գործ No ԵԱՔԴ/0183/01/11

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

13.02.2012թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը

նախագահությամբ` դատավոր Ա.Մկրտչյանի
քարտուղարությամբ` Օ.Կիրակոսյանի
մասնակցությամբ`
մեղադրող Գ.Շահբազյանի
ամբաստանյալ Ե.Հարոյանի
տուժող Ա.Վարդանյանի
պաշտպան Հ.Բաղդասարյանի
թարգմանիչ Վ.Շահինյանի

Դատարանում, դռնբաց դատական նիստում քննեց քրեական գործն ըստ մեղադրանքի` Ելենա Նիկոլայի Հարոյանի /ծնված 07.09.1957թ. Ռուսաստանի Դաշնություն ք.Մախաչկալա, ազգությամբ ռուս, ՀՀ քաղաքացի, միջնակարգ կրթությամբ, ամուսնացած, չի աշխատում, նախկինում չդատված, բնակվում է ք.Երևան Սոսեի փ. տուն 70/:
Մեղադրվում է ՀՀ քրեական օրենսգրքի 117–րդ հոդվածով:

Պ Ա Ր Զ Ե Ց

1.Գործի դատավարական նախապատմությունը
2011 թվականի օգոստոսի 23-ին տեղի է ունեցել դեպքը:
2011 թվականի հոկտեմբերի 05-ին հարուցվել է թիվ 14131211 քրեական գործը:
2011 թվականի դեկտեմբերի 01-ին Ե.Հարոյանին մեղադրանք է առաջադրվել և նրա նկատմամբ խափանման միջոց է ընտրվել ստորագրություն չհեռանալու մասին:
2011 թվականի դեկտեմբերի 13-ին թիվ 14131211 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:

2.Գործի փաստական հանգամանքները
Նախաքննության մարմինն ամբաստանյալ Ելենա Հարոյանին ՀՀ քրեական օրենսգրքի 117–րդ հոդվածով մեղադրանք է առաջադրել այն արարքի համար, որ ՙնա 2011թ. օգոստոսի 23-ին ժամը 18.00-ի սահմաններում Երևան քաղաքի Սոսեի փողոցի թիվ 70 և 72 տների հողամասերի սահմանագծում հողամասի ցանկապատի տեղաշարժման հարցի շուրջ առաջացած վիճաբանության ընթացքում որպես ցանկապատի հենակ տեղադրված փայտով հարվածել է հարևանուհու` Սոսե 72 տան բնակիչ Անժելա Գրիգորի Վարդանյանի գլխին` պատճառելով առողջության թեթև վնասի հատկանիշներ պարունակող մարմնական վնասվածք` արտահայտված գլխի շրջանի արյունազեղման ձևով՚:

3.Ապացույցների հետազոտում
Առաջադրված մեղադրանքում ամբաստանյալ Ելենա Հարոյանն իրեն մեղավոր չի ճանաչել և ցուցմունք տվել այն մասին, որ 2011 թվականի օգոստոսի 23-ին ժամը 18.00-ի սահմաններում ինքը տնամերձ հողամասում ջրել է ծառերը, երբ նկատել է հարևանուհի Անժելային հողամասի սահմանագծում առկա ցանկապատը հրելիս: Մոտենալով հարցրել է, թե ինչ է անում, իսկ Անժելան առանց հարված ստանալու ընկել է գետնին և մորը օգնության կանչել: Ա.Վարդանյանին չի հարվածել, այլ վերջինս վնասվածքը հնարավոր է ստացել է վայր ընկնելու հետևանքով:

Տուժող Անժելա Գրիգորի Վարդանյանը ցուցմունք տվեց այն մասին, որ բնակվում է ք.Երևան Սոսեի 72 հասցեում մայրիկի` Ծաղիկ Բարսեղյանի հետ միասին: Իրենց հարևանությամբ է բնակվում Ելենա Նիկոլայի Հարոյանը, որի տնամերձ հողամասը իրենց հողամասից բաժանվում է մետաղյա ցանցով, որը ձողերով ամուր ամրացված չէ, ինչն էլ պատճառ է դարձել Ելենայի կողմից այն պարբերաբար դեպի իրենց հողամաս հրելուն: Այդ պատճառով էլ իրենց միջև հաճախակի կենցաղային բնույթի վեճեր են տեղի ունեցել: Ա.Վարդանյանը նշեց, որ 2011 թվականի օգոստոսի 23-ին ժամը 18.00-ի սահմաններում գնացել է հողամաս զբոսնելու և նկատել է, որ մետաղյա ցանցը կրկին հրել են իրենց կողմը և փայտե հենակ դրել: Այդ պահին հարևան Ելենան գտնվել է ցանկապատից այն կողմ և ինքը առանց նրա հետ խոսելու հրել է մետաղյա ցանցը, որպեսզի ուղղի: Ելենան մոտենալով ցանցին այն կրկին հրել է իրենց կողմ և ասել, որ այդպես պետք է լինի: Նա փորձել է չթողնել Ելենային ցանցը հրել, իսկ վերջինս ձեռքում եղած փայտով, ուժգին հարվածել է իր գլխին և ինքը վայր է ընկել: Իր օգնության կանչերին արձագանքել է մայրը` Ծաղիկ Բարսեղյանը, ով օգնել է վեր կենալ և տուն հասնել, որից հետո զանգահարել են ոստիկանություն և շտապ օգնություն, սակայն գումար չունենալու պատճառով բուժօգնությունից հրաժարվել է և ոստիկանների ուղեկցությամբ եկել տուն: Տուժողը նշեց, որ Ե.Հարոյանը հարվածել է մեկ անգամ, ինքը նրան չի հարվածել, միջադեպին ականատեսներ չեն եղել:

Վկա Ծաղիկ Բարսեղյանը ցուցմունք տվեց այն մասին, որ բնակվում է ք.Երևան Սոսեի 72 հասցեում դստեր` Անժելա Վարդանյանի հետ միասին, իսկ իրենց հարևանությամբ` թիվ 70 բնակարանում բնակվում է Ելենա Նիկոլայի Հարոյանը, որի ընտանիքի հետ իրենց հարաբերությունները ներկայումս լավ չեն` կապված հողամասի սահմանագծի հետ, որոնք միմյանցից բաժանված են մետաղյա ցանցով: 2011 թվականի օգոստոսի 23-ին ժամը 18.00-ի սահմաններում լսել է Անժելայի օգնության ձայնը և անմիջապես վազել հողամաս, որտեղ մետաղյա ցանկապատի մոտ նկատել է նրան գետնին ընկած վիճակում, իսկ իր այն հարցին, թե ինչ է պատահել, Անժելան պատասխանել է, որ Ելենան փայտով հարվածել է իր գլխին:

Դատաբժշկական փորձաքննության թիվ 2460 եզրակացության համաձայն, Ա.Վարդանյանի ստացած մարմնական վնասվածքը` գլխի շրջանի արյունազեղման ձևով, որը ուղեկցվել է գանգուղեղային վնասվածքի ախտանիշներով, պատճառվել է բութ առարկայի ազդեցությամբ, հնարավոր է նշված ժամկետում, որը պատճառել է առողջությանը թեթև վնաս առողջության կարճատև քայքայումով, նկատի ունենալով, որ վնասվածքների հետ անմիջական պատճառական կապի մեջ եղած հետևանքների տևողությունը վեց օրից ոչ պակաս է, բայց ոչ ավելի 21 օրից: Ելնելով Ա.Վարդանյանի վնասվածքի բնույթից և տեղակայումից, այն չէր կարող առաջանալ վայր ընկնելու հետևանքով, քանի որ այդ դեպքում պետք է լինեին նաև այլ վնասվածքներ գլխի, դեմքի և մարմնի նույն կեսի շրջաններում, որոնք բացակայում են:
գ.թ. 21-22

4.Դատարանի իրավական վերլուծությունները
Դատարանը գործով ձեռք բերված յուրաքանչյուր ապացույց գնահատելով թույլատրելիության վերաբերելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, ղեկավարվելով օրենքով, ներքին համոզմամբ, գտնում է, որ ամբաստանյալ Ելենա Նիկոլայի Հարոյանի մեղավորությունը ՀՀ քրեական օրենսգրքի 117–րդ հոդվածով նախատեսված հանցանք կատարելու մեջ ապացուցված է, որի համար նա ենթակա է քրեական պատասխանատվության և պատժի:
Պատիժ նշանակելիս դատարանը հաշվի է առնում հանցագործության հանրության համար վտանգավորության աստիճանն ու բնույթը, ինչպես նաև անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները:
Ամբաստանյալ Ելենա Հարոյանի անձը բնութագրող տվյալներ, պատասխանատվությունն ու պատիժը մեղմացնող հանգամանքներ դատարանը հաշվի է առնում այն, որ նա նախկինում դատված չի եղել, առաջին անգամ հանգամանքների պատահական զուգորդմամբ կատարել է ոչ մեծ ծանրության հանցանք, բնութագրվում է դրական:
Ամբաստանյալի պատասխանատվությունը և պատիժը ծանրացնող հանգամանքներ դատարանը չի արձանագրել:
Դատարանը գտնում է, որ Տուժող Անժելա Վարդանյանի քաղաքացիական հայցը պետք է թողնել առանց քննության, քաղաքացիական դատավարության կարգով լուծելու համար, քանի որ տուժողի կողմից հայցը հիմնավորող համապատասխան փաստաթղթեր չեն ներկայացվել:
Ղեկավարվելով ՀՀ քրեական դատավարության օրենսգրքի 357-360-րդ, 365-րդ, 369-373-րդ, 379-րդ հոդվածներով դատարանը

Վ Ճ Ռ Ե Ց

Ելենա Նիկոլայի Հարոյանին մեղավոր ճանաչել ՀՀ քրեական օրենսգրքի 117–րդ հոդվածով և պատիժ նշանակել տուգանք` նվազագույն աշխատավարձի հիսնապատիկի` 50.000 /հիսուն հազար/ ՀՀ դրամի չափով:
Ելենա Հարոյանի նկատմամբ ընտրված խափանման միջոցը` ստորագրություն չհեռանալու մասին, թողնել անփոփոխ, մինչև դատավճռի օրինական ուժի մեջ մտնելը:
Տուժող Անժելա Վարդանյանի քաղաքացիական հայցը թողնել առանց քննության, քաղաքացիական դատավարության կարգով լուծելու համար:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակման պահից մեկամսյա ժամկետում:




ԴԱՏԱՎՈՐ Ա.ՄԿՐՏՉՅԱՆ