ԵԱՔԴ/0135/01/12

Ո Ր Ո Շ ՈՒ Մ

քրեական հետապնդումը դադարեցնելու և քրեական գործի վարույթը կարճելու մասին

12 նոյեմբերի 2012թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը` նախագահող դատավոր Լ.Ավետիսյան, քարտուղարությամբ Ն.Ղազարյանի, մասնակցությամբ մեղադրող Դ.Կարապետյանի, դռնբաց դատական նիստում, քննեց քրեական գործն ըստ մեղադրանքի Վահան Հենրիկի Ապրեսյանի (ծնված 1980 թվականի սեպտեմբերի 21-ին, Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուսնացած, խնամքին երկու անչափահաս երեխա, նախկինում չդատված, աշխատում է ՙՈւրախ ժամանց՚ ՍՊ ընկերությունում, որպես հսկիչ-օպերատոր, հաշվառված և բնակվում է Երևան քաղաքի Կ.Ուլեցու փողոցի 70/1 շենքի թիվ 15 բնակարան հասցեում, մեղադրվում է ՀՀ քրեական օրենսգրքի 121 հոդվածի 1-ին մասով,

Պ Ա Ր Զ Ե Ց

2012 թվականի սեպտեմբերի 28-ին ՀՀ ոստիկանության ՔԳՎ Երևան քաղաքի քննչական վարչության Քանաքեռ-Զեյթուն քննչական բաժնում ՀՀ քրեական օրենսգրքի 121 հոդվածի 1-ին մասով նախատեսված հանցագործության հատկանիշներով հարուցվել է թիվ 09112512 քրեական գործը:
2012 թվականի հոկտեմբերի 12-ին Վահան Հենրիկի Ապրեսյանը նախաքննության մարմնի որոշմամբ ներգրավվել է որպես մեղադրյալ ՀՀ քրեական օրենսգրքի 121 հոդվածի 1-ին մասով այն արարքի կատարման համար, որ նա հանդիսանալով ՙՈւրախ ժամանց՚ ՍՊ ընկերության հսկիչ-օպերատոր, 2012թ. հուլիսի 08-ին, ժամը 21-ի սահմաններում, Երևանի Ազատության պողոտա 2 հասցեում գտնվող ՙՊոլիպ՚ կոչվող կարուսելի շահագործման ընթացքում անզգուշությամբ թույլ է տվել անվտանգության կանոնների խախտումներ, որի պատճառով կարուսելի պտույտի ընթացքում թիվ 8 մոդուլի ուղևորներին պաշտպանող, մեխանիկական փականների միջոցով ամրացվող ամրագոտի-բռնաձողը բացվել է և հաճախորդներ Գեորգի Կարենի Ստեփանյանն ու Նաթելլա Հակոբի Աբովյանը դուրս են ընկել կարուսելից: Դրա հետևանքով Նաթելլա Աբովյանը ստացել է առողջության միջին ծանրության վնասվածք:
2012 թվականի հոկտեմբերի 12-ին Վահան Ապրեսյանի նկատմամբ որպես խափանման միջոց է ընտրվել չհեռանալու մասին ստորագրությունը:
2012 թվականի հոկտեմբերի 16-ին թիվ 09112512 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
Տուժող Նաթելլա Աբովյանը դիմումներ է ուղարկել դատարան, հայտնելով, որ Վահան Ապրեսյանը փոխհատուցել է իր բուժման ծախսերը ինքը նրա նկատմամբ որևէ բողոք կամ պահանջ չունի, հաշտվել է նրա հետ և խնդրել է նրան քրեական պատասխանատվության չենթարկել:
Ամբաստանյալ Վահան Ապրեսյանը հայտնեց, որ ինքն ու տուժողը հաշտվել են և ինքը համաձայն է, որպեսզի իր նկատմամբ քրեական հետապնդումը դադարեցվի:
Մեղադրող Դ.Կարապետյանը միջնորդեց ամբաստանյալ Վահան Ապրեսյանի նկատմամբ քրեական հետապնդումը դադարեցնել և քրեական գործի վարույթը կարճել:
Վերոգրյալը հաշվի առնելով, դատարանը գտնում է, որ թիվ ԵԱՔԴ/00135/01/12 քրեական գործի վարույթը պետք է կարճել և Վահան Հենրիկի Ապրեսյանի նկատմամբ քրեական հետապնդումը դադարեցնել, նկատի ունենալով հետևյալը.
