Գործ NԵԱՔԴ/0016/01/12

ՈՐՈՇՈՒՄ

ՔՐԵԱԿԱՆ ԳՈՐԾԻ ՎԱՐՈՒՅԹԸ ԿԱՐՃԵԼՈՒ ԵՎ ՔՐԵԱԿԱՆ
ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ՄԱՍԻՆ

14.03.2012թ. ք. Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը`

նախագահությամբ` դատավոր Ա.Մկրտչյանի
քարտուղարությամբ` Շ.Վանոյանի
մասնակցությամբ`
մեղադրող Հ.Մարտիրոսյանի
ամբաստանյալ Ս.Աբրահամյանի
տուժող Ա.Սարգսյանի

Դռնբաց դատական նիստում քննության առնելով քրեական գործն ըստ մեղադրանքի Սահակ Էդուարդի Աբրահամյանի /ծնված 04.07.1982թ. ք.Երևան, ազգությամբ հայ, ՀՀ քաղաքացի, ամուսնացած, բարձրագույն կրթությամբ, չի աշխատում, հաշվառված` ք.Երևան, Աջափնյակ, Մարգարյան փող. 27շ., բն. 40, նախկինում դատված` ՀՀ քրեական օրենսգրքի 179-րդ հոդվածի 2-րդ մասի 4-րդ կետով դատապարտվել է ազատազրկման 2 տարի ժամկետով, ՀՀ քրեական օրենսգրքի 67-րդ հոդվածի համաձայն, դատավճիռների համակցությամբ, Սյունիքի մարզի առաջին ատյանի դատարանի 2005թ. հուլիսի 26-ի դատավճռով Ս.Աբրահամյանի նկատմամբ 3 տարի 6 ամիս ազատազրկման ձեւով նշանակված եւ չկրած 1 տարի 7 ամիս 14 օր պատժից նոր նշանակված պատժին մասնակիորեն գումարվել է 6 ամիս, վերջնականպես թողնվել է կրելու ազատազրկում 2 տարի 6 ամիս, պատժից ազատվել է 07.05.2010թ./:
Մեղադրվում է ՀՀ քրեական օրենսգրքի 177-րդ հոդվածի 1-ին մասով.

Պ Ա Ր Զ Ե Ց

Նախաքննության մարմինը Սահակ Էդուարդի Աբրահամյանին մեղադրանք է առաջադրել ՀՀ քրեական օրենսգրքի 177-րդ հոդվածի 1-ին մասով այն արարքի համար, որ ՙ2011թ. նոյեմբերի 16-ին, ժամը 21:00-ի սահմաններում, գտնվելով իր ընկեր Ալբերտ Վաչիկի Սարգսյանի` Երևան քաղաքի Դավիթաշեն 1-ին թաղամասի 13 շենքի 14 բնակարանում, վերջինիս բաճկոնի գրպանից գաղտնի հափշտակել է դրամապանակը, որում եղած ՙԱԳԲԱ կրեդիտ ագրիկոլ բանկ՚ ՓԲԸ պլաստիկ քարտով հաջորդ օրը` 17.11.2011թ. ՙԱրարատբանկ՚ ՓԲ ընկերության Ազատության 4 հասցեում գտնվող բանկոմատից կանխիկացրել է 276.000 ՀՀ դրամ գումար և տիրացել` Ա.Սարգսյանին պատճառելով զգալի չափերի հասնող գույքային վնաս՚:
Տուժող Ալբերտ Սարգսյանը մինչև դատաքննության սկսելն ներկայացրեց գրավոր դիմում և հայտարարեց, որ հաշտվել է Սահակ Աբրահամյանի հետ, որևէ բողոք կամ նյութական պահանջ չունի, և խնդրեց գործի վարույթը կարճել:
Ամբաստանյալ Սահակ Աբրահամյանը նույնպես հայտարարեց, որ ինքը հաշտվել է տուժող Ա.Սարգսյանի հետ:
Դատարանը գտնում է, որ նշված պայմաններում քրեական գործի վարույթը ենթակա է կարճման, իսկ քրեական հետապնդումը` դադարեցման հետևյալ պատճառաբանությամբ.
ՀՀ քրեական օրենսգրքի 35-րդ հոդվածի 1-ին մասի 5-րդ կետի` քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե սույն օրենսգրքով նախատեսված դեպքերում տուժողը հաշտվել է կասկածյալի կամ մեղադրյալի հետ:
ՀՀ քրեական դատավարության օրենսգրքի 183-րդ հոդվածի համաձայն` ՀՀ քրեական օրենսգրքի 177-րդ հոդվածի 1-ին մասով նախատեսված հանցագործությունների վերաբերյալ գործերը հարուցվում են ոչ այլ կերպ, քան տուժողի բողոքի հիման վրա և ամբաստանյալի հետ նրա հաշտվելու դեպքում ենթակա է կարճման:
ՀՀ քրեական օրենսգրքի 73-րդ հոդվածի համաձայն` ոչ մեծ ծանրության հանցանք կատարած անձը կարող է ազատվել քրեական պատասխանատվությունից, եթե նա հաշտվել է տուժողի հետ և հատուցել կամ այլ կերպ հարթել է նրան պատճառած վնասը:
Անդրադառնալով իրեղեն ապացույցների տնօրինման հարցին, դատարանը գտնում է, որ իրեղեն ապացույց հանդիսացող, ՙԱրարատբանկ՚ ՓԲԸ-ից ստացված ձայնագրությունը պետք է պահել քրեական գործի հետ միասին:
Ղեկավարվելով ՀՀ քրեական դատավարության օրենսգրքի 35-րդ հոդվածի 1-ին մասի 5-րդ կետով, 119-րդ, 183-րդ հոդվածի 1-ին մասով, 379-րդ հոդվածներով դատարանը`

Ո Ր Ո Շ Ե Ց

Սահակ Էդուարդի Աբրահամյանի վերաբերյալ ՀՀ քրեական օրենսգրքի 177-րդ հոդվածի 1-ին մասի հատկանիշներով հարուցված թիվ 13175811 քրեական գործի վարույթը կարճել և նրա նկատմամբ քրեական հետապնդումը դադարեցնել` տուժողի հետ հաշտվելու հիմքով:
Սահակ Աբրահամյանի նկատմամբ ընտրված խափանման միջոցը` ստորագրություն չհեռանալու մասին, վերացնել:

Իրեղեն ապացույց հանդիսացող, ՙԱրարատբանկ՚ ՓԲԸ-ից ստացված ձայնագրությունը պահել քրեական գործի հետ միասին:

Որոշումը մեկամսյա ժամկետում կարող է բողոքարկվել ՀՀ վերաքննիչ քրեական դատարան:





ԴԱՏԱՎՈՐ Ա.ՄԿՐՏՉՅԱՆ