Գործ N ԵԱՔԴ/0154/01/12
ԴԱՏԱՎՃԻՌ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

25 դեկտեմբերի 2012թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը`

նախագահությամբ` դատավոր Ա.Մկրտչյանի
քարտուղարությամբ Օ.Կիրակոսյանի
Շ.Վանոյանի
մասնակցությամբ`
մեղադրողներ Է.Պետրոսյանի
Ա.Քալաշյանի
տուժող Հ.Վարդանյանի

Դատարանում, դռնբաց դատական նիստում քննեց քրեական գործն ըստ մեղադրանքի` Շահեն Նվերի Գրիգորյանի /ծնված 22.06.1991թ., ք.Երևան, ազգությամբ հայ, ՀՀ քաղաքացի, միջնակարգ կրթությամբ, անհատ ձեռնակատեր, տաքսու վարորդ, չամուսնացած, չդատված, հաշվառված` ք.Երևան, Ա.Խաչատրյան փողոց, 4 շենք, 34 բնակարան/:
Մեղադրվում է ՀՀ քրեական օրենսգրքի 113-րդ հոդվածի 1-ին մասով:

Գործի դատավարական նախապատմությունը
2012 թվականի հուլիսի 07-ին տեղի է ունեցել դեպքը:
2012 թվականի սեպտեմբերի 11-ին հարուցվել է թիվ 14126512 քրեական գործը£
2012 թվականի սեպտեմբերի 26-ին Շահեն Գրիգորյանին մեղադրանք է առաջադրվել ՀՀ քրեական օրենսգրքի 113-րդ հոդվածի 1-ին մասով և խափանման միջոց է ընտրվել ստորագրություն չհեռանալու մասին:
2012 թվականի նոյեմբերի 12-ին թիվ 14126512 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան:

Գործի փաստական հանգամանքները
Նախաքննության մարմինն ամբաստանյալ Շահեն Գրիգորյանին ՀՀ քրեական օրենսգրքի 113-րդ հոդվածի 1-ին մասով մեղադրանք է առաջադրել այն արարքի համար, որ ՙնա 2012 թվականի հուլիսի 7-ին, ժամը 21:45-ի սահմաններում, Երևան քաղաքի ՙԲարեկամության՚ հրապարակից դեպի Կիևյան փողոց տանող հատվածում, տաքսի ավտոմեքենայով ուղևաորփոխադրում կատարելու վերաբերյալ տեղի ունեցած վիճաբանության ընթացքում, մարմնական վնասվածք հասցնելու դիտավորությամբ, գլխով, ապա ձեռքով հարվածել է Հովհաննես Մկրտիչի Վարդանյանի դեմքին` պատճառելով առողջության միջին ծանրության վնաս, ինչն արտահայտվել է զույգ ստորին կոպերի ենթամաշկային հեմատոմայի, աջ ստորին, ձախ վերին և ստորին կոպերի, ձախ ակնագնդի սպիտակուցաթաղանթի արյունազեղումների, քթի շրջանների քերծվածքների, ձախ հոնքի և ձախ այտային շրջանների վերքերի, քթոսկրերի բազմաբեկորային կոտրվածքների, ձախ աչքի տեսողության իջեցման ձևով՚:

Ապացույցների հետազոտում
Առաջադրված մեղադրանքում ամբաստանյալ Շահեն Գրիգորյանն իրեն մեղավոր չի ճանաչել, և ցուցմունք է տվել այն մասին, որ իր անձնական ՙՕպել Վեկտրա Բ՚ մակնիշի 19 ՏՕ 257 պետհամարանիշի ավտոմեքենայով մատուցել է տաքսի ծառայություններ: Հիմնականում երեկոյան ժամերին կայանել է Երևանի ՙԲարեկամություն՚ հրապարակից դեպի Կիևյան փողոց տանող հատվածում, ավտոկանգառից վերև, դեպի աջ: Դեպքի օրը, սովորականի պես, ժամը մոտավորապես 21:45-ի սահմաններում, կանգառել է այնտեղ: Նշած վայրում եղել է նաև իրեն նախկինում անծանոթ Հովհաննես Վարդանյանի ՙԳազ 24՚ մակնիշի ավտոմեքենան: Րոպեներ անց երկու երիտասարդ տղաներ մոտեցել են և նստել իր մեքենան: Այդ պահին Հ.Վարդանյանը, դուրս գալով իր մեքենայից, մոտեցել է դեպի իր կողմ, սկսել է պատուհանից իր հետ խոսել, ասելով, թե ինքը նրանից ինչու է հաճախորդ տանում: Ուղևորներին հասկացրել է, որ նրանք կարող են գնալ վերջինիս մեքենայով, սակայն ուղևորներն ասել են, որ չեն ցանկանում նստել այդ մեքենան, քանի որ այն հին և մաշված է ու պնդել են, որ իր հետ ուղևորվեն: Դրանից հետո գործարկել է ավտոմեքենայի շարժիչը, որ հեռանա ու հենց նույն պահին Հ.Վարդանյանը հայհոյել է իրեն: Անմիջապես դուրս է եկել ավտոմեքենայից, մոտեցել նրան և մեկ անգամ գլխով հարվածել է նրա դեմքին:

Ամբաստանյալ Շահեն Գրիգորյանին մեղսագրվող արարքը հիմնավորվել է դատաքննությամբ հետազոտված ներքոհիշյալ ապացույցներով.

Գործով տուժող Հովհաննես Վարդանյանը դատաքննության փուլում ցուցմունք է տվել այն մասին, որ իր անձնական օգտագործման ՙԳազ-24՚ մակնիշի, 65 ԼՏ 675 պետհամարանիշի ավտոմեքենայով հաճախ մատուցել է տաքսի ծառայություներ, ինչով էլ հոգացել է ընտանիքի ծախսերը: Սովորաբար կայանել է Երևան քաղաքի ՙԲարեկամություն՚ հրապարակից դեպի Կիևայն փողոց տանող հատվածում: 2012 թվականի հուլիսի 7-ին, ժամը 21:45-ին սահմաններում, ավտոմեքենայով կանգնած է եղել նշված վայրում: Այդ պահին իր ավտոմեքենայի հետնամասում կայանել է մուգ կապույտ գույնի ՙՕպել՚ մակինիշի տաքսի ավտոմեքենա: Մի քանի րոպե անց, դուրս է եկել ավտոմեքենայից, մոտեցել է նշված մեքենայի վարորդին և խնդրել, որ հաճախորդ գալու դեպքում առաջինը ինքը սպասարկի, քանի որ երկար ժամանակ կանգնած է եղել այնտեղ: Վարորդը մոտավորապես 20-22 տարեկան երիտասարդ է եղել, որը, ինչպես հետագայում իմացել է, Շահեն Գրիգորյանն է: Վերջինս իրեն պատասխանել է, որ եթե իր ավտոմեքենայի դուռը հաճախորդ բացի, ապա ինքն է սպասարկելու: Տեսնելով, որ նա իր խնդրանքին չի ընդառաջում, ինքը ասել է, որ վերաբերմունքն անմարդկային է և հեռացել դեպի իր ավտոմեքենայի կողմը: Մի քանի րոպե անց նրա ավտոմեքենան նստել են երկու երիտասարդ, ինքը կրկին մոտեցել և խնդրել է, որ այդ ուղևորներին սպասարկի անձամբ, սակայն Շահենը պատասխանել է, որ միևնույն է ինքն է սպասարկելու: Շահենն այդ պահին եկել է իր հետևից և հասնելով մեքենաների մեջտեղի հատվածը, վրդովված տոնով պարզաբանումներ է պահանջել իրենից: Ինքն անգամ չի հասցրել որևէ բան խոսել, երբ Շ.Գրիգորյանը հանկարծակի գլխով խփել է դեմքին, որից հետո, աջ ձեռքով ևս մեկ հարված է հասցրել ձախ աչքին և արագ մոտեցել է իր ավտոմեքենային ու հեռացել ուղևորների հետ: Հենց նույն պահին իրեն են մոտեցել ոստիկանության աշխատակիցները և հրավիրել ոստիկանության Երևան քաղաքի վարչության Արաբկիրի բաժին, որտեղ ինքը կատարվածի մասին տվել է համապատասխան հաղորդում ու բացատրություն: Տուժողը նշել է, որ Շահեն Գրիգորյանն իր առողջությանը դիտավորությամբ միջին ծանրության վնաս պատճառելու համար պետք է ենթարկվի քրեական պատասխանատվության:

Դատաբժշկական փորձաքննության թիվ 2028 եզրակացության համաձայն` Հ.Վարդանյանի մարմնական վնասվածքները ` զույգ ստորին կոպերի ենթամաշկային հեմատոմայի, աջ ստորին, ձախ վերին և ստորին կոպերի, ձախ ակնագնդի սպիտակուցաթաղանթի արյունազեղումների, քթի շրջանի քերծվածքների, ձախ հոնքի և ձախ այտային շրջանների վերքերի, քթոսկրերի բազմաբեկորային կոտրվածքների` բեկորների սեղմումով, ձախից քթային շնչառության միջին աստիճանի դժվարացման, ձախ աչքի տեսողության իջեցման /0.9/ ձևով, հասցվել են բութ, կոշտ առարկաներով, որոնք առաջացրել են առողջության միջին ծանրության վնաս` առողջության տևական քայքայումով:
գ/թ 17-19

