գործ No ԵԱՔԴ/0100/01/12


ԴԱՏԱՎՃԻՌ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

26 սեպտեմբերի 2012թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը


նախագահությամբ` դատավոր Ա.Մկրտչյանի
քարտուղարությամբ` Շ.Վանոյանի
Օ.Կիրակոսյանի
մասնակցությամբ`
մեղադրող Ա.Փանոսյանի
պաշտպան Վ.Կարապետյանի
տուժողի իրավահաջորդ Կ.Սաղաթելյանի


Դատարանում, դռնբաց դատական նիստում քննեց քրեական գործն ըստ մեղադրանքի`
ԳԱԳԻԿ ԼՅՈՒԴՎԻԿԻ ՀԱՐՈՒԹՅՈՒՆՅԱՆԻ /ծնված 28.09.1977թ. Անգեղակոթ գյուղում, ՀՀ քաղաքացի, ազգությամբ հայ, միջնակարգ կրթությամբ, ամուսնացած, խնամքին հինգ անձ, չդատված, աշխատում է որպես վարորդ, գրանցված` Սյունիքի մարզ գյուղ Անգեղակոթ, բնակվում է ք.Երևան, Պատկանյան փող. 20շ., բն.6/:
Մեղադրվում է ՀՀ քրեական օրենսգրքի 242-րդ հոդվածի 2-րդ մասով:

Գործի դատավարական նախապատմությունը
2012 թվականի հունիսի 01-ին տեղի է ունեցել դեպքը:
2012 թվականի հունիսի 01-ին հարուցվել է թիվ 60113512 քրեական գործը£
2012 թվականի հունիսի 07-ին Գագիկ Հարությունյանին մեղադրանք է առաջադրվել ՀՀ քրեական օրենսգրքի 242-րդ հոդվածի 2-րդ մասով և որպես խափանման միջոց է ընտրվել ստորագրություն չհեռանալու մասին:
2012թ. օգոստոսի 08-ին թիվ 60113512 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան:

Գործի փաստական հանգամանքները
Նախաքննության մարմինն ամբաստանյալ Գագիկ Լյուդվիկի Հարությունյանին ՀՀ քրեական օրենսգրքի 242-րդ հոդվածի 2-րդ մասով մեղադրանք է առաջադրել այն արարքի համար, որ ՙնա 2012 թվականի հունիսի 1-ին, ժամը 14:10-ի սահմաններում իր անձնական օգտագործման ՙԿԱՄԱԶ-5511՚ մակնիշի 54 ԼՕ 541 պ/հ բեռնատար ացտոմեքենայով գտնվելով Երևան քաղաքի Հր. Քոչար փողոցի դեպի Ն.Զարյան փողոցի կողմը տանող ուղեմասի վրա` երթևեկության հոսքին հակառակ, կանգնած տեղից սկսել է կատարել հետընթաց, որի ընթացքում թույլ է տվել ՃԵԿ-ի 48 կետի ու ՙՃանապարհային երթևեկության անվտանգության ապահովման մասին՚ ՀՀ օրենքի 23-րդ հոդվածի 3-րդ կետի պահանջներին հակասող գործողություններ, այն է` երթևեկությունը հետընթացով սկսելուց առաջ ինքն իրեն զրկելով վրաերթը կանխելու տեխնիկական հնարավորությունից պատշաճ կերպով չի համոզվել դրա անվտանգության մեջ, չի դիմել այլ անձանց օգնության, տեխնիկական տեսակետից ստեղծել է վթարային իրադրություն` 5,2 մետր հետընթաց կատարելու ընթացքում, ավտոմեքենայի հետևի աջ անվադողով վրաերթի է ենթարկել կանգնած հետիոտն Ժաննա Արտյոմի Սաղաթելյանին և անզգուշությամբ վերջինիս մահ պատճառել՚:

Ապացույցների հետազոտում
Առաջադրված մեղադրանքում Գագիկ Լյուդվիկի Հարությունյանն իրեն լիովին մեղավոր է ճանաչել և ցուցմունք տվել այն մասին, որ 2012թ. հունիսի 1-ին ժամը 14:10-ի սահմաններում իր անձնական օգտագործման ՙԿԱՄԱԶ-5511՚ մակնիշի 54 ԼՕ 541 պ/հ բեռնատար ավտոմեքենայով, առանց ուղևորի, մոտ 5-6 տոննա բեռով, գտնվել է Երևան քաղաքի Հր.Քոչար փողոցի դեպի Ն.Զարյան փողոցի կողմը տանող ուղեմասի վրա` երթևեկության հոսքին հակառակ, ճամփեզրից 6 մետր հեռավորության վրա: Նշված ուղեմասով ուղիղ հետընթաց կատարելու ժամանակ տեսել է, ինչպես տարածքի ճանապարհաշինարարական աշխատանքներ կատարող տրակտորը իր ավտոմեքենայի աջ կողմից թեքվելով դեպի ձախ կանգնել է իր ընթացքի ուղղությամբ: Այնուհետև դիմել է արգելակման և բեռնատար ավտոմեքենան կանգնեցրել է տեղում: Մոտ 2 րոպե կանգնելու ընթացքում մշտապես նայել է աջ կողմի հետին տեսանելիության հայելիով դեպի ավտոմեքենայի հետևի հատվածում գտնվող տրակտորի ուղղությամբ, որից հետո տեսնելով, որ տրակտորն իր բեռնատարի աջ կողմով դուրս է եկել իր ընթացքի ուղղությամբ, կրկին վերսկսել է ընթացքը և զարգացնելով մոտ 5 կմ/ժ արագություն կանգնած տեղից անցել է 5,2 մետր տարածություն, որից հետո փողոցի կողմից լսելով ձայներ` բեռնատարը կանգնեցրել է տեղում: Դուրս գալով բեռնատարի խցիկից տեսել է, որ հետևի աջ անիվի տակ անգիտակից վիճակում պառկած է մի կին: Կրկին վերադառնալով բեռնատարի խցիկ ավտոմեքենան վարել է առաջ 1,8 մետր, ապա կանգնեցրել տեղում: Մինչ վրաերթը` կանգնած ժամանակ, ձախ կողմի հետին տեսանելիության հայելիով դեպի հետ ընդհանրապես չի նայել, իսկ հետընթաց կատարելիս որևէ մեկի օգնությանը չի դիմել:

Վկա Ներսես Ֆրունզիկի Աթոյանը դատաքննության փուլում ցուցմունք է տվել այն մասին, որ աշխատում է ՙՍահակյան-Շին՚ ՓԲԸ-ում որպես վարորդ: 2012թ. հունիսի 1-ին ժամը 14:00-ի սահմաններում գտվել է Երևան քաղաքի Հր.Քոչար և Ռիգա փողոցների խաչմերուկի հարակից տարածքում` Հր.Քոչար փողոցի դեպի Փափազյան փողոցի կողմը տանող ուղեմասի ճամփեզրի մոտ կայանված, իրեն ամրակցված ՙԻՍՈՒԶՈՒ՚ մակնիշի 656 ՕԼ 64 պ/հ բեռնատար ավտոմեքենայի խցիկի մեջ: Այդ ժամանակ տեսել է, որ իրենից 60-70 մետր հեռավորության վրա` հանդիպակաց ուղեմասով, դեպի Ն.Զարյան փողոցի ուղղությամբ հետընթաց կատարելով ընթանում է Գագիկ Հարությունյանն իր անձնական օգտագործման ՙԿԱՄԱԶ-5511՚ մակնիշի 54 ԼՕ 541 պ/հ բեռնատար ավտոմեքենայով: Հետընթաց կատարելու ժամանակ ճանապարհաշինարարական աշխատանքներ կատարող տրակտորի վարորդը մուտք գործելով Գ.Հարությունյանի ընթացագոտի դատարկել է հավաքած ասֆալտի թափոնը, իսկ Գ.Հարությունյանը տեսնելով դա` դիմել է արգելակման և բեռնատարը կանգնեցրել տեղում` ՙՄԻԿԱ՚ բենզալցակայանի դիմացի ճանապարհահատվածում: Տրակտորի վարորդի կողմից ասֆալտի թափոնը դատարկելուց հետո տեսել է ինչպես մի տարեց կին բենզալցակայանի տարածքից դուրս գալով երթևեկելի մաս, ուղիղ և դանդաղ քայլերով անցել է մոտ 7 մետր տարածություն, որից հետո կանգնելով ՙԿԱՄԱԶ-5511՚ մակնիշի 54 ԼՕ 541 պ/հ բեռնատար ավտոմեքենային թիկունքով սկսել է դատարկել իր կողմից հավաքված աղբը: Այդ նույն ժամանակ Գ.Հարությունյանը կանգնած տեղից վերսկսել է հետընթացով երթևեկությունը և զարգացնելով մոտ 3-4 կմ/ժ արագություն ու անցնելով մոտ 5 մետր տարածություն` բեռնատար ավտոմեքենայի հետևի աջ մասով վրաերթի է ենթարկել հետիոտնին:

Տուժողի իրավահաջորդ Կարինե Լևոնի Սաղաթելյանը նախաքննության փուլում ցուցմունք է տվել այն մասին, որ հանգուցյալ Ժաննա Սաղաթելյանն իր մայրն է և միասին բնակվել են նույն բնակարանում: 2012թ. հունիսի 1-ին ժամը 14:30-ի սահմաններում, երբ գտնվել է աշխատանքի վայրում, իր մոտ է եկել եղբայրը և հայտնել, որ մայրն իրեն լավ չի զգում և գտնվում է տանը: Անմիջապես գնալով տուն իմացել է, որ մայրը Հր.Քոչար փողոցի վրա ենթարկվել է վրաերթի և տեղում մահացել է: Հետագայում տեղեկացել է, որ 01.06.2012թ. ժամը 14:00-ի սահմաններում մայրը գտնվելով ՙՄԻԿԱ՚ բենզալցակայանի տարածքում հավաքել է աղբը և դուրս գալով բենզալցակայանի տարածքից երթևեկելի մասի ուղղությամբ` ցանկացել է աղբը դատարկել Հր.Քոչար փողոցում կատարվող ճանապարհաշինարարական աշխատանքների արդյունքում գոյացած աղբի կույտի մեջ, որի ընթացքում իր մայրը վրաերթի է ենթարկվել: Դատաքննության փուլում տուժողի իրավահաջորդը դիմում է ներկայացրել դատարան և նշել, որ Գագիկ Հարությունյանից որևէ բողոք կամ պահանջ չունի:
Գ.թ. 115-116