ՀՀ քրեական դատավարության օրենսգրքի 35 հոդվածի 1-ին մասի 5-րդ կետի համաձայն, քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե ՀՀ քրեական դատավարության օրենսգրքով նախատեսված դեպքերում տուժողը հաշտվել է մեղադրյալի հետ:
ՀՀ քրեական դատավարության օրենսգրքի 183 հոդվածի 1-ին մասի համաձայն, ՀՀ քրեական օրենսգրքի 121 հոդվածի 1-ին մասով նախատեսված հանցագործության վերաբերյալ գործերը հարուցվում են ոչ այլ կերպ, քան տուժողի բողոքի հիման վրա, և կասկածյալի, մեղադրյալի կամ ամբաստանյալի հետ նրա հաշտվելու դեպքում ենթակա են կարճման: Հաշտությունը թույլատրվում է մինչև դատավճիռ կայացնելու համար դատարանի խորհրդակցական սենյակ հեռանալը:
ՀՀ քրեական օրենսգրքի 73 հոդվածի համաձայն, ոչ մեծ ծանրության հանցանք կատարած անձը կարող է ազատվել քրեական պատասխանատվությունից, եթե նա հաշտվել է տուժողի հետ և հատուցել կամ այլ կերպ հարթել է նրան պատճառած վնասը:
ՀՀ քրեական օրենսգրքի 19 հոդվածի 2-րդ մասի համաձայն, ոչ մեծ ծանրության հանցագործություններ են համարվում դիտավորությամբ կատարված այն արարքները, որոնց համար սույն օրենսգրքով նախատեսված առավելագույն պատիժը չի գերազանցում երկու տարի ժամկետով ազատազրկումը, կամ որոնց համար նախատեսված է ազատազրկման հետ կապ չունեցող պատիժ, ինչպես նաև անզգուշությամբ կատարված այն արարքները, որոնց համար սույն օրենսգրքով նախատեսված առավելագույն պատիժը չի գերազանցում երեք տարի ժամկետով ազատազրկումը: ՀՀ քրեական օրենսգրքի 121 հոդվածի 1-ին մասով նախատեսված արարքները դասվում են ոչ մեծ ծանրության հանցագործությունների շարքին:
ՀՀ քրեական դատավարության օրենսգրքի 35 հոդվածի 4-րդ մասի համաձայն, մեղադրողը, դատարանում հայտնաբերելով քրեական հետապնդումը բացառող հանգամանքներ, պարտավոր է հայտարարել ամբաստանյալի նկատմամբ քրեական հետապնդում իրականացնելուց հրաժարվելու մասին: Ամբաստանյալի նկատմամբ քրեական հետապնդում իրականացնելուց հրաժարվելու մասին մեղադրողի հայտարարությունը դատարանի համար քրեական գործի վարույթը կարճելու և քրեական հետապնդումը դադարեցնելու հիմք է:
Ելնելով վերոգրյալից և ղեկավարվելով ՀՀ քրեական օրենսգրքի 73 հոդվածով, ՀՀ քրեական դատավարության օրենսգրքի 33 հոդվածի 2-րդ մասով, 35 հոդվածի 1-ին մասի 5-րդ կետով, 36, 183, 294 և 313 հոդվածներով, դատարանը

Ո Ր Ո Շ Ե Ց

Վահան Հենրիկի Ապրեսյանի նկատմամբ ՀՀ քրեական օրենսգրքի 121 հոդվածի 1-ին մասով քրեական հետապնդումը դադարեցնել և նրա վերաբերյալ թիվ ԵԱՔԴ/0135/01/12 քրեական գործի վարույթը կարճել` ամբաստանյալի հետ տուժող Նաթելլա Աբովյանի հաշտվելու հիմքով:
Վահան Հենրիկի Ապրեսյանի նկատմամբ որպես խափանման միջոց ընտրված չհեռանալու մասին ստորագրությունը վերացնել:
Որոշումը կարող է բողոքարկվել ՀՀ վերաքննիչ քրեական դատարան` հրապարակվելու օրվանից հետո մեկամսյա ժամկետում:

Դատավոր` ստորագրություն
Բնագրի հետ ճիշտ է
Դատավոր Լ. Ավետիսյան