գործ No ԵԱՔԴ/0177/01/11

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

24.01.2012թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը

նախագահությամբ` դատավոր Արթուր Մկրտչյանի
քարտուղարությամբ` Շուշան Վանոյանի
մասնակցությամբ`
մեղադրող Սահակ Գրիգորյանի
ամբաստանյալ Կյուրեղ Աղաջանյանի
պաշտպան Նվարդ Սվարյանի
տուժող Կարինե Աղաջանյանի
տուժողի ներկայացուցիչ Գուրգեն Թորոսյանի

Դատարանում, դռնբաց դատական նիստում քննեց քրեական գործն ըստ մեղադրանքի` Կյուրեղ Առաքելի Աղաջանյանի (ծնված 03.11.1950թ., ք.Երևան, ազգությամբ հայ, ՀՀ քաղաքացի, միջնակարգ կրթությամբ, ամուսնացած, չի աշխատում, չդատված, հաշվառված և բնակվող ք.Երևան, Սևքարեցի Սաքոյի 75 տանը, ներկայումս ՙՆուբարաշեն՚ ՔԿՀ-ի կալանավոր):
Մեղադրվում է ՀՀ քրեական օրենսգրքի 112-րդ հոդվածի 1-ին մասով:

Պ Ա Ր Զ Ե Ց

Գործի դատավարական նախապատմությունը
2011 թվականի օգոստոսի 15-ին տեղի է ունեցել դեպքը:
2011 թվականի օգոստոսի 15-ին հարուցվել է թիվ 14125311 քրեական գործը և Կ.Աղաջանյանը ձերբակալվել է:
2011 թվականի օգոստոսի 18-ին Կյուրեղ Աղաջանյանին մեղադրանք է առաջադրվել ՀՀ քրեական օրենսգրքի 112-րդ հոդվածի 1-ին մասով և նրա նկատմամբ խափանման միջոց է կիրառվել կալանքը:
2011թ. դեկտեմբերի 06-ին թիվ 14125311 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:

Գործի փաստական հանգամանքները
Նախաքննության մարմինն ամբաստանյալ Կյուրեղ Առաքելի Աղաջանյանին ՀՀ քրեական օրենսգրքի 112-րդ հոդվածի 1-ին մասով մեղադրանք է առաջադրել այն արարքի համար, որ ՙնա 2011թ. օգոստոսի 15-ին, ժամը 11:00-ի սահմաններում Երևան քաղաքի Սևքարեցի Սաքոյի 75 տան դիմաց իր հանգուցյալ եղբոր կնոջ` Կարինե Ազատի Աղաջանյանի հետ կենցաղային հարցերի շուրջ ծագած վիճաբանության ժամանակ առողջությանը ծանր մարմնական վնաս հասցնելու դիտավորությամբ իր մոտ եղած դանակով հարվածներ է հասցրել Կ.Աղաջանյանի որովայնի և ուսերի շրջանում` վերջինիս առողջությանը պատճառելով ծանր մարմնական վնասվածքներ՚:

Ապացույցների հետազոտում
Առաջադրված մեղադրանքում ամբաստանյալ Կյուրեղ Աղաջանյանն իրեն լիովին մեղավոր ճանաչեց, սակայն օգտվելով իր դատավարական իրավունքից` հրաժարվեց դատաքննության փուլում ցուցմունք տալուց և նշեց, որ պնդում է նախաքննության փուլում տված ցուցմունքները:
Նախաքննության փուլում Կյուրեղ Աղաջանյանը ցուցմունք է տվել այն մասին, որ 2011թ. օգոստոսի 15-ին վաղ առավոտյան զբաղվել է բակի գործերով, որից հետո պետք է գնար իր ծնողների գերեզմանը մաքրելու: Այդ նպատակով իր մոտ է վերցրել աշխատանքային դանակը, փաթաթել թերթի մեջ ու դուրս եկել իրենց բակից: Ճանապարհին տեսել է Կարինե Աղաջանյանին, որն ինչ-որ բան է ասել իրեն, սակայն ինքը չի հասկացել: Դրանից հետո ինքը հրել է Կարինե Աղաջանյանին, վերջինս ճանկռել է իր պարանոցը և ինքը դանակով հարվածել է Կարինեի աջ կողքին: Կարինե Աղաջանյանն սկսել է գոռալ և հարվածել իրեն, ինչի հետևանքով ինքը մեջքի վրա ընկել է բակում կանգնած ՙԶապորոժեց՚ մակնիշի մեքենայի և պատի արանքում, իսկ Կարինե Աղաջանյանն ընկել է իր վրա: Քանի որ Կարինեն ծանր է եղել և ինքը չի կարողացել բարձրանալ ընկած տեղից, դանակով մի քանի անգամ հարվածել է Կարինեի ուսին, որպեսզի վերջինս վեր կենա իր վրայից, սակայն տեսնելով, որ Կարինեն ևս չի կարողանում բարձրանալ, դադարել է նրան հարվածելուց: Այդ պահին իր որդին է եկել, դուրս հանել իրեն ու տարել տուն, իսկ դանակը վերցրել է: Դեպքից հետո ինքը բակ դուրս չի եկել: Այդ ընթացքում իր կինը և իրենց հարևանները, մինչև շտապօգնության գալը, Կարինե Աղաջանյանին բուժօգնություն են ցույց տվել, իսկ հետո շտապօգնության մեքենայով տարել են հիվանդանոց:
Հասկանալով, թե ինչ է արել, վերցրել է դանակը և ներկայացել ոստիկանություն: Ինքը Կ.Աղաջանյանին չի հետևել, իսկ այդ օրը նրան պատահական է հանդիպել, և մտածելով, որ Կարինեն կրկին վիրավորում և վատաբանում է, անկախ իրենից, չհասկանալով, թե ինչպես, դանակով հարվածել է նրան: Ինքը չի հասկացել, թե ինչպես է բազմաթիվ հարվածներ հասցրել Կ.Աղաջանյանին: Ինքը Կ.Աղաջանյանին սպանելու նպատակ չի ունեցել, իսկ եթե նույնիսկ ունենար, ապա դա կարող էր անել բազմաթիվ անգամ, երբ Կ.Աղաջանյանը տանը միայնակ է եղել: Կարինե Աղաջանյանին դանակահարելու նպատակը եղել է նրան վախեցնելը, գիտակցել է, որ դանակի հարվածներից Կ.Աղաջանյանը չի կարող մահանալ, քանի որ բացի առաջին հարվածից, որը ևս ուժեղ չի եղել, մյուս հարվածներն ավելի թույլ են եղել:
Գ.թ. 24-26, 75-76, 104, 168-175, 199-201

Ամբաստանյալ Կյուրեղ Աղաջանյանին առաջադրված մեղադրանքն ապացուցվել է նաև դատաքննությամբ հետազոտված ներքոհիշյալ ապացույցներով.

Գործով տուժող Կարինե Ազատի Աղաջանյանը դատաքննության փուլում ցուցմունքներ տվեց այն մասին, 2011թ. օգոստոսի 15-ին ժամը 11:00-ի սահմաններում իր քրոջ աղջիկ Լիլիթ Ղազարյանի հետ տուն վերադառնալիս փողոցի վերջում նկատել է տան դարպասի մոտ ծխող Կ.Աղաջանյանին, որն իրեն տեսնելով ներս է մտել: Հասնելով նրանց տան դարպասի մոտ, Կ.Աղաջանյանը մոտեցել է իրեն և մեկնելով փաթաթված թերթը` ասել. ՙսրա մեջ բան կա, վերցրու կարդա, երկու օրից կպատասխանես՚: Ինքը հարցրել է, թե ինչ թուղթ է և Կ.Աղաջանյանը դանակով հարվածել է իր աջ կողքին: Ինքն սկսել է գոռալ, իսկ Կ.Աղաջանյանը նորից է հարվածել իրեն, որից հետո դանակի բռնակով հարվածել է իր գլխին: Դրանից հետո բռնելով իր մազերից գլուխը հարվածել է մոտակա խողովակին: Կ.Աղաջանյանը նորից է հարվածել, իսկ ինքը հրել է նրան, որից Կ.Աղաջանյանը մեջքի վրա ընկել է կայանված ՙԶապոռոժեց՚ մակնիշի մեքենայի վրա, և ուղղվելով կրկին դեպի իրեն է եկել: Այդ ժամանակ Կ.Աղաջանյանն իրեն հայհոյել է և ինքը հարվածել է նրան, որից Կ.Աղաջանյանը դեպի հետ գնալով բռնել է իր շորերից և միասին ընկել են մեքենայի և պատի արանքում: Ինքն ընկել է Կ.Աղաջանյանի վրա, որը ձախ ձեռքով շարունակել է հարվածել իր ուսերին: Այդ պահին մոտեցել է Կ.Աղաջանյանի որդին` Արթուր Աղաջանյանը և բաժանել նրանց: Հավաքված հարևանները իրեն բուժօգնություն են ցուցաբերել, մինչև ժամանել են շտապօգնության աշխատակիցները և իրեն տեղափոխել են ՙԱրմենիա՚ ՀԲԿ:

Գործով վկա, Կ.Աղաջանյանի որդին` Արթուր Կյուրեղի Աղաջանյանը դատաքննության փուլում ցուցմունք է տվել այն մասին, որ իր հոր և հորեղբոր կնոջ միջև տարաձայնություններ են եղել հայրական տան բաժանման հետ կապված և երկկողմ հայցերով դիմել են դատարան, սակայն այդ հարցն այդպես էլ չի լուծվել: 2011թ. օգոստոսի 15-ին առավոտյան ժամը 11:00-ի սահմաններում ինքը քնած է եղել, երբ փողոցից լսել է երեխայի բղավոցի ձայներ, դուրս է եկել փողոց ու տեսել է այնտեղ կայանված ՙԶապորոժեց՚ մակնիշի մեքենայի և պատի արանքում իրար վրա ընկած անձանց: Մոտեցել է և տեսել հորն ու Կարինե Աղաջանյանին: Հոր ձեռքին եղել է բակի աշխատանքային դանակը, որն ինքը վերցրել է, ու հորը տուն է տարել: Վերջինս դրանից հետո տնից դուրս չի եկել: Բակում հավաքված հարևանները Կ.Աղաջանյանին բուժօգնություն են ցույց տվել և շուտով տեղափոխել հիվանդանոց: Իսկ հայրը վերցրել է դանակը և ինքնակամ ներկայացել ոստիկանություն: Հայրը երբեք Կ.Աղաջանյանի հետ վատ չի խոսել և նրան չի վիրավորել, ու նաև երբեք չի ասել, որ պատրաստվում է վնասել վախեցնել կամ առավել ևս դանակահարել նրան:

Գործով վկա, Կ.Աղաջանյանի կինը` Հռիփսիմե Պարույրի Սահակյանը, օգտվելով իր դատավարական իրավունքից, դատական քննության փուլում հրաժարվեց ցուցմունքներ տալուց և նշեց, որ պնդում է նախաքննության փուլում տված ցուցմունքներ:
Հ.Սահակյանը նախաքննության փուլում ցուցմունք է տվել, որ իր ամուսնու և եղբոր կնոջ միջև տարիներ շարունակ տարաձայնություններ են եղել հայրական տան բաժանման պատճառով, որի հետ կապված երկկողմ հայցերով դիմել են դատարան, սակայն այդ հարցը լուծում չի ստացել: 2011թ. օգոստոսի 15-ին ժամը 11:00-ի սահմաններում ամուսինն ասել է, որ ցանկանում է այցելել գերեզման, հողամասից վերցրել է աշխատանքային դանակը, փաթաթել թերթի մեջ և դուրս եկել տնից: Մի քանի րոպե անց լսել է Կարինե Աղաջանյանի քրոջ աղջկա` Լիլիթ Ղազարյանի բղավոցը, դուրս է եկել փողոց և պատի ու բակում կայանված ՙԶապորոժեց՚ մակնիշի մեքենայի արանքում տեսել ընկած Կ.Աղաջանյանին և դեպի տուն քայլող իր որդուն ու ամուսնուն: Ինքը վազելով մոտեցել է Կարինե Աղաջանյանին և հարցրել, թե ինչ է եղել, ու վերջինս պատասխանել է, որ իր ամուսինն է դանակահարել: Հավաքված հարևանների հետ նրան բուժօգնություն է ցույց տվել, հետո Կ.Աղաջանյանին տեղափոխել են հիվանդանոց: Իսկ ամուսինն ինքնակամ ներկայացել է ոստիկանություն: Ամուսինը երբեք Կ.Աղաջանյանին վատ չի վերաբերվել և մտադրություն չի ունեցել նրան վախեցնել կամ վնասել:
Գ.թ. 166-167

