ԵԱՔԴ/0043/01/12

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանը`

նախագահող դատավոր` Լ. Ավետիսյան
քարտուղարությամբ` Ն.Ղազարյանի, Գ.Պետրոսյանի
մասնակցությամբ
մեղադրող` Դ. Կարապետյանի
պաշտպան` Հ. Բաբայանի
տուժող` Ս. Հակոբյանի


2012 թվականի սեպտեմբերի 14-ին, Երևան քաղաքում, դռնբաց դատական նիստում, քննեց քրեական գործն ըստ մեղադրանքի Գագիկ Հակոբի Պողոսյանի, ծնված 1955 թվականի հուլիսի 3-ին, Գորիս քաղաքում, ազգությամբ հայ, ՀՀ քաղաքացի, բարձրագույն կրթությամբ, ֆիզիկապես վատառողջ, ամուսնացած, խնամքին մեկ անձ, չի աշխատել, նախկինում չդատված, հաշվառված է Գորիս քաղաքի Անկախության փողոցի 2 շենքի թիվ 55 բնակարանում, ժամանակավորապես բնակվել է Երևան քաղաքի Գայի պողոտայի 13 շենքի թիվ 2 բնակարանում, մեղադրվում է ՀՀ քրեական օրենսգրքի 178 հոդվածի 2-րդ մասի 2-րդ կետով, ՀՀ քրեական օրենսգրքի 325 հոդվածի 2-րդ մասով, կալանքի տակ է 2011 թվականի նոյեմբերի 22-ից,

Պ Ա Ր Զ Ե Ց

1.Գործի դատավարական նախապատմությունը.
2011թ. հուլիսի 2-ին ՀՀ ոստիկանության ՔԳՎ Երևան քաղաքի քննչական վարչության Արաբկիրի քննչական բաժնում ՀՀ քրեական օրենսգրքի 178 հոդվածի 2-րդ մասի 2-րդ կետով նախատեսված հանցագործության հատկանիշներով հարուցվել է թիվ 14117711 քրեական գործը:
2011թ. սեպտեմբերի 30-ին նախաքննական մարմնի որոշմամբ Գագիկ Հակոբի Պողոսյանը ներգրավվել է որպես մեղադրյալ ՀՀ քրեական օրենսգրքի 178 հոդվածի 2-րդ մասի 2-րդ կետով, նրա նկատմամբ հայտարարվել է հետախուզում և որպես խափանման միջոց ընտրվել կալանավորումը:
2011թ. նոյեմբերի 22-ին Գագիկ Հակոբի Պողոսյանը ձերբակալվել է 25.11.2011թ.-ին նրա նկատմամբ որպես խափանման միջոց ընտրված կալանքը վերահաստատվել է:
2012թ. հունվարի 20-ին նախաքննական մարմնի որոշմամբ Գագիկ Հակոբի Պողոսյանին առաջադրված մեղադրանքի ծավալը փոփոխվել և լրացվել է, նրան նոր մեղադրանք է առաջադրվել ՀՀ քրեական օրենսգրքի 178 հոդվածի 2-րդ մասի 2-րդ կետով և 325 հոդվածի 2-րդ մասով:
2012թ. ապրիլի 4-ին նախաքննական մարմնի որոշմամբ Գագիկ Հակոբի Պողոսյանին առաջադրված մեղադրանքի ծավալը փոփոխվել և լրացվել է, նրան նոր մեղադրանք է առաջադրվել ՀՀ քրեական օրենսգրքի 178 հոդվածի 2-րդ մասի 2-րդ կետով, 325 հոդվածի 2-րդ մասով, 178 հոդվածի 1-ին մասով:
2012թ. ապրիլի 4-ին նախաքննական մարմնի որոշմամբ թիվ 14117711 քրեական գործից մաս է անջատվել` Կարապետ Սերյոժայի Փարսադանյանի կողմից Գ.Պողոսյանի հետ նախնական համաձայնությամբ փաստաթուղթ կեղծելու փաստով ՀՀ քրեական օրենսգրքի 325 հոդվածի 2-րդ մասով, որին շնորհվել է թիվ 14136511 համարը:
2012թ. ապրիլի 6-ին թիվ 14117711 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
2012թ. մայիսի 11-ին դատարանի որոշմամբ Գագիկ Հակոբի Պողոսյանի նկատմամբ ՀՀ քրեական օրենսգրքի 178 հոդվածի 1-ին մասով` Ռոբերտ Գաբրիելյանից խարդախությամբ զգալի չափի գույքի հափշտակություն կատարելու դրվագով, քրեական հետապնդումը դադարեցվել է` ամբաստանյալի հետ տուժող Ռոբերտ Գաբրիելյանի հաշտվելու հիմքով:
2.Գործի փաստական հանգամանքները.
Նախնական քննության մարմինն ամբաստանյալ Գագիկ Հակոբի Պողոսյանին մեղադրանք է առաջադրել այն արարքների կատարման համար, որ նա 2009թ. մայիս ամսվա սկզբին Սիլվարդ Հաբեթի Հակոբյանի վստահությունը չարաշահելու եղանակով վերջինիս` Երևան քաղաքի Հ.Հակոբյան 2 շենքի 31 բնակարանում խաբեությամբ նրանից վերցրել է 1.823.000 ՀՀ դրամին համարժեք 5050 ԱՄՆ դոլար գումար, որպես գումարի երաշխիք առուվաճառքի պայմանագրով իր փեսա Կարապետ Փարսադանյանի անվամբ հաշվառված ՙՖոլկսվագեն Գոլֆ՚ մակնիշի 14 ՍՍ 036 պետհամարանիշի ավտոմեքենան ձևակերպելով Ս.Հակոբյանի անվամբ, սակայն 2010թ. սեպտեմբեր կամ հոկտեմբեր ամսին ավտոմեքենան վաճառելու և գումարը Ս.Հակոբյանին վերադարձնելու պատրվակով, վերցրել է նշված ավտոմեքենան և չվերադարձնելով գումարն ու ավտոմեքենան` խաբեությամբ տիրացել է 1.823.000 ՀՀ դրամին համարժեք 5050 ԱՄՆ դոլար գումարին:
Բացի այդ, Գագիկ Հակոբի Պողոսյանը, հանցավոր համաձայնության գալով Կարապետ Փարսադանյանի հետ, 17.07.2008թ. նրան է տվել իրավունք վերապահող, ՙՄՈՒԳԱՊՈ՚ ՍՊԸ-ի ձևաթղթով և կնիքով կնքված կեղծ տեղեկանք, որ իբր Կարապետ Փարսադանյանն աշխատում է ՙՄՈՒԳԱՊՈ՚ ՍՊԸ-ում որպես տնտեսագետ-մենեջեր և ամսական ստանում է 180.000 ՀՀ դրամ աշխատավարձ, որն էլ վերջինս վարկ ստանալու նպատակով ներկայացրել է ՙՎՏԲ-Հայաստան բանկ՚ ՓԲԸ:
Բացի այդ, Գագիկ Հակոբի Պողոսյանը, հանցավոր համաձայնության գալով Կարապետ Փարսադանյանի հետ, 25.07.2008թ. նրան է տվել իրավունք վերապահող, ՙՄՈՒԳԱՊՈ՚ ՍՊԸ-ի ձևաթղթով և կնիքով կնքված կեղծ տեղեկանք, որ իբր Կարապետ Փարսադանյանն աշխատում է ՙՄՈՒԳԱՊՈ՚ ՍՊԸ-ում որպես մատակարարման բաժնի պետ և ամսական ստանում է 200.000 ՀՀ դրամ աշխատավարձ, որն էլ վերջինս ՙԻՄԵՔՍ ԳՐՈՒՊ՚ ՍՊԸ-ից ՙBAXI՚ ջեռուցման համակարգ գնելու նպատակով ներկայացրել է ՙԻնեկոբանկ՚ ՓԲԸ:
3.Ապացույցների հետազոտում.
