գործ No ԵԱՔԴ/0170/01/11

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

08.02.2012թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը

նախագահությամբ` դատավոր Ա.Մկրտչյանի
քարտուղարությամբ` Օ.Կիրակոսյանի
Շ.Վանոյանի
մասնակցությամբ`
մեղադրող Է.Պետրոսյանի
ամբաստանյալ Բ.Երեմյանի
տուժող Լ.Բալայանի

Դատարանում, դռնբաց դատական նիստում քննեց քրեական գործն ըստ մեղադրանքի` Բագրատ Խաչիկի Երեմյանի (ծնված 14.09.1972թ., ք.Երևան, ազգությամբ հայ, ՀՀ քաղաքացի միջնակարգ կրթությամբ, ամուսնալուծված, խնամքին մեկ մանկահասակ երեխա, չի աշխատում, չդատված, բնակվող ք.Երևան, Դ.Մալյան 31 տուն):
Մեղադրվում է ՀՀ քրեական օրենսգրքի 137-րդ հոդվածի 1-ին մասով և 118-րդ հոդվածով:

ՊԱՐԶԵՑ

Գործի դատավարական նախապատմությունը
2011 թվականի օգոստոսի 01-ին և նոյեմբերի 05-ին տեղի են ունեցել դեպքերը:
2011 թվականի սեպտեմբերի 15-ին հարուցվել է թիվ 14128811 քրեական գործը:
2011 թվականի նոյեմբերի 28-ին Բագրատ Խաչիկի Երեմյանին մեղադրանք է առաջադրվել ՀՀ քրեական օրենսգրքի 137-րդ հոդվածի 1-ին մասով և 118-րդ հոդվածով և նրա նկատմամբ որպես խափանման միջոց է ընտրվել ստորագրություն չհեռանալու մասին:
2011 թվականի դեկտեմբերի 02-ին թիվ 14128811 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:

Գործի փաստական հանգամանքները
Նախաքննության մարմինն ամբաստանյալ Բագրատ Երեմյանին մեղադրանք է առաջադրել ՀՀ քրեական օրենսգրքի 137-րդ հոդվածի 1-ին մասով և 118-րդ հոդվածով, այն արարքի համար, որ ՙնա 2011թ. օգոստոսի 1-ին ժամը 22:00-ի սահմաններում Երևան քաղաքի Ազատության պողոտայի սկզբնամասում գտնվող ՙ50-ամյակի՚ հուշարձանի մոտ փաստական հարաբերություններից ծնված երեխային իրեն հանձնելու հարցի շուրջ սպանության սպառնալիքներ է տվել Լուսինե Կոլյայի Բալայանին և ի կատարումն այդ սպառնալիքի նույն պահին նստելով ՙՎԱԶ 21-07՚ մակնիշի ավտոմեքենան վարել է Լ.Բալայանի ուղղությամբ և նրանցից մեկ մետր հեռավորության վրա արգելակել է` սպանության սպառնալիքն իրականացնելու իրական վտանգ ստեղծելով:
Բացի այդ, Բագրատ Խաչիկի Երեմյանը 2011 թվականի նոյեմբերի 04-ին, ժամը 19:00-ի սահմաններում Երևան քաղաքի Ազատության պողոտայի 11 շենքի մուտքում ալկոհոլ օգտագործած վիճակում իր և Լ.Բալայանի փաստական հարաբերություններից ծնված երեխային տեսակցելու հարցի շուրջ վիճաբանել է Լուսինե Կոլյայի Բալայանի հետ, որի ընթացքում Բագրատ Երեմյանը ոլորել է Լուսինե Բալայանի աջ ձեռքը և դրանով մի քանի անգամ հարվածներ է հասցրել Լ.Բալայանի այտին,ձեռքը ոլորելու ընթացքում կոտրել է Լ.Բալայանի աջ ձեռքին եղած ժամացույցի սլաքները պտտեցնելու համար նախատեսված դետալը, այնուհետև մի քանի անգամ հարվածներ է հասցրել Լ.Բալայանի պարանոցի ու այտի շրջանին,պատճառելով ֆիզիկական ցավ և աջ նախաբազկի դաստակային հոդի շրջանի արյունազեղումների ձևով մարմնական վնասվածքներ՚:

Ապացույցների հետազոտում
Ամբաստանյալ Բագրատ Խաչիկի Երեմյանն առաջադրված մեղադրանքում իրեն մեղավոր ճանաչեց մասնակիորեն և ցուցմունք տվեց այն մասին, որ 2008 թվականին ծանոթացել է Լուսինե Կոլյայի Բալայանի հետ և իրենց միջև ձևավորվել են մտերիմ հարաբերություններ: 2010 թվականի ապրիլի 17-ին իր և Լուսինե Բալայանի փաստական հարաբերություններից ծնվել է որդին` Արամ Երեմյանը: Դրանից հետո իր և Լուսինեի հարաբերությունները աստիճանաբար սկսեցին վատանալ, քանի որ երեխայի ծնվելուց հետո Լուսինե Բալայանը անընդհատ ստիպել է որպեսզի բաժանվի կնոջից և ամուսնանա իր հետ, իսկ ինքը դրան չի համաձայնվել, որին էլ ի պատասխան Լուսինեն իրեն արգելել է տեսակցել երեխային: Դրանից հետո մեկնել է Ռուսաստանի Դաշնության Մոսկվա քաղաք, որտեղից վերադարձել է 2011 թվականի հունիս ամսին: Մոսկվայից վերադառնալուց հետո կրկին փորձել է տեսակցել երեխային և դրանից հետո Լուսինե Բալայանը կրկին սկսել է իրեն արգելել տեսնել երեխային: 2011 թվականի օգոստոսի 1-ին ժամը 21:30-ի սահմաններում եղբոր` Սեդրակ Խաչիկի Երեմյանին պատկանող ՙՎԱԶ 2106՚ մակնիշի 22 SL 139 պետհամարանիշի ավտոմեքենայով անցել է Երևան քաղաքի Ազատության պողոտայում գտնվող ՙ50 ամյակի՚ հուշարձանի մոտով և պատահաբար նկատել է Լուսինե Բալայանին, որդուն և Լուսինե Բալայանի մորը` Լորիկ Սարգսյանին: Ինքը որդուն տեսնելով ցանկացել է գրկել և մոտեցել է նրանց, բարևել է և Լուսինե Բալայանին խնդրել է թույլ տալ որդուն մի քանի րոպե գրկել: Այդ լսելով Լուսինե Բալայանը սկսել է կոպիտ տոնով խոսել իր հետ: Ինքը տեսնելով, որ այդ ամենը կարող է կոնֆլիկտի վերածվել հեռացել է:
Իսկ 2011թ. նոյեմբերի 4-ին ժամը 19:00-ի սահմաններում Լուսինե Բալայանի բնակության վայր հանդիսացող երևան քաղաքի Ազատության պողոտայի 11-րդ շենքի մուտքում հանդիպել է Լ.Բալայանին և երբ նրան հարցրել է, թե ինչու չի թողնում հանդիպել երեխային Լ.Բալայանը իրեն պատասխանել է, որ ժամանակ չունի: Ինքը բռնելով Լ.Բալայանի ձեռքից փորձել է շարունակել խոսակցությունը, սակայն Լ.Բալայանը ձեռքը ազատելով իր ձեռքից հեռացել է: Ինքը Լ.Բալայանին ծեծի չի ենթարկել և նրա նկատմամբ որևէ բռնություն չի գործադրել:Ամբաստանյալը միաժամանակ նշեց , որ խոստանում է այլևս չանհանգստացնել տուժող Լ.Բալայաին և իր երեխային տեսակցել միայն դատական ակտերի հարկադիր կատարողի ներկայությամբ:
/գ.թ. 43, 50,57,72/