Դատաբժշկական փորձաքննության թիվ 504 եզրակացության համաձայն` Ժ.Սաղաթելյանի մահը վրա է հասել` կյանքի հետ անհամատեղելի մարմնական վնասվածքներից` գլխի, կրծքավանդակի, ողնաշարի, որովայնի, կոնքի, վերին և ստորին վերջույթների` բազմակի, համակցված, բաց և փակ, բութ վնասվածքներ ստանալու հետևանքով, որոնք էլ գտնվում են ուղղակի պատճառական կապի մեջ` մահվան հետ: Սույն հետևությունը հիմնավորվել է դիակի դատաբժշկական փորձաքննությամբ հայտնաբերված` գլխի, կրծքավանդակի, ողնաշարի, որովայնի, կոնքի, վերին և ստորին վերջույթների` բազմակի, համակցված, բաց և փակ, բութ վնասվածքների, քերծվածքների, արյունազեղումների, սալջարդ վերքերի` գլխի, իրանի, վերջույթների շրջաններում, արյունազեղումների` գլխի մաշկի տակ, ուղեղի կարծր և փափուկ թաղանթներում, ուղեղանյութում, ներքին օրգանների դրունքների շրջաններում, ներքին օրգանների պատռվածքների և մասնահատումների, քթոսկրերի, այտոսկրերի, վերին և ստորին ծնոտի` բազմաբեկորային, փակ և բաց կոտրվածքների, գանգի թաղի և հիմի ոսկրերի բազմաբեկորային, բաց կոտրվածքների, կրծքային 2-րդ և 10-րդ ողերի մարմինների փակ, տեղաշարժված կոտրվածքների` ողնուղեղի ամբողջականության խախտումով, կրծոսկրի մարմնի, աջից` անրակի, թիակի, կոնքի ոսկրերի, տարբեր անատոմիական գծերով` բոլոր կողերի ուղղակի և անուղղակի, բազմաբեկորային կոտրվածքների` առպատային և ընդերային թոքամջերի պատռվածքներով, աջ նրբոլոքի բաց, տեղաշարժված կոտրվածքի; սալջարդ վերքերի, արյունազեղումների` սրտապարկի, սրտի, թոքերի, լյարդի, ենթաստամոքսային գեղձի, փայծաղի, երիկամների շրջաններում, կրծքավանդակի, որովայնի խոռոչներում հեղուկ արյան առկայություններով, որոնք առաջացել են` կենդանության օրոք, բութ, կոշտ առարկաներով, ինչպիսիք կարող էին լինել նաև շարժվող ավտոփոխադրամիջոցի արտացցված մակերեսները. նման վնասվածքները կենդանի անձանց մոտ, սովորաբար համարվում են` առողջությանը ծանր վնաս առաջացնող, կյանքին վտանգ սպառնացող, իսկ տվյալ դեպքում` բերել են մահվան: Ելնելով դիահերձման ընթացքում ուսումնասիրված` վաղ դիակային երևույթների արտահայտվածությունների աստիճաններից, կարելի է ենթադրել, որ Ժ.Սաղաթելյանի մահը վրա է հասել փորձաքննությունից շուրջ 20-24 ժամ առաջ: Դիակի դատաբժշկական փորձաքննության ընթացքում, նրա մարմնի վրայով ավտոմեքենայի անվադողերի անցմանը բնորոշ և հատուկ մարմնական վնասվածքներ են հայտնաբերվել` կրծքավանդակի հետին մակերեսին` աջից, հարողնաշարային գծից, անցումով աջ բազկի հետին կողմնային մակերեսին, երկայնաձիգ ուղղությամբ: Ժ.Սաղաթելյանը կենդանության օրոք տառապել է` չափավոր արտահայտված ընդհանուր աթերոսկլերոզով, որը տվյալ դեպքում, չի գտնվում պատճառական կապի մեջ` մահվան հետ: Հաշվի առնելով, որ վնասվածքները կոպիտ են և տարածուն, հետևաբար հստակ որոշել առաջին տրավմատիկ հարվածի ներդրման տեղը հնարավոր չէ: Դիակից վերցված արյան դատաքիմիական ուսումնասիրությամբ, սպիրտներ` չեն հայտնաբերվել: Ժ.Սաղաթելյանի դիակից վերցված արյունը պատկանում է` Ա /երկրորդ/ խմբին:
Գ.թ. 119-127

