ԵԱՔԴ/0184/01/11

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանը`

նախագահող դատավոր Լ. Ավետիսյան
քարտուղարությամբ` Ն.Ղազարյանի
մասնակցությամբ
մեղադրող` Ռ. Խաչատրյանի
պաշտպան` Հ. Բաբայանի
տուժող` Ց. Ղարաբաղցյանի

2012 թվականի մայիսի 31-ին, Երևան քաղաքում, դռնբաց դատական նիստում, քննեց քրեական գործն ըստ մեղադրանքի էդգար Գուրգենի Մկրտչյանի, ծնված 1981 թվականի փետրվարի 24-ին, Երևան քաղաքում, ազգությամբ հայ, ՀՀ քաղաքացի, բարձրագույն կրթությամբ, ֆիզիկապես վատառողջ, ամուսնացած, խնամքին երեք անձ, նախկինում չդատված, չի աշխատել, հաշվառված և բնակվել է Երևան քաղաքի Գայի պողոտայի 13 շենքի թիվ 20 բնակարանում, մեղադրվում է ՀՀ քրեական օրենսգրքի 112 հոդվածի 1-ին մասով, կալանքի տակ է 2011 թվականի օգոստոսի 13-ից,

Պ Ա Ր Զ Ե Ց

1.Գործի դատավարական նախապատմությունը.
2011թ. օգոստոսի 13-ին ՀՀ ոստիկանության ՔԳՎ Երևան քաղաքի քննչական վարչության Արաբկիրի քննչական բաժնում ՀՀ քրեական օրենսգրքի 112 հոդվածի 1-ին մասով հարուցվել է թիվ 14125211 քրեական գործը:
2011թ. օգոստոսի 14-ին էդգար Գուրգենի Մկրտչյանը ներգրավվել է որպես մեղադրյալ և նրան մեղադրանք է առաջադրվել ՀՀ քրեական օրենսգրքի 112 հոդվածի 1-ին մասով, նրա նկատմամբ որպես խափանման միջոց է կիրառվել կալանավորումը:
2011թ. դեկտեմբերի 12-ին թիվ 14125211 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
2.Գործի փաստական հանգամանքները.
Նախնական քննության մարմինն ամբաստանյալ էդգար Գուրգենի Մկրտչյանին մեղադրանք է առաջադրել այն արարքի կատարման համար, որ նա գտնվելով ոգելից խմիչքի ազդեցության տակ, 2011թ. օգոստոսի 12-ի լույս 13-ի գիշերը, ժամը 04-ի սահմաններում Երևան քաղաքի Բաղրամյան պողոտայի 1-ին հասցեի 62 նկուղային տարածքում գործող ՙԱնուբիս՚ գիշերային ակումբում, քննությամբ չպարզված հանգամանքներում վիճաբանության մեջ է մտել Ցոլակ Հովակիմի Ղարաբաղցյանի հետ, որի ժամանակ իր մոտ գտնվող դանակով հարվածել է Ց.Ղարաբաղցյանի որովայնի շրջանին՝ վերջինիս առողջությանը դիտավորությամբ պատճառելով ծանր վնաս` որովայնի առաջնային պատի ծակած-կտրած թափանցող վիրավորում մեծ ճարպոնի, բարակ աղեգալարի, միաձիգ հաստ աղու վնասման և հեմոպերիոտներում վերքի ձևով։
3.Ապացույցների հետազոտում.
