գործ N ԵԱՔԴ/0030/01/12

ԴԱՏԱՎՃԻՌ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

26 հունիսի 2012թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը`

նախագահությամբ` դատավոր Ա.Մկրտչյանի
քարտուղարությամբ` Օ.Կիրակոսյանի
Շ.Վանոյանի
մասնակցությամբ`
մեղադրող Ա.Աղայանի

Դատարանում, դռնբաց դատական նիստում քննեց քրեական գործն ըստ մեղադրանքի` Ալբերտ Վարդանի Վարդանյանի /ծնված 13.04.1969թ. Երևան քաղաքում, հայ, ՀՀ քաղաքացի, ութամյա կրթությամբ, չամուսնացած, դատվածություն չունեցող, չի աշխատում, փաստացի բնակվող ք.Երևան, Ժ.Կուստո փողոց 229/2 տուն, ներկայումս ՀՀ ԱՆ ՙՆուբարաշեն՚ ՔԿՀ-ի կալանավոր/:
Մեղադրվում է ՀՀ քրեական օրենսգրքի 177-րդ հոդվածի 2-րդ մասի 2-րդ կետով:

Գործի դատավարական նախապատմությունը
2012թ. հունվարի 18-ին հարուցվել է թիվ 14100712 քրեական գործը£
2012թ. հունվարի 25-ին Ալբերտ Վարդանյանը ներգրավվել է որպես մեղադրյալ և նրա նկատմամբ խափանման միջոց է ընտրվել ստորագրություն չհեռանալու մասին:
2012թ. մարտի 06-ին թիվ 14100712 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան:
2012թ. մարտի 11-ին դատարանի որոշմամբ Ա.Վարդանյանի նկատմամբ ընտրված խափանման միջոցը փոփոխվել է և խափանման միջոց է ընտրվել կալանավորումը, նրա նկատմամբ հայտարարվել է հետախուզում և քրեական գործի վարույթը կասեցվել է:
2012թ. մայիսի 23-ին Ա.Վարդանյանը հայտնաբերվել և կալանավորվել է:
2012թ. հունիսի 05-ին որոշում է կայացվել քրեական գործի վարույթը վերսկսելու և դատական քննության նշանակելու մասին:

Գործի փաստական հանգամանքները
Նախաքննության մարմինն ամբաստանյալ Ալբերտ Վարդանյանին ՀՀ քրեական օրենսգրքի 177-րդ հոդվածի 2-րդ մասի 2-րդ կետով մեղադրանք է առաջադրել այն արարքի համար, որ ՙնա 2011թ. նոյեմբերի 17-ին ժամը 17:30-ի սահմաններում այցելելով իր ծանոթներ Մարիամ Փափազյանի և Աղասի Սարգսյանի ժամանակավոր բնակության վայր հանդիսացող Երևանի Սունդուկյան 7 հասցեում գտնվող ավտոտնակ` գրասեղանի դարակից գաղտնի հափշտակել է Մարիամ Փափազյանին պատկանող 534.000 ՀՀ դրամ գումար և դիմել փախուստի` Մ.Փափազյանին պատճառելով խոշոր չափերի գույքային վնաս՚:

Ապացույցների հետազոտում
Առաջադրված մեղադրանքում Ալբերտ Վարդանյանն իրեն մեղավոր է ճանաչել և դատաքննության փուլում ըստ էության պնդել է նախաքննության փուլում տված ցուցմունքներն այն մասին, որ իր ազգականների հետ միասին բնակվում է Երևանի Ժ.Կուստո փողոցի 229/2 տանը: Մի քանի տարի է ճանաչում է Մարիամ Փափազյանին և Աղասի Սարգսյանին և վերջիններիս հետ գտնվում է ընկերական հարաբերությունների մեջ: 2011թ. նոյեմբերի 17-ին տեսակցելու նպատակով ժամը 17:00-ի սահմաններում այցելել է Մարիամ Փափազյանին և Աղասի Սարգսյանին, որոնք ժամանակավորապես բնակվում են Երևանի Սունդուկյան փողոցի 7 հասցեում գտնվող ավտոտնակում: Ավտոտնակում որոշ ժամանակ մնալուց հետո Մարիամ Փափազյանին տվել է 1.200 դրամ գումար և խնդրել, որ վերջինս սննդամթերք գնի: Մ.Փափազյանի ավտոտնակից դուրս գալուց հետո դուրս է եկել նաև Աղասի Սարգսյանը, և ինքը ավտոտնակում մնալով միայնակ, հետաքրքրությունից ելնելով բացել է ավտոտնակում գտնվող գրասեղանի դարակը և տեսնելով այնտեղ գտնվող գումարը, վերցրել է այն, դուրս եկել ավտոտնակից և դիմել փախուստի: Այնուհետև հաշվել է գումարը` 534.000 դրամ, որը ծախսել է անձնական կարիքների համար:

Ամբաստանյալ Ալբերտ Վարդանյանին մեղսագրվող արարքը հիմնավորվել է նաև դատաքննությամբ հետազոտված հետևյալ ապացույցներով.

Տուժող Մարիամ Իշխանի Փափազյանը նախաքննության փուլում ցուցմունք է տվել այն մասին, որ ինքը հաշվառված է Արարատի մարզի Ռանչպար գյուղում, սակայն իր ամուսնու եղբոր` Աղասի Սարգսյանի հետ միասին ժամանակավոր բնակվում է Երևան քաղաքի Սունդուկյան փողոցի 7 հասցեում գտնվող ավտոտնակներից մեկում: Ալբերտ Վարդանյանն իր եղբոր` Հովհաննես Փափազյանի մտերիմ ընկերն է: 2011թ. նոյեմբերի 17-ին ժամը 17:30-ի սահմաններում Ա.Վարդանյանը զանգահարել է իր 077-30-57-17 հեռախոսահամարին և ասել, որ ցանկանում է տեսնել իրեն, և ինքը վերջինիս հայտնել է իր գտնվելու վայրը: Ժամը 18:30-ի սահմաններում Ա.Վարդանյանը եկել է իր ժամանակավոր բնակության վայր հանդիսացող ավտոտնակ, որտեղ եղել է նաև Աղասի Սարգսյանը: Զրույցի ժամանակ Ա.Վարդանյանն իրեն հարցրել է, թե արդյոք իր մոտ գումար կա, ինքը բացասական պատասխան է տվել, որից հետո Ա.Վարդանյանն իրեն է տվել 1.200 դրամ գումար, որպեսզի նա սննդամթերք գնի: Իր դուրս գալուց հետո ավտոտնակից դուրս է եկել նաև Ա.Աարգսյանը: Մոտ 30 րոպե անց վերադարձել է և տեսել, որ Ա.Վարդանյանն այնտեղ չէ: Անմիջապես ստուգել է դարակը և տեսել, որ այնտեղից բացակայում է իրեն պատկանող 534.000 դրամ գումարը, անձնագիրը և բժշկական փաստաթղթեր: Դուրս է եկել և ավտոտնակից քիչ հեռու տեսել է գետնին ընկած անձնագիրը և բժշկական փաստաթղթերը, իսկ Ա.Վարդանյանն անհետացել է: Կատարվածի մասին անմիջապես հայտնել է ամուսնու եղբորը:
Գ.թ. 39-40, 76-77

