ԵԱՔԴ/0149/01/12

Դ Ա Տ Ա Վ Ճ Ի Ռ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանըª

նախագահող դատավոր Լ. Ավետիսյան
քարտուղարությամբ` Ն. Ղազարյանի
մասնակցությամբ
մեղադրող` Գ. Գասպարյանի
տուժողներ` Ա. Հովսեփյանի, Մ. Հովսեփյանի
թարգման` Հ. Այվազյանի


2012 թվականի դեկտեմբերի 11-ին, Երևան քաղաքում, դռնբաց դատական նիստում քննեց քրեական գործն ըստ մեղադրանքի Գագիկ Անանիկի Գրիգորյանի, ծնված 1973թ. ապրիլի 12-ին, Երևան քաղաքում, ազգությամբ հայ, ՀՀ քաղաքացի, բարձրագույն կրթությամբ, ֆիզիկապես առողջ, ամուսնալուծված, խնամքին երկու անչափահաս երեխա, նախկինում չդատված, աշխատում է ՀՀ ՊՆ Վ. Սարգսյանի անվան ռազմական ինստիտուտում, որպես հրետանու ֆակուլտետի հրետանային հետախուզության և տեղաերկրաբաշխական ապահովման ցիկլի պետ, կոչումով փոխգնդապետ, հաշվառված և բնակվում է ք.Երևան, Ա.Տիգրանյանի փողոց 5 շենք թիվ 1 բնակարան հասցեում, մեղադրվում է ՀՀ քրեական օրենսգրքի 118 հոդվածով /2 դրվագ/, որպես խափանման միջոց է կիրառվել չհեռանալու մասին ստորագրությունը,

Պ Ա Ր Զ Ե Ց

1.Գործի դատավարական նախապատմությունը.
2012 թվականի սեպտեմբերի 26-ին ՀՀ դատախազության Երևանի կայազորի զիվորական դատախազությունում ՀՀ քրեական օրենսգրքի 118 հոդվածով նախատեսված հանցագործության հատկանիշներով հարուցվել է թիվ 90205512 քրեական գործը:
2012 թվականի հոկտեմբերի 8-ին նախաքննության մարմնի որոշմամբ Գագիկ Անանիկի Գրիգորյանը ներգրավվել է որպես մեղադրյալ ՀՀ քրեական օրենսգրքի 118 հոդվածով /2 դրվագ/, նրա նկատմամբ որպես խափանման միջոց ընտրվել է չհեռանալու մասին ստորագրությունը:
2012 թվականի նոյեմբերի 2-ին թիվ 90205512 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
2.Գործի փաստական հանգամանքները.
Նախնական քննության մարմինն ամբաստանյալ Գագիկ Անանիկի Գրիգորյանին մեղադրանք է առաջադրել այն արարքի կատարման համար, որ նա հանդիսանալով ՀՀ ՊՆ 24236 զորամասի սպա, կոչումով փոխգնդապետ, 2012 թվականի սեպտեմբերի 7-ին, ժամը 1750-ի սահմաններում, Երևան քաղաքի Ա. Տիգրանյան փողոցի 5 շենքի թիվ 1 բնակարանում, կենցաղային հարցի շուրջ վիճաբանել է նույն բնակարանում փաստացի բնակվող Անտոնինա Միխայիլի Հովսեփյանի և նրա որդու` Մարկ Աղասու Հովսեփյանի հետ, ու հարվածներ հասցնելով ծեծի է ենթարկել նրանց` պատճառելով առողջության թեթև վնասի հատկանիշներ չպարունակող մարմնական վնասվածքներ:
3.Ապացույցների հետազոտում.
