ԵԱՔԴ/0187/01/11


Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն


Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանը

նախագահող դատավոր Լ. Ավետիսյան
քարտուղարությամբ Ե.Կարապետյանի
մասնակցությամբ
մեղադրող Լ. Մանուկյանի
պաշտպան Ա. Օհանյանի


2012 թվականի հունվարի 17-ին, Երևան քաղաքում, դռնբաց դատական նիստում, դատական քննության արագացված կարգով, քննեց քրեական գործն ըստ մեղադրանքի Ավետիք Պավելի Հայրապետյանի, ծնված 1982 թվականի հունիսի 29-ին, Երևան քաղաքում, ազգությամբ հայ, ՀՀ և ՌԴ քաղաքացի, միջնակարգ կրթությամբ, ամուսնացած, խնամքին երկու անչափահաս երեխա, ֆիզիկապես վատառողջ, աշխատել է ՌԴ-ում որպես հացթուխ, նախկինում չդատված, ՌԴ-ում հաշվառված և բնակվել է Սմոլենսկի մարզի Ելնինսկի շրջանի Դյոմշինո գյուղում, ՀՀ-ում հաշվառված և բնակվել է Երևան քաղաքի Կ.Ուլնեցու փողոցի 1-ին փակուղու 2Ա շենքի թիվ 11 բնակարանում, մեղադրվում է ՀՀ քրեական օրենսգրքի 268 հոդվածի 2-րդ մասի 2-րդ կետով, կալանքի տակ է 2011 թվականի սեպտեմբերի 29-ից,