Առաջադրված մեղադրանքում Գագիկ Հակոբի Պողոսյանն իրեն մեղավոր չճանաչեց և ցուցմունք տվեց այն մասին, որ ինքը գտնվում էր շատ ծանր վիճակում, քանի որ իրենից խարդախությամբ մեծ գումարներ էին վերցրել ԻԻՀ քաղաքացի Հուսեին Միր Հուսեինը` 78.000 ԱՄՆ դոլար և Էջմիածին Նորակերտ գյուղի բնակիչ Ռուբիկ Քոչարյանը` 6 միլիոն դրամ և 1000 ԱՄՆ դոլար և չէին վերադարձրել: 2008թ. կեսերին իր վարձակալած բնակարանում իրեն է հանդիպել Սերգեյ Գալստյանը և պատմել է, որ Վրաստանում և Ռուսաստանում մեծ գործ է ձեռնարկել, գործերը շատ հաջող են ընթանում, սակայն ֆինանսական խնդիրներ են առաջացել և իրեն շտապ 3.000 ԱՄՆ դոլար գումար է պետք` ապրանքների ներկրումը կազմակերպելու համար: Տեղյակ լինելով իր ընտանիքի ծանր վիճակի մասին` Ս.Գալստյանն իրեն առաջարկել է ինչ-որ տեղից հայթհայթել այդ գումարը և 20-25 օրով պարտքով տալ իրեն, որպեսզի կազմակերպի ներկրումը, որից հետո շատ կարճ ժամկետում կվերադարձնի պարտքը, լրացուցիչ օգուտ կստանա, որից իրեն որոշակի մաս կտա: Գումար գտնելու համար դիմել է իր ծանոթներին և հարազատներին, որոնցից եղբոր տղան` Արթուր Պողոսյանը համաձայնել է մեկ ամսով տալ 3.000 ԱՄՆ դոլար: Ինքը գումարը վերցրել է Արթուր Պողոսյանից և տվել Սերգեյ Գալստյանին: Գումարը տալուց մեկ ամիս անց Ս.Գալստյանի հետ կապ է հաստատել նրա վրացական հեռախոսահամարով: Վերջինս ասել է, որ ամեն ինչ ընթանում է ըստ պլանի, միայն մի փոքր կուշանա: Դրանից որոշ ժամանակ անց արդեն չի կարողացել կապ հաստատել նրա հետ: Սերգեյը կամ չի պատասխանել կամ նրա հեռախոսն անջատված է եղել: Այս իրավիճակը տևել է մոտ ութ ամիս: 2009թ. ապրիլի վերջին Երևան քաղաքի Կարապի լճի մոտ պատահաբար հանդիպել է Ս.Գալստյանին: Այդ հանդիպման ժամանակ, չկարողանալով զսպել իրեն, հարվածել է Ս.Գալստյանին, որի հետևանքով նա վայր է ընկել: Վերջինս ասել է, որ նոր է եկել Վրաստանից, բայց փողը չբերելու պատճառով անհարմար է զգացել զանգել, մտածել է փող ճարել, նոր միայն հանդիպել իրեն: Ինքը նրան ասել է, որ ոչ մի պատճառաբանություն չի ուզում լսել, պահանջել է գումար գտնել Ա. Պողոսյանի պարտքը տալու համար: Սերգեյը խոստացել է առաջիկա օրերին ցանկացած պայմանով գումար գտնել: Դրանից երեք օր անց Սերգեյը զանգահարել է և ասել, որ տոկոսով փող տվող է ճարել, ցանկանում է փող վերցնել իր 3.000 ԱՄՆ դոլար գումարը մարելու համար և ևս 2.000 ԱՄՆ դոլար գումար կիսատ մնացած գործը ավարտին հասցնելու համար: Ս.Գալստյանը գնացել է գումար վերցնելու և իրեն ասել է միասին գնալ: Ս. Գալստյանի հետ հանդիպել է Կասյան փողոցի վրա: Նրա հետ եղել է Սերգո անունով մի տղամարդ, ում Ս.Գալստյանը ներկայացրել է որպես միջնորդի` տոկոսով փող տվողի միջև: Միասին գնացել են մոտակայքում բնակվող Սիլվա անունով մի տիկնոջ բնակարան: Սերգեյը պայմանագիր է կնքել այդ կնոջ հետ և Սիլվան տվել է 1500 դոլար: Ինքը ստորագրել է ստացականի տակ: Սիլվան պահանջել է գումարի դիմաց գրավ դնել անշարժ կամ շարժական գույք: Ինքը Սերգեյին առաջարկել է բնակարանը գրավ դնել, սակայն վերջինս հրաժարվել է` պատճառաբանելով, որ բնակարանում թոռներն են բնակվում: Այդ ժամանակ ինքը վարել է քրոջ աղջկա ամուսնուն` Կարապետ Փարսադանյանին պատկանող ՙՖոլկսվագեն Գոլֆ՚ մակնիշի ավտոմեքենան: Սերգեյն իրեն առաջարկել է գրավադնել այդ մեքենան: Ինքը ասել է, որ մեքենան իր սեփականը չի: Սերգեյը խնդրել է իրեն համոզել Կ. Փարսադանյանին մեքենան պարտքի դիմաց գրավ դնելու համար: Քանի որ Արթուրի գումարը վերադարձնելու համար ուրիշ ելք չի ունեցել, իսկ Սերգեյն իրեն հավատացրել է, որ կարճ ժամանակում ապրանք է ներկրելու և բոլոր ֆինանսական հարցերը լուծվելու են, ուստի ինքը խնդրել է Կարապետին նրա մեքենան երեք ամսով գրավ դնել պարտքի դիմաց: Կարապետը համաձայնել է և Սիլվայի հետ կնքել առուվաճառքի պայմանագիր: Պայմանավորվածության համաձայն իրենք մեքենան կայանել են իրենց կողմից վարձակալած տան գարաժում, որի փականը Սիլվան և Սերգոն փոխել են և բանալին պահել իրենց մոտ:
Երեք օր հետո ինքը Սիլվայից ստացել է ևս 3.500 ԱՄՆ դոլար գումար: Ստացականում գրվել է 6050 դոլարի (5000 դոլար գումարը և երեք ամսվա տոկոսը, որը ամսեկան 350 դոլարով կազմել է 1050 դոլար): Այդ գումարից Սերգեյը 3.000 դոլարը տվել է իրեն, որն ինքը վերադարձրել է Արթուրին: Սերգեյն ասել է նաև, որ ունի Յուրա անունով մի գործընկեր, որն այդ պահին գտնվում է Բաթումիում և հետևում է իր գործերին: Նա ասել է, որ Յուրան ճանաչում է իրեն: Առաջարկել է վերցրած գումարից 1.000 դոլար ուղարկել Յուրային` տեղում շտապ հարցեր կարգավորելու համար: Սերգեյն ասել է, որ գումարն ուղարկում է Վրաստան ինչ-որ մեկի միջոցով, որին որպես վճար պետք է տա 100 դոլար: Այդպես մնացած 2.000 դոլարից 1.100 դոլարը ուղարկել է Յուրային, 5.000 դրամ և 50 դոլար գումար Սերգեյը տվել է Սերգոյին որպես միջնորդության վճար, 13.000 դրամ միասին հաց են կերել, մոտ 100 դոլար ծախսվել է մեքենայի առուվաճառքի նոտարական վավերացման համար: 500 դոլար Սերգեյը պահել է իրեն` Բաթումի գնալու համար, իսկ 200 դոլար տվել իրեն` ասելով, որ շատ վնասներ է հասցրել, այդ գումարով ինքը յոլա գնա, մինչև ապրանքը կմտնի Հայաստան և շատ լուրջ եկամուտներ կունենան: Սերգեյի մեկնելուց հետո նրա հետ կապը պահպանել է հեռախոսով: Վերջինս անընդհատ նույն բաներն է պատմել, այսօր-վաղն է արել և մի որոշ ժամանակ կապի դուրս չի եկել: Մեքենան ավտոտնակում