Գործ ԵԱՔԴ/0033/01/12







Դ Ա Տ Ա Վ Ճ Ի Ռ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ


21 մայիսի 2012թ. ք.Երևան


Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը


Նախագահությամբ` դատավոր Մ.Խաչատրյանի
Քարտուղարությամբ` Հ.Արտաշեսյանի
Մասնակցությամբ`
Մեղադրող Խ.Բաղդասարյանի
Պաշտպաններ Ա.Սիմոնյանի
Ժ.Հարությունյանի
Թարգմանիչ Ա.Քիխամեկերդիչի


Դռնբաց դատական նիստում քննության առավ քրեական գործն ըստ մեղադրանքի`
Սեյդ Սեյեդ Ամիր Սեյեդ Ռաբիի, ծնված 07.09.1983թ., ԻԻՀ-ում, ԻԻՀ քաղաքացի, նախկինում չդատված, չամուսնացած, չի աշխատում, սովորում է Երևանի պետական բժշկական համալսարանի ստոմատոլոգիայի ֆակուլտետի 5-րդ կուրսում, բնակվել է Երևանի Կոմիտասի պողոտայի 34/1 շենքի 29 բնակարանում, ներկայումս գտնվում է ՀՀ ԱՆ ՙՆուբարաշեն՚ ՔԿՀ-ում, մեղադրվում է ՀՀ քրեական օրենսգրքի 215-րդ հոդվածի 2-րդ մասով և 268-րդ հոդվածի 2-րդ մասի 2-րդ կետով նախատեսված հանցագործությունների կատարման համար, կալանքի տակ է 2011 թվականի դեկտեմբերի 29-ից :
Դատական քննությամբ դատարանը.

Պ Ա Ր Զ Ե Ց

Ըստ մեղադրական եզրակացության` Իրանի Իսլամական Հանրապետության քաղաքացի, սույն գործով մեղադրյալ Սեյդ Սեյեդ Ամիր Սեյեդ Ռաբիին բարձրագույն ուսումնական հաստատությունում ուսումը շարունակելու նպատակով եկել է Երևան: Ժամանակավոր բնակություն է հաստատել Երևանի Կոմիտասի պողոտայի 34/1 շենքի 29 բնակարանում: Հետագայում` 2007 թվականին, մեղադրյալ Ս.Սեյդը ընդունվել է Երևանի Պետական Բժշկական Համալսարան: Տարվա մեջ շուրջ երկու ամիս, ամառային և ձմեռային արձակուրդներին, մեկնել է Իրանի Իսլամական Հանրապետություն` ծնողներին տեսակցելու համար: 2011 թվականի սեպտեմբերի 3-ին, հերթական անգամ ինքնաթիռով ժամանել է Երևանի ՙԶվարթնոց՚ օդանավակայան: Այս անգամ, մեղադրյալ Ս.Սեյդը, մաքսային հսկողությունից դուրս, խախտելով ՀՀ մաքսային օրենսդրությունը և դրանից բխող ՀՀ միջազգային օդանավակայաններով մեկնող և ժամանող ֆիզիկական անձանց կողմից ուղեկցվող բեռների մաքսային հսկողության իրականացման ժամանակ երթուղային համակարգի կիրառման կարգի մասին ՀՀ կառավարության որոշման պահանջները, առանց համապատասխան հայտարարագրի լրացման, իր հետ ներմուծել է 0,008 գրամ տրիֆլուոպերազիմ, խոշոր չափ հանդիսացող 0,235 գրամ քլորդիազեպօքսիդ տեսակի հոգեմետ նյութեր, ինչպես նաև կրկին խոշոր չափ հանդիսացող 0,3 կոդեին տեսակի թմրամիջոց պարունակող հաբեր:
Տվյալ հաբերը հայտնաբերվել և առգրավվել են ՀՀ ոստիկանության Արաբկիրի բաժնի աշխատակիցների կողմից 2011 թվականի դեկտեմբերի 29-ին Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի որոշման հիման վրա մեղադրյալ Ս.Ա.Սեյդի ժամանակավոր բնակության վայրում` Երևանի Կոմիտասի պողոտայի 34/1 շենքի 29 բնակարանում, կատարված խուզարկության ընթացքում:
Նկարագրված արարքի համար Ս.Ա.Սեյդին մեղադրանք է առաջադրվել ՀՀ քրեական օրենսգրքի 215-րդ հոդվածի 2-րդ մասով և 268-րդ հոդվածի 2-րդ մասի 2-րդ կետով:
Նախաքննության փուլում ամբաստանյալ Ս.Ա.Սեյդը իրեն մեղավոր չի ճանաչել և որպես մեղադրյալ հարցաքննվելիս տվել է հետևյալ ցուցմունքը. ՙԻնձ առաջադրված մեղադրանքը չեմ ընդունում, դեղահաբերը բերել եմ անձնական օգտագործման համար` կապված իմ հիվանդության հետ՚: (Գ.թ. 267):
Դատաքննության ընթացքում ամբաստանյալ Ս.Ա.Սեյդն իրեն մեղավոր չճանաչեց և ցուցմունք տվեց, որ իր տանը հայտնաբերված դեղերը Իրանի Իսլամական Հանրապետությունից Հայաստանի Հանրապետություն բերել են իր հարազատները, մասնավորապես քույրն ու եղբայրը: Վերը նշված դեղերը բերել են իր օգտագործման համար, քանզի ինքը տառապում է երիկամային և այլ հիվանդություններով: Իսկ նախաքննական ցուցմունքները տալիս եղել է հուզված, խնդիրներ են եղել նաև թարգմանության հետ:
Դատարանը գնահատելով Սեյեդ Ամիր Սեյդի նախաքննական և դատական քննության ընթացքում տրված ցուցմունքները հանգում է եզրակացության, որ դատավճռի հիմքում պետք է դնել նրա նախաքննական ցուցմունքը, իսկ դատարանում տված ցուցմունքները հավատ չեն ներշնչում և նպատակ են հետապնդում քրեական պատասխանատվությունից խուսափելու համար հետևյալ պատճառաբանությամբ:
29.12.2011 թվականին Ս.Ա.Սեյդը հարցաքննվել է որպես վկա: Քննիչը մինչև հարցաքննությունը նրան բացատրել է իր դեմ ցուցմունք չտալու իրավունքի մասին:
Քննիչի հարցին. ՙԱյսօր Ձեր բնակության Երևանի Կոմիտաս 34/1 շենքի 29 բնակարանում կատարված խուզարկության արդյունքում հայտնաբերվել է 15 հատ ՙԿոդեին՚ տեսակի դեղահաբ, ՙԴիֆեհոքսիլայ՚ 30 հաբ, ՙՔլորդիազեպօքսիդ՚ 27 հաբ, ՙՏրիֆուօպերալին՚ 8 հաբ, ՙՊսեուդոէֆէդրին՚ 30 հաբ, ՙԴիմետրիկոն՚ 10 հաբ, ՙԼոպեռամիդ՚ 10 հաբ, ՙՄետոկլոպռոամիդ՚ 9 հաբ, ՙԿլոարպենիրամին՚ 10 հաբ, ՙԿլիդինիում Ց՚ 20 հաբ, որտեղից եք ձեռք բերել վերը նշված դեղահաբերը, ինչպիսի դեղահաբեր են նշվածները, դուք օգտագործում եք սրանք թե ոչ, և ինչ նպատակով եք նշված դեղահաբերը պահել Ձեր վերը նշված բնակարանում՚: / գ.թ.23/:
Ամբաստանյալ Ս.Ա.Սեյդը քննիչի հարցին տվել է հետևյալ պատասխանը. ՙ...վերը նշված դեղահաբերը ես ձեռք եմ բերել ԻԻՀ-ից, նշված դեղահաբերը ես օգտագործել եմ բժշկի թույլտվությամբ, ես այն օգտագործել եմ երիկամներիս, մարսողության և մրսածության համար, այդ իսկ պատճառով նշված դեղահաբերը գտնվել են իմ վերը նշված բնակարանում: Նշված դեղորայքը ես ԻԻՀ-ից ՀՀ բերել եմ օդանավակայանով անցնելով մաքսային կետով: Նշված դեղորայքը ԻԻՀ-ից ՀՀ բերել եմ մաս-մաս, տարիների ընթացքում, վերջին անգամ 2011 թվի ամռանը: Նշված դեղորայքը ինձ տրամադրվել է բժշկական հետազոտություն անցնելուց և բժշկի թույլտվությունը ստանալուց հետո: Նշված դեղորայքը ես դրել եմ իմ ճամպրուկի մեջ և անցել ԻԻՀ-ի և ՀՀ մաքսային կետերը, մաքսային կետերում ինձ չեն հարցրել թե ճամպրուկի մեջ դեղորայք կա թե ոչ, ես այդ մասին մաքսային կետերում չեմ ասել՚:
Ամբաստանյալը նաև նշել է, որ ինքը հայտարարագիր մաքսային կետերում չի լրացրել և ոչ ոք իրենից չի պահանջել հայտարարագիր լրացնել:
Այս ցուցմունքները ձեռք են բերվել քրեադատավարական օրենքի պահանջների պահպանմամբ, հետևաբար ամբաստանյալի այն պատճառաբանությունները, որ ինքը շփոթված է եղել, ինքը այլ բան է ասել, հավատ չեն ներշնչում, քանզի բոլոր հարցաքննությունները կատարվել է լիցենզավորված թարգմանչի մասնակցությամբ:
Դատարանը վերլուծելով և գնահատելով ամբաստանյալի նախաքննական և դատարանում տված ցուցմունքները գտնում է, որ ամբաստանյալի մեղավորությունը ՀՀ քրեական օրենսգրքի 215-րդ հոդվածի 2-րդ մասով և 268-րդ հոդվածի 2-րդ մասի 2-րդ կետով հիմնավորված է հետևյալ պատճառաբանությամբ:
ՀՀ քրեական օրենսգրքի 215-րդ հոդվածի 1-ին մասը մաքսանենգություն է համարում ՙՀայաստանի Հանրապետության մաքսային սահմանով ապրանքների... տեղափոխումն է առանց մաքսային հսկողության... կամ դրանց մասին ճշգրիտ տեղեկությունները սահմանված ձևով չհայտարագրելու՚:
Ըստ ամբաստանյալի նախաքննական ցուցմունքների ինքը ՀՀ մաքսային սահմանը հատել է նշված ապրանքները չհայտարարագրելու միջոցով, ՀՀ քրեական օրենսգրքի 215-րդ հոդվածի 2-րդ մասը որակյալ է դառնում, երբ մաքսային սահմանով տեղափոխվում է թմրամիջոցներ, հոգեմետ նյութեր կամ դրանց պրեսկուրատներ: Այսպիսով մաքսանենգության հանցակազմի առկայության համար որևէ նշանակություն չունի, թե ապրանքների տեղափոխումն ինչ նպատակով է կատարվում: Հանցակազմն առկա է, երբ ՀՀ քրեական օրենսգրքի 215-րդ հոդվածի դիսպոզիցիայում նշված գործողությունները կատարվում է առանց մաքսային հսկողության, այն է` սահմանված ձևով տեղափոխվող ապրանքները չհայտարարագրելու միջոցով:
Առաջադրված մեղադրանքն ապացուցված է նաև դատաքննությամբ հետազոտված հետևյալ ապացույցներով. գ.թ. 14-ում եղած բնակարանի խուզարկության արձանագրությամբ, ըստ որի 29.12.2011 թվականին խուզարկություն է կատարվել ամբաստանյալի բնակության վայրում` Կոմիտաս 34/1 շենքի 29 բնակարանում, որտեղից հայնաբերվել են նաև Ս.Ա.Սեյդին մեղադրանք առաջադրելու որոշման մեջ նշված դեղահաբերը:
Հետևաբար պաշտպանների միջնորդությունը այն մասին, որ անհրաժեշտ է վերը նշված բնակարանի խուզարկության արձանագրությունը հանել ապացույցների շարքից և չօգտագործել համոզիչ չէ:
Բնակարանի խուզարկությունը (գ.թ.15) կատարվել է դատավարական օրենսգրքի պահանջների խստիվ պահպանմամբ, մասնակից է դարձել նաև ԻԻՀ դեսպանատան թարգմանիչը և բացի այլ դեղահաբերից հայտնաբերվել է նաև ՙԿոդեին՚ և ՙՔլորդիազեպօքսիդ՚ տեսակի դեղահաբեր, որոնց հիման վրա էլ տրվել է թիվ 597 Ք ՙդատանյութագիտական՚ փորձաքննության եզրակացությունը: Հետևաբար հիմքեր չկան ապացույցների շարքից հանել նաև թիվ 597 Ք եզրակացությունը, որի մասին միջնորդում էին պաշտպանները:
Առաջադրված մեղադրանքն ապացուցված է նաև դատաքննությամբ հետազոտված հետևյալ ապացույցներով նույնպես:
Որպես վկա հարցաքննված ընթերակա Երևանի Կոմիտասի պողոտայի 34/1 շենքի 42 բնակարանի բնակիչ Տիգրան Ներսեսի Հարությունյանի նախաքննական ցուցմունքով այն մասին, որ 2011 թվականի դեկտեմբերի 29-ին, կեսօրի սահմաններում, դուրս է եկել գնումների: Հետ վերադառնալու ժամանակ, շենքի մուտքի մոտ, իրեն մոտեցել են ոստիկանության աշխատակիցներ և առաջարկել որպես ընթերակա մասնակցել իրենց շենքի բնակարաններից մեկում կատարվելիք խուզարկությանը: Դրանից հետո իրեն և որպես ընթերակա հրավիրված ևս մեկ անձնավորության պարզաբանել են ընթերակայի իրավունքները, որից հետո սկսվել է խուզարկությունը: Ոստիկանները բնակարանի դարակներից մեկից հայտնաբերել են տոպրակով հաբեր: Այդ ժամանակ տվյալ բնակարանի բնակիչ ազգությամբ պարսիկ տղամարդը հայտարարել է, որ դրանք ամբողջությամբ իր դեղորայքներն են, որոնք ինքը Պարսկաստանից բերել է բուժման նպատակով: Այնուհետև, տվյալ հաբերը իրենց ներկայությամբ ոստիկանների կողմից փաթեթավորվել և կնքվել են` հետագա ստուգումներ կատարելու համար: (գ/թ 251-252):
Վկան դատական քննության ընթացքում տվեց համանման ցուցմունք:
Որպես վկա հարցաքննված գործով մյուս ընթերակա Երևանի Կոմիտասի պողոտայի 34/2 շենքի 15 բնակարանի բնակիչ Հայկ Կարենի Յանուկյանի նախաքննական ցուցմունքով այն մասին, որ 2011 թվականի դեկտեմբերի 29-ին, կեսօրի սահմաններում, աշխատանքից վերադառնալիս է եղել տուն: Այդ ժամանակ Կոմիտասի պողատայի 34/1 շենքի մուտքի մոտ իրեն են մոտեցել ոստիկանության աշխատակիցներ և առաջարկել որպես ընթերակա մասնակցել տվյալ շենքի բնակարաններից մեկում կատարվելիք խուզարկությանը: Դրանից հետո իրեն և որպես ընթերակա հրավիրված ևս մեկ անձնավորության պարզաբանել են իրենց իրավունքները, որից հետո սկսվել է խուզարկությունը: Խուզարկության ընթացքում ոստիկանները բնակարանի դարակներից մեկից հայտնաբերել են տոպրակով հաբեր: Ոստիկանների այն հարցին, թե հայտնաբերվածը ինչ հաբեր են, բնակարանի բնակիչ մի ազգությամբ պարսիկ տղամարդ հայտարարել է, որ դրանք ամբողջությամբ իր դեղորայքներն են, որոնք ինքը Պարսկաստանից բերել է բուժման նպատակով: Այնուհետև, տվյալ հաբերը իրենց ներկայությամբ ոստիկանների կողմից փաթեթավորվել և կնքվել են` հետագա ստուգումներ կատարելու համար: (գ/թ 253-254):
Վկան դատարանում պնդեց իր նախաքննական ցուցմունքը:
Դատանյութագիտական փորձաքննության թիվ 597 Ք եզրակացությամբ այն մասին, որ Ս.Ա.Սեյդի բնակության վայրում կատարված խուզարկությամբ հայտնաբերված և փորձաքննության ներկայացված ՙACETMINOPHEN CODEINE...՚ գրառմամբ դեղաթիթեղներում առկա ընդհանուր թվով 15 հաբերում հայտնաբերվել է կոդեին տեսակի թմրամիջոց, որի ընդհանուր քաշը կազմում է 0,3 գրամ, ՙChlordiazepoxide 5 HAKIM CO՚, ՙClidinium-C՚ և ՙChlordiazepoxide 5՚ գրառումներով դեղաթիթեղներում առկա, ընդհանուր թվով 47 հաբերում /համապատասխանաբար` 20 հաբ, 10 հաբ և 17 հաբ/ հայտնաբերվել է քլորդիազեպօքսիդ հոգեմետ նյութ, որի ընդհանուր քաշը կազմում է 0,235 գրամ, իսկ ՙTrifluoperazine 1՚ գրառումով դեղաթիթեղում առկա թվով 8 հաբերում հայտնաբերվել է տրիֆլուոպերազիմ հոգեմետ տեսակի նյութ, որի ընդհանուր քաշը կազմում է 0,008 գրամ:
Քննիչի որոշմամբ 0.008 գրամ տրիֆլուոպերազիմ հոգեմետ նյութը, հանվել է ՀՀ քրեական օրենսգրքի 268-րդ հոդվածի 2-րդ մասի 2-րդ կետով նախատեսված մեղադրանքի ծավալից, սակայն այն մնացել է ՀՀ քրեական օրենսգրքի 215-րդ հոդվածի 2-րդ մասի մեղադրանքի ծավալում: Հետևաբար ՀՀ քրեական օրենսգրքի 268-րդ հոդվածի 2-րդ մասի 2-րդ կետով առաջադրված մեղադրանքի ծավալում թողնվել է միայն 0.235 գրամ քլորդիազեպօքսիդ հոգեմետ նյութի ապօրինի պահելը:
Դատարանում նշված փորձաքննության եզրակացությունը հետազոտվեց փորձագետ Ա.Սարգսյանի մասնակցությամբ, որն էլ պարզաբանեց և հաստատեց իր մասնակցությամբ կատարված փորձաքննության արդյունքները և դրանց հիման վրա կազմված եզրակացությունը:
Երևանի Բաշինջաղյան 2-րդ նրբանցքի 12 շենքի 102 բնակարանի բնակիչ, գործով վկա Կարինա Վալերիի Առաքելյանի նախաքննական ցուցմունքով այն մասին, որ 2003 թվականից մինչև 2007 թվականը աշխատել է Երևանի Միքայելյանի անվան վիրաբուժական ինստիտուտում, որպես ուռոլոգ-ռեզիդենտ, իսկ 2007 թվականից սկսած աշխատում է ՙԱրաբկիր՚ ԲԿ-ում, որպես ուռոլոգ-վիրաբույժ: 2012 թվականի հունվարի 11-ին իր կողմից տրվել է տեղեկանք Սեյեդ Ամիր Սեյեդ Ռաբիին ՙԱրաբկիր՚ ԲԿ-ում ցույց տրված բժշկական օգնության և նրա հիվանդությունների վերաբերյալ: Տվյալ տեղեկանքը տալու նախորդ օրը իր մոտ է եկել մի կին` երիտասարդ տղամարդու հետ: Այդ կինը իրեն ասել է, որ Ս.Սեյդը գտնվում է ԻԻՀ-ում, այնտեղ ունի սուր երիկամային նոպա, պառկած է հիվանդանոցում և նրան բուժող բժիշկը պահանջում է տեղեկանք և բժշկական փաստաթղթեր, որպիսի պարզի, թե ինչ դեղամիջոցներով է վերջինս Երևանում բուժում անցել և ընդհանրապես ինչ բուժօգնություն է նրան ցուցաբերվել: Իր մոտ այդ հանգամանքը կասկած է հարուցել, քանի որ 2011 թվականի դեկտեմբերի 12-ին, Ս.Սեյդի վերջին հետազոտությամբ, ոչ-մի խնդիր չէր հայտնաբերվել իր մոտ: Ս.Սեյդի մոտ ախտորոշվել է միզաքարային հիվանդություն, աջ երիկամի վերին բաժակի քար, աջ միզածորանի ստորին երրորդի քար, սուր ցիստիտ, ուրեթրիտ: Վերջինիս նշանակվել են նո-շպա, դիկլոֆենակ, օմնիկ-օկաս, ցիստոն, ուրինեքս, ցիպրոֆլոքսացին դեղամիջոցներ: Հայտնել է նաև, որ հստակ կարող է նշել, որ նարկոտիկանման դեղամիջոցները կամ ցավազրկողները, թմրանյութեր կամ հոգեմետ նյութեր պարունակող հաբերը հակացուցված են երիկամային խիտ /նոպա/ բուժելու դեպքում, քանի որ դրանց ազդեցությունը գործում է բուժմանը ուղղակի հակառակ: Ավելացրել է, որ որպես կանոն, հիվանդի կողմից իրենց դիմելուց, պարզում են այլ հիվանդությունների առկայությունը, նրա կողմից ուրիշ տեղեր բժշկական օգնություն ստանալու կամ ստացած լինելու մասին: Այս պարագայում, Ս.Սեյդը հայտնել է, որ ինքը այլ հիվանդություններ չունի, ոչ-մի տեղ բուժում չի ստանում, չի ստացել և առաջին անգամ գանգատ է ունեցել 2011 թվականի հոկտեմբերի 5-ին և դիմել է ՙԱրաբկիր՚ ԲԿ, որից հետո նրան նշանակվել է ուռոլոգի խորհրդատվություն: (գ/թ 120-122):