Առաջադրված մեղադրանքում էդգար Գուրգենի Մկրտչյանը ցուցմունք տվեց այն մասին, որ 12.08.2011թ. դստեր ծննդյան կապակցությամբ տանը խնջույք է կազմակերպել և հարազատների հետ միասին նշել են: Խնջույքի ընթացքում ինքն օգտագործել է մի քանի բաժակ օղի: Այնուհետև ժամը 24-ի սահմաններում դուրս է եկել տանից` հյուրերին ուղեկցելու նպատակով, իջել է բակ և արդեն լույս 13-ի գիշերը ժամը 01-ի սահմաններում գնացել է ՙԱնուբիս՚ գիշերային ակումբ: Օղի է խմել ու մեկ շիշ գարեջուր պատվիրել: Շուրջ մեկ ժամ գիշերային ակումբում մնալուց հետո դուրս է եկել մաքուր օդ շնչելու և ակումբի շրջակայքում քայլել է: Ճանապարհին հանդիպել է իրեն անծանոթ 3 կամ 4 տղաների, որոնցից մեկն իր հասցեին անպարկեշտ արտահայտություն է արել, որից հետո իրենց միջև վեճ է առաջացել: Նշված տղաները հարձակվելով իր վրա սկսել են ծեծել։ Այնուհետև նրանցից մեկը ավտոմեքենայից բերել է փայտե մահակ և սկսել են մահակով հարվածել, որի հետևանքով կոտրվել է իր գլուխը, քիթը, մատները և կողերը: Մտածելով, որ ակումբ մտնելով կփրկվի, վազելով մտել է ակումբ և նստել սրահում առկա սեղաններից մեկի մոտ։ Այդ պահին գիշերային ակումբի սպարասրահում իրեն է մոտեցել իրեն անծանոթ մի տղամարդ: Ինքը մտածելով, որ այդ տղամարդն իրեն դրսում ծեծող անձանցից է և փորձում է նորից ծեծել կամ դուրս բերել ակումբից` վիճաբանությունը շարունակելու համար, դանակը ձեռքում պահած ոտքի է կանգնել նստած տեղից և հրել այդ տղամարդուն, իսկ վերջինս փոխադարձ իրեն է հրել, ինքն ընկել է սեղանի վրա, ինչի հետևանքով այն կոտրվել է: Քիչ անց եկել են ոստիկանության աշխատակիցները և իրեն տարել բաժին: Այնտեղ տեսել է 4 տղաների և կարծելով որ դրանք իրեն ծեծող տղաներն են, ինքը տուժող է հանդիսանում, այդ պատճառով ասել է, որ ընկել է, քանի որ չի ցանկացել, որ ինքն առաջինը պատմի դեպքի մասին, այլ` պարզվի նրանցից: Այնուհետև, երբ հասկացել է, որ իրեն ծեծողներին չեն կալանավորել, պատմել է ճշմարտությունը: Ինքը Ցոլակ Ղարաբաղցյանին չի ճանաչել: Ոստիկանության բաժնում է իմացել, որ ինքը նրան դանակով հարվածել է: Ինքը դիտավորություն չի ունեցել նրան հարվածելու, ուղղակի հրելու ընթացքում դանակը պատահաբար է դիպել նրան: Դանակը տանից վերցրել է զուտ պաշտպանության նպատակով, քանի որ ուշ գիշեր էր և ինքը պետք է անցներ այգու միջով: Ընդունում է, որ Ցոլակ Ղարաբաղցյանը մարմնական վնասվածքը ստացել է իր գործողությունների արդյունքում: Իրեն մեղավոր է ճանաչում և զղջում է կատարածի համար:
էդգար Մկրտչյանը նախաքննության ժամանակ ցուցմունք է տվել այն մասին, որ 2011 թվականի օգոստոսի 12-ին դստեր ծննդյան 9-րդ ամսվա կապակցությամբ տանը խնջույք է կազմակերպել և հարազատների հետ միասին նշել են: Խնջույքի ժամանակ խմել են 2 շիշ օղի, իսկ դրանից հետո խմել է ևս 2 շիշ գարեջուր: Այնուհետև ժամր 23:30-ի սահմաններում դուրս է եկել տանից հյուրերին ուղեկցելու նպատակով, իջել է բակ ճանապարհել է հորաքրոջն ու մյուս հյուրերին և գնացել է Ջրվեժ թաղամասում գտնվող ՙՄիլիոն՚ խաղատուն, որտեղ իր մոտ եղած 30.000 ՀՀ դրամից տանուլ է տվել 20.000 ՀՀ դրամը: Ժամը 24:00-ի սահմաններում վերադարձել է տուն: Ալկոհոլ օգտագործելու և խաղատուն գնալու պատճառով վիճաբանել է կնոջ հետ, որից զայրացած տան խոհանոցից վերցրել է խոհանոցային դանակն ու դուրս եկել տանից և պատահական տաքսի ավտոմեքենայով ուղևորվել է Բաղրամյան 1 հասցեում գտնվող ՙԱնուբիս՚ գիշերային ակումբ: Հասնելով գիշերային ակումբ, դեռ ներս չմտած՝ ակումբի դիմաց առկա աստիճաներին ոտքը սայթաքել է և վայր ընկելով գլխի ու աջ ձեռքի շրջաններում ստացել է մարմնական վնասվածքներ, սակայն հարբած լինելու հետևանքով ցավ չի զգացել: Ներս մտնելով գիշերային ակումբ պառկել է ակումբի պարասրահի բազմոցներից մեկին: Քիչ անց իր և իրեն անծանոթ մի տղամարդու միջև վիճաբանություն է սկսվել, որի ընթացքում տանից վերցրած խոհանոցային դանակով հարվածել է նրան:
Նախաքննության ընթացքում Էդգար Մկրտչյանին ծեծի ենթարկելու դեպքի առկայությունը հերքվել է և որոշում է կայացվել քրեական գործով անհայտ անձանց կողմից Է.Մկրտչյանին ծեծի ենթարկելու դեպքի առթիվ քրեական հետապնդում չիրականացնելու մասին։
Ամբաստանյալ էդգար Մկրտչյանի պատճառաբանություններն անհիմն են, հետապնդում են մեղմ քրեական պատասխանատվության ենթարկվելու նպատակ:
Ամբաստանյալ էդգար Մկրտչյանին մեղսագրված հանցանքը հիմնավորվել է հետևյալ ապացույցներով.