թողնելուց մի որոշ ժամանակ անց Սերգոն ասել է, որ Սիլվան ցանկանում է մեքենան տեղափոխել իր նախընտրած վայրի ավտոտնակ: Ինքը համաձայնել է, բայց ասել, որ այդ դեպքում մեքենայի տեխ. անձնագիրը պետք է իրեն տալ, որպեսզի վստահ լինի, որ այն չեն վարի, և այդպես էլ արել են: Դրանից երկու-երեք ամիս անց Սիլվան սկսել է անհանգստացնել իրեն` պահանջելով գումարը: Հաճախ եկել է իր տուն, աղմկել և պահանջել գումարը: Այդ պատճառով ինքը 2010թ. ամռանը ստացական է գրել հետին ամսաթվով և այն հանձնել Սիլվային: Ինքը քննիչին խնդրել է իր գրած ստացականն ուղարկել փորձաքննության, տեսնելու համար, որ մեկ տարի ուշ է գրված, իսկ քննիչը մերժել է: 2010թ. սեպտեմբեր-հոկտեմբեր ամիսներին Սերգոն իրեն ասել է, որ մեքենան ավտոտնակում փչանում է և առաջարկել է մեքենան հանել այդ ավտոտնակից: Ինքը գնացել է այդ ավտոտնակ և տեսել, որ մեքենայի տանիքն ամբողջությամբ փչացել է անձրևաջրերից, մեքենան մի մասով վնասվել ու ժանգոտվել է: Մեքենան հանելուց հետո Սերգոն իրեն ասել է, որ ութ ամիս ավտոտնակում մեքենան պահելու դիմաց պետք է ավտոտնակի վարձը վճարվի` 400 ԱՄՆ դոլար: Մեքենան այդ վիճակում տարել և հանձնել է Կարապետին, ով մեքենայի վիճակը տեսնելով կռվել է իր հետ և գանցել: Այդ օրվանից հետո Կարապետին չի տեսել:
Արդյունքում Սերգեյն իրեն գումար չի տվել, իսկ Յուրան քրեական գործի նախաքննության ընթացքում իրեն վերադարձրել է չնչին գումարներ: 2010թ. օգոստոս ամսվա սկզբին Ռոբերտ Արամայիսի Գաբրիելյանից վերցրել է 200 ԱՄՆ դոլար գումար, սակայն չի կարողացել այն վերադարձնել, քանի որ այդ ժամանակ գտնվել է սոցիալապես ծանր վիճակում:
Կարո Փարսադանյանն աշխատել է իր տնօրինած ՙՄՈՒԳԱՊՈ՚ ՍՊԸ-ում հրամանով 5-6 տարի, գնորդից մինչև տնտեսագետ: 2-3 անգամ նրա պաշտոնը հրամանով փոխվել է: Կարո Փարսադանյանը երկու անգամ տեղեկանք է վերցրել բանկի համար: Ինքը չի իմացել, որ նա սոց. ապահովագրության մարմիններում գրանցված չէ: Դա հաշվապահի գործն է: Ինքը տեղյակ է, որ ՀՀ-ում բոլոր բանկերը հարկային մարմինների միջոցով ստուգում են այդ տեղեկանքը, եթե անօրինական է եղել, ինչու են գործարք կատարել:
Սիլվա Հակոբյանը տուժել է հինգ հազար դոլար, բայց Սերգեյ Գալստյանը 1000 ԱՄՆ դոլարը հետ է վերադարձրել, տուժողի մնացած 4.000 ԱՄՆ դոլարն ինքը խոստանում է 1,5 ամսում հետ վերադարձնել, եթե տուժողը իր և Սերգեյ Գալստյանի միջև կնքած պայմանգիրը և ստացականը բերի դատարան:
Ամբաստանյալին մեղսագրված հանցանքը հիմնավորվել է հետևյալ ապացույցներով.
Տուժող Սիլվարդ Հաբեթի Հակոբյանի ցուցմունքով այն մասին, որ 1995-1997 թվականների բնակվել և աշխատել է Գերմանիայում: 1997թ. վերադարձել է Հայաստան` իր հետ բերելով շուրջ 10.000 ԱՄՆ դոլար գումար: Քանի որ միայնակ է ապրել և բնակարանում իրեն շատ գույք հարկավոր չի եղել, ուստի 2000թ-ից սկսած աստիճանաբար վաճառել է իր գույքի մեծ մասը: Արդյունքում իր մոտ որոշակի գումար է կուտակվել: 2009թ. մայիսի 1-ին իր ընկերուհի Սիրանուշ Խաչատրյանի ամուսին Սերգո Դարբինյանը խնդրել է պարքով գումար տալ իրենց ծանոթ, Բերդ քաղաքի բնակիչ Սերգեյ Գալստյանին` ասելով, որ նա մեծ գործ է սկսում, որի համար մեծ գումար է անհրաժեշտ: Նշել, որ Սերգեյն իրենց մտերիմն է և լավության դիմաց շնորհակալություն կհայտնի: Ինքը համաձայնել է և Ս. Գալստյանին տրամադրել իր մոտ եղած 6.000 ԱՄՆ դոլար գումարը: 2009թ. մայիսի 2-ին Ս.Դարբինյանը և Ս.Գալստյանը եկել են իր տուն, որտեղ Ս. Գալստյանը հայտնել է, որ մեծ գործ է սկսում` նշելով, որ այն կատարելու է իր ընկերոջ, Գորիս քաղաքի բնակիչ Գագիկ Պողոսյանի հետ: Ս.Գալստյանի խոսքերից հասկացել է, որ պարտքով վերցրած գումարը տնօրինելու է Գ.Պողոսյանը: Դրանից մի քանի ժամ անց Ս.Դարբինյանը, Ս.Գալստյանը Գ.Պողոսյանի հետ եկել են իր տուն: Ինքը հասկացել է, որ ամբողջ գումարը տրվելու է Գ.Պողոսյանին և գործի ղեկավարն էլ նա է: Այդ ժամանակ Գ.Պողոսյանն իր մոտ վստահություն ձեռք բերելու նպատակով հայտնել է, որ գումարի դիմաց, որպես գրավ իր մոտ կթողնի 8.000 ԱՄՆ դոլար արժողության ավտոմեքենա: Բացի այդ, որպես լավություն Գ.Պողոսյանը խոստացել է աշխատանքով ապահովել Սերգո Ղարիբյանին: Վերջինիս խոսքերը և մեքենա հանձնելու խոստումը իրեն հավատ են ներշնչել և ինքը համաձայնել է: Նույն օրը 1.500 ԱՄՆ դոլար գումար է տվել Գ. Պողոսյանին և պայմանավորվել մայիսի 4-ին հանդիպել նոտարական գրասենյակում` նշված ավտոմեքենայի առուվաճառքը ձևակերպելու նպատակով: Երբ 1.500 ԱՄՆ դոլար գումարը տվել է Գ.Պողոսյանին, վերջինիս նշված գումարից 1.000 ԱՄՆ դոլար գումարը տվել է Ս.Գալստյանին: Այդ օրը 1.500 ԱՄՆ դոլար գումարի ստացականն իր ձեռքով գրել է Ս.Գալստյանը Գագիկ Պողոսյանի անունից, որը ստորագրել է վերջինս: Ստացականի ներքևի հատվածում որպես վկա ստորագրել են Ս.Գալստյանը և Ս.Դարբինյանը: Գագիկ Պողոսյանն այդ ստացականը կնքել է իր ՍՊԸ-ի կնիքով երկու անգամ: 2009թ. մայիսի 4-ին պայմանավորվածության համաձայն Արաբկիր նոտարական գրասենյակում հանդիպել են ինքը, Ս.Դարբինյանը, Գ.Պողոսյանը, վերջինիս աղջկա ամուսին Կ.Փարսադանյանը, որի անունով հաշվառված է եղել այդ ավտոմեքենան: Ս.Գալստյանը այնտեղ չի գտնվել և ըստ Գ.Պողոսյանի հայտարարության դեռևս մայիսի 3-ին մեկնել է Վրաստան: Նոտարի մոտ իր և Կարապետ Փարսադանյանի միջև կնքվել է ՙՖոլկսվագեն Գոլֆ՚ մակնիշի 14 ՍՍ 036 պետհամարանիշի ավտոմեքենայի առուվաճառքի պայմանագիր: Պայմանավորվածության համաձայն ավտոմեքենան որպես վստահության առարկա մնալու էր իր մոտ` մինչ ողջ գումարը վերադարձնելը: Դրանից հետո ինքը, Գ.