ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ՎԵՐԱՔՆՆԻՉ ՔՐԵԱԿԱՆ ԴԱՏԱՐԱՆ

ԵԱՔԴ/0042/01/12
Ո Ր Ո Շ ՈՒ Մ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

12 դեկտեմբերի 2012 թվական ք.Երևան

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԵՐԱՔՆՆԻՉ ՔՐԵԱԿԱՆ
ԴԱՏԱՐԱՆԸ /ԱՅՍՈՒՀԵՏ` ՎԵՐԱՔՆՆԻՉ ԴԱՏԱՐԱՆ/ ՀԵՏԵՎՅԱԼ ԿԱԶՄՈՎ`

նախագահող դատավոր` Հ.ՏԵՐ-ԱԴԱՄՅԱՆ
դատավորներ` Կ.ՂԱԶԱՐՅԱՆ
Գ.ՄԵԼԻՔ-ՍԱՐԳՍՅԱՆ

քարտուղարությամբ` Մ.ՍԱՄՍՈՆՅԱՆԻ

մասնակցությամբ`
մեղադրող` Կ.ՀԱՐՈՒԹՅՈՒՆՅԱՆԻ
պաշտպան` Մ.ՎԱՐԴԱՆՅԱՆԻ
ամբաստանյալ` Խ.ՏԻԳՐԱՆՅԱՆԻ

դռնբաց դատական նիստում վճռաբեկության կարգով քննության առնելով ամբաստանյալ Խաչիկ Սասունի Տիգրանյանի և վերջինիս պաշտպան Մանվել Վարդանյանի վերաքննիչ բողոքը` Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի 2011 թվականի հոկտեմբերի 18-ի դատավճռի դեմ, և վերանայելով դատական ակտը

Պ Ա Ր Զ Ե Ց
ԳՈՐԾԻ ԴԱՏԱՎԱՐԱԿԱՆ ՆԱԽԱՊԱՏՄՈՒԹՅՈՒՆԸ

1. ՀՀ ՊՆ ՀԿԳ քննչական բաժնի ՀԿԳ քննիչ Ա.Թամրազյանի 2011 թվականի օգոստոսի 17-ի որոշմամբ Խաչիկ Սասունի Տիգրանյանի կողմից իրացնելու նպատակով, խոշոր չափերի հասնող <<Մարիխուանա>> տեսակի թմրամիջոց ապօրինի ձեռք բերելու, պահելու և փոխադրելու հանցագործության փաստի առթիվ ՀՀ քրեական օրենսգրքի 266-րդ հոդվածի 2-րդ մասի 2-րդ կետի հատկանիշներով հարուցվել է թիվ 90153911 քրեական գործը:

2. 2011 թվականի օգոստոսի 17-ին Խաչիկ Սասունի Տիգրանյանը ձերբակալվել է:
3. Նախաքննական մարմնի 2011 թվականի օգոստոսի 18-ի որոշմամբ Խաչիկ Սասունի Տիգրանյանը ներգրավվել է որպես մեղադրյալ ՀՀ քրեական օրենսգրքի 272-րդ հոդվածի 1-ին մասով, ՀՀ քրեական օրենսգրքի 266-րդ հոդվածի 1-ին մասով և ՀՀ քրեական օրենսգրքի 266-րդ հոդվածի 2-րդ մասի 2-րդ կետով:

4. ՀՀ ՊՆ ՀԿԳ քննչական բաժնի ՀԿԳ քննիչ Ա.Թամրազյանը 2011 թվականի օգոստոսի 18-ին միջնորդություն է ներկայացրել Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան` թիվ 90153911 քրեական գործով մեղադրյալ Խաչիկ Սասունի Տիգրանյանի նկատմամբ կալանավորումը որպես խափանման միջոց 2 /երկու/ ամիս ժամկետով կիրառելու մասին, որը դատարանի նույն օրվա որոշմամբ բավարարվել է:

5. Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի 12.10.2011թ., 12.12.2011թ., 13.02.2012թ. որոշումներով մեղադրյալ Խաչիկ Սասունի Տիգրանյանին կալանքի տակ պահելու ժամկետը երկարացվել է յուրաքանչյուր անգամ 2 /երկու/-ական ամիս ժամկետով:

6. Նախաքննական մարմնի 2011 թվականի դեկտեմբերի 07-ի որոշմամբ թիվ 90153911 քրեական գործով մեղադրյալ Խաչիկ Սասունի Տիգրանյանին 18.08.2011թ. ՀՀ քրեական օրենսգրքի 272-րդ հոդվածի 1-ին մասով, ՀՀ քրեական օրենսգրքի 266-րդ հոդվածի 1-ին մասով, ՀՀ քրեական օրենսգրքի 266-րդ հոդվածի 2-րդ մասի 2-րդ կետով առաջադրված մեղադրանքների մասերը վերացվել և նրա նկատմամբ նշված հոդվածներով քրեական հետապնդումը դադարեցվել է` կատարված հանցագործություններին նրա մասնակցությունն ապացուցված չլինելու և նոր ապացույցներ ձեռք բերելու բոլոր հնարավորություններն սպառված լինելու պատճառով:
Նախաքննական մարմնի 2011 թվականի դեկտեմբերի 07-ի որոշմամբ թիվ 90153911 քրեական գործով մեղադրյալ Խաչիկ Սասունի Տիգրանյանը ներգրավվել է որպես մեղադրյալ ՀՀ քրեական օրենսգրքի 266-րդ հոդվածի 2-րդ մասի 2-րդ կետով:

7. Նախաքննական մարմնի 2012 թվականի մարտի 28-ի որոշմամբ թիվ 90153911 քրեական գործով մեղադրյալ Խաչիկ Սասունի Տիգրանյանին 07.12.2011թ. ՀՀ քրեական օրենսգրքի 266-րդ հոդվածի 2-րդ մասի 2-րդ կետով առաջադրված մեղադրանքը փոփոխվել, լրացվել և վերջինիս նոր մեղադրանք է առաջադրվել ՀՀ քրեական օրենսգրքի 268-րդ հոդվածի 2-րդ մասի 2-րդ կետով և ՀՀ քրեական օրենսգրքի 34-266-րդ հոդվածի 1-ին մասով:

8. 2012 թվականի ապրիլի 04-ին թիվ 90153911 քրեական գործն ըստ մեղադրանքի Խաչիկ Սասունի Տիգրանյանի` ՀՀ քրեական օրենսգրքի 268-րդ հոդվածի 2-րդ մասի 2-րդ կետով, ՀՀ քրեական օրենսգրքի 34-266-րդ հոդվածի 1-ին մասով և Արտակ Մյասնիկի Ղուկասյանի` ՀՀ քրեական օրենսգրքի 34-268-րդ հոդվածի 1-ին մասով, մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:

9. Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի 2012 թվականի ապրիլի 06-ի որոշմամբ քրեական գործն ըստ մեղադրանքի Խաչիկ Սասունի Տիգրանյանի` ՀՀ քրեական օրենսգրքի 268-րդ հոդվածի 2-րդ մասի 2-րդ կետով, ՀՀ քրեական օրենսգրքի 34-266-րդ հոդվածի 1-ին մասով և Արտակ Մյասնիկի Ղուկասյանի` ՀՀ քրեական օրենսգրքի 34-268-րդ հոդվածի 1-ին մասով, ընդունել է վարույթ և մեղադրյալ Խաչիկ Սասունի Տիգրանյանին կալանքի տակ պահելու ժամկետը երկարացվել է 20 /քսան/ օր ժամանակով` մինչև ՀՀ քրեական դատավարության օրենսգրքի 292-րդ հոդվածով նախատեսված որոշման ընդունումը:

10. Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի 2012 թվականի ապրիլի 11-ի որոշմամբ քրեական գործն ըստ մեղադրանքի Խաչիկ Սասունի Տիգրանյանի` ՀՀ քրեական օրենսգրքի 268-րդ հոդվածի 2-րդ մասի 2-րդ կետով, ՀՀ քրեական օրենսգրքի 34-266-րդ հոդվածի 1-ին մասով և Արտակ Մյասնիկի Ղուկասյանի` ՀՀ քրեական օրենսգրքի 34-268-րդ հոդվածի 1-ին մասով, ըստ ընդդատության ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան /այսուհետ` առաջին ատյանի դատարան/:

11. Առաջին ատյանի դատարանի 2012 թվականի ապրիլի 17-ի որոշմամբ քրեական գործն ըստ մեղադրանքի Խաչիկ Սասունի Տիգրանյանի` ՀՀ քրեական օրենսգրքի 268-րդ հոդվածի 2-րդ մասի 2-րդ կետով, ՀՀ քրեական օրենսգրքի 34-266-րդ հոդվածի 1-ին մասով և Արտակ Մյասնիկի Ղուկասյանի` ՀՀ քրեական օրենսգրքի 34-268-րդ հոդվածի 1-ին մասով, ընդունվել է վարույթ, իսկ 2012 թվականի ապրիլի 28-ի որոշմամբ վերոնշյալ քրեական գործը նշանակվել է դատական քննության 2012 թվականի մայիսի 08-ին, ժամը 16.30-ին և մեղադրյալ Խաչիկ Սասունի Տիգրանյանի նկատմամբ որպես խափանման միջոց ընտրված կալանավորումը թողնվել է անփոփոխ:

12. Առաջին ատյանի դատարանի 2012 թվականի հոկտեմբերի 18-ի դատավճռով Խաչիկ Սասունի Տիգրանյանը մեղավոր է ճանաչվել ՀՀ քրեական օրենսգրքի 268-րդ հոդվածի 2-րդ մասի 2-րդ կետով, ՀՀ քրեական օրենսգրքի 34-266-րդ հոդվածի 1-ին մասով և դատապարտվել.
ՀՀ քրեական օրենսգրքի 268-րդ հոդվածի 2-րդ մասի 2-րդ կետով` ազատազրկման 1 (մեկ) տարի ժամկետով,
ՀՀ քրեական օրենսգրքի 34-266-րդ հոդվածի 1-ին մասով` ազատազրկման 4 (չորս) տարի ժամկետով:
ՀՀ քրեական օրենսգրքի 66-րդ հոդվածով սահմանված կարգով` նշանակված պատիժները մասնակիորեն գումարելու միջոցով, Խաչիկ Սասունի Տիգրանյանի նկատմամբ վերջնական պատիժ է նշանակվել ազատազրկում` 4 (չորս) տարի 6 (վեց) ամիս ժամկետով` պատժի կրման սկիզբը հաշվելով 2011 թվականի օգոստոսի 16-ից:
Խաչիկ Սասունի Տիգրանյանի նկատմամբ ընտրված խափանման միջոցը` կալանավորումը, թողնվել է անփոփոխ` մինչև դատավճռի օրինական ուժի մեջ մտնելը:
Դատավճռով որոշվել է դատավճիռն օրինական ուժի մեջ մտնելուց հետո 2011 թվականի դեկտեմբերի 15-ի որոշմամբ իրեղեն ապացույց ճանաչված` 380.000 ՀՀ դրամը` որպես եկամուտ, հանձնել պետությանը, 64,48 գրամ ընդհանուր հաստատուն քաշով «մարիխուանա» տեսակի չորացված թմրամիջոցի, ստվարաթղթե տուփի, «Կոշիկի կենտրոն» գրառմամբ սպիտակ, գունավոր և ավելի փոքր չափերով, սպիտակ պոլիէթիլենային տոպրակների հարցը թողնել լուծելու թիվ 90150912 քրեական գործով:
Դատական ծախսերի հարցը համարվել է լուծված:
Առաջին ատյանի դատարանի 2012 թվականի հոկտեմբերի 18-ի դատավճռով ՀՀ քրեական օրենսգրքի 34-268-րդ հոդվածի 1-ին մասով մեղավոր է ճանաչվել և 6 (վեց) ամիս ժամկետով ազատազրկման է դատապարտվել նաև գործով մյուս ամբաստանյալ Արտակ Մյասնիկի Ղուկասյանը, ով դատավճիռը չի բողոքարկել:

13. Առաջին ատյանի դատարանի 2012 թվականի հոկտեմբերի 18-ի դատավճռի դեմ վերաքննիչ բողոք են բերել ամբաստանյալ Խ.Տիգրանյանը և վերջինիս պաշտպան Մ.Վարդանյանը:
Վերաքննիչ բողոքի կապակցությամբ գրավոր պատասխան է ներկայացրել մեղադրող Կ.Հարությունյանը:

14. Ամբաստանյալ Խաչիկ Տիգրանյանի և պաշտպան Մանվել Վարդանյանի վերաքննիչ բողոքը վերաքննիչ դատարանում ստացվել է 2012 թվականի նոյեմբերի 13-ին:
Քրեական գործն ըստ մեղադրանքի Խաչիկ Սասունի Տիգրանյանի` ՀՀ քրեական օրենսգրքի 268-րդ հոդվածի 2-րդ մասի 2-րդ կետով, ՀՀ քրեական օրենսգրքի 34-266-րդ հոդվածի 1-ին մասով և Արտակ Մյասնիկի Ղուկասյանի` ՀՀ քրեական օրենսգրքի 34-268-րդ հոդվածի 1-ին մասով, վերաքննիչ դատարանում ստացվել է 2012 թվականի նոյեմբերի 22-ին:

15. ՀՀ վերաքննիչ քրեական դատարանի 2012 թվականի նոյեմբերի 23-ի որոշմամբ ամբաստանյալ Խ.Տիգրանյանի և պաշտպան Մ.Վարդանյանի վերաքննիչ բողոքն ընդունվել է վարույթ և քրեական գործն ըստ մեղադրանքի Խաչիկ Սասունի Տիգրանյանի` ՀՀ քրեական օրենսգրքի 268-րդ հոդվածի 2-րդ մասի 2-րդ կետով, ՀՀ քրեական օրենսգրքի 34-266-րդ հոդվածի 1-ին մասով, նշանակվել է դռնբաց դատական նիստում վճռաբեկության կարգով քննության 2012 թվականի դեկտեմբերի 12-ին, ժամը 12.00-ին, Երևան քաղաքում:

ԳՈՐԾԻ ՓԱՍՏԱԿԱՆ ՀԱՆԳԱՄԱՆՔՆԵՐԸ

16. Խաչիկ Սասունի Տիգրանյանը 2011 թվականի հուլիսի վերջերին` կոնկրետ օրը հայտնի չէ, անհայտ անձից, առանց իրացնելու նպատակի, ապօրինի ձեռք է բերել 30 հատ թղթե փաթեթի մեջ լցված, խոշոր չափերի հասնող` 68,48 գրամ հաստատուն քաշով մարիխուանա տեսակի թմրամիջոց, որը նույն նպատակով ապօրինի պահել և փոխադրել է իր կողմից վարած «Մերսեդես-Բենց Ե-280» մակնիշի 16 ՕՍ 919 պետհամարանիշի ավտոմեքենայի բեռնախցիկում: Խաչիկ Տիգրանյանը ծխախոտի 20 գլանակի մեջ լցված, զգալի չափերի հասնող մարիխուանա տեսակի թմրամիջոց իրացնելու նպատակով ապօրինի ձեռք բերելու և այն Արարատի մարզի Այգավան գյուղի բնակիչ Արտակ Մյասնիկի Ղուկասյանին վաճառելու եղանակով ապօրինի իրացնելու նպատակով 2011 թվականի օգոստոսի 16-ին` ժամը 21:30-ի սահմաններում, նրանից վերցրել է 380.000 ՀՀ դրամ գումար, հետագայում թմրամիջոցն ապօրինի տրամադրելու պայմանով, սակայն Արտակ Ղուկասյանից գումարը ստանալուց անմիջապես հետո բերման է ենթարկվել ՀՀ ոստիկանության Քանաքեռ-Զեյթունի բաժնի աշխատակիցների կողմից` իր կամքից անկախ պատճառներով չկարողանալով հանցագործությունն ավարտին հասցնել: ՀՀ ոստիկանության Քանաքեռ-Զեյթունի բաժնում Խաչիկ Տիգրանյանի ավտոմեքենայի զննությամբ հայտնաբերվել և առգրավվել է թղթե 30 փաթեթում լցված, խոշոր չափերի հասնող` 68,48 գրամ հաստատուն քաշով մարիխուանա տեսակի թմրամիջոցը:

ՎԵՐԱՔՆՆԻՉ ԲՈՂՈՔԻ ՀԻՄՔԵՐԸ, ՀԻՄՆԱՎՈՐՈՒՄՆԵՐԸ ԵՎ ՊԱՀԱՆՋՆԵՐԸ

17. Ամբաստանյալ Խաչիկ Տիգրանյանի և վերջինիս պաշտպան Մանվել Վարդանյանի վերաքննիչ բողոքը քննվում է հետևյալ հիմքերի սահմաններում` ներքոհիշյալ հիմնավորումներով.