Տուժող Ցոլակ Հովակիմի Ղարաբաղցյանի ցուցմունքով այն մասին, որ 2011թ. օգոստոսի 12-ի լույս 13-ի գիշերը ժամը 01-ից 02-ի սահմաններում միայնակ գնացել է Բաղրամյան 1 հասցեում գտնվող ՙԱնուբիս՚ գիշերային ակումբ, որտեղ հաճախակի է լինում։ Երբ բարից մտել է պարասրահ, աջ կողմում գտնվող առաջին սեղանի մոտ տեսել է իրեն անծանոթ մի հարբած տղամարդու, որը նստած, գլուխը ձեռքերի մեջ առած դողացրել է: Մտածելով, որ այդ հարբած տղամարդը իրեն վատ է զգում, մոտեցել և հարցրել է, թե ինչ է պատահել և ինչով կարող է օգնել նրան: Վերջինս, ով, ինչպես հետագայում է պարզվել հանդիսանում է էդգար Մկրտչյանը, առանց որևէ խոսք ասելու, ոտքի է կանգնել և սկսել իրեն քաշքշել ու հրել, որից հետո ինքը վերջինիս հետ է հրել։ Վիճաբանությանը միջամտել են ՙԱնուբիս՚ գիշերային ակումբի աշխատակիցները և փորձել են բաժանել նրանց միմյանցից։ Ազատվելով Է.Մկրտչյանից ինքը դուրս է եկել գիշերային ակումբից և որովայնի շրջանում տաքություն զգալով ձեռքով շոշափել և հայտնաբերել է, որ ամբողջովին արյունոտված է: Հասկանալով, որ վիճաբանության ժամանակ է.Մկրտչյանր իրեն ինչ որ առարկայով մարմնական վնասվածք է հասցրել, Կարեն Համբոյանի օգնությամբ պատահական տաքսի ավտոմեքենայով գնացել է ՙՆաիրի՚ բժշկական կենտրոն։
Վկա Նաթելա Գրիգորյանը դատարանում ցուցմունք տվեց այն մասին, որ Էդգար Մկրտչյանը դեպքի օրը գնացել է գիշերային ակումբ, բարում մեկ բաժակ օղի է խմել և վերցնելով մեկ շիշ գարեջուր նստել է թիվ 1 սեղանի մոտ: Ինքը զգացել է, որ Է.Մկրտչյանը հարբած է: Ընթացքում նկատել է, որ մոտ 10 րոպե նա բացակայել է, սակայն նրա դուրս գնալը և ներս մտնելը չի տեսել: Քիչ անց տեսել է, որ Էդգար Մկրտչյանը և Ցոլակ Ղարաբաղցյանն իրար քաշքշում են: Փորձել է միջամտել, հետո գնացել և օգնության է կանչել բարմեն Աշոտ Պողոսյանին: Մինչև վերադարձել է, տեսել է Ցոլակին սրահից դուրս գալիս: Ակումբի լույսը վառելուց հետո, տեսել է, որ Է.Մկրտչյանի հագուստները թափթփված են, իսկ ճակատին վնասվածք կա: Ինքը սառը թրջոց է տվել նրան: Տեսել է գետին ընկած դանակ և կարծելով, որ ակումբի դանակն է, վերցրել և տարել է խոհանոց: Ոստիկանության բաժնում է իմացել, որ Ցոլակ Ղարաբաղցյանին դանակահարել են: Երբ Է.Մկրտչյանը ներս է մտել ակումբ չի եղել ծեծված և թափթփված, նա նորմալ տեսք է ունեցել: Ոստիկանությունում տեսել է Է.Մկրտչյանին` շորերը պատռված, ձեռքը գիպսի մեջ, ծեծված վիճակում: Հայտնեց նաև, որ շատ բաներ չի հիշում, քանի որ բավական ժամանակ է անցել: Պնդեց նախաքննության ժամանակ տված ցուցմունքը:
Վկա Նաթելա Գրիգորյանի նախաքննության ժամանակ տված և դատարանում հետազոտված ցուցմունքով վեջինս հայտնել է, որ 2010թ. օգոստոս ամսից մինչև 2010թ. սեպտեմբերի 27-ը աշխատել է Բաղրամյան 1 հասցեի նկուղային տարածքում գտնվող ՙԱնուբիս՚ գիշերային ակումբում: 2011թ. օգոստոսի 12-ին նորից աշխատանքի է անցել նույն գիշերային ակումբում։ Օգոստոսի 13-ին, ժամը 02:30-ի սահմաններում ակումբ է գնացել իր ծանոթը՝ ակումբի մշտական հաճախորդ Ցոլակ Ղարաբաղցյանը, ով մոտեցել է բարին և մտել պարասրահ։ Ց.