ԵԱՔԴ/0165/01/12
Ո Ր Ո Շ ՈՒ Մ

քրեական հետապնդումը դադարեցնելու և քրեական գործի վարույթը կարճելու մասին

20 դեկտեմբերի 2012թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը` նախագահող դատավոր Լ.Ավետիսյան, քարտուղարությամբ Ն.Ղազարյանի, մասնակցությամբ մեղադրող Է.Պետրոսյանի, ամբաստանյալ Ա.Ղուկասյանի, տուժող Ն.Վարդանյանի, թարգման Հ.Ստեփանյանի, դռնբաց դատական նիստում, քննության առնելով Արեն Առաքելի Ղուկասյանի (ծնված 1976 թվականի նոյեմբերի 26-ին, Վանաձոր քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուրի, խնամքին ոչ ոք, նախկինում չդատված, չի աշխատում, հաշվառված և բնակվում է ք.Վանաձոր, Ռուսթավի փողոց 8 շենք թիվ 10 բնակարան հասցեում, մեղադրվում է ՀՀ քրեական օրենսգրքի 117 հոդվածով, որպես խափանման միջոց է ընտրվել չհեռանալու մասին ստորագրությունը) վերաբերյալ քրեական գործը,

Պ Ա Ր Զ Ե Ց

2012 թվականի հոկտեմբերի 3-ին ՀՀ ոստիկանության ՔԳՎ Երևան քաղաքի քննչական վարչության Քանաքեռ-Զեյթուն քննչական բաժնում ՀՀ քրեական օրենսգրքի 117 հոդվածով նախատեսված հանցագործության հատկանիշներով հարուցվել է թիվ 09112812 քրեական գործը:
2012 թվականի հոկտեմբերի 22-ին նախաքննության մարմնի որոշմամբ Արեն Առաքելի Ղուկասյանը ներգրավվել է որպես մեղադրյալ ՀՀ քրեական օրենսգրքի 117 հոդվածով այն արարքի կատարման համար, որ նա 2012 թվականի օգոստոսի սկզբներին, Երևան քաղաքի Քանաքեռ 1-ին փողոցի 1-ին նրբանցքի 37/1 տանը առաջացած վիճաբանության ընթացքում մետաղե առարկայով հարվածել է Նատալյա Վյաչեսլավի Վարդանյանի գլխին` պատճառելով վերջինիս առողջությանը թեթև վնաս, առողջության կարճատև քայքայումով:
2012 թվականի հոկտեմբերի 22-ին Արեն Առաքելի Ղուկասյանի նկատմամբ որպես խափանման միջոց է ընտրվել չհեռանալու մասին ստորագրությունը:
2012 թվականի նոյեմբերի 28-ին նախաքննության մարմնի որոշմամբ թիվ քրեական գործով Արեն Առաքելի Ղուկասյանի կողմից Ն.Վարդանյանի նկատմամբ բռնաբարության փորձ կատարելու մասով, իսկ Ն.Վարդանյանի կողմից սուտ մատնություն կատարելու մասով, քրեական հետապնդում չի իրականացվել` նրանց գործողություններում հանցակազմի բացակայության պատճառաբանությամբ:
2012 թվականի դեկտեմբերի 4-ին թիվ 09112812 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
Տուժող Նատալյա Վարդանյանը դիմում ներկայացրեց դատարան, հայտնելով, որ ամբաստանյալ Արեն Ղուկասյանի հետ հաշտվել է, նրա դեմ բողոք չունի և չի ցանկանում որպեսզի նա ենթարկվի քրեական պատասխանատվության: Խնդրում է նրա նկատմամբ քրեական հետապնդումը դադարեցնել և նրա վերաբերյալ քրեական գործի վարույթը կարճել:
Ամբաստանյալ Արեն Ղուկասյանը հայտնեց, որ ինքն ու տուժողը հաշտվել են և համաձայն է, որպեսզի իր նկատմամբ քրեական հետապնդումը դադարեցվի և իր վերաբերյալ քրեական գործի վարույթը կարճվի` տուժողի հետ հաշտվելու հիմքով:
Մեղադրող Է.Պետրոսյանը միջնորդեց ամբաստանյալ Արեն Ղուկասյանի նկատմամբ քրեական հետապնդումը դադարեցնել և քրեական գործի վարույթը կարճել:
Վերոգրյալը հաշվի առնելով, դատարանը գտնում է, որ թիվ ԵԱՔԴ/0165/01/12 քրեական գործի վարույթը պետք է կարճել և Արեն Առաքելի Ղուկասյանի նկատմամբ քրեական հետապնդումը դադարեցնել, նկատի ունենալով հետևյալը.