Առաջադրված մեղադրանքում Գագիկ Անանիկի Գրիգորյանն իրեն մեղավոր չճանաչեց և ցուցմունք տվեց այն մասին, որ Անտոնինա Միխայիլի Հովսեփյանն ու նրա որդի` Մարկ Աղասիի Հովսեփյանը շուրջ երկու տարի վարձով բնակվել են իրեն պատկանող Երևան քաղաքի Ա.Տիգրանյան փողոցի 5-րդ շենքի 1-ին բնակարանի առանձնացված հատվածում: 2012թ. գարնանը որոշել է վերանորոգել բնակարանը և Հովսեփյաններին խնդրել է ազատել բնակարանը, սակայն վերջիններս տարբեր պատճառաբանություններով չեն ազատել բնակարանը: Անտոնինան ասել է, որ գնալու է Օդեսա և այդ ժամանակ ինքը կարող է վերանորոհում կատարել: 2012թ. օգոստոս ամսին բնակարանի մյուս հատվածում սկսել է իրականացնել վերանորոգման աշխատանքներ, որի պատճառով Հովսեփյանների կողմից բնակեցված հատված է տեղափոխել որոշակի իրեր: Շինարարության ընթացքում փոշոտվել է ամբողջ բնակարանը` այդ թվում Հովսեփյանների կողմից բնակեցված մասը: Վերանորոգման ընթացքում Անտոնինա Հովսեփյանը բացակայել է ՀՀ-ից: Երբ վերջինս վերադարձել է, բնակարանի վերանորոգումը դեռևս ավարտված չի եղել: 07.09.2012թ. ժամը 1750-ի սահմաններում, երբ հերթական անգամ ինքը գնացել է բնակարան Անտոնինա և Մարկ Հովսեփյանները գտնվել են տանը: Անտոնինան իր վրա զայրացել է բնակարանը փոշոտելու պատճառով: Ինքը նրան պարզաբանել է, որ կատարում է վերանորոգում, ինչը հնարավոր չէ կատարել առանց փոշի առաջացնելու, իսկ վերանորոգում կատարելու մտադրության մասին հայտնել է ամիսներ առաջ: Իրենց միջև առաջացել է վիճաբանություն: Ա.Հովսեփյանն իրեն չէր տվել բնակարանի երկու ամսվա վարձը: Ինքը պահանջել է այն, սակայն Անտոնինան հրաժարվել է վճարել, քանի որ սենյակն այդ վիճակում է: Ինքը պահանջել է ազատել բնակարանը և ասել է, որ հետ է վերցնում բնակարանի առանձնացված մասի հետ միասին նրանց տրամադրած սառնարանը և բացելով սառնարանի դուռը սկսել է դատարկել այն` սննդամթերքը դնելով քիչ հեռու գտնվող թախտի վրա:
Այդ ժամանակ Ա.Հովսեփյանը հարձակվել է իր վրա և հրել, գցել է թախտին: Ինքը փորձել է հետ մղել նրան: Դա տեսնելով Մարկը փորձել է պաշտպանել մորը և հրել է իրեն: Ինքը պաշտպանվելու նպատակով նույնպես հրել է Մարկին և նա ընկել է թախտի վրա: Հնարավոր է պաշտպանվելիս հարվածած լինի Մ.Հովսեփյանին: Կարծում է վերջինս հոնքի վնասվածքը ստացել է թախտի վրա ընկնելուց, որի վրա դրված են եղել սառնարանից հանված պահածոյի բանկաները: Անտոնինան բռնել էր իր օձիքից և բաց չէր թողնում: Ինքը հարվածել է նրա ձեռքերին, որպեսզի կարողանա ազատվել նրանից: Ինքը տուժողներին դիտավորությամբ մարմնական վնասվածք չի պատճառել:
Ամբաստանյալի պատճառաբանություններն անհիմն են, քրեական պատասխանատվությունից և պատժից խուսափելու նպատակ են հետապնդում:
Ամբաստանյալ Գագիկ Գրիգորյանին մեղսագրված հանցանքը հիմնավորվել է հետևյալ ապացույցներով.
