ԵԱՔԴ/0159/01/12
Ո Ր Ո Շ ՈՒ Մ

քրեական հետապնդումը դադարեցնելու և քրեական գործի վարույթը կարճելու մասին

17 դեկտեմբերի 2012թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը` նախագահող դատավոր Լ.Ավետիսյան, քարտուղարությամբ Ն.Ղազարյանի, մասնակցությամբ մեղադրող Ռ.Խաչատրյանի, ամբաստանյալներ Ա.Անանյանի, Է.Անանյանի, տուժող Վ.Հովհաննիսյանի, դռնբաց դատական նիստում, քննության առնելով Աշոտ Վարուժանի Անանյանի (ծնված 1983 թվականի հոկտեմբերի 29-ին, Երևան քաղաքում, ազգությամբ հայ, ՀՀ քաղաքացի, բարձրագույն կրթությամբ, ֆիզիկապես առողջ, ամուրի, խնամքին ոչ ոք, նախկինում չդատված, չի աշխատում, հաշվառված է ք.Երևան, Մամիկոնյանց փողոց 38 շենք թիվ 23 բնակարան հասցեում, բնակվում է ք.Երևան, Զաքյան փողոց 1-ին նրբանցք 1-ին շենք թիվ 43 բնակարան հասցեում, մեղադրվում է ՀՀ քրեական օրենսգրքի 117 հոդվածով, որպես խափանման միջոց է ընտրվել չհեռանալու մասին ստորագրությունը) և Էդգար Վարուժանի Անանյանի (ծնված 1981 թվականի նոյեմբերի 1-ին, Երևան քաղաքում, ազգությամբ հայ, ՀՀ քաղաքացի, բարձրագույն կրթությամբ, ֆիզիկապես առողջ, ամուրի, խնամքին ոչ ոք, նախկինում չդատված, չի աշխատում, հաշվառված է ք.Երևան, Մամիկոնյանց փողոց 38 շենք թիվ 23 բնակարան հասցեում, բնակվում է ք.Երևան, Զաքյան փողոց 1-ին նրբանցք 1-ին շենք թիվ 43 բնակարան հասցեում, մեղադրվում է ՀՀ քրեական օրենսգրքի 117 հոդվածով, որպես խափանման միջոց է ընտրվել չհեռանալու մասին ստորագրությունը) վերաբերյալ քրեական գործը,

