Գործ N ԵԱՔԴ/0158/01/12

ՈՐՈՇՈՒՄ

ՔՐԵԱԿԱՆ ԳՈՐԾԻ ՎԱՐՈՒՅԹԸ ԿԱՐՃԵԼՈՒ ԵՎ ՔՐԵԱԿԱՆ
ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ՄԱՍԻՆ

19.12.2012թ. ք. Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը`

նախագահությամբ` դատավոր Ա.Մկրտչյանի
քարտուղարությամբ` Շ.Վանոյանի
մասնակցությամբ`
մեղադրող Դ.Կարապետյանի
պաշտպան Հ.Բաբայանի

Դատարանում, դռնբաց դատական նիստում քննության առնելով քրեական գործն ըստ մեղադրանքի` Արմեն Վոլոդի Նաղդալյանի /31.08.1957թ., Ադրբ. ՍՍՀ Դաշքեսանի շրջանի Շահումյան գյուղում, ազգությամբ հայ, ՀՀ քաղաքացի, բարձրագույն կրթությամբ, չի աշխատում, ամուսնացած, նախկինում չդատված, բնակվում է ք.Չարենցավան 4-րդ թաղամաս 13-րդ շենքի 37-րդ բնակարանում/:
Մեղադրվում է ՀՀ քրեական օրենսգրքի 188-րդ հոդվածի 1-ին մասով:

Պ Ա Ր Զ Ե Ց

Նախաքննության մարմինն ամբաստանյալ Արմեն Նաղդալյանին ՀՀ քրեական օրենսգրքի 188-րդ հոդվածի 1-ին մասով մեղադրանք է առաջադրել այն արարքի համար, որ ՙնա խախտելով ՙԼիցենզավորման՚ մասին օրենքի 43-րդ հոդվածի պահանջները, առանց պետական գրանցման, հաշվառման, առանց հատուկ թույլտվության 2010թ. հուլիս ամսից հոկտեմբեր ամիսների ընթացքում Կոտայքի մարզի առինջ գյուղում իրականացրել է լիցենզավորման ենթակա ձեռնարկատիրական գործունեություն, որը զուգորդվել է պետությանը զգալի չափերով` 752.000 ՀՀ դրամի վնաս պատճառելով:
Արմեն Նաղդալյանը Կոտայքի մարզի Առինջ գյուղի Պ.Սևակի 8-րդ թաղամասի 1/1 հասցեում շինարարություն կատարելու նպատակով պայմանավորվածության է եկել Հովիկ Մանսերյանի հետ , վերջինիցս ստացել է 33.000 ԱՄՆ դոլարին համարժեք գումար, որի դիմաց Արմեն Նաղդալյանը կատարել է շինարարություն, որի ընթացքում հրավիրել է անձանց, որոնք կատարել են տարբեր շինարարական աշխատանքներ և վարձատրել է նրանց՚:
Դատական քննության նախապատրաստական փուլում ամբաստանյալ Արմեն նաղդալյանի շահերի պաշտպան Հ.Բաբայանը միջնորդություն է ներկայացրել դատարան Ա.Նաղդալյանի նկատմամբ քրեական հետապնդումը դադարեցնելու և քրեական գործի վարույթը կարճելու մասին այն պատճառաբանությամբ, որ ՀՀ քրեական օրենսգրքի 75-րդ հոդվածի համաձայն անցել են քրեական պատասխանատվության ենթարկելու վաղեմության ժամկետները:
Ամբաստանյալ Արմեն Նաղդալյանը չառարկեց վաղեմության ժամկետներն անցնելու հիմքով քրեական գործի վարույթը կարճելու և քրեական հետապնդումը դադարեցնելու միջնորդության դեմ:
Դատարանը գտնում է, որ նշված պայմաններում քրեական գործի վարույթը ենթակա է կարճման, իսկ քրեական հետապնդումը` դադարեցման հետևյալ պատճառաբանությամբ.
ՀՀ քրեական օրենսգրքի 19-րդ հոդվածի 2-րդ մասի համաձայն` ՀՀ քրեական օրենսգրքի 188-րդ հոդվածը դասվում է ոչ մեծ ծանրության հանցագործությունների շարքին:
ՀՀ քրեական օրենսգրքի 75-րդ հոդվածի 1-ին մասի 1-ին կետի համաձայն` անձն ազատվում է քրեական պատասխանատվությունից, եթե ոչ մեծ ծանրության հանցանքն ավարտված համարելու օրվանից անցել է երկու տարի:
Արմեն Նաղդալյանի հանցանքն ավարտվել է 2010 թվականի հոկտեմբեր ամսին և վաղեմության ժամկետի ընթացքը ընդհատված չի եղել նոր հանցագործությամբ:
Ղեկավարվելով ՀՀ քրեական դատավարության օրենսգրքի 35-րդ հոդվածի 1-ին մասի 6-րդ կետով, 379-րդ հոդվածներով դատարանը`

Ո Ր Ո Շ Ե Ց

ՀՀ քրեական օրենսգրքի 188-րդ հոդվածի 1-ին մասի հատկանիշներով հարուցված թիվ 20123711 քրեական գործի վարույթը կարճել և Արմեն Վոլոդի Նաղդալյանի նկատմամբ քրեական հետապնդումը դադարեցնել` վաղեմության ժամկետներն անցնելու հիմքով:
Արմեն Նաղդալյանի նկատմամբ ընտրված խափանման միջոցը` ստորագրություն չհեռանալու մասին, վերացնել:

Որոշումը մեկամսյա ժամկետում կարող է բողոքարկվել ՀՀ վերաքննիչ քրեական դատարան:





ԴԱՏԱՎՈՐ Ա.ՄԿՐՏՉՅԱՆ