Դատահետքաբանական և դատաքիմիական համալիր փորձաքննության թիվ 14431204 եզրակացության համաձայն ներկայացված ժակետի ու կոշիկների վրա առանձնահատուկ մեխանիկական բնույթի վնասվածքներ և հետքեր չեն հայտնաբերվել: Ներկայացված կարճաթև վերնամասի ու կիսաշրջազգեստի վրա առկա են մեխանիկական բնույթի վնասվածքներ, որոնք իրենց բնույթով և համակցությամբ առաջացել են վրաերթի` մասնավորապես վրաանցման հետևանքով: Ներկայացված ժակետի ու կոշիկների վրա ավտոմեքենայի անվադողերի նախշանկարների հետքեր չեն հայտնաբերվել: Ներկայացված կարճաթև վերնամասի ու կիսաշրջազգեստի հետևամասերում առկա են ավտոմեքենայի անվադողի նախշանկարների արտատպվածքներ, որոնք ունեն ընդհանուր սեռային պատկանելիություն ՙԿԱՄԱԶ-5511՚ մակնիշի 54 ԼՕ 541 պ/հ ավտոմեքենայի հետևի անվադողերի նախշանկարների հետ: Տրամադրված ՙԿԱՄԱԶ-5511՚ մակնիշի 54 ԼՕ 541 պ/հ ավտոմեքենայի հետևի աջ կողմում առկա են հետքեր, որոնք իրենց բնույթով և համակցությամբ կարող էին առաջանալ վրաերթի, մասնավորապես վրաանցման ընթացքում, համեմատաբար փափուկ մակերես ունեցող առարկայի հետ, որպիսին հանդիսանում է նաև մարդու մարմինը, փոխազդեցության մեջ մտնելու հետևանքով:
Գ.թ. 93-99

Դատաավտոտեխնիկական փորձաքննության թիվ 14441208 եզրակացությամբ ներկայացված ՙԿԱՄԱԶ-5511՚ մակնիշի 54 ԼՕ 541 պ/հ ավտոմեքենայի բանվորական և կայանման արգելակային ու ղեկային կառավարման համակարգերն, ընթացային մասը` կախոցները և անիվները, գտնվում են աշխատունակ վիճակում և դրանց այնպիսի անսարքություններ, որպիսիք գոյություն ունեցած լինեին մինչև տվյալ պատահարը և պայմանավորած լինեին ավտոմեքենայի ընթացքի կայունության կամ կառավարելիության կորստի առաջացումը, չեն հայտնաբերվել:
Գ.թ. 85-88

Դատաավտոտեխնիկական փորձաքննության թիվ 14591208 եզրակացությամբ ՙԿԱՄԱԶ-5511՚ մակնիշի 54 ԼՕ 541 պ/հ ավտոմեքենայի վարորդը, երթևեկությունը հետընթացով սկսելուց առաջ պատշաճ կերպով չհամոզվելով դրա անվտանգության մեջ ու նաև հետընթաց կատարելիս չդիմելով այլ անձանց օգնությանը, թույլ է տվել ՃԵԿ-ի 48 կետի և ՙՃանապարհային երթևեկության անվտանգության ապահովման մասին՚ ՀՀ օրենքի 23 հոդ. 3-րդ կետի պահանջներին հակասող գործողություններ, տեխնիկական տեսակետից ստեղծել վթարային իրադրություն, դրանով իսկ պայմանավորել տվյալ վրաերթի առաջացումը` ինքն իրեն զրկելով այն կանխելու տեխնիկական հնարավորությունից: ՙԿԱՄԱԶ-5511՚ մակնիշի 54 ԼՕ 541 պ/հ ավտոմեքենայի վարորդը հետընթաց կատարելուց առաջ տեխնիկական տեսակետից պետք է համոզվեր` անհրաժեշտության դեպքում դիմելով նաև այլ անձանց օգնությանը, որ հետընթացի կատարումն անվտանգ է երթևեկության համար:
Գ.թ. 67-70

Դեպքի վայրի զննման արձանագրության համաձայն` վրաերթը տեղի է ունեցել Երևան քաղաքի Հր.Քոչար փողոցի թիվ 24/1 հասցեում գտնվող ՙՄԻԿԱ՚ բենզալցակայանի դիմաց:
Գ.թ© 3-12

Տրանսպորտային միջոցի զննության արձանագրությամբ` զննության պահին ՙԿԱՄԱԶ-5511՚ մակնիշի 54 ԼՕ 541 պ/հ բեռնատար ավտոմեքենայի հետևի աջ անիվների վրա հայտնաբերվել են արնանման հետքեր և մարմնի հյուսվածքների մնացորդներ:
Գ.թ© 13-18