Տուժող Անտոնինա Միխայիլի Հովսեփյանի ցուցմունքով այն մասին, որ մի քանի տարի շարունակ որդու` Մարկ Հովսեփյանի հետ միասին վարձով բնակվել են ամբաստանյալ Գ.Գրիգորյանին պատկանող Երևան քաղաքի Ա.Տիգրանյան փողոցի 5-րդ շենքի 1-ին բնակարանի առանձնացված հատվածում /աջ հատվածում/: 06.08.2012թ. մեկնել է Ուկրաինայի հանրապետություն և տուն է վերադարձել 07.09.2012թ.-ին, իսկ մինչ այդ որդին բնակվել է նույն բնակարանում: Ուկրաինաից վերադառնալով տեսել է, որ տունը փոշոտված է, իսկ Գ.Գրիգորյանը բնակարանի մյուս հատվածից իր կողմից զբաղեցված հատված է տեղափոխել տարբեր իրեր: Նույն օրը ժամը 18-ի սահմաններում բնակարան է գնացել Գ.Գրիգորյանը: Ինքը բնակարանը փոշոտելու պատճառով զայրացած է եղել և նրան հրավիրելով բնակարանի իրեն տրված հատվածը, հարցրել է, թե ինչու է անհարմարություններ ստեղծել իր համար: Ի պատասխան իր հարցին Գ.Գրիգորյանը պահանջել է բնակարանի օգոստոս ամսվա վարձավճարը, իսկ ինքը հայտնել է, որ որևէ վճարում չի կատարելու, քանի որ փոշոտել է բնակարանը: Իրենց միջև առաջացել է վիճաբանություն: Գ.Գրիգորյանը հայտնել է, որ բնակարանից տանում է իր սառնարանը և բացելով սառնարանի դուռը, սկսել է դատարկել դրանում եղած սննդամթերքը և թափել գետին: Այդ ժամանակ ինքը հրել է Գ.Գրիգորյանին, իսկ վերջինս ցանկացել է խփել իրեն: Այդ տեսնելով իր որդին` Մ.Հովսեփյանը փորձել է հեռացնել Գ.Գրիգորյանին: Վերջինս վայր գցելով Մարկին, սկսել է ոտքերով հարվածել նրան: Ինքը փորձել է օգնել որդուն, մի ձեռքով բռնել է Գրիգորյանի վերնաշապիկից, իսկ մյուս ձեռքով` նրա ձեռքից և հրել է նրան, որպեսզի հեռացնի տղայից: Գ.Գրիգորյանը վերցնելով մինչ այդ սառնարանից հանված մետաղյա տարայով պահածոն, դրանով հարվածել է իր ձախ ձեռքին, որով բռնած է եղել նրա վերնաշապիկից: Երբ Մարկը ոտքի է կանգնել և փորձել է օգնել իրեն, Գ.Գրիգորյանը վերցնելով նույն տարան, դրանով հարվածել է իր որդու հոնքի վերևի հատվածին` պատճառելով մարմնական վնասվածք: Ինքը որդուն ասել է, որ զանգահարի ոստիկանություն: Երբ ոստիկանները եկել են Գ.Գրիգորյանն արդեն հեռացել էր:
Տուժող Մարկ Աղասու Հովսեփյանի ցուցմունքով այն մասին, որ մոր` Անտոնինա Հովսեփյանի հետ միասին վարձով բնակվել են Երևան քաղաքի Ա.Տիգրանյան փողոցի 5-րդ շենքի 1-ին բնակարանի առանձնացված հատվածում /աջ հատվածում/: 2012թ. օգոստոս ամսին մայրը մեկնել է Ուկրաինայի հանրապետություն, իսկ Գ.Գրիգորյանը բնակարանում սկսել է կատարել վերանորոգման աշխատանքներ: Իրենց սենյակում լցրել է տարբեր իրեր և պարկերով շինարարակն աղբ, գաջ, ցեմենտ: Իր հարցին, թե ինչու է այդտեղ դրել, պատասխանել է, որ ժամանակավոր է և շուտով կհանի: Այդպես մի քանի անգամ խոստացել է, բայց չի հանել: 07.09.2012թ. մայրը վերադարձել է և տեսնելով բնակարանի վիճակը, զայրացել է: Նույն օրը ժամը 18-ի սահմաններում իրենց բնակարան է գնացել Գ.Գրիգորյանը: Բնակարանը փոշոտելու պատճառով իր մայրը զայրացել է նրա վրա և հրավիրելով բնակարանի իրենց տրված հատվածը, հարցրել է, թե ինչու է անհարմարություններ ստեղծել իր համար: Ի պատասխան մոր հարցին Գ.