Տուժող Լուսինե Կոլյաի Բալայանը ցուցմունք է տվել այն մասին, որ 2008 թվականի փետրվար ամսին ծանոթացել է Երևան քաղաքի բնակիչ Բագրատ Խաչիկի Երեմյանի հետ, դրանից հետո իրենց միջև ձևավորվել են մտերիմ հարաբերություններ: 2008թ. ապրիլ ամսին Բագրատը եկել է իրենց տուն ծանոթացել է ընտանիքի անդամների հետ և ասել է, որ ցանկանում է նշանվել իր հետ: Այն հանգամանքը, որ նա մենակ է եկել իրենց տուն նշանվելու առաջարկությամբ իր և ընտանիքի մյուս անդամների համար շատ զարմանալի է թվացել, սակայն այդ ժամանակ դրան ուշադրություն չի դարձրել և շարունակել է իր հարաբերությունները Բագրատ Երեմյանի հետ, որոնք ժամանակի ընթացքում ավելի են մտերմացել: Այդ ընթացքում մայրը` Լորիկ Սարգսյանը հետաքրքրվել Բագրատ Երեմյանով և պարզել է, որ վերջինս ամուսնացած է և ունի կին ու երեխաներ ու դրանից հետո արգելել է իրեն շփվել և հանդիպել Բագրատ Երեմյանին: Այդ հանգամանքի մասին իմանալով ինքը դադարեցրել է իր հարաբերությունները Բագրատ Երեմյանի հետ և շուրջ յոթ ամիս այլևս նրան չի հանդիպել: Դրանից հետո կրկին մեր հարաբերությունները մտերմացել են Բագրատ Երեմյանի հետ, քանի որ վերջինս իրեն անընդհատ հավատացրել է, որ ինքը իր նախկին կյանքի հետ այլևս որևէ առնչություն չունի և ցանկանում է նոր կյանք սկսել: Արդեն 2009 թվականի օգոստոս ամսին: Վերը նշված վիրավորանքները տանելով, 2011 ապրիլի 17-ին ծննդաբերել է երեխային: Դրանից հետո Բ. Երեմյանը սկսել է խնդրել, որպեսզի թույլ տա, որ հայրություն ճանաչի: 2011թ. հուլիս ամսին, երբ ինքը վերադարձել է հերթական արձակուրդից, Բագրատ Երեմյանը սկսել է նորից իրեն անհանգստացնել, սմս- հաղորդագրությունների միջոցով սպառնալ, Իսկ արդեն 2011թ. օգօստոսի 1-ն ժամը 22:00 սահմաններում, ինքը, մայրիկի` Լորիկ Սարգսյանի և որդու Արամ Երեմյանի հետ միասնին, գնացել է ՙՀաղթանակի՚զբոսայգու մոտ զբոսնելու, երբ նշված զբոսայգու մոտ հայտնվել է և իրենց է մոտեցել Բագրատ Երեմյանը, և հրելով իրեն փորձել է գրկից վերցնել երեխային, ինքը թույլ չի տվել նրան, և մայրը միջամտելով ստեղծված իրավիճակին փորձել են հեռանալ: Այդ տեսնելով Բագրատ Երեմյանը սպառնացել է, որ իրեն տան երեխային, այլապես նա իրենց կսպանի գցելով ավտոմեքենայի տակ: Վախենալով, որ նա կիրագործի իր սպառնալիքները, վազել են դեպի Ազատության պողոտայի ուղղությամբ: Երբ բավականաչափ հեռացել են,ինքը շրջվել է և նկատել է, որ Երեմյանը սպիտակ գույնի ՎԱԶ-2106 ավտոմեքենայի ղեկին նստած ավտոմեքենան շատ մեծ արագությամբ վարում է իրենց ուղղությամբ: Մայրը մտածելով, որ Բագրատ Երեմյանը կիրագործի իր սպառնալիքները, ձեռքերով փակել է իրեն ու երեխային: Բագրատը ավտոմեքենայով հասնելով մոտ 1 մետր հեռավորության վրա ուժգին արգելակակել է ավտոմեքենան, և կտրուկ շրջադարձ է կատարել և հեռացել: Բագրատ Երեմյանի տված սպանելու սպառնալիքները ինքը ընդունել է իրական, քանի որ համոզվել է, որ նա անհավասարակշիռ անձնավորություն: 2011թ. Նոյեմբերի 4-ին ժամը 19.00-ի սահմաններում Բագրատ Երեմյանի կողմից ծեծի ենթարկվելու դեպքի առթիվ Լուսինե Բալայանը ցուցմունք է տվել և հայտնել է, որ 2011թ. նոյեմբերի 4-ին ժամը 19.00-ի սահմաններում ինքը վերադարձել է տուն: Հասնելով շենքի մուտքի մոտ տեսել է, որ Երեմյանը կանգնած է մուտքի մոտ: Իրեն տեսնելով նա մոտեցել է իրեն: Ինքը նրան ասել է, որ ցանկություն չունի նրա հետ զրուցելու: Բագրատ Երեմյանը այդ լսելով բռնել է երկու ձեռքերից և սկսել է ոլորել ու հայհոյանքներ տալ իր հասցեին, ոլորելու ընթացքում կոտրել է նաև աջ ձեռքին կապաց ժամացույցը: Դրանից հետո երբ փորձել է ձեռքերն ազատել նրանից և փախչել Երեմյանը մի քանի անգամ ապտակել է պարանոցի և այտի շրջանին, պատճառելով ֆիզիկական ցավ:
/ գ.թ. 39- 40, 52/

