ԵԱՔԴ/0145/01/12

Դ Ա Տ Ա Վ Ճ Ի Ռ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանըª

նախագահող դատավոր Լ. Ավետիսյան
քարտուղարությամբ` Ն. Ղազարյանի
մասնակցությամբ
մեղադրողներ` Ա. Սեփոյանի, Ա. Պետրոսյանի
տուժող` Մ. Պետրոսյանի
տուժողի ներկայացուցիչ` Լ. Ղազարյանի
քաղաքացիական պատասխանող` Վ. Առուստամյանի


2013 թվականի փետրվարի 26-ին, Երևան քաղաքում, դռնբաց դատական նիստում քննեց քրեական գործն ըստ մեղադրանքի Գագիկ Սաշայի Գրիգորյանի, ծնված 1976թ. ապրիլի 8-ին, Արարատի մարզի Արևաբույր գյուղում, ազգությամբ հայ, ՀՀ քաղաքացի, ութամյա կրթությամբ, ֆիզիկապես առողջ, ամուսնացած, խնամքին մեկ մանկահասակ երեխա, նախկինում երկու անգամ դատված` 1/. Երևան քաղաքի Շենգավիթ համայնքի ընդհանուր իրավասության դատարանի 26.01.2007թ.-ի դատավճռով ՀՀ քրեական օրենսգրքի 177 հոդվածի 1-ին մասով, ՀՀ քրեական օրենսգրքի 178 հոդվածի 2-րդ մասի 3-րդ կետով, ՀՀ քրեական օրենսգրքի 177 հոդվածի 2-րդ մասի 1-ին և 4-րդ կետերով դատապարտվել է 3 տարի 9 ամիս ժամկետով ազատազրկման, 18.07.2008թ.-ին պայմանական վաղաժամկետ ազատվել է պատժի կրումից, 2/. Արագածոտնի մարզի ընդհանուր իրավասության դատարանի 04.02.2009թ.-ի դատավճռով ՀՀ քրեական օրենսգրքի 177 հոդվածի 2-րդ մասի 1-ին և 3-րդ կետերով, ՀՀ քրեական օրենսգրքի 67 հոդվածի կիրառմամբ դատապարտվել է 3 տարի ժամկետով ազատազրկման, պատիժը լրիվ կրելով ազատվել է 2011թ. սեպտեմբերի 23-ին, դատվածությունը չմարված, աշխատել է ՙԷդա ընդ Էլ՚ ՍՊԸ-ում որպես վարորդ, ներկայումս չի աշխատում, հաշվառված և բնակվում է Արարատի մարզ, գյուղ Արևաբույր Գ. Նժդեհի փողոց 3 տուն հասցեում, մեղադրվում է ՀՀ քրեական օրենսգրքի 242 հոդվածի 1-ին մասով, որպես խափանման միջոց է կիրառվել չհեռանալու մասին ստորագրությունը,

Պ Ա Ր Զ Ե Ց

1.Գործի դատավարական նախապատմությունը.
2012 թվականի սեպտեմբերի 27-ին ՀՀ ոստիկանության ՔԳՎ Երևան քաղաքի քննչական վարչության ՃՏՀ քննության բաժնում ՀՀ քրեական օրենսգրքի 242 հոդվածի 1-ին մասով նախատեսված հանցագործության հատկանիշներով հարուցվել է թիվ 60124112 քրեական գործը:
Նախաքննության մարմնի 2012 թվականի հոկտեմբերի 9-ի որոշմամբ Գագիկ Սաշայի Գրիգորյանը ներգրավվել է որպես մեղադրյալ ՀՀ քրեական օրենսգրքի 242 հոդվածի 1-ին մասով, նրա նկատմամբ որպես խափանման միջոց կիրառվել է չհեռանալու մասին ստորագրությունը:
2012 թվականի հոկտեմբերի 31-ին թիվ 60124112 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
2.Գործի փաստական հանգամանքները.
