ԵԱՔԴ/0188/01/12

Դ Ա Տ Ա Վ Ճ Ի Ռ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանըª

նախագահող դատավոր Լ. Ավետիսյան
քարտուղարությամբ` Ն. Ղազարյանի, Հ. Թադևոսյանի
մասնակցությամբ
մեղադրող` Ռ. Խաչատրյանի

2013 թվականի փետրվարի 11-ին, Երևան քաղաքում, դռնբաց դատական նիստում քննեց քրեական գործն ըստ մեղադրանքի Ռոբերտ Հրաչյայի Վլասյանի, ծնված 1985 թվականի մարտի 27-ին, Երևան քաղաքում, ազգությամբ հայ, ՀՀ քաղաքացի, ութամյա կրթությամբ, ֆիզիկապես առողջ, ամուսնացած, խնամքին երկու մանկահասակ երեխա, նախկինում չդատված, չի աշխատում, հաշվառված է ք.Երևան, Զ.Քանաքեռցու 3-րդ փակուղի 3/1 տուն հասցեում, բնակվում է ք.Երևան, Զ.Քանաքեռցու փողոց 72 շենք թիվ 75 բնակարան հասցեում, մեղադրվում է ՀՀ քրեական օրենսգրքի 333 հոդվածի 2-րդ մասի 3-րդ կետով, որպես խափանման միջոց է ընտրվել չհեռանալու մասին ստորագրությունը,

Պ Ա Ր Զ Ե Ց

1.Գործի դատավարական նախապատմությունը.
2012 թվականի նոյեմբերի 16-ի որոշմամբ ՀՀ ոստիկանության ՔԳՎ Երևան քաղաքի քննչական վարչության Քանաքեռ-Զեյթուն քննչական բաժնում ՀՀ քրեական օրենսգրքի 175 հոդվածի 2-րդ մասի 1-ին, 3-րդ և 4-րդ կետերով նախատեսված հանցագործության հատկանիշներով հարուցվել է թիվ 09115612 քրեական գործը:
2012 թվականի նոյեմբերի 21-ի որոշմամբ ՀՀ ոստիկանության ՔԳՎ Երևան քաղաքի քննչական վարչության Քանաքեռ-Զեյթուն քննչական բաժնում թիվ 09115612 քրեական գործի նյութերով ՀՀ քրեական օրենսգրքի 333 հոդվածի 2-րդ մասի 3-րդ կետով նախատեսված հանցագործության հատկանիշներով հարուցվել է նոր քրեական գործ, որին շնորհվել է թիվ 09116012 համարը:
Նախաքննական մարմնի 2012 թվականի նոյեմբերի 22-ի որոշմամբ Ռոբերտ Հրաչյայի Վլասյանը ներգրավվել է որպես մեղադրյալ ՀՀ քրեական օրենսգրքի 333 հոդվածի 2-րդ մասի 3-րդ կետով, նրա նկատմամբ որպես խափանման միջոց է ընտրվել չհեռանալու մասին ստորագրությունը:
2012 թվականի նոյեմբերի 30-ի որոշմամբ թիվ 09116012 քրեական գործով Ռոբերտ Հրաչյայի Վլասյանի նկատմամբ` ՙՂարս Երկար Վանք՚ ՍՊ ընկերության ՙԼիդեր՚ բենզալցակայանի զգալի չափի գումար յուրացնելու դրվագով քրեական հետապնդում չի իրականացվել` դիմողի բողոքի բացակայության հիմքով, նախատեսված ՀՀ քրեական դատավարության օրենսգրքի 35 հոդվածի 1-ին մասի 4-րդ կետով:
2012 թվականի դեկտեմբերի 17-ի որոշմամբ թիվ 09116012 քրեական գործով Էդգար Դավթի Վլասյանի նկատմամբ քրեական հետապնդում չի իրականացվել` հանցակազմի բացակայության պատճառաբանությամբ, նախատեսված ՀՀ քրեական դատավարության օրենսգրքի 35 հոդվածի 1-ին մասի 2-րդ կետով:
2012 թվականի դեկտեմբերի 28-ին թիվ 09116012 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
2.Գործի փաստական հանգամանքները.