Ղարաբաղցյանի գալուց մոտ 15 րոպե առաջ ակումբ է գնացել մի հարբած տղամարդ՝ էդգար Մկրտչյանը և նստելով պարասրահում գտնվող թիվ 1 սեղանի մոտ, մեկ բաժակ օղի և մեկ շիշ գարեջուր է պատվիրել։ Ժամը 04-ի սահմաններում ակումբը փակվել է և այդ ընթացքում խոհանոցից վերադառնալով տեսել է, որ Ց.Ղարաբաղցյանի և վերոնշված հարբած տղամարդու՝ էդգար Մկրտչյանի միջև քաշքշուկ է առաջացել: Մոտենալով նրանց, փորձել է բաժանել, սակայն չկարողանալով օգնության Է կանչել ՙԱնուբիս՚ գիշերային ակումբի բարմեն Աշոտ Պողոսյանին, այդ ընթացքում Ց.Ղարաբաղցյանը դուրս Է եկել գիշերային ակումբից։ Հետագայում ինքը տեղեկացել է, որ քաշքշուկի ժամանակ Էդգար Մկրտչյանը դանակով հարվածել և մարմնական վնասվածք Է պատճառել Ցոլակ Ղարաբաղցյանին։
Վկա Աշոտ Ալեքսանի Պողոսյանի նախաքննության ժամանակ տված և դատարանում հետազոտված ցուցմունքով վերջինս հայտնել Է, որ Երևան քաղաքի Բաղրամյան 1 հասցեում գտնվող ՙԱնուբիս՚ գիշերային ակումբում շուրջ մեկ տարի աշխատում Է, որպես բարմեն։ Իր ծանոթ՝ ակումբի մշտական հաճախորդ, Ցոլակ Ղարաբաղցյանը, 2011թ. օգոստոսի 12-ի լույս 13-ի գիշերը, կոնկրետ ժամը չի հիշում, գնացել Է ՙԱնուբիս՚ գիշերային ակումբ, մտել պարասրահ և նստել սեղաններից մեկի մոտ։ Այդ ժամանակ սրահում եղել Է նաև իրեն անծանոթ մի հարբած տղամարդ։ ժամը 04:30-ից մինչև 05-ն ընկած ժամանակահատվածում իրեն է մոտեցել նույն գիշերային ակումբի մատուցողուհի Նաթելա Գրիգորյանը և հայտնել, որ Ց.Ղարաբաղցյանը վիճաբանում է վերը նշված հարբած տղամարդու՝ Է.Մկրտչյանի հետ։ Ինքը շտապել է վիճաբանողների մոտ և տեսել, որ Ց.Ղարաբաղցյանը դուրս է գալիս ակումբից։ Ն.Գրիգորյանի հետ Է.Մկրտչյանին նստեցրել են բազմոցին և զանգահարել ակումբի տնօրեն Արսեն Մաթևոսյանին ու հայտնել կատարվածի մասին։ Հետագայում ինքր տեղեկացել է, որ նշված վիճաբանության ժամանակ էդգար Մկրտչյանը դանակով հարվածել և մարմնական վնասվածք է պատճառել Ցոլակ Ղարաբաղցյանին:
Վկա Կարեն Վլադիմիրի Համբոյանի ցուցմունք է տվել այն մասին, որ աշխատում է ՙՍամսունգ՚ ՍՊԸ-ում, որպես օդափոխիչ վերանորոգող և տեղադրող։ 2011թ. օգոստոսի 12-ի լույս 13-ի գիշերը ժամը 04:00-ից մինչև 04:30-ն ընկած ժամանակահատվածում օդափոխիչը վերանորոգելու համար գնացել է Երևան քաղաքի Բաղրամյան 1-ին հասցեում գտնվող ՙԱնուբիս՚ գիշերային ակումբ։ Ակումբի դիմաց հանդիպել է ընկերոջը՝ Ցոլակ Ղարաբաղցյանին։ Տեղեկանալով, որ ակումբում դեռ հաճախորդներ կան, սպասել է, որպեսզի բոլոր հաճախորդները դուրս գան և նոր սկսի օդափոխիչը վերանորոգել, իսկ Ց.Ղարաբաղցյանը մտել է ակումբ։ Քիչ անց ինքը նույնպես մտել է ակումբ և գնացել դեպի պարասրահ: Այդ պահին տեսել է, որ Ց.Ղարաբաղցյանր ձեռքով որովայնը բռնած դուրս է գալիս գիշերային ակումբից։ Այն հարցին, թե ինչ է պատահել Ց.Ղարաբաղցյանը պատասխանել է, որ ակումբում գտնվող մի հարբած տղամարդ դանակով հարվածել է իր որովայնին։ Դրանից հետո ինքը պատահական տաքսի ավտոմեքենայով Ց.Ղարաբաղցյանին տեղափոխել է ՙՆաիրի՚ ԲԿ։