Պողոսյանը և Ս.Դարբինյանը գնացել են իր տուն, որտեղ Ս.Դարբինյանի ներկայությամբ Գ.Պողոսյանին տվել է ևս 4.500 ԱՄՆ դոլար գումար, որի վերաբերյալ Գ.Պողոսյանը կազմել է ստացական 6050 ԱՄՆ դոլար գումար վերցնելու և այն երեք ամսից վերադարձնելու մասին: Բացի այդ, հին ստացականի վրա Գ.Պողոսյանն իր ձեռքով ջնջել է 1.500 ԱՄՆ դոլար նշումը և կատարել 6050 դրամ գրառումը: 50 ԱՄՆ դոլարը ինքը տվել է Գ.Պողոսյանին նշված ավտոմեքենայի ձևակերպումների համար վճարումներ կատարելու նպատակով: Պայմանավորված երեք ամիսներն անցնելուց հետո Գ.Պողոսյանը զանգահարել և հայտնել է, որ գումարը չի կարողանում վերադարձնել, խնդրել է մի փոքր սպասել: Առուվաճառքի պայմանագիրը կնքելուց վեց ամիս անց ավտոմեքենայի տեխ. անձնագիրը տվել է Ս.Դարբինյանին` այն Գ.Պողոսյանին հանձնելու համար: Վերջինս խոստացել է գումարի կեսը նույն օրը վերադարձնել, սակայն նա ոչ միայն գումարը չի վերադարձրել, այլ նաև չի վերադարձրել մեքենայի տեխ. անձնագիրը: 2010թ. սեպտեմբեր կամ հոկտեմբեր ամսին Ս.Դարբինյանը զանգահարել է իրեն և ասել, որ Գ.Պողոսյանը չի կարողանում վերադարձնել պարտքը և ցանկանում է վաճառել իր մոտ գտնվող ավտոմեքենան պարտքը վերադարձնելու համար: Հավատալով այդ խոստմանը` մեքենան տրամադրել է Գ.Պողոսյանին, սակայն դրանից հետո ոչ մի կերպ չի կարողացել կապ հաստատել Գ.Պողոսյանի և Ս.Գալստյանի հետ: Ս.Դարբինյանը, որը խոստացել էր գտնել նրանց, հայտնել է, որ նույնպես չի կարողանում գտնել Գ.Պողոսյանին և Ս.Գալստյանին: 2011թ. օգոստոսի 24-ին Սերյոժա Գալստյանի որդին` Արսեն Գալստյանը, վերադարձրել է 1.000 ԱՄՆ դոլար գումարը, որը 2009թ. մայիսի 1-ին Գագիկ Պողոսյանն իր տված 1.500 ԱՄՆ դոլար գումարից իր ներկայությամբ և իր բանակարանում տվել էր Ս.Գալստյանին:
Տուժող Ռոբերտ Արամայիսի Գաբրիելյանի նախաքննության ընթացքում տված ցուցմունքով այն մասին, որ 2010թ. հուլիսի 26-ին զանգահարել է իրենց շենքի բնակիչ Մերուժան Գալստյանը և ասել, որ իր ծանոթ Արամ Միրզաբեկյանը ծանոթ մարդիկ ունի, որոնց գումար է անհրաժեշտ և հարցրել է իրեն, թե կարող է այդ հարցով օգնել: Միաժամանակ ասել է, որ այդ մարդիկ լավության տակից դուրս կգան: Ինքը համաձայնել է և պայմանավորվել են հանդիպել: Նույն օրը Նոր Նորքի թաղապետարանի մոտ հանդիպել է Արամ Միրզաբեկյանին և նրա հետ եկած անձանց` Գագիկ Պողոսյանին և Նադեժդա Սահակյանին: Գագիկ Պողոսյանը Նադեժդա Սահակյանին ներկայացրել է որպես իր քույր: Խոսակցությունից պարզվել է, որ գումարը անհրաժեշտ է Նադեժդա Սահակյանին, թեև ավելի շատ խոսել է Գագիկ Պողոսյանը: Ինքը Նադեժդա Սահակյանին տրամադրել է 5750 ԱՄՆ դոլար գումար, ինչի մասին վերջինս ստացական է գրել: Դրանից հետո Գագիկ Պողոսյանը անընդհատ զանգահարել է իրեն և հանդիպում խնդրել և հանդիպելիս գումար խնդրել` ինչ որ ավտոմեքենայի պահեստամաս ձեռք բերելու նպատակով: Ինքը միշտ հրաժարվել է: Վերջին խոսակցությունից հետո մոտ երկու օր անց Գագիկը կրկին զանգահարել է և խնդրել հանդիպել: Հանդիպման ժամանակ Գագիկ Պողոսյանը իրեն ասել է, թե հիշյալ պահեստամասերի արժեքի` 600 ԱՄՆ դոլար գումարից 400 ԱՄՆ դոլար գումարը ճարել է և խնդրել երկու օրով իրեն տալ 200 ԱՄՆ դոլար գումար: Վստահություն ներշնչելու համար իրեն տվել է ժամկետանց անձնագիր, ՙՖոլկսֆագեն Գոլֆ՚ մակնիշի ավտոմեքենայի տեխնիկական անձնագիրը, որը հաշվառված է եղել Կարապետ Փարսադանյանի անվամբ, ինչպես նաև իրեն պատկանող ՙՄուգապո՚ ՍՊԸ-ի կնիքը: Բացի այդ, քանի որ նա ներկայացել է որպես Նադեժդա Սահակյանի եղբայր, որին ինքը մեծ գումար է պարտքով տվել, ուստի այդ ամենը իրեն հավատ է ներշնչել և ինքը առանց ստացականի Գ.Պողոսյանին տվել է 200 ԱՄՆ դոլար գումար: Խոստացված երկու օրն անցնելուց հետո Գ.Պողոսյանը չի վերադարձրել գումարը և տարբեր պատճառաբանություններով ձգձգել, իսկ 2010թ. օգոստոսի 31-ին կամ սեպտեմբերի 1-ին իրենց միջև տեղի ունեցած խոսակցությունից հետո Գ.Պողոսյանն անհետացել է և այլևս հնարավոր չի եղել նրա հետ կապ հաստատել մինչև 2011թ. մայիս ամիսը: Այդ ընթացքում Նադեժդա Սահակյանն իրեն ասել է, որ Գ.Պողոսյանն իր եղբայրը չէ, նա խաբեբա անձնավորություն է: 2011թ. մայիս ամսին Գագիկ Պողոսյանը զանգահարել է իրեն և խնդրել հանդիպել: Հանդիպելուց հետո խոստացել է վերադարձնել իր պարտքը: Սակայն կրկին անհետացել է և այլևս նրան չի տեսել: Նկատի ունենալով, որ Գ.Պողոսյանը խաբեությամբ հափշտակել է իր գումարը, խնդրել է քրեական պատասխանատվության ենթարկել վերջինիս:
Վկա Սերգո Սեդրակի Դարբինյանի նախաքննության ընթացում տված ցուցմունքով այն մասին, որ 1981թ-ից ճանաչում է Սիլվարդ Հակոբյանին, ով կնոջ` Սիրուշ Խաչատրյանի ընկերուհին է: Սերգեյ Գալստյանին ճանաչում է 1970-ական թվականներից, որպես համերկրացի և մաքսային ծառայության պետի տեղակալ, որի հետ գտնվել է նորմալ փոխհարաբերությունների մեջ: 2009թ. ապրիլ ամսվա վերջերին Երևան քաղաքի Օհանով փողոցում պատահաբար հանդիպել է Ս.Գալստյանին: Զրույցի ընթացքում Սերգեյն իրեն ցույց է տվել մի հաստափոր թղթապանակ և ասել, որ մեծ գործեր է սկսել, սակայն իրեն գումար է պետք դրանք ավարտելու համար: Սերգեյն իրենից պարտքով գումար է խնդրել: Ինքն ասել է, որ գումար չունի: Սերգեյն ասել է, թե ճանաչում է արդյոք որևէ մեկին, ով կարող է մի քանի օրով պարտքով գումար տալ, ասելով, որ 12.000 ԱՄՆ դոլար արժողության արտասահմանյան մակնիշի մեքենա կարող է գրավ դնել: Ս.Գալստյանն այնքան համոզիչ է խոսել, որ ինքը ոչ մի վատ բան չի կասկածել: Նույն օրը երեկոյան զանգահարել է Սիլվարդին և ասել, որ այդպիսի մի մարդ կա, ով պարտքով մի քանի օրով գումար է խնդրում: Ս.Հակոբյանն ասել է.ՙեթե վստահելի մարդ է, ապա թող գա տեսնեմ՚: 2009թ. մայիսի 2-ին Սերգեյ Գալստյանի հետ գնացել է Ս.Հակոբյանի բնակարան: Այնտեղ Ս.Գալստյանն ասել է, որ գումարը պետք է իրեն և իր ընկերոջը, որի հետ են կատարում այդ գործարքները: Ս.Գալստյանը հայտնել է, որ մեքենան իր այդ ընկերոջն է պատկանում: Իրենք միասին գնացել են և ինքը ծանոթացել է Ս.գալստյանի այդ ընկերոջ` Գագիկ Հակոբի Պողոսյանի հետ: Գ.Պողոսյանն ասել է, որ գործի տերն ինքն է և մեքենան իրեն է պատկանում, սակայն քանի որ չունի վարորդական վկայական, ուստի այն գրանցված է իր փեսայի` Կարապետ Փարսադանյանի անվամբ: Իրենք երեքով միասին նույն օրը գնացել են Ս.Հակոբյանի տուն, որտեղ բոլորի ներկայությամբ վերջինս Գ.Պողոսյանին տվել է 1.500 ԱՄՆ դոլար գումար, որց 1.000 ԱՄՆ դոլար գումարը Գ.Պողոսյանը նույն պահին տվել է Ս.Գալստյանին և պայմանավորվել են մնացած 4.500 ԱՄՆ դոլար գումարը Գ.Պողոսյանին տալ ավտոմեքենայի առուվաճառքի պայմանգիրը կնքելուց հետո: Դրանից հետո ինքը Գ.Պողոսյանի և Ս.Գալստյանի հետ գանցել է Կիևյան փողոցում գտնվող մի ավիատոմսերի վաճառքի կետ, որտեղից վերջինս Թբիլիսի մեկնող ինքնաթիռի տոմս է գնել, որից հետո բաժանվել են: Երկու օր անց` 2009թ. մայիսի 4-ին Արաբկիր նոտարական գրասենյակում Ս.Հակոբյանի և Կ. Փարսադանյանի միջև կնքվել է ՙՖոկկսվագեն Գոլֆ՚ մակնիշի 14 ՍՍ 036 պետհամարանիշի ավտոմեքենայի առուվաճառքի պայմանգիր: Այդ ժամանակ Գ.Պողոսյանը Ս.Հակոբյանին է հանձնել նշված ավտոմեքենայի բանալիները և տեխ. անձնագիրը, իսկ մեքենան կայանած մնացել է Գ.Պողոսյանի վարձակալած Նոր Նորքի զանգվածում գտնվող տան ավտոտնակում: Ժամանակ է անցել, սակայն Գ.Պողոսյանը չի վերադարձրել պարտքը: Պայմանագիրը կնքելուց մոտ երկու ամիս անց համոզվելով, որ նրանք գումարը վերադարձնելն անընդհատ տարբեր պատճառաբանություններով ձգձգում են, ինքը և Ս.Հակոբյանը գնացել, վերցրել են նշված ավտոմեքենան և տարել Արտաշատի գյուղերից մեկում գտնվող վերջինիս բարեկամի տուն: Գ.Պողոսյանը և Ս.Գալստյանն ամեն օր ասել են այսօր վաղը կտան պարտքը: Ս.Գալստյանն իրեն նույնիսկ Բաթումիից է զանգահարել: Այդ ժամանկ ինքը տեղեկացել է, որ նշված ավտոմեքենան գնված է եղել Երևան քաղաքի 3-րդ մասում գտնվող բանկերից մեկի միջոցով և այդ բանկի գումարը նրանք նույնպես չեն վճարել: Դրանից մի երկու ամիս անց Ս.Գալստյանը զանգահարել է իրեն և ասել, որ շտապ խոսելու բան ունի իր հետ: Հանդիպել են 15-րդ թաղամասում: Ս.Գալստյանն ասել է, որ մեքենայի տեխ. անձնագիրն անհարժեշտ է Գ.Պողոսյանին` մեքենայի հետ կապված տարբեր խնդիրներ լուծելու համար, միաժամանկ ասել է, որ 3000-ից 4000 ԱՄՆ դոլար գումար կա, որը հաջորդ օրը կտան: Ինքը կրկին նրան հավատալով նույն օրը Ս.Հակոբյանից վերցրել է մեքենայի տեխանձնագիրը և այդ օրը երեկոյան այն տվել Գ.Պողոսյանին: Հաջորդ օրը Ս.Գալստյանը մեկնել է Բաթումի` չտալով խոստացված գումարը: 2010թ. աշնանը Գ.Պողոսյանն ասել է, որ չի կարողանում պարտքը վերադարձնել և առաջարկել է մեքենան վերանորոգել, տեխզննում անցկացնել, մուծել գույքահարկը, որից հետո այն վաճառել և վերադարձնել Ս.Հակոբյանի պարտքը: Ինքն ասել է, որ գործ չունի և դրա մասին պետք է հարցնի Ս.Հակոբյանին: Զանգահարել, հանդիպել է Ս.Հակոբյանի հետ և վերջինս համաձայնել է: Քանի որ մեքենան անսարք է եղել և չի միացել շարժիչը, ուստի այդ օրը սպասել է մինչև Գ.Պողոսյանը տեղափոխի մեքենան ինչ-որ տեղ, որպեսզի վերցնի մեքենայի բանալիները: Ժամը 23-ի սահմաններում տեսնելով, որ մեքենան չի հաջողվում գործի գցել, Գ.Պողոսյանն իրեն ասել է, որ տուն գնա և որ հաջորդ օրը մեքենայի բանալիները կտա իրեն: Դրանից հետո երկու երեք օր ինքն անընդհատ զանգահարել է Գ.Պողոսյանի 077-14-53-51 բջջային հեռախոսահամարին, սակայն վերջինս չի պատասխանել: Երեք օր անց Գ.Պողոսյանը պատասխանել է իր զանգին, իրենք հանդիպել են ՙԿասկադի՚ մոտ, որտեղից ինքն իր տաքսի ավտոմեքենայով նրան տարել է Նորքի 2-րդ զանգված: Գ.Պողոսյանն իրեն ասել է, որ ինչ-որ գնդապետի տուն է գնում, ինքը գնա հետո կհանդիպեն: Դրանից հետո Գ.Պողոսյանը չի պատասխանել իր զանգերին: Ինքը գնացել է Նորքի 2-րդ զանգվածում գտնվող նրա բնակարան, սակայն այնտեղ ոչ ոք չի բնակվել: 2010թ. դեկտեմբերի 5-ին մեկնել է ՌԴ Մոսկվա քաղաք, որտեղից անընդհատ տարբեր հեռախոսահամարներից զանգահարել է Գ.Պողոսյանին, սակայն վերջին ոչ մի անգամ չի պատասխանել: 2011թ. ապրիլի 7-ին Հայաստանից ՌԴ Մոսկվա քաղաք է գնացել նաև կինը: Հայտնել է, որ տեղյակ չի, թե որտեղ է գտնվում Գ.Պողոսյանը: Հայտնել է նաև, որ Ս.Գալստյանը կալանավորված է և պատիժ է կրում Վրաստանի Հանրապետության Ռուսթավի քաղաքում:
Վկա Արսեն Սերյոժայի Գալստյանի ցուցմունքով այն մասին, որ հանդիսանում է Սերյոժայի Գալստյանի որդին: Հայրը` Սերյոժա Գալստյանը 2010թ. ամռանը Վրաստանի Հանրապետությունում դատապարտվել է 8 տարի ազատազրկման: Հոր խոսքերից գիտի, որ Գագիկ Պողոսյանն ինչ որ գործ ձեռնարկելու համար ցանկացել է գումար ճարել և դիմել է հորը: Մի քանի օր անց իր հայրը պատահաբար հանդիպել է վաղեմի ծանոթ և համերկրացի Սերգո Դարբինյանին և ասել, որ գումար է հարկավոր: Մի քանի օր անց Սերգո Դարբինյանն իր հորը հայտնել է, որ մի ծանոթ կին Սիլվա անունով կարող է պարտքով գումար տալ: Իր հայրը, Սերգո Դարբինյանը և Գագիկ Պողոսյանը գնացել են Սիլվայի հետ հանդիպման: Սիլվան համաձայնել է տրամադրել մոտ 6000 ԱՄՆ դոլար գումար, բայց պայմանով, որ գույք գրավ թողնվի: Գ.Պողոսյանն առաջարկել է իր ավտոմեքենան նոտարական կարգով ձևակերպել Սիլվայի անունով: Պայմանավորվել են, որ Գագիկ Պողոսյանն այդ գումարից պետք է 1000 ԱՄՆ դոլար գումարն իր հոր միջոցով ուղարկի Յուրային, որը նաև իր հոր ծանոթն է եղել, ով գտնվելիս է եղել Բաթումի քաղաքում: Քանի որ գումարը Յուրային շտապ է հարկավոր եղել, Սիլվան այդ 1000 ԱՄՆ դոլար գումարը համաձայնել է տալ, բայց մնացածը` միայն նոտարական կարգով ավտոմեքենայի առուվաճառքի ձևակերպումից հետո: Դրանից հետո հայրն այդ 1000 ԱՄՆ դոլար գումարը Բաթումիում փոխանցել է Յուրային: Ինքը հետագայում Սերգո Դարբինյանի հետ հանդիպել է Սիլվա Հակոբյանին և նկատի ունենալով, որ 1000 ԱՄՆ դոլար գումարը Գ.Պողոսյանն իր հոր միջոցով է փոխանցել Յուրային, համաձայնության է եկել հիշյալ գումարը վերադարձնելու հարցում և ամբողջությամբ վերադարձրել այն, սակայն այդ ժամանակ չի իմացել, որ Յուրան արդեն իսկ Գ.Պողոսյանին ամբողջությամբ վերադարձրել է գումարը:
Վկա Արթուր Գարունի Պողոսյանի նախաքննության ընթացքում տված ցուցմունքով այն մասին, որ հանդիսանում է Գագիկ Պողոսյանի եղբորորդին: 2008թ. ամռանը /կոնկրետ ամիսը և օր չի հիշել/ Գ.Պողոսյանը իրնից 3000 ԱՄՆ դոլար գումար է պարտքով վերցրել` խոստանալով մեկ ամիս անց վերադարձնել: Սակայն մեկ ամիս անցնելուց հետո Գ.Պողոսյանը պարտքը չի վերադարձրել` ասելով, որ մոտ օրերս կլինի, սակայն անցել են ամիսներ, բայց ի վերջո Գ.Պողոսյանը վերադարձրել է պարտքը /չի հիշել, թե երբ/: Գագիկ Պողոսյանը իրեն չի ասել, թե այդ գումարը այլ անձի համար է նախատեսված, նա ասել է, որ գործի մեջ է դնելու: Գ.Պողոսյանն իր ներկայությամբ երբևէ չի զանգահարել որևէ մեկի և գումար պահանջել: Պարտքով գումար վերցնելուց հետո իրենք միմյանց չեն հանդիպել:
Վկա Դոնարա Արամայիսի Համբարձումյանի ցուցմունքով այն մասին, որ հանդիսանում է Գ.Պողոսյանի կինը: Իրենց ընտանիքը գտնվում էր շատ ծանր նյութական վիճակում: 2008թ. կեսերին ոմն Սերգեյ Գալստյան գալով իրենց վարձակալած բնակարան պատմել է, որ Վրաստանում մեծ գործ է ձեռնարկել և ամուսնուն առաջարկել ինչ-որ տեղից 20-25 օրով պարտքով 3.000 դոլար գտնել և դառնալ իր գործընկերը: Վերջինս գումար գտնելու համար դիմել է իր ծանոթներին և հարազատներին: Գագիկի եղբոր տղան` Արթուր Պողոսյանը հավաքելով գումարը մեկ ամսով տվել է 3.000 ԱՄՆ դոլար: Գագիկը գումարը տվել է Սերգեյ Գալստյանին: Գումարը տալուց որոշ ժամանակ անց Ս.Գալստյանն անհայտացել է: Հայտնվում է մեկ տարի անց: Սերգեյը Գագիկին ծանոթացրել է Սիլվա Հակոբյանի հետ: Գիտի, որ Սիլվան 5000 ԱՄՆ դոլար գումար է տվել: Տեղյակ է, որ այդ 5000 ԱՄՆ դոլար գումարից Գագիկ Պողոսյանը 3000 ԱՄՆ դոլար գումարը տվել է եղբորորդուն Արթուր Պողոսյանին, 1000 ԱՄՆ դոլար գումարը տվել է Սերգեյ Գալստյանին, 1000 ԱՄՆ դոլար գումարը տվել է իր ծանոթ ոմն Յուրային: Դրանից հետո Սիլվան իր ընկերուհու` Անահիտի հետ մի քանի անգամ գնացել է իրենց տուն և պահանջել գումարը: Ինքը խնդրել է Սիլվային սպասել և խոստացել են աշխատել և վերադարձնել նրա գումարը:
Ամբաստանյալի կատարած հանցանքը հիմնավորվել է նաև քրեական գործով ձեռք բերված հետևյալ ապացույցներով.
Գագիկ Պողոսյանի մեղքը հիմնավորվել է նաև վերջինիս կողմից և մյուս կողմից Սիլվա Հակոբյանի, Արսեն Գալստյանի ու Ռոբերտ Գաբրիելյանի միջև անցկացված առերես հարցաքննությունների արձանագրություններով:
Գ.Պողոսյանի լուսանկարը Սիլվարդ Հակոբյանին ճանաչման ներկայացնելու արձանագրությամբ:
Գործում առկա մի շարք այլ փաստաթղթերը որպես ապացույց ճանաչելու որոշմամբ` մասնավորապես`
ՙՎՏԲ-Հայաստան բանկ՚ ՓԲԸ-ի Շենգավիթ մասնաճյուղից առգրավված վարկային գործը և ԴԱՀԿ ծառայությունից ստացված կատարողական վարույթի պատճենները` ըստ որոնց Գագիկ Պողոսյանը որպես ՙՄՈՒԳԱՊՈ՚ ՍՊԸ-ի տնօրեն Կարապետ Փարսադանյանին ՙՎՏԲ-Հայաստան բանկ՚ և ՙԻնեկոբանկ՚ ՓԲ ընկերությունում օգտագործելու համար տրամադրել է աշխատանքի վայրի և աշխատավարձի վերաբերյալ կեղծ տեղեկանքներ:
2009թ. մայիսի 4-ին կնքված ավտոմեքենայի առուվաճառքի պայմանգիրը:
Գագի Պողոսյանի կողմից 6.050 ԱՄՆ դոլար գումար պարտքով վերցնելու վերաբերյալ ստացականները:
ՀՀ ոստիկանության ՔԳՎ Երևան քաղաքի ՔՎ Կենտրոնականի քննչական բաժնում քննված և վարույթը կարճված թիվ 13124110 քրեական գործից պատճենահանված փաստաթղթերը` ըստ որոնց Յուրիկ Հարությունյանը 27.07.2010թ. դրությամբ Գ.Պողոսյանին վերադարձրել է 100 ԱՄՆ դոլար և 145.000 ՀՀ դրամ գումար:
ՙՄՈՒԳԱՊՈ՚ ՍՊԸ-ի կնիքը, Գ.Պողոսյանի ժամկետանց անձնագիրը և Կ.Փարսադանյանի անվամբ հաշվառված ՙՖոլկսվագեն Գոլֆ՚ մակնիշի 14 ՍՍ 036 պետհամարանիշի ավտոմեքենայի տեխանձնագիրը իրեղեն ապացույց ճանաչելու մասին որոշմամբ:
Նախաքննության մարմնի կողմից ապացույց ճանաչված վկա Սերգո Դարբինյանի դիմումը դատարանի որոշմամբ ճանաչվել է անթույլատրելի և հանվել ապացույցների շարքից, քանի որ այն ձեռք է բերվել ապացույցների ձեռքբերման համար ՀՀ քրեական դատավարության օրենսգրքով նախատեսված կարգի խախտմամբ:
4.Դատարանի իրավական վերլուծությունները.