Նախնական քննության մարմինն ամբաստանյալ Ռոբերտ Հրաչյայի Վլասյանին մեղադրանք է առաջադրել այն արարքի կատարման համար, որ նա նախազգուշացված լինելով սուտ մատնություն կատարելու համար ՀՀ քրեական օրենսգրքի 333 հոդվածով նախատեսված պատասխանատվության մասին, շահադիտական դրդումներով կատարել է հանցագործության մասին սուտ մատնություն: Այն է.
Ռոբերտ Վլասյանն աշխատելով Երևան քաղաքի Դավիթ Անհաղթի փողոցի թիվ 10/1 հասցեում գործող ՙՂարս Երկար Վանք՚ ՍՊ ընկերության ՙԼիդեր՚ բենզալցակայանում որպես լիցքավորող և 2012 թվականի նոյեմբերի 15-ից 16-ը գտնվելով աշխատանքի մեջ, հերթափոխի ընթացքում վաճառված վառելիքից ստացված, ՍՊԸ-ին պատկանող 170.000 ՀՀ դրամը վերցնելով, նոյեմբերի 16-ի գիշերը գնացել է գյուղ Ջրվեժի 41 փողոցի 40-42 հասցեում գործող ՙԳոլդ՚ խաղատուն, որտեղ նշված գումարը պարտվել է: Այդ գումարն իր կողմից յուրացնելու հանգամանքը թաքցնելու նպատակով, գիտակցելով, որ իր հայտնած տեղեկությունը կեղծ է, նոյեմբերի 16-ին հաղորդում է ներկայացրել ոստիկանության Քանաքեռ-Զեյթունի բաժին, թե, իբր, նույն օրը ժամը 0640-ի սահմաններում երեք դիմակավորված անհայտ անձինք ատրճանակի սպառնալիքով մուտք են գործել վերը նշված բենզալցակայանի իրենց աշխատասենյակ և իրենից հափշտակել են 130.000 ՀՀ դրամ:
3.Ապացույցների հետազոտում.
Առաջադրված մեղադրանքում Ռոբերտ Վլասյանն իրեն մեղավոր ճանաչեց լիովին, հրաժարվեց ցուցմունք տալ և պնդեց նախաքննության ընթացքում տված ցուցմունքները:
Ռոբերտ Վլասյանը նախաքննության ընթացքում ցուցմունքներ է տվել այն մասին, որ հերթափոխով` 24 ժամ աշխատում է ՙԼիդեր՚ բենզալցակայանում որպես լիցքավորող: Նոյեմբերի 15-ին իր և հորեղբոր որդու` Էդգար Վլասյանի աշխատանքային օրն է եղել: 2012 թվականի նոյեմբերի 16-ի գիշերը, ժամը 02-ի սահմաններում, բենզալցակայանից վերցրել է մոտ 100.000 ՀՀ դրամ գումար և առանց Է.Վլասյանին տեղյակ պահելու, իր ՙՄերսեդես՚ մակնիշի 13su317 համարանիշի ավտոմեքենայով գնացել է Ջրվեժ գյուղում գտնվող ՙԳոլդ՚ խաղատուն, որտեղ ամբողջ գումարը պարտվել: Նկատի ունենալով, որ դա իր գումարը չի եղել, ամեն գնով ցանկացել է այն հետ բերել: Ինքը նախկինում մի քանի անգամ հաճախել է այդ խաղատուն, որտեղ խաղացել է իր անձնական մանր գումարները և դեմքով ճանաչել է խաղատան աշխատողին, որի անունը Գոռ է: Դուրս է եկել խաղատնից և վերադարձել բենզալցակայան, որտեղ Էդգար Վլասյանին պատմել է, որ քիչ առաջ խաղատանը պարտվել է բենզալցակայանի գումարը և Է.