Նախնական քննության մարմինն ամբաստանյալ Գագիկ Սաշայի Գրիգորյանին մեղադրանք է առաջադրել այն արարքի կատարման համար, որ նա 2012 թվականի օգոստոսի 31-ին, ժամը 0740-ի սահմաններում, խախտելով ՙՃանապարհային երթևեկության անվատանգության ապահովման մասին՚ ՀՀ օրենքի 24 հոդվածի 5-րդ կետի պահանջը` չունենալով վարորդական իրավունքի վկայական, ՙԷդա ընդ Էլ՚ ՍՊԸ-ին պատկանող, իրեն ամրակցված ՙՎԱԶ-2107՚ մակնիշի Լ 10-66 պ/հ ավտոմեքենան վարել է Երևան քաղաքի Ազատության պողոտայով` Բաբայան փողոցի կողմից դեպի Դ.Անհաղթ փողոցի ուղղությամբ, իր ուղեմասի երրորդ ուղեգոտով, շուրջ 40-50 կմ/ժամ արագությամբ: Հասնելով Ազատության պողոտայի թիվ 12 շենքին` թույլ է տվել ՃԵԿ-ի 67 և 103 կետերի պահանջներին հակասող գործողություններ, այն է` ժամանակին կատարած արգելակումով կամ ավտոմեքենան լրիվ կանգնեցնելու միջոցով հնարարավորություն չի տվել հետիոտնին դուրս գալու ավտոմեքենայի ընթացագոտուց և ավտոմեքենայի առջևի ձախակողմյան մասով վրաերթի է ենթարկել չկարգավորվող հետիոտնային անցումով, իր ընթացքի ուղղությամբ աջից դեպի ձախ, ուղիղ անկյան տակ, հանգիստ քայլերով իր ուղեմասը հատող հետիոտն Մանվել Վարդևանի Պետրոսյանին և նրան անզգուշությամբ պատճառելով կյանքին վտանգ սպառնացող ծանր մարմնական վնասվածքներ:
3.Ապացույցների հետազոտում.
Ամբաստանյալ Գագիկ Սաշայի Գրիգորյանն իրեն լիովին մեղավոր ճանաչեց և ցուցմունք տվեց այն մասին, որ աշխատել է ՙԷդա ընդ Էլ՚ ՍՊԸ-ի ՙԷդել՚ տաքսի ծառայությունում որպես վարորդ: Չունենալով վարորդական իրավունքի վկայական, 2012 թվականի օգոստոսի 31-ին, ժամը 0730-ի սահմաններում, ՙԷդա ընդ Էլ՚ ՍՊԸ-ին պատկանող, իրեն ամրակցված ՙՎԱԶ-2107՚ մակնիշի Լ 10-66 պետհամարանիշի տաքսի ավտոմեքենան վարել է Երևան քաղաքի Ազատության պողոտայով` Բաբայան փողոցի կողմից դեպի Դ.Անհաղթի փողոցի ուղղությամբ, իր ուղեմասի երրորդ ուղեգոտով, շուրջ 40-50 կմ/ժամ արագությամբ: Չհասած Ազատության պողոտայի թիվ 12 շենքի դիմաց գտնվող հետիոտնային անցումին` տեսել է հետիոտնային անցումով, իր ընթացքի ուղղությամբ աջից դեպի ձախ, ուղիղ անկյան տակ, հանգիստ քայլերով իր ուղեմասը հատող հետիոտն Մանվել Պետրոսյանին: Չհասած հետիոտնային անցումին` իր հետևից լսել է ձայնային ազդանշան, ուշադրությունը շեղել է երթևեկությունից, նայել ավտոմեքենայի դրսի աջակողմյան հետին տեսանելիության հայելով ու շարունակել նույն արագությամբ և ուղղությամբ ընթանալ: Երբ դարձյալ նայել է իր դիմացը, տեսել է, որ հասել է հետիոտնային անցումին, իսկ հետիոտն Մ. Պետրոսյանը գտնվել է իր մեքենայի առջև և չհասցնելով դիմել արգելակման, ավտոմեքենայի առջևի ձախակողմյան հատվածով