ԵԱՔԴ/0020/01/12

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանը`

նախագահող դատավոր` Լ. Ավետիսյան
քարտուղարությամբ` Ն. Ղազարյանի
մասնակցությամբ
մեղադրող` Ա. Փանոսյանի
պաշտպաններ` Ա. Շահբազյանի, Ա. Մնացականյանի
թարգման` Ա. Քիխամեկերդիջի


2012 թվականի հոկտեմբերի 8-ին, Երևան քաղաքում, դռնբաց դատական նիստում, քննեց քրեական գործն ըստ մեղադրանքի Էռնեստ Արայիկի Պետրոսյանի, ծնված 1979 թվականի հուլիսի 16-ին, Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուրի, խնամքին ոչ ոք, նախկինում չդատված, չի աշխատել, հաշվառված և բնակվել է Երևան քաղաքի Սարմենի փողոց 13 շենք թիվ 20 բնակարան հասցեում, մեղադրվում է ՀՀ քրեական օրենսգրքի 258 հոդվածի 4-րդ մասով, կալանքի տակ է 2011 թվականի դեկտեմբերի 7-ից,

Պ Ա Ր Զ Ե Ց

1.Գործի դատավարական նախապատմությունը.
2009թ. նոյեմբերի 23-ին ՀՀ քրեական օրենսգրքի 308 հոդվածի 1-ին մասով հարուցվել է թիվ 62208209 քրեական գործը:
2009թ. դեկտեմբերի 22-ին ՀՀ գլխավոր դատախազի որոշմամբ նյութերով քրեական գործի հարուցումը մերժելու մասին ՀՀ ոստիկանության Արաբկիրի բաժնի հետաքննիչ Դ.Աթոյանի կողմից 2008թ. դեկտեմբերի 5-ին կայացրած որոշումը վերացվել է, դեպքի առթիվ ՀՀ քրեական օրենսգրքի 258 հոդվածի 4-րդ մասով հարուցվել է քրեական գործ:
Քրեական գործի նախաքննությունը հանձնարարվել է ՀՀ հատուկ քննչական ծառայությանը:
2009թ. դեկտեմբերի 23-ին ՀՀ հատուկ քննչական ծառայության ՀԿԳ քննիչի որոշմամբ թիվ 62208209 և թիվ 61206109 քրեական գործերը միացվել են մեկ վարույթում:
2010թ. փետրվարի 26-ին Էռնեստ Արայիկի Պետրոսյանը ներգրավվել է որպես մեղադրյալ ՀՀ քրեական օրենսգրքի 258 հոդվածի 4-րդ մասով, նրա նկատմամբ հայտարարվել է հետախուզում և որպես խափանման միջոց կիրառվել կալանավորումը:
2010թ. մարտի 16-ին նախաքննական մարմնի որոշմամբ թիվ 62208209 քրեական գործից անջատվել է թիվ 61206109 քրեական գործը:
2010թ. ապրիլի 1-ին նախաքննությունը շարունակելու համար թիվ 61206109 քրեական գործն ուղարկվել է ՀՀ ոստիկանության քննչական գլխավոր վարչության Երևան քաղաքի քննչական վարչության ծանր հանցագործությունների քննության բաժին:
2010թ. մայիսի 23-ին թիվ 61206109 քրեական գործի վարույթը կասեցվել է` ՀՀ քրեական դատավարության օրենսգրքի 31 հոդվածի 1-ին մասի 2-րդ կետով նախատեսված հիմքով:
2011թ. դեկտեմբերի 7-ին Էռնեստ Արայիկի Պետրոսյանը ձերբակալվել է:
2011թ. դեկտեմբերի 8-ին թիվ 61206109 քրեական գործով կասեցված վարույթը վերսկսվել է:
2011թ. դեկտեմբերի 9-ին Էռնեստ Արայիկի Պետրոսյանի նկատմամբ որպես խափանման միջոց ընտրված կալանքը վերահաստատվել է:
2012թ. փետրվարի 20-ին նախաքննական մարմնի որոշմամբ Էռնեստ Արայիկի Պետրոսյանին առաջադրված մեղադրանքը փոփոխվել և նրան մեղադրանք է առաջադրվել ՀՀ քրեական օրենսգրքի 258 հոդվածի 3-րդ մասի 2-րդ կետով այն արարքի կատարման համար, որ նա 2008թ.-ի նոյեմբերի 25-ին ժամը 0230-ի սահմաններում գտնվելով Երևան քաղաքի Բաղրամյան 2 հասցեում տեղակայված ՙՊիոներ՚ ակումբում, դրսևորելով բացահայտ անհարգալից վերաբերմունք ակումբի աշխատակիցների, սրահում գտնված այլ հաճախորդների նկատմամբ, դիտավորությամբ կոպիտ կերպով խախտել է հասարարակական կարգը, որը զուգորդվել է հասարարակական կարգի պահպանության պարտականություն իրականացնող անձի նկատմամբ բռնություն գործադրելու սպառնալիքով և դիմադրություն ցույց տալով, այն է.
