատավճիռն օրինական ուժի մեջ մտնելուց հետո, իրեղեն ապացույց հանդիսացող և Քանաքեռ-Զեյթունի քննչական բաժնի իրեղեն ապացույցների պահման սենյակում գտնվող, առանձնապես խոշոր չափի` 14434,1 գրամ հաստատուն քաշով մշակումն արգելված կանեփի թփերը, խոշոր չափի` 163,8 գրամ հաստատուն քաշով չորացված մարիխուանա տեսակի թմրամիջոցը և երկու պլաստմասե շշերը ոչնչացնել:
Դատական ծախսերի հարցը համարել լուծված:
Դատավճիռը կարող է բողոքարկվել ՀՀ վերաքննիչ քրեական դատարան հրապարակվելու օրվանից հետո մեկամսյա ժամկետում:
Դատավճիռը չի կարող բողոքարկվել ՀՀ քրեական դատավարության օրենսգրքի 395 հոդվածի 1-ին կետով նախատեսված հիմքով:

Դատավոր` ստորագրություն
Բնագրի հետ ճիշտ է`
Դատավոր Լ. Ավետիսյան