Վկա Աղասի Սուրենի Սարգսյանը նախաքննության փուլում ցուցմունք է տվել այն մասին, որ հաշվառված է Շիրակի մարզ, ք.Գյումրի, Մանուշյան փողոցի 1ա շենքի 45 բնակարաում, սակայն իր եղբոր կնոջ` Մարիամ Փափազյանի հետ միասին ժամանակավորապես բնակվում է Երևան քաղաքի Սունդուկյան փողոցի 7 հասցեում գտնվող ավտոտնակում: 2011թ. նոյեմբերի 17-ին ժամը 17:00-ի սահմաններում Մ.Փափազյանին է զանգահարել Ա.Վարդանյանը և հայտնել, որ ցանկանում է գալ իրենց տեսակցելու: Զրույցի ժամանակ Ա.Վարդանյանը Մ.Փափազյանին հարցրել է, թե արդյոք իր մոտ գումար կա, և բացասական պատասխան լսելով` Մ.Փափազյանին է տվել 1.200 դրամ գումար, որպեսզի նա սննդամթերք գնի: Մ.Փափազյանի դուրս գալուց հետո ինքը նույնպես դուրս է եկել: Երբ վերադարձել է ավտոտնակ, տեսել է գետնին թափված փաստաթղթեր, իսկ գրասեղանի դարակում այնտեղ դրված 534.000 դրամ գումարը չկա:
Գ.թ. 68-69, 82-83

Դատարանի իրավական վերլուծությունները
Դատարանը գործով ձեռք բերված յուրաքանչյուր ապացույց գնահատելով թույլատրելիության վերաբերելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, ղեկավարվելով օրենքով, ներքին համոզմամբ, գտնում է, որ ամբաստանյալ Ալբերտ Վարդանյանի մեղավորությունը ՀՀ քրեական օրենսգրքի 177-րդ հոդվածի 2-րդ մասի 2-րդ կետի հատկանիշներով նախատեսված հանցագործություն կատարելու մեջ ապացուցված է, որի համար նա ենթակա է քրեական պատասխանատվության և պատժի, որը նա պետք է կրի:
Պատիժ նշանակելիս դատարանը հաշվի է առնում հանցագործության հանրության համար վտանգավորության աստիճանն ու բնույթը, ինչպես նաև անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները:
Ամբաստանյալ Ալբերտ Վարդանյանի անձը բնութագրող տվյալներ, պատասխանատվությունն ու պատիժը մեղմացնող հանգամանքներ դատարանը հաշվի է առնում այն, որ նա ընդունել է մեղքը և անկեղծորեն զղջացել կատարած արարքի համար:
Ամբաստանյալի պատասխանատվությունն ու պատիժը ծանրացնող հանգամանք դատարանը չի արձանագրել:
Ղեկավարվելով ՀՀ քրեական դատավարության օրենսգրքի 357-360-րդ, 365-րդ, 369-373-րդ, 379-րդ հոդվածներով, դատարանը`

ՎՃՌԵՑ

Ալբերտ Վարդանի Վարդանյանին մեղավոր ճանաչել ՀՀ քրեական օրենսգրքի 177-րդ հոդվածի 2-րդ մասի 2-րդ կետով և նրա նկատմամբ պատիժ նշանակել ազատազրկում 2 /երկու/ տարի վեց /վեց/ ամիս ժամկետով:
Պատժի սկիզբը հաշվել 2012 թվականի մայիսի 23 -ից:
Պատիժը պետք է կրի ՀՀ ԱՆ համապատասխան քրեակատարողական հիմնարկում:
Ալբերտ Վարդանյանի նկատմամբ ընտրված խափանման միջոցը` կալանքը, թողնել անփոփոխ, մինչև դատավճռի օրինական ուժի մեջ մտնելը:
Գործով քաղաքացիական հայցվոր ճանաչված Մարիամ Իշխանի Փափազյանի քաղաքացիական հայցը բավարարել և Ալբերտ Վարդանյանից հօգուտ Մարիամ Փափազյանի բռնագանձել 534.000 /հինգ հարյուր երեսուն չորս հազար/ դրամ` որպես հանցագործության հետևանքով պատճառված վնասի հատուցում:
Դատավճիռը կարող է բողոքարկվել ՀՀ վերաքննիչ քրեական դատարան հրապարակվելու օրվանից հետո` մեկամսյա ժամկետում:




ԴԱՏԱՎՈՐ Ա.ՄԿՐՏՉՅԱՆ