հանել է իր վերնաշապիկը, կիսամերկ վիճակում կանգնել է բազմոցների վրա, վերնահագուստը թափահարել օդում, սեղանին դրված սառույցի բեկորներ է շպրտել, ակումբի աշխատակիցների նկատմամբ բարձրաձայն անպարկեշտ արտահայտություններ արել, որով խափանել է ակումբի բնականոն աշխատանքը: Ակումբում հասարարակական կարգն ու անվտանգությունն ապահովող ՙՊանտեռա՚ գործակալության աշխատակիցներ` Նորայր Ղուկասյանի ու Սարգիս Հովհաննիսյանի նախազգուշացումներից հետո, չենթարկվելով խուլիգանական գործողությունները դադարեցնելու վերաբերյալ նրանց օրինական պահանջներին, դիմադրել է, վիճաբանության մեջ է մտել վերջիններիս հետ և շարունակել իր խուլիգանական գործողությունները, իսկ Ն.Ղուկասյանի երկրորդ անգամ կատարված նախազգուշացմանը` տվել է վերջինիս նկատմամբ բռնություն գործադրելու սպառնալիք:
Այնուհետև, խուլիգանական գործողությունների ավարտից հետո անվտանգության աշխատակից Նորայր Ղուկասյանի հետ անձնական հարցերը պարզաբանելու համար, Է.Պետրոսյանն իր նախաձեռնությամբ Ն.Ղուկասյանին հրավիրել է ակումբից դուրս, որտեղ վիճաբանել է Ն.Ղուկասյանի հետ, որի ընթացքում նրան տվել է սպանության ապառնալիք, ինչպես նաև առաջացած կռվի ժամանակ դանակով դիտավորությամբ վնասելով Ն.Ղուկասյանի ձախ նախաբազուկը, նրա առողջությանը պատճառել է կարճատև քայքայումով թեթև մարմնական վնասվածք: Նույն վիճաբանության ընթացքում անզգուշությամբ մարմնական վնասվածք է պատճառել նաև Սարգիս Հովհաննիսյանին, երբ վերջինս բռնելով դանակի շեղբից փորձել է խլել Էռնեստ Պետրոսյանի ձեռքից: Վերջին դրվագով Է.Պետրոսյանը կատարել է ՀՀ քրեական օրենսգրքի 117 և 137 հոդվածի 1-ին մասով նախատեսված հանցավոր արարքներ:
2012թ. փետրվարի 20-ին նախաքննական մարմնի որոշմամբ Էռնեստ Պետրոսյանի նկատմամբ ՀՀ քրեական օրենսգրքի 117 և 137 հոդվածի 1-ին մասով քրեական հետապնդում չի իրականացվել` բողոքի բացակայության պատճառաբանությամբ:
2012թ. փետրվարի 23-ին թիվ 61206109 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
2.Գործի փաստական հանգամանքները.
