Գործ ԵԱՔԴ/0054/01/12







Դ Ա Տ Ա Վ Ճ Ի Ռ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

07 հունիսի 2012թ. ք.Երևան


Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը


Նախագահությամբ` դատավոր Մ.Խաչատրյանի
Քարտուղարությամբ` Հ.Արտաշեսյանի
Մասնակցությամբ`
Մեղադրող Ս.Գրիգորյանի
Պաշտպաններ Լ.Հակոբյանի
Ա.Սիմոնյանի
Տուժող Ս.Նավասարդյանի


Դռնբաց դատական նիստում արագացված դատաքննության կարգով քննության առավ քրեական գործն ըստ մեղադրանքի`
1. Գևորգ Շամիրի Սարդարյանի, ծնված 29.08.1990թ., Կոտայքի մարզ ք.Նոր Հաճն, ազգությամբ հայ, ՀՀ քաղաքացի, ութամյա կրթությամբ, ամուսնացած չէ, նախկինում դատապարտված չէ, չի աշխատում, հաշվառված է և բնակվում է Կոտայքի մարզ ք.Նոր Հաճն Հարավ-Արևելյան թաղամաս 1-ին փողոց տուն 18:
Մեղադրվում է ՀՀ քրեական օրենսգրքի 131 հոդվածի 2-րդ մասի 1-ին կետով նախատեսված հանցագործության կատարման համար:
Սույն գործով կալանքի տակ է 2012թվականի փետրվարի 17-ից:
2. Կարեն Վաչագանի Ավետիսյանի, ծնված 25.07.1976թ., Կոտայքի մարզ գ.Ալափարս, ազգությամբ հայ, ՀՀ քաղաքացի, միջնակարգ կրթությամբ, ամուսնացած է, խնամքին 2 անչափահաս, նախկինում դատապարտված չէ, չի աշխատում, հաշվառված է և բնակվում է Կոտայքի մարզ գ.Ալափարս Վ.Մամիկոնյան 46:
Մեղադրվում է ՀՀ քրեական օրենսգրքի 131 հոդվածի 2-րդ մասի 1-ին կետով նախատեսված հանցագործության կատարման համար:
Սույն գործով նրա նկատմամբ որպես խափանման միջոց է ընտրվել կալանավորումը, որը Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի 23.02. 2012թ.-ի որոշմամբ փոխարինվել է գրավով:
Արագացված դատական քննությամբ դատարանը.