Վլասյանից վերցնելով նրա մոտ եղած` բենզալցակայանին պատկանող 20-30.000 ՀՀ դրամը, ասել է, որ ցանկանում է հետ բերել պարտված գումարը: Է.Վլասյանը փորձել է իրեն համոզել, որ չգնա խաղատուն, սակայն ինքը համառել է և կրկին վերադարձել խաղատուն: Խաղատանը պարտվել է նաև այդ գումարը, կրկին վերդարձել է բենզալցակայան, նորից գումար վերցրել և գնացել խաղատուն: Նշված օրը 5 անգամ խաղատուն գնալով և խաղային ավտոմատների վրա խաղալով պարտվել է բենզալցակայանի տիրոջը պատկանող 170.000 ՀՀ դրամ գումարը, որը պետք է առավոտյան փոխանցեր բենզալցակայանի տնօրենին, քանի որ վառելիքից ստացված գումարների համար անձամբ է եղել պատասխանատու: Վերջին անգամ խաղատնից բենզալցակայան է վերադարձել 2012 թվականի նոյեմբերի 16-ին, ժամը 06-ից հետո և ստեղծված իրավիճակից դուրս գալու նպատակով, հորինել է մի պատմություն և խնդրել Է.Վլասյանին, որ տնօրենին ասեն, թե իբր ՙBMW X5՚ մակնիշի, սև գույնի, առանց համարանիշի ավտոմեքենան կայանել է բենզալցակայանի աշխատասենյակի մոտ և դիմակավորված երեք անձինք ատրճանակներով զինված մտել են իրենց սենյակ և սպառնալիքի ազդեցության տակ իրենց մոտից հափշտակել են բենզալցակայանի գումարը: Քանի որ եղել է շփոթված, ոստիկանությունում նշել է, որ հափշտակվել է մոտ 130.000 ՀՀ դրամ, այնուհետև հանգիստ պայմաններում հաշվել է ՙԳոլդ՚ խաղատանը պարտված գումարը, որը կազմել է 170.000 ՀՀ դրամ: Իր կողմից հորինված այս պատմության մասին հեռախոսով հայտնել է տնօրեն Սուրեն Պետրոսյանին: Վերջինս գալով բենզալցակայան, լսելով պատմության մանրամասները, զանգահարել է ոստիկանություն: Չնայած նախազգուշացված լինելով սուտ մատնության համար նախատեսված քրեական պատասխանատվության մասին, ինքը հորինած պատմության վերաբերյալ ոստիկանությունում նաև հաղորդում է տվել: Հետագայում զղջացել է և խոստովանել, որ իրականում բենզալցականայում 2012 թվականի նոյեմբերի 16-ին ավազակային հարձակում չի եղել և ինքը կեղծ տեղեկություններ և սուտ հաղորդում է ներկայացրել ոստիկանություն, որպեսզի բենզալցակայանի տնօրենը չիմանա և այդ կերպ կարողանա թաքցնել նույն օրը Ջրվեժում գտնվող ՙԳոլդ՚ խաղատանը բենզալցակայանին պատկանող 170.000 ՀՀ դրամ գումարը պարտվելու փաստը:
Ամբաստանյալին մեղսագրված հանցանքը հիմնավորվել է նաև հետևյալ ապացույցներով.
