գործ N ԵԱՔԴ/0171/01/11

ԴԱՏԱՎՃԻՌ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

18 մայիսի 2012թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը`

նախագահությամբ` դատավոր Ա.Մկրտչյանի
քարտուղարությամբ` Օ.Կիրակոսյանի
Շ.Վանոյանի
մասնակցությամբ`
մեղադրող Դ.Կարապետյանի
պաշտպան Ա.Ավագյանի
տուժող Հ.Սարգսյանի
տուժողի ներկայացուցիչ Թ.Ալեքսանյանի

Դատարանում, դռնբաց դատական նիստում քննեց քրեական գործն ըստ մեղադրանքի` Կարինե Նելսոնի Ղոչիկյանի /ծնված 23.10.1976թ. ք.Երևան, ազգությամբ հայ, Հայաստանի Հանրապետության քաղաքացի, չամուսնացած, միջնակարգ կրթությամբ, դատվածություն չունեցող, 03.05.2010թ. Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի դատավճռով մեղավոր է ճանաչվել ՀՀ քրեական օրենսգրքի 178-րդ հոդվածի 2-րդ մասի 2-րդ և 3-րդ կետերով և պատիժ է նշանակվել ազատազրկում 2 տարի 6 ամիս ժամկետո: Կիրառվել է ՀՀ ԱԺ 2009թ. հունիսի 19-ի համաներման որոշման 1-ին կետի 1-ին ենթակետը և ազատվել է պատժի կրումից, չի աշխատում, ֆիզիկապես առողջ, ներկայումս ՀՀ ԱՆ ՙԱբովյան՚ ՔԿՀ կալանավոր/:
Մեղադրվում է ՀՀ քրեական օրենսգրքի 177-րդ հոդվածի 3-րդ մասի 1-ին կետով, կալանքի տակ է 2011 թվականի հոկտեմբերի 18-ից:

Գործի դատավարական նախապատմությունը
2010թ. հուլիսի 19-ից օգոստոսի 30-ը տեղի է ունեցել դեպքը:
2010թ. դեկտեմբերի 02-ին հարուցվել է թիվ 14202510 քրեական գործը:
2011թ. հունվարի 24-ին Կ.Ղոչիկյանին մեղադրանք է առաջադրվել, նույն օրը խափանման միջոց է ընտրվել կալանքը և հայտարարվել է հետախուզում:
2011թ. հոկտեմբերի 18-ին Կ.Ղոչիկյանը հայտնաբերվել է, իսկ 2011թ. հոկտեմբերի 21-ին, դատարանի որոշմամբ ընտրված խափանման միջոցը վերահաստատվել է:
2011թ. դեկտեմբերի 02-ին թիվ 14202510 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան:

Գործի փաստական հանգամանքները
Նախաքննության մարմինն ամբաստանյալ Կարինե Ղոչիկյանին ՀՀ քրեական օրենսգրքի 177-րդ հոդվածի 3-րդ մասի 1-ին կետով մեղադրանք է առաջադրել այն արարքի համար, որ ՙ2010թ. հուլիսի 5-ին իր քրոջ ամուսին Հակոբ Անաստասի Սարգսյանի հետ գնացել է ՙՀայէկոնոմբանկ՚ ԲԲԸ-ի Երևան քաղաքի Աբովյան 27 հասցեում գործող ՙՄյասնիկյան՚ մասնաճյուղ, որտեղ Հ.Սարգսյանը դիմում է ներկայացրել անհատական հաշիվ բացելու և պլաստիկ քարտ ստանալու համար, իսկ 2010թ. հուլիսի 15-ին և հուլիսի 19-ին բացված անհատական 9051210200944498 հաշվեհամարին փոխանցել է ընդհանուրը 3.868.000 ՀՀ դրամ գումար, որից հետո 2010թ. հուլիսի 19-ից մինչև օգոստոսի 30-ը ընկած ժամանակահատվածում Կ.Ղոչիկյանը Հակոբ Սարգսյանից գաղտնի, Երևան քաղաքի տարբեր բանկոմատներից կանխիկացրել է վերջինիս հաշվեհամարին եղած 3.868.000 ՀՀ դրամ գումարը և հափշտակել այն՚:

Ապացույցների հետազոտում
Առաջադրված մեղադրանքում ամբաստանյալ Կարինե Ղոչիկյանն իրեն մեղավոր ճանաչեց լիովին, և դատաքննության փուլում ցուցմունք տվեց այն մասին, որ 2010թ. հուլիսի 5-ին քրոջ ամուսին Հակոբ Սարգսյանի հետ գնացել է Հայէկանոմբանկի ՙՄյասնիկյան՚ մասնաճյուղ վերջինիս համար անհատական հաշիվ բացելու և պլաստիկ քարտ ստանալու համար: Բանկի աշխատակցուհին առաջարկել է դիմում գրել, որից հետո` 2010թ. հուլիսի 15-ին կրկին Հ.Սարգսյանի հետ գնացել է նույն բանկ, որտեղ տեղեկացել են, որ պլաստիկ քարտը դեռևս պատրաստ չէ: Նույն օրը Հ.Սարգսյանը հաշվեհամարին մուտքագրել է 3.328.000 ՀՀ դրամ և դուրս եկել բանկից: 2010թ. հուլիսի 19-ին Հ.Սարգսյանի հետ գնացել է Հայէկոնոմբանկի նույն մասնաճյուղ, որտեղ վերջինս հաշվեհամարին մուտքագրել է ևս 540.000 ՀՀ դրամ, որից հետո մոտեցել են բանկի աշխատակցուհուն, և տեղեկացել, որ պլաստիկ քարտը պատրաստ է, և քարտը ծածկագրի ու մյուս փաստաթղթերի հետ միասին հանձնել է Հ.Սարգսյանին: Հ.Սարգսյանը պլաստիկ քարտը ծածկագրի և մյուս փաստաթղթերի հետ միասին բանկում հանձնել է իրեն, որից հետո դուրս են եկել բանկից: Դրանից հետո, հասկանալով, որ հիփոթեքային վարկի հետ կապված գործարքը չի լինելու և վարկը Հ.Սարգսյանին չեն տրամադրելու, ինքը պլաստիկ քարտի վրա եղած գումարը` 3.868.000 ՀՀ դրամը կանխիկացրել է Երևան քաղաքի տարբեր բանկոմատներից և ծախսել անձնական նպատակներով, որի մասին Հ.Սարգսյանը տեղյակ է եղել:
Կ.Ղոչիկյանը նշեց նաև, որ չի հրաժարվում փոխհատուցել պատճառված վնաը:

Ամբաստանյալ Կարինե Ղոչիկյանին առաջադրված մեղադրանքը հիմնավորվել է նաև դատաքննությամբ հետազոտված ներքոհիշյալ ապացույցներով.

Տուժող Հակոբ Անաստասի Սարգսյանը դատաքննության փուլում ցուցմունք է տվել այն մասին, որ 2010թ. ցանկացել է բանկի միջոցով բնակարան գնել, որի համար դիմել է իր քենուն` Կարինե Ղոչիկյանին: 2010թ. հուլիսի 5-ին Կարինե Ղոչիկյանի, կնոջ Անահիտ Ղոչիկյանի և մոր հետ գնացել է ՙՀայէկանոմբանկ՚ ԲԲԸ-ի Երևան քաղաքի Աբովյան 27 հասցեում գործող ՙՄյասնիկյան՚ մասնաճյուղ, որտեղ դիմում է ներկայացրել անհատական հաշիվ բացելու և պլաստիկ քարտ ստանալու համար, որից հետո 2010թ. հուլիսի 15-ին և 19-ին բացված անհատական 9051210200944498 հաշվեհամարին փոխանցել է ընդհանուրը 3.868.000 ՀՀ դրամ գումար: 2010թ. հուլիսի 25-ին գնացել է նույն մասնաճյուղ պլաստիկ քարտը ստանալու համար, սակայն բանկի աշխատակցուհի Ժաննան, որը Կարինե Ղոչիկյանի ընկերուհին է, պատասխանել է, որ պլաստիկ քարտը և դրա ծածկագիրը տվել է Կ.Ղոչիկյանին: Այդ ընթացքում` 2010թ. հուլիսի 19-ից մինչև օգոստոսի 30-ը Կ.Ղոչիկյանն իրենից գաղտնի, Երևան քաղաքում գտնվող թվով 5 բանկերի տարբեր բանկոմատներից կանխիկացրել է վերջինիս հաշվեհամարին եղած 3.868.000 ՀՀ դրամ գումար և հափշտակել այն:

Դատաքննությամբ նույնաբովանդակ ցուցմունք է տվել վկա Անահիտ Նելսոնի Ղոչիկյանը:

Վկա Հասմիկ Արմենի Խաչատրյանը դատաքննության փուլում ցուցմունք է տվել այն մասին, որ 2007թ. փետրվար ամսից աշխատում է ՙՀայէկանոմբանկ՚ ԲԲԸ-ի Երևան քաղաքի Իսահակյան 12 հասցեում գործող ՙՄյասնիկյան՚ մասնաճյուղում` որպես հաշվապահ- գանձապահ: 2010թ. հուլիսի 19-ին իրեն են մոտեցել Հակոբ Սարգսյանը և Կարինե Ղոչիկյանը և հարցրել, թե արդյոք Հ.Սարգսյանի անվամբ պատվիրված պլաստիկ քարտը պատրաստ է, թե ոչ: Ինքը ստուգելով և տեսնելով, որ պատրաստ է, ստուգել է Հ.Սարգսյանի ինքնությունը և պլաստիկ քարտը ծածկագրի ու մյուս փաստաթղթերի հետ հանձնել է Հ.Սարգսյանին` առանց նրան որևէ ստացական տրամադրելու: Քարտն ստանալուց անմիջապես հետո դրա վրա մուտք է եղել 540.000 ՀՀ դրամ գումար: Ինքը Կ.Ղոչիկյանին պլաստիկ քարտ չի տվել և Հ.Սարգսյանին չի ասել, որ պլաստիկ քարտը տվել է Կ.Ղոչիկյանին:
Դատաքննության փուլում նույնաբովանդակ ցուցմունքներ են տվել նաև վկաներ Թերեզա Վաղինակի Պողոսյանը և Ժանետա Մկրտիչի Զակալաշվիլին:

Վկա Երջանիկ Վասյայի Գևորգյանը նախաքննության փուլում ցուցմունք է տվել, որ 1992թ.-ից ճանաչում է Կարինե Ղոչիկյանին, որի հետ եղել է մտերիմ հարաբերությունների մեջ: Դրանից հետո ինքը մի քանի անգամ գնացել է արտասահման և վերադարձել, որի ընթացքում Կ.Ղոչիկյանի հետ հանդիպումները ընդհատվել են և վերսկսվել: 2010թ. մարտ ամսին վերադարձել է Երևան` իր հողատարածքը վաճառելու նպատակով: Այդ ընթացքում պատահաբար հանդիպել է Կ.Ղոչիկյանին: 2010թ. օգոստոս ամսին ինքը Կ.Ղոչիկյանի հետ գտնվել է Կոմիտաս փողոցում, որտեղ Կ.Ղոչիկյանն ասել է, որ իրեն տանի մոտակա բանկոմատի մոտ գումար կանխիկացնելու համար: Այդ ժամանակ ինքը Կ.Ղոչիկյանի մոտ տեսել է պլաստիկ քարտ, որի վրա գրված է եղել տղամարդու անուն ազգանուն: Դրանից հետո 10 օրվա ընթացքում Կ.Ղոչիկյանը տարբեր բանկոմատներից մի քանի անգամ ևս գումարներ է կանխիկացրել:

Կարինե Ղոչիկյանին մեղսագրվող արարքը հիմնավորվել է նաև.

