Գործ N ԵԱՔԴ/0136/01/12
ԴԱՏԱՎՃԻՌ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

20 նոյեմբերի 2012թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը`

նախագահությամբ` դատավոր Ա.Մկրտչյանի
քարտուղարությամբ Շ.Վանոյանի
մասնակցությամբ`
մեղադրող Է.Պետրոսյանի
տուժող Մ.Խանջյանի

Դատարանում, դռնբաց դատական նիստում քննեց քրեական գործն ըստ մեղադրանքի` Վարդան Եսիկի Մանուկյանի /ծնված 24.09.1987թ., ք.Ջերմուկ, ազգությամբ հայ, ՀՀ քաղաքացի, միջնակարգ կրթությամբ, չամուսնացած, չդատված, բնակվող` ք.Երևան, Ահարոնյան 8-րդ շենք, բնակարան 33/:
Մեղադրվում է ՀՀ քրեական օրենսգրքի 118-րդ հոդվածով:

Գործի դատավարական նախապատմությունը
2012 թվականի մայիսի 24-ին տեղի է ունեցել դեպքը:
2012 թվականի օգոստոսի 16-ին հարուցվել է թիվ 14121212 քրեական գործը£
2012 թվականի հոկտեմբերի 11-ին Վարդան Մանուկյանին մեղադրանք է առաջադրվել ՀՀ քրեական օրենսգրքի 118-րդ հոդվածով և խափանման միջոց է ընտրվել ստորագրություն չհեռանալու մասին:
2012 թվականի հոկտեմբերի 17-ին թիվ 14121212 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան:

Գործի փաստական հանգամանքները
Նախաքննության մարմինն ամբաստանյալ Վարդան Մանուկյանին ՀՀ քրեական օրենսգրքի 118-րդ հոդվածով մեղադրանք է առաջադրել այն արարքի համար, որ ՙնա 2012 թվականի մայիսի 24-ին ժամը 12:30-ի սահմաններում Երևան քաղաքի Աղբյուր Սերոբի 46 շենքի 4 բնակարանում կենցաղային հարցի շուրջ վիճաբանել է Մարիետա Վաղարշակի Խանջյանի հետ, որի ընթացքում քաշքշել է վերջինիս մազերից և ծեծի է ենթարկել` պատճառելով առողջությանը թեթև վնասի հատկանիշներ չպարունակող մարմնական վնասվածք` պարանոցային հատվածի սալջարդի ձևով՚:

Ապացույցների հետազոտում
Առաջադրված մեղադրանքում դիրքորոշումը ճշտելիս` ամբաստանյալ Վարդան Մանուկյանն իրեն մեղավոր է ճանաչել մասնակի, սակայն դատաքննության փուլում տված ցուցմունքում իրեն լիովին մեղավոր է ճանաչել և անկեղծորեն զղջացել կատարած արարքի համար, մասնավորապես, ցուցմունք տվել, որ 2012 թվականի մայիսի 24-ին ժամը 12:30-ի սահմաններում Երևան քաղաքի Աղբյուր Սերոբի 46 շենքի մուտքում իր քրոջը վիրավորելու պատճառով վիճաբանել և մազերից քաշքշել է հարևանուհի Մարիետա Խանջյանին: Ամբաստանյալը անկեղծորեն զղջացել է կատարած արարքի համար:

Տուժող Մարիետա Խանջյանը դատաքննությամբ ցուցմունք է տվել այն մասին, որ 2003թ.-ից բնակվում է Աղբյուր Սերոբ 46 շենքի 4-րդ բնակարանում: Իրենց շենքի առաջին հարկում, 2011 թվականի ապրիլ ամսից բնակվում են Ֆլորա Նահապետյանը իր դստեր` Հեղին Մանուկյանի և որդու` Վարդան Մանուկյանի հետ: Սույն թվականի մայիսի 24-ին իր բնակարանի մուտքի դիմաց վառվել է Ա.Սերոբ 46 շենքի 5-րդ բնակարանի, այսինքն Ֆլորա Նահապետյանի բնակարանի հոսանքալարերը: Դա առաջին դեպքը չի եղել, բազմաթիվ անգամ զգուշացրել է իրենց շենքը սպասարկող տեսուչին` Կամո Ասատրյանին, որ վառվող հոսանքալարի հոտ է գալիս: Նշված ժամին այրվող հոսանքից և ծխից, ինքը բացել է բնակարանի դուռը և դռան առջևի հատվածում նկատել է էլեկտրացանցի տեսուչ` Կամո Ասատրյանին և շենքում վարձակալության հիմունքներով բնակվող Ֆլորա Նահապետյանի աղջկան` Հեղին Մանուկյանին: Ինքը շատ էր բարկացած, որ վերջիններիս պատճառով վառվում են հոսանքալարերը և Հեղին Մանուկյանին դուրս է հրավիրել իր շքամուտքից: Մի քանի րոպե անց շքամուտք է ներխուժել նրա եղբայրը` Վարդան Մանուկյանը և վիրավորելով, սկսել է բռունցքներով հարվածել իր գլխին և պարանոցին: Դրանից հետո ինքն անմիջապես զանգահարել է ոստիկանություն և հայտնել է դեպքի մասին, ոստիկանության աշխատակիցները ժամանել են իրենց շենք և իրեն հրավիրել են ոստիկանության բաժին: Դրանից հետո իրեն շտապօգնության ավտոմեքենայով տեղափոխել են բժշկական կենտրոն, վերակենդանացման բաժանմունք:

Վկա Կամո Ռաֆիկի Ասատրյանը նախաքննությամբ ցուցմունք է տվել, որ ինքը հանդիսանում է էլեկտրացանցի Հյուսիսային մասնաճյուղի տեսուչը: Իր սպասարկման տարածքի մեջ է մտնում նաև Ա.Սերոբ 46 շենքը: 2012 թվականի մայիսի 24-ին ժամը 11:00-ի սահմաններում իր բջջային հեռախոսահամարին է զանգահարել մի կին, ներկայացել է Ֆլորա Նահապետյան և հայտնել, որ իրենց` Աղբյուր Սերոբ 46 շենքի 5 բնակարանը հոսանքազրկված է, ինքը նրանց պատասխանել է, որ այդ բնակարանը ինքը չի հոսանքազրկել և պատճառը այլ է: Որոշ ժամանակ անց գնացել է նշված շենք, այնտեղ իրեն դիմավորել է իրեն զանգահարող կնոջ դուստրը` Հեղին Մանուկյանը: Նախկինում ինքը տվյալ անձանց հետ չի շփվել և տվյալ օրը տեսել է առաջին անգամ: Այնտեղ ինքը նկատել է, որ թիվ 4-րդ և 5-րդ բնակարանների հոսանքալարերը հալվել են և միացել են իրար և դրանցից սկսել է ծուխ դուրս գալ: Ինքը բարձրացել է հոսանքալարերի մոտ և սկսել է աշխատել` նախապես հոսանաքազրկելով վերը նշված բնակարանները: Իր աշխատանքներին հետևել է Հեղին Մանուկյանը: Այդ ժամանակ թիվ 5 բնակարանից դուրս է եկել Մարիետա Խանջյանը` որին ճանաչում է վաղուց: Մարիետա Խանջյանը դուրս գալով բնակարանից անհիմն, առանց որևէ պատճառաբանության, Հեղին Մանուկյանին վիրավորել է և նրանից պահանջել, որպեսզի հեռանա շքամուտքից: Այդ խոսքերից Հեղին Մանուկյանը նեղվել է և շքամուտքից հեռացել իրենց բնակարան: Ինքը շարունակել է կատարել իր աշխատանքները, իսկ Մարիետա Խանջյանը կանգնած հետևել է իրեն: Որոշ ժամանակ անց շենք է եկել մի երիտասարդ, որը, ինչպես հետո պարզվել է, Հեղին Մանուկյանի եղբայրն է` Վարդան Մանուկյանը, և Մարիետա Խանջյանին հարցրել է, թե ինչու է անպատվել իր քրոջը, և գալով դեպի Մարիետա Խանջյանը, բռնել է նրա ձեռքից, իսկ Մարիետա Խանջյանը ետ է քաշվել իր բնակարան, Վարդան Մանուկյանը նույնպես մտել է վերջինիս բնակարան: Մոտ 3 րոպե անց ինքը հասկանալով, որ Մ.Խանջյանի և Վ.Մանուկյանի միջև վիճաբանությունը չի դադարում, այլ ընդհակառակը թեժանում է, իջել է սանդուղքից, մոտեցել է Մարիետա Խանջյանի բնակարանին, և մուտքի դռան մոտից դուրս է քաշել Վարդան Մանուկյանի, որպեսզի վերջիններս դադարեն միմյանց քաշքշել: Այդ ընթացքում Մարիետա Խանջյանը զանգահարել է ոստիկանություն, որից հետո Վարդան Մանուկյանը հեռացել է: Ինքը չի կարող հայտնել, թե նրանցից ով ում է հարվածել, քանի որ նման բան չի տեսել, այլ տեսել է միայն, թե ինչպես էին նրանք միմյանց քաշքշում, որին ինքը միջամտել է և նրանց բաժանել է իրարից:
Գ/Թ-52-53, 85-86

