ԵԱՔԴ/0044/01/12

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանը

նախագահող դատավոր Լ. Ավետիսյան
քարտուղարությամբ Ն.Ղազարյանի
մասնակցությամբ`
մեղադրող Ա. Գասպարյանի

2012 թվականի ապրիլի 27-ին, Երևան քաղաքում, դռնբաց դատական նիստում, քննեց քրեական գործն ըստ մեղադրանքի Կարեն Վարդգեսի Պետրոսյանի, ծնված 1987 թվականի օգոստոսի 1-ին, Արմավիր քաղաքում, ազգությամբ հայ, ՀՀ քաղաքացի, բարձրագույն կրթությամբ, ամուրի, խնամքին ոչ ոք, նախկինում չդատված, պայմանագրային հիմունքներով ծառայում է ՀՀ ՊՆ 31549 զորամասի 1-ին կապի գումարտակի թիկունքի ղեկավարման կետի կապի հանգույցի վաշտի ռադիոդասակում, որպես ռադիոջոկի հրամանատար, կոչումով սերժանտ, հաշվառված է Արմավիր քաղաքի Բաղրամյան փողոցի 35 շենքի թիվ 6 բնակարանում, բնակվում է Երևան քաղաքի Ներքին Շենգավիթ 15 փողոցի 9 տանը, մեղադրվում է ՀՀ քրեական օրենսգրքի 361 հոդվածի 1-ին մասով, որպես խափանման միջոց է ընտրվել չհեռանալու մասին ստորագրությունը,

