ԵԱՔԴ/0001/01/13

Դ Ա Տ Ա Վ Ճ Ի Ռ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանը

նախագահող դատավոր` Լ. Ավետիսյան
քարտուղարությամբ` Ե. Կարապետյանի, Ն.Ղազարյանի
մասնակցությամբ`
մեղադրողներ` Ա.Քալաշյանի, Հ.Մարտիրոսյանի, Կ.Բարսեղյանի
պաշտպան` Լ.Օհանյանի
տուժողի ներկայացուցիչ` Բ.Կարապետյանի

2013 թվականի օգոստոսի 30-ին, Երևան քաղաքում, դռնբաց դատական նիստում, քննեց քրեական գործն ըստ մեղադրանքի
1. Արմեն Ռաֆիկի Պետրոսյանի, ծնված 1965 թվականի հունվարի 27-ին, Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ֆիզիկապես վատառողջ, ամուսնացած, խնամքին չորս անձ, նախկինում դատված, դատվածությունը մարված, չի աշխատել, հաշվառված և բնակվել է Երևան քաղաքի Հ.Էմինի փողոցի 2/2 շենքի թիվ 1 բնակարան հասցեում, մեղադրվում է ՀՀ քրեական օրենսգրքի 177 հոդվածի 3-րդ մասի 1-ին կետով, կալանքի տակ է 2012թ. սեպտեմբերի 14-ից:
2. Կարեն Հովսեփի Համբարձումյանի, ծնված 1982 թվականի մարտի 06-ին, Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուրի, խնամքին երեք անձ, նախկինում չդատված, չի աշխատել, հաշվառված և բնակվել է Երևան քաղաքի Հ.Հակոբյան փողոցի 2-րդ շենքի թիվ 28 բնակարան հասցեում, մեղադրվում է ՀՀ քրեական օրենսգրքի 177 հոդվածի 3-րդ մասի 1-ին կետով, կալանքի տակ է 2012թ. սեպտեմբերի 14-ից:

ՊԱՐԶԵՑ

1.Գործի դատավարական նախապատմությունը.
2012 թվականի օգոստոսի 30-ին ՀՀ ոստիկանության ՔԳՎ Երևան քաղաքի քննչական վարչության Արաբկիրի քննչական բաժնում ՀՀ քրեական օրենսգրքի 177 հոդվածի 3-րդ մասի 1-ին կետով նախատեսված հանցագործության հատկանիշներով հարուցվել է թիվ 14124012 քրեական գործը:
2012 թվականի սեպտեմբերի 14-ին Կարեն Հովսեփի Համբարձումյանը և Արմեն Ռաֆիկի Պետրոսյանը ձերբակալվել են:
Նախաքննության մարմնի 2012 թվականի սեպտեմբերի 16-ի որոշմամբ Արմեն Ռաֆիկի Պետրոսյանը ներգրավվել է որպես մեղադրյալ և նրան մեղադրանք է առաջադրվել ՀՀ քրեական օրենսգրքի 177 հոդվածի 3-րդ մասի 1-ին կետով: Դատարանի որոշմամբ նրա նկատմամբ որպես խափանման միջոց է ընտրվել կալանավորումը:
Նախաքննության մարմնի 2012 թվականի սեպտեմբերի 16-ի որոշմամբ Կարեն Հովսեփի Համբարձումյանը ներգրավվել է որպես մեղադրյալ և նրան մեղադրանք է առաջադրվել ՀՀ քրեական օրենսգրքի 177 հոդվածի 3-րդ մասի 1-ին կետով: Դատարանի որոշմամբ նրա նկատմամբ որպես խափանման միջոց է ընտրվել կալանավորումը:
2012 թվականի դեկտեմբերի 24-ի որոշմամբ Արմեն Ռաֆիկի Պետրոսյանին և Կարեն Հովսեփի Համբարձումյանին առաջադրված մեղադրանքը փոփոխվել և լրացվել է համապատասխան հմ. 28521210 ապրանքագիտական փորձաքննության եզրակացության տվյալների և վերջիններիս կրկին մեղադրանք է առաջադրվել ՀՀ քրեական օրենսգրքի 177 հոդվածի 3-րդ մասի 1-ին կետով:
2012 թվականի դեկտեմբերի 25-ի որոշմամբ թիվ 14124012 քրեական գործից ոմն Կարենի մասը` ՀՀ քրեական օրենսգրքի 177 հոդվածի 3-րդ մասի 1-ին կետի հատկանիշներով, անջատվել է առանձին վարույթում, որին շնորհվել է թիվ 14147312 համարը:
2012 թվականի դեկտեմբերի 28-ին թիվ 14124012 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան:
2.Գործի փաստական հանգամանքները.
