ԵԱՔԴ/0010/01/12
Ո Ր Ո Շ ՈՒ Մ

քրեական հետապնդումը դադարեցնելու և քրեական գործի վարույթը կարճելու մասին


ՙ5՚ մարտի 2012թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը` նախագահող դատավոր Լ.Ավետիսյան, քարտուղարությամբ Ն.Ղազարյանի, մասնակցությամբ մեղադրող Ս.Գրիգորյանի, տուժող Ս.Սահակյանի, տուժողի ներկայացուցիչ Ա.Թովմասյանի, դռնբաց դատական նիստում, քննեց քրեական գործն ըստ մեղադրանքի Սասուն Ժորայի Դանիելյանի (ծնված 06.10.1987թ., Եղվարդ քաղաքում, ազգությամբ հայ, ՀՀ քաղաքացի, ութամյա կրթությամբ, ամուսնացած, խնամքին մեկ երեխա, նախկինում չդատված, չի աշխատում, հաշվառված և բնակվում է Կոտայքի մարզ, Նոր Հաճն քաղաքի, Չարենցի փողոցի 31 շենքի թիվ 32 բնակարանում) ՀՀ քրեական օրենսգրքի 117 հոդվածով,


Պ Ա Ր Զ Ե Ց

2011 թվականի նոյեմբերի 15-ին ՀՀ ոստիկանության ՔԳՎ Երևան քաղաքի քննչական վարչության Արաբկիրի քննչական բաժնում ՀՀ քրեական օրենսգրքի 117 հոդվածի հատկանիշներով հարուցվել է թիվ 14133711 քրեական գործը:
2011 թվականի դեկտեմբերի 29-ին Սասուն Ժորայի Դանիելյանը ներգրավվել է որպես մեղադրյալ ՀՀ քրեական օրենսգրքի 117 հոդվածով այն արարքի կատարման համար, որ ՙնա 2011 թվականի սեպտեմբերի 9-ին, ժամը 0300-ի սահմաններում, Երևան քաղաքի Բաղրամյան պողոտայի թիվ 85 հասցեում գտնվող ՙՍԱՍ՚ սուպերմարկետ հաց առաքելու ժամանակ, հացով լի սայլակների տեղավորման կապակցությամբ վեճի է բռնվել նույն սուպերմարկետի աշխատակից Սարգիս Վլադիմիրի Սահակյանի հետ, որից հետո, խոսակցությունը շարունակելու նպատակով Սարգիս Սահակյանին հրավիրել է դուրս: Այնուհետև Սասուն Դանիելյանը ծեծի է ենթարկել Սարգիս Սահակյանին` գլխով հարվածելով վերջինիս դեմքին, պատճառել է մարմնական վնասվածքներ (լնդի արյունազեղման, վերին ծնոտի ձախից երկրորդ ատամի և աջից առաջին ատամների պսակների կոտրվածքների, աջից առաջին ատամի տրավմատիկ շարժունակության, վերին ծնոտի ձախից առաջին ատամի և աջից ատամների արմատների շուրջ պերիոդոնտալ ճեղքի լայնացման տեսքով) որոնք առաջացրել են առողջության թեթև վնաս` առողջության կարճատև քայքայումով՚:
2011 թվականի դեկտեմբերի 29-ին Սասուն Դանիելյանի նկատմամբ որպես խափանման միջոց է ընտրվել չհեռանալու մասին ստորագրությունը:
2012 թվականի փետրվարի 8-ին թիվ 14133711 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
Դատական քննության ընթացքում տուժող Սարգիս Սահակյանը ներկայացնելով գրավոր դիմում հայտնեց, որ ինքը հաշտվել է ամբաստանյալ Սասուն Դանիելյանի հետ, նրա նկատմամբ որևէ բողոք չունի, վերջինս պարտավորվել է փոխհատուցել հանցագործությամբ իրեն պատճառված վնասը: Խնդրեց դադարեցնել քրեական հետապնդումը և կարճել քրեական գործի վարույթը: Տուժողը խնդրեց քաղաքացիական հայցը քննության չառնել:
Ամբաստանյալ Սասուն Դանիելյանը ներկայացնելով գրավոր դիմում հայտնեց, որ զղջում է կատարածի համար, հաշտվել է տուժողի հետ, պարտավորվում է հատուցել հանցագործությամբ տուժողին պատճառված վնասը և խնդրում է իր նկատմամբ դադարեցնել քրեական հետապնդումը և քրեական գործի վարույթը կարճել:
Մեղադրող Ս.Գրիգորյանը միջնորդեց ամբաստանյալ Սասուն Դանիելյանի նկատմամբ քրեական հետապնդումը դադարեցնել և քրեական գործի վարույթը կարճել:
ՀՀ քրեական դատավարության օրենսգրքի 35 հոդվածի 1-ին մասի 5-րդ կետի համաձայն, քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե ՀՀ քրեական դատավարության օրենսգրքով նախատեսված դեպքերում տուժողը հաշտվել է մեղադրյալի հետ:
ՀՀ քրեական դատավարության օրենսգրքի 183 հոդվածի 1-ին մասի համաձայն, ՀՀ քրեական օրենսգրքի 117 հոդվածով նախատեսված հանցագործության վերաբերյալ գործերը հարուցվում են ոչ այլ կերպ, քան տուժողի բողոքի հիման վրա, և կասկածյալի, մեղադրյալի կամ ամբաստանյալի հետ նրա հաշտվելու դեպքում ենթակա են կարճման: Հաշտությունը թույլատրվում է մինչև դատավճիռ կայացնելու համար դատարանի խորհրդակցական սենյակ հեռանալը:
Վերոգրյալը հաշվի առնելով, դատարանը գտնում է, որ թիվ ԵԱՔԴ/0010/01/12 քրեական գործի վարույթը պետք է կարճել և Սասուն Ժորայի Դանիելյանի նկատմամբ քրեական հետապնդումը դադարեցնել:
Ելնելով վերոգրյալից և ղեկավարվելով ՀՀ քրեական օրենսգրքի 73 հոդվածով, ՀՀ քրեական դատավարության օրենսգրքի 33 հոդվածի 2-րդ մասով, 35 հոդվածի 1-ին մասի 5-րդ կետով, 36, 183, 294 և 313 հոդվածներով, դատարանը

Ո Ր Ո Շ Ե Ց


Սասուն Ժորայի Դանիելյանի նկատմամբ ՀՀ քրեական օրենսգրքի 117 հոդվածով քրեական հետապնդումը դադարեցնել և նրա վերաբերյալ թիվ ԵԱՔԴ/0010/01/12 քրեական գործի վարույթը կարճել` ամբաստանյալի հետ տուժող Սարգիս Վլադիմիրի Սահակյանի հաշտվելու հիմքով:
Սասուն Ժորայի Դանիելյանի նկատմամբ որպես խափանման միջոց ընտրված չհեռանալու մասին ստորագրությունը վերացնել:
Որոշումը կարող է բողոքարկվել ՀՀ վերաքննիչ քրեական դատարան` հրապարակվելու օրվանից հետո մեկամսյա ժամկետում:


Դատավոր` ստորագրություն
Բնագրի հետ ճիշտ է
Դատավոր Լ. Ավետիսյան