Պ Ա Ր Զ Ե Ց

Նախաքննության մարմինը Գևորգ Շամիրի Սարդարյանին և Կարեն Վաչագանի Ավետիսյանին ՀՀ քրեական օրենսգրքի 131 հոդվածի 2-րդ մասի 1-ին կետով մեղադրանք է առաջադրել այն բանի համար, որ նրանք ՙնախնական համաձայնությամբ, 16.12.2011թ.-ինª ժամը 18.30-ի սահմաններում, բռնություն գործադրելու եղանակով, ք.Երևան Դավիթ Անհաղթ 19 շենքի բակից բացահայտ առևանգել են Սվետլանա Նավասարդյանին՚:
Ըստ մեղադրական եզրակացության նկարագրական մասի արարքը կատարվել է հետևյալ կերպ:
Գևորգ Սարդարյանը ՙ2011թ.-ի հունիս ամսից աշխատել է Ե.Չարենցի անվան գրականության և արվեստի թանգարանում կատարվող շինարարական աշխատանքներում որպես բանվոր: Աշխատանքի ընթացքում ծանոթացել է ՀՀ ազգային պատկերասրահի աշխատակից Սվետլանա Նավասարդյանին, սիրահարվել նրան և փորձել շահել վերջինիս սիրտը: Նվիրել է ծաղկեփնջեր և գրեթե ամեն օր ճանապարհել է տուն: Վերջիններիս շփումը շարունակվել է մինչ 2011թ.-ի դեկտեմբերի 12-ը, երբ Սվետլանա Նավասարդյանը Գևորգ Սարդարյանին հայտնել է, որ չի սիրում և չի ցանկանում ամուսնանալ նրա հետ և առաջարկել է մնալ ընկերներ: Չընդունելով Սվետլանա Նավասարդյանի մերժումըª Գևորգ Սարդարյանը, 2011թ.-ի դեկտեմբերի 16-ին, առավոտյան հանդիպել է Կարեն Ավետիսյանին, որի հետ ծանոթացել և մտերմացել են Ե.Չարենցի անվան գրականության և արվեստի թանգարանում բանվորական աշխատանքներ կատարելու ժամանակ, միասին գնացել են իրենց նախկին աշխատավայր, որտեղ Գևորգ Սարդարյանը Կարեն Ավետիսյանին հայտնել է, որ ցանկանում է փախցնել Սվետլանա Նավասարդյանին և ամուսնանալ նրա հետ: Կարեն Ավետիսյանը համաձայնվել է օգնել Գևորգ Սարդարյանին: Պայմանավորվածության համաձայն, նույն օրը ժամը 18.00-ի սահմաններում Գևորգ Սարդարյանը և Կարեն Ավետիսյանը, վերջինիս ՎԱԶ 2106 մակնիշի 22 ՏՏ 256 պ/հ ավտոմեքենայով, գնացել են Երևան քաղաքի Դ.Անհաղթ 19 շենքի բակ ու սպասել Սվետլանա Նավասարդյանին: Տեսնելով Սվետլանա Նավասարդյանին, և անտեսելով այն, որ շենքի բակում կան քաղաքացիներ, Գևորգ Սարդարյանը մոտեցել է նրան, մեջքի կողմից գրկել և բռնի ուժ գործադրելով, նստացրել Կարեն Ավետիսյանի ավտոմեքենայի ետևի նստատեղին: Այդ ամենին ականատես է եղել պատահական անցորդ Աշոտ Դավթյանը, որը փորձել է մեքենայի միջից դուրս հանել Սվետլանա Նավասարդյանին, սակայն օգնությունը ձախողվել է, քանի որ Կարեն Ավետիսյանը մեքենայի միջից դուրս է հանել Աշոտ Դավթյանի ձեռքը և արագ վարելով ավտոմեքենանª հեռացել են: Գ.Սարդարյանը և Կարեն Ավետիսյանը Սվետլանա Նավասարդյանին տեղափոխել են Կոտայքի մարզի Ալափարս գյուղի Վ.Մամիկոնյան 27 հասցեում գտնվող Թաթոս Գևորգյանի տուն: Տանն է գտնվել Թաթոս Գևորգյանի կինըª Գայանե Գևորգյանը, որը հասկանալով, որ Սվետլանա Նավասարդյանին առևանգել են, մոտ 20 րոպե անց, զուգարան տանելու պատրվակով Ս.Նավասարդյանին հանել է տանից ու օգնել փախչել: Սվետլանա Նավասարդյանը փախել և մտել է նույն փողոցի վրա գտնվող Աշոտ Սերգոյանի մթերային խանութ, որտեղ օգնություն է խնդրել վաճառողուհի Մալվինա Աղոյանից ու Գայանե Կարապետյանից, իսկ վերջիններս թաքցրել են նրան և, երբ խանութ է մտել Գևորգ Սարդարյանը, վերջինիս հայտնել են, որ ոչ մի աղջկա չեն տեսել: Դրանից հետո, Սվետլանա Նավասարդյանը զանգահարել է իր մորաքրոջ որդի Գևորգ Աղոյանին, բացատրել նշված խանութի գտնվելու վայրը, որն էլ Երևանից շտապ եկել է այդ խանութ և Սվետլանա Նավասարդյանին վերադարձրել տուն՚:
Նախաքննության փուլում առաջադրված մեղադրանքում Գևորգ Շամիրի Սարդարյանը և Կարեն Վաչագանի Ավետիսյանը իրենց մեղավոր են ճանաչել լիովին, նշել են նաև, որ զղջում են կատարածի համար, իսկ առևանգման նպատակը եղել է Գևորգ Սարդարյանի Սվետլանա Նավասարդյանի հետ ամուսնությունը:
Մինչև դատաքննության սկսելն ամբաստանյալներ Գևորգ Շամիրի Սարդարյանը և Կարեն Վաչագանի Ավետիսյանը միջնորդեցին դատական քննությունն անցկացնել արագացված կարգով և հայտարարեցին, որ առաջադրված մեղադրանքը պարզ է, համաձայն են իրենց առաջադրված մեղադրանքին, գիտակցում են արագացված կարգով դատական քննություն անցկացնելու հետևանքները, միջնորդությունը ներկայացրել են կամավոր` պաշտպանների հետ խորհրդակցելուց հետո:
Միջնորդությունը հաստատեցին նաև ամբաստանյալների պաշտպաններ Լ.Հակոբյանը և Ա.Սիմոնյանը:
Մեղադրող Ս.Գրիգորյանը և տուժող Ս.Նավասարդյանը նույնպես արագացված դատական քննության կարգի դեմ չառարկեցին:
Դատարանը համոզվելով, որ առկա են ՀՀ քրեական դատավարության օրենսգրքի 3751-րդ և 3752-րդ հոդվածներով նախատեսված պայմանները, որոշում կայացրեց արագացված կարգով դատական քննություն անցկացնելու մասին:
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալներ Գևորգ Շամիրի Սարդարյանի և Կարեն Վաչագանի Ավետիսյանի մեղավորությունը ՀՀ քրեական օրենսգրքի 131 հոդվածի 2-րդ մասի 1-ին կետի հատկանիշներով նախատեսված հանցանք կատարելու մեջ ապացուցված է և արարքը որակված է ճիշտ:
Պատիժ նշանակելիս դատարանը հաշվի է առնում հանցագործության հանրության համար վտանգավորության աստիճանն ու բնույթը, ինչպես նաև ամբաստանյալների անձը բնութագրող տվյալները, պատասխանատվությունն ու պատիժը ծանրացնող և մեղմացնող հանգամանքները:
Որպես ամբաստանյալ Գևորգ Շամիրի Սարդարյանի անձը բնութագրող տվյալներ և պատիժը և պատասխանատվությունը մեղմացնող հանգամանք դատարանը հաշվի է առնում այն, որ նա նախկինում դատված չի եղել, բնութագրվում է դրական, անկեղծորեն զղջացել է կատարվածի համար:
Ամբաստանյալ Գևորգ Շամիրի Սարդարյանի պատասխանատվությունը և պատիժը ծանրացնող հանգամանք դատարանը չի արձանագրում:
Դատարանը գտնում է, որ ամբաստանյալ Գևորգ Շամիրի Սարդարյանն իր կատարած արաքի համար ենթակա է պատժի և այն պետք է կրի:
Որպես ամբաստանյալ Կարեն Վաչագանի Ավետիսյանի պատասխանատվությունը և պատիժը մեղմացնող հանգամանք և անձը բնութագրող տվյալներ դատարանը հաշվի է առնում այն, որ նա նախկինում դատված չի եղել, բնութագրվում է դրական, խնամքին են գտնվում երկու երեխա` Վահե /ծնված 1998թ./ և Գևորգ /ծնված 2000թ./ Կարենի Ավետիսյանները: Նրանցից Գևորգ Կարենի Ավետիսյանին ծնված 01.07.2000 թվականին ՀՀ աշխատանքի և սոցիալական հարցերի նախարարության ՀՀ բժշկասոցիալական փորձաքննության գործակալության թիվ 577775 տեղեկանքի մինչև 01.07.2018 թվականը տրվել է ՙհաշմանդամ երեխա՚ կարգավիճակ, իսկ հայրը` Վաչագան Ավետիսի Ավետիսյանը 3-րդ խմբի հաշմանդամ է: /հատոր 1, գ.թ. 77-79/:
Ամբաստանյալ Կարեն Վաչագանի Ավետիսյանի պատասխանատվությունը և պատիժը ծանրացնող հանգամանք դատարանը չի արձանագրում:
Նման պայմաններում դատարանը գտնում է, որ ամբաստանյալ Կարեն Ավետիսյանն իր կատարած հանցանքի համար ենթակա է պատժի և միաժամանակ հաշվի առնելով հանցավորի վերը շարադրված անձը բնութագրող տվյալները, պատասխանատվությունը և պատիժը մեղմացնող հանգամանքները, ինչպես նաև պատասխանատվությունը և պատիժը ծանրացնող հանգամանքների բացակայությունը, հանգում է այն հետևության, որ ամբաստանյալի ուղղվելը հնարավոր է պատիժը պայմանականորեն չկիրառելու միջոցով` նրա վարքագծի նկատմամբ վերահսկողություն իրականացնելու պայմաններում:
Ղեկավարվելով ՀՀ քրեական դատավարության օրենսգրքի 357-360-րդ, 365-րդ, 369-373-րդ, 3753-րդ, 3754-րդ հոդվածներով դատարանը