Նախնական քննության մարմինն ամբաստանյալ Արմեն Ռաֆիկի Պետրոսյանին ՀՀ քրեական օրենսգրքի 177 հոդվածի 3-րդ մասի 1-ին կետով մեղադրանք է առաջադրել այն արարքի կատարման համար, որ նա ուրիշի գույքի գաղտնի հափշտակություն կատարելու դիտավորությամբ Կարեն Համբարձումյանի և գործով ինքնությունը չպարզված ոմն Կարենի հետ նախնական համաձայնության գալով, 2012 թվականի օգոստոսի 29-ի լույս օգոստոսի 30-ի գիշերը, ժամը 0240-ից 0640-ն ընկած ժամանակահատվածում, գնացել է Երևան քաղաքի Հ.Հակոբյան փողոցի թիվ 3 հասցեում գտնվող ՙԿահույքի աշխարհ՚ ՍՊ ընկերության վաճառքի սրահի մոտ, որտեղ, ըստ նախապես կատարված դերաբաշխման, Կ.Համբարձումյանը խանութի շենքի անկյունային հատվածից հսկել է Ա.Պետրոսյանի և ոմն Կարենի գործողությունների անվտանգությունը, որպեսզի հնարավոր խոչընդոտի դեպքում ահաձայնի, իսկ վերջիններս խանութի պատուհանի ապակին կոտրելու միջոցով ապօրինի մուտք են գործել շինություն ու հափշտակել առանձնապես խոշոր չափի արժողության ՙԿլեոպատրա՚ տեսակի մեկ մահճակալ ու հարդասեղան և ՙՌոյալ՚ տեսակի փայտե շրջանակով մեկ հայելի, որի հետևանքով ՙԿահույքի աշխարհ՚ ՍՊ ընկերությանը պատճառվել է 5.555.000 ՀՀ դրամի գույքային վնաս:
Նախնական քննության մարմինն ամբաստանյալ Կարեն Հովսեփի Համբարձումյանին ՀՀ քրեական օրենսգրքի 177 հոդվածի 3-րդ մասի 1-ին կետով մեղադրանք է առաջադրել այն արարքի կատարման համար, որ նա ուրիշի գույքի գաղտնի հափշտակություն կատարելու դիտավորությամբ Արմեն Պետրոսյանի և գործով ինքնությունը չպարզված ոմն Կարենի հետ նախնական համաձայնության գալով, 2012 թվականի օգոստոսի 29-ի լույս օգոստոսի 30-ի գիշերը, ժամը 0240-ից 0640-ն ընկած ժամանակահատվածում, գնացել է Երևան քաղաքի Հ.Հակոբյան փողոցի թիվ 3 հասցեում գտնվող ՙԿահույքի աշխարհ՚ ՍՊ ընկերության վաճառքի սրահի մոտ, որտեղ, ըստ նախապես կատարված դերաբաշխման, խանութի շենքի անկյունային հատվածից հսկել է Ա.Պետրոսյանի և ոմն Կարենի գործողությունների անվտանգությունը, որպեսզի հնարավոր խոչընդոտի դեպքում ահաձայնի, իսկ վերջիններս խանութի պատուհանի ապակին կոտրելու միջոցով ապօրինի մուտք են գործել շինություն ու հափշտակել առանձնապես խոշոր չափի արժողության ՙԿլեոպատրա՚ տեսակի մեկ մահճակալ ու հարդասեղան և ՙՌոյալ՚ տեսակի փայտե շրջանակով մեկ հայելի, որի հետևանքով ՙԿահույքի աշխարհ՚ ՍՊ ընկերությանը պատճառվել է 5.555.000 ՀՀ դրամի գույքային վնաս:
3.Ապացույցների հետազոտում.
Առաջադրված մեղադրանքում ամբաստանյալ Կարեն Համբարձումյանն իրեն մեղավոր չճանաչեց և հրաժարվեց ցուցմունք տալ, պնդեց նախաքննության ընթացքում տված իր ցուցմունքները:
Նախաքննության ժամանակ Կարեն Համբարձումյանը ցուցմունք է տվել այն մասին, որ 2012 թվականի օգոստոսի 29-ի, լույս 30-ի գիշերը, ՙՄերգելյան՚-ի անվան ինստիտուտի առջևի հատվածում պատահական հանդիպել է ընկերներին` Արմեն Պետրոսյանին և Կարենին, ում ազգանունը չգիտի: Ինչպես ինքը, այնպես էլ նրանք հարբած են եղել: Ինքն ու Կարենը որոշել են Ա.Պետրոսյանին ուղեկցել տուն, որից հետո իրենք գնալ տուն: Մոտավորապես ժամը 01-ի սահմաններում քայլելով հասել են Հ.Հակոբյան փողոցի թիվ 3 հասցեում տեղակայված ՙԿահույքի աշխարհ՚ խանութի մոտ: Ա.Պետրոսյանն իրեն և Կարենին առաջարկել է մտնել խանութ և գողություն կատարել` չկոնկրետացնելով, թե ինչ: Որոշել են ներս մտնել խանութի կողային` դեպի բակ ընկած հատվածի պատուհանով: Երեքով բաժանել են յուրաքանչյուրի կատարելիք գործողությունները, համաձայն որի Ա.