ԵԱՔԴ/0021/01/12

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանը

նախագահող դատավոր Լ. Ավետիսյան
քարտուղարությամբ Ն. Ղազարյանի
մասնակցությամբ
մեղադրող Ա. Ամիրզադյանի
պաշտպան Հ. Հարությունյանի
թարգման Ա. Քիխամեկերդիջիի


2012 թվականի մարտի 20-ին, Երևան քաղաքում, դռնբաց դատական նիստում, դատական քննության արագացված կարգով, քննեց քրեական գործն ըստ մեղադրանքի Մոհամադ Ռեզայի Մալաքութիխահի, ծնված 1958 թվականի սեպտեմբերի 25-ին, ԻԻՀ Սպահան քաղաքում, ազգությամբ պարսիկ, ԻԻՀ քաղաքացի, ամուսնացած, խնամքին ոչ ոք, աշխատում է ՙԴիդիար Սեյր Գիթի՚ տրանսպորտային ընկերությունում որպես վարորդ, նախկինում չդատված, հաշվառված է ԻԻՀ, Թեհրան քաղաքի Սաբերի փողոցի 14 տանը, ժամանակավորապես բնակվում է Երևան քաղաքի Թավրիզյան փողոցի 59 տանը, մեղադրվում է ՀՀ քրեական օրենսգրքի 215 հոդվածի 1-ին մասով, որպես խափանման միջոց է ընտրվել չհեռանալու մասին ստորագրությունը,

