ԵԱՔԴ/0079/01/12
Ո Ր Ո Շ ՈՒ Մ

քրեական հետապնդումը դադարեցնելու և քրեական գործի վարույթը կարճելու մասին


ՙ24՚ սեպտեմբերի 2012թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը` նախագահող դատավոր Լ.Ավետիսյան, քարտուղարությամբ Ն.Ղազարյանի, մասնակցությամբ մեղադրող Է.Պետրոսյանի, դռնբաց դատական նիստում, քննեց քրեական գործն ըստ մեղադրանքի Միկիչ Սայադի Շահումյանի (ծնված 1986 թվականի մայիսի 1-ին, Տավուշի մարզի Կոթի գյուղում, ազգությամբ հայ, ՀՀ քաղաքացի, միջնակարգ կրթությամբ, ֆիզիկապես վատառողջ, գտնվում է փաստական ամուսնական հարաբերությունների մեջ, խնամքին մեկ անչափահաս երեխա, նախկինում դատված` Տավուշի մարզի ընդհանուր իրավասության դատարանի 09.03.2011թ. դատավճռով ՀՀ քրեական օրենսգրքի 361 հոդվածի 1-ին մասով դատապարտվել է կարգապահական գումարտակում պահելուն երեք ամիս ժամանակով, ազատվել է 03.06.2011թ.-ին` ՀՀ Ազգային ժողովի 2009թ. հունիսի 19-ի ՙՀամաներում հայտարարելու մասին՚ որոշմամբ, չի աշխատում, հաշվառված է Տավուշի մարզի Կոթի գյուղի 2-րդ փողոցի 20 տուն հասցեում, բնակվում է Երևան քաղաքի Ռուբինյանց փողոցի 28 շենքի թիվ 36 բնակարան հասցեում) ՀՀ քրեական օրենսգրքի 178 հոդվածի 1-ին մասով,