Պետրոսյանը պետք է կոտրեր պատուհանի ապակին, ինքը պետք է կանգներ փողոցի տվյալ հատվածը տանող անկյունում, որպեսզի վտանգի դեպքում տեղեկացնի, իսկ Կարենը և Արմենը ապակին կոտրելուց հետո պետք է մտնեին խանութ և դուրս բերեին գողացվելիք ապրանքները: Իրենք նախապես որոշած չեն եղել, թե գողոնը ինչ պետք է անեն, սակայն ենթադրվել է, որ հնարավոր իրացումից հետո ստացվելիք գումարը հավասար պետք է բաժանվեր երեքի միջև: Համաձայն դերաբախշման, ինքը մնացել է կանգնած իր տեղում, իսկ ընկերները առաջացել են դեպի այդ պատուհանը: Չի նկատել, թե ինչով, սակայն որքան հասկացել է Արմենը կոտրել է ապակին և նրանք մտել են ներս: Այնտեղից նրանք դուրս են բերել մեկ հատ մահճակալ, մեկ հարդասեղան և մեկ հայելի` փայտե շրջանակով: Մահճակալը քանդված վիճակում է եղել: Այդ ժամանակ նկատել է, որ վնասվել է Արմենի աջ թևը` դաստակի հատվածում: Վերքից արյուն է եկել: Նա թաշկինակով փաթաթել է վնասվածքը և իրենք երեքով ապրանքները տեղափոխել են մոտակա բարձրահարկ շենքի բակ և տեղավորել այնտեղ գտնվող մի շինության պատի տակ: Այնուհետև, քանի որ Արմենի վերքը ուժեղ արնահոսել է, նույն վայրից կանգնեցրել են պատահական տաքսի ավտոմեքենա ու գնացել Պռոշյան փողոցի վրա գտնվող թիվ 3 հիվանդանոց: Մեքենան բաց են թողել և երեքով մտել հիվանդանոց: Արմենը հերթապահ բժշկին ցույց է տվել վնասվածքը, որից հետո նրան ուղեկցել են վիրահատարան: Տեղյակ չէ, թե վնասվածքի ստացման պատճառի մասին Արմենն ինչ է ասել բժշկին, սակայն ենթադրել է, որ, բնականաբար, հազիվ թե ճշմարտությունն ասեր: Արմենի թևը վիրակապելուց հետո, իրենք երեքով դուրս են եկել հիվանդանոցից, փողոցից կրկին կանգնեցրել են պատահական անցնող տաքսի ավտոմեքենա և բարձրացել դեպի իրենց բակ: Արդեն եղել է ուշ ժամ և ընկերներն իրեն իջեցրել են բնակարանի մոտ և տաքսիով գնացել դեպի այն վայրը, որտեղ նախապես տեղափոխված են եղել գողացված իրերը: Այդ օրը իրենք չեն պայմանավորվել, թե գողոնը կոնկրետ ինչ պետք է անեն: Բնականաբար տաքսու մեջ այդ բովանդակության ոչ մի խոսակցություն տեղի չի ունեցել: Ստույգ տեղեկություն չունի գողոնի հետագա ճակատագրի վերաբերյալ:
Առաջադրված մեղադրանքում ամբաստանյալ Արմեն Պետրոսյանն իրեն մեղավոր չճանաչեց և հրաժարվեց ցուցմունք տալ, պնդեց նախաքննության ընթացքում տված իր ցուցմունքները:
Նախաքննության ժամանակ Արմեն Պետրոսյանը ցուցմունք է տվել այն մասին, որ 2012 թվականի օգոստոսի 29-ին իրենց տանը նշել են որդու ծննդյան օրվա արարողությունը: Կեսգիշերի սահմաններում դուրս է եկել տանից և գնացել դեպի Հ.Հակոբյան փողոցի թիվ 3 հասցեում գտնվող ՙԿահույքի աշխարհ՚ ընկերության վաճառասրահի մոտ: Այնտեղ բռունցքով հարվածել և ջարդել է խանութի պատուհանի ապակին, ինչից վնասել է աջ ձեռքը: Սկսվել է արյունահոսություն: Ոտքով գնացել է դեպի հարևանությամբ գտնվող Ա.Խաչատրյան փողոցի վրա տեղակայված բենզալցակայանի մոտ: Այնտեղ հանդիպել է թաղամասի բնակիչներից Կարենին, ում մականունը ՙԾգլ՚ է: Վերջինիս հետ պատահական տաքսի ավտոմեքենայով անմիջապես գնացել է թիվ 3 կլինիկական հիվանդանոց: Այնտեղ իրեն ցույց են տվել անհրաժեշտ բուժօգնություն և կար դրել դաստակի պատռված վերքին: Ինքը հիվանդանոցում հայտնել է սխալ, հորինված տեղեկություններ իր ինքնության և բնակության վայրի վերաբերյալ: Հիվանդանոցից դուրս գալով ուրիշ տաքսի ավտոմեքենայով Կարենի հետ շարժվել են դեպի իրենց թաղամաս: Կարենին իջեցրել է տուն, այնուհետև կրկին գնացել ՙԿահույքի աշխարհ՚ ընկերության վաճառասրահի մոտ, կոտրած պատուհանից մտել է ներս և խանութից գողացել մեկ հատ մահճակալ ու հարդասեղան և մեկ հայելի` փայտե շրջանակով: Նշված բոլոր իրերը տեղափոխել է հարևանությամբ տեղակայված մի շինության մոտ ու պատի տակ դասավորելով թաքցրել է դրանք: Հաջորդ օրը, ժամը 1200-ի սահմաններում, գնացել է ՙԳնունու՚ շուկա, հանդիպել է շուկայում կահույքի գործ անող անձանց և նրանց առաջարկել գնել նշված փայտե իրերը: Դրանից հետո գողոնը վաճառել է վերջիններիս` 80.000 ՀՀ դրամով:
Ամբաստանյալներին մեղսագրված հանցանքները հիմնավորվել են նաև հետևյալ ապացույցներով.