Վ Ճ Ռ Ե Ց

Գևորգ Շամիրի Սարդարյանին մեղավոր ճանաչել ՀՀ քրեական օրենսգրքի 131-րդ հոդվածի 2-րդ մասի 1-ին կետով նախատեսված հանցանքի կատարման համար և դատապարտել ազատազրկման 4 /չորս/ տարի ժամկետով:
Պատժի սկիզբը հաշվել 2012 թվականի փետրվարի 17-ից:
Գևորգ Շամիրի Սարդարյանի նկատմամբ ընտրված խափանման միջոց կալանավորումը մինչև դատավճռի ուժի մեջ մտնելը թողնել անփոփոխ :
Ազատազրկումը պետք է կրի ՀՀ ԱՆ համապատասխան հիմնարկում:

Կարեն Վաչագանի Ավետիսյանին մեղավոր ճանաչել ՀՀ քրեական օրենսգրքի 131-րդ հոդվածի 2-րդ մասի 1-ին կետով նախատեսված հանցանքի կատարման համար և դատապարտել ազատազրկման 4 /չորս/ տարի ժամկետով: Կիրառել ՀՀ քրեական օրենսգրքի 70-րդ հոդվածը, նշանակված պատիժը պայմանականորեն չկիրառել, սահմանել փորձաշրջան 2 /երկու/ տարի ժամկետով:
Կարեն Ավետիսյանի վարքագծի նկատմամբ վերահսկողությունը հանձնարարել ՀՀ ԱՆ քրեակատարողական վարչության նրա բնակության վայրի այլընտրանքային պատիժների կատարման բաժնին, որի սկիզբը հաշվել քրեակատարողական վարչության այլընտրանքային պատիժների կատարման բաժնում նրան հաշվառման վերցնելու պահից:
Կարեն Վաչագանի Ավետիսյանի նկատմամբ ընտրված խափանման այլընտրանքային միջոց գրավը մինչև դատավճռի ուժի մեջ մտնելը թողնել անփոփոխ :
Դատավճիռը ուժի մեջ մտնելուց հետո 24.02.2012թ. թիվ 120224021538040 անդորագրով Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի 900005016010 դեպոզիտ հաշվին մուծված 500.000 /հինգ հարյուրհազար/ ՀՀ դրամ գումարը վերադարձնել Կարեն Վաչագանի Ավետիսյանին :
Դատավճիռը, բացի ՀՀ քրեական դատավարության օրենսգրքի 395-րդ հոդվածի 1-ին մասի 1-ին կետով նախատեսված հիմքից, դատավարության մասնակիցների կողմից 1 /մեկ/ ամսվա ընթացքում վերաքննության կարգով կարող է բողոքարկվել ՀՀ վերաքննիչ քրեական դատարան:



ԴԱՏԱՎՈՐ` Մ.ԽԱՉԱՏՐՅԱՆ