գործ No ԵԱՔԴ/0014/01/12

ԴԱՏԱՎՃԻՌ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

22.03.2012թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը


նախագահությամբ` դատավոր Ա.Մկրտչյանի
քարտուղարությամբ` Օ.Կիրակոսյանի
Շ.Վանոյանի
մասնակցությամբ`
մեղադրող Հ.Սարգսյանի
պաշտպան Կ.Խաչատրյանի
ամբաստանյալ Ս.Համբարձումյանի


Դատարանում, դռնբաց դատական նիստում, արագացված դատաքննության կարգով քննեց քրեական գործն ըստ մեղադրանքի` Սերոբ Աշոտի Համբարձումյանի /ծնված 18.11.1979թ. Եղեգնաձորի շրջանի Գլաձոր գյուղում, ազգությամբ հայ, ՀՀ քաղաքացի, ամուսնացած խնամքին երկու անձ, չդատված, հաշվառված ՀՀ Վայոց Ձորի մարզի Գլաձոր գյուղում, բնակվող ք.Երևան Հարավ-Արևմտյան թաղամասի Բաբաջանյան փողոց, 85 շենք, 7 բնակարան/:
Մեղադրվում է ՀՀ քրեական օրենսգրքի 178-րդ հոդվածի 2-րդ մասի 2-րդ և 5-րդ կետերով:


ՊԱՐԶԵՑ


1.Գործի դատավարական նախապատմությունը
2011 թվականի հոկտեմբերի 28-ին տեղի է ունեցել դեպքը:
2011 թվականի հոկտեմբերի 28-ին հարուցվել է թիվ 58212911 քրեական գործը:
2011 թվականի հոկտեմբերի 28-ին Սերոբ Համբարձումյանը ձերբակալվել է:
2011 թվականի հոկտեմբերի 31-ին Ս.Համբարձումյանին մեղադրանք է առաջադրվել ՀՀ քրեական օրենսգրքի 178-րդ հոդվածի 2-րդ մասի 2-րդ և 5-րդ կետերով ու նրա նկատմամբ խափանման միջոց է ընտրվել կալանքը:
2012 թվականի փետրվարի 16-ին թիվ 58212911 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:

Գործի փաստական հանգամանքները
Նախաքննության մարմինն ամբաստանյալ Սերոբ Համբարձումյանին ՀՀ քրեական օրենսգրքի 178-րդ հոդվածի 2-րդ մասի 2-րդ և 5-րդ կետերով մեղադրանք է առաջադրել այն արարքի համար, որ ՙնա, հանդիսանալով ՙՎնասվածքաբանության և օրթոպեդիայի գիտական կենտրոն՚ ՓԲԸ մեծահասակների օրթոպեդիայի և ոսկրային պաթոլոգիաների բաժանմունքի բժիշկ-վնասվածքաբան, կոտայքի տարածքային զինկոմիսարիատից ուղեգրով հետազոտման նպատակով նշված բժշկական հաստատություն ուղարկված զորակոչիկ Նորայր Գնելի Հովսեփյանի մոտ ախտորոշել է կրծքավանդակի առաջային պատի դեֆորմացիա, որից հետո նշված զորակոչիկին ներկայացրել է իրենց բժշկական հաստատության կողմից ստեղծված բժշկական հանձնաժողովին: Իմանալով, որ Նորայր Հովսեփյանի հարազատները ցանկություն ունեն հիվանդության հիմքով ազատել վերջինիս իսկական զինվորական ծառայությունից, արդեն իսկ կայացված հանձնաժողովային եզրակացության պայմաններում Նորայր Հովսեփյանի քեռուն` Արայիկ Ֆրանգյանին հայտնել է, որ իրենից է կախված այդ եզրակացության կայացնելը, որը կարող է ապագայում բարենպաստ դեր ունենալ ռազմաբժշկական հանձնաժողովի որոշման վրա, դրա համար պահանջել է 1500 ԱՄՆ դոլար, նպատակ ունենալով խաբեությամբ` կաշառք ստանալու պատրվակով հափշտակել այդ խոշոր չափերի գումարը:
Բացի դրանից, չունենալով որևիցե իրական հնարավորություն ապագայում ազդել ռազմաբժշկական հանձնաժողովի որոշման վրա, Արայիկ Ֆրանգյանին խոստացել է 4500 ԱՄՆ դոլարի դիմաց ապահովել վերոհիշյալ զորակոչիկին իսկական զինվորական ծառայությունից ազատելու վերաբերյալ հանձնաժողովի որոշումը` այդ գումարից տարբեր պատասխանատու անձանց կաշառքներ բաժանելով, իրականում նպատակ ունենալով համապատասխան որոշման կայացման դեպքում խարդախությամբ տիրանալ այդ գումարին:
2011 թվականի հոկտեմբերի 28-ին ըստ պայմանավորվածության հանդիպել է Արայիկ Ֆրանգյանի հետ և իրենց բժշկական հաստատության հանձնաժողովի կողմից արդեն իսկ կայացված եզրակացությունը կաշառքի դիմաց ապահովելու պատրվակով վերջինիցս ստացել է նախապես պահանջած գումարը` 567.870 ՀՀ դրամին համարժեք 1500 ԱՄՆ դոլարը, որից հետո բռնվել է ՀՀ ԱԱԾ աշխատակիցների կողմից՚:

Արագացված դատական քննություն
Մինչև դատաքննությունն սկսելն ամբաստանյալ Սերոբ Համբարձումյանը միջնորդել է դատական քննությունն անցկացնել արագացված կարգով և հայտարարել, որ առաջադրված մեղադրանքը պարզ է, համաձայն է իրեն առաջադրված մեղադրանքին, գիտակցում է արագացված կարգով դատական քննություն անցկացնելու հետևանքները, միջնորդությունը ներկայացրել է կամավոր` պաշտպանի հետ խորհրդակցելուց հետո:
Միջնորդությունը հաստատել է նաև ամբաստանյալի պաշտպան Կ.Խաչատրյանը:
Մեղադրող Հ.Սարգսյանը դատական քննության արագացված կարգ կիրառելուն չի առարկել:
Տուժող Արայիկ Ֆրանգյանը չի առարկել դատական քննության արագացված կարգ կիրառելուն և նշել է, որ ամբաստանյալ Ս.Համբարձումյանից որևէ պահանջ չունի:
Դատարանը համոզվելով, որ առկա են ՀՀ քրեական դատավարության օրենսգրքի 3751-րդ և 3752-րդ հոդվածներով նախատեսված պայմանները, որոշում է կայացրել արագացված կարգով դատական քննություն անցկացնելու մասին:
Դատարանի իրավական վերլուծությունները
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Սերոբ Համբարձումյանի մեղավորությունը ՀՀ քրեական օրենսգրքի 178-րդ հոդվածի 2-րդ մասի 2-րդ և 5-րդ կետերի հատկանիշներով նախատեսված հանցանք կատարելու համար առաջադրված մեղադրանքում ապացուցված է, որի համար նա ենթակա է քրեական պատասխանատվության և պատժի:
Ամբաստանյալ Սերոբ Համբարձումյանի նկատմամբ պատիժ նշանակելիս դատարանը հաշվի է առնում հանցագործության հանրության համար վտանգավորության աստիճանն ու բնույթը, ինչպես նաև անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները:
Սերոբ Համբարձումյանի անձը բնութագրող տվյալներ, պատասխանատվությունն ու պատիժը մեղմացնող հանգամանքներ դատարանը հաշվի է առնում այն, որ նա ընդունել է մեղքը և անկեղծորեն զղջացել է կատարած արարքի համար, նախկինում դատված չէ, բնութագրվում է դրական, խնամքին են գտնվում մեկ մանկահասակ երեխան և հղի կինը, ընտանիքի միակ կերակրողն է:
Ամբաստանյալի պատասխանատվությունը և պատիժը ծանրացնող հանգամանքներ դատարանը չի արձանագրել:
Սերոբ Համբարձումյանի նկատմաբ տուգանքի ձևով պատիժ նշանակելը, դատարանը գտնում է, որ չի կարող ապահովել պատժի նպատակները ուստի նրա նկատմամբ պատիժ պետք է նշանակել ազատազրկման ձևով, որը նա պետք է կրի:
Դատարանը միաժամանակ գտնում է, որ ամբաստանյալ Սերոբ Համբարձումյանից որպես դատական ծախսեր հօգուտ պետական բյուջեի պետք է բռանագանձել 54.960 ՀՀ դրամ:
Անդրադառնալով իրեղեն ապացույցների տնօրինման հարցին դատարանը գտնում է, որ ՙԴեղատուն Նոր Աստղ՚ գրառմամբ պոլիէթիլենային տոպրակում փաթաթված 1500 ԱՄՆ դոլարը պետք է թողնել ՀՀ ԱԱԾ տնօրինմանը, իսկ թղթադրամների մակերեսից, ՙԴեղատուն Նոր Աստղ՚ գրառմամբ պոլիէթիլենային տոպրակի ներսից բամբակե խծուծով վերցված ինչպես նաև թղթադրամները նախապես մշակելու ժամանակ օգտագործված հատուկ քիմիական փոշուց և քիմիական մատիտից վերցված նմուշները, ոչնչացնել:
Ղեկավարվելով ՀՀ քրեական դատավարության օրենսգրքի 119-րդ, 134-րդ, 357-360-րդ, 3753-րդ և 3754-րդ, 379-րդ հոդվածներով, դատարանը