վրաերթի է ենթարկել նրան: Դեպքի պահին ասֆալտը չոր է եղել, եղանակն առանց տեղումների, տեսանելիությունը բավարար: Մեքենան գտնվել է տեխնիկապես սարքին վիճակում: Ինքը եղել է սթափ վիճակում: Հարվածի հետևանքով Մ. Պետրոսյանն ընկել է գետին, իսկ ինքն անմիջապես կանգնել է և իջնելով մեքենայից, մոտեցել է նրան օգնություն ցույց տալու համար: Այդ ընթացքում հավաքվել են անծանոթ քաղաքացիներ և քանի որ տուժողը գանգատվել է ձախ ոտքի շրջանում եղած ցավերից և ոտքից արյուն է հոսել, քաղաքացիների օգնությամբ վերջինիս պառկեցնելով իր ավտոմեքենայի հետևի նստատեղին, տեղափոխել է ՙՄիքայելյան՚ հիվանդանոց: Դրանից հետո կատարվածի մասին հայտնել է տաքսի ծառայության տնօրեն Վահե Առուստամյանին: Հայտնել է, որ մոտ 140.000 ՀՀ դրամի չափով հոգացել է իր կողմից վրաերթի ենթարկված հետիոտն Մանվել Պետրոսյանի բուժման հետ կապված ծախսերը: Բացի այդ ՙՍիլ Ինշուրանս՚ ապահովագրական ընկերության կողմից վճարվել է 608.753 (վեց հարյուր ութ հազար յոթ հարյուր հիսուներեք) ՀՀ դրամ գումար, որպես առողջության վերականգնման համար իրականացված ծախսի փոխհատուցում: Զղջում է կատարածի համար:
Ամբաստանյալ Գագիկ Գրիգորյանին մեղսագրված հանցանքը նրա խոստովանական ցուցմունքից բացի, հիմնավորվել է նաև հետևյալ ապացույցներով.
Տուժող Մանվել Վարդևանի Պետրոսյանի ցուցմունքով այն մասին, որ 2012 թվականի օգոստոսի 31-ին, ժամը 0740-ի սահմաններում, գտնվել է Երևան քաղաքի Ազատության պողոտայում` թիվ 12 շենքի դիմաց: Հանդիպակաց ուղեմասի կանգառից տրանսպորտ նստելու համար իջնելով մայթից, նշված շենքի դիմաց գտնվող հետիոտնային անցումով սկսել է հանգիստ քայլերով, ուղիղ անկյան տակ հատել Ազատության պողոտայի դեպի Դ. Անհաղթի փողոցի կողմ տանող ուղեմասը: Երբ մնացել է մոտ 1 մետր տարածություն, որ ավարտեր հատել պողոտայի դեպի Դ.Անհաղթի փողոցի կողմ տանող ուղեմասի 3-րդ ուղեգոտին, իր համար անսպասելի, ձախ կողմից վրաերթի է ենթարկվել Գագիկ Գրիգորյանի վարած ՙՎԱԶ-2107՚ մակնիշի Լ 10-66 պետհամարանիշի տաքսի ավտոմեքենայի կողմից: Հարվածի հետևանքով ընկել է ասֆալտին և ձախ ոտքի ազդրի շրջանում ստացել կոտրվածք: Վրաերթ կատարած տաքսի ավտոմեքենան անմիջապես կանգնել է և վարորդը մոտենալով իրեն, անծանոթ քաղաքացիների օգնությամբ պառկեցնելով ավտոմեքենայի հետևի նստատեղին, տեղափոխել է ՙՄիքայելյան՚ հիվանդանոց, որտեղ իրեն ցույց են տվել համապատասխան բուժօգնություն: Վիրահատվել է: Ներկայացրել է քաղաքացիական հայցի պահանջ: Խնդրեց հայցապահանջից հանել ապահովագրական ընկերության կողմից վճարված գումարը, իսկ մնացած ծախսերը հատուցել:
Տուժողը հայտնեց նաև, որ ցանկանում է որպեսզի ամբաստանյալը ենթարկվի քրեական պատասխանատվության, քանի որ չի հատուցել հանցագործությամբ իրեն պատճառված նյութական վնասը:
Քաղաքացիական պատասխանող Վահե Սամվելի Առուստամյանի նախաքննության ընթացքում տված ցուցմունքով այն մասին, որ հանդիսանում է ՙԷդա ընդ Էլ՚ ՍՊԸ-ի տնօրենը: Ընկերությանն է պատկանում ՙԷդել՚ տաքսի ծառայությանը, որի տնօրենը նույնպես հանդիսանում է ինքը: Գագիկ Սաշայի Գրիգորյանը հանդիսանում է իրեն պատկանող տաքսի ծառայության վարորդներից, ով աշխատանքի է ընդունվել 2012 թվականի օգոստոսի 1-ին իր և նրա միջև կնքված աշխատանքային պայմանագրի հիման վրա: 2012 թվականի օգոստոսի 31-ին, ժամը 0730-ի սահմաններում, իրեն է զանգահարել Գագիկ Գրիգորյանը և հայտնել, որ Երևան քաղաքի Ազատության պողոտայում իրեն ամրակցված ՙՎԱԶ-2107՚ մակնիշի Լ 10-66 պ/հ տաքսի ավտոմեքենայով վրաերթի է ենթարկել հետիոտն մի տղամարդու, ով ստացել է մարմնական վնասվածքներ և նրան տեղափոխել է Միքայելյանի անվան հիվանդանոց: Որոշ ժամանակ անց Գագիկը դարձյալ զանգահարել է իրեն և ասել, որ տուժողին հիվանդանոցում հետազոտելուց հետո պարզվել է, որ նա ոտքի շրջանում ստացել է կոտրվածքի ձևով մարմնական վնասվածք և պետք է մնա հիվանդանոցում` հետագայում վիրահատելու համար: Դեպքից մի քանի օր անց տեղեկացել է, որ Գագիկի կողմից վրաերթի ենթարկված տղամարդը հանդիսանում է Մանվել Պետրոսյանը, ում նախկինում չի ճանաչել: Միաժամանակ նշել է, որ Գագիկ Գրիգորյանին աշխատանքի ընդունելիս իմացել է, որ նա վարորդական իրավունքի վկայական չունի և պայմանավորվել են, որ 20 օրվա ընթացքում ձեռք բերի այն, սակայն հետագայում չի անդրադարձել այդ հարցին, քանի որ զբաղված է եղել իր առօրյա աշխատանքով:
Դատաբժշկական փորձաքննության փորձագետի թիվ 1222/հ եզրակացությամբ այն մասին, որ Մ. Պետրոսյանի մարմնական վնասվածքները` ձախ գագաթային, աջ ուսային, արմնկային հոդերի, աջ բազկի, ձախ ազդրի շրջանների քերծվածքների, սալջարդ վերքերի, ձախ ազդրոսկրի բաց, բազմաբեկորային կոտրվածքի ձևով, հասցվել են` բութ, կոշտ առարկաներով, հնարավոր է նշված ժամկետում և հանգամանքներում, և պատճառվել է առողջությանը ծանր վնաս` կյանքին վտանգ սպառնացող:
Դատաավտոտեխնիկական փորձաքննության փորձագետի թիվ 26011208 եզրակացությամբ այն մասին, որ ՙՎԱԶ-2107՚ մակնիշի Լ 10-66 պետհամարանիշի ավտոմեքենայի վարորդը տվյալ վրաերթը կանխելու տեխնիկական հնարավորություն ունեցել է և նա ժամանակին միջոցներ չձեռնարկելով ավտոմեքենան կանգնեցնելու կամ դանդաղեցնելու այն հաշվով, որպեսզի հետիոտնը դուրս գա ավտոմեքենայի ընթացագոտուց, թույլ է տվել ՃԵԿ-ի 67 և 103 կետերի պահանջներին հակասող գործողություններ և դրանով իսկ պայմանավորել տվյալ վրաերթի առաջացումը:
Ինչ վերաբերում է ՙՎԱԶ-2107՚ մակնիշի Լ 10-66 պետհամարանիշի ավտոմեքենայի վարորդի գործողությանը` վարորդական իրավունքի վկայական չունենալու պայմաններում ավտոմեքենան վարելուն, ապա այդ առումով նա խախտել է ՙՃանապարհային երթևեկության անվտանգության ապահովման մասին՚ ՀՀ օրենքի 24 հոդվածի 5-րդ կետի պահանջը:
ՙՎԱԶ-2107՚ մակնիշի Լ 10-66 պետհամարանիշի ավտոմեքենայի վարորդը պետք է ձեռնպահ մնար վարորդական իրավունքի վկայական չունենալու պայմաններում ավտոմեքենան վարելուց, իսկ վարելու դեպքում էլ ճանապարհը չկարգավորվող հետիոտնային անցումով հատող հետիոտնին հայտնաբերելու հնարավորություն ունենալու պահից սկսած պետք է ժամանակին կատարված արգելակումով իր վարած ավտոմեքենայի ընթացքը դանդաղեցնելու կամ էլ այն լրիվ կանգնեցնելու միջոցով հնարավորություն տար հետիոտնին դուրս գալու ավտոմեքենայի ընթացագոտուց, դրանով իսկ խոչընդոտ չստեղծելով չկարգավորվող հետիոտնային անցումով երթևեկելի մասը հատող հետիոտնին:
Դեպքի վայրի զննության արձանագրությամբ այն մասին, որ վրաերթը տեղի է ունեցել Երևան քաղաքի Ազատության պողոտայի թիվ 12 շենքի դիմաց գտնվող ճանապարհահատվածում, որտեղ առկա է չկարգավորվող հետիոտնային անցում:
ՙՎԱԶ-2107՚ մակնիշի Լ 10-66 պետհամարանիշի ավտոմեքենայի զննության արձանագրությամբ այն մասին, որ դեֆորմացված է ավտոմեքենայի առջևի պահպանիչ վահանը, շարժիչի ծածկոցը և առջևի ձախակողմյան անվաթևը:
4.Դատարանի իրավական վերլուծությունները.
Վերլուծելով և գնահատելով դատական քննության ժամանակ հետազոտված ապացույցներն իրենց համակցության մեջ, դատարանը ձեռք բերված ապացույցները բավարար է գտնում և գործի փաստական հանգամանքներով հաստատված է համարում, որ ամբաստանյալ Գագիկ Գրիգորյանը կատարել է հանցավոր արարք, որը համապատասխանում է ՀՀ քրեական օրենսգրքի 242 հոդվածի 1-ին մասի հատկանիշներին:
Ամբաստանյալ Գագիկ Գրիգորյանի նկատմամբ պատիժ նշանակելիս, դատարանը հաշվի է առնում նրա կատարած արարքի հանրության համար վտանգավորության աստիճանը, ինչպես նաև հանցավորի անձը:
Որպես ամբաստանյալ Գագիկ Գրիգորյանի անձը բնութագրող, պատասխանատվությունը և պատիժը մեղմացնող հանգամանքներ դատարանը դիտում է այն, որ նա հանցանքն ընդունել և զղջում է կատարած արարքի համար, նրա խնամքին է գտնվում մանկահասակ երեխան (Նարե Գագիկի Գրիգորյան` ծնված 15.10.2012թ.), բնութագրվում է դրական, ինչպես նաև այն, որ դեպքից անմիջապես հետո տուժողին տեղափոխել է հիվանդանոց: 1992-93թթ.-ին մասնակցել է Երասխավանի, Շուռնուխի և Լաչինի շրջանի բնակավայրերի ազատագրական և պաշտպանական մարտերին: 1994-97թթ.-ին 5-րդ բրիգադի Մասիսի գումարտակի կազմում մասնակցել է ԼՂՀ Մարտակերտի շրջանի և ՙՀորադիզ՚ տարածքի բնակավայրերի սահմանների պաշտպանությանը:
Ամբաստանյալի պատասխանատվությունը և պատիժը ծանրացնող հանգամանքներ դատարանը չի հայտնաբերել:
Կատարած արարքի համար ամբաստանյալ Գագիկ Սաշայի Գրիգորյանը ենթակա է քրեական պատասխանատվության և պատժի:
ՀՀ քրեական օրենսգրքի 61 հոդվածի 3-րդ մասի համաձայն, հանցագործության համար նախատեսված պատիժներից առավել խիստը նշանակվում է, եթե նվազ խիստ տեսակը չի կարող ապահովել պատժի նպատակները:
Հաշվի առնելով ամբաստանյալ Գագիկ Գրիգորյանի կատարած արարքի հանրության համար վտանգավորության աստիճանը և բնույթը, նրա անձը, նրան բնութագրող տվյալները, պատասխանատվությունը և պատիժը մեղմացնող հանգամանքները, պատասխանատվությունը և պատիժը ծանրացնող հանգամանքների բացակայությունը, ինչպես նաև այն, որ ՀՀ քրեական օրենսգրքի 242 հոդվածի 1-ին մասի սանկցիայով նախատեսված է պատիժ նաև տուգանքի ձևով և պատժի նպատակներն ապահովելու համար առավել խիստ պատիժ նշանակելու անհրաժեշտությունը բացակայում է, դատարանը գտնում է, որ ամբաստանյալ Գագիկ Գրիգորյանի նկատմամբ պատիժ պետք է նշանակել տուգանքի ձևով:
Վերջինիս նկատմամբ պետք է նշանակել նաև օրենքով նախատեսված լրացուցիչ պատիժ: Գագիկ Գրիգորյանի նկատմամբ կիրառված խափանման միջոցը պետք է թողնել անփոփոխ` մինչև դատավճռի օրինական ուժի մեջ մտնելը:
Սույն քրեական գործով տուժող Մանվել Պետրոսյանի ներկայացուցիչ Լևոն Ղազարյանը ներկայացրել է քաղաքացիական հայց` առավել վտանգի աղբյուր հանդիսացող ավտոմեքենայի սեփականատեր ՙԷդա ընդ Էլ՚ ՍՊԸ-ի հիմնադիր և տնօրեն Վահե Առուստամյանից պահանջելով հանցագործությամբ տուժողին պատճառված վնասը` 3.543.000 ՀՀ դրամ: Դատաքննության ընթացքում տուժողի ներկայացուցիչը ճշգրտելով հայցապահանջը ներկայացրեց 2.935.000 ՀՀ դրամ գումարի պահանջ:
ՀՀ քրեական դատավարության օրենսգրքի 154 հոդվածի համաձայն, քրեական դատավարությունում քաղաքացիական հայցը հարուցվում, ապացուցվում և լուծվում է սույն օրենսգրքի դրույթներով սահմանված կանոններով: Քաղաքացիական դատավարության օրենսդրության նորմերի կիրառումը թույլատրվում է, եթե դրանք չեն հակասում քրեական դատավարության օրենսգրքին, և քաղաքացիական հայցով վարույթի համար անհրաժեշտ են կանոններ, որոնք նախատեսված չեն սույն օրենսգրքով: Քաղաքացիական հայցով որոշումն ընդունվում է քաղաքացիական օրենսդրության նորմերին համապատասխան:
ՀՀ քաղաքացիական օրենսգրքի 1052 հոդվածի համաձայն ՙԻրավաբանական անձինք և քաղաքացիները, որոնց գործունեությունը կապված է շրջապատի համար առավել վտանգի աղբյուրի հետ (տրանսպորտային միջոցների, մեխանիզմների, բարձր լարվածության էներգիայի, ատոմային էներգիայի, պայթուցիկ նյութերի, ուժեղ ներգործող թույների և այլնի օգտագործում, շինարարական և դրա հետ կապված այլ գործունեության իրականացում), պարտավոր են հատուցել առավել վտանգի աղբյուրով պատճառված վնասը, եթե չեն ապացուցում, որ վնասը ծագել է անհաղթահարելի ուժի կամ տուժողի դիտավորության հետևանքով: Առավել վտանգի աղբյուրի սեփականատիրոջը դատարանը կարող է նաև լրիվ կամ մասնակիորեն ազատել պատասխանատվությունից` սույն օրենսգրքի 1076 հոդվածի 2-րդ և 3-րդ կետերով նախատեսված հիմքերով:
Վնաս հատուցելու պարտականությունը դրվում է առավել վտանգի աղբյուրը սեփականության իրավունքով կամ այլ օրինական հիմքով (վարձակալության իրավունք, լիազորագրով տրանսպորտային միջոցները վարելու իրավունք և այլն) տիրապետող իրավաբանական անձի կամ քաղաքացու վրա:՚
Դատարանը գտնում է, որ տուժող Մանվել Պետրոսյանի ներկայացուցիչ Լևոն Ղազարյանի քաղաքացիական հայցի պահանջը պետք է բավարարել մասնակի և առավել վտանգի աղբյուր հանդիսացող ավտոմեքենայի սեփականատիրոջից` ՙԷդա ընդ Էլ՚ ՍՊԸ-ից հօգուտ Մանվել Պետրոսյանի, որպես բաց թողնված աշխատավարձի հատուցում` 2012թ. օգոստոսի 31-ից մինչև 2013թ. փետրվարի 26-ն ընկած ժամանակաշրջանի համար, պետք է բռնագանձել երեք հարյուր վաթսուն հազար (360.000) ՀՀ դրամ:
Ինչ վերաբերում է տուժողի լրացուցիչ ծախսերի հատուցման հարցին, ապա դատարանն անդրադառնալով այդ հարցին, գտնում է, որ քաղաքացիական հայցը այդ մասով պետք է թողնել առանց քննության:
Դատարանը միաժամանակ պարզաբանում է, որ ՀՀ քրեական դատավարության օրենսգրքի 155 հոդվածի 3-րդ մասի համաձայն, քրեական դատավարությունում հարուցված քաղաքացիական հայցը, որը դատարանի կողմից թողնվել է առանց քննության, կարող է հետագայում հարուցվել քաղաքացիական դատավարության կարգով:
Դատարանի 2012թ. նոյեմբերի 16-ի որոշմամբ հայցագնի` երեք միլիոն հինգ հարյուր քառասուներեք հազար (3.543.000) ՀՀ դրամ գումարի, չափով արգելանք է դրվել ՙԷդա ընդ Էլ՚ ՍՊԸ-ին պատկանող գույքի և դրամական միջոցների վրա (Կոտայքի մարզ, ք.Աբովյան, Գառնիի փողոց 4-րդ շենք 47 բնակարան, գրանցման վկայական` N 03Ա-067043, ՀՎՀՀ00858415), մինչև հարցի վերջնական լուծումը:

Դատարանը նկատի ունենալով, սույն քրեական գործով քաղաքացիական հայցի առկայությունը, գտնում է, որ ՙԷդա ընդ Էլ՚ ՍՊԸ-ին պատկանող գույքի և դրամական միջոցների վրա դրված արգելանքը պետք է պահպանել, մինչև քրեական գործով տուժողին պատճառված նյութական վնասի հատուցման հարցի լուծումը։