Դատաքննության ընթացքում մեղադրողի 2012 թվականի հուլիսի 26-ի որոշմամբ Էռնեստ Արայիկի Պետրոսյանին առաջադրված մեղադրանքը փոփոխվել և նրան նոր մեղադրանք է առաջադրվել ՀՀ քրեական օրենսգրքի 258 հոդվածի 4-րդ մասով այն արարքի կատարման համար, որ նա 2008թ. նոյեմբերի 25-ին` ժամը 0230-ի սահմաններում, հասարակական վայր հանդիսացող Երևան քաղաքի Բաղրամյան 2 հասցեում գտնվող ՙՊիոներ՚ գիշերային ակումբում, ոգելից խմիչքի ազդեցության տակ, կոպիտ կերպով խախտելով հասարակական կարգը և բացահայտ անհարգալից վերաբերմունք դրսևորելով հասարակության` գիշերային ակումբի աշխատակիցների և ներկա հաճախորդների նկատմամբ, հանել է իր վերնաշապիկը, կիսամերկ վիճակում կանգնել բազմոցների վրա, վերնաշապիկը թափահարել օդում, սեղանին դրված սառույցի բեկորներ նետել, բարձրաձայն անպարկեշտ արտահայտություններ արել ակումբի աշխատակիցների հասցեին` խափանելով ակումբի բնականոն աշխատանքը: Ակումբում հասարակական կարգն ու անվտանգությունն ապահովող աշխատակիցներ Նորայր Ղուկասյանի և Սարգիս Հովհաննիսյանի նախազգուշացումներից հետո, չենթարկվելով խուլիգանական գործողությունները դադարեցնելու վերաբերյալ նրանց օրինական պահանջներին, Էռնեստ Պետրոսյանը չի դադարեցրել իր խուլիգանական գործողությունները և դիմադրելով հասարակական կարգի խախտումը խափանող նշված անձանց` բռնություն գործադրելու սպառնալիք է տվել Նորայր Ղուկասյանին:
Հասարակության մեջ ընդունված վարքագծի կանոններից իր անկախությունն ապացուցելու, հասարակությանն իր գերակայությունը ցուցադրելու և իր առավելությունն ընդգծելու ձգտումով Էռնեստ Պետրոսյանը Նորայր Ղուկասյանին կանչել է ակումբի նախասրահ` մուտքի դռան մոտ, որտեղ շարունակելով իր խուլիգանական գործողությունները վիճաբանել է Նորայր Ղուկասյանի և Սարգիս Հովհաննիսյանի հետ, բռնություն գործադրել նրանց նկատմամբ, տվել հայհոյանքներ, սպառնալիքներ, այդ ընթացում գործադրելով իր մոտ եղած դանակը: Այնուհետև նույն դանակով դիտավորությամբ հարվածել է Նորայր Ղուկասյանին և Սարգիս Հովհաննիսյանին` նրանց առոոջությանը պատճառել թեթև վնաս:
3.Ապացույցների հետազոտում.
