ԵԱՔԴ/0163/01/12

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանը

նախագահող դատավոր Լ. Ավետիսյան
քարտուղարությամբ Ն.Ղազարյանի
մասնակցությամբ
մեղադրող Հ. Սարգսյանի
պաշտպան Կ. Քամալյանի

2012 թվականի դեկտեմբերի 12-ին, Երևան քաղաքում, դռնբաց դատական նիստում, դատական քննության արագացված կարգով, քննեց քրեական գործն ըստ մեղադրանքի Արկադի Հայրապետի Սուքիասյանի, ծնված 1956 թվականի հուլիսի 1-ին, ՎՀ Թբիլիսի քաղաքում, ազգությամբ հայ, ՀՀ քաղաքացի, բարձրագույն կրթությամբ, ամուսնացած, խնամքին ոչ ոք, ֆիզիկապես վատառողջ, նախկինում չդատված, աշխատել է ՙԱրեգ-Նարեկ՚ ՍՊ ընկերությունում որպես տաքսու վարորդ, հաշվառված է ք.Երևան, Զաքարիա Քանաքեռցու փողոց 72 շենք թիվ 85 բնակարան հասցեում, վարձակալությամբ բնակվել է ք.Երևան, Զաքարիա Քանաքեռցու փողոց 72 շենք թիվ 87 բնակարան հասցեում, մեղադրվում է ՀՀ քրեական օրենսգրքի 235 հոդվածի 1-ին մասով, կալանքի տակ է 2012 թվականի հունիսի 13-ից,