18. Ամբաստանյալ Խաչիկ Տիգրանյանը և պաշտպան Մանվել Վարդանյանը վերաքննիչ բողոքով խնդրել են. <<…Ամբողջովին բավարարել վերաքննիչ բողոքը, ամբաստանյալ Խ.Տիգրանյանի մասով ամբողջությամբ բեկանել Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի 18.10.2012թ. թիվ ԵԱՔԴ/0042/01/12 դատավճիռը, բեկանված մասով Խ.Տիգրանյանի նկատմամբ կայացնել գործն ըստ էության լուծող դատական ակտ կամ գործն ուղարկել համապատասխան ստորադաս դատարան` նոր քննության` սահմանելով նոր քննության ծավալը կամ ամբողջությամբ բեկանել և փոփոխել բողոքարկվող դատավճիռը, եթե ստորադաս դատարանի հաստատած փաստական հանգամանքները հնարավորություն են տալիս կայացնելու նման ակտ և եթե դա բխում է արդարադատության արդյունավետության շահերից կամ մասնակիորեն բեկանել բողոքարկվող դատավճիռը և կարճել գործի վարույթն ամբողջովին կամ դրա մասը կամ մեղմացնել Խ.Տիգրանյանի նկատմամբ բողոքարկվող դատավճռով սահմանված պատիժը:>>:

19. Ի հիմնավորումն վերաքննիչ բողոքի` ամբաստանյալ Խաչիկ Տիգրանյանը և վերջինիս պաշտպան Մանվել Վարդանյանը մասնավորապես նշել են հետևյալը.
Խաչիկ Տիգրանյանի ավտոմեքենան ոչ թե զննվել է, այլ խուզարկվել, որպիսի իրավասություն հետաքննության մարմնի աշխատակիցները չունեն:
Հետևաբար, 30 փաթեթ թմրամիջոց հայտնաբերվել և ՀՀ քրեական օրենսգրքի 268-րդ հոդվածի 2-րդ մասի 2-րդ կետով Խ.Տիգրանյանին առաջադրված մեղադրանքի հիմքում դրվել է ՀՀ քրեական դատավարության օրենսգրքի 57-րդ, 217-218-րդ, 225-րդ, 226-րդ, 230-րդ և 231-րդ հոդվածներով սահմանված դատավարական նորմերի խախտումներով: Բացի այդ, 30 փաթեթ թմրամիջոց որպես ապացույց գոյություն չունի: Ուստի, ՀՀ քրեական օրենսգրքի 268-րդ հոդվածի 2-րդ մասի 2-րդ կետով առաջադրված մեղադրանքում Խ.Տիգրանյանին պետք է ճանաչել անպարտ:
Վերաքննիչ բողոքի հեղինակները նշել են նաև այն մասին, որ Խաչիկ Տիգրանյանի մոտից 380.000 ՀՀ դրամը հայտնաբերվել է ազատությունից ապօրինի զրկված լինելու, իրավական պաշտպանության արդյունավետ միջոցից զրկված լինելու պայմաններում:
Վերաքննիչ բողոքի հեղինակների կարծիքով դատարանն ի վնաս պաշտպանության կողմի, սխալ է մեկնաբանել և կիրառել ՀՀ քրեական դատավարության օրենսգրքի 217-րդ և 225-րդ հոդվածները, որի հետևրանքով ՀՀ քրեական դատավարության օրենսգրքի <<Որպես ապացույց չթույլատրվող նյութեր>> վերտառությամբ 105-րդ հոդվածի 1-ին մասի 5-րդ կետի համաձայն` քննչական կամ այլ դատավարական կարգի էական խախտմամբ ձեռք բերված 380.000 ՀՀ դրամ գումարը և 30 փաթեթ թմրամիջոցն անհիմն դրվել են մեղադրանքի և դատական ակտի հիմքում: Բողոքի հեղինակները գտնում են, որ նման պայմաններում 30 փաթեթ թմրամիջոցը և 380.000 ՀՀ դրամ գումարն իրեղեն ապացույց չի կարող ճանաչվել և որպես անթույլատրելի ապացույց պետք է հանվի ապացույցների շարքից:
Վերաքննիչ բողոքի հեղինակները վկայակոչելով ՀՀ Վճռաբեկ դատարանի ԵԷԴ/0125/01/09 գործով որոշումը, բողոքում նշել են, որ Խաչիկ Տիգրանյանն իր հերթին թմրամիջոց է ձեռք բերել այլ անձից, իսկ Արտակ Ղուկասյանը նրան ոչ միայն դրդել է ՀՀ քրեական օրենսգրքի 268-րդ հոդվածով նախատեսված հանցանքի կատարման, այլև կազմակերպել է հանցանքի կատարումը: Արտակ Ղուկասյանը համոզել, խնդրել և գումար է տվել Խաչիկ Տիգրանյանին իր համար թմրամիջոց ձեռք բերելու համար, իսկ Խաչիկ Տիգրանյանը հանդես է եկել միայն որպես թմրամիջոց ապօրինի ձեռք բերելու օժանդակող, քանի որ նրա մոտ հայտնաբերված 30 փաթեթ թմրամիջոցը եղել է միայն նրա անձնական օգտագործման համար:
Բողոքի հեղինակները գտնում են, որ վեոնշյալ փաստական հանգամանքների առկայության պայմաններում Խ.Տիգրանյանին ՀՀ քրեական օրենսգրքի 34-266-րդ հոդվածով մեղսագրվող արարքը /թմրամիջոց ապօրինի իրացնելու փորձ/ պետք է վերաորակել ՀՀ քրեական օրենսգրքի 38-34-268-րդ հոդվածով /թմրամիջոց ապօրինի ձեռք բերելուն օժանդակելու փորձ/:
Վերաքննիչ բողոքի հեղինակները բողոքում նշել են, որ Արտակ Ղուկասյանի կողմից Խաչիկ Տիգրանյանին գումար տալը և Խաչիկ Տիգրանյանինի կողմից Արտակ Ղուկասյանից գումար վերցնելը Խաչիկ Տիգրանյանի կողմից թմրամիջոցների ապօրինի շրջանառության հանցատեսակի` տվյալ դեպքում թմրամիջոցն ապօրինի ձեռք բերելու կատարմանն ուղղված գործողություն` մարմնաշարժում չէ: Գումարի փոխանցումը տվյալ հանցագործության նախապատրաստության դասական դրսևորումն է:
Հետևաբար, Խաչիկ Տիգրանյանին ՀՀ քրեական օրենսգրքի 34-266-րդ հոդվածով մեղսագրվող արարքը /թմրամիջոց ապօրինի իրացնելու փորձ/ պետք է վերաորակել ՀՀ քրեական օրենսգրքի 35-266-րդ հոդվածով /թմրամիջոց ապօրինի իրացնելու նախապատրաստություն/:
Այսպիսով, վերաքննիչ բողոքի հեղինակները գտնում են, որ գործի քննության և լուծման արդյունքում դատարանը թույլ է տվել նյութական իրավունքի խախտում, այսինքն` չի կիրառել այն օրենքը, որը ենթակա էր կիրառման:
Վերաքննիչ բողոքի հեղինակները գտնում են, որ Խ.Տիգրանյանի նկատմամբ պատիժ նշանակելիս դատարանը բավարար չափով գնահատման չի ենթարկել նրա կողմից կատարված հանցանքի` հանրության համար վտանգավորության աստիճանն ու բնույթը, գործի կոնկրետ հանգամանքները, նրա անձը բնութագրող տվյալները, այն, որ նա հանցանքը կատարել է առաջին անգամ, բնութագրվում է դրականորեն, խնամքին ունի երկու մանկահասակ երեխա: Արդյունքում, դատարանի կողմից Խ.Տիգրանյանի նկատմամբ նշանակվել է պատիժ, որն անարդարացի է ակնհայտ խիստ լինելու պատճառով և չի համապատասխանում նրա կատարած հանցագործության ծանրությանը և հանցավորի անձին:
Վերոշարադրյալ հիմնավորումներով վերաքննիչ բողոքի հեղինակները խնդրում են ամբաստանյալ Խ.Տիգրանյանին անպարտ չճանաչելու պարագայում մեղմացնել նրա նկատմամբ նշանակված պատժաչափը:

ԱՄԲԱՍՏԱՆՅԱԼ Խ.ՏԻԳՐԱՆՅԱՆԻ ԵՎ ՊԱՇՏՊԱՆ Մ.ՎԱՐԴԱՆՅԱՆԻ
ՎԵՐԱՔՆՆԻՉ ԲՈՂՈՔԻ ԴԵՄ ՄԵՂԱԴՐՈՂ Կ.ՀԱՐՈՒԹՅՈՒՆՅԱՆԻ ԿՈՂՄԻՑ
ԲԵՐՎԱԾ ԳՐԱՎՈՐ ՊԱՏԱՍԽԱՆԻ ԷՈՒԹՅՈՒՆԸ

20. Մեղադրող Կ.Կարությունյանն ըստ էության առարկելով ամաբստանյալ Խ.Տիգրանյանի և վերջինիս պաշտպան Մ.Վարդանյանի վերաքննիչ բողոքի դեմ, իր գրավոր պատասխանով մասնավորապես հայտնել է հետևյալը.