Գագիկ Լյուդվիկի Հարությունյանի մասնակցությամբ դեպքի վայրի լրացուցիչ զննության արձանագրության համաձայն` վրաերթը տեղի է ունեցել Երևան քաղաքի Հր.Քոչար փողոցում դեպի Ն.Զարյան փողոցի կողմը տանող ուղեմասում` ՙՄԻԿԱ՚ բենզալցակայանի դիմաց: Գ.Հարությունյանը դեպքի վայրում մատնացույց է արել ճանապարհի այն հատվածը որ մասով որ հետընթացով երթևեկել է մինչ վրաերթը: Չափումից պարզվել է, որ իր անձնական օգտագործման ՙԿԱՄԱԶ-5511՚ մակնիշի 54 ԼՕ 541 պ/հ բեռնատար ավտոմեքենայով մինչ վրաերթը հետընթացով երթևեկել է ճամփեզրից 6 մետր հեռավորության վրա, այնուհետև հայտարարել է, որ նշված ուղեմասով ուղիղ հետընթաց կատարելու ժամանակ տեսել է, ինչպես տարածքի ճանապարհաշինարարական աշխատանքներ կատարող տրակտորը իր ավտոմեքենայի աջ կողմից թեքվելով դեպի ձախ կանգնել է իր ընթացքի ուղղությամբ: Տեսնելով դա դիմել է արգելակման և բեռնատար ավտոմեքենան կանգնեցրել է տեղում: Այնուհետև նշել է, որ տեղում մոտ 2 րոպե կանգնելու ընթացքում մշտապես նայել է աջ կողմի հետին տեսանելիության հայելիով դեպի ավտոմեքենայի հետևի հատվածում գտնվող տրակտորի ուղղությամբ, որից հետո տեսնելով, որ տրակտորը իր բեռնատարի աջ կողմով դուրս է եկել իր ընթացքի ուղղությամբ կրկին վերսկսել է ընթացքը և զարգացրել է մոտ 5 կմ/ժ արագություն: Դրանից հետո Գ.Հարությունյանը մատնացույց է արել այն վայրը, որտեղ վրաերթի է ենթարկել Ժ.Սաղաթելյանին: Չափումից պարզվել է, որ կանգնած տեղից դեպի հետ ընթացող Գ.Հարությունյանը ավտոմեքենան վարել է 5,2 մետր տարածություն: Այնուհետև Գ.Հարությունյանը հայտարարել է, որ փողոցի կողմից լսելով բղավոցներ բեռնատարը կանգնեցրել է տեղում, ապա դուրս գալով բեռնատարի խցիկից տեսել է, որ հետևի աջ անիվի տակ անգիտակից վիճակում պառկած է մի կին: Կրկին վերադառնալով բեռնատարի խցիկ ավտոմեքենան վարել է առաջ` անցնելով 1,8 մետր տարածություն, որից հետո բեռնատարը կանգնեցրել է տեղում: Գ.Հարությունյանը նաև հայտարարել է, որ մինչ վրաերթը` կանգնած ժամանակ, ձախ կողմի հետին տեսանելիության հայելիով դեպի հետ ընդհանրապես չի նայել, իսկ հետընթաց կատարելիս որևէ մեկի օգնությանը չի դիմել:
Գ.թ. 53-59

Ժ.Սաղաթելյանի հագուստների և կոշիկների առգրավման և զննության արձանագրություններով առգրավվել և զննվել են վերջինիս հագուստները և կոշիկները, որոնց վրա հայտնաբերվել են վրաերթին բնորոշ հետքեր և վնասվածքներ, որոնք էլ ճանաչվել են իրեղեն ապացույց և կցվել են քրեական գործին:
Գ.թ. 44-45, 101-102

Գ.Հարությունյանի բժշկական վկայարկման թիվ 101294 արձանագրության համաձայն` դեպքի պահին վերջինս գտնվել է սթափ վիճակում:
Գ.թ. 20