Պ Ա Ր Զ Ե Ց

1.Գործի դատավարական նախապատմությունը.
2012թ. հունիսի 11-ին ՀՀ կառավարությանն առընթեր ԱԱԾ քննչական վարչությունում ՀՀ քրեական օրենսգրքի 38-35-104 հոդվածի 2-րդ մասի 7-րդ և 8-րդ կետերով նախատեսված հանցագործության հատկանիշներով հարուցվել է թիվ 58204812 քրեական գործը:
2012թ. նոյեմբերի 12-ին թիվ 58204812 քրեական գործից մեղադրյալ Արկադի Սուքիասյանի կողմից զենք և ռազմամթերք ապօրինի ձեռք բերելու և պահելու մասով անջատվել է առանձին քրեական գործ, որին շնորհվել է 58210812 համարը:
2012թ. հունիսի 15-ին նախաքննության մարմնի որոշմամբ Արկադի Հայրապետի Սուքիասյանը ներգրավվել է որպես մեղադրյալ ՀՀ քրեական օրենսգրքի 235 հոդվածի 1-ին մասով, նրա նկատմամբ որպես խափանման միջոց կիրառվել է կալանավորումը:
2012թ. նոյեմբերի 12-ին նախաքննության մարմնի որոշմամբ թիվ 58210812 քրեական գործով մեղադրյալ Արկադի Սուքիասյանի նկատմամբ` հրազեն և ռազմամթերք հափշտակելու և Ջամալ Սլոյանի սպանության նախապատրաստությանը մասնակցելու դրվագներով քրեական հետապնդում չի իրականացվել` նրա գործողություններում հանցակազմի բացակայության հիմքով, նախատեսված ՀՀ քրեական դատավարության օրենսգրքի 35 հոդվածի 1-ին մասի 2-րդ կետով:
2012թ. նոյեմբերի 23-ին թիվ 58210812 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
2.Գործի փաստական հանգամանքները.
Նախնական քննության մարմինն ամբաստանյալ Արկադի Հայրապետի Սուքիասյանին մեղադրանք է առաջադրել այն արարքի կատարման համար, որ նա 1990-ական թվականներին քննությամբ չպարզված հանգամանքներում ապօրինի ձեռք է բերել և պահել հրազեն` 1981 թվականի գործարանային արտադրության 198355 համարի 5.45 մմ տրամաչափի ՙԱԿ-74՚ մոդելի ինքնաձիգը և դրա համար նախատեսված, ռազմամթերք հանդիսացող 856 հատ գործարանային արտադրության 5.45 մմ տրամաչափի մարտական փամփուշտները, սակայն դրանք 2012 թվականի հունիսի 13-ին խուզարկությամբ հայտնաբերվել են նրա վարձակալած բնակարանում:
3. Արագացված դատական քննություն.
Մինչև դատաքննությունն սկսելն ամբաստանյալ Արկադի Հայրապետի Սուքիասյանը միջնորդեց դատական քննությունն անցկացնել արագացված կարգով և հայտարարեց, որ առաջադրված մեղադրանքն իրեն պարզ է, համաձայն է իրեն առաջադրված մեղադրանքին, գիտակցում է արագացված կարգով դատական քննություն անցկացնելու բնույթն ու հետևանքները, միջնորդությունը ներկայացրել է կամավոր` պաշտպանի հետ խորհրդակցելուց հետո: Միջնորդությունը հաստատեց նաև ամբաստանյալի պաշտպան Կարեն Քամալյանը:
Մեղադրող Հովսեփ Սարգսյանը մեղադրական եզրակացությունը հաստատելիս դատական քննության արագացված կարգ կիրառելուն առարկել է, սակայն դատարանում փոխելով դիրքորոշումը, դատական քննության արագացված կարգ կիրառելուն չառարկեց:
Դատարանը համոզվելով, որ առկա են ՀՀ քրեական դատավարության օրենսգրքի 3751 և 3752 հոդվածներով նախատեսված պայմանները, որոշում է կայացրել դատական քննության արագացված կարգ կիրառելու մասին:
4.Դատարանի իրավական վերլուծությունները.
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Արկադի Հայրապետի Սուքիասյանին առաջադրված մեղադրանքը ՀՀ քրեական օրենսգրքի 235 հոդվածի 1-ին մասով հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 235 հոդվածի 1-ին մասի հատկանիշներին և արարքի որակումը ճիշտ է:
Ամբաստանյալ Արկադի Սուքիասյանի նկատմամբ պատիժ նշանակելիս, դատարանը հաշվի է առնում նրա կատարած արարքի հանրության համար վտանգավորության աստիճանը և բնույթը, ինչպես նաև հանցավորի անձը:
Որպես ամբաստանյալի անձը բնութագրող, պատասխանատվությունը և պատիժը մեղմացնող հանգամանքներ դատարանը հաշվի է առնում այն, որ նա հանցանքն ընդունել և զղջում է կատարածի համար, նախկինում դատված չի եղել, բնութագրվում է դրական, ֆիզիկապես վատառողջ է` 08.01.2009թ. և 05.08.2011թ. կատարվել է ՙկորոնար զարկերակի ստենտավորում՚:
Կատարած արարքի համար ամբաստանյալ Արկադի Հայրապետի Սուքիասյանը ենթակա է քրեական պատասխանատվության և պատժի:
Հաշվի առնելով Արկադի Սուքիասյանի կատարած արարքի հանրության համար վտանգավորության աստիճանը և բնույթը, նրա անձը, նրան դրականորեն բնութագրող տվյալները, պատասխանատվությունն ու պատիժը մեղմացնող հանգամանքները, պատասխանատվությունն ու պատիժը ծանրացնող հանգամանքների բացակայությունը, ինչպես նաև այն, որ ՀՀ քրեական օրենսգրքի 235 հոդվածի 1-ին մասի սանկցիայով նախատեսված է պատիժ միայն ազատազրկման ձևով, դատարանը գտնում է, որ պատժի նպատակներին հասնելու համար ամբաստանյալ Արկադի Հայրապետի Սուքիասյանի նկատմամբ ՀՀ քրեական օրենսգրքի 235 հոդվածի 1-ին մասով նախատեսված հանցանք կատարելու համար պատիժ պետք է նշանակել ազատազրկման ձևով, որը նա պետք է կրի, իսկ նրա նկատմամբ կիրառված խափանման միջոցը պետք է թողնել անփոփոխ, մինչև դատավճռի օրինական ուժի մեջ մտնելը:
Անդրադառնալով իրեղեն ապացույցների տնօրինման հարցին, դատարանը գտնում է, որ դատավճիռն օրինական ուժի մեջ մտնելուց հետո, 2012 թվականի նոյեմբերի 12-ի որոշմամբ իրեղեն ապացույց ճանաչված և ՀՀ ոստիկանության փորձաքրեագիտական վարչությունում պահվող, Արկադի Սուքիասյանի վարձակալած բնակարանից խուզարկությամբ հայտնաբերված 1981 թվականի գործարանային արտադրության 198355 համարի 5.45 մմ տրամաչափի ՙԱԿ-74՚ մոդելի ինքնաձիգը և դրա համար նախատեսված 3 հատ պահունակները, լիցքավորված ՙԱԿ-74՚ մոդելի ինքնաձիգի համար նախատեսված 5.45 մմ տրամաչափի 90 հատ մարտական փամփուշտները և ռազմամթերք հանդիսացող 856 հատ գործարանային արտադրության 5.45 մմ տրամաչափի մարտական փամփուշտները, պետք է թողնել ՀՀ ոստիկանության փորձաքրեագիտական վարչության տնօրինությանը:
ՀՀ կառավարությանն առընթեր ԱԱԾ քննչական վարչության ՀԿԳ ավագ քննիչի 12.11.2012թ.-ի այլ փաստաթուղթն ապացույց ճանաչելու մասին որոշումով ապացույց ճանաչված և քրեական գործին կցված Արկադի Հայրապետի Սուքիասյանին 13.06.2012թ. բերման ենթարկելու արձանագրությունը պետք է պահել քրեական գործի հետ միասին:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 357-360, 3753 և 3754 հոդվածներով, դատարանը

