Գործ No ԵԱՔԴ/0128/01/12

ԴԱՏԱՎՃԻՌ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

12 նոյեմբերի 2012թ. ք.Երևան


Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը


նախագահությամբ` դատավոր Ա.Մկրտչյանի
քարտուղարությամբ` Օ.Կիրակոսյանի
Շ.Վանոյանի
մասնակցությամբ`
մեղադրող Ռ.Էլիզբարյանի
տուժող Գ.Փուզյանի


Դատարանում, դռնբաց դատական նիստում քննեց քրեական գործն ըստ մեղադրանքի`
ՎԱՀԱԳՆ ՀՈՒՆԱՆԻ ԱՎԵՏԻՍՅԱՆԻ /ծնված 06.08.1992թ., ք.Սիսիան, ազգությամբ հայ, ՀՀ քաղաքացի, միջնակարգ կրթությամբ, չամուսնացած, չդատված, ՀՀ ՊՆ 31549 զորամասի ժամկետային զինծառայող, կոչումով շարքային, բնակվում է Սյունիքի մարզ, գ.Վաղատին/:
Մեղադրվում է ՀՀ քրեական օրենսգրքի 359-րդ հոդվածի 1-ին մասով:

Գործի դատավարական նախապատմությունը
2012 թվականի հուլիսի 10-ին տեղի է ունեցել դեպքը:
2012 թվականի հուլիսի 23-ին հարուցվել է թիվ 90202512 քրեական գործը£
2012 թվականի սեպտեմբերի 12-ին Վահագն Ավետիսյանին մեղադրանք է առաջադրվել ՀՀ քրեական օրենսգրքի 359-րդ հոդվածի 1-ին մասով և նրա նկատմամբ որպես խափանման միջոց է ընտրվել զորամասի հրամանատարության հսկողությանը հանձնելը:
2012 թվականի հոկտեմբերի 01-ին թիվ 90202512 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան:

Գործի փաստական հանգամանքները
Նախաքննության մարմինն ամբաստանյալ Վահագն Ավետիսյանին ՀՀ քրեական օրենսգրքի 359-րդ հոդվածի 1-ին մասով մեղադրանք է առաջադրել այն արարքի համար, որ ՙնա, հանդիսանալով ՀՀ ՊՆ 31549 զորամասի ժամկետային զինծառայող, կոչումով շարքային 10.07.2012թ. ժամը 19:40-ի սահմաններում 1-ին կապի գումարտակում, 1-ին վաշտի զորանոցում արթնացրել է մահճակալին պառկած կրտսեր սերժանտ Գուրգեն Արտաշեսի Փուզյանին և այդ պատճառով նրանց միջև առաջացած վիճաբանության ընթացքում, շարքային Վ.Ավետիսյանը` ստորադասության հարաբերությունների բացակայության դեպքում, խախտելով ՀՀ զինված ուժերի ներքին ծառայության կանոնագրքի 13 հոդվածով սահմանված` զինվորական ընկերասիրությունը բարձր պահելու, ընկերոջ պատիվն ու արժանապատվությունը հարգելու, այլ զինծառայողների նկատմամբ կոպտություն թույլ չտալու, զինծառայողների փոխհարաբերությունների կանոնագրքային կանոնները` բռնություն գործադրելով, ձախ ձեռքի բռունցքով հարվածել է կրտսեր սերժանտ Գ.Փուզյանի աջ աչքի շրջանին, ինչի հետևանքով վեջինս ստացել է առողջության թեթև վնասի հատկանիշներ չպարունակող մարմնական վնասվածք՚:

Ապացույցների հետազոտում
Ամբաստանյալ Վահագն Ավետիսյանն առաջադրված մեղադրանքում իրեն մեղավոր ճանաչեց լիովին, սակայն օգտվելով իր դատավական իրավունքից հրաժարվեց դատաքննության փուլում ցուցմունքներ տալուց` նշելով, որ պնդում է նախաքննության փուլում տված ցուցմունքները:
Նախաքննության փուլում Վ.Ավետիսյանը ցուցմունք է տվել այն մասին, որ 10.07.2012թ. ժամը 19:40-ի սահմաններում ինքը գտնվել է 1-ին կապի գումարտակի 1-ին վաշտի զորանոցում և պատրաստվել է իջնել շարահրապարակ` շարք կանգնելու համար և այդ ժամանակ նկատել է համածառայող կրտսեր սերժանտ Գուրգեն Արտաշեսի Փուզյանին, որը մահճակալին քնած է եղել: Այդ ժամանակ ինքը հրելով արթնացրել է Գ.Փուզյանին, և վերջինս արթնանալով իր դժգոհությունն է արտահայտել իրեն հրելով արթնացնելու համար: Այդ պատճառով իրենց միջև առաջացած վիճաբանության ընթացքում ձախ ձեռքի բռունցքով հարվածել է կրտսեր սերժանտ Գ.Փուզյանի աջ աչքի շրջանին: Հարվածից հետո իրենք անմիջապես դադարել են վիճաբանելը: Վ.Ավետիսյանը միաժամանակ նշել է, որ զղջում է կատարած արարքի համար և, խնդրել է իր նկատմամբ մեղմ վերաբերվել:

Տուժող Գուրգեն Փուզյանը դատաքննության փուլում ցուցմունք է տվել այն մասին, որ 10.07.2012թ. ժամը 19:40-ի սահմաններում ինքը թիվ 31549 զորամասի 1-ին կապի գումարտակի 1-ին վաշտի զորանոցում քնած է եղել, և այդ ժամանակ իրեն հրելով արթնացրել է շարքային Վ.Ավետիսյանը: Արթնանալով ինքն իր դժգոհությունն է արտահայտել Վ.Ավետիսյանին` հրելով արթնացնելու համար և այդ պատճառով իրենց միջև առաջացած վիճաբանության ընթացքում Վ.Ավետիսյանը ձախ ձեռքի բռունցքով մեկ անգամ հարվածել է իր աջ աչքի շրջանին: Հարվածից հետո իրենք անմիջապես դադարել են վիճաբանել:
Գ.Փուզյանը նշել է, որ Վ.Ավետիսյանից որևէ բողոք կամ պահանջ չունի:

Վկա Ռաֆիկ Հարությունյանը դատաքննության փուլում ցուցմունք է տվել այն մասին, որ թիվ 31549 զորամասի 1-ին վաշտի դասակի հրամանատարն է, ամբաստանյալին և տուժողին ճանաչում է որպես համաձառայողներ: 11.07.2012թ. ժամը 17:00-ի սահմաններում տեղեկացել է, որ կրտսեր սերժանտ Գուրգեն Փուզյանի աջ աչքի շրջանում կապտուկ է հայտնաբերվել: Վերջինիցս տեղեկացել է, որ նույն օրը ժամը 19:40-ի սահմաններում 1-ին կապի գումարտակի, 1-ին վաշտի զորանոցում կատակել է համածառայող, շարքային Վահագն Ավետիսյանի հետ, որի ընթացքում վերջինիս ձեռքը պատահաբար դիպել է Գ.Փուզյանի աջ աչքի շրջանին, սակայն նույն օրը զորամասում տարածվող խոսակցություններից տեղեկացել է, որ վերջինների միջև տեղի է ունեցել վիճաբանություն, որի ընթացքում Վ.Ավետիսյանը բռունցքով մեկ անգամ հարվածել է Գ.Փուզյանի աջ աչքի շրջանին: Դեպքի մասին զեկուցվել է վերադաս հրամանատարին:

Վկա Հայկ Սերոբյանը դատաքննության փուլում ցուցմունք է տվել այն մասին, որ ծառայում է թիվ 31549 զորակասի 1-ին կապի գումարտակի3-րդ վաշտում` որպես ռադիոկայանի պետ: Գումարտակի ընդհանուր խոսակցություններից տեղեկացել է, որ կրտսեր սերժանտ Գուրգեն Փուզյանն իր աջ աչքի շրջանում մարմնական վնասվածքն ստացել է համածառայող, շարքային Վահագն Ավետիսյանի հետ կատակելիս, որի ընթացքում վերջինիս ձեռքը պատահաբար դիպել է Գ.Փուզյանի աջ աչքի շրջանին:

Դատաբժշկական փորձագետի թիվ 2107 եզրակացության համաձայն Գ.Փուզյանի սատացած մարմնական վնասվածքն աջ աչքի ստորին կոպի շրջանի արյունազեղման ձևով, հասցվել է բութ առարկայով, հնարավոր է որոշման մեջ նշված ժամկետին, որն առողջության թեթև վնասի հատկանիշներ չի պարունակում:
գ.թ. 14-15

Ամբաստանյալ Վ.Ավետիսյանին մեղսագրվող արարքը հիմնավորվել է նաև որպես այլ ապացույց ճանաչված` թիվ 367, 907 և 961 հեռախոսագրերով, թիվ 247 և 100 հրամանի քաղվածքներով այն մասին, որ վերջինս 10.07.2012թ. ժամը 19:40-ի սահմաններում վիճաբանել և մեկ անգամ բռունցքով հարվածել է Գ.Փուզյանին:
գ.թ. 4-5, 27-28, 34

Դատարանի իրավական վերլուծությունները
Դատարանը հետազոտելով գործով ձեռք բերված յուրաքանչյուր ապացույց, գնահատելով թույլատրելիության վերաբերելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, ղեկավարվելով օրենքով, ներքին համոզմամբ, գտնում է, որ ամբաստանյալ Վահագն Ավետիսյանի մեղավորությունը` զինծառայողների փոխհարաբերությունների կանոնագրքային կանոնները խախտելու և բռնություն գործադրելու մեջ, որը նախատեսված է ՀՀ քրեական օրենսգրքի 359-րդ հոդվածի 1-ին մասով, ապացուցված է:
Վերոհիշյալ հանցանքի կատարման համար ամբաստանյալ Վահագն Ավետիսյանը ենթակա է քրեական պատասխանատվության և պատժի:
Ամբաստանյալի նկատմամբ պատիժ նշանակելիս դատարանը հաշվի է առնում հանցագործության հանրության համար վտանգավորության աստիճանն ու բնույթը, ինչպես նաև անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները:
Ամբաստանյալ Վահագն Ավետիսյանի անձը բնութագրող տվյալներ, պատասխանատվությունն ու պատիժը մեղմացնող հանգամանքներ դատարանը հաշվի է առնում այն, որ նա ընդունել է մեղքը և անկեղծորեն զղջացել կատարած արարքի համար, բնութագրվում է դրական, նախկինում դատված չի եղել, տուժողը հաշտվել է ամբաստանյալի հետ, որևէ բողոք կամ պահանջ չունի և խնդրել է մեղմ վերաբերվել նրա նկատմամբ:
Ամբաստանյալի պատասխանատվությունը և պատիժը ծանրացնող հանգամանքներ դատարանը չի արձանագրել:
Ղեկավարվելով ՀՀ քրեական դատավարության օրենսգրքի 134-րդ, 357-360-րդ, 379-րդ հոդվածներով, դատարանը

ՎՃՌԵՑ

Վահագն Հունանի Ավետիսյանին մեղավոր ճանաչել ՀՀ քրեական օրենսգրքի 359-րդ հոդվածի 1-ին մասով և նրա նկատմամբ պատիժ նշանակել կալանք` 15 /տասնհինգ/ օր ժամկետով:
Պատիժը պետք է կրի կայազորային կարգապահական մեկուսարանում:
Վահագն Ավետիսյանի նկատմամբ ընտրված խափանման միջոցը` զորամասի հրամանատարության հսկողությանը հանձնելը, թողնել անփոփոխ, մինչև դատավճռի օրինական ուժի մեջ մտնելը:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակման պահից մեկամսյա ժամկետում:





ԴԱՏԱՎՈՐ Ա.ՄԿՐՏՉՅԱՆ