Գործ հ. ԵԱՔԴ/0024/01/12

Ո Ր Ո Շ ՈՒ Մ

Հ Ա Ն Ո Ւ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ Ո Ւ Թ Յ Ա Ն

10 օգոստոսի 2012թ. ք.Երևան

Հայաստանի Հանրապետության վերաքննիչ քրեական դատարանը
/այսուհետ`Վերաքննիչ դատարան/ հետևյալ կազմով`

ՆԱԽԱԳԱՀՈՂ ԴԱՏԱՎՈՐ` Ա.ՀՈՎՀԱՆՆԻՍՅԱՆ
ԴԱՏԱՎՈՐՆԵՐ` Ա.ԽԱՉԱՏՐՅԱՆ
Լ.ԹԱԴԵՎՈՍՅԱՆ

ՔԱՐՏՈՒՂԱՐՈՒԹՅԱՄԲ` Մ.ՄԱՀՏԵՍՅԱՆԻ
ՄԱՍՆԱԿՑՈՒԹՅԱՄԲ`
ՄԵՂԱԴՐՈՂՆԵՐ` Գ.ՀՈՎՀԱՆՆԻՍՅԱՆԻ,
Ա.ՇԱՀԻՆՅԱՆԻ
ՊԱՇՏՊԱՆ` Ա.ԹՈՎՄԱՍՅԱՆԻ

Դռնբաց դատական նիստում, վճռաբեկ վարույթի կանոններով, քննության առնելով Գագիկ Բեյբութի Աբրահամյանի նկատմամբ ՀՀ քրեական օրենսգրքի 358-րդ հոդվածի 1-ին մասով և Ռոման Արամայիսի Զադոյանի նկատմամբ ՀՀ քրեական օրենսգրքի 375-րդ հոդվածի 1-ին մասով, Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը 2012թ. ապրիլի 18-ի դատավճռի դեմ բերված պաշտպանների վերաքննիչ բողոքը


Պ Ա Ր Զ Ե Ց

1.Գործի դատավարական նախապատմությունը և փաստական հանգամանքերը.