Վ Ճ Ռ Ե Ց

Արկադի Հայրապետի Սուքիասյանին մեղավոր ճանաչել ՀՀ քրեական օրենսգրքի 235 հոդվածի 1-ին մասով նախատեսված հանցանք կատարելու մեջ և նրան դատապարտել ազատազրկման մեկ (1) տարի վեց (6) ամիս ժամկետով:
Պատժի սկիզբը հաշվել 2012 թվականի հունիսի 13-ից:
Պատիժը պետք է կրի ՀՀ ԱՆ համապատասխան քրեակատարողական հիմնարկում:
Արկադի Հայրապետի Սուքիասյանի նկատմամբ որպես խափանման միջոց ընտրված կալանավորումը թողնել անփոփոխ, մինչև դատավճռի օրինական ուժի մեջ մտնելը:
Դատավճիռն օրինական ուժի մեջ մտնելուց հետո իրեղեն ապացույց հանդիսացող, ՀՀ ոստիկանության փորձաքրեագիտական վարչությունում պահվող 1981 թվականի գործարանային արտադրության 198355 համարի 5.45 մմ տրամաչափի ՙԱԿ-74՚ մոդելի ինքնաձիգը և դրա համար նախատեսված 3 հատ պահունակները, լիցքավորված ՙԱԿ-74՚ մոդելի ինքնաձիգի համար նախատեսված 5.45 մմ տրամաչափի 90 հատ մարտական փամփուշտները և ռազմամթերք հանդիսացող 856 հատ գործարանային արտադրության 5.45 մմ տրամաչափի մարտական փամփուշտները թողնել ՀՀ ոստիկանության փորձաքրեագիտական վարչության տնօրինությանը:
Ապացույց ճանաչված և քրեական գործին կցված, Արկադի Հայրապետի Սուքիասյանին 13.06.2012թ. բերման ենթարկելու արձանագրությունը պահել քրեական գործի հետ միասին:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակվելու օրվանից հետո մեկամսյա ժամկետում:
Դատավճիռը չի կարող բողոքարկվել ՀՀ քրեական դատավարության օրենսգրքի 395 հոդվածի 1-ին կետով նախատեսված հիմքով:

Դատավոր` ստորագրություն
Բնագրի հետ ճիշտ է
Դատավոր Լ. Ավետիսյան