Գրիգորյանը պահանջել է բնակարանի օգոստոս ամսվա վարձավճարը, իսկ մայրը հայտնել է, որ որևէ վճարում չի կատարելու, քանի որ փոշոտել է բնակարանը: Այդ ժամանակ Գ.Գրիգորյանը հայտնել է, որ բնակարանից տանում է իր սառնարանը և բացելով սառնարանի դուռը սկսել է դատարկել դրանում եղած սննդամթերքը և թափել գետին: Այդ ժամանակ մայրը փորձել է կանխել և հետ է քաշել Գ.Գրիգորյանին, իսկ վերջինս հրել է մորը: Ինքը փորձել է հեռացնել նրան: Այդ ժամանակ Գ.Գրիգորյանն իրեն հրել գցել է գետին և սկսել ոտքերով հարվածներ հասցնել: Կրկին միջամտել Է մայրը: Ինքն այդ ընթացքում բարձրացել և տեսել Է, որ Գ.Գրիգորյանը պահածոյի տարայով հարվածում Է մոր ձեռքին: Ինքը փորձել Է բաժանել նրանց, իսկ Գ.Գրիգորյանը նույն տարայով հարվածել Է իր ճակատին` պատճառելով մարմնական վնասվածք: Այդ ժամանակ ներս Է մտել վերանորոգող վարպետը և քաշքշուկն այլևս չի շարունակվել:
Վկա Աշխեն Վազգենի Վարդանյանի նախաքննության ընթացքում տված ցուցմունքով այն մասին, որ 2012 թվականի սեպտեմբերի 3-ից իր տասնչորս ամյա քրոջ` Անահիտ Վազգենի Վարդանյանի հետ միասին ապրում են ք.Երևան, Ա.Տիգրանյան 5 շենքի, թիվ 1 բնակարանի ձախ հատվածում: Այդ բնակարանը պատկանում է Գագիկ Անանիկի Գրիգորյանին, ով կոչումով փոխգնդապետ է և աշխատում է Վազգեն Սարգսյանի անվան ռազմական ինստիտուտում: Ինքը Երևանում բնակվում է ուսումը շարունակելու կապակցությամբ, իսկ քույրը սովորում է դպրոցում: Բնակարանը չորս սենյականոց է, սակայն մուտքի դռնից ներս տեղադրված են երկու դռներ, այսինքն` բնակարանը բաժանված է երկու առանձին բնակարանների, որոնցից մեկում բնակվում են ինքն ու քույրը, իսկ մյուսում` ռուսախոս մի կին իր որդու հետ, որոնց անունները չգիտի, սակայն տեղյակ է, որ նրանք այդ բանակարանում բնակվում են շուրջ երեք տարի: Այդ կնոջ հետ շփվել է շատ քիչ: Տեղեկացել է, որ Գ. Գրիգորյանը դեռևս 2012 թվականի ապրիլ ամսից ցանկացել է, որ այդ կինն ազատի բնակարանը: Նա աշխատում է դպրոցում, որպես մարզիչ, իսկ որդին սովորում է քոլեջում: 2012 թվականի սեպտեմբերի 7-ին երեկոյան գտնվել է տանը, երբ ժամը 1730-ի սահմաններում այդ կինը գնացել է իրենց տուն, որտեղ և ծանոթացել է նրա հետ: Նա եղել է զայրացած, քանի որ բնակարանի իրենց հատվածում կատարված շինարարության ընթացքում աղտոտվել է նաև բնակարանի իր հատվածը: Նա տեղեկացել է, որ իրենք նույնպես վարձով են ապրում: Իրեն հարցրել է, թե ուր է Գագիկը և հրավիրել է տեսնելու իր բնակարանի աղտոտված վիճակը: Քիչ անց եկել է Գագիկը սանտեխնիկի հետ միասին, ում անունը ինքը չգիտի: Այդ կինը Գագիկին հրավիրել է իր բնակարան, իսկ ինքը սանտեխնիկի հետ միասին գնացել է բնակարանի իր հատվածը: Սանտեխնիկն ինչ-որ գործիքներ է բերել: Իր բնակարան գնալուց 5 րոպե անց եկել է Գագիկը, ով զայրացած սանտեխնիկին պատմել է, որ երկար ժամանակ է, ինչ ցանկացել է այդ կնոջը և նրա որդուն բնակարանից դուրս հանել, սակայն վերջիններս դուրս չեն եկել: Քիչ անց Գ.Գրիգորյանն ինչ-որ զանգ է ստացել և դուրս է եկել իր գործերով: Դրանից հինգ րոպե անց եկել են ոստիկանները: Ավելի ուշ տեղեկացել է, որ իր բացակայության ընթացքում հարևանները և Գ. Գրիգորյանը վիճաբանել են և քաշքշել միմյանց: Ոստիկաններին հրավիրել և Գ. Գրիգորյանի դեմ բողոք է ներկայացրել իր հարևանուհին: Ինքը վստահ է, որ լուրջ բան չի կատարվել, քանի որ իրենց բնակարանները բաժանված են մեկ պատով, մուտքը նույն միջանցքից է և ինքը գտնվելով տանը, որևէ աղմուկ կամ հայհոյանք չի լսել: Դեպքի մասին ավել բան իրեն հանտի չէ:
Վկա Հրայր Գուրգենի Ղալեչյանի նախաքննության ընթացքում տված ցուցմունքով այն մասին, որ Գագիկ Գրիգորյանին ճանաչում է շուրջ մեկ տարի և նրա գտնվում է մտերիմ հարաբերությունների մեջ: 2011 թվականին Գագիկի խնդրանքով նրա ք.Երևան, Ա.Տիգրանյան 5/1 հասցեում գտնվող բնակարանում փոխել է լոգարանի խողովակը: Բնակարանը բաժանված է եղել երկու մասի, որի այն հատվածում, որտեղ փոխել է խողովակը, բնակվել է մի կին իր որդու հետ: 2012 թվականի օգոստոս ամսին Գագիկի խնդրանքով բնակարանի մյուս հատվածում նույնպես կատարել է վերանորոգման աշխատանքներ: 2012 թվականի սեպտեմբերի 7-ին Գ.Գրիգորյանի հետ գնացել են նրա բնակարան և այդ ժամանակ նույն բնակարանում բնակվող կինը, ում անունը ինքը չգիտի և ով ռուսախոս է եղել, մեղադրել է Գ.Գրիգորյանին բնակարանը փոշոտելու համար: Գագիկը նրան պատասխանել է, որ փոշին առաջացել է վերանորոգման պատճառով: Նա գնացել է բնակարանի այն հատվածը, որտեղ այդ կինն է եղել, իսկ ինքը գնացել է մեքենայից գործիքներ բերելու: 2-3 րոպե անց վերադարձել է և բնակարանի այդ կնոջ հատվածից վիճաբանության ձայներ է լսել: Մտնելով ներս տեսել է, որ այդ կնոջ տղան նստած է մահճակալին, իսկ Գ.Գրիգորյանը և այդ կինը կանգնած վիճաբանում են: Քանի որ վերջինս հայտարարել է, որ ոստիկաններին է կանչելու, ինքը Գագիկին ասել է. ՙդուրս արի, դրա հետ գլուխ մի դնի՚ և նա էլ դուրս է եկել: Ինքը որևէ մեկի մարմնին վնասվածք չի նկատել: Նկատել է, որ Գագիկի հագուստը թափթփված է, վերնաշապիկը դուրս եկած արդրավարտիքի տակից: Վերնաշապիկի վրա պատռվածքներ չի նկատել, սակայն չի բացառում դա: Ինքն ու Գ.Գրիգորյանը մտել են բնակարանի մյուս հատվածը: Մի քանի րոպե անց Գագիկին զանգել են և կանչել, սակայն ինքը չգիտի, թե ով: Գագիկը դուրս է եկել ու գնացել: Ավելի ուշ հեռացել է նաև ինքը:
Դատաբժշկական փորձաքննության փորձագետի թիվ 2736 եզրակացությամբ այն մասին, որ Մ.Հովսեփյանի ստացած մարմնական վնասվածքները` ճակատային ձախ կեսի արյունազեղման, ճակատային աջ կեսի սալջարդ վերքի, կրծքավանդակի աջ կեսի առաջային մակերեսի քերծվածքի, ձախ ոտնաթաթի հետին մակերեսի քերծվածքի ձևով պատճառվել են բութ առարկաների ներգործության հետևանքով, հնարավոր է նշված ժամանակին և հանգամանքներում, որոնք առողջության թեթև վնասի հատկանիշներ չեն պարունակում:
Դատաբժշկական փորձաքննության փորձագետի թիվ 2735 եզրակացությամբ այն մասին, որ Ա.Հովսեփյանի ստացած մարմնական վնասվածքները` աջ սրունքի միջին երրորդի ներսային մակերեսի, ձախ սրունք-թաթային հոդի ներսային մակերեսի արյունազեղումների, ձախ դասակի թիկնային մակերեսի քերծվածքների ձևով պատճառվել են բութ առարկաների ներգործության հետևանքով, հնարավոր է նշված ժամանակին և հանգամանքներում, որոնք առողջության թեթև վնասի հատկանիշներ չեն պարունակում:
4.Դատարանի իրավական վերլուծությունները.