Առաջադրված մեղադրանքում ամբաստանյալ Էռնեստ Արայիկի Պետրոսյանն իրեն մեղավոր չճանաչեց և հրաժարվեց ցուցմունք տալ:
Էռնեստ Պետրոսյանի նախաքննության ընթացքում ցուցմունքներ է տվել այն մասին, որ դեպքի օրը եղբոր և հոր հետ միասին այցելել է ՙՊիոներ՚ գիշերային ակումբ` զվարճանալու: Ինքը մշտապես բնակվել է ԱՄՆ-ում, որտեղ նման կարգի ակումբներում թույլատրվել է, գրեթե, ամեն ինչ, ուստի իրեն ազատ է զգացել, պարել է, զվարճացել, որի ընթացքում նաև հանել է վերնաշապիկը, կանգնել բազմոցներին, սառույցներ նետել։ Իրեն մոտեցել և զգուշացրել են անվտանգության աշխատակիցները: Վերջիններս բացատրել են, որ ակումբում նման վարքագիծ դրսևորելն անթույլատրելի է, այն խանգարում է մյուս հաճախորդների հանգիստը։ Չնայած ինքն ընդունել է դիտողությունը, սակայն ընթացքում ոգևորվելով, կրկին հանել է վերնաշապիկը և պարել բազմոցների վրա։ Այդ ժամանակ մոտեցել է անվտանգության աշխատակիցներից մեկը և կրկին հրամայական տոնով դիտողություն է արել։ Ինքն ասել է, որ եկել է հարազատների հետ զվարճանալու, գումար է ծախսել, որ ուրախանա և ոչ թե նստած մնա։ Իր պատասխանին հետևել է անվտանգության աշխատակցի էլ ավելի հրամայական պահանջն ու կեցվածքը։ Դրանից հետո տեսնելով, որ խոսակցությունը կարող է վերաճել կռվի, որին կարող էին խառնվել հարազատներն ու այլ հաճախորդներ, այն աշխատակցին, որն իր հետ հրամայական տոնով է խոսել, դուրս է հրավիրել զրուցելու։ Դուրս գալով ակումբից, մուտքի դռան մոտ զրուցել է անվտանգության աշխատակցի և այդ ընթացքում իրենց միացած ևս 2 հաղթանդամ աշխատակիցների հետ։ Խոսակցության ընթացքում միմյանց չհասկանալով կռվել են, որի ընթացքում վերջիններս իրեն պառկեցրել են գետնին, սակայն երբ ամեն ինչ հանդարտվել է, ինքը վճարելով մատուցված ծառայությունների համար` հեռացել է: Եթե հայաստանյան չափանիշներով իր կատարածը համարվում է խուլիգանություն, ապա ընդունում է, որ կատարել է խուլիգանություն: Պնդել է, որ ինքը դանակ չի գործադրել:
Էռնեստ Պետրոսյանը առաջադրված նոր մեղադրանքի հետ կապված հայտարարել է, որ ինքը գիշերային ակումբ է գնացել զվարճանալու նպատակով, անվտանգության ծառայության աշխատակիցներն են վեճ հրահրել, բռնություն գործադրել իր նկատմամբ, ինքը միայն պաշտպանվել է: Ծեծկռտուքի ժամանակ ինքը մենակ է եղել, իսկ անվտանգության աշխատակիցները` չորս հոգի: Ինքը դանակ չի գործադրել: Նրանք փայտերով ծեծել են իրեն: Հարվածել են գլխին, ստացել է մատի կտրվածք, կողերը կապտել են: Դիմել է բժշկի և իրեն օգնություն են ցույց տվել: Երբ իր հայրը և եղբայրը եկել են հանդարտեցնելու, սկսել են նրանց էլ հարվածել: Փայտով հարվածներ հասցրել են նաև իր հոր գլխին, որի հետևանքով վերջինս գլխի լուրջ վնասվածքներ է ստացել:
Ամբաստանյալին մեղսագրված հանցանքը հիմնավորվել է հետևյալ ապացույցներով.
