ԵԱՔԴ/0166/01/12


Դ Ա Տ Ա Վ Ճ Ի Ռ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանը`

նախագահող դատավոր Լ. Ավետիսյան
քարտուղարությամբ` Ն. Ղազարյանի
մասնակցությամբ
մեղադրող` Դ. Կարապետյանի
պաշտպան` Ռ. Սարգսյանի


2012 թվականի դեկտեմբերի 25-ին, Երևան քաղաքում, դռնբաց դատական նիստում, դատական քննության արագացված կարգով քննեց քրեական գործն ըստ մեղադրանքի Սամվել Մամիկոնի Թադևոսյանի, ծնված 1951 թվականի հունվարի 14-ին, Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուրի, խնամքին ոչ ոք, դատվածություն չունեցող, չի աշխատել, հաշվառված է ք.Երևան, Ղափանցյան փողոց 5/12 տուն հասցեում, բնակվել է ք.Երևան, Ղափանցյան փողոց 5/13 տուն հասցեում, մեղադրվում է ՀՀ քրեական օրենսգրքի 268 հոդվածի 3-րդ մասով, ՀՀ քրեական օրենսգրքի 273 հոդվածի 1-ին մասով, կալանքի տակ է 2012 թվականի սեպտեմբերի 26-ից,

Պ Ա Ր Զ Ե Ց

1.Գործի դատավարական նախապատմությունը.
2012 թվականի սեպտեմբերի 26-ին ՀՀ ոստիկանության ՔԳՎ Երևան քաղաքի քննչական վարչության Արաբկիրի քննչական բաժնում ՀՀ քրեական օրենսգրքի 268 հոդվածի 3-րդ մասով նախատեսված հանցագործության հատկանիշներով հարուցվել է թիվ 14129212 քրեական գործը:
2012 թվականի սեպտեմբերի 26-ին Սամվել Մամիկոնի Թադևոսյանը ձերբակալվել է:
2012 թվականի սեպտեմբերի 29-ին նախաքննության մարմնի որոշմամբ Սամվել Մամիկոնի Թադևոսյանը ներգրավվել է որպես մեղադրյալ ՀՀ քրեական օրենսգրքի 268 հոդվածի 3-րդ մասով և ՀՀ քրեական օրենսգրքի 273 հոդվածի 1-ին մասով: Նրա նկատմամբ որպես խափանման միջոց է ընտրվել կալանավորումը:
2012 թվականի դեկտեմբերի 7-ին թիվ 14129212 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
2.Գործի փաստական հանգամանքները.
Նախնական քննության մարմինն ամբաստանյալ Սամվել Մամիկոնի Թադևոսյանին ՀՀ քրեական օրենսգրքի 268 հոդվածի 3-րդ մասով և ՀՀ քրեական օրենսգրքի 273 հոդվածի 1-ին մասով մեղադրանք է առաջադրել այն արարքների կատարման համար, որ նա 2012 թվականի գարնանը, առանց իրացնելու նպատակի, անձնական օգտագործման համար, իր բնակության վայրում` Երևան քաղաքի Ղափանցյան փողոցի 5/12 տան բակում, ապօրինի ցանել և աճեցրել է թվով 60 հատ` ընդհանուր քաշով 5,5 կգ, մշակումն արգելված թմրանյութ պարունակող մշակովի կանեփ տեսակի բույս և 2012 թվականի օգոստոսի 25-ին հավաքելով դրանց կողային ցողունները` ծաղկաբույլերով, նույն տան բակում թիթեղի վրա, արևի տակ չորացնելու եղանակով, ապօրինի մշակել և պատրաստել է առանձնապես խոշոր չափերի` 1,4 կգ քաշով մարիխուաննա տեսակի թմրամիջոց, որը 2012 թվականի օգոստոսի 29-ին հայտնաբերվել և առգրավվել է ոստիկանության աշխատակիցների կողմից:
Այսպիսով, Սամվել Մամիկոնի Թադևոսյանը, առանց իրացնելու նպատակի, ապօրինի ցանել, աճեցրել է մշակումն արգելված մարիխուաննա տեսակի թմրանյութ, ինչպես նաև վերամշակել, պատրաստել և պահել է առանձնապես խոշոր չափի թմրամիջոց:
3. Արագացված դատական քննություն.
Մինչև դատաքննությունն սկսելն ամբաստանյալ Սամվել Մամիկոնի Թադևոսյանը միջնորդեց դատական քննությունն անցկացնել արագացված կարգով և հայտարարեց, որ առաջադրված մեղադրանքն իրեն պարզ է, համաձայն է իրեն առաջադրված մեղադրանքին, գիտակցում է արագացված կարգով դատական քննություն անցկացնելու բնույթն ու հետևանքները, միջնորդությունը ներկայացրել է կամավոր` պաշտպանի հետ խորհրդակցելուց հետո: Միջնորդությունը հաստատեց նաև ամբաստանյալի պաշտպան Ռուբեն Սարգսյանը:
Մեղադրող Դ.Կարապետյանը մեղադրական եզրակացությունը հաստատելիս դատական քննության արագացված կարգ կիրառելուն առարկել է, սակայն դատարանում փոխելով դիրքորոշումը, դատական քննության արագացված կարգ կիրառելուն չառարկեց:
Դատարանը համոզվելով, որ առկա են ՀՀ քրեական դատավարության օրենսգրքի 3751 և 3752 հոդվածներով նախատեսված պայմանները, որոշում է կայացրել դատական քննության արագացված կարգ կիրառելու մասին:
4.Դատարանի իրավական վերլուծությունները.
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Սամվել Մամիկոնի Թադևոսյանին առաջադրված մեղադրանքը ՀՀ քրեական օրենսգրքի 268 հոդվածի 3-րդ մասով և ՀՀ քրեական օրենսգրքի 273 հոդվածի 1-ին մասով հիմնավորված է: Նրա կողմից կատարված արարքները համապատասխանում են ՀՀ քրեական օրենսգրքի 268 հոդվածի 3-րդ մասի և ՀՀ քրեական օրենսգրքի 273 հոդվածի 1-ին մասի հատկանիշներին և արարքների որակումը ճիշտ է:
Ամբաստանյալ Սամվել Թադևոսյանի նկատմամբ պատիժ նշանակելիս, դատարանը հաշվի է առնում նրա կատարած արարքների հանրության համար վտանգավորության աստիճանը, ինչպես նաև հանցավորի անձը:
Որպես ամբաստանյալ Սամվել Թադևոսյանի անձը բնութագրող, պատասխանատվությունը և պատիժը մեղմացնող հանգամանքներ դատարանը հաշվի է առնում այն, որ նա հանցանքն ընդունել և զղջում է կատարածի համար, բնութագրվում է դրական:
Ամբաստանյալի պատասխանատվությունը և պատիժը ծանրացնող հանգամանքներ առկա չեն:
Կատարած արարքների համար ամբաստանյալ Սամվել Մամիկոնի Թադևոսյանը ենթակա է քրեական պատասխանատվության և պատժի:
Հաշվի առնելով Սամվել Թադևոսյանի կատարած արարքների հանրության համար վտանգավորության աստիճանը և բնույթը, նրա անձը, նրան բնութագրող տվյալները, պատասխանատվությունը և պատիժը մեղմացնող հանգամանքները, պատասխանատվությունը և պատիժը ծանրացնող հանգամանքների բացակայությունը, ինչպես նաև այն, որ ՀՀ քրեական օրենսգրքի 268 հոդվածի 3-րդ մասի սանկցիայով նախատեսված է պատիժ միայն ազատազրկման ձևով, իսկ ՀՀ քրեական օրենսգրքի 273 հոդվածի 1-ին մասի սանկցիայով նախատեսված է պատիժ նաև ազատազրկման ձևով, դատարանը գտնում է, որ պատժի նպատակներին հասնելու համար ամբաստանյալ Սամվել Մամիկոնի Թադևոսյանի նկատմամբ ՀՀ քրեական օրենսգրքի 268 հոդվածի 3-րդ մասով և ՀՀ քրեական օրենսգրքի 273 հոդվածի 1-ին մասով նախատեսված հանցանքներ կատարելու համար պատիժ պետք է նշանակել ազատազրկման ձևով, որը նա պետք է կրի, իսկ նրա նկատմամբ կիրառված խափանման միջոցը պետք է թողնել անփոփոխ, մինչև դատավճռի օրինական ուժի մեջ մտնելը:
Անդրադառնալով իրեղեն ապացույցների տնօրինման հարցին, դատարանը գտնում է, որ դատավճիռն օրինական ուժի մեջ մտնելուց հետո, ՀՀ ոստիկանության ՔԳՎ Երևան քաղաքի քննչական վարչության Արաբկիրի քննչական բաժնի քննիչի 04.12.2012թ.-ի որոշումով իրեղեն ապացույց ճանաչված և քրեական գործին կցված, ընդհանուր 5,5 կգ քաշով /Cannabis Sativa/ տեսակի թվով 60 հատ բույսերը /արմատներով, կենտրոնական ցողուններով և տերևներով/ և 1,4 կգ մարիխուանա տեսակի թմրամիջոցը պետք է ոչնչացնել:
Սամվել Մամիկոնի Թադևոսյանի ՙSONY՚ տեսակի բջջային հեռախոսը պետք է վերադարձնել Սամվել Մամիկոնի Թադևոսյանին:
Առգրավված ՙPETRO BERETA՚ տեսակի ՙH20414203՚ համարի, առանց փաստաթղթերի, օդամղիչ ատրճանակը պետք է հանձնել ՀՀ ոստիկանության փորձաքրեագիտական վարչության տնօրինությանը:
Դատարանը գտնում է, որ դատական ծախսերն ամբաստանյալ Սամվել Թադևոսյանից ենթակա չեն բռնագանձման, նկատի ունենալով, որ ՀՀ քրեական դատավարության օրենսգրքի 168 հոդվածի 1-ին մասի 1-ին կետով նախատեսված դատական ծախս սույն քրեական գործով չկա, իսկ 2-8-րդ կետերով նախատեսված դատական ծախսերն արագացված դատական քննության կարգ կիրառելու դեպքում, համաձայն նույն օրենսգրքի 3753 հոդվածի 8-րդ մասի, ամբաստանյալից ենթակա չեն բռնագանձման:
Հաշվի առնելով, որ ՀՀ ԱՆ ՙՀոգեբուժական բժշկական կենտրոն՚ ՓԲԸ-ի Նարկոլոգիական կլինիկայի դատանարկոլոգիական-ամբուլատոր փորձաքննության 31.10.2012թ.-ի թիվ 218/12 եզրակացության համաձայն ամբաստանյալ Սամվել Մամիկոնի Թադևոսյանը տառապում է կանաբինոիդային թմրամոլությամբ, վերջինս հարկադիր բուժման կարիք ունի և դրա համար հակացուցումներ չկան, դատարանը գտնում է, որ Սամվել Մամիկոնի Թադևոսյանի նկատմամբ թմրամոլության դեմ պետք է նշանակել բժշկական բնույթի հարկադրանքի միջոցներ, քանի որ ՀՀ քրեական օրենսգրքի 98 հոդվածի 2-րդ մասի համաձայն մեղսունակությունը չբացառող, բայց թմրամոլությունից բուժման կարիք ունեցող անձանց նկատմամբ դատարանը պատժի հետ մեկտեղ կարող է նշանակել բժշկական բնույթի հարկադրանքի միջոցներ: ՀՀ քրեական օրենսգրքի 103 հոդվածի 1-ին մասի համաձայն նույն օրենսգրքի 98-րդ հոդվածի երկրորդ մասով նախատեսված դեպքերում բժշկական բնույթի հարկադրանքի միջոցները կիրառվում են ըստ ազատազրկումը կրելու վայրի, իսկ այլ պատժատեսակների դատապարտվածների նկատմամբ՝ արտահիվանդանոցային հոգեբուժական օգնություն ցուցաբերող առողջապահական մարմինների հաստատություններում:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 357-360, 3753 և 3754 հոդվածներով, դատարանը

