ԵԱՔԴ/0095/01/12

Դ Ա Տ Ա Վ Ճ Ի Ռ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանըª

նախագահող դատավոր Լ. Ավետիսյան
քարտուղարությամբ` Ն. Ղազարյանի, Հ.Թադևոսյանի
մասնակցությամբ
մեղադրող` Է. Պետրոսյանի


2012 թվականի հոկտեմբերի 26-ին, Երևան քաղաքում, դռնբաց դատական նիստում քննեց քրեական գործն ըստ մեղադրանքի Կարապետ Ասատուրի Կարապետյանի, ծնված 1951 թվականի հունվարի 18-ին, Արմավիրի մարզի Տանձուտ գյուղում, ազգությամբ հայ, ՀՀ քաղաքացի, միջնակարգ կրթությամբ, ֆիզիկապես վատառողջ, ամուսնացած, խնամքին ոչ ոք, դատվածություն չունեցող, չի աշխատում, հաշվառված և բնակվում է ք.Երևան, Անդրանիկի փողոց 62 շենք թիվ 42 բնակարան հասցեում, մեղադրվում է ՀՀ քրեական օրենսգրքի 333 հոդվածի 1-ին մասով, որպես խափանման միջոց է ընտրվել չհեռանալու մասին ստորագրությունը,

