ԵԱՔԴ/0119/01/12

Դ Ա Տ Ա Վ Ճ Ի Ռ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանըª

նախագահող դատավոր Լ. Ավետիսյան
քարտուղարությամբ` Ն. Ղազարյանի
մասնակցությամբ
մեղադրող` Կ. Բարսեղյանի
տուժող` Ա. Թավաքալյանի


2012 թվականի հոկտեմբերի 5-ին, Երևան քաղաքում, դռնբաց դատական նիստում քննեց քրեական գործն ըստ մեղադրանքի Գարեգին Քաջիկի Քամալյանի, ծնված 1969թ. փետրվարի 23-ին, Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ֆիզիկապես առողջ, ամուսնացած, խնամքին երկու երեխա, նախկինում չդատված, աշխատում է ՙԱրյան փոխներարկման ինստիտուտ՚ ՓԲԸ-ում, որպես վարորդ, հաշվառված է ք.Երևան, Կ. Ուլնեցու փողոց 66 շենք թիվ 59 բնակարան հասցեում, բնակվում է ք.Երևան, Զ.Սարկավագի փողոց 131 շենք թիվ 48 բնակարան հասցեում, մեղադրվում է ՀՀ քրեական օրենսգրքի 118 հոդվածով, որպես խափանման միջոց է կիրառվել չհեռանալու մասին ստորագրությունը,

Պ Ա Ր Զ Ե Ց

1.Գործի դատավարական նախապատմությունը.
2012 թվականի օգոստոսի 9-ին ՀՀ ոստիկանության ՔԳՎ Երևան քաղաքի քննչական վարչության Քանաքեռ-Զեյթուն քննչական բաժնում ՀՀ քրեական օրենսգրքի 118 հոդվածով նախատեսված հանցագործության հատկանիշներով հարուցվել է թիվ 09108712 քրեական գործը:
2012 թվականի օգոստոսի 28-ին Գարեգին Քաջիկի Քամալյանի նկատմամբ որպես խափանման միջոց ընտրվել է չհեռանալու մասին ստորագրությունը:
2012 թվականի օգոստոսի 28-ին Գարեգին Քաջիկի Քամալյանը ներգրավվել է որպես մեղադրյալ ՀՀ քրեական օրենսգրքի 118 հոդվածով:
2012 թվականի սեպտեմբերի 12-ին թիվ 09108712 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
2.Գործի փաստական հանգամանքները.
Նախնական քննության մարմինն ամբաստանյալ Գարեգին Քաջիկի Քամալյանին մեղադրանք է առաջադրել այն արարքի կատարման համար, որ նա 2012 թվականի հուլիսի 14-ին, ժամը 0845-ի սահմաններում, Երևան քաղաքի Կ. Ուլնեցու փողոցի 66ա շենքի մուտքում, 1-ին հարկում` վերելակի դիմաց, ամուսնալուծվելու պատճառով վիճաբանության մեջ է մտել կնոջ` Անահիտ Բորիսի Թավաքալյանի հետ, որի ընթացքում բռնություն գործադրելով Ա. Թավաքալյանի նկատմամբ ծեծել է նրան` քաշել է մազերից, ձեռքով դիտավորյալ հարվածել գլխին և պարանոցի շրջանի փափուկ հյուսվածքների սալջարդի ձևով պատճառել առողջության թեթև վնասի հատկանիշներ չպարունակող մարմնական վնասվածքներ:

3.Ապացույցների հետազոտում.
Ամբաստանյալ Գարեգին Քամալյանը հրաժարվելով ցուցմունք տալուց պնդեց նախնական քննության ընթացքում տված ցուցմունքը: Համաձայն այդ ցուցմունքի ամուսնությունից հետո իր և կնոջ` Ա. Թավաքալյանի փոխհարաբերությունները եղել են լարված, 2011թ. սեպտեմբեր ամսից կինը երկու երեխաների հետ տեղափոխվել է ծնողների տուն և ցանկանալով ամուսնալուծվել, չի թողնում, որ ինքը երեխաների հետ հանդիպի: 2012թ. հուլիսի 14-ին, ժամը 0845-ի սահմաններում Կ. Ուլնեցու փողոցի 66ա շենքի մուտքի մոտ կանգնել, սպասել է կնոջը: Երբ Ա. Թավաքալյանը վերելակից դուրս է եկել, ինքը մոտեցել է նրան, բռնել նրա ձեռքից, առաջարկել որպեսզի նստի ավտոմեքենան` ընտանիքի վիճակի մասին խոսելու համար: Ա.Թավաքալյանը չի համաձայնել ու նրա կոպիտ պատասխանից զայրացած, ինքը բռնել է նրա թևից, ծեծել նրան, քաշել մազերից և ձեռքով մի քանի անգամ հարվածել նրա գլխին: Զղջում է կատարածի համար:
Ամբաստանյալ Գարեգին Քամալյանին մեղսագրված հանցանքը նրա ինքնախոստովանական ցուցմունքից բացի, հիմնավորվել է նաև հետևյալ ապացույցներով.
Տուժող Անահիտ Թավաքալյանի ցուցմունքով այն մասին, որ Գարեգին Քամալյանի հետ եղել են անհաշտ ամուսիններ և հաճախակի վիճաբանել են: 2011 թվականի սեպտեմբեր ամսից փաստացի բաժանվելով նրանից տեղափոխվել է ծնողների տուն և երեխաների հետ ապրել այնտեղ: 2012թ. հուլիսի 14-ին, առավոտյան ժամը 0845-ին, աշխատանքի գնալու նպատակով, երբ դուրս է եկել Կ.Ուլնեցու փողոցի 66ա շենքի 2-րդ մուտքի վերելակից, տեսել է շքամուտքի մոտ կանգնած Գարեգին Քամալյանին: Իրեն տեսնելով Գ. Քամալյանը վազելով մոտեցել է իրեն, ուժեղ բռնել ձախ ձեռքի դաստակից և ձեռքը ոլորելով պահանջել է նստել մեքենան: Ինքը ցավից գոռալով փորձել է ձեռքն ազատել, սակայն Գ.Քամալյանը աջ ձեռքով սկսել է հարվածներ հասցնել իր գլխին, քաշել է մազերը և անտեսելով իր խնդրանքները, շարունակել է ծեծել իրեն: Գ. Քամալյանի հարվածներից ինքը ստացել է մարմնական վնասվածքներ: Իրենց վիճաբանության, գոռգոռոցի ձայները լսել են հարևանները, որոնցից Սուսաննա Մամիկոնյանը իջել է ներքև ու օգնելով իրեն, միասին բարձրացել են տուն:
Վկա Աստղիկ Սուրենի Ազարյանի նախաքննության ընթացքում տված ցուցմունքով այն մասին, որ իր դուստրը` Անահիտ Թավաքալյանն ամուսնու` Գարեգին Քամալյանի հետ անախորժ ընտանեկան հարաբերությունների մեջ է գտնվել և այդ պատճառով շուրջ մեկ տարի է երեխաների հետ բնակվում է իրենց տանը և ցանկանում է ամուսնալուծվել: 2012թ. հուլիսի 14-ին, առավոտյան ժամը 0845-ի սահմաններում, աշխատանքի գնալու համար Անահիտը դուրս է եկել տնից, սակայն 10 րոպե անց դեմքը, պարանոցը կարմրած վերադարձել է ու լաց լինելով պատմել է, որ վերելակից դուրս գալիս իր վրա հարձակվել է Գարեգինը, քաշել մազերից, հարվածներ հասցնելով գլխին` ծեծել է իրեն:
Վկա Սուսաննա Բորիսի Թավաքալյանի ցուցմունքով այն մասին, որ Ա.Թավաքալյանն իր հարազատ քույրն է, ով 2003թ. ամուսնացել է Գարեգին Քամալյանի հետ: Ընտանեկան անախորժությունների պատճառով, 2011թ. սեպտեմբեր ամսից քույրը երեխաների հետ տեղափոխվել և բնակվում է ծնողների տանը և ցանկանում է ամուսնալուծվել: 2012թ. հուլիսի 14-ին, առավոտյան ժամը 09.00-ի սահմաններում զանգահարել է ծնողների տուն, մայրը` Աստղիկ Ազարյանը լաց լինելով ասել է, որ աշխատանքի գնալիս Անահիտին Գարեգինը ծեծել է: Ինքն անմիջապես գնացել է ծնողների տուն, տեսել Անահիտին բազմոցին պառկած, աչքերի տակ այտուցներ, պարանոցին քերծված կարմրած հետքեր: Անահիտը պատմել է, որ ժամը 0845-ի սահմաններում աշխատանքի գնալիս, վերելակից դուրս գալուն պես Գարեգինը հարձակվել և ծեծի է ենթարկել իրեն, իսկ հարևանների միջամտությունից հետո թողել հեռացել է:
Վկա Էդուարդ Արտավազդի Սարիբեկյանի ցուցմունքով այն մասին, որ ճանաչում է ամուսիններ Անահիտ Թավաքալյանին և Գարեգին Քամալյանին: 2012թ. հուլիսի 14-ին, առավոտյան ժամը 0830-ի սահմաններում դուրս է եկել տնից: Շենքի բակում տեսել է կանգնած Գարեգին Քամալյանին: Իր անձնական ավտոմեքենան ավտոտնակից հանելու ժամանակ, շենքի մուտքից բարձր գոռգոռոցի ձայներ է լսել: Անմիջապես մտել է շքամուտք և վերելակի մոտ տեսել է Գարեգին Քամալյանին, ով եղել է շատ զայրացած, նյարդացած վիճակում: Նրանից տեղեկանալով, որ վիճաբանել ու ծեծել է կնոջը` Անահիտ Թավաքալյանին, ով այդ պահին այնտեղ չի եղել, սաստել է Գարեգինին, ամոթանք տվել նրան ու թևից բռնելով դուրս է բերել մուտքից:
Վկա Սուսաննա Հայկազի Մամիկոնյանի նախաքննության ընթացքում տված ցուցմունքով այն մասին, որ ճանաչում է ամուսիններ Անահիտ Թավաքալյանին և Գարեգին Քամալյանին: 2012թ. հուլիսի 14-ին, առավոտյան ժամը 0830-ի սահմաններում պատուհանից դուրս նայելով, շենքի բակում տեսել է կանգնած Գարեգին Քամալյանին: Քիչ անց շքամուտքից բարձր գոռգոռոցի ձայներ է լսել: Լսել է Գարեգինի բղավոցի ձայնը և հասկացել է, որ նա վիճաբանում է կնոջ` Անահիտի հետ: Անմիջապես վերելակով իջել է առաջին հարկ, տեսել է Գարեգին Քամալյանին, ով Անահիտի ձեռքը բռնած նրան քաշքշել է: Ինքը միջամտել է, կանգնել նրանց միջև ու Գարեգինին հեռացրել: Այնուհետև Անահիտին օգնել է և ուղեկցել տուն: Ա.Թավաքալյանն իրեն պատմել է, որ Գարեգինը վիճաբանել ու ծեծել է իրեն` քաշել մազերը, հարվածել գլխին:
Դատաբժշկական փորձաքննության փորձագետի թիվ 982/հ եզրակացությամբ այն մասին, որ Ա. Թավաքալյանի ստացած մարմնական վնասվածքը` ըստ բժշկական փաստաթղթերի տվյալների`պարանոցի շրջանի փափուկ հյուսվածքների սալջարդի ձևով, պատճառվել է բութ առարկայով, որը առողջության թեթև վնասի հատկանիշներ չի պարունակում:
4.Դատարանի իրավական վերլուծությունները.
Վերլուծելով և գնահատելով դատական քննության ժամանակ հետազոտված ապացույցներն իրենց համակցության մեջ, դատարանը ձեռք բերված ապացույցները բավարար է գտնում և գործի փաստական հանգամանքներով հաստատված է համարում, որ ամբաստանյալ Գարեգին Քամալյանը կատարել է հանցավոր արարք, որը համապատասխանում է ՀՀ քրեական օրենսգրքի 118 հոդվածի հատկանիշներին:
Ամբաստանյալ Գարեգին Քամալյանի նկատմամբ պատիժ նշանակելիս, դատարանը հաշվի է առնում նրա կատարած արարքի հանրության համար վտանգավորության աստիճանը, ինչպես նաև հանցավորի անձը:
Որպես ամբաստանյալ Գարեգին Քամալյանի անձը բնութագրող, պատասխանատվությունը և պատիժը մեղմացնող հանգամանքներ դատարանը դիտում է այն, որ նա հանցանքն ընդունել և զղջում է կատարածի համար, նրա խնամքին են գտնվում մինչև 14 տարեկան երկու երեխաները (Լիլի Գարեգինի Քամալյան` ծնված 16.03.2004թ. և Բորիս Գարեգինի Քամալյան` ծնված 16.06.2006թ.), նախկինում դատված չի եղել, բնութագրվում է դրական:
Ամբաստանյալի պատասխանատվությունը և պատիժը ծանրացնող հանգամանքներ չկան:
Կատարած արարքի համար ամբաստանյալ Գարեգին Քաջիկի Քամալյանը ենթակա է քրեական պատասխանատվության և պատժի:
Հաշվի առնելով ամբաստանյալ Գարեգին Քամալյանի կատարած արարքի հանրության համար վտանգավորության աստիճանը և բնույթը, նրա անձը, նրան դրականորեն բնութագրող տվյալները, պատասխանատվությունը և պատիժը մեղմացնող հանգամանքները, պատասխանատվությունը և պատիժը ծանրացնող հանգամանքների բացակայությունը, ինչպես նաև այն, որ ՀՀ քրեական օրենսգրքի 118 հոդվածի սանկցիայով նախատեսված է պատիժ նաև տուգանքի ձևով և պատժի նպատակներն ապահովելու համար առավել խիստ պատիժ նշանակելու անհրաժեշտությունը բացակայում է, դատարանը գտնում է, որ ամբաստանյալի նկատմամբ պատիժ պետք է նշանակել տուգանքի ձևով, իսկ նրա նկատմամբ կիրառված խափանման միջոցը պետք է թողնել անփոփոխ, մինչև դատավճռի օրինական ուժի մեջ մտնելը:


Վերոգրյալի հիման վրա և ղեկավարվելով ՀՀ քրեական դատավարության օրենսգրքի 357-360, 365, 369-372 հոդվածներով, դատարանը

Վ Ճ Ռ Ե Ց

Գարեգին Քաջիկի Քամալյանին մեղավոր ճանաչել ՀՀ քրեական օրենսգրքի 118 հոդվածով նախատեսված հանցանք կատարելու մեջ և նրան դատապարտել տուգանքի նվազագույն աշխատավարձի քառասնապատիկի` 40.000 /քառասուն հազար/ ՀՀ դրամի չափով:
Գարեգին Քաջիկի Քամալյանի նկատմամբ որպես խափանման միջոց ընտրված չհեռանալու մասին ստորագրությունը թողնել անփոփոխ, մինչև դատավճռի օրինական ուժի մեջ մտնելը:
Դատավճիռը կարող է բողոքարկվել ՀՀ վերաքննիչ քրեական դատարան հրապարակվելու օրվանից հետո մեկամսյա ժամկետում:


Դատավոր` ստորագրություն
Բնագրի հետ ճիշտ է`
Դատավոր Լ. Ավետիսյան