Վ Ճ Ռ Ե Ց

Սամվել Մամիկոնի Թադևոսյանին մեղավոր ճանաչել ՀՀ քրեական օրենսգրքի 268 հոդվածի 3-րդ մասով և ՀՀ քրեական օրենսգրքի 273 հոդվածի 1-ին մասով նախատեսված հանցանքներ կատարելու մեջ:
ՀՀ քրեական օրենսգրքի 268 հոդվածի 3-րդ մասով Սամվել Մամիկոնի Թադևոսյանին դատապարտել ազատազրկման երեք (3) տարի ժամկետով: ՀՀ քրեական օրենսգրքի 273 հոդվածի 1-ին մասով դատապարտել ազատազրկման մեկ (1) տարի ժամկետով:
ՀՀ քրեական օրենսգրքի 66 հոդվածի 4-րդ մասի համաձայն` հանցանքների համակցությամբ պատիժները մասնակիորեն գումարելու միջոցով Սամվել Մամիկոնի Թադևոսյանի նկատմամբ վերջնական պատիժ նշանակել ազատազրկում երեք (3) տարի վեց (6) ամիս ժամկետով:
Սամվել Մամիկոնի Թադևոսյանի նկատմամբ նշանակված պատժի սկիզբը հաշվել 2012 թվականի սեպտեմբերի 26-ից:
Սամվել Մամիկոնի Թադևոսյանի նկատմամբ թմրամոլության դեմ նշանակել հարկադիր բուժում:
Պատիժը պետք է կրի ՀՀ ԱՆ համապատասխան քրեակատարողական հիմնարկում:
Սամվել Մամիկոնի Թադևոսյանի նկատմամբ որպես խափանման միջոց ընտրված կալանավորումը թողնել անփոփոխ, մինչև դատավճռի օրինական ուժի մեջ մտնելը:
Դատավճիռն օրինական ուժի մեջ մտնելուց հետո, իրեղեն ապացույց հանդիսացող և քրեական գործին կցված, ընդհանուր 5,5 կգ քաշով /Cannabis Sativa/ տեսակի թվով 60 հատ բույսերը /արմատներով, կենտրոնական ցողուններով և տերևներով/ և 1,4 կգ մարիխուանա տեսակի թմրամիջոցը ոչնչացնել:
Սամվել Մամիկոնի Թադևոսյանի ՙSONY՚ տեսակի բջջային հեռախոսը վերադարձնել նրան:
Առգրավված ՙPETRO BERETA՚ տեսակի ՙH20414203՚ համարի, առանց փաստաթղթերի, օդամղիչ ատրճանակը հանձնել ՀՀ ոստիկանության փորձաքրեագիտական վարչության տնօրինությանը:
Դատական ծախսերի հարցը համարել լուծված:
Դատավճիռը կարող է բողոքարկվել ՀՀ վերաքննիչ քրեական դատարան հրապարակվելու օրվանից հետո մեկամսյա ժամկետում:
Դատավճիռը չի կարող բողոքարկվել ՀՀ քրեական դատավարության օրենսգրքի 395 հոդվածի 1-ին կետով նախատեսված հիմքով:


Դատավոր` ստորագրություն
Բնագրի հետ ճիշտ է`
Դատավոր Լ. Ավետիսյան