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Գագիկ Հակոբի Պողոսյանին առաջադրված մեղադրանքը ՀՀ քրեական օրենսգրքի 178 հոդվածի 2-րդ մասի 2-րդ կետով, 325 հոդվածի 2-րդ մասով հիմնավորված է: Նրա կողմից կատարված արարքները համապատասխանում են ՀՀ քրեական օրենսգրքի 178 հոդվածի 2-րդ մասի 2-րդ կետին, 325 հոդվածի 2-րդ մասին և արարքների որակումը ճիշտ է:
Ամբաստանյալ Գագիկ Պողոսյանի նկատմամբ պատիժ նշանակելիս, դատարանը հաշվի է առնում նրա կատարած արարքների հանրության համար վտանգավորության աստիճանը և բնույթը, ինչպես նաև հանցավորի անձը:
Որպես ամբաստանյալի անձը բնութագրող, պատասխանատվությունը և պատիժը մեղմացնող հանգամանքներ դատարանը հաշվի է առնում այն, որ նա նախկինում դատված չի եղել, բնութագրվում է դրական, նրա խնամքին է գտնվում հոգեկան հիվանդ դուստրը, ընտանիքի միակ կերակրողն է, վատառողջ է, հանցագործությամբ պատճառված վնասը մասնակի վերականգնվել է, ինչպես նաև տուժողի խնդրանքը ամբաստանյալի նկատմամբ մեղմ պատիժ նշանակելու վերաբերյալ:
Ամբաստանյալի պատասխանատվությունը և պատիժը ծանրացնող հանգամանքներ չկան:
Կատարած արարքների համար ամբաստանյալ Գագիկ Հակոբի Պողոսյանը ենթակա է քրեական պատասխանատվության և պատժի:
Հաշվի առնելով Գագիկ Պողոսյանի կատարած արարքների հանրության համար վտանգավորության աստիճանը և բնույթը, նրա անձը, նրան դրականորեն բնութագրող տվյալները, պատասխանատվությունն ու պատիժը մեղմացնող հանգամանքները, պատասխանատվությունը և պատիժը ծանրացնող հանգամանքների բացակայությունը, ինչպես նաև այն, որ ՀՀ քրեական օրենսգրքի 178 հոդվածի 2-րդ մասի 2-րդ կետի և ՀՀ քրեական օրենսգրքի 325 հոդվածի 2-րդ մասի սանկցիայով նախատեսված է պատիժ նաև ազատազրկման ձևով, դատարանը գտնում է, որ պատժի նպատակներին հասնելու համար ամբաստանյալ Գագիկ Պողոսյանի նկատմամբ ՀՀ քրեական օրենսգրքի 178 հոդվածի 2-րդ մասի 2-րդ կետով և ՀՀ քրեական օրենսգրքի 325 հոդվածի 2-րդ մասով կատարած հանցանքների համար պատիժ պետք է նշանակել ազատազրկման ձևով:
ՀՀ Ազգային ժողովի 2009 թվականի հունիսի 19-ի ՙՀամաներում հայտարարելու մասին՚ որոշման 14-րդ կետի համաձայն, ՙՀամաներում հայտարարելու մասին՚ որոշումը կիրառվում է այն անձանց նկատմամբ, ովքեր հանցագործություն են կատարել մինչև 2009 թվականի հունիսի 1-ը ներառյալ: Գագիկ Պողոսյանը ՀՀ քրեական օրենսգրքի 325 հոդվածի 2-րդ մասով նախատեսված արարքները կատարել է 2008թ. հուլիսին:
ՀՀ Ազգային ժողովի 2011 թվականի մայիսի 26-ի ՙՀամաներում հայտարարելու մասին՚ որոշման 15-րդ կետի համաձայն, ՙՀամաներում հայտարարելու մասին՚ որոշումը կիրառվում է այն անձանց նկատմամբ, ովքեր հանցագործություն են կատարել մինչև 2011 թվականի մայիսի 1-ը ներառյալ: Գագիկ Պողոսյանը ՀՀ քրեական օրենսգրքի 178 հոդվածի 2-րդ մասի 2-րդ կետով նախատեսված արարքը կատարել է 2009թ. մայիսին:
Սույն քրեական գործով բացակայում են համաներման մասին հիշյալ որոշումների համապատասխանաբար 8-րդ և 9-րդ կետում նշված այն սահմանափակումները, որոնք կարող են արգելք հանդիսանալ Գագիկ Պողոսյանի նկատմամբ համաներման ակտի կիրառման համար:
Հիմք ընդունելով վերը նշվածը, դատարանը գտնում է, որ ամբաստանյալ Գագիկ Պողոսյանի նկատմամբ կիրառելի է ՀՀ Ազգային ժողովի 2009 թվականի հունիսի 19-ի ՙՀամաներում հայտարարելու մասին՚ և ՀՀ Ազգային Ժողովի ՙՀայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին՚ 2011 թվականի մայիսի 26-ի որոշումները:
Անդրադառնալով տուժող Սիլվարդ Հակոբյանի կողմից ներկայացված քաղաքացիական հայցին, դատարանը գտնում է, որ այն հիմնավոր է և ենթակա է բավարարման հետևյալ պատճառաբանությամբ.
Համաձայն ՀՀ քրեական դատավարության օրենսգրքի 158 հոդվածի 2-րդ մասի, քաղաքացիական հայց հարուցվում է կասկածյալի, մեղադրյալի կամ նրա դեմ, ում վրա կարող է գույքային պատասխանատվություն դրվել մեղադրյալի գործողությունների համար:
Քրեական դատավարությունում քաղաքացիական հայցի առարկան է կազմում հանցագործությամբ անմիջականորեն պատճառված գույքային վնասը, որի հարուցման մասին պահանջը հայցվորը ներկայացնում է մեղադրյալին կամ նրա գործողությունների համար պատասխանատվություն կրող անձին: Քաղաքացիական հայցի առարկայի որոշման համար անհրաժեշտ է, որպեսզի վնասն անմիջականորեն հանցագործությամբ պատճառված լինի:
Տվյալ դեպքում հանցագործությամբ անմիջականորեն պատճառված վնասը կազմում է 1.823.000 ՀՀ դրամ, որից 729.200 ՀՀ դրամը ամբաստանյալի հարազատների կողմից դատարանում վերականգնվել է, ուստի դատարանը գտնում է, որ ամբաստանյալ Գագիկ Պողոսյանից հօգուտ տուժող Սիլվարդ Հակոբյանի պետք է բռնագանձել մեկ միլիոն իննսուներեք հազար ութ հարյուր (1.093.200) ՀՀ դրամ:
Անդրադառնալով իրեղեն ապացույցների հարցին, դատարանը գտնում է, որ դատավճիռն օրինական ուժի մեջ մտնելուց հետո 2012թ.-ի ապրիլի 4-ի որոշմամբ իրեղեն ապացույց ճանաչված Գ.Պողոսյանի թիվ AE 0402185 ժամկետանց անձնագիրը, ՙՄՈՒԳԱՊՈ՚ ՍՊԸ-ի կնիքը և Կ.Փարսադանյանի անվամբ հաշվառված ՙՖոլկսվագեն Գոլֆ՚ մակնիշի 14 ՍՍ 036 պետհամարանիշի ավտոմեքենայի տեխանձնագիրը պետք է հանձնել ՀՀ ոստիկանության ՔԳՎ Երևան քաղաքի քննչական վարչության Արաբկիրի քննչական բաժնի տնօրինությանը` մասն անջատված թիվ 14136511 քրեական գործին կցելու համար:
Անձնական խուզարկությամբ Գ.Պողոսյանի մոտից հայտնաբերված և առգրավված Nokia տեսակի բջջային հեռախոսն իր 0096-65-73-54 Beeline քարտով, H3 No 2693835 համարի զինվորական գրքույկը, ՀՀ ՊՆ ՙԱնդրանիկ Օզանյան՚ մեդալի թիվ 1537 վկայականը, ՙՄայրական Երախտագիտություն՚ մեդալի թիվ 375 վկայականը, 5 հատ ՊՆ սպառազինության վարչության ելքի կարգագրերը, ՙՕլիվեր՚ գրուպ գնահատման գործակալության գրությունը, ՙՄՈՒԳԱՊՈ՚ ՍՊԸ տեղեկանքը տրված 06.05.2010թ., ՙՄՈՒԳԱՊՈ՚ ՍՊԸ-ի կնիքով աշխատավարձի հաշվարկման տեղեկանքը, ՙՄՈՒԳԱՊՈ՚ ՍՊԸ-ի կնիքով աշխատանքային պայմանագիրը, ՙՄՈՒԳԱՊՈ՚ ՍՊԸ-ի կնիքով և ՀՀ ՊՆ 90453 զորամասի հրամանատարի կնիքով ընդունման հանձնման ակտը, ՀՀ ՊՆ կնիքով և ՙՄՈՒԳԱՊՈ՚ ՍՊԸ-ի կնիքով պայմանագիրը, պայմանագրերը և ստացականները` կնիքված վիճակով, վերադարձնել Գագիկ Պողոսյանին:
Դատարանը գտնում է, որ դատավճիռն օրինական ուժի մեջ մտնելուց հետո քննիչի 2012թ.-ի ապրիլի 04-ի փաստաթուղթը ապացույց ճանաչելու մասին որոշմամբ ապացույց ճանաչված և քրեական գործին կցված ՙՎՏԲ-Հայաստան բանկ՚ ՓԲԸ-ի Շենգավիթ մասնաճյուղից առգրավված վարկային գործը և ԴԱՀԿ ծառայությունից ստացված կատարողական վարույթի պատճենները, 2009թ. մայիսի 4-ին կնքված ավտոմեքենայի առուվաճառքի պայմանգիրը, Գագի Պողոսյանի կողմից 6.050 ԱՄՆ դոլար գումար պարտքով վերցնելու վերաբերյալ ստացականները, ՀՀ ոստիկանության ՔԳՎ Երևան քաղաքի ՔՎ Կենտրոնականի քննչական բաժնում քննված և վարույթը կարճված թիվ 13124110 քրեական գործից պատճենահանված փաստաթղթերը պետք է պահել քրեական գործի հետ միասին:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 35, 357-360, 365, 369-372 հոդվածներով, դատարանը

Վ Ճ Ռ Ե Ց


Գագիկ Հակոբի Պողոսյանին մեղավոր ճանաչել ՀՀ քրեական օրենսգրքի 178 հոդվածի 2-րդ մասի 2-րդ կետով և ՀՀ քրեական օրենսգրքի 325 հոդվածի 2-րդ մասով նախատեսված հանցանքներ կատարելու մեջ:
ՀՀ քրեական օրենսգրքի 325 հոդվածի 2-րդ մասով Գագիկ Հակոբի Պողոսյանին դատապարտել ազատազրկման երկու (2) տարի ժամկետով:
Կիրառել ՀՀ Ազգային Ժողովի ՙՀամաներում հայտարարելու մասին՚ 2009 թվականի հունիսի 19-ի որոշման 1-ին կետի 1-ին ենթակետը և ամբաստանյալ Գագիկ Հակոբի Պողոսյանին ազատել նշանակված պատիժը կրելուց:
ՀՀ քրեական օրենսգրքի 178 հոդվածի 2-րդ մասի 2-րդ կետով Գագիկ Հակոբի Պողոսյանին դատապարտել ազատազրկման երկու (2) տարի վեց (6) ամիս ժամկետով:
Կիրառել ՀՀ Ազգային Ժողովի ՙՀայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին՚ 2011 թվականի մայիսի 26-ի որոշման 1-ին կետի 1-ին ենթակետը և ամբաստանյալ Գագիկ Հակոբի Պողոսյանին ազատել նշանակված պատիժը կրելուց:
Գագիկ Հակոբի Պողոսյանի նկատմամբ որպես խափանման միջոց կիրառված կալանավորումը վերացնել և նրան անհապաղ ազատել կալանքից դատական նիստի դահլիճում:
Տուժող Սիլվարդ Հակոբյանի քաղաքացիական հայցը բավարարել. Գագիկ Հակոբի Պողոսյանից հօգուտ Սիլվարդ Հակոբյանի բռնագանձել 1.093.800 (մեկ միլիոն իննսուներեք հազար ութ հարյուր) ՀՀ դրամ գումար:
Դատավճիռն օրինական ուժի մեջ մտնելուց հետո իրեղեն ապացույց հանդիսացող Գ.Պողոսյանի թիվ AE 0402185 ժամկետանց անձնագիրը, ՙՄՈՒԳԱՊՈ՚ ՍՊԸ-ի կնիքը և Կ.Փարսադանյանի անվամբ հաշվառված ՙՖոլկսվագեն Գոլֆ՚ մակնիշի 14 ՍՍ 036 պետհամարանիշի ավտոմեքենայի տեխանձնագիրը հանձնել ՀՀ ոստիկանության ՔԳՎ Երևան քաղաքի քննչական վարչության Արաբկիրի քննչական բաժնի տնօրինությանը` մասն անջատված թիվ 14136511 քրեական գործին կցելու համար:
Գագիկ Հակոբի Պողոսյանի Nokia տեսակի բջջային հեռախոսն իր 0096-65-73-54 Beeline քարտով, H3 No 2693835 համարի զինվորական գրքույկը, ՀՀ ՊՆ ՙԱնդրանիկ Օզանյան՚ մեդալի թիվ 1537 վկայականը, ՙՄայրական Երախտագիտություն՚ մեդալի թիվ 375 վկայականը, 5 հատ ՊՆ սպառազինության վարչության ելքի կարգագրերը, ՙՕլիվեր՚ գրուպ գնահատման գործակալության գրությունը, ՙՄՈՒԳԱՊՈ՚ ՍՊԸ տեղեկանքը տրված 06.05.2010թ., ՙՄՈՒԳԱՊՈ՚ ՍՊԸ-ի կնիքով աշխատավարձի հաշվարկման տեղեկանքը, ՙՄՈՒԳԱՊՈ՚ ՍՊԸ-ի կնիքով աշխատանքային պայմանագիրը, ՙՄՈՒԳԱՊՈ՚ ՍՊԸ-ի կնիքով և ՀՀ ՊՆ 90453 զորամասի հրամանատարի կնիքով ընդունման հանձնման ակտը, ՀՀ ՊՆ կնիքով և ՙՄՈՒԳԱՊՈ՚ ՍՊԸ-ի կնիքով պայմանագրերը և ստացականները` կնիքված վիճակով, վերադարձնել Գագիկ Պողոսյանին:
Ապացույց ճանաչված այլ փաստաթուղթ հանդիսացող ՙՎՏԲ-Հայաստան բանկ՚ ՓԲԸ-ի Շենգավիթ մասնաճյուղից առգրավված վարկային գործը և ԴԱՀԿ ծառայությունից ստացված կատարողական վարույթի պատճենները, 2009թ. մայիսի 4-ին կնքված ավտոմեքենայի առուվաճառքի պայմանգիրը, Գագիկ Պողոսյանի կողմից 6.050 ԱՄՆ դոլար գումար պարտքով վերցնելու վերաբերյալ ստացականները, ՀՀ ոստիկանության ՔԳՎ Երևան քաղաքի ՔՎ Կենտրոնականի քննչական բաժնում քննված և վարույթը կարճված թիվ 13124110 քրեական գործից պատճենահանված փաստաթղթերը պահել քրեական գործի հետ միասին:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակվելու օրվանից հետո մեկամսյա ժամկետում:

Դատավոր` ստորագրություն
Բնագրի հետ ճիշտ է
Դատավոր Լ. Ավետիսյան