Գործ Nօ ԵԱՔԴ/0134/01/12

ՈՐՈՇՈՒՄ

ՔՐԵԱԿԱՆ ԳՈՐԾԻ ՎԱՐՈՒՅԹԸ ԿԱՐՃԵԼՈՒ ԵՎ ՔՐԵԱԿԱՆ
ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ՄԱՍԻՆ

28 նոյեմբերի 2012թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը`


նախագահությամբ` դատավոր Ա.Մկրտչյանի
քարտուղարությամբ` Շ.Վանոյանի
մասնակցությամբ`
մեղադրող Կ.Բարսեղյանի
տուժողի ներկայացուցիչ Հ.Գրիգորյանի


Դռնբաց դատական նիստում քննության առնելով քրեական գործն ըստ մեղադրանքի Արթուր Ալբերտի Հովհաննիսյանի /ծնված` 06.04.1976թ., ք.Երևան, ազգությամբ հայ, ՀՀ քաղաքացի, չամուսնացած, միջնակարգ կրթությամբ, չի աշխատում, չդատված, հաշվառված` ք.Երևան, Կոմիտաս 48ա շենք բնակարան 17/:
Մեղադրվում է ՀՀ քրեական օրենսգրքի 178-րդ հոդվածի 1-ին մասով.

Պ Ա Ր Զ Ե Ց

Նախաքննության մարմինն Արթուր Ալբերտի Հովհաննիսյանին մեղադրանք է առաջադրել ՀՀ քրեական օրենսգրքի 178-րդ հոդվածի 1-ին մասով այն արարքի համար, որ ՙնա օգտագործելով Է.Մեսրոպյանի 01.03.2003թ.-ին տրված AF 0666945 անձնագիրը, 10.04.2012թ.-ին ՙԱրմենՏել՚ ՓԲԸ-ի` ք.Երևան Պ.Սևակ 51 հասցեում գտնվող ՙԲիլայն՚ հաճախորդների սպասարկման կենտրոնում հանդես գալով նրա անունից, չարաշահելով ՙԱրմենՏել՚ ՓԲԸ-ի աշխատակիցների վստահությունը տարաժամկետ վճարման պատրվակով, 37.200 ՀՀ դրամ կանխավճար վճարելով, խաբեությամբ վերցրել է 186.000 ՀՀ դրամ արժողության ՙNokia 701՚ բջջային հեռախոս ու տիրացել դրան` ՙԱրմենՏել՚ ՓԲԸ-ին պատճառելով զգալի չափերի` 148.800 ՀՀ դրամ գույքային վնաս՚:
Տուժողի ներկայացուցիչ Հակոբ Գրիգորյանը դատաքննության փուլում ներկայացրեց գրավոր դիմում և հայտարարեց, որ հաշտվել է Արթուր Հովհաննիսյանի հետ, որևէ բողոք կամ նյութական պահանջ չունի, և խնդրեց գործի վարույթը կարճել:
Ամբաստանյալ Արթուր Հովհաննիսյանը նույնպես հայտարարեց, որ առաջադրված մեղադրանքում իրեն մեղավոր է ճանաչում, զղջում է կատարածի համար, հատուցել է պատճառված գույքային վնասը, ինչպես նաև հաշտվել է տուժողի ներկայացուցիչ Հակոբ Գրիգորյանի հետ:
Դատարանը գտնում է, որ նշված պայմաններում քրեական գործի վարույթը պետք է կարճել, իսկ քրեական հետապնդումը` դադարեցնել հետևյալ պատճառաբանությամբ.
ՀՀ քրեական օրենսգրքի 35-րդ հոդվածի 1-ին մասի 5-րդ կետի համաձայն` քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե սույն օրենսգրքով նախատեսված դեպքերում տուժողը հաշտվել է կասկածյալի կամ մեղադրյալի հետ:
ՀՀ քրեական դատավարության օրենսգրքի 183-րդ հոդվածի համաձայն` ՀՀ քրեական օրենսգրքի 178-րդ հոդվածի 1-ին մասով նախատեսված հանցագործությունների վերաբերյալ գործերը հարուցվում են ոչ այլ կերպ, քան տուժողի բողոքի հիման վրա և ամբաստանյալի հետ նրա հաշտվելու դեպքում ենթակա են կարճման:
ՀՀ քրեական օրենսգրքի 73-րդ հոդվածի համաձայն` ոչ մեծ ծանրության հանցանք կատարած անձը կարող է ազատվել քրեական պատասխանատվությունից, եթե նա հաշտվել է տուժողի հետ և հատուցել կամ այլ կերպ հարթել է նրան պատճառած վնասը:
Դատարանը գտնում է, որ իրեղեն ապացույց ճանաչված Է.Մեսրոպյանի AF 0666945 անձնագիրը պետք է հանձնել ՀՀ ոստիկանության անձնագրերի և վիզաների վարչության տնօրինմանը:
Ղեկավարվելով ՀՀ քրեական դատավարության օրենսգրքի 35-րդ հոդվածի 1-ին մասի 5-րդ կետով, 183-րդ հոդվածի 1-ին մասով, 379-րդ հոդվածով` դատարանը

Ո Ր Ո Շ Ե Ց

ՀՀ քրեական օրենսգրքի 178-րդ հոդվածի 1-ին մասի հատկանիշներով հարուցված թիվ 09111412 քրեական գործի վարույթը կարճել և Արթուր Ալբերտի Հովհաննիսյանի նկատմամբ քրեական հետապնդումը դադարեցնել` տուժողի հետ հաշտվելու հիմքով:
Արթուր Հովհաննիսյանի նկատմամբ ընտրված խափանման միջոցը` ստորագրություն չհեռանալու մասին, վերացնել:
Իրեղեն ապացույց ճանաչված Է.Մեսրոպյանի AF 0666945 անձնագիրը հանձնել ՀՀ ոստիկանության անձնագրերի և վիզաների վարչության տնօրինմանը:
Որոշումը մեկամսյա ժամկետում կարող է բողոքարկվել ՀՀ վերաքննիչ քրեական դատարան:





ԴԱՏԱՎՈՐ Ա.ՄԿՐՏՉՅԱՆ