Վկա Ալինա Թագվորյանի ցուցմունքով այն մասին, որ աշխատել է ՙՊիոներ՚ գիշերային ակումբում որպես պարուհի: Ամբաստանյալին ճանաչում է որպես ակումբի հաճախորդ: Նա հաճախ չէր գալիս ակումբ, հանգիստ հաճախորդ էր: Դեպքի օրն ամբաստանյալը եկել է երկու երեք հոգով, նրանց կողմից որևէ բացասական բան չի տեսել: Ինքը բեմի վրա պարելիս նկատել է, որ ակումբում անվտանգության աշխատակիցները և ամբաստանյալն իրար քաշքշում են: Հետո իրենք հանդերձարան են մտել: Ինքը գտնվել է հանդերձարանում և չի տեսել, սակայն լսել է հայոյանք, գոռգոռոց: Դրանից հետո ակումբի աշխատանքը դադարել է, իրենք չեն աշխատել և ակումբի հաճախորդները հեռացել են: Ընդհանրապես ակումբի աշխատանքն ավարտվում է ժամը 5-ից 6-ը, սակայն այդ օրն ավարտվել է ժամը երկուսի կամ երեքի սահմաններում:
Վկա, ՙՊիոներ՚ ակումբի պարուհի Ալինա Թագվորյանը նախաքննության ընթացքում տված ցուցմունքով հայտնել է, որ դեպքի օրը բեմի վրա պարելիս, նկատել է, որ սրահում նստած մի երիտասարդ հանել է վերնահագուստն ու թափահարում, կանգնել բազմոցների վրա, աղմկել, անկանոն շարժումներ արել: Սկզբում անվտանգության աշխատակիցներն այդ երիտասարդին մի քանի անգամ նախազգուշացրել են, սակայն վերջինս շարունակել է նույն պահվածքը: Տեսել է, որ երիտասարդը չի ենթարկվում անվտանգության աշխատակցի պահանջներին ու զրույցը նմանվել է վիճաբանության: Տեսնելով վիճաբանությունը, դադարեցրել է պարը և գնացել հանդերձարան: Քիչ անց ակումբի նախասրահից լսել է վիճաբանության ձայներ, գոռգոռոցներ: Վիճաբանությունը տևել է շուրջ 15 րոպե, որի պատճառով մյուս հաճախորդները հեռացել են ակումբից և ակումբի աշխատանքը դադարել է:
Վկաներ, ՙՊանտեռա՚ ընկերության աշխատակիցներ Սարգիս Հովհաննիսյանի, Նորայր Ղուկասյանի և Դավիթ Թորոսյանի նախաքննության ընթացքում տված նույնաբովանդակ ցուցմունքներով այն մասին, որ դեպքի օրը ՙՊիոներ՚ գիշերային ակումբում իրականացրած ծառայության ընթացքում մերկապարուհիներն ու սպասարկող անձնակազմի աշխատակիցներն իրենց հայտնել են, որ սրահում մի երիտասարդ, ինչպես հետագայում տեղեկացել են հանդիսանում է Էռնեստ Պետրոսյանը, պատշաճ վարքագիծ չի դրսևորում: Նա հանել է վերնաշապիկը, կանգնել բազմոցների վրա, գոռգոռացել, սառույցներ նետել, վիրավորել մերկապարուհիներին, դրանով խանգարել ակումբի աշխատանքները։ Իրենք մոտեցել են այդ հաճախորդին, ներկայացել որպես ակումբի անվտանգության աշխատակից և պահանջել դրսևորել պատշաճ վարքագիծ: Քիչ անց Էռնեստ Պետրոսյանը շարունակել է նույն գործողությունները։ Նորայր Ղուկասյանը մոտեցել և կրկին պահանջել է դրսևորել պատշաճ վարքագիծ, սակայն դրան ի պատասխան Էռնեստ Պետրոսյանը սկզբում հայտնել է, թե գումար են վճարել և կարող են ամեն ինչ անել, իսկ երկրորդ զգուշացման ժամանակ՝ տվել է բռնություն գործադրելու սպառնալիք։ Միջամտել է Էռնեստ Պետրոսյանի եղբայրը` հանդարտեցնելով նրան։ Կարճ ժամանակ անց Էռնեստ Պետրոսյանը մոտենալով Նորայր Ղուկասյանին` առաջարկել է դուրս գալ սրահից։ Երբ դուրս են եկել ակումբի սրահից՝ շքամուտքի մոտ վիճաբանություն է ծագել Նորայր Ղուկասյանի և Էռնեստ Պետրոսյանի միջև, որի ընթացքում վերջինս