Պ Ա Ր Զ Ե Ց

1.Գործի դատավարական նախապատմությունը.
2012 թվականի մարտի 5-ին Երևանի կայազորի զինվորական դատախազության ավագ դատախազ Ա.Գասպարյանի որոշմամբ ՀՀ ՊՆ 31549 զորամասի պայմանագրային զինծառայող, կրտսեր սերժանտ Կ.Պետրոսյանի կողմից առանց հարգելի պատճառների ծառայության վայր չներկայանալու փաստի առթիվ ՀՀ քրեական օրենսգրքի 361 հոդվածի 1-ին մասի հատկանիշներով հարուցվել է թիվ 90200412 քրեական գործը և ուղարկվել ՀՀ ՊՆ ՔԾ 4-րդ կայազորային քննչական բաժին` նախաքննություն կատարելու համար:
2012 թվականի մարտի 28-ին Կարեն Վարդգեսի Պետրոսյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 361 հոդվածի 1-ին մասով, նրա նկատմամբ որպես խափանման միջոց կիրառվել է չհեռանալու մասին ստորագրությունը:
2012 թվականի ապրիլի 3-ի որոշմամբ Կարեն Վարդգեսի Պետրոսյանի կողմից մեկ օր` 2012թ. մարտի 24-ին առանց հարգելի պատճառների ծառայության չներկայանալու համար քրեական հետապնդում չի իրականացվել` հանացակազմի բացակայության պատճառաբանությամբ:
2012 թվականի ապրիլի 06-ին թիվ 90200412 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
2.Գործի փաստական հանգամանքները.
Նախնական քննության մարմինն ամբաստանյալ Կարեն Վարդգեսի Պետրոսյանին մեղադրանք է առաջադրել այն արարքի կատարման համար, որ նա հանդիսանալով ՀՀ ՊՆ 31549 զորամասի 1-ին կապի գումարտակի թիկունքի ղեկավարման կետի կապի հանգույցի վաշտի ռադիոդասակի ռադիոջոկի հրամանատար, կոչումով սերժանտ, 2012 թվականի փետրվարի 24-ից առանց հարգելի պատճառների ծառայության վայր չի ներկայացել և միայն հինգ օր անց` 2012 թվականի մարտի 1-ին, ժամը 0830-ին ինքնակամ ներկայացել է զորամաս` ծառայությունից բացակայելով երեք օրից ավելի, բայց մեկ ամսից ոչ ավելի տևողությամբ:
3.Ապացույցների հետազոտում.
Առաջադրված մեղադրանքում ամբաստանյալ Կարեն Պետրոսյանն իրեն մեղավոր ճանաչեց լիովին և ցուցմունք տվեց այն մասին, որ 2011թ. հոկտեմբեր ամսից պայմանագրային հիմունքներով ծառայության է անցել ՀՀ զինված ուժերում և նշանակվել է ՀՀ ՊՆ 31549 զորամասի 1-ին կապի գումարտակի թիկունքի ղեկավարման կետի կապի հանգույցի վաշտի ռադիոդասակում, որպես ռադիոջոկի հրամանատար, սերժանտի զիվորական կոչումով: Զորամասում ինքը համածառայողների հետ գտնվել է կանոնադրային փոխհարաբերությունների մեջ, իր նկատմամբ բռնություն չի գործադրվել, իր պատիվն ու արժանապատվությունը երբևէ չի ստորացվել: 2012թ. փետրվարի 24-ից մինչև մարտի 1-ն ինքն առանց համապատասխան թույլտվության ծառայության չի ներկայացել, քանի որ նշված օրերին ունեցել է առողջական խնդիրներ, սակայն բուժօգնության չի դիմել և բուժվել է տնային պայմաններում: Ինքը հասկացել է, որ հակաօրինական արարք է կատարել: Զղջում է կատարածի համար և խնդրում է իր նկատմամբ մեղմ վերաբերվել:
Ամբաստանյալ Կարեն Պետրոսյանին մեղսագրված հանցանքը նրա ինքնախոստովանական ցուցմունքից բացի, հիմնավորվել է նաև հետևյալ ապացույցներով.
Վկա, ՀՀ ՊՆ 31549 զորամասի 1-ին կապի գումարտակի շտաբի պետ Դավիթ Հենրիկի Գրիգորյանի ցուցմունքով այն մասին, որ իրենց գումարտակի պայմանագրային զինծառայող սերժանտ Կարեն Վարդգեսի Պետրոսյանը 2012թ-ի փետրվարի 24-ից առանց հարգելի պատճառների ծառայության վայր չի ներկայացել, չի կատարել ծառայողական պարտականությունները և միայն 2012թ-ի մարտի 1-ին, ժամը 0830-ին ինքնակամ ներկայացել է զորամաս: Սերժանտ Կ.Պետրոսյանը համածառայող թե սպաների և թե պայմանագրային մյուս զինծառայողների հետ գտնվել է կանոնադրային փոխհարաբերությունների մեջ, նրա պատիվն ու արժանապատվությունը չի ստորացվել, նրա նկատմամբ որևէ բռնություն չի գործադրվել:
Վկա, ՀՀ ՊՆ 31549 զորամասի 1-ին կապի գումարտակի թիկունքի ղեկավարման կետի կապի հանգույցի վաշտի հրամանատար, Հայկ Ստեփանի Սաֆարյանի ցուցմունքով այն մասին, որ իր հրամանատարության ներքո գտնվող վաշտի պայմանագրային զինծառայող, սերժանտ Կարեն Վարդգեսի Պետրոսյանը 2012թ-ի փետրվարի 24-ից առանց հարգելի պատճառների ծառայության վայր չի ներկայացել, չի կատարել ծառայողական պարտականությունները: Ինքը որպես վաշտի հրամանատար, փորձել է զանգահարել Կ.Պետրոսյանին, սակայն վերջինիս հեռախոսն անհասանելի է եղել: Իսկ 2012թ-ի մարտի 1-ին, ժամը 0830-ին Կ.Պետրոսյանն ինքնակամ ներկայացել է զորամաս` պատճառաբանելով, որ բացակա օրերին վատառողջ է եղել, սակայն այդ մասին վկայող որևէ փաստաթուղթ չի ներկայացրել: Կ. Պետրոսյանը համածառայողների հետ գտնվել է կանոնադրային փոխհարաբերությունների մեջ:
Վկա, ՀՀ ՊՆ 31549 զորամասի 1-ին կապի գումարտակի թիկունքի ղեկավարման կետի կապի հանգույցի վաշտի 3-րդ դասակի հրամանատար Ռուբեն Անուշավանի Ստեփանյանի նախաքննության ժամանակ տված ցուցմունքով այն մասին, որ իրենց վաշտի պայմանագրային զինծառայող, սերժանտ Կարեն Վարդգեսի Պետրոսյանը 2012թ-ի փետրվարի 24-ից առանց հարգելի պատճառների ծառայության վայր չի ներկայացել և միայն 2012թ-ի մարտի 1-ին, ժամը 0830-ին ինքնակամ ներկայացել է զորամաս` պատճառաբանելով, որ բացակա օրերին վատառողջ է եղել: Կ. Պետրոսյանը համածառայողների հետ գտնվել է կանոնադրային փոխհարաբերությունների մեջ:
Որպես այլ փաստաթուղթ ապացույց ճանաչված ՀՀ ՊՆ 31549 զորամասի հրամանատարի 27.10.2011թ. թիվ 238 հրամանով, համաձայն որի, Կ.Պետրոսյանը հանդիսանում է ՀՀ ՊՆ 31549 զորամասի պայմանագրային զինծառայող, զեկուցագրերով, հեռախոսագրերով, տեղեկանքներով։
4.Դատարանի իրավական վերլուծությունները.
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Կարեն Վարդգեսի Պետրոսյանին առաջադրված մեղադրանքը ՀՀ քրեական օրենսգրքի 361 հոդվածի 1-ին մասով հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 361 հոդվածի 1-ին մասի հատկանիշներին և արարքի որակումը ճիշտ է:
Ամբաստանյալ Կարեն Պետրոսյանի նկատմամբ պատիժ նշանակելիս, դատարանը հաշվի է առնում նրա կատարած արարքի հանրության համար վտանգավորության աստիճանը և բնույթը, ինչպես նաև հանցավորի անձը:
Որպես ամբաստանյալի անձը դրականորեն բնութագրող, պատասխանատվությունը և պատիժը մեղմացնող հանգամանքներ դատարանը հաշվի է առնում այն, որ նա նախկինում դատված չի եղել, հանցանքն ընդունել և զղջում է կատարածի համար:
ՀՀ քրեական օրենսգրքի 63 հոդվածի 1-ին մասի 10-րդ կետի համաձայն, պատասխանատվությունն ու պատիժը ծանրացնող հանգամանք է հանցանքն այնպիսի անձի կողմից կատարելը, ով դրանով խախտել է զինվորական կամ մասնագիտական երդումը:
Դատարանը գտնում է, որ Կարեն Պետրոսյանի պատասխանատվությունն ու պատիժը ծանրացնող հանգամանք պետք է դիտել այն, որ զինվորական ծառայության կարգի դեմ ուղղված հանցանք կատարելով` Կարեն Պետրոսյանը խախտել է զինվորական երդումը:
Կատարած արարքի համար ամբաստանյալ Կարեն Վարդգեսի Պետրոսյանը ենթակա է քրեական պատասխանատվության և պատժի:
Հաշվի առնելով Կարեն Պետրոսյանի կատարած արարքի հանրության համար վտանգավորության աստիճանը և բնույթը, նրա անձը, ինչպես նաև այն, որ ՀՀ քրեական օրենսգրքի 361 հոդվածի 1-ին մասի սանկցիայով նախատեսված է պատիժ նաև կալանքի ձևով, դատարանը գտնում է, որ ամբաստանյալ Կարեն Վարդգեսի Պետրոսյանի նկատմամբ ՀՀ քրեական օրենսգրքի 361 հոդվածի 1-ին մասով կատարած հանցանքի համար պատիժ պետք է նշանակել կալանքի ձևով, որը նա պետք է կրի, իսկ նրա նկատմամբ կիրառված խափանման միջոցը պետք է թողնել անփոփոխ, մինչև դատավճռի օրինական ուժի մեջ մտնելը:
Դատարանը գտնում է, որ քրեական գործում առկա, ապացույց ճանաչված, այլ փաստաթուղթ հանդիսացող, ՀՀ ՊՆ 31549 զորամասի հրամանատարի 27.10.2011թ. թիվ 238 հրամանը, զեկուցագրերը, հեռախոսագրերը, տեղեկանքները պետք է պահել քրեական գործում:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 357-360, 365, 369-372 հոդվածներով, դատարանը