Դատարանի իրավական վերլուծությունները
Դատարանը հետազոտելով գործով ձեռք բերված յուրաքանչյուր ապացույց, գնահատելով թույլատրելիության վերաբերելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, ղեկավարվելով օրենքով, ներքին համոզմամբ, գտնում է, որ ամբաստանյալ Գագիկ Հարությունյանի մեղավորությունը ՀՀ քրեական օրենսգրքի 242-րդ հոդվածի 2-րդ մասով նախատեսված հանցագործության կատարման մեջ` ճանապարհային երթևեկության կանոնները խախտելը, որն անզգուշությամբ առաջացրել է մահ, ապացուցված է:
Վերոհիշյալ հանցանքի կատարման համար ամբաստանյալը ենթակա է քրեական պատասխանատվության և պատժի:
Ամբաստանյալի նկատմամբ պատիժ նշանակելիս դատարանը հաշվի է առնում գործի կոնկրետ հանգամանքները, հանցագործության հանրության համար վտանգավորության աստիճանն ու բնույթը, ինչպես նաև անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները:
Ամբաստանյալ Գագիկ Հարությունյանի անձը բնութագրող տվյալներ, պատասխանատվությունն ու պատիժը մեղմացնող հանգամանքներ դատարանը հաշվի է առնում այն, որ նա ընդունել է մեղքը և անկեղծորեն զղջացել կատարած արարքի համար, նախկինում դատված չէ, ընտանիքը բաղկացած է հինգ անձից, խնամքին են գտնվում 2008թ. և 2010թ. ծնված երկու մանկահասակ երեխաները, երորդ խմբի հաշմանդամ մայրը և կենսաթոշակառու հայրը, ընտանիքի միակ կերակրողն է, բնութագրվում է դրական, տրանսպորտային միջոց վարելը հանդիսանում է ընտանիքի ապրուստի միջոցը, տուժողի իրավահաջորդը որևէ բողոք կամ պահանջ չի ներկայացրել:
Ամբաստանյալի պատասխանատվությունը և պատիժը ծանրացնող հանգամանքներ դատարանը չի արձանագրել:
Անդրադառնալով Գագիկ Հարությունյանի նկատմամբ նշանակվող պատժին, դատարանը միաժամանակ գտնում է, որ նրա ուղղվելը հնարավոր է առանց պատիժը կրելու:
Նման եզրահանգման դատարանը գալիս է` հաշվի առնելով հատկապես ամբաստանյալի անձը բնութագրող, պատասխանատվությունն ու պատիժը մեղմացնող հանգամանքների համակցությունը:

Ղեկավարվելով ՀՀ քրեական դատավարության օրենսգրքի 134-րդ, 357-360-րդ, 365-րդ, 369-373-րդ, 379-րդ հոդվածներով, դատարանը`

ՎՃՌԵՑ

Գագիկ Լյուդվիկի Հարությունյանին մեղավոր ճանաչել ՀՀ քրեական օրենսգրքի 242-րդ հոդվածի 2-րդ մասով և նրա նկատմամբ պատիժ նշանակել ազատազրկում 2 /երկու/ տարի ժամկետով` զրկելով տրանսպորտային միջոցներ վարելու իրավունքից` 1 /մեկ/ տարի ժամկետով:
Կիրառել ՀՀ քրեական օրենսգրքի 70-րդ հոդվածը և Գագիկ Հարությունյանի նկատմամբ ազատազրկման ձևով նշանակված պատիժը պայմանականորեն չկիրառել, սահմանել փորձաշրջան 1 /մեկ/ տարի ժամկետով:
Գագիկ Հարությունյանի նկատմամբ ընտրված խափանման միջոցը` ստորագրություն չհեռանալու մասին, թողնել անփոփոխ, մինչև դատավճռի օրինական ուժի մեջ մտնելը:

Դատավճիռը կարող է բողոքարկվել ՀՀ վերաքննիչ քրեական դատարան հրապարակման պահից` մեկամսյա ժամկետում:




ԴԱՏԱՎՈՐ Ա.ՄԿՐՏՉՅԱՆ