Տուժողի ներկայացուցիչ Բաբկեն Աշոտի Կարապետյանի ցուցմունքով այն մասին, որ աշխատում է ՙԿահույքի աշխարհ՚ ՍՊ ընկերությունում որպես մենեջեր: 2012 թվականի օգոստոսի 30-ին, առավոտյան ժամը 1000-ի սահմաններում գնացել է աշխատավայր և տեղեկացել նույն գիշերը Հ.Հակոբյան 3 հասցեում գտնվող խանութ-սրահից կատարված գողության մասին: Վաճառասրահի կողային պատուհանի ապակին կոտրելու միջոցով հափշտակված է եղել ՙԿլեոպատրա՚ տեսակի մեկ մահճակալ ու հարդասեղան և ՙՌոյալ՚ տեսակի փայտե շրջանակով մեկ հայելի: Կահույքը ստացվել է Ռումինիայից: ՙԿլեոպատրա՚ կահույքի մեջ մտնում է 5 կտոր` պահարան, մահճակալ, 2 տումբա, հարդասեղան: Ընկերությանը պատճառվել է ընդհանուր 7.637.000 ՀՀ դրամի գույքային վնաս: Պատճառված վնասը բնեղենով վերականգնվել է: Ամբաստանյալներից որևէ նյութական պահանջ չունի:
Վկա Ժիրայր Մարտիրոսի Անդրյանի ցուցմունքով այն մասին, որ աշխատում է ՙԿահույքի աշխարհ՚ ՍՊ ընկերությունում որպես պահակ: 2012 թվականի օգոստոսի 30-ի գիշերը, լինելով աշխատավայրում, ժամը 0200-ի սահմաններում շրջայց է կատարել խանութ-սրահի տարածքում, ապա գնացել է իր գիշերելու համար նախատեսված սենյակ /գտնվում է մուտքի դռնից դեպի ձախ/ որտեղ պառկել է քնելու: Առավոտյան, ժամը 0600-ի սահմաններում արթնացել է, դուրս է եկել կրկին շրջայցի և նկատել, որ խանութի դրսի ձախակողմյան հատվածում պատուհանի ապակին կոտրված է: Կասկածել է, որ գողություն է կատարվել: Սպասել է, որ մի փոքր լուսանա, այնուհետև զանգահարել է ընկերության աշխատակիցներից Հովհաննես Կոստանյանին և ղեկավարությանը ու հայտնել կատարվածի մասին: Աշխատակիցները եկել և պարզել են, որ գողացվել է մեկ մահճակալ և 2-3 կտոր այլ կահույք: Ոստիկանություն են զանգահարել:
Վկա Հովհաննես Հայկազի Կոստանյանի ցուցմունքով այն մասին, որ աշխատում է ՙԿահույքի աշխարհ՚ ՍՊ ընկերությունում որպես բանվոր: 2012 թվականի օգոստոսի 30-ին, ժամը 08-ի սահմաններում իրեն է զանգահարել ընկերության պահակը` Ժիրայրը և հայտնել, որ խանութի սրահի ապակին դրսի կողմից կոտրված է: Գնացել է խանութ և տեղեկացել, որ խանութից գողություն է կատարվել: Գողացված են եղել ՙԿլեոպատրա՚ տեսակի մեկ մահճակալ ու հարդասեղան և ՙՌոյալ՚ տեսակի փայտե շրջանակով մեկ հայելի:
Վկա Նունե Սամվելի Մանուկյանի ցուցմունքով այն մասին, որ, աշխատում է ՙԿահույքի աշխարհ՚ ՍՊ ընկերությունում որպես վաճառողուհի: 2012 թվականի օգոստոսի 30-ին, առավոտյան ժամը 1100-ի սահմաններում գնացել է աշխատանքի և տեղեկացել, որ գիշերը խանութից գողություն է կատարվել: Տեսել է, որ խանութի ապակին կոտրված է: Գողացված են եղել ՙԿլեոպատրա՚ տեսակի մեկ մահճակալ ու հարդասեղան և ՙՌոյալ՚ տեսակի փայտե շրջանակով մեկ հայելի:
Վկա Մովսես Յուրիի Հարությունյանի նախաքննության ընթացքում տված ցուցմունքով այն մասին, որ աշխատում է թիվ 3 կլինիկական հիվանդանոցում որպես բժիշկ: 2012 թվականի օգոստոսի 30-ին, գիշերը գտնվել է աշխատանքի վայրում: Ժամը մոտավորապես 0430-ի սահմաններում դաստակի վնասվածքով բուժօգնության է դիմել մոտ 40 տարեկան մի տղամարդ: Հայտնել է, որ վնասվածքը ստացել է տանը` ձեռքը անզգուշորեն սեղանին հարվածելուց: Ինքը նրան ցույց է տվել անհրաժեշտ բուժօգնություն և կրիմինալ դեպքերի հաշվառման մատյանում գրանցել է այդ անձի կողմից ներկայացված տվյալները: Բուժօգնության դիմած տղամարդուն ուղեկցել է համեմատաբար երիտասարդ տարիքով մի հոգի: Բուժսպասարկման ընթացքում վերջինս բուժօգնության դիմած անձի հետ շփվել է իրեն կասկածելի թվացող անուններով` (մասնավորապես, որքան հիշում է, ՙծմլ՚, ՙկճո՚ և