Վ Ճ Ռ Ե Ց

Կարեն Վարդգեսի Պետրոսյանին մեղավոր ճանաչել ՀՀ քրեական օրենսգրքի 361 հոդվածի 1-ին մասով նախատեսված հանցանք կատարելու մեջ և նրան դատապարտել կալանքի մեկ (1) ամիս ժամկետով:
Պատժի սկիզբը հաշվել Կարեն Վարդգեսի Պետրոսյանին արգելանքի վերցնելու օրվանից:
Պատիժը պետք է կրի կայազորային կարգապահական մեկուսարանում:
Կարեն Վարդգեսի Պետրոսյանի նկատմամբ որպես խափանման միջոց ընտրված չհեռանալու մասին ստորագրությունը թողնել անփոփոխ, մինչև դատավճռի օրինական ուժի մեջ մտնելը:
Ապացույց ճանաչված, այլ փաստաթուղթ հանդիսացող, ՀՀ ՊՆ 31549 զորամասի հրամանատարի 27.10.2011թ. թիվ 238 հրամանը, զեկուցագրերը, հեռախոսագրերը, տեղեկանքները պահել քրեական գործում:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակվելու օրվանից հետո մեկամսյա ժամկետում:


Դատավոր` ստորագրություն
Բնագրի հետ ճիշտ է
Դատավոր Լ. Ավետիսյան