Քրեական գործով ապացույց ճանաչված, այլ փաստաթուղթ հանդիսացող 2012 թվականի հուլիսի 7-ին ՀՀ ոստիկանության ՊՊԾ գնդի 2-րդ գումարտակի 2-րդ վաշտի 2-րդ դասակի ջոկի հրամանատար, ոստիկանության ենթասպա Մ.Հարությունյանի կողմից ոստիկանության Երևան քաղաքի վարչության Արաբկիրի բաժնի պետի պաշտոնակատար Ա.Մարգարյանին ներկայացված զեկուցագրի համաձայն` հաստատվել է Շ.Գրիգորյանի կողմից տուժող Հ.Վարդանյանի առողջությանը դիտվորությամբ միջին ծանրության վնաս պատճառելու հանգամանքը:
գ/թ 4, 60

Դատարանի իրավական վերլուծությունները
Դատարանը հետազոտելով գործով ձեռք բերված յուրաքանչյուր ապացույց, գնահատելով թույլատրելիության վերաբերելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, ղեկավարվելով օրենքով, ներքին համոզմամբ, գտնում է, որ ամբաստանյալ Շահեն Գրիգորյանի մեղավորությունը` դիտավորությամբ Հովհաննես Վարդանյանի առողջությանը միջին ծանրության վնաս պատճառելու մեջ, որը նախատեսված է ՀՀ քրեական օրենսգրքի 113-րդ հոդվածի 1-ին մասով, ապացուցված է:
Վերոհիշյալ հանցանքի կատարման համար ամբաստանյալը ենթակա է քրեական պատասխանատվության և պատժի, որը նա պետք է կրի:
Պատիժ նշանակելիս դատարանը հաշվի է առնում հանցագործության հանրության համար վտանգավորության աստիճանն ու բնույթը, ինչպես նաև անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները:
Ամբաստանյալ Շահեն Գրիգորյանի անձը բնութագրող տվյալներ, պատասխանատվությունն ու պատիժը մեղմացնող հանգամանքներ դատարանը հաշվի է առնում այն, որ նա նախկինում դատված չի եղել, առաջին անգամ հանգամանքների պատահական զուգորդմամբ կատարել է ոչ մեծ ծանրության հանցանք:
Ամբաստանյալի պատասխանատվությունն ու պատիժը ծանրացնող հանգամանք դատարանը չի արձանագրել:
Դատարանը գտնում է, որ Հ.Վարդանյանի կողմից ներկայացված քաղաքացիական հայցը պետք է բավարարել, և ամբաստանյալ Շահեն Գրիգորյանից հօգուտ տուժող Հովհաննես Վարդանյանի բռնագանձել 50.000 /հիսուն հազար/ ՀՀ դրամ` որպես հանցագործության հետևանքով պատճառված նյութական վնասի հատուցում:
Ղեկավարվելով ՀՀ քրեական դատավարության օրենսգրքի 134-րդ, 357-360-րդ, 365-րդ, 369-373-րդ, 379-րդ հոդվածներով, դատարանը`

ՎՃՌԵՑ

Շահեն Նվերի Գրիգորյանին մեղավոր ճանաչել` ՀՀ քրեական օրենսգրքի 113-րդ հոդվածի 1-ին մասով նախատեսված հանցագործության կատարման մեջ և նրա նկատմամբ պատիժ նշանակել կալանք 2 /երկու/ ամիս ժամկետով:
Շահեն Գրիգորյանի նկատմամբ ընտրված խափանման միջոցը` ստորագրություն չհեռանալու մասին, թողնել անփոփոխ` մինչև դատավճռի օրինական ուժի մեջ մտնելը:
Քաղաքացիական հայցը բավարարել և Շահեն Գրիգորյանից հօգուտ Հովհաննես Վարդանյանի բռնագանձել 50.000 /հիսուն հազար/ ՀՀ դրամ` որպես հանցագործության հետևանքով պատճառված նյութական վնասի հատուցում:
Դատավճիռը կարող է բողոքարկվել ՀՀ վերաքննիչ քրեական դատարան հրապարակվելու օրվանից հետո` մեկամսյա ժամկետում:





ԴԱՏԱՎՈՐ Ա.ՄԿՐՏՉՅԱՆ