Գործով անչափահաս վկա, տուժողի քրոջ դուստր Լիլիթ Ռազմիկի Ղազարյանը դատաքննության փուլում ցուցմունք է տվել այն մասին, որ 2011թ. օգոստոսի 15-ին ժամը 11:00-ի սահմաններում իր մրաքրոջ հետ գնացել է տուն, երբ փողոցում դարպասի մոտ տեսել է Կ.Աղաջանյանին, որն իրենց տեսնելով ներս է մտել: Երբ հասել են տան դարպասին, ինքը ներս է մտել, իսկ Կ.Աղաջանյանը մոտեցել է մորաքրոջը, նրան մեկնել փաթաթված թերթը և ասել, որ կարդա և երեք օրից պատասխանի: Երբ մորաքույրը ձեռքը մեկնել է, որ վերցնի, Կ.Աղաջանյանը բռնել է նրա մազերից և գլուխը խփել մոտակա խողովակին: Տեսնելով այդ, ինքը վազել է դեպի տուն: Ճանապարհին տեսել է հարևանուհի Սվետլանա Ղազարյանին և նրան ասել, որ մորաքրոջը սպանում են: Մտել է տուն և զանգահարել հարևանուհի Լիլիկ Անտոնյանին ու նույնն ասել նաև նրան: Դրանից հետո, երբ հարևանները հավաքվել են, ինքն իջել է փողոց, իսկ որոշ ժամանակ անց մորաքրոջը տեղափոխել են հիվանդանոց:

Գործով վկա Սվետլանա Հրանտի Ղազարյանը դատաքննության փուլում ցուցմունք է տվել այն մասին, որ Կյուրեղ և Կարինե Աղաջանյանների հարևանուհին է: 2011թ. օգոստոսի 15-ին ժամը 11:00-ի սահմաններում, երբ գտնվել է տանը, լսել է Կարինե Աղաջանյանի քրոջ աղջիկ Լիլիթ Ղազարյանի բղավոցը: Վերջինս շատ վախեցած և շփոթված Է եղել ու իրեն ասել է, որ մորաքրոջը խփել են: Դուրս է եկել և տեսել, որ այնտեղ կայանված մեքենայի մոտ հավաքվել են հարևաններ, որոնք Կարինե Աղաջանյանին Էին բարձրացնում: Երբ մոտեցել է, Կյուրեղ Աղաջանյանի կինը` Հռիփսիմե Սահակյանն իրեն խնդրել Է աթոռ բերել, որ Կ.Աղաջանյանը նստի: Այդտեղ գտնվողներից ինչ-որ մեկն ասել Է, որ Կյուրեղ Աղաջանյանն Է դանակահարել նրան: Հավաքված մարդիկ բուժօգնություն են ցուցաբերել նրան` մինչև ժամանել են շտապօգնության աշխատակիցները և տարել հիվանդանոց:

Գործով վկա Հրաչյա Պարույրի Սեդրակյանը դատաքննության ժամանակ ցուցմունք է տվել այն մասին, որ Կյուրեղ և Կարինե Աղաջանյանների հարևանն է: 2011թ. օգոստոսի 15-ին ժամը 11:00-ի սահմաններում ինքը տանը քնած է եղել, երբ փողոցից ձայներ Է լսել: Դուրս գալով տեսել Է Կարինե, Կյուրեղ և Արթուր Աղաջանյաններին: Կարինե Աղաջանյանը փողոցում կայանված մեքենայի մոտ պառկած կամ կիսանստած վիճակում էր, իսկ Արթուրը և հայրը այդ պահին տուն են մտել: Ինքը Արթուրի ձեռքին տեսել է չափսերով մեծ դանակ, որը Կ.Աղաջանյանը միշտ օգտագործել Է հողամասում աշխատալիս: Այդ պահին մոտեցել են հարևանուհիները և ինքը լսել Է, թե ինչպես է Կարինե Աղաջանյանն ասում, որ Կյուրեղ Աղաջանյանն իրեն դանակահարել է: Կանայք բարձրացնել են Կ.Աղաջանյանի հագուստները վնասվածքները տեսնելու համար, իսկ ինքը մտել է Կյուրեղ Աղաջանյանի տուն, որը պատրաստվում էր ներկայանալ ոստիկանություն: Շուտով ժամանել են շտապօգնության աշխատակիցները և Կ.Աղաջանյանին տեղափոխել են հիվանդանոց:
Ինքը Կյուրեղ Աղաջանյանի կողմից Կարինե Աղաջանյանին սպանելու սպառնալիքներ չի լսել: Հայտնել է նաև, որ Կարինե և Կյուրեղ Աղաջանյանների միջև արդեն երկար տարիներ առկա են տարաձայնություններ` կապված հողատարածքի բաժանման հետ:

Գործով վկաներ Սվետլանա Սանասարի Հարությունյանը, Մեդաքսի Մարտինի Կարապետյանը, Գագիկ Սերյոժայի Մարգարյանը, Էմմա Սարիբեկի Հախվերդյանը, Ալվարդ Սարիբեկի Մարգարյանը, Սուսաննա Մովսեսի Ավագյանը, Սաթենիկ Աշոտի Նիկողոսյանը, Արարատ Մարտինի Կուջոյանը դատաքննությամբ նույնաբովանդակ ցուցմունքներ են տվել այն մասին, որ 2011թ. օգոստոսի 15-ին ժամը 11:00-ի սահմաններում բակից լսել են ձայներ, դուրս են եկել և տեսել, որ հարևաններ են հավաքված և Կարինե Աղաջանյանին բուժօգնություն են ցույց տալիս: Որոշ ժամանակ անց Կ.Աղաջանյանին շտապօգնության մեքենայով տեղափոխել են հիվանդանոց: Հետագայում իմացել են, որ նրան դանակահարել է Կյուրեղ Աղաջանյանը:
Նախաքննության փուլում նունաբովանդակ ցուցմունքներ են տվել նաև վկաներ Արմեն Սարիբեկի Կարապետյանը և Լիլիկ Կառլենի Անտոնյանը:
Գ.թ. 115-116, 132, 163-164

Ամբաստանյալ Կյուրեղ Աղաջանյանին առաջադրված մեղադրանքը հիմնավորվել է նաև Կյուրեղ Աղաջանյանի ինքնակամ ներկայանալու և հանցագործության գործիք հանդիսացող դանակը ներկայացնելու մասին արձանագրություններով:
Գ.թ 6

Տուժող Կարինե Աղաջանյանի դատաբժշկական փորձաքննության թիվ 1154 եզրակացության համաձայն` Կ.Աղաջանյանի մարմնական վնասվածքները` դեմքի, աջ ակնակապիճի, արմնկային հոդի, դաստակի, ձախ նախաբազկի շրջանների քերծվածքի, արյունազեղումների, աջ ճակատ-քունքային շրջանի ենթամաշկային արյունահավաքի, քերծվածքների, գլխուղեղի ցնցման, աջ և ձախ թիակային, աջ ուսահոդի, աճուկային, ձախ գոտկային, որովայնի շրջանի բազմաթիվ ծակված-կտրված, չթափանցող վերքերի, մեծ ճարպոնի վնասում՝ որովայնի առաջնային պատի ծակված-կտրված, թափանցող վերքի ձևով հասցվել են աջ ակնակապիճի, արմնկային հոդի, դաստակի, ձախ նախաբազկի շրջանների քերծվածքները, արյունազեղումները, աջ ճակատ-քունքային շրջանի ենթամաշկային արյունահավաքը, քերծվածքները, գլխուղեղի ցնցումը` բութ, կոշտ առարկաներով: Աջ և ձախ թիակային, աջ ուսահոդի, աճուկային, ձախ գոտկային, որովայնի շրջանի բազմաթիվ ծակված-կտրված, չթափանցող վերքերի, մեծ ճարպոնի վնասում` որովայնի առաջնային պատի ծակված-կտրված, թափանցող վերքը սուր ծակող-կտրող գործիքով/ներով/, հնարավոր Է` նշված ժամկետում և հանգամանքներում և պատճառել է առողջությանը ծանր վնաս` կյանքին վտանգ սպառնացող:
գ.թ. 107-108