դանակը պահել է Նորայր Ղուկասյանի պարանոցին և հայհոյելով սպառնացել կտրել նրա պարանոցը: Անվտանգության ծառայության աշխատակիցները մի կողմ են հրել Էռնեստ Պետրոսյանին, որից հետո վերջինս կրկին հարձակվել է Նորայր Ղուկասյանի վրա և փորձել դանակով հարվածներ հասցնել նրան: Նորայր Ղուկասյանը պաշտպանվել է մի քանի հարվածներից, սակայն Էռնեստ Պետրոսյանը դանակով հարվածել է նրա ձախ ձեռքի նախաբազկին: Սարգիս Հովհաննիսյանը և Դավիթ Թորոսյանը շուրջ 5 րոպե փորձել են Էռնեստ Պետրոսյանից խլել դանակը, սակայն վերջինս ազատվելով` դանակով կտրել է նաև Սարգիս Հովհաննիսյանի ձախ ձեռքի բութ մատը: Սարգիս Հովհաննիսյանի և Դավիթ Թորոսյանի գործողությունների արդյունքում Էռնեստ Պետրոսյանը դանակը գցել է գետնին, որից հետո Սարգիս Հովհաննիսյանն այն ոտքով հրել է ակումբի սրահի կողմ, որտեղ հավաքված են եղել ակումբի աշխատակիցներ, ովքեր հետևել են նրանց գործողություններին։ Կարճ ժամանակ անց, երբ Էռնեստ Պետրոսյանը սթափվել է, թույլատրել են նրան գնալ և վերջինս վճարելով մատուցված ծառայությունների համար, հեռացել է։ Էռնեստ Պետրոսյանի խուլիգանական գործողություններն ակումբի սրահում տևել են շուրջ 20, իսկ սրահից դուրս` շուրջ 5 րոպե:
Վկա, ՙՊիոներ՚ ակումբի մենեջեր Ալինա Կուրղինյանի նախաքննության ընթացքում տված ցուցմունքով այն մասին, որ 28.11.2008թ.-ի ժամը 02-ի սահմաններում մատուցող Մարիամ Սամվելյանն ու մերկապարուհինները բողոքել են, որ հաճախորդներից մի երիտասարդ, ինչպես հետագայում տեղեկացել է` Էռնեստ Պետրոսյանը, սրահում հանել է վերնահագուստը, սառույցներ նետել մերկապարուհիների ուղղությամբ, անհանգստացրել է մերկապարուհիներին, խանգարել ակումբի աշխատանքները: Այդ մասին տեղեկացրել են անվտանգության աշխատակիցներին: Ինքը նկատել է, որ անվտանգության ծառայության աշխատակիցները հաճախորդի հետ դուրս են եկել ակումբի սրահից: Մի քանի րոպե անց լսվել են գոռգոռոցներ: Ինքը դուրս է եկել նախասրահ և տեսել, որ անվտանգության ծառայության աշխատակիցները վիճաբանում են հաճախորդի հետ: Վիճաբանությանն իր հետ հետևել են նաև մատուցողները, պարուհիները, հնչել են հայհոյանքներ, որից հետո ինքը հեռացել է խոհանոց: Վիճաբանությունը տևել է շուրջ 5 րոպե, դրա հետևանքով խախտվել է ակումբի աշխատանքը, բոլոր հաճախորդները հեռացել են և այդ օրն ակումբն այլևս չի աշխատել: Վիճաբանության ավարտից հետո խոսակցություններից տեղեկացել է, որ հաճախորդը դանակով հարվածել և վնասվածքներ է պատճառել անվտանգության ծառայության աշխատակիցներ Նորայրին և Սարգսին:
Վկա, ՙՊիոներ՚ ակումբի մատուցող Մարիամ Սամվելյանի նախաքննության ընթացքում տված ցուցմունքով այն մասին, որ դեպքի օրը սպասարկել է Երվանդ անունով մի տղայի, որը ակումբում գտնվել է եղբոր և հոր հետ միասին: Ընթացքում նկատել է, որ Երվանդի եղբայրը հանել է վերնահագուստը և թափահարել օդում, ում մոտեցել են անվտանգության աշխատակիցները: Որոշ ժամանակ անց նկատել է, որ նշված հաճախորդն անվտանգության ծառայության աշխատակիցների հետ դուրս է եկել սրահից: Այնուհետև նախասրահից լսվել են գոռգոռոցներ և աղմուկ, ինքը մենեջերի, մյուս մատուցողների հետ գնացել