Վ Ճ Ռ Ե Ց


Սերոբ Աշոտի Համբարձումյանին մեղավոր ճանաչել ՀՀ քրեական օրենսգրքի 178-րդ հոդվածի 2-րդ մասի 2-րդ և 5-րդ կետերով և պատիժ նշանակել ազատազրկում 2 /երկու/ տարի ժամկետով:
Սերոբ Համբարձումյանի նկատմամբ ընտրված խափանման միջոց կալանավորումը, թողնել անփոփոխ, մինչև դատավճռի օրինական ուժի մեջ մտնելը:
Պատժի սկիզբը հաշվել 2011 թվականի հոկտեմբերի 28-ից:
Սերոբ Համբարձումյանից որպես դատական ծախսեր հօգուտ պետական բյուջեի բռնագանձել 54.960 ՀՀ դրամ:
Պատիժը պետք է կրի ՀՀ ԱՆ համապատասխան քրեակատարողական հիմնարկում:
Գործով իրեղեն ապացույց հանդիսացող ՙԴեղատուն Նոր Աստղ՚ գրառմամբ պոլիէթիլենային տոպրակում փաթաթված 1500 ԱՄՆ դոլարը թողնել ՀՀ ԱԱԾ տնօրինմանը, իսկ թղթադրամների մակերեսից, ՙԴեղատուն Նոր Աստղ՚ գրառմամբ պոլիէթիլենային տոպրակի ներսից բամբակե խծուծով վերցված, ինչպես նաև թղթադրամները նախապես մշակելու ժամանակ օգտագործված հատուկ քիմիական փոշուց և քիմիական մատիտից վերցված նմուշները, ոչնչացնել:
Դատավճիռը, բացի ՀՀ քրեական դատավարության օրենսգրքի 395-րդ հոդվածի 1-ին մասով նախատեսված հիմքից, կարող է բողոքարկվել ՀՀ վերաքննիչ քրեական դատարան` հրապարակման պահից մեկամսյա ժամկետում:





ԴԱՏԱՎՈՐ Ա.ՄԿՐՏՉՅԱՆ