այլն): Միաժամանակ կասկածելի է թվացել այն հանգամանքը, որ երբ բուժօգնության դիմած անձին հարցրել է անձնական տվյալների մասին, վերջինիս փոխարեն պատասխանել է ուղեկցողը: Դեպքից մոտավորապես 2 օր անց, ոստիկանների կողմից կրիմինալ դեպքերի հաշվառման մատյանը զննելուց և անհրաժեշտ ստուգողական գործողություններ կատարելուց հետո, ինքը տեղեկացել է, որ նման տվյալներով անձնավորություն գոյություն չունի և հասկացել է, որ բուժօգնության դիմած անձն իրեն ուղեկցող անձնավորության հետ միասին հայտնել են սխալ տվյալներ: Որպես բժիշկ ինքը հաստատապես նշել է, որ այդ անձնավորության ստացած մարմնական վնասվածքը իր բոլոր հատկանիշներով համապատասխանել է ապակուց ստացված պատռվածքին:
Վկա Գագիկ Սերգեյի Նավասարդյանի նախաքննության ընթացքում տված ցուցմունքով այն մասին, որ աշխատում է ՙՋասթ՚ տաքսի ծառայությունում որպես վարորդ: Իրեն է ամրակցված ՙՇկոդա Օկտավիա՚ մոդելի S 8658 պետհամարանիշի ավտոմեքենան: Օգոստոսի 30-ին, գիշերը ժամը 0415-ի սահմաններում, Ա.Խաչատրյան փողոցի թիվ 4 և թիվ 2 շենքերի մոտ իր մեքենան են նստել երեք ուղևորներ, որոնցից մեկը եղել է մոտ 40 տարեկան տղամարդ, ով նստել է դիմացի նստատեղին, իսկ երկուսը, համեմատաբար ավելի երիտասար` մոտ 30 տարեկան, որոնք նստել են հետևի նստատեղերին: Մութ լինելու պատճառով չի կարողացել դեմքերը նկատել, սակայն տեսել է, որ առջևի ուղևորի ձեռքից արյուն է գալիս, ինչի կապակցությամբ հետևի երիտասարդներից մեկը նրան ասել է, որ ձեռքը դրսում պահելով մեքենան արյունոտում է, իսկ վերջինս պատասխանել է, որ եթե ձեռքը ներս բերի, ապա արյունը մեքնայի մեջ կլցվի: Ուղևորվել են դեպի 3-րդ կլինիկական հիվանդանոց: ՈՒղևորները ճանապարհին իրար հետ չեն շփվել, անուններով չեն դիմել: Ավտոմեքենան կանգառել է հիվանդանոցի առջևի մասում, որից հետո առջևի ուղևորը երկրորդի հետ միասին մտել է հիվանդանոց, իսկ երրորդը վճարել է 1500 ՀՀ դրամ: Հիվանդանոցի բակում գտնվող ցայտաղբյուրից միացված հոսող ջրով մաքրել է դռան վրայի արյունը, որից հետո ինքը հեռացել է այնտեղից:
2012 թվականի օգոստոսի 30-ին կազմված դեպքի վայրի զննության արձանագրությամբ, որով հիմնավորվում է Երևան քաղաքի Հ.Հակոբյան փողոց 3 հասցեում գործող ՙԿահույքի աշխարհ՚ ՍՊ ընկերության վաճառասրահից գողություն կատարելու փաստը, հանցավորների կողմից տվյալ շինություն մուտք գործելու եղանակը և հանցագործության այլ հանգամանքներ:
ՙՋասթ՚ տաքսի ծառայությանը պատկանող, Գագիկ Նավասարդյանի կողմից վարվող ՙՇկոդա Օկտավիա՚ մոդելի S 8658 պետհամարանիշի ավտոմեքենան զննելու մասին արձանագրությամբ, որով տվյալ ավտոմեքենայից հայտնաբերվել և առգրավվել են արյան հետքեր:
Թիվ 3 կլինիկական հիվանդանոցի անվտանգության համար նախատեսված համակարգչից 2012 թվականի օգոստոսի 30-ի գիշերվա ժամի տեսաձայնագրությունը առգրավելու և գործով վկա, բժիշկ Մովսես Հարությունյանի մասնակցությամբ այն զննության ենթարկելու մասին 2012 թվականի սեպտեմբերի 7-ի արձանագրությամբ, համաձայն որի տեսաձայնագրությունում պատկերված, ձեռքի դաստակի հատվածում վիրակապի առկայությամբ անձնավորությունը հանդիսանում է տվյալ օրը իր կողմից բուժօգնություն ստացած անձը, ով ներկայացել է Կարեն Գրիգորյան կեղծ տվյալներով, իսկ նրա կողքին երևացող սև վերնաշապիկով անձը հանդիսանում է ձեռքը վնասած անձին ուղեկցողը:
Ա.Պետրոսյանի մասնակցությամբ կատարված քննչական փորձարարության արձանագրությամբ, որով հիմնավորվում են հանցագործության հանգամանքները:
Կ.Համբարձումյանի մասնակցությամբ կատարված քննչական փորձարարության մասին արձանագրությամբ, որով հիմնավորվում է Ա.Պետրոսյանի և Կ.Համբարձումյանի կողմից նախնական համաձայնությամբ ՙԿահույքի աշխարհ՚ ՍՊ ընկերության վաճառասրահից առանձնապես խոշոր չափի արժողության կահույք գողանալու հանգամանքը:
2012 թվականի սեպտեմբերի 17-ին Ա.Պետրոսյանի` Երևան քաղաքի Հ.Էմինի փողոցի 2/2 շենքի 1-ին բնակարանում խուզարկություն կատարելու մասին արձանագրությամբ, որով հայտնաբերվել է ՙԿահույքի աշխարհ՚ ՍՊ ընկերությունից գողացված ամբողջ կահույքը:
Դատակենսաբանական փորձաքննության ներկայացված արյան փորձանմուշների առկայությամբ և նույն փորձաքննության թիվ 300 եզրակացությամբ, համաձայն որի թիվ 24 կնիքով կնիքված ծրարում հայտնաբերված մեկ բամբակյա խծուծի և թիվ 56 կնիքով կնիքված ծրարում հայտնաբերված երկու մառլյայե խծուծների վրա տեղակայված կասկածելի հետքերում հաստատվել է արյան առկայություն, որը պատկանում է մարդու և առաջացել է ըստ արյան ABO իզոշճաբանական համակարգի A խումբ ունեցող որևէ անձից: Արմեն Պետրոսյանի արյան խումբը համընկնում է փորձաքննությամբ հաստատված արյան խմբին:
Դատաապրանքագիտական փորձաքննության հմ. 28521210 եզրակացությամբ, համաձայն որի 2012 թվականի օգոստոսի 30-ին Երևան քաղաքի Հ.Հակոբյան փողոց 3 հասցեում տեղակայված ՙԿահույքի աշխարհ՚ ՍՊ ընկերության վաճառասրահից հափշտակված կահույքի` ՙԿլեոպատրա՚ տեսակի մեկ մահճակալի ու հարդասեղանի և ՙՌոյալ՚ տեսակի փայտե շրջանակով մեկ հայելու ընդհանուր շուկայական միջին արժեքը դեպքի օրվա դրությամբ կազմել է 5.555.000 ՀՀ դրամ:
Դատարանի որոշմամբ նշանակված կրկնակի ապրանքագիտական փորձաքննության հմ. 13-0088Դ եզրակացությամբ, համաձայն որի, փորձաքննության տրամադրված ննջասենյակի կահույքի միջին շուկայական արժեքը դրամային արտահայտությամբ` 2012թ.-ի օգոստոսի 30-ի դրությամբ կարող է կազմել. 1. ՙCLEOPATRA LUX՚ հավաքածու /խանութ-սրահում առաջարկվող լրակազմով/- 14 113 700 /տասնչորս միլիոն հարյուր տասներեք հազար յոթ հարյուր/ ՀՀ դրամ: 1.1 ՙCLEOPATRA LUX՚ մահճակալ /1800/- 3 708 000 /երեք միլիոն յոթ հարյուր հազար/ ՀՀ դրամ: 2. ՙCLEOPATRA CLASSIC՚ հավաքածու /խանութ-սրահում առաջարկվող լրակազմով/- 5 551 000 /հինգ միլիոն հինգ հարյուր հիսունմեկ հազար/ ՀՀ դրամ: 2.1 Հարդասեղան ՙCLEOPATRA CLASSIC՚ - 1 200 000 /մեկ միլիոն երկու հարյուր հազար/ ՀՀ դրամ: 3. ՙROYAL՚ հավաքածու /խանութ-սրահում առաջարկվող լրակազմով/- 4 250 000 /չորս միլիոն երկու հարյուր հիսուն հազար/: 3.1 Փայտե շրջանակով հայելի ՙROYAL՚ - 220 000 /երկու հարյուր քսան հազար/ ՀՀ դրամ:
ՙԿլեոպատրա՚ տեսակի մեկ մահճակալն ու հարդասեղանը, ՙՌոյալ՚ տեսակի փայտե շրջանակով մեկ հայելին իրեղեն ապացույց ճանաչելու մասին որոշմամբ:
Այլ փաստաթուղթ հանդիսացող, գործով ապացույց ճանաչված, դեպքի վայրի զննությամբ առգրավված, այնուհետև նաև թիվ 3 կլինիկական հիվանդանոցի անվտանգության բաժնից առգրավված լազերային կրիչների առկայությամբ:
4.Դատարանի իրավական վերլուծությունները.
Վերլուծելով և գնահատելով դատական քննության ժամանակ հետազոտված ապացույցներն իրենց համակցության մեջ, դատարանը ձեռք բերված ապացույցները բավարար է գտնում և գործի փաստական հանգամանքներով հաստատված է համարում, որ ամբաստանյալներ Արմեն Պետրոսյանը և Կարեն Համբարձումյանը կատարել են հանցավոր արարքներ, որոնք համապատասխանում են ՀՀ քրեական օրենսգրքի 177 հոդվածի 3-րդ մասի 1-ին կետի հատկանիշներին:
Կատարած արարքների համար ամբաստանյալներ Արմեն Ռաֆիկի Պետրոսյանը և Կարեն Հովսեփի Համբարձումյանը ենթակա են քրեական պատասխանատվության և պատժի:
ՀՀ քրեական օրենսգրքի 48 հոդվածի համաձայն.