Պ Ա Ր Զ Ե Ց

1.Գործի դատավարական նախապատմությունը.
2011 թվականի դեկտեմբերի 16-ին ՀՀ ազգային անվտանգության ծառայության քննչական վարչությունում ՀՀ քրեական օրենսգրքի 215 հոդվածի 1-ին մասով նախատեսված հանցագործության հատկանիշներով հարուցվել է թիվ 58215311 քրեական գործը:
2012 թվականի հունվարի 27-ին Մոհամադ Ռեզայի Մալաքութիխահը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 215 հոդվածի 1-ին մասով, նրա նկատմամբ որպես խափանման միջոց ընտրվել է չհեռանալու մասին ստորագրությունը:
2012 թվականի փետրվարի 14-ի որոշմամբ ՀՀ ԿԱ ՊԵԿ ՆՀՎ Մեղրիի տարածաշրջանային մաքսատան տեսուչ Լևոն Բազիկյանի, մաքսանենգության դեմ պայքարի և կրկնակի մաքսային հսկողության բաժնի տեսուչ Արմեն Տոնոյանի, ինչպես նաև ԻԻՀ քաղաքացիներ` Արվին Սուքիասյանի, Մինաս Սաֆարյանի, Մասուդ Ֆահնեժադի և Սաիդ Քյարոխի վերաբերյալ քրեական գործի մասը կարճվել և քրեական հետապնդում չի իրականացվել` նրանց արարքում հանցակազմի բացակայության հիմքով` նախատեսված ՀՀ քրեական դատավարության օրենսգրքի 35 հոդվածի 1-ին մասի 2-րդ կետով:
2012 թվականի փետրվարի 24-ին թիվ 58215311 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
2.Գործի փաստական հանգամանքները.
Նախնական քննության մարմինն ամբաստանյալ Մոհամադ Ռեզայի Մալաքութիխահին մեղադրանք է առաջադրել այն արարքի կատարման համար, որ նա հանդիսանալով ՙԴիդիարսեյրգիթի՚ պարսկական տրանսպորտային կազմակերպության վարորդ, 2011 թվականի նոյեմբերի 24-ին, ժամը 05-ի սահմաններում, ՙՍկանիա՚ մակնիշի 16A757 պետհամարանիշի ավտոբուսով ԻԻՀ-ից ժամանելով ՀՀ Մեղրիի տարածաշրջանային մաքսակետ, տարբեր անձանց համար բերված բանջարեղենի սերմերը, քարտրիջները, ֆաքսի թղթերը, ամսագրերը, գազի բալոնները և այլ ապրանքներ /ընդհանուր 2.620.700 դրամ արժեքով/ բաժանել է ավտոբուսի ուղևորներ Արվին Սուքիասյանի, Մինաս Սաֆարյանի, Սաիդ Քիարոխի և Մասուդ Ֆահնեժադի միջև` մեկ խմբաքանակով, առանց մաքսազերծման բեռներ անցկացնելու թույլատրելի չափը չգերազանցելու համար և մաքսանենգությամբ` մաքսային հսկողությունից թաքցնելու միջոցով, նշված ապրանքները տեղափոխել է Հայաստանի Հանրապետության մաքսային սահմանով:
3. Արագացված դատական քննություն.
Մինչև դատաքննություն սկսելն ամբաստանյալ Մոհամադ Ռեզայի Մալաքութիխահին միջնորդեց դատական քննությունն անցկացնել արագացված կարգով և հայտարարեց, որ առաջադրված մեղադրանքն իրեն պարզ է, համաձայն է իրեն առաջադրված մեղադրանքին, գիտակցում է արագացված կարգով դատական քննություն անցկացնելու բնույթն ու հետևանքները, միջնորդությունը ներկայացրել է կամավոր` պաշտպանի հետ խորհրդակցելուց հետո: Միջնորդությունը հաստատեց նաև ամբաստանյալի պաշտպան Հ. Հարությունյանը:
Մեղադրող Ա.Ամիրզադյանը փոխելով իր դիրքորոշումը դատական քննության արագացված կարգ կիրառելուն չառարկեց:
Դատարանը համոզվելով, որ առկա են ՀՀ քրեական դատավարության օրենսգրքի 3751 և 3752 հոդվածներով նախատեսված պայմանները, որոշում է կայացրել դատական քննության արագացված կարգ կիրառելու մասին:
4.Դատարանի իրավական վերլուծությունները.
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Մոհամադ Ռեզայի Մալաքութիխահիին առաջադրված մեղադրանքը ՀՀ քրեական օրենսգրքի 215 հոդվածի 1-ին մասով հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 215 հոդվածի 1-ին մասի հատկանիշներին և արարքի որակումը ճիշտ է:
Ամբաստանյալ Մոհամադ Ռեզայի Մալաքութիխահիի նկատմամբ պատիժ նշանակելիս, դատարանը հաշվի է առնում նրա կատարած արարքի հանրության համար վտանգավորության աստիճանը և բնույթը, ինչպես նաև հանցավորի անձը:
Որպես ամբաստանյալի անձը դրականորեն բնութագրող, պատասխանատվությունը և պատիժը մեղմացնող հանգամանքներ դատարանը հաշվի է առնում այն, որ նա հանցանքն ընդունել և զղջում է կատարածի համար, նախկինում դատված չի եղել:
Ամբաստանյալի պատասխանատվությունը և պատիժը ծանրացնող հանգամանքներ չկան:
Կատարած արարքի համար ամբաստանյալ Մոհամադ Ռեզայի Մալաքութիխահին ենթակա է քրեական պատասխանատվության և պատժի:
Հաշվի առնելով ամբաստանյալ Մոհամադ Մալաքութիխահիի կատարած արարքի հանրության համար վտանգավորության աստիճանը և բնույթը, նրա անձը, նրան դրականորեն բնութագրող տվյալները, պատասխանատվությունը և պատիժը մեղմացնող հանգամանքները, պատասխանատվությունը և պատիժը ծանրացնող հանգամանքների բացակայությունը, ինչպես նաև այն, որ ՀՀ քրեական օրենսգրքի 215 հոդվածի 1-ին մասի սանկցիայով նախատեսված է պատիժ նաև տուգանքի ձևով և պատժի նպատակներն ապահովելու համար առավել խիստ պատիժ նշանակելու անհրաժեշտությունը բացակայում է, դատարանը գտնում է, որ ամբաստանյալի նկատմամբ պատիժ պետք է նշանակել տուգանքի ձևով, իսկ նրա նկատմամբ կիրառված խափանման միջոցը պետք է թողնել անփոփոխ, մինչև դատավճռի օրինական ուժի մեջ մտնելը:
Սույն քրեական գործով մաքսանենգության առարկաները` ՀՀ ԿԱ ԱԱԾ քննչական վարչության տնտեսական պահեստում պահվող 13 հատ քարտրիջները, 7 հատ ֆաքսի կալկայի թղթերը, 50 հատ ֆաքսի քարտրիջները, 5 հատ գազի բալոնները, 8 հատ մեքենայի դիսկերը, 30 հատ ռուսերեն լեզվով գրքերը, 6 կգ քաշով կենդանու կնիքները, 14 հատ լոգարանի ջրի բաշխիչները, 26 հատ լոգարանի քրոմանիկելապատ խողովակները և 10 կգ քաշով դրա պարագաները, 50 տարաներում կարմիր բողկի և 24 տարաներում գազարի սերմերը ճանաչվել են իրեղեն ապացույց: ՀՀ քրեական օրենսգրքի 551 հոդվածի համաձայն նույն օրենսգրքի 215-րդ հոդվածով նախատեսված մաքսանենգության ճանապարհով Հայաստանի Հանրապետության սահմանով տեղափոխված մաքսանենգության առարկաների, իսկ վերջիններիս բացակայության դեպքում` դրանց արժեքի բռնագրավումը պարտադիր է: ՈՒստի, դատարանը գտնում է, որ իրեղեն ապացույցները ենթակա են բռնագրավման:
Դատարանը գտնում է, որ Մոհամադ Ռեզայի Մալաքութիխահիից պետք է բռնագանձել ապրանքագիտական և կենսաբանական փորձաքննության համար վճարվելիք գումարը` 41 400 ՀՀ դրամը (հիմք` փորձագետի 2011թ. նոյեմբերի 30-ի հմ. 44651110 եզրակացությանը կից հաշիվ-ապրանքագիր հանդիսացող հանձնման-ընդունման արձանագրությունը:
Դատարանը գտնում է, որ քրեական գործում առկա, ապացույց ճանաչված, այլ փաստաթուղթ հանդիսացող, ԱԱԾ ՀՀԳՎ 8-րդ բաժնի աշխատակիցների կողմից ավտոբուսի զննման արդյունքների վերաբերյալ կազմված արձանագրությունը պետք է պահել քրեական գործում:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 357-360, 3753 և 3754 հոդվածներով, դատարանը