Պ Ա Ր Զ Ե Ց

2012 թվականի սեպտեմբերի 14-ին ՀՀ ոստիկանության ՔԳՎ Երևան քաղաքի քննչական վարչության Արաբկիրի քննչական բաժնում ՀՀ քրեական օրենսգրքի 117 հոդվածով նախատեսված հանցագործության հատկանիշներով հարուցվել է թիվ 14127512 քրեական գործը:
2012 թվականի սեպտեմբերի 28-ին Աշոտ Վարուժանի Անանյանի և Էդգար Վարուժանի Անանյանի նկատմամբ որպես խափանման միջոց ընտրվել է չհեռանալու մասին ստորագրությունը:
2012 թվականի հոկտեմբերի 04-ին նախաքննության մարմնի որոշմամբ Աշոտ Վարուժանի Անանյանը ներգրավվել է որպես մեղադրյալ ՀՀ քրեական օրենսգրքի 117 հոդվածով, այն արարքի կատարման համար, որ նա 2012 թվականի հուլիսի 28-ին, ժամը 1430-ի սահմաններում, Երևան քաղաքի Ն.Տիգրանյան փողոցի 9/1 հասցեում տեղակայված թիվ 54 ավագ դպրոցի բակում, անձնական հարցերի պարզաբանման նպատակով տեղի ունեցած վիճաբանության ընթացքում, եղբոր` Էդգար Վարուժանի Անանյանի հետ միասին, մարմնական վնասվածք հասցնելու դիտավորությամբ, ձեռքերով և ոտքերով հարվածներ է հասցրել Վահե Վալերիկի Հովհաննիսյանի մարմնի տարբեր հատվածներին` պատճառելով առողջության թեթև վնաս, ինչն արտահայտվել է գանգուղեղային փակ վնասվածքի, քթի ոսկրերի փակ կոտրվածքի, ճակատային աջ թմբկության շրջանի, ձախ այտային շրջանի սալջարդ վերքերի ձևով:
2012 թվականի հոկտեմբերի 04-ին նախաքննության մարմնի որոշմամբ Էդգար Վարուժանի Անանյանը ներգրավվել է որպես մեղադրյալ ՀՀ քրեական օրենսգրքի 117 հոդվածով, այն արարքի կատարման համար, որ նա 2012 թվականի հուլիսի 28-ին, ժամը 1430-ի սահմաններում, Երևան քաղաքի Ն.Տիգրանյան փողոցի 9/1 հասցեում տեղակայված թիվ 54 ավագ դպրոցի բակում, անձնական հարցերի պարզաբանման նպատակով տեղի ունեցած վիճաբանության ընթացքում, եղբոր` Աշոտ Վարուժանի Անանյանի հետ միասին, մարմնական վնասվածք հասցնելու դիտավորությամբ, ձեռքերով և ոտքերով հարվածներ է հասցրել Վահե Վալերիկի Հովհաննիսյանի մարմնի տարբեր հատվածներին` պատճառելով առողջության թեթև վնաս, ինչն արտահայտվել է գանգուղեղային փակ վնասվածքի, քթի ոսկրերի փակ կոտրվածքի, ճակատային աջ թմբկության շրջանի, ձախ այտային շրջանի սալջարդ վերքերի ձևով:
2012 թվականի նոյեմբերի 19-ին թիվ 14127512 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
Տուժող Վահե Հովհաննիսյանը դիմում ներկայացրեց դատարան, հայտնելով, որ ամբաստանյալներ Աշոտ և Էդգար Անանյանների հետ հաշտվել է: Նյութական պահանջ չունի և խնդրում է նրանց քրեական պատասխանատվության չենթարկել և նրանց վերաբերյալ քրեական գործը կարճել:
Ամբաստանյալներ Աշոտ և Էդգար Անանյանները հայտնեցին, որ հաշտվել են տուժողի հետ և համաձայն են, որպեսզի իրենց նկատմամբ քրեական հետապնդումը դադարեցվի և իրենց վերաբերյալ քրեական գործի վարույթը կարճվի` տուժողի հետ հաշտվելու հիմքով:
Մեղադրող Ռ.Խաչատրյանը միջնորդեց ամբաստանյալներ Աշոտ և Էդգար Վարուժանի Անանյանների նկատմամբ քրեական հետապնդումը դադարեցնել և քրեական գործի վարույթը կարճել` ամբաստանյալների հետ տուժողի հաշտվելու հիմքով:
Վերոգրյալը հաշվի առնելով, դատարանը գտնում է, որ թիվ ԵԱՔԴ/0159/01/12 քրեական գործի վարույթը պետք է կարճել և Աշոտ և Էդգար Վարուժանի Անանյանների նկատմամբ քրեական հետապնդումը դադարեցնել, նկատի ունենալով հետևյալը.
ՀՀ քրեական դատավարության օրենսգրքի 35 հոդվածի 1-ին մասի 5-րդ կետի համաձայն, քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե ՀՀ քրեական դատավարության օրենսգրքով նախատեսված դեպքերում տուժողը հաշտվել է մեղադրյալի հետ:
ՀՀ քրեական դատավարության օրենսգրքի 183 հոդվածի 1-ին մասի համաձայն, ՀՀ քրեական օրենսգրքի 117 հոդվածով նախատեսված հանցագործության վերաբերյալ գործերը հարուցվում են ոչ այլ կերպ, քան տուժողի բողոքի հիման վրա, և կասկածյալի, մեղադրյալի կամ ամբաստանյալի հետ նրա հաշտվելու դեպքում ենթակա են կարճման: Հաշտությունը թույլատրվում է մինչև դատավճիռ կայացնելու համար դատարանի խորհրդակցական սենյակ հեռանալը:
ՀՀ քրեական օրենսգրքի 73 հոդվածի համաձայն, ոչ մեծ ծանրության հանցանք կատարած անձը կարող է ազատվել քրեական պատասխանատվությունից, եթե նա հաշտվել է տուժողի հետ և հատուցել կամ այլ կերպ հարթել է նրան պատճառած վնասը:
ՀՀ քրեական օրենսգրքի 19 հոդվածի 2-րդ մասի համաձայն, ոչ մեծ ծանրության հանցագործություններ են համարվում դիտավորությամբ կատարված այն արարքները, որոնց համար սույն օրենսգրքով նախատեսված առավելագույն պատիժը չի գերազանցում երկու տարի ժամկետով ազատազրկումը, կամ որոնց համար նախատեսված է ազատազրկման հետ կապ չունեցող պատիժ, ինչպես նաև անզգուշությամբ կատարված այն արարքները, որոնց համար սույն օրենսգրքով նախատեսված առավելագույն պատիժը չի գերազանցում երեք տարի ժամկետով ազատազրկումը: ՀՀ քրեական օրենսգրքի 117 հոդվածով նախատեսված արարքները դասվում են ոչ մեծ ծանրության հանցագործությունների շարքին:
ՀՀ քրեական դատավարության օրենսգրքի 35 հոդվածի 4-րդ մասի համաձայն, մեղադրողը, դատարանում հայտնաբերելով քրեական հետապնդումը բացառող հանգամանքներ, պարտավոր է հայտարարել ամբաստանյալի նկատմամբ քրեական հետապնդում իրականացնելուց հրաժարվելու մասին: Ամբաստանյալի նկատմամբ քրեական հետապնդում իրականացնելուց հրաժարվելու մասին մեղադրողի հայտարարությունը դատարանի համար քրեական գործի վարույթը կարճելու և քրեական հետապնդումը դադարեցնելու հիմք է:
Անդրադառնալով ամբաստանյալների նկատմամբ կիրառված խափանման միջոցին` դատարանը գտնում է, որ Աշոտ և Էդգար Վարուժանի Անանյանների նկատմամբ որպես խափանման միջոց կիրառված չհեռանալու մասին ստորագրությունը պետք է վերացնել:
ՀՀ ոստիկանության ՔԳՎ Երևան քաղաքի քննչական վարչության Արաբկիրի քննչական բաժնի ավագ քննիչի 07.11.2012թ.-ի այլ փաստաթուղթն ապացույց ճանաչելու մասին որոշումով ապացույց ճանաչված և քրեական գործի նյութերին կցված տեսուչ Ս.Հարությունյանի զեկուցագիրը պետք է պահել քրեական գործի հետ միասին:
Ելնելով վերոգրյալից և ղեկավարվելով ՀՀ քրեական օրենսգրքի 73 հոդվածով, ՀՀ քրեական դատավարության օրենսգրքի 33 հոդվածի 2-րդ մասով, 35 հոդվածի 1-ին մասի 5-րդ կետով, 36, 183, 294 և 313 հոդվածներով, դատարանը

Ո Ր Ո Շ Ե Ց

Աշոտ Վարուժանի Անանյանի նկատմամբ ՀՀ քրեական օրենսգրքի 117 հոդվածով և Էդգար Վարուժանի Անանյանի նկատմամբ ՀՀ քրեական օրենսգրքի 117 հոդվածով քրեական հետապնդումը դադարեցնել և նրանց վերաբերյալ թիվ ԵԱՔԴ/0159/01/12 քրեական գործի վարույթը կարճել` ամբաստանյալների հետ տուժող Վահե Հովհաննիսյանի հաշտվելու հիմքով:
Աշոտ Վարուժանի Անանյանի և Էդգար Վարուժանի Անանյանի նկատմամբ որպես խափանման միջոց ընտրված չհեռանալու մասին ստորագրությունը վերացնել:
Ապացույց ճանաչված և քրեական գործին կցված զեկուցագիրը պահել քրեական գործի հետ միասին:
Որոշումը կարող է բողոքարկվել ՀՀ վերաքննիչ քրեական դատարան` հրապարակվելու օրվանից հետո մեկամսյա ժամկետում:

Դատավոր` ստորագրություն
Բնագրի հետ ճիշտ է
Դատավոր Լ. Ավետիսյան