Վերլուծելով և գնահատելով դատական քննության ժամանակ հետազոտված ապացույցներն իրենց համակցության մեջ, դատարանը ձեռք բերված ապացույցները բավարար է գտնում և գործի փաստական հանգամանքներով հաստատված է համարում, որ ամբաստանյալ Գագիկ Գրիգորյանը կատարել է հանցավոր արարք, որը համապատասխանում է ՀՀ քրեական օրենսգրքի 118 հոդվածի /2 դրվագ/ հատկանիշներին:
Ամբաստանյալ Գագիկ Անանիկի Գրիգորյանի նկատմամբ պատիժ նշանակելիս, դատարանը հաշվի է առնում նրա կատարած արարքի հանրության համար վտանգավորության աստիճանը, ինչպես նաև հանցավորի անձը:
Որպես ամբաստանյալ Գագիկ Անանիկի Գրիգորյանի անձը բնութագրող, պատասխանատվությունը և պատիժը մեղմացնող հանգամանքներ դատարանը դիտում է այն, որ նրա խնամքին են գտնվում մինչև 14 տարեկան երկու երեխաները (Նարե Գագիկի Գրիգորյան` ծնված 02.06.2006թ. և Պոլինա Գագիկի Գրիգորյան` ծնված 10.09.1999թ.), նախկինում դատված չի եղել, զորամասի հրամանատարության կողմից բնութագրվում է դրական:
Ամբաստանյալի պատասխանատվությունը և պատիժը ծանրացնող հանգամանքներ չկան:
Կատարած արարքի համար ամբաստանյալ Գագիկ Անանիկի Գրիգորյանը ենթակա է քրեական պատասխանատվության և պատժի:
Հաշվի առնելով ամբաստանյալ Գագիկ Գրիգորյանի կատարած արարքի հանրության համար վտանգավորության աստիճանը և բնույթը, նրա անձը, նրան դրականորեն բնութագրող տվյալները, պատասխանատվությունը և պատիժը մեղմացնող հանգամանքները, պատասխանատվությունը և պատիժը ծանրացնող հանգամանքների բացակայությունը, ինչպես նաև այն, որ ՀՀ քրեական օրենսգրքի 118 հոդվածի սանկցիայով նախատեսված է պատիժ նաև տուգանքի ձևով և պատժի նպատակներն ապահովելու համար առավել խիստ պատիժ նշանակելու անհրաժեշտությունը բացակայում է, դատարանը գտնում է, որ ամբաստանյալի նկատմամբ պատիժ պետք է նշանակել տուգանքի ձևով, իսկ նրա նկատմամբ կիրառված խափանման միջոցը պետք է թողնել անփոփոխ, մինչև դատավճռի օրինական ուժի մեջ մտնելը:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 357-360, 365, 369-372 հոդվածներով, դատարանը

Վ Ճ Ռ Ե Ց

Գագիկ Անանիկի Գրիգորյանին մեղավոր ճանաչել ՀՀ քրեական օրենսգրքի 118 հոդվածով (երկու դրվագ) նախատեսված հանցանքներ կատարելու մեջ:
Գագիկ Անանիկի Գրիգորյանին ՀՀ քրեական օրենսգրքի 118 հոդվածով (Անտոնինա Միխայիլի Հովսեփյանին ծեծելու դրվագով) դատապարտել տուգանքի նվազագույն աշխատավարձի քառասնապատիկի` 40.000 /քառասուն հազար/ ՀՀ դրամի չափով:
Գագիկ Անանիկի Գրիգորյանին ՀՀ քրեական օրենսգրքի 118 հոդվածով (Մարկ Աղասու Հովսեփյանին ծեծելու դրվագով) դատապարտել տուգանքի նվազագույն աշխատավարձի քառասնապատիկի` 40.000 /քառասուն հազար/ ՀՀ դրամի չափով:
ՀՀ քրեական օրենսգրքի 66 հոդվածի հիման վրա, հանցանքների համակցությամբ պատիժները մասնակիորեն գումարելու միջոցով Գագիկ Անանիկի Գրիգորյանի նկատմամբ վերջնական պատիժ նշանակել տուգանք նվազագույն աշխատավարձի հիսնապատիկի` 50.000 /հիսուն հազար/ ՀՀ դրամի չափով:
Գագիկ Անանիկի Գրիգորյանի նկատմամբ որպես խափանման միջոց ընտրված չհեռանալու մասին ստորագրությունը թողնել անփոփոխ, մինչև դատավճռի օրինական ուժի մեջ մտնելը:
Դատավճիռը կարող է բողոքարկվել ՀՀ վերաքննիչ քրեական դատարան հրապարակվելու օրվանից հետո մեկամսյա ժամկետում:

Դատավոր` ստորագրություն
Բնագրի հետ ճիշտ է`
Դատավոր Լ. Ավետիսյան