Վկա Լորիկ Կարմենի Սարգսյանի դատաքննությամբ ցուցմունք է տվել այն մասին, որ 2008թ-ին աղջիկը` Լուսինե Բալայանը ծանոթացել է Երևան քաղաքի բնակիչ Բագրատ Երեմյանի հետ: Վերջինս իբր թե աղջկա հետ ամուսնանալու նպատակով 2008թ. ապրիլ ամսին եկել է իրենց տուն ծանոթանալու համար և հայտարարել է, որ ցանկանում է նշանվել Լուսինե Բալայանի հետ: Ինքը զարմացել է նրա այդ հայտարարությունից և հարցրել է. Թե ինչու է այդ դեպքում միայնակ եկել: Երեմյանի այդ պահվածքը իր մոտ կասկած է առաջացրել և սկսել է հետաքրքրվել Բագրատ Երեմյանով և նրա հասցեով գնացել է նրանց տուն, որտեղ պարզել է, որ Բագրատ Երեմյանը ամուսնացած է և ունի երեք երեխա: Դրանից հետո արգելել է Լուսինե Բալայանին շփվել Բագրատ Երեմյանի հետ: Այդ ընթացքում սակայն Բագրատ Երեմյանը հանգիստ չի տվել Լուսինե Բալայանին պնդելով, որ ինքը նրա հետ ցանկանում է նոր կյանք սկսել: Լուսինե Բալայանի և Բագրատ Երեմյանի վերսկսված հարաբերություններից մի քանի ամիս հետո տեղեկացել են, որ Լուսինեն հղի է: 2011 ապրիլի 17-ին Լուսինեն ծննդաբերել է երեխային: Դրանից հետո Բագրատ Երեմյանը խնդրել է, որպեսզի Լուսինեն թույլ տա, որ հայրություն ճանաչի: Այդ գործընթացը ավարտելուց հետո, Բագրատ Երեմյանը սկսել է կրկին անհանգստացնել, մասնավորապես զանգահարել, հայհոյել, սպառնացել է: 2011թ. օգոստոսի 1-ին ժամը 22:00 սահմաններում, ինքը Լուսինե Բալայանի, և թոռնիկի Արամ Երեմյանի հետ միասնին, գնացել են ՙՀաղթանակի՚ զբոսայգու մոտ զբոսնելու, ե հայտնվել ու իրենց է մոտեցել Բագրատ Երեմյանը, և հրելով Լուսինեին փորձել է նրա գրկից վերցնել երեխային, Լուսինե Բալայանը թույլ չի տվել նրան, և ինքը միջամտելով ստեղծված իրավիճակին փորձել է հեռանալ: Այդ տեսնելով Բագրատը սպառնացել է, որ իրեն տան երեխային, այլապես նա իրենց կգցի ավտոմեքենայի տակ: Վախենալով, որ նա կիրագործի իր սպառնալիքները, իրենք վազել են դեպի Ազատության պողոտայի ուղղությամբ: Ինքը մտածելով, որ Բագրատ Երեմյանը կիրագործի իր սպառնալիքները, ձեռքերով փակել է Լուսինեին ու երեխային: Երեմյանը ավտոմեքենայով հասնելով իրենց մոտ 1 մետր հեռավորության վրա ուժգին արգելակել է ավտոմեքենան, համարյա իր ոտքերի դիմաց և գոռալով, որ մեկ է Լուսինեին վաղ թե ուշ սպանելու է կտրուկ շրջադարձ է կատարել և հեռացել:
/ գ.թ. 41-42 /:

Վկա Կարմեն Սեդրակի Սարգսյանը նախաքննական ցուցմունքով այն մասին, որ որ 2011թ. օգոստոսի 2-ին իրեն է զանգահարել Լուսինե Բալայանը և շատ հուզված վիճակում պատմել է, որ նախորդ օրը այսինքն 2011թ. օգոստոսի 1-ին Երևան քաղաքի Ազատության պողոտայում գտնվող 50-ամյակի հուշարձանի մոտ նրա երեխայի հայրը` Բագրատ Երեմյանը հանդիպել է իրենց և երեխային իրեն տալու հարցի շուրջ վիճաբանել է, սպառնացել է, որ սպանելու է նրան: Այնուհետև նստելով իր կողմից վարվող ժիգուլի ավտոմեքենան Բագրատ Երեմյանը այն վարել է Լուսինե Բալայանի և աղջկաս` Լորիկ Սարգսյանի ուղղությամբ և հասնելով նրանց մոտ կտրուկ արգելակել է այդ կերպ ցույց տալով, որ կիրագործի իր վերոգրյալ սպառնալիքը:
/ գ.թ. 49 /:

Բագրատ Երեմյանին մեղսագրվող արարքը հիմնավորվել է նաև `

Դատաբժշկական փորձաքննության փորձագետի թիվ 3209 եզրակացությամբ, համաձայն որի Լ.Բալայանի ստացած մարմնական վնասվածքները` աջ նախաբազուկ դաստակային հոդի շրջանի արյունազեղումների ձևով, պատճառվել են բութ կոշտ առարկայով, և առողջության թեթև վնասի հատկանիշներ չեն պարունակում:
/ գ.թ.62-63 /:

Լ.Բալայանի կողմից քննությանը ներկայացված թևի ժամացույցը և ձայնաերիզը զննելու արձանագրություններով:
/ գ.թ.53,56 /:
Գործով իրեղեն ապացույց ճանաչված Լուսինե Բալայանի ձեռքի ժամացույցով:
/ գ.թ. 76 /:

Դատարանի իրավական վերլուծությունները
Դատարանը գործով ձեռք բերված յուրաքանչյուր ապացույց գնահատելով թույլատրելիության վերաբերելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, ղեկավարվելով օրենքով, ներքին համոզմամբ, գտնում է, որ ամբաստանյալ Բագրատ Երեմյանի մեղավորությունը ՀՀ քրեական օրենսգրքի 137-րդ հոդվածի 1-ին մասով և 118-րդ հոդվածով նախատեսված հանցանք կատարելու մեջ ապացուցված է, որի համար նա ենթակա է քրեական պատասխանատվության և պատժի:
Պատիժ նշանակելիս դատարանը հաշվի է առնում հանցագործության հանրության համար վտանգավորության աստիճանն ու բնույթը, ինչպես նաև անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները:
Ամբաստանյալ Բագրատ Երեմյանի անձը բնութագրող տվյալներ, պատասխանատվությունն ու պատիժը մեղմացնող հանգամանքներ դատարանը հաշվի է առնում այն, որ նա մասնակիորեն ընդունել է մեղքը, նախկինում դատված չէ, խնամքին է գտնվում մեկ մանկահասակ երեխա:
Ամբաստանյալի պատասխանատվությունը և պատիժը ծանրացնող հանգամանքներ դատարանը չի արձանագրել:
Անդրադառնալով իրեղեն ապացույցների տնօրինման հարցին, դատարանը գտնում է, որ գործով իրեղեն ապացույց ճանաչված ձեռքի ժամացույցը պետք է վերադարձնել Լուսինե Բալայանին:
Ղեկավարվելով ՀՀ քրեական դատավարության օրենսգրքի 119-րդ, 357-360-րդ, 365-րդ, 369-373-րդ, 379-րդ հոդվածներով դատարանը

Վ Ճ Ռ Ե Ց

Բագրատ Խաչիկի Երեմյանին մեղավոր ճանաչել ՀՀ քրեական օրենսգրքի 137-րդ հոդվածի 1-ին մասով և 118-րդ հոդվածով:
ՀՀ քրեական օրենսգրքի 137-րդ հոդվածի 1-ին մասով պատիժ նշանակել տուգանք ՀՀ նվազագույն աշխատավարձի հարյուրապատիկի` 100.000 /հարյուր հազար/ ՀՀ դրամի չափով:
ՀՀ քրեական օրենսգրքի 118-րդ հոդվածով պատիժ նշանակել տուգանք ՀՀ նվազագույն աշխատավարձի հիսնապատիկի` 50.000 /հիսուն հազար/ ՀՀ դրամի չափով:
ՀՀ քրեական օրենսգրքի 66-րդ հոդվածի կանոններով, պատիժները լրիվ գումարելու միջոցով` Բագրատ Երեմյանի նկատմամբ վերջնական պատիժ նշանակել տուգանք` ՀՀ նվազագույն աշխատավարձի հարյուրհիսնապատիկի` 150.000 /հարյուր հիսուն հազար/ ՀՀ դրամի չափով:
Բագրատ Երեմյանի նկատմամբ ընտրված խափանման միջոցը` ստորագրություն չհեռանալու մասին, թողնել անփոփոխ, մինչև դատավճռի օրինական ուժի մեջ մտնելը:
Գործով իրեղեն ապացույց ճանաչված ձեռքի ժամացույցը վերադարձնել Լուսինե Բալայանին:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակման պահից մեկամսյա ժամկետում:






ԴԱՏԱՎՈՐ Ա.ՄԿՐՏՉՅԱՆ