Պ Ա Ր Զ Ե Ց

1.Գործի դատավարական նախապատմությունը.
2011թ. սեպտեմբերի 09-ին ՀՀ ոստիկանության ՔԳՎ Երևան քաղաքի ՔՎ Քանաքեռ-Զեյթուն քննչական բաժնում ՀՀ քրեական օրենսգրքի 268 հոդվածի 2-րդ մասի 2-րդ կետով նախատեսված հանցագործության հատկանիշներով հարուցվել է թիվ 09114111 քրեական գործը:
2011թ. հոկտեմբերի 01-ին Ավետիք Պավելի Հայրապետյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 268 հոդվածի 2-րդ մասի 2-րդ կետով, նրա նկատմամբ որպես խափանման միջոց կիրառվել է կալանավորումը:
2011թ. դեկտեմբերի 19-ին թիվ 09114111 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
2.Գործի փաստական հանգամանքները.
Նախնական քննության մարմինն ամբաստանյալ Ավետիք Պավելի Հայրապետյանին մեղադրանք է առաջադրել այն արարքի համար, որ նա 2011 թվականի սեպտեմբերի 27-ին Զեյթունի գերեզմանատնից իր անձնական օգտագործման համար քաղել, այնուհետև ապօրինի պատրաստել և իր մոտ է պահել խոշոր չափի 5,9 գրամ քաշով չորացված մարիխուանա տեսակի թմրամիջոց, որը 2011 թվականի սեպտեմբերի 28-ին հայտնաբերվել է վերջինիս անձնական խուզարկության ժամանակ` ոստիկանության Քանաքեռ-Զեյթունի բաժնի աշխատակիցների կողմից:
3. Արագացված դատական քննություն.
Մինչև դատաքննություն սկսելն ամբաստանյալ Ավետիք Պավելի Հայրապետյանը միջնորդեց դատական քննությունն անցկացնել արագացված կարգով և հայտարարեց, որ առաջադրված մեղադրանքն իրեն պարզ է, համաձայն է իրեն առաջադրված մեղադրանքին, գիտակցում է արագացված կարգով դատական քննություն անցկացնելու բնույթն ու հետևանքները, միջնորդությունը ներկայացրել է կամավոր` պաշտպանի հետ խորհրդակցելուց հետո: Միջնորդությունը հաստատեց նաև ամբաստանյալի պաշտպան Ա.Օհանյանը:
Մեղադրող Լ.Մանուկյանը փոխելով իր դիրքորոշումը դատական քննության արագացված կարգ կիրառելուն չառարկեց:
Դատարանը համոզվելով, որ առկա են ՀՀ քրեական դատավարության օրենսգրքի 3751 և 3752 հոդվածներով նախատեսված պայմանները, որոշում է կայացրել դատական քննության արագացված կարգ կիրառելու մասին:
4.Դատարանի իրավական վերլուծությունները.
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Ավետիք Պավելի Հայրապետյանին առաջադրված մեղադրանքը ՀՀ քրեական օրենսգրքի 268 հոդվածի 2-րդ մասի 2-րդ կետով հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 268 հոդվածի 2-րդ մասի 2-րդ կետի հատկանիշներին և արարքի որակումը ճիշտ է:
Ամբաստանյալ Ավետիք Հայրապետյանի նկատմամբ պատիժ նշանակելիս, դատարանը հաշվի է առնում նրա կատարած արարքի հանրության համար վտանգավորության աստիճանը և բնույթը, ինչպես նաև հանցավորի անձը:
Որպես ամբաստանյալի անձը դրականորեն բնութագրող, պատասխանատվությունը և պատիժը մեղմացնող հանգամանքներ դատարանը հաշվի է առնում այն, որ նա հանցանքն ընդունել և զղջում է կատարածի համար, նախկինում դատված չի եղել, նրա խնամքին են գտնվում մինչև տասնչորս տարեկան երկու երեխաները (Աիդա Ավետիքի Հայրապետյան` ծնված 2004թ. մարտի 20-ին, Պավել Ավետիքի Հայրապետյան` ծնված 2005թ. սեպտեմբերի 24-ին), տառապում է ներվային հիվանդությամբ (դիմային ներվի բորբոքման հետևանքով առաջացած միմիկաների խանգարում):
Ամբաստանյալի պատասխանատվությունը և պատիժը ծանրացնող հանգամանքներ չկան:
Կատարած արարքների համար ամբաստանյալ Ավետիք Պավելի Հայրապետյանը ենթակա է քրեական պատասխանատվության և պատժի:
Հաշվի առնելով Ավետիք Հայրապետյանի կատարած արարքի հանրության համար վտանգավորության աստիճանը և բնույթը, նրա անձը, նրան դրականորեն բնութագրող տվյալները, պատասխանատվությունն ու պատիժը մեղմացնող հանգամանքները, պատասխանատվությունը և պատիժը ծանրացնող հանգամանքների բացակայությունը, ինչպես նաև այն, որ ՀՀ քրեական օրենսգրքի 268 հոդվածի 2-րդ մասի սանկցիայով նախատեսված է պատիժ միայն ազատազրկման ձևով, դատարանը գտնում է, որ Ավետիք Պավելի Հայրապետյանի նկատմամբ ՀՀ քրեական օրենսգրքի 268 հոդվածի 2-րդ մասի 2-րդ կետով կատարած արարքի համար պատիժ պետք է նշանակել ազատազրկման ձևով, որը նա պետք է կրի ՀՀ ԱՆ համապատասխան քրեակատարողական հիմնարկում, իսկ նրա նկատմամբ կիրառված խափանման միջոցը պետք է թողնել անփոփոխ, մինչև դատավճռի օրինական ուժի մեջ մտնելը:
Անդրադառնալով իրեղեն ապացույցների տնօրինման հարցին, դատարանը գտնում է, որ 2011թ. հոկտեմբերի 29-ի որոշմամբ իրեղեն ապացույց ճանաչված և քրեական գործին կցված, Ավետիք Հայրապետյանի մոտ հայտնաբերված մարիխուանա տեսակի թմրանյութը պետք է ոչնչացնել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 357-360, 3753 և 3754 հոդվածներով, դատարանը

Վ Ճ Ռ Ե Ց

Ավետիք Պավելի Հայրապետյանին մեղավոր ճանաչել ՀՀ քրեական օրենսգրքի 268 հոդվածի 2-րդ մասի 2-րդ կետով և նրան դատապարտել ազատազրկման մեկ (1) տարի ժամկետով:
Պատժի սկիզբը հաշվել 2011 թվականի սեպտեմբերի 29-ից:
Պատիժը պետք է կրի ՀՀ ԱՆ համապատասխան քրեակատարողական հիմնարկում:
Ավետիք Պավելի Հայրապետյանի նկատմամբ ընտրված խափանման միջոցը` կալանավորումը, թողնել անփոփոխ, մինչև դատավճռի օրինական ուժի մեջ մտնելը:
Դատավճիռն օրինական ուժի մեջ մտնելուց հետո իրեղեն ապացույց հանդիսացող, Ավետիք Պավելի Հայրապետյանի անձնական խուզարկությամբ հայտնաբերված 5,9 գրամ քաշով չորացված մարիխուանա տեսակի թմրանյութը ոչնչացնել:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակվելու օրվանից հետո մեկամսյա ժամկետում:
Դատավճիռը չի կարող բողոքարկվել ՀՀ քրեական դատավարության օրենսգրքի 395 հոդվածի 1-ին կետով նախատեսված հիմքով:


Դատավոր` ստորագրություն
Բնագրի հետ ճիշտ է
Դատավոր Լ. Ավետիսյան