Վ Ճ Ռ Ե Ց

Մոհամադ Ռեզայի Մալաքութիխահիին մեղավոր ճանաչել ՀՀ քրեական օրենսգրքի 215 հոդվածի 1-ին մասով նախատեսված հանցանք կատարելու մեջ և նրան դատապարտել տուգանքի նվազագույն աշխատավարձի հազարապատիկի` մեկ միլիոն /1.000.000/ ՀՀ դրամի չափով, մաքսանենգության առարկաների /իրեղեն ապացույց հանդիսացող 13 հատ քարտրիջներ, 7 հատ ֆաքսի կալկայի թղթեր, 50 հատ ֆաքսի քարտրիջներ, 5 հատ գազի բալոններ, 8 հատ մեքենայի դիսկեր, 30 հատ ռուսերեն լեզվով գրքեր, 6 կգ քաշով կենդանու կնիքներ, 14 հատ լոգարանի ջրի բաշխիչներ, 26 հատ լոգարանի քրոմանիկելապատ խողովակներ և 10 կգ քաշով դրա պարագաներ, 50 տարրաներում կարմիր բողկի և 24 տարաներում գազարի սերմեր/ բռնագրավմամբ:
Մոհամադ Ռեզայի Մալաքութիխահիի նկատմամբ որպես խափանման միջոց ընտրված չհեռանալու մասին ստորագրությունը թողնել անփոփոխ, մինչև դատավճռի օրինական ուժի մեջ մտնելը:
Մոհամադ Ռեզայի Մալաքութիխահիից հօգուտ ՀՀ պետական բյուջեի բռնագանձել քառասունմեկ հազար չորս հարյուր /41 400/ ՀՀ դրամ, որպես դատական ծախս:
Ապացույց ճանաչված, այլ փաստաթուղթ հանդիսացող ԱԱԾ ՀՀԳՎ 8-րդ բաժնի աշխատակիցների կողմից ավտոբուսի զննման արդյունքների վերաբերյալ կազմված արձանագրությունը պահել քրեական գործում:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակվելու օրվանից հետո մեկամսյա ժամկետում:
Դատավճիռը չի կարող բողոքարկվել ՀՀ քրեական դատավարության օրենսգրքի 395 հոդվածի 1-ին կետով նախատեսված հիմքով:


Դատավոր` ստորագրություն
Բնագրի հետ ճիշտ է
Դատավոր Լ. Ավետիսյան