Վկա Էդգար Դավթի Վլասյանի ցուցմունքով այն մասին, որ 2012 թվականի ամռանից աշխատում է ՙՂարս Երկար Վանք՚ ՍՊԸ-ի ՙԼիդեր՚ բենզալցակայանում որպես լիցքավորող: Աշխատում է օրը մեջ և իր հետ որպես լիցքավորող է աշխատում նաև իր հորեղբոր որդին` Ռոբերտ Վլասյանը: Քանի որ նա ավելի շատ աշխատանքային փորձ ունի, այդ պատճառով հիմնականում նրա մոտ է հավաքվում օրվա ընթացքում վառելիքի վաճառքից ստացված գումարը: 2012 թվականի նոյեմբերի 16-ին, ժամը 02-ի սահմաններում Ռ.Վլասյանն իրեն ասել է, որ աշխատանքից գործով դուրս է գալիս և վերադարձել է ժամը 03-ի սահմաններում: Սկզբում չի իմացել, որ Ռ.Վլասյանը խաղատուն է գնացել, իսկ երբ իմացել է, որ նա մոտ 100.000 ՀՀ դրամ գումար է պարտվել, փորձել է թույլ չտալ եղբորը կրկին խաղատուն գնալ, սակայն Ռ.Վլասյանն իրեն չի լսել և ասելով, որ բենզալցակայանի գումարն է պարտվել և պետք է անպայման այն հետ բերի և իր մոտից վերցնելով կրկին բենզալցակայանին պատկանող 20-30.000 ՀՀ դրամը` գնացել է ՙԳոլդ՚ խաղատուն: Այն նույնպես պարտվել է և այդ գիշերվա ընթացքում 4-5 անգամ վերադարձել է բենզալցակայան` գումար վերցնելու նպատակով: Ժամը 06-ից հետո, երբ վերադարձել է բենզալցակայան, պարտված է եղել իրենց մոտ եղած 170.000 ՀՀ դրամ գումարը: Որպեսզի դա կարողանա բենզալցակայանի տնօրենից թաքցնել, Ռոբերտը պատմություն է հորինել, թե իբր ՙBMW X5՚ մակնիշի, սև գույնի, առանց համարանիշի ավտոմեքենայով դիմակավորված անհայտ անձինք գնացել են բենզալցակայան և մտնելով սենյակ` ատրճանակով սպառնալիքներ տալով նրանից վերցրել են բենզալցակայանին պատկանող ամբողջ գումարը և դիմել փախուստի: Քանի որ Ռ.Վլասյանի հորինած պատմությունը իրեն ի սկզբանե դուր չի եկել, որոշել է ասել, որ ինքն այդ պահին քնած է եղել և արթնացել է, երբ դիմակավորված անձանցից մեկն ատրճանակն ուղղած է եղել իր ուղղությամբ և գումար պահանջել: Իրենցից գումարը վերցնելուց հետո նրանք նստելով մեքենան դիմել են փախուստի: Ռոբերտ Վլասյանը հորինած պատմությունը պատմել է բենզալցակայանի տնօրենին, իսկ վերջինս իր հերթին ահազանգել է ոստիկանություն, որտեղ Ռ.Վլասյանն իրականությանը չհամապատասխանող հաղորդում է տվել:
Վկա Սուրեն Հայկազի Պետրոսյանի ցուցմունքով այն մասին, որ հանդիսանում է ՙՂարս Երկար Վանք՚ ՍՊ ընկերության ՙԼիդեր՚ բենզալցակայանի տնօրենը: Ռ.Վլասյանը յոթ տարի աշխատել է իրենց մոտ որպես լիցքավորող: 2012 թվականի նոյեմբերի 15-ի լույս 16-ի առավոտյան աշխատավայրից իրեն է զանգահարել Ռոբերտ Վլասյանը և շփոթված ձայնով իրեն կանչել է բենզալցակայան: Գալով բենզալցակայան ու Ռ.