Նկատի ունենալով, որ սույն քրեական գործով նախաքննության ընթացքում թիվ 26011208 դատաավտոտեխնիկական փորձաքննության արժեքը կազմել է 13.800 /տասներերք հազար ութ հարյուր/ ՀՀ դրամ, թիվ 1222/հ դատաբժշկական փորձաքննության արժեքը` 8000 /ութ հազար/ ՀՀ դրամ, իսկ համաձայն ՀՀ քրեական դատավարության օրենսգրքի 168 հոդվածի դատական ծախսերը բաղկացած են`... 3/ մասնագետի, փորձագետի, թարգմանչի վարձատրության գումարներից ... և այլն, բացի այդ, ՀՀ քրեական դատավարության օրենսգրքի 169 հոդվածի 1-ին մասի համաձայն նույն օրենսգրքի 168 հոդվածի առաջին մասի 1-6-րդ կետերում թվարկված դատական ծախսերը կարող են դատարանի կողմից դրվել դատապարտյալի վրա, ուստի դատարանը գտնում է, որ փորձաքննությունների ընդհանուր արժեք կազմող 21.800 /քսանմեկ հազար ութ հարյուր/ ՀՀ դրամ գումարը, հօգուտ ՀՀ պետական բյուջեի ենթակա է բռնագանձման ամբաստանյալ Գագիկ Գրիգորյանից:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 357-360, 365, 369-372 հոդվածներով, դատարանը

Վ Ճ Ռ Ե Ց

Գագիկ Սաշայի Գրիգորյանին մեղավոր ճանաչել ՀՀ քրեական օրենսգրքի 242 հոդվածի 1-ին մասով նախատեսված հանցանք կատարելու մեջ և նրան դատապարտել տուգանքի նվազագույն աշխատավարձի հարյուրապատիկի` 100.000 (հարյուր հազար) ՀՀ դրամի չափով` տրանսպորտային միջոցներ վարելու իրավունքից զրկելով մեկ (1) տարի ժամկետով:
Գագիկ Սաշայի Գրիգորյանի նկատմամբ որպես խափանման միջոց կիրառված չհեռանալու մասին ստորագրությունը թողնել անփոփոխ, մինչև դատավճռի օրինական ուժի մեջ մտնելը:
Տուժող Մանվել Պետրոսյանի ներկայացուցիչ Լևոն Ղազարյանի կողմից ներկայացված քաղաքացիական հայցը բավարարել մասնակիորեն. առավել վտանգի աղբյուր հանդիսացող ավտոմեքենայի սեփականատիրոջից` ՙԷդա ընդ Էլ՚ ՍՊԸ-ից հօգուտ Մանվել Պետրոսյանի, որպես հանցագործության հետևանքով պատճառված վնասի հատուցում, բռնագանձել երեք հարյուր վաթսուն հազար (360.000) ՀՀ դրամ:
Տուժող Մանվել Պետրոսյանի քաղաքացիական հայցը` լրացուցիչ ծախսերի հատուցման մասով թողնել առանց քննության` նրան իրավունք վերապահելով քաղաքացիական դատավարության կարգով դիմել դատարան` այն լուծելու նպատակով:
Դատարանի 2012թ. նոյեմբերի 16-ի որոշմամբ ՙԷդա ընդ Էլ՚ ՍՊԸ-ին պատկանող գույքի և դրամական միջոցների վրա դրված արգելանքը պահպանել, մինչև քրեական գործով պատճառված նյութական վնասի հատուցման հարցի լուծումը։
Գագիկ Սաշայի Գրիգորյանից հօգուտ ՀՀ պետական բյուջեի բռնագանձել քսանմեկ հազար ութ հարյուր (21.800) ՀՀ դրամ, որպես դատական ծախս:
Դատավճիռը կարող է բողոքարկվել ՀՀ վերաքննիչ քրեական դատարան հրապարակվելու օրվանից հետո մեկամսյա ժամկետում:

Դատավոր` ստորագրություն
Բնագրի հետ ճիշտ է`
Դատավոր Լ. Ավետիսյան