Վկա Արսեն Ռուբիկի Մաթևոսյանի նախաքննության ժամանակ տված և դատարանում հետազոտված ցուցմունքով, վերջինս հայտնել է, որ 2011թ. օգոստոսի 12-ի լույս 13-ի գիշերը ժամը 06-ի սահմաններում իր բջջային հեռախոսահամարին զանգահարել է ՙԱնուբիս՚ գիշերային ակումբի մատուցող Ն.Գրիգորյանը և հայտնել, որ ակումբում միջադեպ է տեղի ունեցել: Ինքր շտապել է գիշերային ակումբ և ներս մտնելով տեսել, որ պարասրահում, ջարդված սեղանի վրա պառկած է մի տղամարդ, որի դեմքին նկատել է արյան հետքեր: Ակումբի աշխատակիցներն իր հարցին պատասխանել են, որ վիճաբանություն է տեղի ունեցել նշված հարբած տղամարդու և ակումբի մշտական հաճախորդ Ց.Ղարաբաղցյանի միջև։ Հետագայում ինքը տեղեկացել է, որ նշված վիճաբանության ժամանակ էդգար Մկրտչյանր դանակով հարվածել և մարմնական վնասվածք է պատճառել Ցոլակ Ղարաբաղցյանին ու վերջինիս տեղափոխել են հիվանդանոց։
Վկա Արսեն Մաթևոսյանը դատարանում հայտնեց նաև, որ մի քանի րոպե հետո գիշերային ակումբ են գնացել ոստիկանության աշխատակիցները և ներկա գտնվողներին տարել ոստիկանության բաժին: Հետագայում Ցոլակն իրեն պատմել է, որ Է.Մկրտչյանն ակումբի սրահում իրեն տարօրինակ է պահել: Ինքը մոտեցել է պարզելու, թե ինչումն է բանը: Ցոլակն էլ չի հասկացել, թե ինչու, իրար հրել են, որից հետո Ցոլակը դուրս է եկել ակումբից և դրսում համոզվելով, որ որովայնի շրջանում ծակող առարկայով վնասվածք է ստացել, Կարեն Համբոյանին խնդրել է իրեն տեղափոխել հիվանդանոց:
Վկա Սամվել Հակոբի Տոնյանի նախաքննության ժամանակ տված և դատարանում հետազոտված ցուցմունքով այն մասին, որ 2011թ. օգոստոսի 12-ի լույս 13-ի գիշերը ժամը 06-ի սահամններում իր ընկերոջ Արթուր Աթոյանի հետ զվարճանալու նպատակով գնացել է Բաղրամյան 1-ին հասցեում գտնվող՝ իրենց ընկեր Արսեն Մաթևոսյանին պատկանող, ՙԱնուբիս՚ գիշերային ակումբ: Ներս մտնելով գիշերային ակումբ, տեսել է, որ պարասրահում, ջարդված սեղանի վրա պառկած է մի տղամարդ, որի դեմքին նկատել է արյան հետքեր: Այդ ժամանակ ակումբում են եղել ակումբի աշխատակիցներ՝ մատուցողուհի Ն.Գրիգորյանը և բարմեն Ա.Պողոսյանը: Հետագայում իմացել են, որ ակումբում դանակահարվել է այդ ակումբի մշտական հաճախորդ Ց. Ղարաբաղցյանը:
Վկա Սամվել Տոնյանը դատարանում ցուցմունք տվեց այն մասին, որ ակումբի մատուցող Ն.Գրիգորյանը և բարմեն Ա.Պողոսյանը հայտնել են, որ դանակահարվել է իր ընկեր Ցոլակ Ղարաբաղցյանը: Մոտ 3 րոպե անց ակումբ են գնացել ոստիկանության աշխատակիցները և իրենց բոլորին տարել ոստիկանության բաժին: Պնդեց նախաքննության ժամանակ տված ցուցմունքը:
Վկա Արթուր Վանիկի Աթոյանի նախաքննության ժամանակ տված ցուցմունքով, որը նույնաբովանդակ է վկա Սամվել Տոնյանի ցուցմունքի հետ:
Վկա Արթուր Աթոյանը ցուցմունք տվեց այն մասին, որ ընկերոջ Սամվել Տոնյանի հետ գնացել է իրենց ընկեր Արսեն Մաթևոսյանին պատկանող ՙԱնուբիս՚ գիշերային ակումբ: Ներս մտնելով իմացել է, որ դանակահարություն է տեղի ունեցել: Իրենց գնալուց մոտ 2 րոպե անց ակումբ են գնացել ոստիկանները և իրենց բոլորին տարել ոստիկանության բաժին: Հետագայում չի հիշում թե ումից, լսել է, որ ակումբից դուրս կռիվ է եղել, մեկը ծեծված եկել է ակումբ, որից հետո դեպքն է եղել: Պնդեց նախաքննության և դատաքննության ժամանակ տված ցուցմունքները:
Վկա Սոֆյա Մկրտչյանը ցուցմունք տվեց այն մասին, որ 2011թ. օգոստոսի 12-ին հարազատների հետ նշել են դստեր ծննդյան 9-րդ ամիսը: Խնջույքի ընթացքում ամուսինը` էդգար Մկրտչյանը 3-4 բաժակ օղի է օգտագործել: Ժամը 01-ի սահմաներում Էդգարը դուրս է եկել տանից հյուրերին ուղեկցելու նպատակով: Քիչ անց վերադարձել է: Իրենց միջև վեճ է առաջացել և ամուսինն առանց որևէ բան ասելու դուրս է եկել տանից: Առավոտյան զանգահարել և ասել են, որ Էդգարը ոստիկանությունում է: Ոստիկանությունում Էդգարին տեսել է ծեծված վիճակում, ձեռքը գիպսի մեջ, գլուխը վնասված, հագին կեղտոտ, արյունոտ վերնաշապիկ, որը նրանը չէր: Հետո նրան հագուստ է տարել, իսկ այդ վերնաշապիկը քննիչը պահել է իր մոտ: Օրեր անց մեկուսարանում Էդգարի հետ խոսելիս իմացել է, որ գիշերային ակումբի մոտ դրսում նրան ծեծել են և նա փախել և մտել է ակումբ: Այնտեղ մութ է եղել, զգացել է, որ ինչ որ մեկը մոտեցել է և նա էլ պաշտպանվել է: Տարիներ առաջ Էդգարը վթարի է ենթարկվել, գլխուղեղի արյան մատակարարման հետ կապված խնդիրներ է ունեցել, ուժեղ գլխացավեր է ունեցել, սակայն ՌԴ-ում բուժվել է և նրա մոտ ամեն ինչ նորմալ է: Նախաքննության ընթացքում այդպիսի ցուցմունք է տվել, քանի որ կարծել է, որ գլխի հարվածից երևի հիվանդությունը կրկնվել է:
Վկա Սոֆյա Սուրենի Մկրտչյանի նախաքննության ժամանակ տված ցուցմունքով հայտնել է, որ Է.Մկրտչյանը ուղեղի արյան մատակարարման հետ կապված խնդիրներ ունի և ոգելից խմիչք օգտագործելուց հետո ունենում է գլխացավեր և չի կարողանում լիարժեք ընկալել արտաքին միջավայրը: Այդպիսի իրավիճակներ նրա մոտ առաջանում են նաև սթափ վիճակում, իսկ ալկոհոլ օգտագործելուց հետո այդ վիճակը ավելի սուր է արտահայտվում:
Դատաբժշկական փորձաքննության թիվ 2344 եզրակացությամբ, համաձայն որի Է.Մկրտչյանի ստացած մարնական վնասվածքները գլխի ձախից ճակատային թմբկության, ձախ նախաբազուկ-դաստակային հոդի, ձախ նախաբազկի, աջ սրունքի շրջանի քերծվածների, քթի մեջքին, աջ վերին կոպի, ձախից գոտկային շրջանի արյունազեղումների, աջ քունքային շրջանի փափուկ հյուսվածքների պատռված վերքի, փակ գանգուղեղային վնասվածքի, աջ դաստակի 2-3-4-րդ մատերի հիմնային ֆալանգի կոտրվածքների ձևով պատճառվել են բութ առարկաներով, հնարավոր է որոշման մեջ նշված ժամկետում: Ձախ նախաբազուկ-դաստակային հոդի, ձախ նախաբազկի, աջ սրունքի շրջանի քերծվածների - ձախից գոտկային շրջանի արյունազեղումները առողջության թեթև վնասի հատկանիշներ չեն պարունակում, գլխի շրջանի քերծվածքը, արյունազեղումերը, պատռված վերքը և գանգուղեղային վնասվածքը պատճառել են առողջութանը թեթև վնաս, առողջության կարճատև քայքայումով: Աջ դաստակի 2-3-4-րդ մատերի հիմնային ֆալանգի փակ կոտրվածքները պատճառել են առողջությանը միջին ծանրութան վնաս, առողջության տևական քայքայումով: Չի բացառվում վերջիներիս առաջացումը ինչպես վայր ընկնելուց, այնպես էլ բութ առարկաների անմիջական պատճառման հետևանքով:
Դատաբժշկական փորձաքննության թիվ 1151/հ եզրակացությամբ, համաձայն որի Ցոլակ Ղարաբաղցյանի ստացած մարմնական վնասվածքները՝ որովայնի առաջնային պատի ծակած-կտրած թափանցող վիրավորումների, վերքայի խողովակի ընթացքում մեծ ճարպոնի, բարակ աղեգալարի, միաձիգ հաստ աղու վնասումների ձևով, որն ուղեկցվել է հեմոպերիոտներումով, պատճառվել են սուր ծակող-կտրող գործիքով/ներով/, հնարավոր է որոշման մեջ նշված ժամկետում և ինչպես առանձին-առանձին, այնպես էլ միասին վերցրած պատճառվել են առողջությանը ծանր վնաս՝ կյանքին վնաս սպառնացող։
Դատահետքաբանական և քրեագիտական համալիր փորձաքննության հմ 1704 եզրակացությամբ, համաձայն որի փորձաքննությանը ներկայացված Ցոլակ Ղարաբաղցյանի մայկայի վրա առկա վնասվածքը ծակած-կտրած է և կարող էր առաջանալ ինչպես փորձաքննությանը ներկայացված դանակի շեղբի, այնպես էլ նմանատիպ` միակողմանի սրվածության ծակող-կտրող շեղբ ունեցող այլ գործիքի՝ հնարավոր է դանակի շեղբի, ներգործության արդյունքում։
Փորձաքննությանը ներկայացված դանակը դասվում է կենցաղ-տնտեսական նշանակության խոհանոցային դանակների շարքին, պատրաստված է գործարանային եղանակով և սառը զենք չի հանդիսանում։
Դատահոգեբուժական ամբուլատոր փորձաքննության թիվ 384/11 եզրակացությամբ, համաձայն որի էդգար Գուրգենի Մկրտչյանը որևէ հոգեկան հիվանդությամբ չի տառապել և չի տառապում։ Որպես հոգեպես առողջ անձնավորություն՝ Է.Մկրտչյանը կարող էր ու կարող է հաշիվ տալ իրեն իր գործողությունների համար և ղեկավարել դրանք ինչպես իրավախախտումը կատարելու պահին, այնպես էլ ներկայումս: Ուստի էդգար Գուրգենի Մկրտչյանին իրեն մեղսագրվող արարքի նկատմամբ հարկ է ճանաչել մեղսունակ։ Իրավախախտումը կատարել է հասարակ հարբածության վիճակում: Իր ներկա հոգեկան վիճակով նա կարող է մասնակցել դատաքննչական գործողություններին։
Դեպքի վայրի զննության արձանագրությամբ և դրան կից լուսանկարչական հավելվածներով:
Ցոլակ Հովակիմ Ղարաբաղցյանի վերնաշապիկը ներկայացնելու և զննելու մասին արձանագրությամբ:
Վկա Նաթելա Գագիկի Գրիգորյանի կողմից, հանցագործության գործիք` դանակը ներկայացնելու արձանագրությամբ:
Իրեղեն ապացույց ճանաչված խոհանոցային դանակով և Ց.Ղարաբաղցյանի վերնաշապիկով:
էդգար Գուրգենի Մկրչյանին բերման ենթարկելու և անձնական խուզարկության ենթարկելու արձանագրություններով:
Դատարանը գտնում է, որ դեպքի ժամանակ Է.Մկրտչյանի հագին եղած վերնաշապիկը ներկայացնելու և զննելու մասին արձանագրությունը Էդգար Մկրտչյանին առաջադրված մեղադրանքին վերաբերելի չէ և այն որպես ապացույց չի կարող օգտագործվել, նկատի ունենալով, որ դեպքի ժամանակ ամբաստանյալի հագին եղած վերնաշապիկը նրա կողմից տուժողին դանակով ծանր մարմնական վնասվածք պատճառելու մեղադրանքի համար որևէ ապացուցողական նշանակություն ունենալ չի կարող: Հետևաբար, այն պետք է հանել ապացույցների ցանկից:
4.Դատարանի իրավական վերլուծությունները.