ՙ1. Պատիժը պետական հարկադրանքի միջոց է, որը դատարանի դատավճռով պետության անունից նշանակվում է հանցագործության համար մեղավոր ճանաչված անձի նկատմամբ և արտահայտվում է այդ անձին իրավունքներից ու ազատություններից օրենքով նախատեսված զրկմամբ կամ դրանց սահմանափակմամբ:
2. Պատժի նպատակն է վերականգնել սոցիալական արդարությունը, ուղղել պատժի ենթարկված անձին, ինչպես նաև կանխել հանցագործությունները՚:
ՀՀ քրեական օրենսգրքի 61 հոդվածի համաձայն.
ՙ1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սահմաններում՝ հաշվի առնելով սույն օրենսգրքի Ընդհանուր մասի դրույթները:
2. Պատժի տեսակը և չափը որոշվում են հանցագործության՝ հանրության համար վտանգավորության աստիճանով և բնույթով, հանցավորի անձը բնութագրող տվյալներով, այդ թվում՝ պատասխանատվությունը և պատիժը մեղմացնող կամ ծանրացնող հանգամանքներով:
3. Հանցագործության համար նախատեսված պատիժներից առավել խիստը նշանակվում է, եթե նվազ խիստ տեսակը չի կարող ապահովել պատժի նպատակները՚:
Ամբաստանյալներ Արմեն Պետրոսյանի և Կարեն Համբարձումյանի նկատմամբ պատիժ նշանակելիս, դատարանը հաշվի է առնում նրանց կատարած արարքների հանրության համար վտանգավորության աստիճանը, ինչպես նաև հանցավորների անձը:
Որպես ամբաստանյալ Արմեն Պետրոսյանի անձը բնութագրող, պատասխանատվությունը և պատիժը մեղմացնող հանգամանքներ դատարանը հաշվի է առնում այն, որ նա բնութագրվում է դրական, ֆիզիկապես վատառողջ է /նրա մոտ ախտորոշվել է ՍԻՀ: Լարման ստենոկարդիա` I ՖԴ (CCS)/, նրա խնամքին են գտնվում թոշակառու ծնողները, ուսանող դուստրն ու որդին, ընտանիքը սոցիալապես անապահով է:
Ամբաստանյալ Արմեն Պետրոսյանի պատասխանատվությունը և պատիժը ծանրացնող հանգամանքներ չկան:
Որպես ամբաստանյալ Կարեն Համբարձումյանի անձը բնութագրող, պատասխանատվությունը և պատիժը մեղմացնող հանգամանքներ դատարանը հաշվի է առնում այն, որ նա նախկինում դատված չի եղել, բնութագրվում է դրական, նրա խնամքին են գտնվում 2-րդ խմբի հաշմանդամ հայրը, ուսանող քույրն ու մայրը, ընտանիքը սոցիալապես անապահով է:
Ամբաստանյալ Կարեն Համբարձումյանի պատասխանատվությունը և պատիժը ծանրացնող հանգամանքներ չկան:
Հաշվի առնելով Արմեն Պետրոսյանի և Կարեն Համբարձումյանի կատարած արարքների հանրության համար վտանգավորության աստիճանը և բնույթը, նրանց անձը, նրանց բնութագրող տվյալները, պատասխանատվությունը և պատիժը մեղմացնող հանգամանքները, պատասխանատվությունն ու պատիժը ծանրացնող հանգամանքների բացակայությունը, ինչպես նաև այն, որ ՀՀ քրեական օրենսգրքի 177 հոդվածի 3-րդ մասի սանկցիայով նախատեսված է պատիժ միայն ազատազրկման ձևով, դատարանը գտնում է, որ պատժի նպատակներին հասնելու համար Արմեն Ռաֆիկի Պետրոսյանի և Կարեն Հովսեփի Համբարձումյանի նկատմամբ ՀՀ քրեական օրենսգրքի 177 հոդվածի 3-րդ մասի 1-ին կետով նախատեսված արարքներ կատարելու համար պատիժ պետք է նշանակել ազատազրկման ձևով, որը նրանք պետք է կրեն ՀՀ ԱՆ համապատասխան քրեակատարողական հիմնարկում:
Դատարանը, քննության առնելով ամբաստանյալների նկատմամբ լրացուցիչ պատիժ նշանակելու հարցը, գտնում է, որ նպատակահարմար չէ ՀՀ քրեական օրենսգրքի 177 հոդվածի 3-րդ մասի սանկցիայով նախատեսված լրացուցիչ պատիժ` գույքի բռնագրավում նշանակելը:
Դատարանը գտնում է, որ ամբաստանյալների նկատմամբ որպես խափանման միջոց կիրառված կալանավորումը պետք է թողնել անփոփոխ, մինչև դատավճռի օրինական ուժի մեջ մտնելը:
Հաշվի առնելով, որ տուժողի ներկայացուցիչ Բ.Կարապետյանը հայտնել է, որ հանցագործությամբ պատճառված վնասն ամբողջությամբ բնեղենով վերականգնվել է և տուժողի ներկայացուցիչն ամբաստանյալների նկատմամբ նյութական պահանջ չունի, դատարանը գտնում է, որ քաղաքացիական հայցի հարցը պետք է համարել լուծված:
Անդրադառնալով իրեղեն ապացույցների տնօրինման հարցին, դատարանը գտնում է, որ դատավճիռն օրինական ուժի մեջ մտնելուց հետո Արաբկիրի քննչական բաժնի ավագ քննիչի 17.09.2012թ. որոշմամբ իրեղեն ապացույց ճանաչված և տուժողի ներկայացուցիչ Բաբկեն Կարապետյանին ի պահ հանձնված ՙԿլեոպատրա՚ տեսակի մահճակալը, հարդասեղանը և ՙՌոյալ՚ տեսակի փայտե շրջանակով հայելին պետք է վերադարձնել տուժող ՙԿահույքի աշխարհ՚ ՍՊ ընկերության տնօրինությանը:
Դատարանը գտնում է, որ քննիչի 25.12.2012թ. որոշմամբ ապացույց ճանաչված և քրեական գործին կցված, դեպքի վայրի զննությամբ և թիվ 3 կլինիկական հիվանդանոցի անվտանգության բաժնից առգրավված լազերային կրիչները պետք է պահել քրեական գործի հետ միասին:
Դատարանը գտնում է, որ դատավճիռն օրինական ուժի մեջ մտելուց հետո, Արմեն Ռաֆիկի Պետրոսյանի անձնական խուզարկությամբ հայտնաբերված ՙfly՚ տեսակի բջջային հեռախոսը պետք է վերադարձնել նրա կնոջը` Ե.Վարդանյանին: Կարեն Հովսեփի Համբարձումյանի անձնական խուզարկությամբ հայտնաբերված ՙNokia՚ տեսակի բջջային հեռախոսը պետք է վերադարձնել նրա մորը` Ա.Մկրտչյանին:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 357-360, 365, 369-372 հոդվածներով դատարանը`

ՎՃՌԵՑ

Արմեն Ռաֆիկի Պետրոսյանին մեղավոր ճանաչել ՀՀ քրեական օրենսգրքի 177 հոդվածի 3-րդ մասի 1-ին կետով նախատեսված հանցանք կատարելու մեջ և նրան դատապարտել ազատազրկման չորս (4) տարի ժամկետով, առանց գույքի բռնագրավման:
Արմեն Պետրոսյանի պատժի սկիզբը հաշվել 2012 թվականի սեպտեմբերի 14-ից:
Պատիժը պետք է կրի ՀՀ ԱՆ համապատասխան քրեակատարողական հիմնարկում:
Արմեն Պետրոսյանի նկատմամբ կիրառված խափանման միջոցը` կալանավորումը, թողնել անփոփոխ, մինչև դատավճռի օրինական ուժի մեջ մտնելը:
Կարեն Հովսեփի Համբարձումյանին մեղավոր ճանաչել ՀՀ քրեական օրենսգրքի 177 հոդվածի 3-րդ մասի 1-ին կետով նախատեսված հանցանք կատարելու մեջ և նրան դատապարտել ազատազրկման չորս (4) տարի ժամկետով, առանց գույքի բռնագրավման:
Կարեն Համբարձումյանի պատժի սկիզբը հաշվել 2012 թվականի սեպտեմբերի 14-ից:
Պատիժը պետք է կրի ՀՀ ԱՆ համապատասխան քրեակատարողական հիմնարկում:
Կարեն Համբարձումյանի նկատմամբ կիրառված խափանման միջոցը` կալանավորումը, թողնել անփոփոխ, մինչև դատավճռի օրինական ուժի մեջ մտնելը:
Քաղաքացիական հայցի հարցը համարել լուծված:
Դատավճիռն օրինական ուժի մեջ մտնելուց հետո, իրեղեն ապացույց հանդիսացող և տուժողի ներկայացուցիչ Բաբկեն Կարապետյանին ի պահ հանձնված ՙԿլեոպատրա՚ տեսակի մահճակալը, հարդասեղանը, ՙՌոյալ՚ տեսակի փայտե շրջանակով հայելին վերադարձնել տուժող ՙԿահույքի աշխարհ՚ ՍՊ ընկերության տնօրինությանը:
Ապացույց ճանաչված, դեպքի վայրի զննությամբ և թիվ 3 կլինիկական հիվանդանոցի անվտանգության բաժնից առգրավված լազերային կրիչները պահել քրեական գործի հետ միասին:
Արմեն Ռաֆիկի Պետրոսյանի անձնական խուզարկությամբ հայտնաբերված ՙfly՚ տեսակի բջջային հեռախոսը վերադարձնել նրա կնոջը` Ե.Վարդանյանին: Կարեն Հովսեփի Համբարձումյանի անձնական խուզարկությամբ հայտնաբերված ՙNokia՚ տեսակի բջջային հեռախոսը վերադարձնել նրա մորը` Ա.Մկրտչյանին:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակվելու օրվանից հետո մեկամսյա ժամկետում:

Դատավոր` ստորագրություն
Բնագրի հետ ճիշտ է
Դատավոր Լ. Ավետիսյան