Պ Ա Ր Զ Ե Ց

1.Գործի դատավարական նախապատմությունը.
2012 թվականի մայիսի 17-ին ՀՀ ոստիկանության ՔԳՎ Երևան քաղաքի քննչական վարչության Արաբկիրի քննչական բաժնում ՀՀ քրեական օրենսգրքի 333 հոդվածի 1-ին մասով նախատեսված հանցագործության հատկանիշներով հարուցվել է թիվ 14112412 քրեական գործը:
2012 թվականի հուլիսի 24-ին նախաքննության մարմնի որոշմամբ Կարապետ Ասատուրի Կարապետյանը ներգրավվել է որպես մեղադրյալ ՀՀ քրեական օրենսգրքի 333 հոդվածի 1-ին մասով, նրա նկատմամբ որպես խափանման միջոց է ընտրվել չհեռանալու մասին ստորագրությունը:
2012 թվականի օգոստոսի 1-ին թիվ 14112412 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
2.Գործի փաստական հանգամանքները.
Նախնական քննության մարմինն ամբաստանյալ Կարապետ Ասատուրի Կարապետյանին մեղադրանք է առաջադրել այն արարքի կատարման համար, որ նա 2012թ.-ի փետրվարի 14-ին Երևան քաղաքի Կոմիտասի պողոտայի 25/2 հասցեում գտնվող ՙԱրինա՚ տաքսի ծառայության գրասենյակում Արման Գրիգորյանի հետ վիճաբանելուց հետո, ցանկանալով վրեժ լուծել վերջինից, գիտակցելով, որ իր տրամադրած տեղեկությունները կեղծ են, սուտ մատնություն կատարելու դիտավորությամբ, ՀՀ ոստիկանության Արաբկիրի բաժին հաղորդում է տվել այն մասին, որ Ա.Գիրգորյանն իրեն ծեծի է ենթարկել` պատճառելով մարմնական վնասվածքներ:
3.Ապացույցների հետազոտում.
Նախաքննության ընթացքում առաջադրված մեղադրանքում Կարապետ Ասատուրի Կարապետյանն իրեն մեղավոր է ճանաչել և խոստովանական ցուցմունքներ տվել այն մասին, որ 2011թ. ձմռանը, անվադողերի անհամապատասխան և մաշվածության պատճառով Հրազդանի կիրճում վթարի է ենթարկել ՙԱրինա՚ տաքսի ծառայությանը պատկանող ավտոմեքենան: Դրանից հետո ինքը վերանորոգել է իր կողմից վնասած մեքենան, սակայն տնօրեն Արման Գրիգորյանը դժգոհ է մնացել իրենից: Այդ կապակցությամբ աշխատանքից ազատվելու նպատակով, ինքը 2012թ. փետրվարի 14-ին գնացել է Կոմիտասի պողոտայի 25/2 հասցեում գտնվող ՙԱրինա՚ տաքսի ծառայության գրասենյակ և պահանջել իր աշխատանքից ազատվելու փաստաթղթերը: Արման Գրիգորյանը հրաժարվել է իրեն աշխատանքից ազատել` պահանջելով վերանորոգել մեքենան: Ինքն էլ իր հերթին հրաժարվել է վերանորոգել մեքենան, որի կապակցությամբ վիճաբանություն է առաջացել իր և Ա.Գրիգորյանի միջև: Վիճաբանությունից հետո դժգոհ և զայրացած որոշել է հաղորդում տալ ոստիկանության Արաբկիրի բաժին, որ Արման Գրիգորյանն իրեն ծեծի է ենթարկել: Իրականում նման բան չի եղել, ուղղակի զայրացած է եղել և ցանկացել է վատություն անել Ա.Գրիգորյանին: Զղջում է կատարած արարքի համար:
Դատաքննության ժամանակ առաջադրված մեղադրանքում ամբաստանյալ Կարապետ Կարապետյանն իրեն մեղավոր չճանաչեց և ցուցմունք տվեց այն մասին, որ ինքը սուտ մատնություն չի կատարել: ՙԱրինա՚ տաքսի ծառայությունում աշխատել է երկուս ու կես տարի, իրեն չեն գրանցել որպես աշխատող: Դեպքի օրն ինքն աշխատանքից չի ուշացել, ասել է, որ այլևս չի ցանկանում աշխատել: Պահանջել է իր անձնագիրը, սակայն Արման Գրիգորյանն ասել է, որ պատճառած վնասը հատուցելուց հետո նոր միայն անձնագիրը կվերադարձնի: Սկսել են վիճել: Արմանը ձեռքով մի քանի անգամ հարվածել է իր գլխին: Հարվածից վնասվածք չի ստացել: Ինքն էլ է ուզել հարվածել, բայց չի կարողացել: Արմենն իրեն դուրս է հանել: Դուրս գալուց հետո ինքը ոչ ոքի չի տեսել: Գնացել է ոստիկանության Արաբկիրի բաժին և հաղորդում տվել:
Ամբաստանյալ Կարապետ Կարապետյանը դատարանում տված ցուցմուքնով նպատակ է հետապնդում խուսափելու քրեական պատասխանատվությունից:
Կ.Կարապետյանին մեղսագրված հանցանքը հիմնավորվել է հետևյալ ապացույցներով.
Տուժող Արման Զորիկի Գրիգորյանի նախաքննության ընթացքում տված ցուցմունքներով այն մասին, որ 2012թ. փետրվարի 14-ին, ժամը 1200-ի սահմաններում ինքը գտնվել է Երևան քաղաքի Կոմիտասի պողոտայի 25/2 հասցեում գտնվող ՙԱրինա՚ տաքսի ծառայության գրասենյակում: Ուշացած աշխատանքի է գնացել Կ.Կարապետյանը, ում ինքը դիտողություն է արել աշխատանքից ուշանալու համար: Կարապետ Կարապետյանն ասել է, որ այլևս չի ցանկանում աշխատել: Ինչին ինքը պատասխանել է, որ նրա կողմից վթարի ենթարկած մեքենան վերանորոգելուց հետո միայն նա կարող է ազատվել աշխատանքից: Վիճաբանություն է տեղի ունեցել, որի ընթացքում Կ.Կարապետյանը դժգոհություն արտահայտելով հեռացել է գրասենյակից: Հայտնել է նաև, որ ինքը չի հարվածել Կ. Կարապետյանին:
Վկա Հրանտ Ռոբերտի Գրիգորյանի նախաքննության ընթացքում տված ցուցմունքներով այն մասին, որ 2012թ. փետրվարի 14-ին ինքը գտնվել է Կոմիտասի պողոտայի 25/2 հասցեում, որտեղ պատահաբար հանդիպել է Կարապետ Կարապետյանին: Իր հարցին, թե ինչ է պատահել, Կ.Կարապետյանը պատասխանել է, որ զայրացած է Ա.Գրիգորյանի վրա և առաջարկել է իր հետ միասին ոստիկանությունում հաղորդում տալ, որ Ա.Գրիգորյանն իրեն նույնպես հարվածել է: Ինքը հրաժարվել է սուտ հաղորդում տալուց և առաջարկել է Կ. Կարապետյանին նույնպես նման բան չանել:
Վկա Քրիստինե Ավետիքի Գևորգյանի ցուցմունքով այն մասին, որ աշխատում է ՙԱրինա՚ տաքսի ծառայությունում, որպես հեռախոսավարուհի: 2012թ. փետրվարի 14-ին, ժամը 1230-ի սահմաններում, ինքը գտնվել է Կոմիտասի պողոտայի 25/2 հասցեում գտնվող ՙԱրինա՚ տաքսի ծառայության գրասենյակում, որտեղ ուշացած գնացել է վարորդ Կարապերտ Կարապետյանը: Տնօրեն Ա. Գրիգորյանը նկատողություն է արել նրան ուշանալու համար, ինչին Կ.Կարապետյանը պատասխանել է, որ այլևս չի ցանկանում աշխատել և պահանջել է իր փաստաթղթերը: Ա. Գրիգորյանն ասել է, որ եթե ցանկանում է ազատվել աշխատանքից, ապա պետք է վերանորոգի իր կողմից վնասած մեքենան, որից հետո կարող է ազատվել աշխատանքից: Կ.Կարապետյանը հրաժարվել է, ինչի կապակցությամբ վիճաբանություն է սկսվել: Ներկա է եղել Արմանը, Կարապետը, Ստեփանը, Արմենը և, հավանաբար, Հրանտը: Ողջ ընթացքում ինքը ներկա է գտնվել: Վիճաբանության ընթացքում ոչ Ա.Գրիգորյանը, ոչ էլ որևէ այլ անձ չի հարվածել Կարապետ Կարապետյանին: Մեխանիկ Արմենը հրելով դուրս է հանել Կարապետին: Վերջինս գոռգոռալով դուրս է եկել գրասենյակից և հեռացել:
Վկա Ստեփան Վաչեի Վասիլյանի ցուցմունքով այն մասին, որ աշխատում է ՙԱրինա՚ տաքսի ծառայությունում, որպես կարգավար: 2012թ. փետրվարի 14-ին, գտնվել է Կոմիտասի պողոտայի 25/2 հասցեում գտնվող ՙԱրինա՚ տաքսի ծառայության գրասենյակում և կատարել իր աշխատանքային պարտականությունները: Ժամը 1230-ի սահմաններում գրասենյակ է գնացել վարորդ Կարապետ Կարապետյանը: Աշխատանքից ուշանալու կապակցությամբ տնօրեն Արման Գրիգորյանը դիտողություն է արել վերջինիս, իսկ Կ. Կարապետյանն ասել է, որ այլևս չի ցանկանում աշխատել այդտեղ: Ա. Գրիգորյանը պատասխանել է, որ իր կողմից վնասած մեքենան վերանորոգելուց հետո միայն կարող է ազատվել աշխատանքից: Այդ կապակցությամբ վիճաբանություն է սկսվել: Նրանց միջև քաշքշոց, կռիվ չի եղել, ուղղակի բարձրաձայն գոռգոռացել են: Ներկա են եղել ինքը, Արմանը, Կարապետը, Քրիստինեն, Արմենը և Հրանտը: Այնուհետև Կարապետ Կարապետյանն ասելով, որ կբողոքի ոստիկանություն, դուրս է եկել գրասենյակից:
Դատաբժշկական փորձաքննության թիվ 312 եզրակացությամբ, համաձայն որի Կ. Կարապետյանի մոտ, փորձաքննության պահին, մարմնական վնասվածքների օբյեկտիվ հատկանիշներ չեն հայտնաբերվել:
4.Դատարանի իրավական վերլուծությունները.
Վերլուծելով և գնահատելով դատական քննության ժամանակ հետազոտված ապացույցներն իրենց համակցության մեջ, դատարանը ձեռք բերված ապացույցները բավարար է գտնում և գործի փաստական հանգամանքներով հաստատված է համարում, որ ամբաստանյալ Կարապետ Կարապետյանը կատարել է սուտ մատնություն, գիտակցելով, որ իր տրամադրած տեղեկատվությունը կեղծ է, որպիսի արարքը համապատասխանում է ՀՀ քրեական օրենսգրքի 333 հոդվածի 1-ին մասի հատկանիշներին:
Ամբաստանյալ Կարապետ Կարապետյանի նկատմամբ պատիժ նշանակելիս, դատարանը հաշվի է առնում նրա կատարած արարքի հանրության համար վտանգավորության աստիճանը, ինչպես նաև հանցավորի անձը:
Որպես ամբաստանյալ Կարապետ Կարապետյանի պատասխանատվությունը և պատիժը մեղմացնող հանգամանք դատարանը դիտում է այն, որ նա ֆիզիկապես վատառողջ է` տառապում է սրտային հիվանդությամբ:
Ամբաստանյալի պատասխանատվությունը և պատիժը ծանրացնող հանգամանքներ չկան:
Կատարած արարքի համար ամբաստանյալ Կարապետ Ասատուրի Կարապետյանը ենթակա է քրեական պատասխանատվության և պատժի:
Հաշվի առնելով Կարապետ Կարապետյանի կատարած արարքի հանրության համար վտանգավորության աստիճանը և բնույթը, նրա անձը, ինչպես նաև այն, որ ՀՀ քրեական օրենսգրքի 333 հոդվածի 1-ին մասի սանկցիայով նախատեսված է պատիժ նաև տուգանքի ձևով, դատարանը գտնում է, որ ամբաստանյալ Կարապետ Կարապետյանի նկատմամբ ՀՀ քրեական օրենսգրքի 333 հոդվածի 1-ին մասով նախատեսված հանցանք կատարելու համար պատիժ պետք է նշանակել տուգանքի ձևով, իսկ նրա նկատմամբ կիրառված խափանման միջոցը պետք է թողնել անփոփոխ, մինչև դատավճռի օրինական ուժի մեջ մտնելը:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 357-360, 365, 369-372 հոդվածներով, դատարանը

Վ Ճ Ռ Ե Ց

Կարապետ Ասատուրի Կարապետյանին մեղավոր ճանաչել ՀՀ քրեական օրենսգրքի 333 հոդվածի 1-ին մասով նախատեսված հանցանք կատարելու մեջ և նրան դատապարտել տուգանքի նվազագույն աշխատավարձի երկուհարյուրապատիկի` երկու հարյուր հազար (200.000) ՀՀ դրամի չափով:
Կարապետ Ասատուրի Կարապետյանի նկատմամբ որպես խափանման միջոց ընտրված չհեռանալու մասին ստորագրությունը թողնել անփոփոխ, մինչև դատավճռի օրինական ուժի մեջ մտնելը:
Դատավճիռը կարող է բողոքարկվել ՀՀ վերաքննիչ քրեական դատարան հրապարակվելու օրվանից հետո մեկամսյա ժամկետում:

Դատավոր` ստորագրություն
Բնագրի հետ ճիշտ է`
Դատավոր Լ. Ավետիսյան