է դեպի նախասրահ, լսել են հայհոյանքներ և կրկին գնացել ներս: Վիճաբանության ավարտից հետո նախասրահի հատակին նկատել է կոր շեղբով դանակ, որը վերցրել և տվել է ակումբի տնօրենին: Հետագայում տեղեկացել է, որ վիճաբանության ընթացքում անվտանգության ծառայության աշխատակիցներին դանակով վնասվածքներ են պատճառվել: Նախասրահում վիճաբանությունը, աղմուկը և հայհոյանքները տևել են շուրջ 5 րոպե և դրա հետևանքով ակումբի աշխատանքը դադարեցվել է:
Լուսանկարով անձին ճանաչման ներկայացնելու արձանագրությունով, ըստ որի Նորայր Ղուկասյանը ճանաչել է Էռնեստ Պետրոսյանին և հայտարարել, որ վերջինս 2008թ. նոյեմբերի վերջին ՙՊիոներ՚ գիշերային ակումբում տեղի ունեցած դեպքի ժամանակ դանակով հարվածել և վնասվածքներ է պատճառել իրեն ու Սարգիս Հովհաննիսյանին:
Թիվ 62208209 քրեական գործով ՀՀ հատուկ քննչական ծառայության քննիչի կողմից կազմված մեղադրական եզրակացությամբ և նույն գործով Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի 28.04.2010թ.-ի մեղադրական դատավճռով` ըստ մեղադրանքի ոստիկանության աշխատակիցներ Հ.Սիմոնյանի և Դ.Աթոյանի, որոնցով հաստատվել է 25.11.2008թ.-ին Երևան քաղաքի Բաղրամյան 2 հասցեում գտնվող ՙՊիոներ՚ գիշերային ակումբում տեղի ունեցած դեպքի կատարման փաստն ու հանգամանքները:
Դատաբժշկական փորձաքննության փորձագետի թիվ 2849 եզրակացությամբ, համաձայն որի Ն.Ղուկասյանի ստացած մարմնական վնասվածքը, ըստ բժշկական փաստաթղթերի` ձախ նախաբազկի շրջանի կտրած վերքի /այժմյան սպիի/ ձևով, պատճառվել է սուր ծակող-կտրող կամ կտրող գործիքով, այդ թվում` նաև դանակով, հնարավոր է որոշման մեջ նշված ժամկետում և պատճառել է առողջությանը թեթև վնաս` առողջության կարճատև քայքայումով, նկատի ունենալով վնասվածքի հետ անմիջական պատճառական կապի մեջ եղած հետևանքների տևողությունը ոչ պակաս 6 օրից և ոչ ավելի 21 օրից:
Դատաբժշկական փորձաքննության փորձագետի թիվ 2861 եզրակացությամբ, համաձայն որի Ս.Հովհաննիսյանի ստացած մարմնական վնասվածքները` ձախ դաստակի 1-ին մատի թիկնային մակերեսի ներկայիս սպիների, նախկինում եղած կտրած վերքերի ձևերով, հասցվել են սուր կտրող, կամ ծակող կտրող գործիքով, ինչպիսին կարող էր հանդիսանալ նաև դանակը, հնարավոր է նշված ժամկետում և պատճառել են առողջությանը թեթև վնաս` առողջության կարճատև քայքայումով, նկատի ունենալով վնասվածքների հետ անմիջական պատճառական կապի մեջ եղած հետևանքների տևողությունը ոչ պակաս 6 օրից և ոչ ավելի 21 օրից:
Էռնեստ Պետրոսյանի վերաբերյալ բժշկական փաստաթղթերով:
Դատարանը քննության առնելով պաշտպանի միջնորդությունը` փորձագետի եզրակացությունները դեպքից մեկ տարի հետո տրված լինելու հիմքով անթույլատրելի ճանաչելու վերաբերյալ, գտնում է, որ այն ենթակա է մերժման, նկատի ունենալով, որ փորձաքննությունները կատարվել և եզրակացությունները տրվել են սպիների առկայության պայմաններում:
Դատարանը գտնում է, որ Էռնեստ Պետրոսյանի ստացած մարմնական վնասվածքների վերաբերյալ բժշկական փաստաթղթերը նրան առաջադրված մեղադրանքին վերաբերելի չեն և դրանք որպես ապացույց չեն կարող գնահատվել:
4.Դատարանի իրավական վերլուծությունները.