Կյուրեղ Առաքելի Աղաջանյանի դատաբժշկական փորձաքննության թիվ 1201 եզրակացության համաձայն Կ.Աղաջանյանի մարմնական վնասվածքները` զույգ արմնկային հոդերի, ձախ սրունքի շրջանների քերծվածքների, ներկայիս՝ ապապիգմենտավորված տեղամասերի ձևով հասցվել են բութ, կոշտ առարկաներով, հնարավոր Է նշված ժամկետում և հանգամանքներում, որոնք առողջության թեթև վնասի հատկանիշներ չեն պարունակում:
գ.թ. 117-118

Դատահետքաբանական-քրեագիտական համալիր փորձաքննության թիվ 1705 եզրակացության համաձայն` Կարինե Աղաջանյանի զգեստի և ներքնազգեստի վրա առկա վնասվածքները ծակած-կտրած են և կարող Էին առաջանալ ինչպես փորձաքննությանը ներկայացված դանակի շեղբի, այնպես էլ նմանատիպ ծակող-կտրող շեղբ ունեցող այլ գործիքի/ների/, հնարավոր է դանակի/ների/, շեղբի ներգործության արդյունքում: Ներկայացված դանակը պատրաստված է արհեստագործական եղանակով, այն դասվում է կենցաղ-տնտեսական նշանակության խոհանոցային դանակների շարքին և սառը զենք չի հանդիսանում:
գ.թ. 141-144

Դատարանը գտնում է, որ գործով անթույլատրելի և ոչ վերաբերելի ապացույցներ չկան:

4.Դատարանի իրավական վերլուծությունները
Դատարանը գործով ձեռք բերված յուրաքանչյուր ապացույց գնահատելով թույլատրելիության վերաբերելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, ղեկավարվելով օրենքով, ներքին համոզմամբ, գտնում է, որ ամբաստանյալ Կյուրեղ Աղաջանյանի մեղավորությունը ՀՀ քրեական օրենսգրքի 112-րդ հոդվածի 1-ին մասի հատկանիշներով նախատեսված հանցագործություն կատարելու մեջ ապացուցված է, որի համար նա ենթակա է քրեական պատասխանատվության և պատժի:
Պատիժ նշանակելիս դատարանը հաշվի է առնում հանցագործության հանրության համար վտանգավորության աստիճանն ու բնույթը, ինչպես նաև հանցավորի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները:
Ամբաստանյալ Կյուրեղ Աղաջանյանի անձը բնութագրող տվյալներ, պատասխանատվությունն ու պատիժը մեղմացնող հանգամանքներ դատարանը հաշվի է առնում այն, որ նա ընդունել է մեղքը և անկեղծորեն զղջացել է կատարած արարքի համար, բնութագրվում է դրական, նախկինում դատված չէ, հատուցել է տուժողին հանցագործության հետևանքով պատճառված վնասը:
Ամբաստանյալի պատասխանատվությունն ու պատիժը ծանրացնող հանգամանքներ դատարանը չի արձանագրել:
Դատարանը գտնում է, որ տուժող Կարինե Աղաջանյանի կողմից ներկայացված քաղաքացիական հայցը պետք է բավարարել մասնակիորեն` 300.000 ՀՀ դրամի չափով: Նկատի ունենալով, որ 200.000 ՀՀ դրամը Կյուրեղ Աղաջանյանի կողմից կամովին վերականգնվել է, ամբաստանյալ Կ.Աղաջանյանից հօգուտ տուժողի պետք է բռնագանձել 100.000 ՀՀ դրամ:
Անդրադառնալով մեղադրողի կողմից ներկայացված քաղաքացիական հայցին, դատարանը գտնում է, որ այն պետք է մերժել, քանի որ տուժող Կարինե Աղաջանյանի բուժումը կազմակերպվել է պետական պատվերի շրջանակներում:
ՀՀ սահմանադրության 38-րդ հոդվածի համաձայն` յուրաքանչյուր ոք ունի անվճար հիմնական բժշկական ծառայություններ ստանալու իրավունք:
ՙԲնակչության բժշկական օգնության և սպասարկման մասին՚ ՀՀ օրենքի 2-րդ հոդվածի համաձայն` բժշկական օգնության և սպասարկման հիմնական տեսակ է առաջնային բժշկական օգնությունը` որպես յուրաքանչյուր մարդու համար անվճար, առավել մատչելի մեթոդների և տեխնոլոգիաների վրա հիմնված բժշկական օգնության և սպասարկման տեսակ, որը երաշխավորվում է պետության կողմից:
ՀՀ վճռաբեկ դատարանի քաղաքացիական պալատը թիվ 3-328/ՎԴ/ 25.07.2008թ. որոշմամբ իրավական դիրքորոշում է արտահայտել այն մասին, որ պետական պատվերի շրջանակներում անվճար բժշկական օգնության տրամադրումն իրենից ներկայացնում է պետական մարմինների կողմից իրենց սահմանադրական առաքելության շրջանակներում ի շահ ուրիշի կատարված գործողություն և նման բժշկական օգնության շրջանակներում տրամադրվող գումարները պետությանը վերադարձման ենթակա չեն:
Պետության կողմից անհետաձգելի բժշկական օգնության ցուցաբերումը պայմանավորվում է ոչ թե վնաս հասցրած անձի հետ աշխատանքային կամ այլ իրավահարաբերությունների առկայությամբ, այլև նման օգնության ցուցաբերումը սոցիալական և առողջապահական քաղաքականության բնագավառում պետության սահմանադրական պարտականությունն է:
Ինչ վերաբերում է իրեղեն ապացույցների տնօրինման հարցին, դատարանը գտնում է, որ գործով իրեղեն ապացույց հանդիսացող Կարինե Աղաջանյանի հագուստը պետք է վերադարձնել, իսկ հանցագործության գործիք հանդիսացող դանակը` ոչնչացնել:
Ղեկավարվելով ՀՀ քրեական դատավարության օրենսգրքի 119-րդ, 357-360-րդ, 365-րդ, 369-373-րդ, 379-րդ հոդվածներով, դատարանը`



Վ Ճ Ռ Ե Ց

Կյուրեղ Առաքելի Աղաջանյանին մեղավոր ճանաչել ՀՀ քրեական օրենսգրքի 112-րդ հոդվածի 1-ին մասով և նրա նկատմամբ պատիժ նշանակել ազատազրկում 3 (երեք) տարի 6 /վեց/ ամիս ժամկետով:
Պատժի սկիզբը հաշվել 2011 թվականի օգոստոսի 15-ից:
Պատիժը պետք է կրի ՀՀ ԱՆ համապատասխան քրեակատարողական հիմնարկում:
Կյուրեղ Առաքելի Աղաջանյանի նկատմամբ ընտրված խափանման միջոցը` կալանքը, թողնել անփոփոխ, մինչև դատավճռի օրինական ուժի մեջ մտնելը:
Կյուրեղ Աղաջանյանից հօգուտ տուժող Կարինե Աղաջանյանի բռնագանձել 100.000 /հարյուր հազար/ ՀՀ դրամ:
Մեղադրողի կողմից ներկայացված քաղաքացիական հայցը մերժել:
Գործով իրեղեն ապացույց ճանաչված Կարինե Աղաջանյանի հագուստները վերադարձնել, իսկ հանցագործության գործիք հանդիսացող դանակը ոչնչացնել:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակման պահից մեկամսյա ժամկետում:






ԴԱՏԱՎՈՐ Ա.ՄԿՐՏՉՅԱՆ