Պ Ա Ր Զ Ե Ց

2012 թվականի մարտի 23-ին ՀՀ ոստիկանության ՔԳՎ Երևան քաղաքի քննչական վարչության Քանաքեռ-Զեյթունի քննչական բաժնում ՀՀ քրեական օրենսգրքի 178 հոդվածի 1-ին մասով նախատեսված հանցագործության հատկանիշներով հարուցվել է թիվ 09103312 քրեական գործը:
2012 թվականի մայիսի 21-ին Միկիչ Սայադի Շահումյանը նախաքննական մարմնի որոշմամբ ներգրավվել է որպես մեղադրյալ քրեական օրենսգրքի 178 հոդվածի 1-ին մասով այն արարքի կատարման համար, որ ՙնա խարդախությամբ ուրիշի գույքի հափշտակություն կատարելու դիտավորությամբ, չարշահելով Գայանե Սաֆարյանի վստահությունը` 2011 թվականի օգոստոս ամսին վերջինիս հետ եկել է Երևան քաղաքի Պ.Սևակ փողոցի 51 հասցեում գտնվող ՙԱրմենՏել՚ ընկերության գրասենյակ, որտեղ Գայանե Սաֆարյանի անվամբ ապառիկ վճարման կարգով վերցրել են 115.000 ՀՀ դրամ արժողությամբ ՆեթԲուք տեսակի համակարգիչ` հետագայում Միկիչ Շահումյանի կողմից համակարգչի գումարը վճարելու պայմանով, սակայն համակարգիչը վերցնելուց հետո, Միկիչ Շահումյանը չի կատարել համակարգչի գնման համար վճարումները և խարդախությամբ տիրացել է զգալի չափերի` 115.000 ՀՀ դրամ արժողությամբ համակարգչին:՚
2012 թվականի մայիսի 21-ին Միկիչ Սայադի Շահումյանի նկատմամբ հայտարարվել է հետախուզում և որպես խափանման միջոց է ընտրվել չհեռանալու մասին ստորագրությունը:
2012 թվականի հունիսի 4-ին Միկիչ Շահումյանը ինքնակամ ներկայացել է ՀՀ ոստիկանության Քանաքեռ-Զեյթունի բաժին:
2012 թվականի հունիսի 27-ին թիվ 09103312 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
Դատական քննության ընթացքում տուժող Գայանե Սաֆարյանը Ռուսաստանի Դաշնությունից նոտարական կարգով հաստատված դիմում է ուղարկել դատարան հայտնելով, որ ինքն ամբաստանյալ Միկիչ Շահումյանի նկատմամբ որևէ բողոք չունի, վերջինս փոխհատուցել է հանցագործությամբ իրեն պատճառված վնասը:
Ամբաստանյալ Միկիչ Շահումյանը հայտնեց, որ ինքն ու տուժողը հաշտվել են և ինքը համաձայն է, որպեսզի իր նկատմամբ քրեական հետապնդումը դադարեցվի:
Մեղադրող Է.Պետրոսյանը միջնորդեց ամբաստանյալ Միկիչ Շահումյանի նկատմամբ քրեական հետապնդումը դադարեցնել և քրեական գործի վարույթը կարճել հետևյալ պատճառաբանությամբ.
ՀՀ քրեական դատավարության օրենսգրքի 35 հոդվածի 1-ին մասի 5-րդ կետի համաձայն, քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե ՀՀ քրեական դատավարության օրենսգրքով նախատեսված դեպքերում տուժողը հաշտվել է մեղադրյալի հետ:
ՀՀ քրեական դատավարության օրենսգրքի 183 հոդվածի 1-ին մասի համաձայն, ՀՀ քրեական օրենսգրքի 178 հոդվածի 1-ին մասով նախատեսված հանցագործության վերաբերյալ գործերը հարուցվում են ոչ այլ կերպ, քան տուժողի բողոքի հիման վրա, և կասկածյալի, մեղադրյալի կամ ամբաստանյալի հետ նրա հաշտվելու դեպքում ենթակա են կարճման: Հաշտությունը թույլատրվում է մինչև դատավճիռ կայացնելու համար դատարանի խորհրդակցական սենյակ հեռանալը:
Վերոգրյալը հաշվի առնելով, դատարանը գտնում է, որ թիվ ԵԱՔԴ/0079/01/12 քրեական գործի վարույթը պետք է կարճել և Միկիչ Սայադի Շահումյանի նկատմամբ քրեական հետապնդումը դադարեցնել, նկատի ունենալով հետևյալը.
ՀՀ քրեական օրենսգրքի 73 հոդվածի համաձայն, ոչ մեծ ծանրության հանցանք կատարած անձը կարող է ազատվել քրեական պատասխանատվությունից, եթե նա հաշտվել է տուժողի հետ և հատուցել կամ այլ կերպ հարթել է նրան պատճառած վնասը:
ՀՀ քրեական օրենսգրքի 19 հոդվածի 2-րդ մասի համաձայն, ոչ մեծ ծանրության հանցագործություններ են համարվում դիտավորությամբ կատարված այն արարքները, որոնց համար սույն օրենսգրքով նախատեսված առավելագույն պատիժը չի գերազանցում երկու տարի ժամկետով ազատազրկումը, կամ որոնց համար նախատեսված է ազատազրկման հետ կապ չունեցող պատիժ, ինչպես նաև անզգուշությամբ կատարված այն արարքները, որոնց համար սույն օրենսգրքով նախատեսված առավելագույն պատիժը չի գերազանցում երեք տարի ժամկետով ազատազրկումը: ՀՀ քրեական օրենսգրքի 178 հոդվածի 1-ին մասով նախատեսված արարքները դասվում են ոչ մեծ ծանրության հանցագործությունների շարքին:
ՀՀ քրեական դատավարության օրենսգրքի 35 հոդվածի 4-րդ մասի համաձայն, մեղադրողը, դատարանում հայտնաբերելով քրեական հետապնդումը բացառող հանգամանքներ, պարտավոր է հայտարարել ամբաստանյալի նկատմամբ քրեական հետապնդում իրականացնելուց հրաժարվելու մասին: Ամբաստանյալի նկատմամբ քրեական հետապնդում իրականացնելուց հրաժարվելու մասին մեղադրողի հայտարարությունը դատարանի համար քրեական գործի վարույթը կարճելու և քրեական հետապնդումը դադարեցնելու հիմք է:
Ելնելով վերոգրյալից և ղեկավարվելով ՀՀ քրեական օրենսգրքի 73 հոդվածով, ՀՀ քրեական դատավարության օրենսգրքի 33 հոդվածի 2-րդ մասով, 35 հոդվածի 1-ին մասի 5-րդ կետով, 36, 183, 294 և 313 հոդվածներով, դատարանը

Ո Ր Ո Շ Ե Ց

Միկիչ Սայադի Շահումյանի նկատմամբ ՀՀ քրեական օրենսգրքի 178 հոդվածի 1-ին մասով քրեական հետապնդումը դադարեցնել և նրա վերաբերյալ թիվ ԵԱՔԴ/0079/01/12 քրեական գործի վարույթը կարճել` ամբաստանյալի հետ տուժող Գայանե Սաֆարյանի հաշտվելու հիմքով:
Միկիչ Սայադի Շահումյանի նկատմամբ որպես խափանման միջոց ընտրված չհեռանալու մասին ստորագրությունը վերացնել:
Որոշումը կարող է բողոքարկվել ՀՀ վերաքննիչ քրեական դատարան` հրապարակվելու օրվանից հետո մեկամսյա ժամկետում:


Դատավոր` ստորագրություն
Բնագրի հետ ճիշտ է
Դատավոր Լ. Ավետիսյան