Վերլուծելով և գնահատելով դատական քննության ժամանակ հետազոտված ապացույցներն իրենց համակցության մեջ, դատարանը ձեռք բերված ապացույցները բավարար է գտնում և գործի փաստական հանգամանքներով հաստատված է համարում, որ ամբաստանյալ Էռնեստ Պետրոսյանը կատարել է խուլիգանություն, որը կատարել է որպես զենք օգտագործվող առարկայի` դանակի գործադրմամբ, որպիսի արարքը համապատասխանում է ՀՀ քրեական օրենսգրքի 258 հոդվածի 4-րդ մասի հատկանիշներին:
Ամբաստանյալ Էռնեստ Պետրոսյանի նկատմամբ պատիժ նշանակելիս, դատարանը հաշվի է առնում նրա կատարած արարքի հանրության համար վտանգավորության աստիճանը, ինչպես նաև հանցավորի անձը:
Որպես ամբաստանյալ Էռնեստ Պետրոսյանի պատասխանատվությունը և պատիժը մեղմացնող հանգամանք դատարանը հաշվի է առնում այն, որ նա նախկինում դատված չի եղել:
Ամբաստանյալի պատասխանատվությունը և պատիժը ծանրացնող հանգամանքներ չկան:
Կատարած արարքի համար ամբաստանյալ Էռնեստ Արայիկի Պետրոսյանը ենթակա է քրեական պատասխանատվության և պատժի:
Հաշվի առնելով Էռնեստ Պետրոսյանի կատարած արարքի հանրության համար վտանգավորության աստիճանը և բնույթը, նրա անձը, ինչպես նաև այն, որ ՀՀ քրեական օրենսգրքի 258 հոդվածի 4-րդ մասի սանկցիայով նախատեսված է պատիժ միայն ազատազրկման ձևով, դատարանը գտնում է, որ պատժի նպատակներին հասնելու համար Էռնեստ Արայիկի Պետրոսյանի նկատմամբ ՀՀ քրեական օրենսգրքի 258 հոդվածի 4-րդ մասով նախատեսված արարք կատարելու համար պատիժ պետք է նշանակել ազատազրկման ձևով, որը նա պետք է կրի ՀՀ ԱՆ համապատասխան քրեակատարողական հիմնարկում, իսկ նրա նկատմամբ կիրառված խափանման միջոցը պետք է թողնել անփոփոխ, մինչև դատավճռի օրինական ուժի մեջ մտնելը:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 357-360, 365, 369-372 հոդվածներով, դատարանը

Վ Ճ Ռ Ե Ց

Էռնեստ Արայիկի Պետրոսյանին մեղավոր ճանաչել ՀՀ քրեական օրենսգրքի 258 հոդվածի 4-րդ մասով նախատեսված հանցանք կատարելու մեջ և նրան դատապարտել ազատազրկման չորս (4) տարի ժամկետով:
Պատժի սկիզբը հաշվել 2011 թվականի դեկտեմբերի 7-ից:
Պատիժը պետք է կրի ՀՀ ԱՆ համապատասխան քրեակատարողական հիմնարկում:
Էռնեստ Արայիկի Պետրոսյանի նկատմամբ որպես խափանման միջոց ընտրված կալանավորումը թողնել անփոփոխ, մինչև դատավճռի օրինական ուժի մեջ մտնելը:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակվելու օրվանից հետո մեկամսյա ժամկետում:

Դատավոր` ստորագրություն
Բնագրի հետ ճիշտ է
Դատավոր Լ. Ավետիսյան