ՙՀայէկոնոմբանկ՚ ԲԲԸ-ի կողմից տրված Հ.Սարգսյանի անվամբ բացված 9051210200944498 հաշվեհամարից գումարները 19.07.2010թ.-ից մինչև 30.08.2010թ. կանխիկացնելու վերաբերյալ քաղվածքով:
Հ.1 գ/թ 88-89

3.868.000 ՀՀ դրամ գումարը Հ.Սարգսյանի անվամբ բացված 9051210200944498 հաշվեհամարին մուտք անելու վերաբերյալ երկու անդորրագրով:
Հ.1 գ/թ 95-96

ՙԻնեկոբանկ՚ և ՙԱկբա-Կրեդիտ Ագրիկոլ Բանկ՚ ՓԲԸ-ների կողմից տրված գրությամբ և լուսանկարներով, ըստ որոնց երևում է, որ Հ.Սարգսյանի անվամբ բացված 9051210200944498 հաշվեհամարից կնոջ կողմից գումարներ են կանխիկացվում:
Հ.2 գ/թ 8, 87-90

Դատարանը գտնում է, որ գործով անթույլատրելի և ոչ վերաբերելի ապացույցներ չկան:
Դատարանի իրավական վերլուծությունները
Դատարանը գործով ձեռք բերված յուրաքանչյուր ապացույց գնահատելով թույլատրելիության վերաբերելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, ղեկավարվելով օրենքով, ներքին համոզմամբ, գտնում է, որ ամբաստանյալ Կարինե Նելսոնի Ղոչիկյանի մեղավորությունը ՀՀ քրեական օրենսգրքի 177-րդ հոդվածի 3-րդ մասի 1-ին կետով նախատեսված հանցագործություն կատարելու մեջ ապացուցված է, որի համար նա ենթակա է քրեական պատասխանատվության և պատժի:
Պատիժ նշանակելիս դատարանը հաշվի է առնում հանցագործության հանրության համար վտանգավորության աստիճանն ու բնույթը, ինչպես նաև անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները:
Ամբաստանյալ Կարինե Ղոչիկյանի անձը բնութագրող տվյալներ, պատասխանատվությունն ու պատիժը մեղմացնող հանգամանքներ դատարանը հաշվի է առնում այն, որ նա ընդունել է մեղքը, անկեղծորեն զղջացել է կատարած արաքի համար, լիովին հատուցել է տուժող Հ.Սարգսյանին պատճառված նյութական վնասը, հայրը մարտական գործողությունների ժամանակ վիրավորվել և ստացել է 2-րդ խմբի հաշմանդամություն, տուժող Հ. Սարգսյանը որևէ բողոք չունի և խնդրել է Կ.Ղոչիկյանի նկատմամբ մեղմ պատիժ նշանակել:
Ամբաստանյալի պատասխանատվությունն ու պատիժը ծանրացնող հանգամանքներ դատարանը չի արձանագրել:
Անդրադառնալով Կարինե Ղոչիկյանի նկատմամբ նշանակվող պատժին, դատարանը գտնում է, որ նրա ուղղվելը հնարավոր է առանց պատիժ կրելու:
Նման եզրահանգման դատարանը գալիս է` հաշվի առնելով հատկապես ամբաստանյալի պատասխանատվությունն ու պատիժը մեղմացնող հանգամանքների համակցությունը:
Ղեկավարվելով ՀՀ քրեական դատավարության օրենսգրքի 357-360-րդ, 365-րդ, 369-373-րդ, 379-րդ հոդվածներով, դատարանը`

ՎՃՌԵՑ

Կարինե Նելսոնի Ղոչիկյանին մեղավոր ճանաչել ՀՀ քրեական օրենսգրքի 177-րդ հոդվածի 3-րդ մասի 1-ին կետով և նրա նկատմամբ պատիժ նշանակել ազատազրկում 4 /չորս/ տարի ժամկետով:
ՀՀ քրեական օրենսգրքի 70-րդ հոդվածի կիրառմամբ Կարինե Ղոչիկյանի նկատմամբ ազատազրկման ձևով նշանակված պատիժը պայմանականորեն չկիրառել, սահմանել փորձաշրջան 2 /երկու/ տարի ժամկետով:
Կարինե Ղոչիկյանի նկատմամբ ընտրված խափանման միջոցը` կալանքը վերացնել, և նրան ազատել դատարանի դահլիճից:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակման պահից մեկամսյա ժամկետում:




ԴԱՏԱՎՈՐ Ա.ՄԿՐՏՉՅԱՆ