Վկա Կարինա Առաքելյանը դատարանում տվեց նույնաբովանդակ ցուցմունք ավելացնելով, որ ամբաստանյալն իրեն ասում էր, որ ուժեղ ցավազրկող դեղ նշանակի, սակայն ինքը չի նշանակել, քանզի հետազոտության արդյունքում համանման օբյեկտիվ տվյալներ ձեռք չեն բերվել: Վկան նշեց նաև, որ նշված հիվանդությկան ժամանակ կոդեին չի նշանակվում: Վկան նշեց նաև, որ 2011 թվականի դեկտեմբերի սկզբներին ամբաստանյալը հետազոտվել է իր մոտ և ոչինչ չի հայտնաբերվել, իսկ դեկտեմբերի կեսերին չեկավ, քարտը փակվել է:
Կ.Առաքելյանը նշեց, որ ամբաստանյալի բարեկամների խնդրանքով տվել է տեղեկանք Սեյեդ Ամիր Սեյդի բուժման վերաբերյալ:
Ըստ գ.թ. 83-ում եղած նշված տեղեկանքի նրա մոտ ախտորոշվել է սուր ցիստիտ, ուրեթրիտ, որի կապակցությամբ նշանակվել է բուժում (ցիպրոֆլոքսացին, դիկլոֆենակ, վիտամին ՙC՚, հեղուկներ օրական 3 լիտր, դիետա):
Սակայն դրան հակառակ գ.թ. 260-ում գտնվում է պարսկերենից հայերեն թարգմանված 09.01.2012 թվականի Իրանի Իսլամական Հանրապետության բժիշկ Ամիրմոզաֆար Ռահիմի` մասնագիտացված ներքին և շնչառական հիվանդությունների բնագավառում, բժշկական լիցենզիա 34966 փաստաթուղթ, ըստ որի ՙՍեյեդ Ամիր Սեիդը իմ հսկողության տակ է եղել երկու տարի առաջ երիկամային հիվանդությունների գանգատներով (երիկամի քարի անփոփոխ ցավով) հաճախակիորեն ընդունելով ուժեղ հանգստացնողներ, ներառյալ 2 ացետամինոֆեն կոդեին հաբերն, յուրաքանչյուր չորս ժամը մեկ և անհրաժեշտ հակաբիոտիկներ կիպռոֆլոքսետին և կոտրիմոքսազոլ՚:
Գնահատելով այս գրավոր փաստաթուղթը, դատարանը հանգում է եզրակացության, որ այն չի կարող անդրադառնալ ամբաստանյալի արարքի քրեաիրավական գնահատման վրա, քանզի Հայաստանի Հանրապետություն վերը նշված դեղորայքային հաբերը ամբաստանյալը բերել է մաքսանենգ ճանապարհով և այն առանց իրացնելու նպատակի ապօրինի պահել, որը Հայաստանի Հանրապետության օրենսդրությամբ քրեորեն պատժելի է:
Դատաքիմիական փորձաքննության Հմ. 1226 եզրակացությամբ այն մասին, որ 2011 թվականի դեկտեմբերի 29-ի` մեղադրյալ Ս.Սեյդի մազի և մեզի փորձանմուշներում հայտնաբերվել են ափիոն խմբի թմրամիջոցների թմրալկալոիդների հետքեր: (գ/թ 141):
Դատաթմրաբանական փորձաքննության Հմ 39-12 եզրակացությամբ այն մասին, որ մեղադրյալ Ս.Սեյդը տառապում է ՙՅաթրոգեն թմրամոլություն՚ ախտորոշմամբ, ուստի ունի հարկադիր բուժման կարիք, որի համար հակացուցումեր չկան: (գ/թ 230-231):
Իրեղեն ապացույց ճանաչված`ՙACETMINOPHEN CODEINE...՚ տեսակի թվով 14, ՙChlordiazepoxide 5 HAKIM CO՚ թվով 19, ՙClidinium-C՚ թվով 9, ՙChlordiazepoxide 5՚ թվով 16 և ՙTrifluoperazine 1՚ թվով 7 հաբերի առկայությամբ: (գ/թ 258):
Այլ փաստաթուղթ հանդիսացող և գործով ապացույց ճանաչված 2012 թվականի հունվարի 25-ին ՀՀ ոստիկանության ՔՀԳ վարչությունից ստացված գրության և փետրվարի 16-ին ՀՀ ԿԱ ՊԵ կոմիտեից ստացված հարցման պատասխանի առկայությամբ: (գ/թ 132-134, 204, 259):
Ինչ վերաբերվում է պաշտպանների պահանջին, որ անհրաժեշտ է նշված փաստաթուղթը չօգտագործել և հանել ապացույցների շարքից, ապա դատարանն արձանագրում է, որ դրանց ձեռք բերումը և որպես այլ փաստաթուղթ ճանաչելը կատարվել դատավարական օրենքով սահմանված կարգով:
Առաջադրված մեղադրանքն ապացուցված է նաև Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի 30.12.2011 թվականի որոշմամբ, որով սույն գործով ամբաստանյալ Սեյեդ Ամիր Սեյեդ Ռաբիի Սեյդի նկատմամբ որպես խափանման միջոց ընտրվել է կալանքը և այդ որոշումից նույնպես երևում է, որ Սեյեդ Ամիր Սեյդը դատարանում բացատրություն է տվել, որ իր տան խուզարկությամբ հայտնաբերված Կոդեին տեսակի դեղահաբերը ինքն է բերել Իրանի Իսլամական Հանրապետությունից, քանի որ տառապում է երիկամային հիվանդությամբ և օդանավակայանում իրենից հայտարարագիր չեն պահանջել:
Պաշտպանության կողմի միջնորդությամբ հարցաքննված վկա Արմինե Այվազյանի ցուցմունքով, համաձայն որի հանդիսանում է ԻԻՀ քաղաքացի, սովորել և ավարտել է հայկական դպրոց, տիրապետում է հայերեն գրավոր և բանավոր խոսքին, հանդիսանում է Երևանի Կոմիտաս 34/1 շենքի թիվ 29 բնակարանի սեփականատերը: Ինքը ապրում և աշխատում է ԻԻՀ-ում, ժամանակ առ ժամանակ լինում է նաև Երևանում: Վկան նշեց, որ ճանաչում է ամբաստանյալին, գտնվում են շատ լավ հարաբերությունների մեջ, ընտանիքներով շատ մոտ են, այդ պատճառով էլ իր վերը նշված բնակարանը տվել է Սեյեդ Ամիրին ապրելու համար:
Բնակարանի խուզարկության ժամանակ ինքը եղել է բնակարանում, դատարանի որոշումը իրեն ներկայացվել է, կատարվել է խուզարկություն, հետո Սեյեդ Ամիրը ներկայացրել է պոլիէթիլենային տոպրակով դեղեր և խուզարկությունը դադարեցվել է: Խուզարկությանը բացի ընթերականերից մասնակցել է նաև ԻԻՀ դեսպանատան թարգմանիչը: Վկան նշեց, որ Սեյեդ Ամիրի ներկայացրած դեղերի մեջ Կոդեին չի եղել:
Վկայի ցուցմունքի վերջին մասը դատարանին հավատ չի ներշնչում, քանզի ըստ գ.թ 14 արձանագրության բնակարանի խուզարկությամբ հայտնաբերվել է ՙԿոդեին՚ թվով 15 հաբ:
Վկան որպես բնակարանի սեփականատեր ստորագրել է բնակարանի խուզարկության արձանագրության բոլոր երեք էջերը: Վկայի ցուցմունքի նշված մասը դատարանը գնահատելիս նկատի է ունենում, որ վկան իր ցուցմունքով փորձում է ամբաստանյալին ազատել քրեական պատասխանատվությունից` քանզի նրանց ընտանիքները գտնվում են շատ լավ հարաբերությունների մեջ: Վկան դատարանում անգամ նշեց, որ ամբաստանյալին վերաբերվում է որպես իր փոքր եղբոր:
Վերոգրյալի հիման վրա դատարանն ապացուցված է համարում, որ Սեյդ Սեյեդ Ամիր Սեյեդ Ռաբիին 2011 թվականի սեպտեմբերի 3-ին ԻԻՀ-ից ինքնաթիռով ժամանել է Երևանի ՙԶվարթնոց՚ օդանավակայան, որի ընթացքում մաքսանենգություն կատարելու դիտավորությամբ, մաքսային հսկողությունից դուրս, առանց իրացնելու նպատակի, ՀՀ մաքսային սահմանով տեղափոխել է վերը նշված դեղորայքների հաբերը, որոնք իրենց մեջ պարունակել են` 0,008 գրամ տրիֆլուոպերազիմ տեսակի հոգեմետ նյութ, 0,3 գրամ խոշոր չափ հանդիսացող կոդեին տեսակի թմրամիջոց և 0,235 գրամ խոշոր չափ հանդիսացող քլորդիազեպօքսիդ տեսակի հոգեմետ նյութ:
Նշված թմրամիջոց պարունակող և 0,235 գրամ խոշոր չափ հանդիսացող քլորդիազեպօքսիդ հոգեմետ նյութ հանդիսացող դեղահաբերը նաև ապօրինի պահել է իր բնակարանում, արարքներ, որոնք նախատեսված են ՀՀ քրեական օրենսգրքի 215-րդ հոդվածի 2-րդ մասով և 268-րդ հոդվածի 2-րդ մասի 2-րդ կետով, որոնց համար էլ Սեյդ Սեյեդ Ամիր Սեյեդ Ռաբիին պետք է քրեական պատասխանատվության ենթարկվի և նշանակված պատիժը պետք է կրի:
Պատիժ սահմանելիս հաշվի է առնվում մեղսագրվող արարքների բնույթը և վտանգավորության աստիճանը և ամբաստանյալի անձը բնութագրող տվյալները, պատիժը և պատասխանատվությունը մեղմացնող հանգամանքները:
Պատիժը և պատասխանատվությունը մեղմացնող հանգամանք է դիտվում, որ նա նախկինում դատապարտված չի եղել, ուսանող է, բնութագրվում է դրականորեն:
Պատիժը և պատասխանատվությունը ծանրացնող հանգամանք դատարանը չի արձանագրում:
Դատարանը գտնում է, որ ամբաստանյալի նկատմամբ պետք է նշանակվի հարկադիր բուժում, քանզի ըստ դատաթմրաբանական փորձաքննության եզրակացության ամբաստանյալի մոտ ախտորոշվել է ՙՅաթրոգեն՚ թմրամոլություն և բուժման համար հակացուցումներ չկան: (գ.թ.230-231):
Գործով իրեղեն ապացույց ճանաչված դեղահաբերը պետք է ոչնչացվեն:
Անդրադառնալով ՀՀ քրեական օրենսգրքի 215-րդ հոդվածի 2-րդ մասով նախատեսված լրացուցիչ պատժին` գույքի բռնագրավմանը, դատարանն արձանագրում է, որ ՀՀ քրեական օրենսգրքի 55-րդ հոդվածի պահանջների կոնտեքստում, այդպիսին չպետք է կիրառվի:
Վերոգրյալների հիման վրա և ղեկավարվելով ՀՀ քրեական դատավարության օրենսգրքի 357-360-րդ, 365-րդ, 369-373-րդ հոդվածներով, ՀՀ քրեական օրենսգրքի 97-րդ, 98-րդ և 103-րդ հոդվածներով դատարանը

Վ Ճ Ռ Ե Ց

Սեյդ Սեյեդ Ամիր Սեյեդ Ռաբիին մեղավոր ճանաչել ՀՀ քրեական օրենսգրքի 215-րդ հոդվածի 2-րդ մասով և 268-րդ հոդվածի 2-րդ մասի 2-րդ կետով նախատեսված հանցագործությունների կատարման համար և դատապարտել ազատազրկման` ՀՀ քրեական օրենսգրքի 215-րդ հոդվածի 2-րդ մասով 4 /չորս/ տարի ժամկետով, իսկ ՀՀ քրեական օրենսգրքի 268-րդ հոդվածի 2-րդ մասի 2-րդ կետով 3 /երեք/ ամիս ժամկետով: ՀՀ քրեական օրենսգրքի 66-րդ հոդվածի կարգով նշանակված պատիժները լրիվ գումարելու սկզբունքով վերջնական պատիժ սահմանել ազատազրկում 4 /չորս/ տարի 3 /երեք/ ամիս ժամկետով:
Պատժի կրման սկիզբը հաշվել 2011 թվականի դեկտեմբերի 29-ից:
Պատիժը պետք է կրի ՀՀ ԱՆ քրեակատարողական համապատասխան հիմնարկում:
Սեյդ Սեյեդ Ամիր Սեյեդ Ռաբիի նկատմամբ պատժի կատարման հետ միացված նշանակել հարկադիր բուժում թմրամոլությունից բուժվելու համար:
Իրեղեն ապացույց ճանաչված բոլոր դեղահաբերը, որոնք փաթեթավորված են երեք ծրարներում (կոդեին պարունակող դեղահաբեր, հոգեմետ նյութեր պարունակող դեղահաբեր և այլ դեղամիջոցներ), դատավճիռն ուժի մեջ մտնելուց հետո ոչնչացնել:
Ընտրված խափանման միջոց կալանավորումը մինչև դատավճռի օրինական ուժի մեջ մտնելը թողնել անփոփոխ:
Դատավճիռը դատավարության մասնակիցների կողմից 1 /մեկ/ ամսվա ընթացքում, իսկ Սեյդ Սեյեդ Ամիր Սեյեդ Ռաբիի համար դատավճռի պարսկերեն թարգմանությունը ստանալու օրից 1 /մեկ/ ամսվա ընթացքում, վերաքննության կարգով կարող է բողոքարկվել ՀՀ վերաքննիչ քրեական դատարան:



ԴԱՏԱՎՈՐ` Մ.ԽԱՉԱՏՐՅԱՆ