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ էդգար Գուրգենի Մկրտչյանին առաջադրված մեղադրանքը ՀՀ քրեական օրենսգրքի 112 հոդվածի 1-ին մասով հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 112 հոդվածի 1-ին մասին և արարքի որակումը ճիշտ է:
Ամբաստանյալ էդգար Մկրտչյանի նկատմամբ պատիժ նշանակելիս, դատարանը հաշվի է առնում նրա կատարած արարքի հանրության համար վտանգավորության աստիճանը, ինչպես նաև հանցավորի անձը:
Որպես ամբաստանյալ էդգար Մկրտչյանի անձը բնութագրող, պատասխանատվությունը և պատիժը մեղմացնող հանգամանքներ դատարանը դիտում է այն, որ նա նախկինում դատված չի եղել, երիտասարդ է, բնութագրվում է դրական, հանցանքն ընդունել և զղջում է կատարածի համար, նրա խնամքին են գտնվում մայրը, կինը և մանկահասակ երեխան (Էլիզա Էդգար Մկրտչյան` ծնված 12.11.2010թ.-ին), որոնց միակ կերակրողն ինքն է, տառապում է ՙԳանգուղեղային վնասվածքի հետևանքներ՚ ախտորոշմամբ:
Ամբաստանյալի պատասխանատվությունը և պատիժը ծանրացնող հանգամանք է հանցանք ալկոհոլի ազդեցության տակ կատարելը:
Կատարած արարքի համար ամբաստանյալ էդգար Գուրգենի Մկրտչյանը ենթակա է քրեական պատասխանատվության և պատժի:
Հաշվի առնելով էդգար Մկրտչյանի կատարած արարքի հանրության համար վտանգավորության աստիճանը և բնույթը, նրա անձը դրականորեն բնութագրող տվյալները, պատասխանատվությունը և պատիժը մեղմացնող և ծանրացնող հանգամանքները, ինչպես նաև այն, որ ՀՀ քրեական օրենսգրքի 112 հոդվածի 1-ին մասի սանկցիայով նախատեսված է պատիժ միայն ազատազրկման ձևով, դատարանը գտնում է, որ պատժի նպատակներին հասնելու համար էդգար Գուրգենի Մկրտչյանի նկատմամբ ՀՀ քրեական օրենսգրքի 112 հոդվածի 1-ին մասով կատարած արարքի համար պատիժ պետք է նշանակել ազատազրկման ձևով, որը նա պետք է կրի ՀՀ ԱՆ համապատասխան քրեակատարողական հիմնարկում, իսկ նրա նկատմամբ կիրառված խափանման միջոցը` կալանավորումը, պետք է թողնել անփոփոխ` մինչև դատավճռի օրինական ուժի մեջ մտնելը:
Դատարանը գտնում է, որ տուժող Ցոլակ Ղարաբաղցյանի քաղաքացիական հայցի հարցը պետք է համարել լուծված, քանի որ դատական քննության ժամանակ Ցոլակ Ղարաբաղցյանը հայտնել է, որ ամբաստանյալի նկատմամ բողոք և որևէ նյութական պահանջ չունի:
Անդրադառնալով իրեղեն ապացույցների հարցին, դատարանը գտնում է, որ դատավճիռն օրինական ուժի մեջ մտնելուց հետո 2011թ. օգոստոսի 13-ի որոշումներով իրեղեն ապացույց ճանաչված հանցագործության գործիք հանդիսացող դանակը և Ցոլակ Ղարաբաղցյանի սև գույնի վերնաշապիկը պետք է ոչնչացնել:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 357-360, 365, 369-372 հոդվածներով, դատարանը

Վ Ճ Ռ Ե Ց

էդգար Գուրգենի Մկրտչյանին մեղավոր ճանաչել ՀՀ քրեական օրենսգրքի 112 հոդվածի 1-ին մասով նախատեսված հանցանք կատարելու մեջ և նրան դատապարտել ազատազրկման երեք (3) տարի ժամկետով:
Պատժի սկիզբը հաշվել 2011 թվականի օգոստոսի 13-ից:
Պատիժը պետք է կրի ՀՀ ԱՆ համապատասխան քրեակատարողական հիմնարկում:
էդգար Գուրգենի Մկրտչյանի նկատմամբ որպես խափանման միջոց ընտրված կալանավորումը թողնել անփոփոխ, մինչև դատավճռի օրինական ուժի մեջ մտնելը:
Տուժող Ցոլակ Ղարաբաղցյանի քաղաքացիական հայցի հարցը համարել լուծված:
Դատավճիռն օրինական ուժի մեջ մտնելուց հետո իրեղեն ապացույց հանդիսացող խոհանոցային դանակը և Ցոլակ Ղարաբաղցյանի վերնաշապիկը ոչնչացնել:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակվելու օրվանից հետո մեկամսյա ժամկետում:


Դատավոր` ստորագրություն
Բնագրի հետ ճիշտ է
Դատավոր Լ. Ավետիսյան