Վլասյանից իմանալով, որ ինչ-որ ՙBMW X5՚ մակնիշի, սև գույնի, առանց համարանիշի ավտոմեքենայով դիմակավորված անհայտ անձինք գնացել են բենզալցակայան և մտնելով սենյակ` ատրճանակի սպառնալիքով նրանից վերցրել են այդ օրվա վառելիքի վաճառքից առաջացած ամբողջ գումարը, որը առավոտյան նա պետք է հանձներ իրեն, քանի որ նա է եղել վառելիքից ստացված գումարների պատասխանատուն: Հասկացել է, որ բենզալցակայանում ավազակային հարձակում է կատարվել և զանգահարել է ոստիկանություն: Ոստիկանները գնացել են բենզալցակայան, ուսումնասիրել աշխատասենյակը և Ռ.Վլասյանին ու Է.Վլասյանին տարել են ոստիկանության բաժին: Այնուհետև, իրեն հրավիրել են ոստիկանություն, որտեղ իմացել է, որ բենզալցակայանում ավազակային հարձակում տեղի չի ունեցել: Ռ.Վլասյանը բենզալցակայանին պատկանող 170.000 ՀՀ դրամն առանց իր գիտության վերցրել և պարտվել է խաղատանը: Նույն օրը երեկոյան Ռ.Վլասյանը նույնպես խոստովանել է, որ ավազակային հարձակում տեղի չի ունեցել, ներողություն է խնդրել, ասելով, որ կատարվածի համար շատ է ամաչել և չի կարողացել իրականությունն իրեն պատմել, ուստի նման պատմություն է հորինել: Հաջորդ օրը 170.000 ՀՀ դրամ գումարը Ռ.Վլասյանը վերականգնել է: Աշխատանքային 7 տարիների ընթացքում ինքը Ռ.Վլասյանի կողմից ոչ մի վատ բան չի նկատել: Առաջին անգամ ոստիկանությունում է իմացել, որ Ռ.Վլասյանը խաղատուն է այցելում: Ինքը, հաշվի առնելով, որ Ռ.Վլասյանը վերականգնել է պատճառված վնասը և բացի այդ ունի անչափահաս երկու երեխա, ներել է նրան և չի ցանկացել, որ նա ենթարկվի քրեական պատասխանատվության: Նյութական որևէ պահանջ չունի:
Վերոհիշյալը նկատի ունենալով նախաքննության մարմինը զգալի չափի գումար յուրացնելու համար Ռ.Վլասյանի նկատմամբ քրեական հետապնդում չի իրականացրել ՀՀ քրեական դատավարության օրենսգրքի 35 հոդվածի 1-ին մասի 4-րդ կետի հիմքով` տուժողի բողոքի բացակայության պատճառով:
Վկա Գոռ Խաչատուրի Ջանիկյանի նախաքննության ընթացքում տված ցուցմունքով այն մասին, որ շուրջ երկու տարի է աշխատում է Ջրվեժ գյուղում գործող ՙԳոլդ՚ խաղատանը, որպես օպերատոր: Իր աշխատանքային պարտականությունների մեջ են մտնում հաճախորդների կողմից տրված գումարներին համապատասխան չափով միավորների մուտքագրումը խաղային ապարատներում: 16.11.2012թ. ժամը 0130-ից 02-ի սահմաններում խաղատուն է հաճախել Ռոբերտ անունով մի երիտասարդ, ում ճանաչել է որպես մի քանի անգամ խաղատուն այցելած հաճախորդի և չի իմացել, թե վերջինս ընդհանրապես ինչով է զբաղվում: Ռոբերտն առաջին հայացքից իր վրա նորմալ տպավորություն է թողել, սակայն նրա հետ մտերիմ չի եղել: Զրույցի ընթացքում իմացել է, որ նա աշխատում է Դավիթ Անհաղթ փողոցի վրա գտնվող ՙԼիդեր՚ բենզալցակայանում` որպես լիցքավորող: Այդ օրը Ռոբերտը խաղային ապարատներից օգտվելու ընթացքում պարտվել է 100.000 ՀՀ դրամից ավել գումար: Ողջ գիշերվա ընթացքում նա խաղատնից մի քանի անգամ դուրս է եկել և կրկին վերադարձել, որը ֆիքսել են նաև խաղատանը տեղադրված տեսախցիկները: Հետագայում ինքն իմացել է, որ բենզալցակայանին պատկանող գումարները պարտվելու հանգամանքը թաքցնելու նպատակով Ռոբերտը կեղծ հաղորդում է տվել ոստիկանություն թե, իբր, իրենց նկատմամբ ավազակային հարձակում է կատարվել:
Դեպքի վայրի զննության 16.11.2012թ.-ի արձանագրությամբ, համաձայն որի զննության մասնակից Ռ.Վլասյանը հայտարարել է, թե ինչպես 16.11.2012թ. ժամը 0640-ի սահմաններում ՙBMW X5՚ մակնիշի, սև գույնի, առանց համարանիշի ավտոմեքենան կայանել է բենզալցակայանի աշխատասենյակի մոտ և դիմակավորված երեք անձ ատրճանակներով մտել են սենյակ և սպառնալիքի ազդեցության տակ իրենից և Է.Վլասյանից հափշտակել են բենզալցակայանին պատկանող մոտ 130.000 ՀՀ դրամ գումարը ու նստելով արդեն իսկ բենզալցակայանից հեռու կանգնած նույն ավտոմքենան` դիմել են փախուստի:
Որպես այլ ապացույց ճանաչված` 16.11.2012թ. ոստիկանության Քանաքեռ-Զեյթուն բաժնում Ռոբերտ Վլասյանից հաղորդում ընդունելու մասին արձանագրությամբ և նույն օրը Կոտայքի Ջրվեժ գյուղի 41 փողոցի 40-42 հասցեում գործող ՙԳոլդ՚ խաղատան տարածքը տեսանկարահանող սարքերի տեսաձայնագրություններով` առգրավված լազերային սկավառակի վրա:
16.11.2012թ. ՙԳոլդ՚ խաղատնից առգրավված լազերայաին սկավառակը զննելու արձանագրությամբ, համաձայն որի, Ռ.Վլասյանի մասնակցությամբ կատարվել է լազերային սկավառակի զննում և վերջինս հաստատել է տեսաձայնագրությունը վերարտադրելու ընթացքում իր կողմից խաղատանը և խաղատնից դուրս կատարած բոլոր գործողությունները:
4.Դատարանի իրավական վերլուծությունները.
Վերլուծելով և գնահատելով դատական քննության ժամանակ հետազոտված ապացույցներն իրենց համակցության մեջ, դատարանը ձեռք բերված ապացույցները բավարար է գտնում և գործի փաստական հանգամանքներով հաստատված է համարում, որ ամբաստանյալ Ռոբերտ Վլասյանը շահադիտական դրդումներով կատարել է հանցագործության մասին սուտ մատնություն, որպիսի արարքը համապատասխանում է ՀՀ քրեական օրենսգրքի 333 հոդվածի 2-րդ մասի 3-րդ կետի հատկանիշներին:
Ամբաստանյալ Ռոբերտ Վլասյանի նկատմամբ պատիժ նշանակելիս, դատարանը հաշվի է առնում նրա կատարած արարքի հանրության համար վտանգավորության աստիճանը, ինչպես նաև հանցավորի անձը:
Որպես ամբաստանյալ Ռոբերտ Վլասյանի անձը բնութագրող, պատասխանատվությունը և պատիժը մեղմացնող հանգամանքներ, դատարանը դիտում է այն, որ նա հանցանքն ընդունել և զղջում է կատարածի համար, նախկինում դատված չի եղել, երիտասարդ է, նրա խնամքին են գտնվում երկու մանկահասակ երեխաները ¥Հրաչյա Ռոբերտի Վլասյան` ծնված 14.04.2011թ.-ին և Լիանա Ռոբերտի Վլասյան` ծնված 24.04.2009թ.-ին), կամովին հատուցել է հափշտակությամբ պատճառված նյութական վնասը:
Ամբաստանյալի պատասխանատվությունը և պատիժը ծանրացնող հանգամանքներ չկան:
Կատարած արարքի համար ամբաստանյալ Ռոբերտ Հրաչյայի Վլասյանը ենթակա է քրեական պատասխանատվության և պատժի:
Դատարանը հաշվի առնելով հանցավորի անձը բնութագրող տվյալները, պատասխանատվությունը և պատիժը մեղմացնող հանգամանքները /նախկինում դատապարտված չլինելը, ամբողջությամբ պատճառված գույքային վնասը հատուցելը, խնամքին երկու մանկահասակ երեխա ունենալը/, ինչպես նաև պատասխանատվությունը և պատիժը ծանրացնող հանգամանքների բացակայությունը, հանգում է այն հետևության, որ ամբաստանյալի ուղղվելը հնարավոր է պատիժը պայմանականորեն չկիրառելու, սակայն` նրա վարքագծի նկատմամբ վերահսկողություն իրականացնելու պայմաններում:
Դատարանը գտնում է, որ Ռոբերտ Վլասյանի նկատմամբ որպես խափանման միջոց կիրառված չհեռանալու մասին ստորագրությունը պետք է թողնել անփոփոխ` մինչև դատավճռի օրինական ուժի մեջ մտնելը:
Դատարանը գտնում է, որ դատավճիռն օրինական ուժի մեջ մտելուց հետո, ՀՀ ոստիկանության ՔԳՎ Երևան քաղաքի քննչական վարչության Քանաքեռ-Զեյթուն քննչական բաժնի քննիչի 20.11.2012թ. որոշմամբ այլ ապացույց ճանաչված և քրեական գործին կցված ոստիկանության Քանաքեռ-Զեյթուն բաժնում 16.11.2012թ.-ին Ռոբերտ Վլասյանից վերցված հաղորդում ընդունելու մասին արձանագրությունը և նույն օրը ՙԳոլդ՚ խաղատնից առգրավված տեսաձայնագրությունները` էլեկտրոնային կրիչի /լազերային սկավառակի/ վրա, պետք է պահել քրեական գործի հետ միասին:
Վերոգրյալի հիման վրա և ղեկավարվելով ՀՀ քրեական օրենսգրքի 70, ՀՀ քրեական դատավարության օրենսգրքի 357-360, 365, 369-372 հոդվածներով, դատարանը

Վ Ճ Ռ Ե Ց

Ռոբերտ Հրաչյայի Վլասյանին մեղավոր ճանաչել ՀՀ քրեական օրենսգրքի 333 հոդվածի 2-րդ մասի 3-րդ կետով նախատեսված հանցանք կատարելու մեջ և նրան դատապարտել ազատազրկման վեց (6) ամիս ժամկետով:
Կիրառել ՀՀ քրեական օրենսգրքի 70 հոդվածը և Ռոբերտ Հրաչյայի Վլասյանի նկատմամբ ազատազրկման ձևով նշանակված պատիժը պայմանականորեն չկիրառել, սահմանելով փորձաշրջան մեկ (1) տարի ժամկետով:
Ռոբերտ Հրաչյայի Վլասյանի նկատմամբ ընտրված խափանման միջոցը` չհեռանալու մասին ստորագրությունը, թողնել անփոփոխ, մինչև դատավճռի օրինական ուժի մեջ մտնելը:
Ռոբերտ Հրաչյայի Վլասյանի վարքագծի նկատմամբ վերահսկողությունը հանձնարարել ՀՀ ԱՆ քրեակատարողական վարչության նրա բնակության վայրի այլընտրանքային պատիժների կատարման բաժնին: Փորձաշրջանի սկիզբը հաշվել քրեակատարողական վարչության այլընտրանքային պատիժների կատարման բաժնում Ռոբերտ Վլասյանին հաշվառման վերցնելու օրվանից:
Դատավճիռն օրինական ուժի մեջ մտելուց հետո, այլ ապացույց ճանաչված և քրեական գործին կցված ոստիկանության Քանաքեռ-Զեյթուն բաժնում 16.11.2012թ.-ին Ռոբերտ Վլասյանից վերցված հաղորդում ընդունելու մասին արձանագրությունը և նույն օրը ՙԳոլդ՚ խաղատնից առգրավված տեսաձայնագրությունները` էլեկտրոնային կրիչի /լազերային սկավառակի/ վրա, պահել քրեական գործի հետ միասին:

Դատավճիռը կարող է բողոքարկվել ՀՀ վերաքննիչ քրեական դատարան հրապարակվելու օրվանից հետո մեկամսյա ժամկետում:

Դատավոր` ստորագրություն
Բնագրի հետ ճիշտ է`
Դատավոր Լ. Ավետիսյան