Գործ No ԵԱՔԴ/0187/01/12

ԴԱՏԱՎՃԻՌ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

12 փետրվարի 2013թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը`

նախագահությամբ` դատավոր Ա.Մկրտչյանի
քարտուղարությամբ Շ.Վանոյանի
մասնակցությամբ`
մեղադրող Է.Պետրոսյանի
տուժող Ս.Քարիմյանի

Դատարանում, դռնբաց դատական նիստում քննեց քրեական գործն ըստ մեղադրանքի` Վահագն Ռուբենի Հակոբյանի /ծնված 16.05.1978թ., ք.Երևան, ազգությամբ հայ, ՀՀ քաղաքացի, միջնակարգ կրթությամբ, չամուսնացած, չի աշխատում, նախկինում չդատված, հաշվառված` ք.Երևան, Ադոնցի 17 շենք բնակարան 41/:
Մեղադրվում է ՀՀ քրեական օրենսգրքի 177-րդ հոդվածի 1-ին մասով:

Գործի դատավարական նախապատմությունը
2012 թվականի դեկտեմբերի 05-ին տեղի է ունեցել դեպքը:
2012 թվականի դեկտեմբերի 26-ին հարուցվել է թիվ 14147612 քրեական գործը£
2012 թվականի դեկտեմբերի 26-ին Վահագն Հակոբյանը ներգրավվել է որպես մեղադրյալ և նրա նկատմամբ խափանման միջոց է ընտրվել ստորագրություն չհեռանալու մասին:
2012 թվականի դեկտեմբերի 28-ին թիվ 14147612 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան:

Գործի փաստական հանգամանքները
Նախաքննության մարմինն ամբաստանյալ Վահագն Հակոբյանին ՀՀ քրեական օրենսգրքի 177-րդ հոդվածի 1-ին մասով մեղադրանք է առաջադրել այն արարքի համար, որ ՙնա, ուրիշի գույքի գաղտնի հափշտակություն կատարելու դիտավորությամբ 2012թ. դեկտեմբերի 5-ին ժամը 15:30-ի սահմաններում գնացել է Մամիկոնյանց 42-րդ շենքի մոտ, որտեղ փողոցի վրա կայանված Սերժիկ Քարիմյանին պատկանող ՈՒԱԶ 452 մակնիշի 61 ՍՕ 681 պետհամարանիշի մեքենայից գաղտնի հափշտակել է 80.000 ՀՀ դրամ արժողությամբ էլեկտրական սղոցը և 25.000 ՀՀ դրամ արժողությամբ էլեկտրական շաղափը` Ս.Քարիմյանին պատճառելով զգալի չափի` 105.000 ՀՀ դրամի նյութական վնաս՚:

Ապացույցների հետազոտում
Առաջադրված մեղադրանքում ամբաստանյալ Վահագն Հակոբյանն իրեն լիովին մեղավոր է ճանաչել և անկեղծորեն զղջացել կատարած արարքի համար, սակայն օգտվելով իր դատավարական իրավունքից` դատաքննության փուլում հրաժարվել է ցուցմունք տալուց` նշելով, որ պնդում է նախաքննությամբ տված ցուցմունքները:
Նախաքննության փուլում ամբաստանյալ Վ.Հակոբյանը ցուցմունք է տվել այն մասին, որ 2012թ. դեկտեմբերի 5-ին ժամը 15:00-ի սահմաններում Կոմիտասի շուկայից վերադարձել է տուն, երբ նախկին կույրերի գործիքագործական արհեստանոցի մոտ տեսել է կանաչ գույնի ՈՒԱԶ ավտոմեքենա, մոտեցել է և տեսել, որ ավտոմեքենայի դուռը բաց է, և որոշել է մեքենայից ապրանք գողանալ և վաճառել, քանի որ գումար չի ունեցել: Մեքենայի սրահում գտնվող տուփի միջից վերցրել է էլեկտրական շաղափը և էլեկտրական սղոցը, որից հետո երթուղային տաքսիով գնացել է Գնունի շուկա: Շուկայում էլեկտրական սղոցն ու էլեկտրական շաղափը ձեռքում պահած կանգնած է եղել, երբ իրեն է մոտեցել 50-60 տարեկան տարեց մի մարդ, որին 3000 ՀՀ դրամ գումարով վաճառել է էլեկտրական սղոցն ու շաղափը: Հաջորդ օրը Կոմիտասի շուկայում իրեն է մոտեցել Անդրանիկը, որին ճանաչում է որպես թաղի բնակիչ, և հարցրել արդյոք ինքը էժան էլեկտրական սղոցի և էլեկտրական շաղափի տեղ չգիտի, քանի որ ցանկանում է գնել, իսկ ինքն Անդրանիկին ասել է, որ եթե մեկ օր առաջ իրեն ասած լիներ, ապա ինքը ուներ վաճառքի էլեկտրական շաղափ և էլեկտրական սղոց, սակայն արդեն վաճառել է: Նույն օրը երեկոյան տուն գնալիս հանդիպել է Սերժիկ Քարիմյանին, որն իրեն կանչել է և հարցրել, թե ինչու է գողացել իր էլեկտրական սղոցն ու շաղափը, ինքը Սերժիկին ասել է, որ իրեն գումար է անհրաժեշտ եղել, իսկ ապրանքը վաճառել է Գնունի շուկայում` 3000 ՀՀ դրամ գումարով: Այդ ժամանակ Սերժիկի մոտ է եկել նաև Անդրանիկը և մեկ այլ տղամարդ, որն իրեն տեսնելով ասել, որ իրեն է տեսել մեքենայի մոտ: Դրանից հետո Սերժիկն իրեն առաջարկել է վերականգնել իր գումարը կամ իրեն հետ տալ իր ապրանքները, սակայն քանի որ ինքը գումար չի ունեցել և չունի, ուստի չի կարողացել Սերժիկին վերադարձնել գումարները:

Տուժող Սերժիկ Քարիմյանը դատաքննության փուլում ցուցմունք է տվել այն մասին, որ ինքը մասնագիտությամբ փականագործ է, և հաճախ է պատահում, որ մասնավոր պատվերներ է ստանում: Այդ պատճառով իր ՈՒԱԶ մակնիշի մեքենայի մեջ միշտ պահում է գործիքներ, որոնք կարող են պետք գալ աշխատանքներ կատարելիս, դրանցից է նաև էլեկտրական կտրիչը և էլեկտրական սղոցը: 2012թ. դեկտեմբերի 5-ին ժամը 14.00-ի սահմաններում գնացել է նախկին կույրերի միավորման գործիքագործական արտադրամաս` իր ընկերոջը հանդիպելու համար, մեքենան կանգնեցրել է Մամիկոնյանց փողոցի վրա և դռներն առանց կողպելու, գնացել արհեստանոց: Ժամը 15.00-ի սահմաններում արհեստանոց է գնացել նաև իր ընկեր Անդրանիկ Խաչատրյանը: Ժամը 16.00-ի սահամաններում դուրս է եկել արհեստանոցից, և երբ մոտեցել է մեքենային` նկատել է, որ գործիքների տուփը, որը դրված է մեքենայի խցիկում, բաց է: Միանգամից հասկացել է, որ մեքենայից գողություն է կատարվել, նայել է տուփի մեջ և հայտնաբերել, որ մեքենայից գողացել են իրեն պատկանող ռուսական արտադրության էլեկտրական սղոցը և էլեկտրական շաղափը: Դրանից հետո վերադարձել է արհեստանոց և ասել, որ իր մեքենայից գողացել են էլեկտրական կտրիչը և էլեկտրական շաղափը: Այդ ժամանակ Անդրանիկն իրեն ասել է, որ երբ մի պահ դուրս է եկել իր մեքենային նայելու, տեսել է մի երիտասարդի գլխարկով և բաճկոնով, որի ձեռքին եղել է էլեկտրական շաղափ և էլեկտրական սղոց: Անդրանիկը նկարագրել է այդ տղային և նրա նկարագրությունից ինքը հասկացել է, որ գողությունը հնարավոր է կատարած լինի Վահագն Հակոբյանը, որին ճաաչում է իրենց թաղից: 2012թ. դեկտեմբերի 6-ին դիմել է իր ծանոթ Անդրանիկ Մուրադյանին, որը ճանաչում էր Վահագնին: Անդրանիկը նույն օրը կեսօրին Վահագնին ասել էր, որ իրեն էժան էլեկտրական սղոց կամ էլեկտրական շաղափ է անհրաժեշտ, իսկ Վահագնն Անդրանիկին ասել էր, որ ինքն ունեցել է էլեկտրական շաղափ և կտրիչ, որոնք դրանից մի օր առաջ վաճառել է Գնունի շուկայում: Նույն օրը երեկոյան Վահագնին կանչել է իր մոտ, որից հետո եկել է նաև Անդրանիկ Մուրադյանը, որի ներկայությամբ Վահագնն ընդունել է, որ ինքն է գողացել իր էլեկտրական շաղափն ու էլեկտրական կտրիչը, որոնք նույն օրը տարել և վաճառել է Գնունի շուկայում` 3000 ՀՀ դրամ գումարով: Որոշ ժամանակ անց եկել է նաև Անդրանիկ Խաչատրյանը, որը միանգամից ճանաչել է Վահագնին և ասել է, որ նրան է տեսել իր մեքենայի մոտ` ձեռքին էլեկտրական շաղափ և էլեկտրական սղոց: Վահագնն անընդհատ անտրամաբանական պատասխաններ է տվել, և ինքը ոստիկանությունում հաղորդում է տվել իր մեքենայից կատարված գողության մասին:
Տուժող Ս.Քարիմյանը միաժամանակ նշել է, որ իր ապրանքը գտել է և գնել 40.000 ՀՀ դրամով, և ամբաստանյալ Վ.Հակոբյանից պահանջում է 40.000 ՀՀ դրամ գումար:

Գործով վկա Անդրանիկ Մուրադյանը դատաքննության փուլում ցուցմունք է տվել, որ 2012թ. դեկտեմբերի 6-ին առավոտյան հանդիպել է Սերժիկին, որն իրեն պատմել է, որ նրա ՈՒԱԶ մեքենայից գողացել են էլեկտրական շաղափը և էլեկտրական սղոցը, Սերժիկից տեղեկացել է, որ իր ընկեր Անդրանիկը տեսել է գողություն կատարողին և ըստ նկարագրության` գողություն է կատարել Վահագն Հակոբյանը, որին ինքը ճանաչում է որպես թաղի բնակիչ: Սերժիկը խնդրել է իրեն պարզել, արդյոք Վահագնը կապ ունի գողության հետ, թե ոչ: Դրանից հետո նույն օրը` կեսօրին, հանդիպել է Վահագին և նրան ասել, որ իրեն էլեկտրական շաղափ և էլեկտրական սղոց է անհրաժեշտ, արդյոք նա չունի վաճառքի ապրանք, իսկ Վահագնը պատասխանել է, որ ուներ սակայն մի օր առաջ արդեն վաճառել է: Այդ մասին պատմել է Սերժիկին, որից հետո նույն օրը երեկոյան Սերժիկը զանգահարել է իրեն և խնդրել է գնալ իր մոտ: Երբ ինքը հասել է Սերժիկի մոտ, այնտեղ է եղել նաև Վահագը: Իր ներկայությամբ Վահագնը Սերժիկին ասել է, որ ինքն է գողացել նրա էլեկտրական շաղափը և էլեկտրական սղոցը, որոնք վաճառել է Գնունի շուկայում 3000 ՀՀ դրամ գումարով: Որոշ ժամանակ անց Սերժիկի մոտ է գնացել նաև Անդրանիկ Խաչատրյանը, ով տեսնելով Վահագնին ասել է, որ նրան է տեսել դեկտեմբերի 5-ին Սերժիկի մեքենայի մոտ:

Գործով վկա Անդրանիկ Խաչատրյանը դատաքննության փուլում ցուցմունք է տվել այն մասին, որ 2012թ. դեկտեմբերի 5-ին ժամը 15.10-ի սահմաններում ինքը գնացել է Մամիկոնյանց փողոցի վրա գտնվող նախկին կույրերի գործիքագործական արհեստանոց, որտեղ հանդիպել է Սերժիկին: Մոտ կես ժամ զրուցելուց հետո ինքը մի պահ դուրս է եկել փողոց` իր ավտոմեքենային նայելու համար, այդ ժամանակ նկատել է մի տղայի` Սերժիկի ՈՒԱԶ 452 մակնիշի մեքենայից 5-6 մետր հեռավորության վրա, ձեռքին էլեկտրական շաղափ և էլեկտրական սղոց: Ժամը 16.00-ի սահմաններում Սերժիկը դուրս է եկել արհեստանոցից, սակայն մոտ 10 րոպե անց վերադարձել և ասել է, որ իր մեքենայից գողացել են նրա էլեկտրական շաղափն ու էլեկտրական կտրիչը: Այդ ժամանակ ինքը Սերժիկին պատմել է, որ երբ դուրս է եկել իր մեքենային նայելու, տեսել է, թե ինչպես մի տղա` էլեկտրական շաղափն ու կտրիչը ձեռքին, հեռացել է իր մեքենայի մոտից, սակայն քանի որ ոչինչ չի կասկածել, Սերժիկին ոչինչ չի ասել: Դրանից հետո Սերժիկին նկարագրել է այդ տղային: Հաջորդ օրը` 2012թ. դեկտեմբերի 6-ին, երեկոյան ժամը 18.30-ի սահմաններում իրեն է զանգահարել Սերժիկը և խնդրել է գնալ իր մոտ: Երբ գանցել է, Սերժիկի մոտ տեսել է նաև Անդրանիկին, որին ճանաչում է Սերժիկի միջոցով, և այն տղային, որին տեսել էր մեկ օր առաջ Սերժիկի մեքենայի մոտ` ձեռքին Էլեկտրական շաղափ և էլեկտրական կտրիչ: Ինքը պնդել է, որ Վահագնն այն նույն անձն է, որին տեսել էր Սերժիկի մեքենայի մոտ:
Դատարանի իրավական վերլուծությունները
Դատարանը հետազոտելով գործով ձեռք բերված յուրաքանչյուր ապացույց, գնահատելով թույլատրելիության վերաբերելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, ղեկավարվելով օրենքով, ներքին համոզմամբ, գտնում է, որ ամբաստանյալ Վահագն Մանուկյանի մեղավորությունը` ուրիշի գույքի զգալի չափերով գաղտնի հափշտակություն կատարելու մեջ, որը նախատեսված է ՀՀ քրեական օրենսգրքի 177-րդ հոդվածի 1-ին մասով, ապացուցված է:
Վերոհիշյալ հանցանքի կատարման համար ամբաստանյալը ենթակա է քրեական պատասխանատվության և պատժի, որը նա պետք է կրի:
ՀՀ քրեական օրենսգրքի 10-րդ հոդվածի համաձայնª ՙՀանցանք կատարած անձի նկատմամբ կիրառվող պատիժը և քրեաիրավական ներգործության այլ միջոցները պետք է լինեն արդարացիª համապատասխանեն հանցանքի ծանրությանը, դա կատարելու հանգամանքներին, հանցավորի անձնավորությանը, անհրաժեշտ և բավարար լինեն նրան ուղղելու և նոր հանցագործությունները կանխելու համար՚:
ՀՀ քրեական օրենսգրքի 48-րդ հոդվածի 2-րդ մասի համաձայնª ՙՊատժի նպատակն է վերականգնել սոցիալական արդարությունը, ուղղել պատժի ենթարկված անձին, ինչպես նաև կանխել հանցագործությունները՚:
ՀՀ քրեական օրենսգրքի 61-րդ հոդվածի 2-րդ մասի համաձայնª ՙՊատժի տեսակը և չափը որոշվում է հանցագործությանª հանրության համար վտանգավորության աստիճանով և բնույթով, հանցավորի անձը բնութագրող տվյալներով, այդ թվումª պատասխանատվությունը և պատիժը մեղմացնող կամ ծանրացնող հանգամանքներով՚:
Ամբաստանյալ Վահագն Հակոբյանի անձը բնութագրող տվյալներ, պատասխանատվությունն ու պատիժը մեղմացնող հանգամանքներ դատարանը հաշվի է առնում այն, որ նա ընդունել է մեղքը և անկեղծորեն զղջացել կատարած արարքի համար, նախկինում դատված չի եղել:
Ամբաստանյալի պատասխանատվությունն ու պատիժը ծանրացնող հանգամանք դատարանը չի արձանագրել:
Անդրադառնալով տուժողի կողմից ներկայացված քաղաքացիական հայցին, դատարանը գտնում է, որ այն պետք է բավարարել և ամբաստանյալ Վահագն Հակոբյանից հօգուտ տուժող Սերժիկ Քարիմյանի պետք է բռնագանձել 40.000 ՀՀ դրամ` որպես հանցագործության հետևանքով պատճառված գույքային վնասի հատուցում:
Տուժող Ս.Քարիմյանին ի պահ հանձնված էլեկտրական սղոցը և էլեկտրական շաղափը պետք է թողնել նրա տնօրինմանը:
Ղեկավարվելով ՀՀ քրեական դատավարության օրենսգրքի 134-րդ, 357-360-րդ, 365-րդ, 369-373-րդ, 379-րդ հոդվածներով, դատարանը`

ՎՃՌԵՑ

Վահագն Ռուբենի Հակոբյանին մեղավոր ճանաչել` ՀՀ քրեական օրենսգրքի 177-րդ հոդվածի 1-ին մասով նախատեսված հանցագործության կատարման մեջ և նրա նկատմամբ պատիժ նշանակել տուգանք` նվազագույն աշխատավարձի հարյուրապատիկի` 100.000 /հարյուր հազար/ ՀՀ դրամի չափով:
Վահագն Հակոբյանի նկատմամբ ընտրված խափանման միջոցը` ստորագրություն չհեռանալու մասին, թողնել անփոփոխ` մինչև դատավճռի օրինական ուժի մեջ մտնելը:
Քաղաքացիական հայցը բավարարել և Վահագն Հակոբյանից հօգուտ տուժող Սերժիկ Քարիմյանի բռնագանձել 40.000 /քառասուն հազար/ ՀՀ դրամ` որպես հանցագործության հետևանքով պատճառված գույքային վնասի հատուցում:
Տուժող Ս.Քարիմյանին ի պահ հանձնված էլեկտրական սղոցը և էլեկտրական շաղափը թողնել նրա տնօրինմանը:
Դատավճիռը կարող է բողոքարկվել ՀՀ վերաքննիչ քրեական դատարան հրապարակվելու օրվանից հետո` մեկամսյա ժամկետում:




ԴԱՏԱՎՈՐ Ա.ՄԿՐՏՉՅԱՆ