Վկա Հեղին Եսիկի Մանուկյանը դատաքննությամբ ցուցմունք է տվել, որ ինքը բնակվել է Ա.Սերոբ 46 շենքի 5-րդ բնակարանում մայրիկի` Ֆլորա Սիսակի Նահապետյանի և եղբոր` Վարդան Մանուկյանի հետ միասին: Իրենց հարևանությամբ է բնակվել նաև Մարիետա Խանջյանը: Իրենք վերջինիս հետ որևէ շփում չեն ունեցել: 2012 թվականի մայիսի 24-ին ժամը 10:00-ի սահմաններում իր մայրը զանգահարել և իրենց բնակարան է կանչել վերը նշված շենքի տեսուչին, քանի որ բնակարանը հոսանքազրկվել էր, որից հետո իր մայրը և եղբայրը դուրս են եկել բնակարանից իրենց գործերով: Ժամը 11:00-ի սահմաններում եկել է շենքի էլեկտրիկ Կամո Ասատրյանը և շենքի շքամուտքում սկսել է կատարել վերանորոգման աշխատանքներ: Քիչ անց, երբ ինքը գտնվել է շենքի շքամուտքում և հետևելուց է եղել էլեկտրիկի աշխատանքներին, իրենց հարևանությամբ բնակվող Մ.Խանջյանը բացելով իր բնակարանի դուռը, սկսել է իրեն վիրավորել և պահանջել է հեռանալ շենքից: Ինքը վերջինիս չպատասխանելով հեռացել է իրենց բնակարան: Այդ ժամանակ զանգահարել է եղբայրը` Վարդան Մանուկյանը և ինքը պատմել է կատարվածի մասին: Որոշ ժամանակ անց տուն է եկել Վարդան Մանուկյանը: Վ.Մանուկյանի տուն վերադառնալուց հետո որոշ ժամանակ անց իրենց բնակարան են այցելել ոստիկանության աշխատակիցները և Վարդան Մանուկյանին բերման են ենթարկել ոստիկանություն:

Դատաբժշկական փորձաքննության թիվ 1709 եզրակացության համաձայն` Մարիետա Խանջյանի մարմնական վնասվածքը` ըստ բժշկական փաստաթղթերի տվյալների պարանոցային հատվածի սալջարդի ձևով, պատճառվել է բութ առարկայով, հնարավոր է որոշման մեջ նշված ժամկետում և հանգամանքներում, որը առողջության թեթև վնասի հատկանիշներ չի պարունակում:
Գ/Թ-31-32, 37

Դատարանի իրավական վերլուծությունները
Դատարանը հետազոտելով գործով ձեռք բերված յուրաքանչյուր ապացույց, գնահատելով թույլատրելիության վերաբերելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, ղեկավարվելով օրենքով, ներքին համոզմամբ, գտնում է, որ ամբաստանյալ Վարդան Մանուկյանի մեղավորությունը` Մարիետա Խանջյանին ծեծի ենթարկելու` առողջության թեթև վնասի հատկանիշներ չպարունակող մարմնական վնասվածք պատճառելու մեջ, որը նախատեսված է ՀՀ քրեական օրենսգրքի 118-րդ հոդվածով, ապացուցված է:
Վերոհիշյալ հանցանքի կատարման համար ամբաստանյալը ենթակա է քրեական պատասխանատվության և պատժի, որը նա պետք է կրի:
Պատիժ նշանակելիս դատարանը հաշվի է առնում հանցագործության հանրության համար վտանգավորության աստիճանն ու բնույթը, ինչպես նաև անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները:
Ամբաստանյալ Վարդան Մանուկյանի անձը բնութագրող տվյալներ, պատասխանատվությունն ու պատիժը մեղմացնող հանգամանքներ դատարանը հաշվի է առնում այն, որ նա նախկինում դատված չի եղել, ընդունել է մեղքը և անկեղծորեն զղջացել կատարած արարքի համար, առաջին անգամ հանգամանքների պատահական զուգորդմամբ կատարել է ոչ մեծ ծանրության հանցանք:
Ամբաստանյալի պատասխանատվությունն ու պատիժը ծանրացնող հանգամանք դատարանը չի արձանագրել:
Ղեկավարվելով ՀՀ քրեական դատավարության օրենսգրքի 134-րդ, 357-360-րդ, 365-րդ, 369-373-րդ, 379-րդ հոդվածներով, դատարանը`

ՎՃՌԵՑ

Վարդան Եսիկի Մանուկյանին մեղավոր ճանաչել` ՀՀ քրեական օրենսգրքի 118-րդ հոդվածով նախատեսված հանցագործության կատարման մեջ և նրա նկատմամբ պատիժ նշանակել տուգանք ՀՀ նվազագույն աշխատավաձի հիսնապատիկի` 50.000 /հիսուն հազար/ ՀՀ դրամի, չափով:
Վարդան Մանուկյանի նկատմամբ ընտրված խափանման միջոցը` ստորագրություն չհեռանալու մասին, թողնել անփոփոխ, մինչև դատավճռի օրինական ուժի մեջ մտնելը:
Դատավճիռը կարող է բողոքարկվել ՀՀ վերաքննիչ քրեական դատարան հրապարակման պահից` մեկամսյա ժամկետում:





ԴԱՏԱՎՈՐ Ա.ՄԿՐՏՉՅԱՆ