21. <<Ծանոթանալով վերաքննիչ բողոքին և խնդրանքի տարաբնույթ պահանջներին, տպավորություն է ստեղծվում, որ ամբաստանյալը և նրա պաշտպանը վիճարկել են ոչ թե կոնկրետ նյութական կամ դատավարական իրավունքի խախտում, որը ազդել է գործի ելքի վրա, այլ ընտրել են ամեն գնով ի օգուտ իրենց որևէ որոշում ստանալու ճանապարհ։
Գտնում եմ, որ վերաքննիչ բողոքը անհիմն է, ենթակա է մերժման հետևյալ պատճառաբանությամբ.
Անդրադառնանք ամբաստանյալի և նրա պաշտպանի վերաքննիչ բողոքում նշված պատճառաբանություններին։
Պաշտպանը պատճառաբանելով այն փաստը, որ ամբաստանյալի մոտ հայտնաբերված խոշոր չափերի հասնող թմրանյութը վերջինս ձեռք է բերել այլ անձից և ոչ թե ինքն է արտադրել, մեկնաբանում է, որ իր պաշտպանյալը թմրանյութ իրացնող չէ։
Անհասկանալի է պաշտպանի և ամբաստանյալի նման մոտեցումը, քանի որ թմրանյութ իրացնելու կամ իրացնելու փորձի համար պարտադիր չէ անձամբ թմրանյութ արտադրել։ Թմրանյութ իրացնել կամ փորձել իրացնել հնարավոր է նաև այն ձեռք բերելով մեկ այլ անձից, ինչը տվյալ դեպքում և կատարվել է։
Պաշտպանը և ամբաստանյալը հղում են կատարել նաև իրենց միջնորդությամբ դատարանում հարցաքննված Արման Սաղաթելյանի ցուցմունքներին, ըստ որի` Խ.Տիգրանյանը նրան իբրև հայտնել է, թե ինչ որ մեկը «զզվեցրել է» իրեն «ծխելու բան է ուզում, բայց ինքը չի ճարելու»։ Իրենց միջնորդությամբ դատարան հրավիրված վկայի դատաքննական և նախաքննական ցուցմունքների հակասության պատճառաբանությամբ հրապարակվել է նաև վկա Ա.Սաղաթելյանի նախաքննական ցուցմունքները։ Վերջինս նախաքննության ընթացքում հարցաքննվել է երկու անգամ, և նույնիսկ քննիչի կոնկրետ հարցադրմանը, թե իրենք ինչ են զրուցել սրճարանում Խ.Տիգրանյանի հետ, վկան հստակ պատասխան է տվել, սակայն ոչ մի բառ չէր նշել դատարանում նշված «ծխելու բան է ուզում, բայց ինքը չի ճարելու»-ի մասին։ Դա նույնպես վկայում է այն մասին, որ պաշտպանական կողմի միջնորդությամբ դատարան հրավիրված և կոնկրետ իրենց հարցադրմանը համապատասխան հնչեցրած պատասխանը մտացածին էր, ոչ արժանահավատ և նպատակ էր հետապնդում խեղաթյուրել իրականությունը, մեղմացնելով Խ.Տիգրանյանի պատասխանատվությունը։
Պաշտպանը և ամբաստանյալը վիճարկել են նաև այն հանգամանքը, որ իբր նախաքննական մարմնի կողմից թվով 30 փաթեթներում գտնվող թմրանյութը իրեղեն ապացույց չի ճանաչվել։ Հանգամանք, որը մեղմ ասած անհասկանի է, քանի որ դեռևս 15.12.2011թ. քննիչի կողմից կայացվել է որոշում նշված 30 փաթեթներում գտնվող թմրանյութն իրեղեն ապացույց ճանաչելու մասին, ավելին` նշված որոշումը գտնվում է հատոր 3 Գ.Թ. 142-143 /քրեական գործի նյութերի պատճենը ամբողջությամբ տրամադրվել է նաև ամբաստանյալին և նրա պաշտպանին/։ Պաշտպանը և ամբաստանյալը վիճարկել են նաև այն փաստը, որ փաթեթը, որում գտնվել է թվով 30 փաթեթներում պահվող թմրանյութը կնիքված և ստորագրված է միայն քննիչի կողմից և բացակայում են ընթերակաների ստորագրությունները կնիքի վրա։ Նշված պատճառաբանությունը նույնպես անհիմն է, քանի որ արձանագրությունը, որով հաստատվել է կոնկրետ քննիչի կողմից թմրանյութը փաթեթավորելու փաստը, կատարվել է ընթերակաների մասնակցությամբ և համապատասխան արձանագրության մեջ աոկա են նշված ընթերակաների ստորագրությունները, ինչպես նաև օրենքում նախատեսված մյուս տվյալները։ Քրեադատավարական որևէ նորմով սահմանված չէ, որ ընթերակաների ստորագրությունները պետք է առկա լինեն փաթեթների կնիքների վրա։
Պաշտպանը և ամբաստանյալը վիճարկել են նաև Խ.Տիգրանյանի մեքենայից զննությամբ հայտնաբերված թմրանյութի օրինականությունը` մանրամասը նշելով զննության և խուզարկության տարբերությունները, մոռանալով սակայն այն հանգամանքը, որ թմրանյութը ոստիկանության աշխատակիցների կողմից հայտնաբերվել է ոչ թե մեքենայի կամ դրա բեռնախցիկի ինչ որ դարակից, թաքստոցից, այլ տեսանելի վայրից, ինչը ենթադրում է, որ ոստիկանության աշխատակիցները իրավասու էին զննության ենթարկել ինչպես մեքենայի սրահի, այնպես էլ բեռնախցիկի տեսանելի հատվածները։ Այդ հարցին նույնպես առաջին ատյանի դատարանը տվել է իր քրեաիրավական գնահատականը, նշելով, որ ոստիկանների գործողությունները եղել են իրավաչափ։
Պաշտպանը և ամբաստանյալը վիճարկել են իրեղեն ապացույց ճանաչված 380 հազար դրամի փաստը, մոռանալով, որ քրեական գործով նախաքննությամբ, ինչպես նաև դատաքննությամբ անհերքելի ապացույցներ են ձեռք բերվել այն մասին, որ 380 հազար ՀՀ դրամը Ա.Ղուկասյանը փոխանցել է Խ.Տիգրանյանին 20 գլանակ թմրանյութ ձեռք բերելու նպատակով։
Պաշտպանը և ամբաստանյալը վերաքննիչ բողոքում անդրադարձ են կատարել նաև արարքների քրեաիրավական որակմանը, նշելով որ Խ.Տիգրանյանի կողմից 380 հազար դրամ գումարը վերցնելը ոչ թե հանցափորձ է, այլ հանցագործության նախապատրաստություն։
Անհասկանալի է, որ նման վերլուծություն կատարելուց հետո պաշտպանը մեջբերում է կատարում վճռաբեկ դատարանի կողմից կայացված նախադեպային որոշումը, պատճառաբանելով, որ իր պաշտպանյաը փորձել է ոչ թե թմրանյութ իրացնել, այլ օժանդակել է թմրանյութ ձեռք բերողին, մեջբերելով Ա.Ասլանյանի վերաբերյալ ԵԷԴ/0125/01/09 գործով 2010թ. որոշման 18–րդ կետով վճռաբեկ դատարանի կողմից սահմանված հետևյալ չորս պայմանների միաժամանակյա առկայությունը.
ա/ սպառողի խնդրանքով և դրամական միջոցներով, բ/ սպառողի անձնական գործածման համապատասխան քանակով, գ/ առանց դրանց նկատմամբ տնօրինման իրավունքի, դ/ միջնորդի դիտավորությունն ընդգրկում է, ոչ թե իրացումը, այլ ձեռքբերմանն աջակցելը։ Ցանկանում եմ նշել, որ պաշտպանի կողմից բերված նախադեպային որոշման օրինակի փաստական հանգամանքներն էականորեն տարբերվում են բողոքարվող ղատավճռի փաստական հանգամանքներից։
Պաշտպանը և ամբաստանյալը մոռանում են այն հանգամանքը, որ Խ.Տիգրանյանը գործել է ոչ թե թմրանյութ ձեռք բերողի՝ Ա.Ղուկասյանի շահերից ելնելով, այլ ավելին, ինքն է նրան շահագրգռել, որ հատկապես իրենից թմրանյութ ձեռք բերի, առաջարկելով նույնիսկ զեղջ, որ 20 գլանակ գնելու դեպքում կպահանջի ոչ թե 400.000, այլ՝ 380.000 դրամ։ Մտացածին է նաև այն հանգամանքը, թե իբր Ա.Ղուկասյանից գումարը վերցնելուց հետո որոշ ժամանակ հետո գումարը պետք է հետ վերադարձներ նրան և հայտներ, որ թմրանյութ չի «ճարել» մոռանալով, որ քրեական գործով ապացուցված է այն փաստը, որ նույն օրը՝ 16.08.2011թ. երբ առաջին անգամ հանդիպել են Խ.Տիգրանյանը և Ա.Ղուկասյանը, վերջինս ցանկացել է ձեռք բերել 280.000 ՀՀ դրամին համարժեք քանակով թմրանյութ, սակայն Խ.Տիգրանյանր չի համաձայնվել և պնդել է, որ Ա.Ղուկասյանը գնա և բերի նաև մնացած 100.000 դրամը, պատճառաբանելով, որ իր կողմից նշված 720 գլանակ քանակից պակաս չի կարող վաճառել։ Ա.Ղուկասյանը ստիպված ետ է վերադարձել գյուղ, ճարել պահանջվող 100.000 դրամը և կրկին վերադարձել ք.Երեան՝ Խ.Տիգրանյանին փոխանցելու համար։ Չգիտես ինչու անտեսելով նման էական նշանակություն ունեցող ապացույցները Խ.Տիգրանյանր նշել է, որ ինքը գիտենալով իր ընկերոջ՝ Ա.Ղուկասյանի, նյութական ծանր պայմանների մասին, որոշել էր 380.000 դրամը վերցնելուց հետո մի քանի օր պահել և ետ վերադարձնել նրան, մինդեռ ոչինչ նրան չէր խանգարում, որպիսի նա 16.08.2011թ. առաջին անգամ հանդիպման ժամանակ Ա.Ղուկասյանից վերցներ 280.000 դրամը, և ընկերոջը, որն ըստ իրեն գտնվում էր ծանր նյութական վիճակի մեջ, Երևանից նորից ետ չուղարկեր Արարատի մարզ գյուղ Այգեվան, որը նույնպես ենթադրում է հավելյալ նյութական ծախսեր /գնալ և ետ գալ շուրջ 160 կմ/։
Վերլուծելով վերոգրյալը և քրեական գործով ձեռք բերված ապացույցները գտնում եմ, որ վերաքննիչ բողոքում արծարծված հարցերը մտացածին են, իրականությանը չեն համապատասխանում, նպատակ են հետապնդում իրականությունը խեղաթյուրելով մեղմացնել Խ.Տիգրանյանի պատիժը ե պատասխանատվությունը։ Հիմնավորված է, որ Խ.Տիգրանյանը հետապնդել է անձնական շահ և փորձել թմրանյութ իրացնել, որն ավարտին չի հասցրել անկախ իր կամքից։>>:

22. Ելնելով վերոգրյալից մեղադրող Կ.Հարությունյանը խնդրել է ամբաստանյալ Խ.Տիգրանյանի և նրա պաշտպան Մ.Վարդանյանի վերաքննիչ բողոքն ամբողջությամբ մերժել` անհիմն լինելու պատճառաբանությամբ և առաջին ատյանի դատարանի դատավճիռը թողնել օրինական ուժի մեջ:

ՎԵՐԱՔՆՆԻՉ ԴԱՏԱՐԱՆԻ ՊԱՏՃԱՌԱԲԱՆՈՒԹՅՈՒՆՆԵՐՆ ՈՒ ԵԶՐԱՀԱՆԳՈՒՄԸ

Վերաքննիչ դատարանը, վերաքննիչ բողոքում նշված հիմքերի և հիմնավորումների սահմաններում վերանայելով դատավճիռը, լսելով ամբաստանյալի և պաշտպանի` բողոքում բերված փաստարկները, բողոքի դեմ արտահայտված մեղադրողի պատասխանը, ուսումնասիրելով և գնահատության ենթարկելով գործով ձեռք բերված ապացույցները, հանգում է այն հետևության, որ ամբաստանյալ Խ.Տիգրանյանի և պաշտպան Մ.Վարդանյանի վերաքննիչ բողոքը պետք է մերժել և առաջին ատյանի դատարանի դատավճիռը թողնել օրինական ուժի մեջ` հետևյալ պատճառաբանությամբ.

Ամբաստանյալ Խաչիկ Սասունի Տիգրանյանի
դիրքորոշումն առաջադրված մեղադրանքի նկատմամբ

23. Ամբաստանյալ Խաչիկ Տիգրանյանն առաջին ատյանի դատարանում, դատաքննության ընթացքում ՀՀ քրեական օրենսգրքի 268-րդ հոդվածի 2-րդ մասի 2-րդ կետով առաջադրված մեղադրանքում իրեն մեղավոր է ճանաչել, իսկ ՀՀ քրեական օրենսգրքի 34-266-րդ հոդվածի 1-ին մասով առաջադրված մեղադրանքում իրեն մեղավոր չի ճանաչել և ցուցմունք է տվել այն մասին, որ ինքը Արտակ Ղուկասյանին թմրամիջոց վաճառելու մտադրություն չի ունեցել: Ինքն ու Արտակը եղել են ընկերներ: Արտակն իրեն նախկինում տեսել է թմրամիջոց օգտագործած վիճակում, և իրենց միջև բազմիցս խոսակցություններ են եղել թմրամիջոց ձեռք բերելու մասին, իսկ ինքը նրան ասել է, որ հնարավորություն չունի և ոչնչով չի կարող օգնել: Արտակն իրեն խնդրել է նրա համար թմրամիջոց ձեռք բերել, սակայն ինքը նրան մերժել է` հորինելով տարբեր պատճառաբանություններ: Մասնավորապես, ինքը պատճառաբանել է, թե թմրամիջոցը վաճառում են առնվազն 20 գլանակով` յուրաքանչյուրը 20.000 ՀՀ դրամ, որպեսզի գումարի չափը մեծ լինի, և նա չկարողանա այդքան վճարել: 2011 թվականի օգոստոսի 16-ին ինքն ու Արտակը երկու անգամ հանդիպել են: Առաջին անգամ Արտակը գնացել է իր ծառայության վայր և խնդրել նրա համար թմրամիջոց ձեռք բերել, սակայն ինքը նրան պատասխանել է, որ հնարավոր չէ` պատճառաբանելով, որ նրա մոտ եղած գումարը քիչ է: Դրանից հետո Արտակը գնացել է գումար հայթայթելու: Այնուհետև Արտակը զանգահարել է իրեն, և իրենք պայմանավորվել են հանդիպել: Նույն օրը` ժամը 21:00-21:30-ի սահմաններում, ինքն ու Արտակը հանդիպել են «Մեցո» սրճարանի մոտ: Այդ ժամանակ ինքը նստել է Արտակի մեքենան և նրան ասել, որ չի կարող թմրամիջոց ձեռք բերել, քանի որ թմրամիջոց բերող անձը` Ալին, չի զանգահարել: Արտակն առաջարկել է գումարը թողնել իր մոտ, որպեսզի նա չծախսի: Այդ ժամանակ Արտակը 20 գլանակ թմրամիջոց գնելու համար բերել է 380.000 ՀՀ դրամ: Ինքն այդ գումարը ցանկացել է Արտակից վերցնել նրա խնդրանքով, սակայն պետք է հետո այն վերադարձներ նրան և ասեր, որ չի կարողացել թմրամիջոց ձեռք բերել, քանի որ ինքը մտադրություն չի ունեցել նրան թմրամիջոց տալ: Այնուհետև` փողը հաշվելու պահին, երբ գումարի կեսն իր մոտ է եղել, իսկ մյուս մասը` Արտակի, իրենց բռնել են: Եթե ինքը ցանկանար Արտակին թմրամիջոց տալ, ապա մինչ իրենց բռնելն ինքն այն կտար: Իր մոտ եղած 30 փաթեթ թմրամիջոցն ինքը ձեռք է բերել Ալիից, ով 2011 թվականի օգոստոսի 16-ին Հայաստանում չի եղել: Այդ թմրամիջոցն ինքը ձեռք է բերել իր անձնական օգտագործման համար: Ոստիկաններն իրենց բռնել են 2011 թվականի օգոստոսի 16-ին` ժամը 21:30-ի սահմաններում, որից հետո ինքն ազատության մեջ չի եղել: Ոստիկաններն իրեն տարել են ՀՀ ոստիկանության Քանաքեռ-Զեյթունի բաժին, որից մոտ մեկուկես ժամ անց զննել են, հետո ինքն անձամբ` իր ձեռքով բացել է մեքենայի դուռը, և ոստիկանները սկսել են մեքենան խուզարկել: Իր ներկայությամբ իր մեքենայից հայտնաբերվել է 30 փաթեթ թմրամիջոց: Իր նկատմամբ ՀՀ ոստիկանության Քանաքեռ-Զեյթունի բաժնի ոստիկանապետն ու նրա տեղակալը բռնություն են գործադրել:
Ամբաստանյալ Խաչիկ Տիգրանյանն առաջին ատյանի դատարանում դատաքննության ընթացքում` 2012 թվականի հունիսի 14-ին լրացուցիչ ցուցմունք է տվել այն մասին, որ 2011 թվականին ինքը պարբերաբար հանդիպել է Ալիին, ով իրեն թմրամիջոց է հյուրասիրել, ինչից հետո ինքը սկսել է նրանից գնել թմրամիջոց: Ալիին վերջին անգամ ինքը տեսել է 2011 թվականի հուլիսին: Այդ ժամանակ Ալին իրեն ասել է, որ Հայստանից գնում է և 30 փաթեթ թմրամիջոց ունի, որը ցանկանում է վաճառել: Ինքը նպատակ չի ունեցել 30 փաթեթ գնելու, քանի որ իրեն այդքանն անհրաժեշտ չի եղել, սակայն 500.000 ՀՀ դրամ վճարելով` ինքը գնել է այն: Ինքը ոչ ոքի հետ թմրամիջոց չի գործածել: Ինքն Արտակին ճանաչում է երկար ժամանակ, իրենք համագյուղացիներ են և ընկերություն են արել: 2007 թվականից սկսած ինքն ու Արտակը հաճախ են հանդիպել և միասին բիզնեսով զբաղվել: Այդ հանդիպումների ժամանակ Արտակը հասկացել է, որ ինքը թմրամիջոց է օգտագործում և սկսել է իրենից թմրամիջոց ուզել, սակայն ինքը չի ցանկացել նրան թմրամիջոց տալ, և տարբեր պատճառաբանություններ հորինելով` ասել է, որ չունի: Դրանից հետո Արտակն իրեն խնդրել է հնարավորության դեպքում նրա համար նույնպես թմրամիջոց գնել, սակայն ինքը մերժել է: Ինքը չի ցանկացել, որպեսզի նա կարծի, թե ինքը նրա համար ոչինչ չի ուզում անել կամ խաբում է, քանի որ այդ դեպքում իրենց բիզնեսի ծրագիրը չէր իրականանա: 2011 թվականի օգոստոսին նա եկել է իր ծառայության վայր և իրեն առաջարկել մոտը եղած գումարը տալ` թմրամիջոց գնելու համար: Քանի որ ինքը տեղյակ է եղել նրա ֆինանսական խնդիրների մասին (նրա հայրն ու մայրը վատառողջ են եղել, ու նա հիվանդանոցի հետ կապված պարտքեր է ունեցել, մեքենայի վերանորոգման համար մոտ 4.000 ԱՄՆ դոլար ծախսած է եղել), ուստի որոշել է թանկ գին ասել` մեկ գլանակի համար 20.000 ՀՀ դրամ, որպեսզի նա չհամաձայնվեր: Սակայն Արտակը համաձայնել է մեկ գլանակի համար վճարել 20.000 ՀՀ դրամ, որից հետո ինքը նրան ասել է, որ պետք է առնվազն 20 հատ գնի, ինչին նա նորից համաձայնվել է: Դեպքի օրն ինքը գնացել է Երևան քաղաքի Իսահակյան փողոցի վրա գտնվող սրճարան: Արտակը, առանց որևէ պայմանավորվածության, եկել ու զանգահարել է իրեն: Այդ ժամանակ ինքը մոտեցել է Արտակի մեքենային և նրան հրավիրել սրճարան, սակայն Արտակը չի համաձայնել և խնդրել է, որպեսզի ինքը նստի նրա մեքենան: Ինքը նստել է նրա մեքենան, և նա սկսել է գումարը հաշվել: Այդ ժամանակ ինքը նրան ասել է, որ եթե այդ մարդը (կոնկրետ անձի մասին խոսք չի եղել, քանի որ այդպիսին չի էլ եղել) չի զանգահարել, հավանաբար թմրամիջոցը չի լինի: Այդ ընթացքում Արտակը գումարը հաշվել է ու ասել, որ այն 380.000 ՀՀ դրամ է` խնդրելով իրեն 20.000 ՀՀ դրամ ավելացնել, որը նա իրեն կվերադարձնի հաջորդ օրը: Ինքն Արտակին պատասխանել է, որ դժվար թե կկարողանա թմրամիջոց ձեռք բերել, ինչին նա պատասխանել է, որ չլինելու դեպքում կարող է վերադարձնել այդ գումարը: Այդ պահին իրենց ձերբակալել են և տարել ոստիկանության բաժին: Ինքը համոզված է եղել, որ Արտակի համար չի կարող թմրամիջոց ձեռք բերել: Ինքն ընդամենը փորձել է Արտակին չնեղացնել և ցուցադրել նրան, թե ինքը ցանկանում է ինչ-որ բան անել: Այդ առումով ինքն Արտակին խաբել է: Վերջին անգամ ինքը Ալիից 30 փաթեթ թմրամիջոց ձեռք բերելու համար վճարել է 500.000 ՀՀ դրամ: Իր կողմից լրացուցիչ ցուցմունք տալու իմաստն այն է, որ ինքը կասկածել է Արտակին` այն պատճառով, որ նա ցանկացել է մեկ գլանակ թմրամիջոցը գնել 20.000 ՀՀ դրամով: Արտակը ոստիկանությունում ընկերներ է ունեցել: Պատժի վախից ինքն Արտակին թմրամիջոց չէր իրացնի, իսկ եթե օրենքը թույլատրեր, գուցե աներ: Իրեն արգելանքի վերցնելու պահից հետո իրենց մեքենային ուղեկցել է ճանապարհային ոստիկանության մեքենան, և մոտ 10 րոպե անց իրենք եղել են ոստիկանության բաժնում: Այդ ժամանակ անձրև և խցանում չի եղել: Իր մեքենայում գաղտնարան չի եղել: Իր մեքենան զննելու ժամանակ ինքը ներկա է գտնվել: ՀՀ ոստիկանության բաժնում ինքը ճիշտ չի գրել: Ինքը գրել է այն, ինչ իրեն թելադրել են ոստիկանությունում:
Ամբաստանյալ Խաչիկ Տիգրանյանը առաջին ատյանի դատարանում դատաքննության ընթացքում` 2012 թվականի հուլիսի 10-ին լրացուցիչ ցուցմունք է տվել այն մասին, 2011 թվականի օգոստոսի 16-ին, երբ Արտակը զանգահարել է իրեն, ինքն իր զինծառայակից ընկերոջ` Արման Սաղաթելյանի հետ, գտնվել է սրճարանում: Այդ ժամանակ ինքն անջատել է հեռախոսը և նեղվելով` Արման Սաղաթելյանին պատմել, որ Արտակին խաբում է ու չգիտի, թե ինչ անի: Ինքն Արման Սաղաթելյանին ասել է, որ եթե նույնիսկ գումարը վերցնի, ապա թմրամիջոց չի տա: Նախաքննության և դատաքննության ժամանակ այդ մասին չի նշել, քանի որ կարծել է, որ դա նշանակություն չի կարող ունենալ: Եթե իրեն 5 րոպե ուշ ձերբակալեին, ապա հնարավոր է, որ ինքն այդ գումարը չվերցներ: Դատական քննության ընթացքում հրապարակված գաղտնալսման ձայնագրություններն իր և Արտակի խոսակցություններն են: Այդ խոսակցությունը եղել է մեքենայի անվադողերի մասին: Ինքը նրա հետ խոսելիս հասկացել է, որ նա գալիս է ու գումար է բերում թմրամիջոցի համար:

Ամբաստանյալ Խաչիկ Սասունի Տիգրանյանին
առաջադրված մեղադրանքի հիմնավորվածությունը
և մեղադրական դատավճռի հիմքում դրված ապացույցները


24. Առաջին ատյանի դատարանն ամբաստանյալ Խաչիկ Սասունի Տիգրանյանին առաջադրված մեղադրանքը հաստատված է համարել հետևյալ ապացույցներով.
<<Ամբաստանյալ Արտակ Ղուկասյանը դատական քննության ընթացքում ՀՀ քրեական օրենսգրքի 34-268-րդ հոդվածի 1-ին մասով առաջադրված մեղադրանքում իրեն մեղավոր է ճանաչել և հրաժարվել է ցուցմունք տալ, սակայան հարցերին պատասխանել է, որ Խաչիկ Տիգրանյանի հետ համագյուղացի, մանկության ընկերներ են:
Ինքը օգտագործում է թմրամիջոց: Խաչիկի կողմից թմրամիջոց օգտագործելու մասին ինքը տեղեկացել է այն ժամանակ, երբ հանդիպել են` 2011 թվականի օգոստոսի 16-ից մոտ 15-20 օր առաջ: Այդ ժամանակ ինքը հասկացել է, որ Խաչիկը թմրամիջոց օգտագործած է եղել: Այժմ իրեն հասկանալի է, որ Խաչիկը չի ցանկացել իր համար թմրամիջոց ձեռք բերել: 2011 թվականի օգոստոսի 16-ին` Խաչիկի հետ առաջին հանդիպման ժամանակ, իր մոտ եղել է 200.000 ՀՀ դրամ, իսկ հետո, երբ նա իրեն ասել է, որ չի լինի, գումարը և քանակը պետք է շատ լինեն, ինքը հասկացել է, որ նա չի ուզում իր համար թմրամիջոց ձեռք բերել, այլ պարզապես չի ցանկացել նեղացնել իրեն: Այնուհետև ինքը գումար է հայթայթել, զանգահարել է նրան, հանդիպել են ու գումարը` 380.000 ՀՀ դրամը, տվել է նրան` թմրամիջոց լինելու դեպքում գնելու պայմանով: Իր կողմից գումարը հայթայթելուց հետո զանգել է նրան ու ասել, որ ցանկանում է հանդիպել, սակայն չի ասել, որ գումարն է տանում: Ինքը հեռախոսով տեղեկացել է նրա գտնվելու վայրի մասին և գնացել այնտեղ: Իրենք հեռախոով հիմնականում թմրամիջոցի մասին չեն խոսել: Ինքը կարողացել է գումար հայթայթել, որը տվել է նրան: Նախնական քննության ժամանակ իրեն չեն ստիպել, որպեսզի ցուցմունք գրի, և տված ցուցմունքներն իր մտքերն են: Նախնական քննության ընթացքում տված ցուցմունքը հրապարակելուց հետո Արտակ Ղուկասյանը հայտնեց, որ հրաժարվում է այդ ցուցմունքներից, քանի որ ոստիկանությունում իրեն ասել են, որ Խաչիկին բռնել են` իրեն խաբելով և համոզելով, թե ինքը պետք է գրի, որպեսզի գնա տուն: Քննիչն իրեն չի ստիպել ցուցմունք տալ, այլ համոզել է գրել ճշմարտությունը, սակայն ինքը ստել է` գրելով այն, ինչ գրել է ոստիկանությունում և մտածելով, որ իրեն բաց կթողնեն:
Ամբաստանյալ Արտակ Ղուկասյանը նախնական քննության ընթացքում` 2011 օգոստոսի 19-ին, ցուցմունք է տվել այն մասին, որ համաձայն չէ իրեն առաջադրված մեղադրանքի հետ այն մասով, որ 2011 թվականի օգոստոսի 16-ին ինքը փորձել է ձեռք բերել մարիխուանա տեսակի թմրամիջոց այն իրացնելու նպատակով, քանի որ ինքը հակում է ունեցել թմրամիջոց գործածելու և ցանկացել է թմրամիջոցը ձեռք բերել իր ծխելու համար: Խաչիկ Տիգրանյանին ճանաչում է մանկուց` որպես իր համագյուղացի, ով ներկայում բնակվում է Երևանում, սակայն հաճախակի գալիս է գյուղ: Մոտ մեկ տարի է, որ ինքը ծխելու միջոցով օգտագործում է կանեփի տերևներից պատրաստված թմրամիջոց: Ինքը գյուղի դաշտերում վայրի աճած կանեփի թփից տերևներ է քաղել, չորացրել և ծխել: Ինքը տանը կամ մեքենայում թմրամիջոց չի պահել, միայն օգտագործել է: Օգտագործել է ամիսը մի քանի անգամ: 2011 թվականի հուլիսի վերջին կամ օգոստոսի սկզբին` ժամը 12:00-ի սահմաններում, գյուղի կենտրոնական մասում պատահաբար հանդիպել է Խաչիկ Տիգրանյանին: Նրա հետ խոսակցության ընթացքում նա իրեն հայտնել է, որ լսել է իր թմրամիջոց ծխելու մասին, կարող է արդյոք ցանականա լավ որակի մարիխուանա ձեռք բերել: Նա ասել է, որ չգիտի, թե այդ «պլանը» տեղական է, թե` ոչ, բայց լավն է, և վաճառում են: Նա առաջարկել է իր ցանկությամբ իր համար գնել նշված թմրամիջոցից, բայց չի ասել, թե ով է վաճառում և որտեղ: Խաչիկն ասել է, որ այդ թմրամիջոցով լցված ծխախոտի մեկ գլանակը կարող է գնել 20.000 ՀՀ դրամով: Ինքը ցանկություն է հայտնել 7 գլանակ թմրամիջոց գնել, սակայն ասել է, որ գումարը կտա մի քանի ժամից: Խաչիկը որպես ճանապարհածախս իրենից պահանջել է 10.000 ՀՀ դրամ: Դրանից հետո ինքը տանից վերցրել է 150.000 ՀՀ դրամ և նույն օրը` ժամը 18:00-ի սահմաններում, գնացել է իրենց գյուղի կենտրոն և նրանց տանից մոտ 100 մետր հեռավորության վրա սպասել Խաչիկին: Երբ նա մոտեցել է, ինքը նրան գաղտնի, առանց որևէ մեկի ներկայության, տվել է 150.000 ՀՀ դրամ: Նա վերցրել է իր հեռախոսահամարը (077-11-18-37), որպեսզի հաջորդ օրը զանգի ու իրեն տա 7 գլանակ թմրամիջոց: Դրանից երկու օր հետո` ժամը 15:00-ի սահմաններում, Խաչիկը զանգահարել է իրեն և ասել, որ ապրանքը մոտն է, և ինքը կարող է գնալ Երևան ու վերցնել այն: Նույն օրն ինքն ու Խաչիկը հանդիպել են բուսաբանական այգու մոտ, որտեղ նա իրեն տվել է 7 գլանակ թմրամիջոց: 2011 թվականի օգոստոսի 16-ին` ժամը 11:00-12:00-ի սահմաններում, իրեն զանգահարել է Խաչիկը և նորից առաջարկել թմրամիջոց գնել, ինչին ինքը համաձայնվել է: Նա ասել է, որ այդ անգամ քիչ քանակությամբ չի լինի, պետք է գոնե 20 հատ գնի: Ինքն ասել է, որ այդքան գումար չունի, կարող է 280.000 ՀՀ դրամ տալ, ինչին նա չի համաձայնվել: Ինքն ասել է, որ կփորձի հայթայթել 20 հատի գումար, որը, նրա ասելով, այդ անգամ զեղչով կկազմեր 380.000 ՀՀ դրամ: Մեկ ժամ հետո Խաչիկը նորից զանգահարել է 095-52-00-00 համարով և հարցրել է, թե արդյոք ինքը գումարը ճարել է, ինչին ինքը բացասական պատասխան է տվել` ասելով, որ քիչ անց կհանդիպի նրան աշխատավայրում: Ինքն իր մեքենայով գնացել է նրա աշխատավայր, որտեղ Խաչիկը չի համաձայնել 280.000 ՀՀ դրամի չափով տալ թմրամիջոց և ասել, որ ինքը գնա այն ժամանակ, երբ հայթայթի գումարը: Դրանից հետո ինքը վերադարձել է գյուղ, տանից վերցրել ևս 100.000 ՀՀ դրամ և եկել Երևան: Երբ ինքը տանից շարժվել է դեպի Երևան, կրկին զանգահարել է Խաչիկին և ասել, որ գալիս է, որի ընթացքում նա կրկին հարցրել է, թե արդյոք ճարել է 380.000 ՀՀ դրամ ու ասել, որ անպայման պետք է «20 պագրիշկա» վերցնի` ի նկատի ունենալով իրենց պայմանավորված թմրամիջոցով գլանակները: Հավանաբար նա մտածել է, որ նրա հեռախոսը կարող են լսել: Ժամը 22:00-ի սահմաններում ինքը կրկին զանգահարել է Խաչիկին և հարցրել նրա գտնվելու վայրը: Ինքը գնացել է Խաչիկի նշած վայրը, որտեղ նա նստել է իր մեքենան: Այդ ժամանակ ինքը նրան ասել է, որ կտա 380.000 ՀՀ դրամ 20 գլանակի համար և, հանելով գումարը, հաշվել է այն ու տվել Խաչիկին, որպեսզի նա իրեն 20 գլանակ թմրամիջոց տա: Այդ ժամանակ Խաչիկն ասել է, որ այդ օրը չի լինի, հաջորդ օրը կամ մյուս օրը նա կզանգահարի իրեն և կպայմանավորվեն: Ինքը համաձայնվել է ու նրա իջնելու պահին իրենց բռնել են ոստիկանները և տարել ՀՀ ոստիկանության Քանաքեռ-Զեյթունի բաժին:
Ամբաստանյալ Արտակ Ղուկասյանը նախնական քննության ընթացքում` 2011 օգոստոսի 25-ին, ցուցմունք է տվել այն մասին, որ, բացի իր նշած երկու դեպքից, երբ մի անգամ Խաչիկն իրեն 7 գլանակ թմրամիջոց է վաճառել և երբ 20 գլանակ գնելու նպատակով նրան 380.000 ՀՀ դրամ է տվել, այլ անգամներ նա իրեն թմրամիջոց չի տվել, բացառությամբ առաջին դեպքից, երբ նա իրենց գյուղում առաջարկել է թմրամիջոց գնել և այդ պահին նա իրեն տվել է թմրամիջոցով կիսատ լցված մի գլանակ, որպեսզի ինքը փորձի և հավանելու դեպքում, գնի: Ինքն այդ գլանակը ծխել է միայնակ, գյուղի տարածքից դուրս` գերեզմանների հատվածում, և քանի որ այն իրեն դուր է եկել, Խաչիկին երեկոյան տվել է 150.000 ՀՀ դրամ: Ինքը որևէ մեկին չի խոստացել և չի առաջարկել թմրամիջոց հյուրասիրել, ոչ ոքից գումար չի վերցրել, և Խաչիկին տված 150.000 և 380.000 ՀՀ դրամ գումարները պատկանել են իրեն: Ինքն ընդհանրապես իր կյանքում ոչ ոքի թմրամիջոց չի տվել և բոլորից թաքցրել է իր կողմից թմրամիջոց օգտագործելու հանգամանքը: Ինքը ցանկացել է 20 գլանակ գնել, քանի որ Խաչիկն իրեն ասել է, որ 20 գլանակից պակաս չի լինի, նույնիսկ չի համաձայնվել 280.000 ՀՀ դրամի դիմաց թմրամիջոց տալ: Ինքը պետք է գներ 20 գլանակ, այլ ոչ թե փաթեթ: Մեքենայում գումարը Խաչիկին տալու ժամանակ նա ասել է, որ թմրամիջոցն այդ օրը չի տալու, այլ հաջորդ օրը կամ երկու օր անց: Երբ իրենց տարել են ՀՀ ոստիկանության Քանաքեռ-Զեյթունի բաժին, և ինքն իմացել է, որ Խաչիկի մեքենայից թմրամիջոց են հայտնաբերել, զարմացել ու հասկացել է, որ Խաչիկն իրեն խաբել է` ասելով, որ իր մոտ թմրամիջոց չկա: Իրեն հայտնի չէ, թե որտեղից է Խաչիկ Տիգրանյանը թմրամիջոց ձեռք բերել, այդ մասին նա իրեն ոչինչ չի ասել, նրա հետ որևէ անգամ այլ անձանց չի տեսել: Խաչիկի տված թմրամիջոցը շատ քիչ է տարբերվել մինչ այդ իր օգտագործած թմրամիջոցներից: Ինքը զբաղվում է գյուղատնտեսությամբ և իր եկամուտը ստանում է այգեգործությունից ու հողագործությունից, ունի ընկերներ, ովքեր բոլորը ոստիկանության աշխատակիցներ են, բայց հիմնականում ժամանակ չի ունենում նրանց հետ շփվելու, քանի որ զբաղված է հողագործությամբ:
Վկա Պավել Օրդյանը դատական քննության ընթացքում ցուցմունք է տվել այն մասին, որ ինքն աշխատել է ՀՀ ոստիկանության Քանաքեռ-Զեյթունի բաժնում` որպես ավագ օպեր լիազոր: Իրենք թմրամիջոց իրացնելու պահին Խաչիկի Տիգրանյանին բռնել և բերման են ենթարկել ՀՀ ոստիկանության բաժին: Իրենք Խաչիկի մեքենայից հայտնաբերել են թմրամիջոց, իսկ նրա մոտից` Արտակից վերցրած այն գումարը, որի դիմաց նա պետք է վաճառեր թմրամիջոց: Խաչիկի մեքենան եղել է «Մերսեդես» մակնիշի` մուգ կապույտ, սակայն բռնելու պահին նա եղել է Արտակի մեքենայում: Խաչիկի մեքենայի բեռնախցիկից հայտնաբերել են տուփի մեջ դասավորած, թղթի մեջ փաթաթած, (փաթեթները եղել են տարբեր քաշերի` 2, 3 գրամ), որքան հիշում է` մոտ 35 փաթեթ թմրամիջոց, իսկ Խաչիկի մոտից հայտնաբերվել է ավելի քան 400.000 ՀՀ դրամ, որից 380.000 ՀՀ դրամը, համաձայն Խաչիկի և Արտակի հայտարարությունների, տվել էր Արտակը` 20 փաթեթ թմրամիջոց ձեռք բերելու համար: Ինքը բերման ենթարկելու կոնկրետ ժամը չի կարող ասել, սակայն այդ ժամանակ եղել է մութ: Բերման են ենթարկել Իսահակյան փողոցից: Այդ ժամանակ եղանակը եղել է անձրևոտ, և ճանապարհները եղել են խցանված, որի պատճառով իրենք դանդաղ են գնացել և մինչև ոստիկանության բաժին հասնելը բավականին ժամանակ է անցել: Արձանագրությունը կազմվել է ոստիկանության բաժնում:
Վկա Արման Քոչարյանը դատական քննության ընթացքում ցուցմունք է տվել այն մասին, որ աշխատում է որպես ոստիկան: Խաչիկ Տիգրանյանի ավտոմեքենայի զննության ժամանակ բեռնախցիկից հայտնաբերվել է թմրամիջոց: Եթե չի սխալվում, ինքը միայն կազմել է ավտոմեքենայի զննության արձանագրությունը, իսկ բերման ենթարկելուց ինքը չի եղել: Թմրամիջոցը կոնկրետ եղել է ավտոմեքենայի բեռնախցիկում` պոլիէթիլենային տոպրակների մեջ փաթեթավորված թղթերով:
Ընդհանուր եղել է 30 փաթեթ, իսկ քաշը, որքան հիշում է` մոտ 66 գրամ: Որպես կանոն մեքենայի զննության ժամանակ բոլոր մասերն էլ նայում են` դիմացը, սրահը, փոխանցման տուփի մոտ, բեռնախցիկը, սրահի խցիկը, արևապաշտպան վահանակը և այլն: Եթե հանձնարարվեր խուզարկություն կատարել, ապա կքանդեր նաև մեքենայի շարժիչը, անվադողերն ու մնացած բոլոր մասերը: Բերման ենթարկելու ժամանակ ինքը ներկա չի եղել, բայց չի կարող հիշել` արձանագրությունում իր անունը նշված է, թե` ոչ: Թմրամիջոցը հայտնաբերելուց հետո, ընթերակաների և Խաչիկի ներկայությամբ, ոստիկանության բաժնի առաջին հարկում, լուսավոր պայմաններում, այն կշռել են էլէկտրական կշեռքով: Կշիռն իրենց մոտավորապես հայտնի է դարձել կշռելուց հետո:
Վկա Տիգրան Տիգրանյանը դատական քննության ընթացքում ցուցմունք է տվել այն մասին, որ Խաչիկին և Արտակին բերման են ենթարկել ոստիկանության բաժին` թմրամիջոց իրացնելու կասկածանքով, որին ինքը ներկա է եղել: Չի կարող հիշել ժամը և այն, թե որքան ժամանակում են հասել ոստիկանության բաժին, մութ է եղել, օրն` անձրևոտ, և խցանումներ են եղել: Իր մասնակցությամբ կատարված` Խաչիկ Տիգրանյանի մեքենայի զննությամբ հայտնաբերվել է թմրամիջոց, ինչն արձանագրվել է ընթերակաների մասնակցությամբ:
Վկա Արման Սաղաթելյանը դատական քննության ընթացքում ցուցմունք է տվել այն մասին, որ դեպքի օրը` 2012 թվականի օգոստոսի 16-ին, ինքը Խաչիկ Տիգրանյանի հետ հանդիպել է «Մեցո» սրճարանում: Այդ ժամանակ Խաչիկի բջջային հեռախոսին անընդհատ զանգեր են եկել, իսկ նա եղել է շփոթված և զայրացած: Ինքը նրան հարցրել է, թե ինչ է պատահել, ինչին ի պատասխան` նա ասել է, որ մի ընկեր իրեն գումար է տվել` «ծխելու բան» (թմրամիջոց) գնելու համար: Ինքը զարմացել է, նախատել Խաչիկին, հարցրել, թե արդյոք նա զբաղվում է այդպիսի բաներով, իսկ նա բացասական պատասխան է տվել և, դուրս գալով սրճարանից, ասել է, որ կվերադառնա և կպատմի: Դրանից 5 րոպե անց` ժամը 22:00-ի սահմաններում, ոստիկանները եկել ու սեղանի մոտից իրեն ձերբակալել ու տարել ՀՀ ոստիկանության Քանաքեռ-Զեյթունի բաժին: Չի կարող ասել, թե որքան ժամանակ է տևել մինչև ոստիկանություն հասնելը, հավանաբար` 10-15 րոպե կամ ավելի քիչ: Ինքն ամբողջ գիշեր եղել է ՀՀ ոստիկանության Քանաքեռ-Զեյթունի բաժնում, այնուհետև իրեն տարել են զինվորական դատախազություն, որտեղ հարցաքննել են ու ժամը 12:00-13:00-ի սահմաններում բաց թողել: Նախնական քննության ընթացքում տված ցուցմունքը հրապարակելուց հետո վկան պատասխանեց, որ իր հիշելով, առաջին հեռախոսազանգին Խաչիկը չի պատասխանել, իսկ հետո, երբ նա պատասխանել է երկրորդ զանգին, նա իր տված հարցին պատասխանել է, որ «ծխելու բան» է պետք: Ինքն այդ ժամանակ չի մտածել, որ նրան թմրամիջոց է պետք եղել, քանի որ նա թմրամիջոց չի շեշտել, իսկ հետո, երբ ոստիկանության բաժնում ինքը տեղեկացել է իրենց ձերբակալման պատճառի մասին, հասկացել է նրա ասածի իմաստը: Սրճարանում ինքը Խաչիկին հարցրել է, թե ծխելու հետ նա ինչ կապ ունի, որ փող է վերցրել կամ փող պետք է տա ու հաճախ զանգահարում են, իսկ նա այդ ժամանակ, պատասխանելով հեռախոսազանգին, խոսելով դուրս է եկել սրճարանից:
Վկա Արման Սաղաթելյանը նախնական քննության ընթացքում ցուցմունք է տվել այն մասին, որ Խաչիկ Տիգրանյանին ճանաչում է դեռևս ժամկետային զինվորական ծառայություն անցկացնելու ժամանակից: Զինվորական ծառայությունից հետո սկզբնական շրջանում ինքն ու Խաչիկ Տիգրանյանն ավելի հաճախ են շփվել: 2011 թվականի հուլիսի 25-ից մինչև օգոստոսի 15-ն ինքը եղել է ՌԴ-ում: ՌԴ-ից վերադառնալուց հետո` 2011 թվականի օգոստոսի 16-ին, ինքը զանգահարել է իր ընկեր Խաչիկ Տիգրանյանի 095-52-00-00 հեռախոսահամարին և առաջարկել հանդիպել: Նույն օրը` ժամը 21:00-21:20-ի սահմաններում, ինքն ու Խաչիկը հանդիպել են Իսահակյան փողոցում գտնվող «Մեցո» սրճարանում: Երբ մատուցողը կոնյակով բաժակները բերել է, այդ ժամանակ Խաչիկի բջջային հեռախոսին զանգ է եկել և նա խոսելով հեռացել է սեղանից և այլևս չի վերադարձել: Դրանից 5-6 րոպե անց իրեն են մոտեցել զինվորական համազգեստով, դիմակներով և զինված մարդիկ (ինչպես հասկացել է` նրանք ոստիկանության աշխատակիցներ են) ու իրեն և իր մեքենան տարել Երևան քաղաքի ոստիկանության Քանաքեռ-Զեյթունի բաժին: Այնտեղ իրեն հարցաքննել են, որից հետո զննել են իր ավտոմեքենան: Ինքը երբևէ թմրամիջոց չի օգտագործել, ոչ մեկից, այդ թվում` Խաչիկ Տիգրանյանից, թմրամիջոց չի գնել և չի իրացրել:
Բերման ենթարկելու մասին 2011 թվականի օգոստոսի 16-ի արձանագրության համաձայն` 2011 թվականի օգոստոսի 16-ին` ժամը 23:30-ին, Խաչիկ Սասունի Տիգրանյանը թմրամիջոց ձեռք բերելու և իրացնելու կասկածանքով բերման է ենթարկվել ՀՀ ոստիկանության Քանաքեռ-Զեյթունի բաժին:
Բերման ենթարկելու մասին 2011 թվականի օգոստոսի 16-ի արձանագրության համաձայն` 2011 թվականի օգոստոսի 16-ին` ժամը 23:30-ին, Արտակ Մյասնիկի Ղուկասյանը թմրամիջոց ապօրինի ձեռք բերելու և իրացնելու կասկածանքով բերման է ենթարկվել ՀՀ ոստիկանության Քանաքեռ-Զեյթունի բաժին:
Ավտոմեքենան զննելու մասին 2011 թվականի օգոստոսի 16-ի արձանագրության համաձայն` 2011 թվականի օգոստոսի 16-ին` ժամը 23:50-ին, ՀՀ ոստիկանության Քանաքեռ-Զեյթունի բաժնի բակում զննության է ենթարկվել «Մերսեդես-Բենց Ե-280» մակնիշի 16ՕՍ919 պետհամարանիշի ավտոմեքենան: Վարորդի նստատեղի կողքի տուփից հայտնաբերվել է Խաչիկ Տիգրանյանին տրված` ՀՀ ոստիկանության թիվ 93166 վկայականը, թիվ UD018887 վարորդական իրավունքի վկայականը, Էդվարդ Հարությունյանին տրված թիվ SC065137 ավտոմեքենայի տեխնիկական անձնագիր, 8.000 ՀՀ դրամ, ռուսերեն գրառմամբ (Визин) դեղ` աչքի կաթիլ: Ավտոմեքենայի ձայնագրիչի տակի պահոցից հայտնաբերվել է 077-57-90-40 համարի բջջային հեռախոսաքարտը:
Ավտոմեքենայի բեռնախցիկից հայտնաբերվել է «Կոշիկի կենտրոն» գրառմամբ պոլիէթիլենային սպիտակ տոպրակ, որի մեջ եղել է կոշիկի ստվարաթղթե կարմիր տուփ, իսկ դրանում «Արզնի» գրառմամբ պոլիէթիլենային տոպրակ, որի մեջ եղել է տետրի թղթով փաթեթավորված 5 փաթեթ, որոնց մեջ` մոտ 13 գրամ քաշով մարիխուանա տեսակի թմրամիջոցի նման դեղնականաչավուն զանգված, ինչպես նաև տետրի թղթով փաթեթավորված 25 փաթեթ, որոնց մեջ եղել է մոտ 64,2 գրամ ընդհանուր քաշով մարիխուանա տեսակի թմրամիջոցի նման դեղնականաչավուն զանգված: Ըստ Խաչիկ Տիգրանյանի հայտարարության` հայտնաբերված դեղնականաչավուն զանգվածը հանդիսացել է մարիխուանա տեսակի թմրամիջոց, պատկանել է իրեն, որը քաղել է Արարատի մարզից: Հայտնաբերված դեղնականաչավուն զանգվածը փաթեթավորվել, կնքվել է, իսկ մնացածը` առգրավվել:
Ձերբակալման մասին 2011 թվականի օգոստոսի 17-ի արձանագրության համաձայն` 2011 թվականի օգոստոսի 17-ին` ժամը 05:30-ին, Խաչիկ Սասունի Տիգրանյանը ձերբակալվել է:
Ձերբակալման մասին 2011 թվականի օգոստոսի 17-ի արձանագրության համաձայն` 2011 թվականի օգոստոսի 17-ին` ժամը 06:00-ին, Արտակ Մյասնիկի Ղուկասյանը ձերբակալվել է:
Խուզարկություն կատարելու մասին 2011 թվականի օգոստոսի 18-ի արձանագրության համաձայն` խուզարկություն է կատարվել Ռուբինյանց փողոցի 19/2 շենքի 26-րդ բնակարանում, դրա օժանդակ շինություններում և թիվ 150 ավտոտնակում:
Խուզարկությամբ բնակարանից հայտնաբերվել և առգրավվել են կանաչ զանգված (թիվ 1 փաթեթ), 0,2 գրամ քաշով սերմնանման հատիկներ (թիվ 2 փաթեթ) և թիվ 150 ավտոտնակում գնտվող «ԳԱԶ-3110» մակնիշի 505ՕԼ01 ավտոմեքենայի բեռնախցիկում հայտնաբերված երեք տետր, որոնցից պակասել են թերթեր (թիվ 3, 4 և 5 փաթեթներ):
Փորձագետի 2011 թվականի օգոստոսի 17-ի թիվ 274-Ք եզրակացության համաձայն` փորձաքննության ներկայացված թվով 30 փաթեթում առկա ընդհանուր 68,48 գրամ հաստատուն քաշով նյութերը հանդիսանում են չորացված մարիխուանա տեսակի թմրամիջոց:
Փորձագետի 2011 թվականի օգոստոսի 24-ի թիվ 1168 եզրակացության համաձայն` Խաչիկ Տիգրանյանի մարմնական վնասվածքները` զույգ բազուկների, նախաբազուկների շրջանների արյունազեղումների ձևով, հասցվել են բութ, կոշտ առարկաներով, հնարավոր է` որոշման մեջ նշված ժամկետում, որոնք առողջության թեթև վնասի հատկանիշներ չեն պարունակում:
Փորձագետի 2011 թվականի օգոստոսի 29-ի թիվ 0665 եզրակացության համաձայն` 2011 թվականի օգոստոսի 18-ին Խաչիկ Սասունի Տիգրանյանից վերցված մեզի փորձանմուշում հայտնաբերվել են կանաբիսի խմբի թմրամիջոցների թմրալկալոիդները:
Փորձագետի 2011 թվականի օգոստոսի 29-ի թիվ 0666 եզրակացության համաձայն` 2011 թվականի օգոստոսի 18-ին Արտակ Մյասնիկի Ղուկասյանից վերցված մեզի փորձանմուշում հայտնաբերվել են կանաբիսի խմբի թմրամիջոցների թմրալկալոիդները:
Փորձագետի 2011 թվականի դեկտեմբերի 5-ի թիվ 36331106 եզրակացության համաձայն` փորձաքննությանը տրամադրված «EPOCH» ֆիրմայի արտադրության սկավառակի վրա առկա է «wav» ձևաչափի յոթ պանակ, որոնք հանդիսանում են ձայնագրված հեռախոսային խոսակցություններ: Հեռախոսային յուրաքանչյուր խոսակցությանը մասնակցում է երկու տղամարդ: Խոսակցություններն` առանձին-առանձին, ընթանում են առանց ընդհատումների: Խոսակցությունների մասնակից տղամարդկանց բանավոր խոսքերը (ձայները) պիտանի չեն նույնացմանն ուղղված հետազոտություններ անցկացնելու համար` անձն անհատականացնող հատկանիշների անբավարարության պատճառով: Հետևաբար և պարզել, թե խոսակցություններին մասնակցում են Խաչիկ Տիգրանյանը և Արտակ Ղուկասյանը, հնարավոր չէ:
Փորձագետի 2011 թվականի դեկտեմբերի 5-ի թիվ 36331106 եզրակացությանը կից հաշիվ-ապրանքագիր հանդիսացող հանձնման-ընդունման արձանագրության համաձայն` փորձաքննության համար վճարման ենթակա գումարը կազմում է 55.200 (հիսունհինգ հազար երկու հարյուր) ՀՀ դրամ:
Զննություն կատարելու մասին 2011 թվականի օգոստոսի 31-ի արձանագրության համաձայն` զննության են ենթարկվել.
1. ՀՀ ոստիկանության Քանաքեռ-Զեյթունի բաժնից ստացված ստվարաթղթե տուփը, որից հայտանբերվել և առգրավվել է 30 փաթեթ թմրամիջոց: Տուփը 30x14x10սմ չափերի է, կարմիր, բացվող կափարիչով, մի շարք հատվածներում անգլերեն գրառումներով:
2. պոլիէթիլենային սպիտակ տոպրակը, որի վրա կարմիր ֆոնին առկա է «Կոշիկի կենտրոն» գրվածքը:
3. 648.000 ՀՀ դրամը և 200 ԱՄն դոլարը: 648.000 ՀՀ դրամը բաղկացած է քսան 20.000 դրամանոց, տասնութ 10.000 դրամանոց, տասներկու 5.000 դրամանոց և ութ 1.000 դրամանոց թղթադրամներից: 200 ԱՄՆ դոլարը բաղկացած է երկու 100 ԱՄՆ դոլարանոց թղթադրամներից:
Զննությունից հետո 380.000 ՀՀ դրամն առանձնացվել և փաթեթավորվել է թիվ 1 փաթեթում, իսկ 268.000 ՀՀ դրամը և 200 ԱՄՆ դոլարը` մեկ այլ` թիվ 2 փաթեթում:
Ստվարաթղթե տուփը և պոլիէթիլենային տոպրակը փաթեթավորվել են թիվ 3 փաթեթում և կնիքվել:
Զննում կատարելու մասին 2011 թվականի սեպտեմբերի 26-ի արձանագրության համաձայն` զննության է ենթարկվել «EPOCH» ֆիրմայի էլեկտրոնային սկավառակ` նախատեսված 700 մեգաբայտ ծավալով տեղեկատվություն կրելու համար: Սկավառակի վրա առկա են եղել «5-835-11», «5-836-11» և «№82» գրառումները: Սկավառակի պարունակությունը զննելու համար այն տեղադրվել է «Պենտիում 4» տեսակի համակարգչում և միացվել է: Պարզվել է, որ դրանում առկա է 7 (յոթ) ձայնագրառում:
Ձայնագրառումներն առանձին-առանձին բացվել և տպագրվել են թղթերի վրա և կցվել արձանագրությանը: Տեղեկանքներում նշվել են խոսակցությունների ամսաթիվը, ժամանակը և տևողությունը, ինչպես նաև ընդհանուր բնույթի այլ տեղեկություններ:
Զննում կատարելու մասին 2011 թվականի սեպտեմբերի 26-ի արձանագրության մասը հանդիսացող հավելվածի համաձայն` 2011 թվականի օգոստոսի 16-ին` ժամը 11:10-ին, 095-52-00-00 (Խչո) և 077-11-18-31 (Արտակ) հեռախոսահամարների բաժանորդների միջև տեղի է ունեցել 1 րոպե 43 վայրկյան տևողությամբ, հետևյալ բովանդակությամբ խոսակցությունը.
Ա-Հազար բարև ախպեր ջան:
Խ-Բարլուս:
Ա-Ո՞նց ես:
Խ-Լավ:
Ա-Ի՞նչ ես անում, ախպեր:
Խ-Բան չէ, տունը: Էն օրը իրիկունը զանգեցի, մի ձևի էիր, ախպեր, արա: Ասի` հո բան-ման չի՞ եղել:
Ա-Չէ, հարմար չէր, ապեր, հետո ուրիշ դվիժենիների մեջ էի, ջղայնացած էի:
Խ-Խմած էլ էի՞ր:
Ա-Բանը, ի՞նչ ես անում:
Խ-Տունն եմ, ցավդ տանեմ:
Ա-Էսօր գամ, տենամ, չ՞է իրար:
Խ-Արտակ ջան, էդ օրն ենք մենք գնացել, ըտենց էլ ոչ մի բան:
Ա-Վայ: Բա խի՞ չասիր, ախպեր, որ էթում ենք:
Խ-Բա ասի քեզ, ախպեր, ասի` սպասում ենք քեզի, հետո որ ասիր երկու ժամ սպասել ենք, սպասել ենք, հետո նոր տասի յաները գնացել ենք, ընկեր:
Ա-Ի՞նչ կլինի, որ մի տասը-քսան հատ բերեմ, վերցենք էլի, էսօր բայց էլի:
Խ-Ախպեր, մի տասն օր հետո նոր բան կանենք:
Ա-Հլը մի հատ խոսա էլի: Նայի մեր վիճակը, վափշե գոնե քսան հազար տանք, միանգամից վերցնենք:
Խ-Հեսա կայնի խոսամ:
Ա-Հլը խոսա: Դե սպասում եմ զանգիդ ու գալիս եմ: Դուրս եմ գալիս գյուղից:
Խ-Տենամ էդ պագրիշկեքը ինչ մոմենտ ա, ասեմ քսան հատ, հա՞:
Ա-Հա:
Խ-Էդ քսան հատիկ պագրիշկեքը տենամ ի՞նչ ա:
Ա-Հա:
Խ-Լավ:
2011 թվականի օգոստոսի 16-ին` ժամը 12:37-ին, 095-52-00-00 և 077-11-18-31 հեռախոսահամարների բաժանորդների միջև տեղի է ունեցել 48 վայրկյան տևողությամբ, հետևյալ բովանդակությամբ խոսակցությունը.
Խ-Հա, ապե:
Ա-Մեռնեմ քեզ:
Խ-Հա, ախպեր:
Ա-Երեքն անց կեսից չորսը էդ քսան հատ պագրիշկեն կբերեն, ախպեր:
Խ-Քսանը՞:
Ա-Հա: Երեքն անց կեսից չորսը, բայց էտի հիմա եմ ասում էլի, կարողա չստացվի:
Խ-Ես մի հինգ հատ, մի-մի կոմպլեկտ բան եմ ճարել:
Ա-Դե բան անենք, հեսա փողը պրծնում ա, կխոսանք:
Խ-Լավ:
2011 թվականի օգոստոսի 16-ին` ժամը 18:10-ին, 095-52-00-00 և 077-11-18-31 հեռախոսահամարների բաժանորդների միջև տեղի է ունեցել 48 վայրկյան տևողությամբ, հետևյալ բովանդակությամբ խոսակցությունը.
Տ-Մեռնեմ քեզ:
Խ-Հա, ախպերս, հարմար չէր տեղս:
Տ-Հա, բա ու՞ր ես, գամ մի հատ քեզի տենամ:
Խ-Գործի եմ, ի՞նչ արիր ապե:
Տ-Արա, ախպեր, երեկ չվերցիր, թողին գնացին, ախպեր: Դրանք էլ հեռախոսիդ մեռա .....: Դե լավ, դու գործի տե՞ղն ես:
Խ-Հա:
Տ-Էն հետևը գամ չէ՞, որ միշտ գալիս եմ:
Խ-Հա, ստերանք ես:
Տ-Հա, գալիս եմ:
2011 թվականի օգոստոսի 16-ին` ժամը 20:05-ին, 095-52-00-00 և 077-11-18-31 հեռախոսահամարների բաժանորդների միջև տեղի է ունեցել 50 վայրկյան տևողությամբ, հետևյալ բովանդակությամբ խոսակցությունը.
Խ-Հա, ապեր:
Տ-Ախպեր, մեռնեմ քեզ, ե՞րբ գամ բա:
Խ-Դու պիտի ասես, ես երբ ասեմ .......
Տ-Երբ ասես, կգամ կառոչի:
Խ-Հմի ի՞չքան փող կա քո մոտ:
Տ-Լրիվ մնացածը կա:
Խ-Դու հմի ուր ե՞ս:
Տ-Գյուղը, գյուղում:
Խ-Դե արի սենց պայմանավորվենք:
Տ-Հը:
Խ-9-ին լա՞վ ա: 8-ն անց 10 ա:
Տ-Հա, 9-ից 9-ն անց 15, 20 ըտեղ կլնեմ ախպերս:
Խ-Լավ ապեր:
Տ-Դավայ ախպերս:
2011 թվականի օգոստոսի 16-ին` ժամը 21:04-ին, 095-52-00-00 և 077-11-18-31 հեռախոսահամարների բաժանորդների միջև տեղի է ունեցել 30 վայրկյան տևողությամբ, հետևյալ բովանդակությամբ խոսակցությունը.
Տ-Մեռնեմ քեզ, հեսա մի տասը րոպե չի քաշի ըտեղ կլինեմ էլի:
Խ-Ու՞րդեղ ես հիմա:
Տ-Իմ գործի տեղն եմ:
Խ-Դե արի ըտեղ, վստրեչ գամ քեզի:
Տ-Հեսա գալում եմ ախպեր, մի վայրկյան:
Խ-Հա:
2011 թվականի օգոստոսի 16-ին` ժամը 21:08-ին, 095-52-00-00 և 077-11-18-31 հեռախոսահամարների բաժանորդների միջև տեղի է ունեցել 22 վայրկյան տևողությամբ, հետևյալ բովանդակությամբ խոսակցությունը.
Տ-Մեռնեմ քեզ, որտե՞ղ վստրեչ գաս:
Խ-Ապեր, ես քաղաք եմ եկել արդեն:
Տ-Դե ես առաջին մաս, Հայրենիք խաչմերուկ եմ հասնում: Որտե՞ղ գամ:
Խ-Արի պապլավոկի դեմը:
Տ-Ֆսյո, դավայ, տասը րոպեից ըտեղ եմ:
Խ-Լավ:
2011 թվականի օգոստոսի 16-ին` ժամը 21:27-ին, 095-52-00-00 և 077-11-18-31 հեռախոսահամարների բաժանորդների միջև տեղի է ունեցել 18 վայրկյան տևողությամբ, հետևյալ բովանդակությամբ խոսակցությունը.
Տ-Ու՞ր ես բա:
Խ-Դեմն եմ, ապեր:
Տ-Հասա:
Զննում կատարելու մասին 2011 թվականի նոյեմբերի 4-ի արձանագրության համաձայն` զննության են ենթարկվել դատաքիմիական փորձաքննության ենթարկված և թիվ 274-Ք եզրակացությամբ ստացված` 64,48 գրամ քաշով «մարիխուանա» տեսակի թմրամիջոցի փաթեթները: Զննության ընթացքում կնիքված պոլիէթիլենային տոպրակների միջից հանվել է 30 կապույտ, զուգահեռ տողերով թղթերի մեջ փաթաթված կանաչավուն չորացված զանգված: Բոլոր փաթեթները հերթականությամբ բացվել են, պարունակությունը` առանձին-առանձին տեղափոխվել, ապա զննության են ենթարկվել փաթեթ հանդիսացող թղթերը: Դրանք ունեցել են 20x16,5 քսմ մակերես, բոլորը` միանման, երեք կողմը` հարթ, մեկ կողմը` անհարթ եզրերով: Բոլոր թղթերը ներսի կողմից համարակալված են եղել 1-ից մինչև 30 թվանշաններով: Զննության ընթացքում և դրանից հետո կատարվել են լուսանկարահանումներ, այնուհետև դատարկված զանգվածները լցվել են նույն փաթեթներում և նույն եղանակով փաթեթավորվել տոպրակների մեջ: Վերջնական փաթեթը կնիքվել է ՀՀ ՊՆ ՀԿԳ քննչական բաժնի «Քննիչ №10» կնիքով:
Զննում կատարելու մասին 2011 թվականի նոյեմբերի 10-ի արձանագրության համաձայն` զննության է ենթարկվել «EPOCH» ֆիրմայի թիվ 111 էլեկտրոնային սկավառակը: Սակվառակը նախատեսված է 700 մեգաբայտ ծավալով տեղեկատվություն կրելու համար: Սկավառակի վրա առկա են եղել «5-835-11», «5-836-11» և «№111» գրառումները: Սկավառակը զննության նպատակով տեղադրվել է «Պենտիում 4» տեսակի համակարգչում: Սկավառաում առկա են եղել «5-835-11» և «5-836-11» պանակները: «5-835-11» պանակը պարունակել է 30 խոսակցության ձայնագրառում, իսկ «5-836-11» պանակը` 46 խոսակցության ձայնագրառում: Խոսակցությունները բացվել, և տպագրվել առանձին թղթերի վրա և կցվել արձանագրությանը: Տեղեկանքներում նշվել են խոսակցությունների ժամանակը և այլ մանրամասներ:
Զննում կատարելու մասին 2011 թվականի նոյեմբերի 24-ի արձանագրության համաձայն` զննության են ենթարկվել 2011 թվականի օգոստոսի 18-ին Խաչիկ Տիգրանյանի բնակարանի խուզարկությամբ հայտնաբերված և առգրավված տետրերը` թիվ 3, 4 և 5 փաթեթներում: Թիվ 3 փաթեթում առկա է եղել գունազարդ կազմով տետր, որի թերթերը բացակայել են: Տետրի առջևի մասում առկա է եղել «Nature» գրվածքը, իսկ հետևի մասում` «Тетрадь 60 листов» գրվածքը: Կազմի երկարությունը ծալված վիճակում կազմել է 20,6սմ, իսկ լայնությունը` 17,2սմ: Թիվ 4 փաթեթում առկա է եղել տետր` առջևի մասում «SKARLET» և «Տետր» գրվածքներով: Տետրը բաղկացած է եղել 12 թերթից` վանդակավոր և լուսանցքներով: Թիվ 5 փաթեթում առկա է եղել վարդագույն կազմով տետր` կազմի վրա` առջևի մասում նապաստակների պատկերով և «Տետր» գրվածքով, իսկ հետևի մասում` «SKARLET» գրվածքով: Տետրը, ըստ կազմի վրա եղած գրվածքի, պետք է բաղկացած լինի 40 թերթից, սակայն առկա է եղել 6 թերթ: Թերթերն ունեցել են 20,5x14,5քսմ չափեր` միմյանցից 7,5մմ հեռավորությամբ 22 զուգահեռ տողերով, առանց լուսանցքների: Զննության ընթացքում և դրանից հետո կատարվել է լուսանկարահանում, տետրերը կրկին փաթեթավորվել են նույն փաթեթներում և կնիքվել ՀՀ ՊՆ ՀԿԳ քննչական բաժնի «Քննիչ №10» կնիքով:
ՀՀ արտակարգ իրավիճակների նախարարության «Հայաստանի հիդրոօդերևութաբանության և մոնիտորինգի պետական ծառայություն» ՊՈԱ կազմակերպության տնօրենի կողմից 2012 թվականի հուլիսի 31-ին տրված թիվ 06-266 գրության համաձայն` ըստ Երևան «Արաբկիր» օդերևութաբանական կայանի տվյալների (Երևան, Անտառային 125), որը գտնվում է Երևանի «Պապլավոկ» սրճարանից մինչև Երևանի Վերին Զեյթուն, Պարույր Սևակ փողոցն ընկած հատվածի կենտրոնական մասում, 2011 թվականի օգոստոսի 16-ին` ժամը 21:30-ից միչև ժամը 23:30-ն ընկած ժամանակահատվածում, դիտվել է հյուսիսարևմտյան ուղղությամբ քամի` 3մ/վրկ արագությամբ, պոռթկումը` 6-7մ/վրկ և միայն ժամը 21:45-ից մինչև 22:00-ն ընկած ժամանակահատվածում դիտվել է թույլ անձրև, տեղումների քանակը կազմել է 0,0մմ: Նշված քանակի տեղումները և քամին որակվում են որպես թույլ երևույթ, հետևաբար տրանսպորտի խցանումներ, երթևեկության խաթարումներ ու տրանսպորտային երթևեկության կանգ առաջացնել չեն կարող: Միաժամանակ հայտնվել է նաև, որ հնարավոր չէ, որ նշված օդերևութաբանական կայանի կողմից կայանի տարածքում անձրևն ու քամին դիտարկված չլինեն կամ դիտարկված լինեն սխալ:
Իրեղեն ապացույց ճանաչելու մասին 2011 թվականի դեկտեմբերի 15-ի որոշման համաձայն` իրեղեն ապացույց են ճանաչվել Խաչիկ Տիգրանյանի մոտ հայտնաբերված և առգրավված 638.000 ՀՀ դրամից 380.000 ՀՀ դրամը, 64,48 գրամ ընդհանուր հաստատուն քաշով մարիխուանա տեսակի չորացված թմրամիջոցը, ստվարաթղթե տուփը, «Կոշիկի կենտրոն» գրառմամբ սպիտակ, գունավոր և ավելի փոքր չափերով, սպիտակ պոլիէթիլենային տոպրակները, որոնք հետազոտվեցին դատական քննության ընթացքում:
Այլ փաստաթուղթ ճանաչելու մասին 2012 թվականի հունվարի 19-ի որոշման համաձայն` թիվ 90153911 քրեական գործով ապացույց են ճանաչվել Խաչիկ Տիգրանյանին պատկանող 095-52-00-00 և Արտակ Ղուկասյանին պատկանող 077-11-18-37 հեռախոսահամարների խոսակցությունների ձայնագրառումները պարունակող թիվ 82 սկավառակը, Ղ-Տելեկոմ» և «Օրանժ-Արմենիա» ընկերություններից ստացված` Խաչիկ Տիգրանյանի, Արտակ Ղուկասյանի և Կ.Այդինյանի կողմից օգտագործված հեռախոսահամարների մուտքային և ելքային հեռախոսազանգերի վերծանումները պարունակող երկու սկավառակը և «Ղ-Տելեկոմ» ընկերությունից ստացված 11 թերթի վրա առկա` 077-57-90-40 և 093-48-50-56 հեռախոսահամարների մուտքային և ելքային զանգերի վերծանումները և մյուս տեղեկությունները:
ՀՀ ոստիկանության Երևան քաղաքի վարչության Քանաքեռ-Զեյթունի բաժնի պետի օպերատիվ գծով տեղակալ Ա.Աբրահամյանի 2011 թվականի նոյեմբերի 10-ի թիվ 47-597գ գրության համաձայն` ՀՀ ՊՆ քննչական ծառայության ՀԿԳ քննչական բաժնի պետ Յ.Բադալյանին են ուղարկվել թիվ 90153911 քրեական գործով մեղադրյալ Խաչիկ Սասունի Տիգրանյանի նկատմամբ Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի թիվ ԵԱՔԴ/0084/09/11 որոշմամբ իրականացված «Հեռախոսային խոսակցությունների վերահսկում» օպերատիվ-հետախուզական միջոցառման ընթացքում վերջինին պատկանող 095-52-00-00 հեռախոսահամարից կայացած հեռախոսային խոսակցությունների ձայնագրառումները` թիվ 111 սկավառակով:>>:

25. Հարկ է նշել, որ առաջին ատյանի դատարանը գնահատության ենթարկելով գործով մյուս ամբաստանյալ Ա.Ղուկասյանի նախաքննական և դատաքննական ցուցմունքների մեջ առկա հակասությունները, դրանք համադրելով գործի փաստական տվյալներին, գործով ձեռք բերված ամապույցներին, իրավացիորեն հանգել է հետևյալ եզրահանգման.
<<Դատական քննության ընթացքում ամբաստանյալ Արտակ Ղուկասյանը ցուցմունք տվեց այն մասին, որ ոստիկանությունում իր հայտնած տեղեկությունները չեն համապատասխանում իրականությանը, քանի որ իրեն խաբել են` ասելով, որ այդ բովանդակությամբ բացատրություն գրելու դեպքում իրեն բաց կթողնեն, ուստի ինքը նաև նույնաբովանդակ ցուցմունք է տվել: Ամբաստանյալ Արտակ Ղուկասյանը դատական քննության ընթացքում ցուցմունք տվեց նաև այն մասին, որ քննիչն իրեն չի ստիպել ցուցմունք տալ, այլ առաջարկել է ճիշտ ցուցմունք տալ: Դատարանն արձանագրում է նաև, որ Արտակ Ղուկասյանը որպես մեղադրյալ հարցաքննությունից անմիջապես առաջ ինքնակամ հրաժարվել է իր պաշտպան Անահիտ Սաֆարյանի ծառայություններից, որպիսի փաստը, ըստ մեղադրյալի պնդումների` արդեն իսկ ոստիկանության աշխատակիցների կողմից իրենից խաբեությամբ բացատրություն վերցրած լինելու պարագայում, օբյեկտիվորեն վկայում է դատարանում նրա հայտնած պատճառաբանությունների` իրականությանը չհամապատասխանելու մասին:
Վերոնշյալ հիմնավորմամբ Դատարանը գտնում է, որ Արտակ Ղուկասյանի պատճառաբանություններն այն մասին, որ նախնական քննության ընթացքում իր տված ցուցմունքները չեն համապատասխանում իրականությանը, հերքվում են ինչպես իր իսկ ցուցմունքներով, այնպես էլ քրեական գործով ձեռք բերված այլ ապացույցներով:
Այսպիսով` Դատարանը գտնում է, որ դատավճռի հիմքում պետք է դնել Արտակ Ղուկասյանի` նախնական քննության ընթացքում տված ցուցմունքները, քանի որ ի տարբերություն նրա` դատական քննության ընթացքում տված ցուցմունքների, դրանք հաստատվում են նաև գործով ձեռք բերված այլ օբյեկտիվ տվյալներով:>>:

Վերաքննիչ դատարանի իրավական դիրքորոշումը պաշտպանության կողմի
վերաքննիչ բողոքներում բերված փաստարկների վերաբերյալ

26. Առաջին ատյանի դատարանի դատավճռի իրավական վերլուծությունից երևում է, որ ամբաստանյալ Խ.Տիգրանյանի և նրա պաշտպան Մ.Վարդանյանի կողմից վերաքննիչ բողոքում բերված փաստարկները և պատճառաբանությունները քննարկման առարկա են դարձել նաև առաջին ատյանի դատարանի դատական քննության ժամանակ և գործի քննության ու լուծման ընթացքում դատարանը դրանց տվել է պատշաճ իրավական գնահատական և իրավացիորեն հանգել է ճիշտ հետևության:

27. Այս առումով, համաձայնվելով առաջին ատյանի դատարանի եզրահանգումների հետ, վերաքննիչ դատարանը հարկ է համարում փաստել, որ դատարանը դատավճռի նկարագրական-պատճառաբանական մասում արձանագրել է հետևյալը.
<<Դատարանն արձանագրում է, որ ամբաստանյալներ Խաչիկ Տիգրանյանը և Արտակ Ղուկասյանը փաստացի արգելանքի են վերցվել 2011 թվականի օգոստոսի 16-ին` ժամը 21:30-ի սահմաններում, նրանց բերման ենթարկելու մասին արձանագրությունում` որպես բերման ենթարկելու ժամ, նշվել է ժամը 23:30-ը, իսկ ձերբակալման արձանագրությունները կազմվել են` համապատասխանաբար 2011 թվականի օգոստոսի 17-ին` ժամը 05:30-ին և 2011 թվականի օգոստոսի 17-ին` ժամը 06:00-ին, այսինքն` համապատասխանաբար` ութ և ութուկես ժամ հետո, հետևաբար խախտվել է ազատությունից զրկված անձին քրեական հետապնդման մարմին բերելուց առավելագույնը երեք ժամ հետո ձերբակալման արձանագրություն կազմելու օրենսդրական պահանջը:
Ինչ վերաբերում է իրեղեն ապացույց ճանաչված 380.000 ՀՀ դրամը և 30 փաթեթ թմրամիջոցն անթույլատրելի ապացույց ճանաչելու, դրանք Խաչիկ Տիգրանյանի անձի անձեռնմխելիության և պաշտպանական իրավունքների խախտմամբ հայտնաբերված լինելու փաստը ճանաչելու մասին պաշտպան Մանվել Վարդանյանի միջնորդությանը, ապա Դատարանը գտնում է, որ այն ենթակա է մերժման` հետևյալ պատճառաբանությամբ.
ՀՀ քրեական դատավարության օրենսգրքի 180-րդ հոդվածի 1-ին մասի համաձայն` հանցագործությունների մասին հաղորդումները պետք է քննարկվեն և լուծվեն անհապաղ, իսկ գործ հարուցելու առիթի օրինականությունը և հիմքերի բավարար լինելն ստուգելու անհրաժեշտության դեպքում` դրանց ստացման պահից 10 օրվա ընթացքում: Նույն հոդվածի 2-րդ մասի համաձայն` նշված ժամկետում կարող են պահանջվել լրացուցիչ փաստաթղթեր, բացատրություններ, այլ նյութեր, ինչպես նաև կարող է կատարվել դեպքի վայրի զննություն, հանցագործություն կատարելու կասկածանքի բավարար հիմքերի առկայության դեպքում կարող են բերման և անձնական խուզարկության ենթարկվել անձինք, հետազոտման համար վերցվել նմուշներ, նշանակվել փորձաքննություն:
Դատարանն արձանագրում է, որ Խաչիկ Տիգրանյանին բերման ենթարկելու մասին արձանագրությունը կազմելուց հետո քրեական հետապնդման մարմինը նրան ծանուցել է մարդու իրավունքների և ազատությունների սահմանափակումից բխող իրավունքների մասին, ինչի վերաբերյալ կազմված արձանագրությունում առկա է նաև Խաչիկ Տիգրանյանի ստորագրությունը: Դրանից հետո Խաչիկ Տիգրանյանը ենթարկվել է անձնական խուզարկության, որի ընթացքում նրա մոտից հայտնաբերվել է գումար, այդ թվում` իրեղեն ապացույց ճանաչված 380.000 ՀՀ դրամը: Այսինքն` իրեղեն ապացույց ճանված 380.000 ՀՀ դրամը որպես անթույլատրելի ապացույց ճանաչելու` ՀՀ քրեական դատավարության օրենսգրքով նախատեսված որևէ հիմք առկա չէ:
ՀՀ քրեական դատավարության օրենսգրքի 217-րդ հոդվածի համաձայն` հանցագործության հետքերը, այլ նյութական օբյեկտները հայտնաբերելու, հանցագործության դեպքը, ինչպես նաև գործի համար նշանակություն ունեցող մյուս հանգամանքները պարզելու նպատակով քննիչը կատարում է տեղանքի, շինությունների, առարկաների, փաստաթղթերի, կենդանիների, մարդու կամ կենդանու դիակի զննում:
ՀՀ քրեական դատավարության օրենսգրքի 218-րդ հոդվածի 2-րդ մասի համաձայն` քննիչը զննում է տեսանելի օբյեկտները, իսկ անհրաժեշտության դեպքում դրանց զննումը դարձնում է իրեն մատչելի, եթե դրանով չեն խախտվում քաղաքացիների իրավունքները: Անհրաժեշտության դեպքում քննիչը կատարում է զննվող վայրի և առանձին առարկաների չափումներ, կազմում է հատակագծեր, գծագրեր, սխեմաներ, իսկ հնարավորության դեպքում կատարում լուսանկարում, տեսանկարահանում, կինոնկարահանում և այլ տեսակի ամրագրում, որի մասին նշվում է արձանագրության մեջ: Ամրագրման արդյունք հանդիսացող նշված փաստաթղթերը կցվում են արձանագրությանը:
ՀՀ քրեական դատավարության օրենսգրքի 225-րդ հոդվածի 1-ին մասի համաձայն` քննիչը, բավարար հիմքեր ունենալով ենթադրելու, որ որևէ շենքում կամ այլ տեղ կամ որևէ անձի մոտ գտնվում են հանցագործության գործիքներ, հանցավոր ճանապարհով ձեռք բերված առարկաներ ու արժեքներ, ինչպես նաև այլ առարկաներ և փաստաթղթեր, որոնք կարող են նշանակություն ունենալ գործի համար, խուզարկություն է կատարում դրանք գտնելու և վերցնելու համար:
Դատարանն արձանագրում է, որ Խաչիկ Տիգրանյանի մեքենան տվյալ դեպքում ենթարկվել է զննության` որպես հանցանքի կատարման վայր, և իրեղեն ապացույց ճանաչված` 30 փաթեթ թմրամիջոցը հայտնաբերվել է նրա մեքենայի բեռնախցիկից, ինչն իրավաչափ է` հաշվի առնելով ՀՀ քրեական դատավարության օրենսգրքի համապատասխան հոդվածների համադրական վերլուծությունը: Հակառակ մոտեցման դեպքում` կստացվի, որ քրեական հետապնդման մարմինը պետք է բավարարվեր ավտոմեքենան պարզապես արտաքինից դիտելով` նույնիսկ չբացելով դրա դռները, որպիսի պարագայում կատարված գործողությունը կլիներ բովանդակազուրկ և աննպատակ:
Դատարանը հարկ է համարում նաև նշել, որ չնայած այն հանգամանքին, որ Խաչիկ Տիգրանյանին ձերբակալելու մասին արձանագրությունը կազմվել է ժամկետի խախտմամբ` դա չի կարող իրեղեն ապացույցներն անթույլատրելի ճանաչելու հիմք հանդիսանալ, քանի որ նախ` անձնական խուզարկության և մեքենայի զննության կատարման ժամանակ Խաչիկ Տիգրանյանին բերման ենթարկելու մասին կազմված է եղել արձանագրություն, երկրորդ` իրեղեն ապացույցների հայտնաբերումը չի հանդիսացել Խաչիկ Տիգրանյանին քրեական հետապնդման մարմին բերելուց առավելագույնը երեք ժամ հետո ձերբակալման արձանագրություն կազմելու օերնսդրական պահանջը չկատարելու հետևանք, բացի այդ` առգրավված առարկաները Խաչիկ Տիգրանյանին պատկանելու փաստը չի վիճարկվում, ավելին` դա ընդունում է հենց ինքը` Խաչիկ Տիգրանյանը:>>:
…
<<Դատարանը գտնում է, որ պաշտպան Մանվել Վարդանյանի միջնորդությունը` 095-52-00-00 հեռախոսահամարի մուտքային և ելքային հեռախոսային խոսակցությունների ձայնագրառումներն անթույլատրելի ապացույց ճանաչելու մասին, ենթակա է մերժման, քանի որ պաշտպանը չի ներկայացրել այն անթույլատրելի ճանաչելու` ՀՀ քրեական դատավարության օրենսգրքով նախատեսված հիմքերի առկայության մասին որևէ հիմնավորում: Իսկ ինչ վերաբերում է, դրանց ոչ վերաբերելի լինելուն, ապա Դատարանը գտնում է, որ եթե ոչ գաղտնալսված բոլոր, ապա դատավճռում նշված վերոգրյալ խոսակցությունների ձայնագրությունները վերաբերելի են, քանի որ դրանցով հաստատվում են քրեական գործով պարզաբանման ենթակա հանգամանքներ, ավելին` թե Խաչիկ Տիգրանյանը և թե Արտակ Ղուկասյանը ցուցմունք են տվել այն մասին, որ այդ խոսակցությունների մասնակիցներն իրենք են:>>:
…
<<Դատարանը գտնում է, որ ամբաստանյալ Խաչիկ Տիգրանյանի պաշտպան Մանվել Վարդանյանի միջնորդությունը` Խաչիկ Տիգրանյանին ՀՀ քրեական օրենսգրքի 34-266-րդ հոդվածով մեղսագրվող արարքը (թմրամիջոց ապօրինի իրացնելու փորձ) ՀՀ քրեական օրենսգրքի 38-34-268-րդ հոդվածով (թմրամիջոց ապօրինի ձեռք բերելու օժանդակության փորձ) վերաորակելու մասին, ենթակա է մերժման, քանի որ քրեական գործով ձեռք բերված օբյեկտիվ տվյալները (հատկապես` Խաչիկ Տիգրանյանի մեքենայի զննությամբ 30 փաթեթ թմրամիջոցի հայտնաբերումը, Արտակ Ղուկասյանի կողմից նախնական քննության ընթացքում տված ցուցմունքները` Խաչիկ Տիգրանյանից թմրամիջոց ձեռք բերելու պայմանավորվածությունների մասին, Խաչիկ Տիգրանյանի և Արտակ Ղուկասյանի հեռախոսային խոսակցությունների գաղտնալսման արձանագրությունները) վկայում են Խաչիկ Տիգրանյանի կողմից Արտակ Ղուկասյանին թմրամիջոց ապօրինի իրացնելու դիտավորություն ունենալու մասին:>>:
…
<<Դատարանը գտնում է, որ ամբաստանյալ Խաչիկ Տիգրանյանի պաշտպան Մանվել Վարդանյանի միջնորդությունը` Խաչիկ Տիգրանյանին ՀՀ քրեական օրենսգրքի 34-266-րդ հոդվածով մեղսագրվող արարքը (թմրամիջոց ապօրինի իրացնելու փորձ) ՀՀ քրեական օրենսգրքի 35-266-րդ հոդվածով (թմրամիջոց ապօրինի իրացնելու նախապատրաստություն) վերաորակելու մասին, ենթակա է մերժման` հետևյալ պատճառաբանությամբ.
ՀՀ քրեական օրենսգրքի 34-րդ հոդվածի համաձայն` հանցափորձ է համարվում ուղղակի դիտավորությամբ կատարված այն գործողությունը (անգործությունը), որն անմիջականորեն ուղղված է հանցանք կատարելուն, եթե հանցագործությունն ավարտին չի հասցվել անձի կամքից անկախ հանգամանքներով:
ՀՀ քրեական օրենսգրքի 35-րդ հոդվածի համաձայն` հանցագործության նախապատրաստություն է համարվում ուղղակի դիտավորությամբ հանցանք կատարելու համար միջոցներ կամ գործիքներ ձեռք բերելը կամ հարմարեցնելը, ինչպես նաև դիտավորությամբ այլ պայմաններ ստեղծելը, եթե հանցագործությունն ավարտին չի հասցվել այդ անձի կամքից անկախ հանգամանքներով:
ՀՀ քրեական օրենսգրքի 266-րդ հոդվածի 1-ին մասով նախատեսված հանցանքի (իրացնելու նպատակով թմրամիջոցներ, հոգեմետ (հոգեներգործուն) նյութեր ապօրինի պատրաստելը, վերամշակելը, ձեռք բերելը, պահելը, փոխադրելը, առաքելը կամ դրանք ապօրինի իրացնելը) օբյեկտիվ կողմը, եթե այն կատարվել է վաճառելու եղանակով թմրամիջոց ապօրինի իրացնելու ձևով և ՀՀ քրեական օրենսգրքի 268-րդ հոդվածի 1-ին մասով նախատեսված հանցանքի (առանց իրացնելու նպատակի զգալի չափերով թմրամիջոցներ կամ հոգեմետ (հոգեներգործուն) նյութեր ապօրինի պատրաստելը, վերամշակելը, ձեռք բերելը, պահելը, փոխադրելը կամ առաքելը) օբյեկտիվ կողմը, եթե այն կատարվել է գնելու եղանակով թմրամիջոց ապօրինի ձեռք բերելու ձևով, ընդգրկում են համապատասխանաբար թմրամիջոց ապօրինի վաճառելու նպատակով գումար ստանալն ու դրա դիմաց թմրամիջոցն ապօրինի հանձնելը և ձեռք բերելու նպատակով գումարը հանձնելն ու դրա դիմաց թմրամիջոցն ապօրինի ստանալը: Քննարկվող հանցագործություններն ավարտված են համարվում իրացնելու դեպքում` թմրամիջոցն ապօրինի հանձնելու, իսկ ձեռք բերելու դեպքում` թմրամիջոցն ապօրինի ստանալու պահից:
Տվյալ դեպքում Խաչիկ Տիգրանյանն Արտակ Ղուկասյանից, թմրամիջոց ապօրինի վաճառելու նպատակով, ստացել է, իսկ Արտակ Ղուկասյանն իր հերթին, թմրամիջոց ապօրինի գնելու նպատակով, հանձնել է գումարը, այսինքն` Խաչիկ Տիգրանյանը և Արտակ Ղուկասյանը կատարել են իրենց մեղսագրվող արարքների օբյեկտիվ կողմի մի մասը` անմիջականորեն հանցանք կատարելուն ուղղված գործողությունները, և հանցագործություններն ավարտին չեն հասցվել նրանց կամքից անկախ հանգամանքներով:>>:

28. Վերաքննիչ բողոքի հիման վրա դատական ստուգման ենթարկելով գործի փաստական հանգամանքների բացահայտման և քրեական օրենքի կիրառման ճշտությունը, ուսումնասիրելով և վերլուծելով դատաքննության ժամանակ հետազոտված ապացույցները, միևնույն ժամանակ նկատի ունենալով, որ դատարանի կողմից հաստատված ճանաչված հանգամանքները համապատասխանում են դատարանում հետազոտված ապացույցներին, որ դատարանի հետևությունները հիմնված են միայն դատաքննության ժամանակ հետազոտված ապացույցների վրա, վերաքննիչ դատարանը գտավ, որ գործի քննության և լուծման ընթացքում թույլ չի տրվել նյութական և դատավարական իրավունքի խախտումներ, որոնք ազդել են գործով ճիշտ որոշում կայացնելու վրա:
Առաջին ատյանի դատարանում հետազոտված ապացույցները վերլուծելու և համադրելու արդյունքում վերաքննիչ դատարանը նույնպես գալիս է այն եզրահանգման, որ Խաչիկ Սասունի Տիգրանյանը 2011 թվականի հուլիսին, առանց իրացնելու նպատակի, ապօրինի ձեռք է բերել խոշոր չափերով` 68,48 գրամ չորացված մարիխուանա տեսակի թմրամիջոց, որը ապօրինի պահել է իր կողմից վարած «Մերսեդես-Բենց Ե-280» մակնիշի 16ՕՍ919 պետհամարանիշի ավտոմեքենայի բեռնախցիկում:
Այսինքն` Խաչիկ Սասունի Տիգրանյանը կատարել է արարք, որը համապատասխանում է ՀՀ քրեական օրենսգրքի 268-րդ հոդվածի 2-րդ մասի 2-րդ կետի հատկանիշներին:
Բացի այդ, Խաչիկ Տիգրանյանը, Արտակ Մյասնիկի Ղուկասյանին 20 գլանակ մարիխուանա տեսակի թմրամիջոց վաճառելու եղանակով ապօրինի իրացնելու նպատակով, 2011 թվականի օգոստոսի 16-ին` ժամը 21:30-ի սահմաններում, նրանից ստացել է 380.000 ՀՀ դրամը, սակայն հանցագործությունն ավատին չի հասցրել` իր կամքից անկախ հանգամանքներով, քանի որ Արտակ Ղուկասյանից նշված գումարը ստանալուց հետո բերման է ենթարկվել ոստիկանության աշխատակիցների կողմից:
Այսինքն` Խաչիկ Սասունի Տիգրանյանը կատարել է արարք, որը համապատասխանում է ՀՀ քրեական օրենսգրքի 34-266-րդ հոդվածի 1-ին մասի հատկանիշներին:
Ապացուցված է Խաչիկ Սասունի Տիգրանյանի մեղավորությունը ՀՀ քրեական օրենսգրքի 268-րդ հոդվածի 2-րդ մասի 2-րդ կետով և 34-266-րդ հոդվածի 1-ին մասով նախատեսված արարքներ կատարելու մեջ:
Այսպիսով, վերաքննիչ դատարանը փաստում է, որ մեղադրական դատավճիռը բեկանելու, գործը համապատասխան ստորադաս դատարան` նոր քննության ուղարկելու կամ բեկանված մասով փոփոխելու, կամ գործի վարույթն ամբողջովին կամ դրամ մի մասը կարճելու համար հիմքեր չկան:

29. Քննության առնելով վերաքննիչ բողոքում բերված հիմքերը, փաստարկները և պահանջը` ամբաստանյալ Խ.Տիգրանյանի նկատմամբ նշանակված պատժաչափը մեղմացնելու մասին, վերաքննիչ դատարանը հանգում է այն հետևության, որ ամբաստանյալի և պաշտպանի փաստարկներն ու պահանջն այդ մասով ևս անհիմն է և ենթակա է մերժման հետևյալ պատճառաբանությամբ.
Սույն քրեական գործի նյութերից երևում է, որ առաջին ատյանի դատարանն ամբաստանյալ Խաչիկ Տիգրանյանի նկատմամբ պատժի տեսակն ու չափը որոշելիս ղեկավարվել է ՀՀ քրեական օրենսգրքի 61-րդ հոդվածով սահմանված պատիժ նշանակելու ընդհանուր սկզբունքներով և բավարար չափով ստուգման և գնահատության ենթարկելով նրա կողմից կատարված հանցավոր արարքների հանրության համար վտանգավարության աստիճանն ու բնույթը, անձը բնութագրող տվյալները, այդ թվում` պատիժն ու պատասխանատվությունը ծանրացնող հանգամանքների բացակայությունը, մեղմացնող հանգամանքների առկայությունը, մասնավորապես այն, որ վերջինս նախկինում դատապարտված կամ արատավորված չի եղել, բնութագրվում է դրական, խնամքին ունի մինչև 14 տարեկան երկու երեխա (Արմեն Խաչիկի Տիգրանյան` ծնված 2004 թվականի դեկտեմբերի 8-ին և Արսեն Խաչիկի Տիգրանյան` ծնված 2006 թվականի մարտի 21-ին), ամբաստանյալ Խ.Տիգրանյանի նկատմամբ նշանակել է արդարացի պատիժ, ինչը բխում է ՀՀ քրեական օրենսգրքի 10-րդ հոդվածով ամրագրված արդարության և պատասխանատվության անհատականացման սկզբունքից:
Փաստորեն, առաջին ատյանի դատարանն ամբաստանյալ Խ.Տիգրանյանի նկատմամբ պատիժ նշանակելիս, պատժի տեսակը և չափը որոշելիս հաշվի է առել ՀՀ քրեական օրենսգրքի Ընդհանուր մասի 5-րդ, 10-րդ, 48-րդ և 61-րդ հոդվածներով սահմանված իրավադրույթները, հանգել է ճիշտ հետևության և վերջինիս նկատմամբ ՀՀ քրեական օրենսգրքի նշված հոդվածներով ՀՀ քրեական օրենսգրքի 66-րդ հոդվածի կանոնների կիրառմամբ նշանակել է պատիժ` ազատազրկում 4 (չորս) տարի 6 (վեց) ամիս ժամկետով:
Այսպիսով, քննության առնելով պատժի հարցը, վերաքննիչ դատարանը հանգում է այն հետևության, որ ընդհանուր իրավասության դատարանը, պահպանելով ՀՀ քրեական օրենսգրքի 61-րդ հոդվածով սահմանված պատիժ նշանակելու ընդհանուր սկզբունքները, ամբաստանյալ Խաչիկ Սասունի Տիգրանյանի նկատմամբ նշանակել է պատիժ, որը համապատասխանում է վերջինիս կատարած հանցանքների ծանրությանը և անձին և, որ վերաքննիչ բողոքում նշված փաստարկները նշանակված պատիժը մեղմացնելու հիմք չեն հանդիսանում:

30. Այսպիսով, վերաքննիչ դատարանը վերոշարադրյալ հիմքերով առաջին ատյանի դատարանի 2012 թվականի հոկտեմբերի 18-ի դատավճիռը համարում է օրինական, հիմնավորված և պատճառաբանված, իսկ վերաքննիչ բողոքում ամբաստանյալ Խաչիկ Տիգրանյանի և վերջինիս պաշտպան Մանվել Վարդանյանի կողմից բերված փաստարկներն` անհիմն:

Ելնելով վերոգրյալից և ղեկավարվելով ՀՀ քրեական դատավարության օրենսգրքի 393-395-րդ և 402-րդ հոդվածներով, վերաքննիչ քրեական դատարանը

à ð à Þ º ò

1. Ամբաստանյալ Խ.Տիգրանյանի և պաշտպան Մ.Վարդանյանի վերաքննիչ բողոքը մերժել:

2. Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի 2012 թվականի հոկտեմբերի 18-ի դատավճիռը` Խաչիկ Սասունի Տիգրանյանի վերաբերյալ ՀՀ քրեական օրենսգրքի 268-րդ հոդվածի 2-րդ մասի 2-րդ կետով և ՀՀ քրեական օրենսգրքի 34-266-րդ հոդվածի 1-ին մասով, թողնել օրինական ուժի մեջ:

3. Սույն որոշումը կարող է բողոքարկվել ՀՀ Վճռաբեկ դատարան հրապարակման պահից` մեկամսյա ժամկետում:


ՆԱԽԱԳԱՀՈՂ ԴԱՏԱՎՈՐ ստորագրություն

ԴԱՏԱՎՈՐՆԵՐ ստորագրություններ
Իսկականի հետ ճիշտ է`

ՆԱԽԱԳԱՀՈՂ ԴԱՏԱՎՈՐ Հ.ՏԵՐ-ԱԴԱՄՅԱՆ