ՀՀ քրեական դատավարության օրենսգրքի 35 հոդվածի 1-ին մասի 5-րդ կետի համաձայն, քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե ՀՀ քրեական դատավարության օրենսգրքով նախատեսված դեպքերում տուժողը հաշտվել է մեղադրյալի հետ:
ՀՀ քրեական դատավարության օրենսգրքի 183 հոդվածի 1-ին մասի համաձայն, ՀՀ քրեական օրենսգրքի 117 հոդվածով նախատեսված հանցագործության վերաբերյալ գործերը հարուցվում են ոչ այլ կերպ, քան տուժողի բողոքի հիման վրա, և կասկածյալի, մեղադրյալի կամ ամբաստանյալի հետ նրա հաշտվելու դեպքում ենթակա են կարճման: Հաշտությունը թույլատրվում է մինչև դատավճիռ կայացնելու համար դատարանի խորհրդակցական սենյակ հեռանալը:
ՀՀ քրեական օրենսգրքի 73 հոդվածի համաձայն, ոչ մեծ ծանրության հանցանք կատարած անձը կարող է ազատվել քրեական պատասխանատվությունից, եթե նա հաշտվել է տուժողի հետ և հատուցել կամ այլ կերպ հարթել է նրան պատճառած վնասը:
ՀՀ քրեական օրենսգրքի 19 հոդվածի 2-րդ մասի համաձայն, ոչ մեծ ծանրության հանցագործություններ են համարվում դիտավորությամբ կատարված այն արարքները, որոնց համար սույն օրենսգրքով նախատեսված առավելագույն պատիժը չի գերազանցում երկու տարի ժամկետով ազատազրկումը, կամ որոնց համար նախատեսված է ազատազրկման հետ կապ չունեցող պատիժ, ինչպես նաև անզգուշությամբ կատարված այն արարքները, որոնց համար սույն օրենսգրքով նախատեսված առավելագույն պատիժը չի գերազանցում երեք տարի ժամկետով ազատազրկումը: ՀՀ քրեական օրենսգրքի 117 հոդվածով նախատեսված արարքները դասվում են ոչ մեծ ծանրության հանցագործությունների շարքին:
ՀՀ քրեական դատավարության օրենսգրքի 35 հոդվածի 4-րդ մասի համաձայն, մեղադրողը, դատարանում հայտնաբերելով քրեական հետապնդումը բացառող հանգամանքներ, պարտավոր է հայտարարել ամբաստանյալի նկատմամբ քրեական հետապնդում իրականացնելուց հրաժարվելու մասին: Ամբաստանյալի նկատմամբ քրեական հետապնդում իրականացնելուց հրաժարվելու մասին մեղադրողի հայտարարությունը դատարանի համար քրեական գործի վարույթը կարճելու և քրեական հետապնդումը դադարեցնելու հիմք է:
Անդրադառնալով ամբաստանյալի նկատմամբ կիրառված խափանման միջոցին` դատարանը գտնում է, որ Արեն Առաքելի Ղուկասյանի նկատմամբ որպես խափանման միջոց կիրառված չհեռանալու մասին ստորագրությունը պետք է վերացնել:
Ելնելով վերոգրյալից և ղեկավարվելով ՀՀ քրեական օրենսգրքի 73 հոդվածով, ՀՀ քրեական դատավարության օրենսգրքի 33 հոդվածի 2-րդ մասով, 35 հոդվածի 1-ին մասի 5-րդ կետով և 4-րդ մասով, 36, 183, 294 և 313 հոդվածներով, դատարանը

Ո Ր Ո Շ Ե Ց

Արեն Առաքելի Ղուկասյանի նկատմամբ ՀՀ քրեական օրենսգրքի 117 հոդվածով քրեական հետապնդումը դադարեցնել և նրա վերաբերյալ թիվ ԵԱՔԴ/0165/01/12 քրեական գործի վարույթը կարճել` ամբաստանյալի հետ տուժող Նատալյա Վյաչեսլավի Վարդանյանի հաշտվելու հիմքով:
Արեն Առաքելի Ղուկասյանի նկատմամբ որպես խափանման միջոց ընտրված չհեռանալու մասին ստորագրությունը վերացնել:
Որոշումը կարող է բողոքարկվել ՀՀ վերաքննիչ քրեական դատարան` հրապարակվելու օրվանից հետո մեկամսյա ժամկետում:

Դատավոր` ստորագրություն
Բնագրի հետ ճիշտ է
Դատավոր Լ. Ավետիսյան