2012 թվականի հունվարի 19-ին ՀՀ ՊՆ քննչական ծառայության 4-րդ կայազորային քննչական բաժնում ՀՀ քրեական օրենսգրքի 359-րդ հոդվածի 1-ին մասի հատկանիշներով հարուցվել է թիվ 90252912 քրեական գործը:
2012թ. փետրվարի 7-ին Գագիկ Բեյբութի Աբրահամյանը որպես մեղադրյալ է ներգրավվել ՀՀ քրեական օրենսգրքի 358-րդ հոդվածի 1-ին մասով այն արարքի կատարման համար, որ ՙնա հանդիսանալով ՀՀ ՊՆ 24923 զորամասի ՀՆ 3-րդ ջոկատի ՀՆ 9-րդ վաշտի ՀՆ 3-րդ խմբի 1-ին ջոկի հրամանատար, կոչումով` կրտսեր սերժանտ, 29.12.2011թ.-ին, ժամը 02:30-ի սահմաններում ՀՆ 3-րդ ջոկատի օրվա հերթապահ, ժամկետային զինծառայող, սերժանտ Ռոման Արամայիսի Զադոյանի կողմից` քնած չլինելու և զորանոցում շրջելու կապակցությամբ դիտողության արժանանալուց հետո վիճաբանության է բռնվել նրա հետ, որի ընթացքում զինվորական ծառայության պարտականությունները կատարելու կապակցությամբ բռնություն է գործադրել զինվորական ծառայության բերումով իր նկատմամբ պետ հանդիսացող սերժանտ Ռ. Ա. Զադոյանի նկատմամբ` հարվածներ հասցնելով վերջինիս` պատճառել է առողջությանը թեթև վնաս՚:
2012թ. փետրվարի 15-ին Ռոման Արամայիսի Զադոյանը որպես մեղադրյալ է ներգրավվել ՀՀ քրեական օրենսգրքի 375-րդ հոդվածի 1-ին մասով այն արարքի կատարման համար, որ ՙնա հանդիսանալով ՀՀ ՊՆ 24923 զորամասի ՀՆ 3-րդ ջոկատի ՀՆ 7-րդ վաշտի ՀՆ 3-րդ խմբի 1-ին ջոկի հրամանատար, կոչումով սերժանտ, 29.12.2011թ.-ին, նշանակված լինելով ՀՆ 3-րդ ջոկատի հերթապահ, նույն օրը ժամը 02:30-ի սահմաններում քնած չլինելու և զորանոցում շրջելու կապակցությամբ իր լիազորությունների կատարման շրջանակներում դիտողություն է արել համածառայող, կրտսեր սերժանտ Գագիկ Բեյբութի Աբրահամյանին, որի շուրջ առաջացած վիճաբանության ժամանակ իր գերակայությունն ի ցույց դնելու նպատակով, անձնական շահագրգռվածությունից ելնելով չարաշահել է պաշտոնեական դիրքը` բռունցքներով հարվածներ է հասցրել Գ. Բ. Աբրահամյանին, որի հետևանքով առաջացել է էական վնաս` վերջինիս առողջությանը պատճառվել է թեթև վնաս՚:
2012 թվականի փետրվարի 29-ին թիվ 90252912 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան` ըստ էության քննելու համար:
Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը, կիրառելով դատական քննության արագացված կարգ, 2012թ. ապրիլի 18-ի դատավճռով ամբաստանյալ Գագիկ Բեյբութի Աբրահամյանին մեղավոր է ճանաչել ՀՀ քրեական օրենսգրքի 358-րդ հոդվածի 1-ին մասով նախատեսված հանցանք կատարելու մեջ և նրան դատապարտել է կարգապահական գումարտակում պահել` 1 /մեկ/ տարի 6 /վեց/ ամիս ժամկետով:
Գագիկ Աբրահամյանը պատիժը պետք է կրի ՀՀ ՊՆ համակարգում գործող կարգապահական գումարտակում, որի սկիզբը հաշվել է նրան փաստացի արգելանքի տակ վերցնելու պահից:
Գագիկ Աբրահամյանի նկատմամբ որպես խափանման միջոց կիրառված` զորամասի հրամանատարության հսկողության հանձնելը, փոխվել է կալանավորմամբ:
Ամբաստանյալ Ռոման Արամայիսի Զադոյանին մեղավոր է ճանաչել ՀՀ քրեական օրենսգրքի 375-րդ հոդվածի 1-ին մասով նախատեսված հանցանք կատարելու մեջ և նրան դատապարտել է ազատազրկման 2 /երկու/ տարի ժամկետով:
ՀՀ քրեական օրենսգրքի 58-րդ հոդվածի կարգով 2 /երկու/ տարի ժամկետով ազատազրկման փոխարեն կիրառել է կարգապահական գումարտակում պահել` 2 /երկու/ տարի ժամկետով:
Ռոման Զադոյանը պատիժը պետք է կրի ՀՀ ՊՆ համակարգում գործող կարգապահական գումարտակում, որի սկիզբը հաշվել է նրան փաստացի արգելանքի տակ վերցնելու պահից:
Ռոման Զադոյանի նկատմամբ որպես խափանման միջոց կիրառված` զորամասի հրամանատարության հսկողության հանձնելը, փոխվել է կալանավորմամբ:
Վճռվել է նաև` դատավճիռն օրինական ուժի մեջ մտնելուց հետո ՀՀ ՊՆ քննչական ծառայության չորրորդ կայազորային քննչական բաժնի քննիչ Վ. Սարգսյանի 23.02.2012թ.-ի փաստաթղթերն ապացույց ճանաչելու մասին որոշմամբ ապացույց ճանաչված և քրեական գործին կցված ՀՀ ՊՆ 24923 զորամասի հրամանատարի 04.11.11թ.-ի թիվ 308 և 08.11.11թ.-ի թիվ թիվ 312 հրամաններից քաղվածքները, ՀՀ ՊՆ 24923 զորամասի հրամանատարի կողմից տրված տեղեկանքը, Երևանի կայազորի ՌՈ բաժնից ՀՀ ՊՆ ՌՈ պետին և Երևանի կայազորի զինվորական դատախազին տրված թիվ 1520 և 1521 հեռախոսագրերը, ԵԿՌՈ բաժնի ՕՀ և ԶԻԼ բաժանմունքի պետի կողմից ԵԿՌՈ պետի ԺՊ-ին հասցեագրված զեկուցագիրը, ԵԿՌՈ բաժնից ստացված թիվ 272/232 օպերատիվ գրությունը` պահել քրեական գործի հետ միասին:
Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի 18.04.2012թ. դատավճռի դեմ վերաքննիչ բողոքներ են բերել ամբաստանյալ Գագիկ Աբրահամյանի շահերի պաշտպան` Արշակ Թովմասյանը և ամբաստանյալ Ռոման Զադոյանի շահերի պաշտպան` Նորայր Միքայելյանը, որը Վերաքննիչ դատարանի 30.05.2012թ. որոշմամբ ընդունվել է վարույթ:
Քրեական գործը ՀՀ Վերաքննիչ քրեական դատարանում ստացվել է 2012 թվականի մայիսի 24-ին:


2.Վերաքննիչ բողոքների հիմքերը, հիմնավորումները և պահանջը.

ա/ Պաշտպան Ա.Թովմասյանի վերաքննիչ բողոքի հիմքերը, հիմնավորումները և պահանջը

Պաշտպան Ա.Թովմասյանը գտնում է, որ առաջին ատյանի դատավճռով Գ.Աբրահամյանին նշանակված պատիժը հիմնավոր չէ, չի բխում գործում եղած տվյալներից, հանգամանքներից, հիմնված չէ պատասխանատվության անհատականացման և մարդասիրության սկզբունքների վրա:
Գագիկ Աբրահամյանը և Ռոման Զադոյանը ՀՀ զինված ուժեր են զորակոչվել Շիրակի մարզից, համատեղ ծառայության ընթացքում դարձել են մտերիմ ընկերներ և պատահական հանգամանքերի բերումով վիճաբանել են միմյանց հետ և կատարել միջին ծանրության հանցանք, որից հետո պատշաճորեն շարունակել են ծառայել և մնալ մտերիմ ընկերներ:
Գագիկ Աբրահամյանը հրամանատարության կողմից բնութագրվում է դրական, որպես կարգապահ զինվոր, ունի խրախուսանքներ, կարգապահական խախտումներ չի ունեցել, բնութագրվում է դրական նաև Շիրակի մարզի Լեռնակերտ համայնքի կողմից, որպես աշխատասեր, կարգապահ և օրինապահ անձնավորություն, ավարտել է Երևանի Խ.Աբովյանի անվան պետական մանկավարժական ինստիտուտը, զղջացել է կատարածի համար, տվել է խոստովանական ցուցմունքներ, օժանդակել է հանցագործության բացահայտմանը: Դեպքից հետո գտնվելով հրամանատարության հսկողության տակ, լավ ծառայության համար հրամանատարության կողմից արաժանացել է շնորհակալության:
Գործով ամբաստանյալի պատասխանատվությունը և պատիժը ծանրացնող հանգամանքներ չկան:
Պաշտպանը նշել է նաև, որ մեղադրողը հաշվի առնելով վերը նշված հանգամանքները, ընդհանուր իրավասության դատարանում միջնորդել է և հնարավոր է համարել ամբաստանյալ` Գագիկ Աբրահամյանի նկատմամբ պատիժը պայմանականորեն չկիրառելը, համաձայն ՀՀ քր. օր-ի 70-րդ հոդվածի:
Պաշտպանը գտնում է, որ ընդհանուր իրավասության դատարանն վերոգրյալները հաշվի չառնելով ամբաստանյալ` Գագիկ Աբրահամյանի նկատմամբ կայացրել է ակնհայտորեն խիստ պատիժ:
Ըստ պաշտպանի` առաջին ատյանի դատարանը դատավճռով ընդունել է քրական պատասխանատվությունը և պատիժը մեղմացնող բոլոր փաստական հանգամանքները, սակայն չի անդրադարձել մասնակցող դատախազի և ամբաստանյալներին ու միջնորդություններին:
Պաշտպան Ա.Թովմասյանը խնդրել է ամբողջությամբ բեկանել և փոփոխել առաջին ատյանի դատարանի 18.04.2012թ. դատավճիռը` Գագիկ Բեյբութի Աբրահամյանի նկատմամբ կարգապահական գումարտակում պահելու ձևով նշանակված պատժաչափը և ՀՀ քր. օր.-ի 70-րդ հոդվածի դրույթներից ելնելով կայացնել պատիժը պայմանականորեն չկիրառելու որոշում, փոխել Գագիկ Աբրահամյանի նկատմամբ խափանման միջոց կիրառված կալանավորումը:


բ/ Պաշտպան Ն.Միքայելյանի վերաքննիչ բողոքի հիմքերը, հիմնավորումները և պահանջը

Պաշտպան Ն.Միքայելյանը գտնում է, որ առաջին ատյանի դատավճռով Ռ.Զադոյանի նկատմամբ կիրառված պատժի հարցում հիմնավոր չէ, չի բխում գործում եղած տվյալներից, հանգամանքներից, այն պետք է բեկանել ներքոհիշյալ պատճառաբանություններով.
Ռոման Զադոյանը և Գագիկ Աբրահամյանը ՀՀ զինված ուժեր են զորակոչվել Շիրակի մարզից, համատեղ ծառայության ընթացքում դարձել են մտերիմ ընկերներ և պատահական հանգամանքերի բերումով վիճաբանել են միմյանց հետ և կատարել միջին ծանրության հանցանք, որից հետո պատշաճորեն շարունակել են ծառայել և մնալ մտերիմ ընկերներ:
Ռոման Զադոյանը հրամանատարության կողմից բնութագրվում է դրական, որպես բարձր ֆիզիկական, շարային պատրաստակամություն ունեցող, կարգապահ զինվոր, որի համար չորս անգամ խրախուսվել է, այդ թվում` քաջարի մարտիկ կրծքանշանով:
Ռ.Զադոյանը բնութագրվում է դրական նաև Շիրակի մարզի Վահրամաբերդի գյուղական համայնքի կողմից, միջնակարգ դպրոցի տնօրինության, Գյումրի քաղաքի մանկավարժական ինստիտուտի, Գյումրիի քաղաքապետարանի ֆիզկուլտուրայի և սպորտի բաժնի կողմից, Ռ.Զադոյանը ազատ ոճի ըմբշամարտիկ է, միջազգային և հանրապետական տարբեր մրցաշարերի տասնակի մրցանակակիր, ՀՀ առաջնության քառակի մրցանակակիր, ԱՊՀ երկրների բարեկամական բանակների յոթերորդ սպարտակիադայի բրոնզե մեդալակիր, ամուսնացած է, տանը նրան է սպասում երիտասրդ կինը, իսկ ծառայության երկու տարին լրանում է 16.06.2012թվականին, զղջացել է կատարածի համար, տվել է խոստովանական ցուցմունքներ, օժանդակել է հանցագործության բացահայտմանը, հանցավոր արարքից հետո տևական ժամանակ /4 ամիս / բարեխիղճ, կարգապահ շարունակել է զինծառայությունը, արժանացել է հրամանատարության գոհունակությանը, իսկ Գ.Աբրահամյանի հետ մինչ դեպքը և դրանից հետո մտերիմ ընկերներ են:
Գործով ամբաստանյալի պատասխանատվությունը և պատիժը ծանրացնող հանգամանքներ չկան:
Պաշտպանը նշել է նաև, որ մեղադրողը վերոգրյալ փաստական հանգամանքները նկատի ունենալով ընդհանուր իրավասության դատարանում միջնորդել է և հնարավոր է համարել ամբաստանյալ` Ռոման Զադոյանի նկատմամբ պատիժը պայմանականորեն չկիրառելը, համաձայն ՀՀ քր. օր-ի 70-րդ հոդվածի:
Պաշտպանը գտնում է, որ ընդհանուր իրավասության դատարանն անտեսելով Ռ.Զադոյանի անձը բնութագրող փաստական հանգամանքները, նյութական և դատավարական նորմերի սահմանումն ու դրույթները, ՀՀ վճռաբեկ դատարանի նախադեպային համապատասխան որոշումները իր պաշտպանյալի նկատմամբ, պատժի առումով կայացրել է խիստ դատավճիռ, որը ենթակա է բեկանման:
Ըստ պաշտպանի` առաջին ատյանի դատարանը դատավճռով ընդունել է վերը նշված քրական պատասխանատվությունը և պատիժը մեղմացնող բոլոր փաստական հանգամանքները, սակայն չի անդրադարձել մասնակցող դատախազի և ամբաստանյալների պաշտպանների վերլուծություններին ու միջնորդություններին:
Գտնում է, որ սույն բողոքում առկա են ՀՀ քր. դատ. օր-ի 381-րդ հոդ. 1-ին մասի հիմքերը և սոցիալական արդարության, քրեաիրավական օրենսդրության սկզբունքներից և արդարադատության արդյունավետության շահերից ելնելով բողոքարկված դատավճիռը ենթակա է բեկանման:
Պաշտպան Ն.Միքայելյանը խնդրել է ամբողոջությամբ բեկանել և փոփոխել առաջին ատյանի դատարանի 18.04.2012թ. դատավճիռը, մեղմացնել Ռ.Զադոյանի նկատմամբ կարգապահական գումարտակում պահելու ձևով նշանակված պատժաչափը և ՀՀ քր. օր.-ի 70-րդ հոդվածի դրույթներից ելնելով կայացնել պատիժը պայմանականորեն չկիրառելու որոշում, փոխել Ռոման Զադոյանի նկատմամբ խափանման միջոց կիրառված կալանավորումը:



3 Վերաքննիչ դատարանի պատճառաբանությունները և եզրահանգումը.

Վերաքննիչ բողոքում նշված հիմքերի ու հիմնավորումների սահմաններում վերլուծելով գործի նյութերը, լսելով պաշտպանի և ամբաստանյալ Ռ.Զադոյանի կողմից իրենց վերաքննիչ բողոքների հիմնավորումները, ամբաստանյալներին, մեղադրողի պատասխանը, Վերաքննիչ քրեական դատարանը գտնում է, որ պաշտպանների վերաքննիչ բողոքները պետք է մերժել` հետևյալ պատճառաբանությամբ.
ՀՀ քր. դատ. օր.-ի 385հդ.-ի 1-ին մասի համաձայն` Վերաքննիչ դատարանը դատական ակտը վերանայում է Վերաքննիչ բողոքի հիմքերի և հիմնավորումների սահմաններում, նույն հոդվածի 3-րդ մասի համաձայն` Վերաքննիչ դատարանում բողոքի քննության ժամանակ առաջին ատյանի դատարանում հաստատված փաստական հանգամանքներն ընդունվում են որպես հիմք, բացառությամբ այն դեպքի, երբ բողոքում վիճարկվում է որևէ փաստական հանգամանք և Վերաքննիչ դատարանը հանգում է այն հետևության, որ տվյալ փաստական հանգամանքի վերաբերյալ եզրակացության հանգելիս առաջին ատյանի դատարանն ակնհայտ սխալ է թույլ տվել:
Գագիկ Բեյբութի Աբրահամյանի կողմից ՀՀ քրեական օրենսգրքի 358-րդ հոդվածի 1-ին մասով և Ռոման Արամայիսի Զադոյանի կողմից ՀՀ քրեական օրենսգրքի 375-րդ հոդվածի 1-ին մասով, նախատեսված հանցանքները կատարելը և նրանց մեղքը դատավարության որևէ մասնակցի կողմից չի վիճարկվում:
Չի վիճարկվում նաև առաջին ատյանի դատարանի կողմից դատավճռով հաստատված ճանաչված որևէ փաստական հանգամանք:
Այդ իսկ պատճառով, ինչպես նաև նկատի առնելով այն հանգամանքը, որ Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը սույն քրեական գործը քննել է դատական քննության արագացված կարգի կիրառմամբ, ՀՀ քր. դատ. օր.-ի 375-1-375-4-րդ հոդվածների պահանջների պահպանմամբ, ամբաստանյալներ Գագիկ Բեյբութի Աբրահամյանի նկատմամբ ՀՀ քրեական օրենսգրքի ՀՀ քրեական օրենսգրքի 358-րդ հոդվածի 1-ին մասով և Ռոման Արամայիսի Զադոյանի նկատմամբ ՀՀ քրեական օրենսգրքի 375-րդ հոդվածի 1-ին մասով, մեղսագրված հանցանքների հիմնավորվածությունը ՀՀ Վերաքննիչ քրեական դատարանը քննության առարկա չի դարձնում:
ՀՀ քրեական դատավարության օրենսգրքի 360-րդ հոդվածի 1-ին մասի համաձայն` դատավճիռ կայացնելիս դատարանը ներկայացված հաջորդականությամբ լուծում է հետևյալ հարցերը` ենթակա է արդյոք պատժի ամբաստանյալն իր կատարած հանցանքի համար, ինչ պատիժ պետք է նշանակվի նրա նկատմամբ, ամբաստանյալն արդյոք պետք է կրի իր նկատմամբ նշանակված պատիժը:
Նշված հարցերի լուծման ընթացքում դատարանը պետք է ղեկավարվի ՀՀ քրեական օրենսգրքի Ընդհանուր մասի մի շարք հոդվածներով: Մասնավորապես, ՀՀ քրեական օրենսգրքի 10-րդ հոդվածի համաձայն` հանցանք կատարած անձի նկատմամբ կիրառվող պատիժն արդարացի է, եթե համապատասխանում է հանցանքի ծանրությանը, դա կատարելու հանգամանքներին, հանցավորի անձնավորությանը, անհրաժեշտ և բավարար է անձին ուղղելու և նրա կողմից նոր հանցանքի կատարումը կանխելու համար:
ՀՀ քրեական օրենսգրքի 61-րդ հոդվածի 1-ին մասը սահմանում է, որ հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է քրեական օրենսգրքի Հատուկ մասի համապատասխան հոդվածի սահմաններում`հաշվի առնելով նույն օրենսգրքի Ընդհանուր մասի դրույթները:
ՀՀ քրեական օրենսգրքի 48-րդ հոդվածի 2-րդ մասի համաձայն` հանցագործության համար մեղավոր ճանաչված անձի նկատմամբ նշանակվող պատժի նպատակն է վերականգնել սոցիալական արդարությունը, ուղղել պատժի ենթարկված անձին, ինչպես նաև կանխել հանցագործությունները:
Քրեական օրենսգրքի Ընդհանուր մասի վերը թվարկված դրույթներից հետևում է, որ հանցագործության համար մեղավոր ճանաչված անձի նկատմամբ, ինչպես պատժատեսակի և պատժաչափի, այնպես էլ նշանակված պատիժը կրելու նպատակահարմարության վերաբերյալ դատարանի կողմից կայացված որոշումը պետք է հիմնված լինի կատարած հանցագործության, դրա առանձնահատկությունների, գործի կոնկրետ հանգամանքների, հանցավորի անձի, պատասխանատվությունը և պատիժը մեղմացնող կամ ծանրացնող հանգամանքների բազմակողմանի գնահատման վրա` նպատակ ունենալով ապահովել ՀՀ քրեական օրենսգրքի 48-րդ հոդվածի 2-րդ մասում նշված պատժի նպատակների իրագործման հնարավորությունը:
Պատիժ նշանակելիս և այն կրելու նպատակահարմարության հարցը քննարկելիս դատարանը հաշվի է առնում նաև ՀՀ քրեական օրենսգրքի 62-րդ և 63-րդ հոդվածներով նախատեսված պատասխանատվությունն ու պատիժը մեղմացնող և ծանրացնող հանգամանքները:
ՀՀ քրեական օրենսգրքի 70-րդ հոդվածի 1-ին, 2-րդ մասերի համաձայն` եթե դատարանը կալանքի, ազատազրկման կամ կարգապահական գումարտակում պահելու ձևով պատիժ նշանակելով, հանգում է այն հետևության, որ դատապարտյալի ուղղվելը հնարավոր է առանց պատիժը կրելու, ապա կարող է որոշում կայացնել այդ պատիժը պայմանականորեն չկիրառելու մասին:
Պատիժը պայմանականորեն չկիրառելիս դատարանը հաշվի է առնում հանցավորի անձը բնութագրող տվյալները, պատասխանատվությունը և պատիժը մեղմացնող և ծանրացնող հանգամանքները:
Օրենքի նշված դրույթից հետևում է, որ պատիժը պայմանականորեն չկիրառելը օրենսդիրը կախման մեջ չի դնում ոչ կատարված հանցանքի բնույթից և հասարակական վտանգավորության աստիճանից, ոչ այն կատարող անձից, կարևորը այն է, որ իրավասու դատարանը յուրաքանչյուր կոնկրետ դեպքում, բազմակողմանի գնահատելով հանցանքի կատարման հանգամանքները, վերլուծելով այն կատարող անձին բնութագրող տվյալները, հանգի այն հետևության, որ դատապարտյալի ուղղվելը հնարավոր է առանց պատիժը կրելու:
Ընդ որում, պատիժը պայմանականորեն չկիրառելու հետ կապված ՀՀ քրեական օրենսգիրքը ինչպես հանցագործությունների տեսակների, հանցավոր արարքի վտանգավորության աստիճանի ու բնույթի, այնպես էլ անձանց շրջանակի հետ կապված որևէ հատուկ սահմանափակում չի նախատեսել:
Այսինքն` օրենսդիրը պատիժը պայմանականորեն չկիրառելու հիմք է համարում դատարանի համոզվածությունը, որ դատապարտյալի ուղղվելը հնարավոր է առանց որոշակի պատժատեսակները ռեալ կրելու:
Վերաքննիչ քրեական դատարանը գտնում է, որ ընդհանուր իրավասության դատարանը, բավարար չափով հաշվի է առել ինչպես ամբաստանյալների կատարած հանցագործությունների բնույթն ու հասարակական վտանգավորության աստիճանը, հանցավորների անձը, այնպես էլ ամբաստանյալներից յուրաքանչյուրի պատասխանատվությունը և պատիժը մեղմացնող հանգամանքները` այն, որ ամբաստանյալ Գագիկ Աբրահամյանը երիտասարդ է, ծառայության և բնակության վայրերում բնութագրվում է դրականորեն, նախկինում դատված ու արատավորված չի եղել:
Ամբաստանյալ Ռոման Զադոյանը երիտասարդ է, ծառայության, բնակության վայրերում և ուսումնական հաստատությունների կողմից բնութագրվում է դրականորեն, նախկինում դատված ու արատավորված չի եղել, հանդիսանում է ազատ ոճի ըմբշամարտի բազմակի մրցանակակիր:
Որպես ամբաստանյալների պատասխանատվությունը և պատիժը մեղմացնող հանգամանքներ դատարանը հաշվի է առել նաև այն, որ ամբաստանյալներից յուրաքանչյուրն առաջին անգամ հանգամանքների պատահական զուգորդմամբ կատարել են իրենց մեղսագրված միջին ծանրության հանցանքներ, ինչպես նաև ՀՀ ՊՆ 24923 զորամասի հրամանատարության կողմից տրված երաշխավորագիրը, որով խնդրել են ամբաստանյալներին հնարավորություն տալ շարունակելու իրենց ծառայությունը, ամբաստանյալների պատիժը և պատասխանատվությունը ծանրացնող հանգամանքների բացակայությունը և նշանակել է համաչափ պատիժ` պահպանելով ՀՀ քրեական օրենսգրքի 10-րդ, 48-րդ, 61-րդ հոդվածների պահանջները:
Քննության առնելով վերը նշված բոլոր հանգամանքներն իրենց համակցության մեջ, Վերաքննիչ քրեական դատարանը գտնում է, որ Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի 2012 թվականի ապրիլի 18-ի դատավճիռը` Գագիկ Աբրահամյանի և Ռոման Զադոյանի նկատմամբ նշանակված պատժի մասով, օրինական է, հիմնավորված և պատճառաբանված, հետևաբար պաշտպանների վերաքննիչ բողոքի փաստարկները չեն կարող բավարար հիմք հանդիսանալ Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի 18.04.2012 թվականի դատավճիռը բեկանելու կամ փոփոխելու համար:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 393-րդ, 394-րդ, 402-րդ, 418-րդ հոդվածներով, ՀՀ Վերաքննիչ քրեական դատարանը



Ո Ր Ո Շ Ե Ց

Պաշտպանների վերաքննիչ բողոքները մերժել:
Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի 2012 թվականի ապրիլի 18-ի դատավճիռը` Գագիկ Բեյբութի Աբրահամյանի նկատմամբ ՀՀ քրեական օրենսգրքի 358-րդ հոդվածի 1-ին մասով և Ռոման Արամայիսի Զադոյանի նկատմամբ ՀՀ քրեական օրենսգրքի 375-րդ հոդվածի 1-ին մասով, թողնել օրինական ուժի մեջ:
Որոշումը կարող է բողոքարկվել ՀՀ վճռաբեկ դատարան` հրապարակման պահից մեկամսյա ժամկետում:


ՆԱԽԱԳԱՀՈՂ ԴԱՏԱՎՈՐ` ստորագրություն
ԴԱՏԱՎՈՐՆԵՐ` ստորագրություններ
Իսկականի հետ ճիշտ

ՆԱԽԱԳԱՀՈՂ ԴԱՏԱՎՈՐ` Ա.ՀՈՎՀԱՆՆԻՍՅԱՆ