գործ N ԵԱՔԴ/0167/01/11

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

07.12.2011թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը`

նախագահությամբ` դատավոր Արթուր Մկրտչյանի
քարտուղարությամբ` Օֆելյա Կիրակոսյանի
մասնակցությամբ`
մեղադրող Գոռ Շահբազյանի
ամբաստանյալ Գևորգ Սայադյանի

Դատարանում, դռնբաց դատական նիստում քննեց քրեական գործն ըստ մեղադրանքի` Գևորգ Վրեժի Սայադյանի /ծնված 21.12.1958թ. ք.Երևան, ազգությամբ հայ, ՀՀ քաղաքացի միջնակարգ կրթությամբ, ամուսնացած, չի աշխատում, հաշվառված և բնակվող ք.Երևան, Զ.Սարկավագի 1-ին նրբ. տուն 5, նախկինում դատված, դատվածությունը չմարված` Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի 13.01.2009թ. դատավճռով, ՀՀ քրեական օրենսգրքի 235-րդ հոդվածի 1-ին մասով և 268-րդ հոդվածի 2-րդ մասի 2-րդ կետով դատապարտվել է ազատազրկման 2 տարի ժամկետով, պատժից պայմանական վաղաժամկետ ազատվել է 29.10.2010թ./:
Մեղադրվում է ՀՀ քրեական օրենսգրքի 268-րդ հոդվածի 2-րդ մասի 2-րդ և 273-րդ հոդվածի 2-րդ մասի 3-րդ կետերով:

Պ Ա Ր Զ Ե Ց

Գործի դատավարական նախապատմությունը
06.09.2011թ. կատարվել է դեպքը:
06.09.2011թ. հարուցվել է թիվ 09113311 քրեական գործը, Գ.Սայադյանը ձերբակալվել է:
08.09.2011թ. Գ.Սայադյանը ներգրավվել է որպես մեղադրյալ և նրա նկատմամբ խափանման միջոց է կիրառվել կալանքը:
01.11.2011թ. Գ.Սայադյանին առաջադրված մեղադրանքի ծավալը փոփոխվել, լրացվել և նոր մեղադրանք է առաջադրվել ՀՀ քրեական օրենսգրքի 268-րդ հոդվածի 2-րդ մասի 2-րդ և 273-րդ հոդվածի 2-րդ մասի 3-րդ կետերով:
2011թ. նոյեմբերի 18-ին թիվ 09113311 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:

Գործի փաստական հանգամանքները
Նախաքննության մարմինն ամբաստանյալ Գևորգ Սայադյանին ՀՀ քրեական օրենսգրքի 268-րդ հոդվածի 2-րդ մասի 2-րդ և 273-րդ հոդվածի 2-րդ մասի 3-րդ կետերով մեղադրանք է առաջադրել այն արարքի համար, որ ՙիր` Երևան քաղաքի Զ.Սարկավագի 1-ին նրբ. 5 տանը կից հողատարածքում և նրան կից շինությունում ապօրինի կերպով, առանց իրացնելու նպատակի, պատրաստել և պահել է խոշոր չափի 16,75 գրամ հաստատուն քաշով չորացված և խոշոր չափի` 65,2 գրամ հաստատուն քաշով չչորացված ՙմարիխուանա՚ տեսակի թմրամիջոց, ապօրինի կերպով աճեցրել է առանձնապես խոշոր չափի 13.950 գրամ քաշով կանեփի թփեր՚:

Ապացույցների հետազոտում
Առաջադրված մեղադրանքում ամբաստանյալ Գևորգ Սայադյանն իրեն մեղավոր չի ճանաչել և ցուցմունք է տվել այն մասին, որ ինքը թմրամիջոց չի աճեցրել, չի պահել և երբևէ չի օգտագործել:

Ամբաստանյալ Գևորգ Սայադյանին առաջադրված մեղադրանքն ապացուցվել է դատաքննությամբ հետազոտված ներքոհիշյալ ապացույցներով.

Գործով վկա Ֆլորա Հովհաննեսի Ափոյանը դատաքննությամբ ըստ էության պնդեց նախաքննության փուլում տված ցուցմունքներն այն մասին, որ ճանաչում է Գ.Սայադյանին և բնակվում է վերջինիս հարևանությամբ: 2011թ. սեպտեմբերի 6-ին, ժամը 08:30-ի սահմաններում իր տուն են գնացել ոստիկանության աշխատակիցներ և իրեն ու աղջկան` Լուսինե Նալբանդյանին, հրավիրել են Գ.Սայադյանի տուն` կատարվելիք խուզարկությանը որպես ընթերակա մասնակցելու համար: Գ.Սայադյանի բնակարանում կատարված խուզարկությամբ ոչինչ չի հայտնաբերվել, որից հետո մտել են տանը հարակից հողատարածք, որտեղ եղել են մարգերով ցանված և մշակված թփեր: Ոստիկանության աշխատակիցներն արմատախիլ են արել դրանք: Այնուհետև հողատարածքի սկզբնամասում գտնվող փայտե սեղանին դրված սկուտեղի վրա հայտնաբերել են կիսաչորացված զանգված: Հողատարածքում եղել է նաև շորերով ծածկված շինություն, որտեղ Գ.Սայադյանն, իր ասելով, գիշերում է: Հայտնաբերված զանգվածները ոստիկանության աշխատակիցների կողմից կշռվել, փաթեթավորվել և կնիքվել են:

Դատաքննությամբ նույնաբովանդակ ցուցմունքներ է տվել նաև վկա Լուսինե Հովհաննեսի Նալբանդյանը:

Գործով վկա Ռիտա Բաբկենի Սայադյանի դատաքննության փուլում տված ցուցմունքներով այն մասին, որ իրենց` Զ.Սարկավագի 1-ին նրբ. 5 տանը կից հողամասում ինքը մշակել է լոբի, կանաչի, պոմիդոր, սակայն կանեփ երբևէ չի ցանել: Ամուսինը` Գ.Սայադյանը, նշված հողատարածքում հաճախ է եղել` բույսերը մշակելու նպատակով: Հողատարածքից հայտնաբերված թմրամիջոցների և կանեփի մասին տեղյակ չի եղել և չգիտի, թե դրանք ում են պատկանում: Նախկինում այդ բույսերը չի տեսել, կանեփ բույսը չի ճանաչում: Նշեց նաև, որ որդին հողատարածք երբևէ չի մտել:

Գործով վկա Արշակ Գևորգի Սայադյանի նախաքննության փուլում տված ցուցմունքներով այն մասին, որ 2011թ. սեպտեմբերի 6-ին ժամը 08:30-ի սահմաններում իրենց տուն են գնացել ոստիկանության աշխատակիցներ և հայտնել, որ դատարանի որոշման հիման վրա պետք է խուզարկեն բնակարանը: Վերջիններս ընթերակաների մասնակցությամբ խուզարկել են իրենց բնակարանը, սակայն ոչինչ չեն գտել: Այնուհետև խուզարկել են տանը կից հողատարածքը, սակայն ինքը տանից դուրս չի եկել և չի մասնակցել հողատարածքում կատարված խուզարկությանը: Միայն հետո իմացել է, որ իրենց հողատարածքից հայտնաբերվել և առգրավվել են չորացված և աճած կանեփ: Նշել է, որ ինքը երբևէ հողատարածք չի մտել, որևէ բույս չի մշակել և ընդհանրապես տեղյակ չէ, թե հողատարածքում ինչ կա: Չգիտի նաև, թե այնտեղից հայտնաբերված կանեփի բույսերն ում են պատկանում:
Գ.թ. 123-124

Խուզարկություն կատարելու մասին արձանագրության համաձայն` 06.09.2011թ. Գևորգ Վրեժի Սայադյանի Զ.Սարկավագի 1-ին նրբանցքի 5 տանը և օժանդակ շինություններում կատարված խուզարկության ժամանակ տանը կից հողատարածքում հայտնաբերվել են մարգերով ցանված և մշակված կանեփի կանաչ թփեր` մոտ 14 կիլոգրամ ընդհանուր քաշով: Հողատարածքի սկզբնամասում գտնվող սեղանի վրա` սկուտեղի մեջ լցված, հայտնաբերվել է կանեփի թփերի նմանվող կիսաչորացված զանգված` մոտ 70 գրամ ընդհանուր քաշով: Հողատարածքի վրա կառուցված շինության երկրորդ հարկում, որտեղ գիշերել է Գ.Սայադյանը, մահճակալի ներքնակի ձախ մասում հայտնաբերվել են կարմիր կափարիչի վրա լցված կանաչ գույնի ՙմարիխուանա՚ տեսակի թմրամիջոցի նմանվող չորացված զանգված, իսկ նույն տեղում գտնվող մետաղե քամիչի մեջ` մոտ 2,7 գրամ ընդհանուր քաշով կանեփի սերմեր:
Գ.թ. 10-11

Փորձագետի թիվ 397Ք եզրակացության համաձայն` Գ.Սայադյանի Զ.Սարկավագի 1-ին նրբանցքի 5 տանը կից հողատարածքում և այնտեղ առկա շինությունում հայտնաբերված, առգրավված և փորձաքննության ներկայացված ՙմարիխուանա՚ տեսակի թմրամիջոցի նմանվող չորացված զանգվածը, կիսաչոր կանեփանման զանգվածը հանդիսանում են խոշոր չափի` 16,75 գրամ հաստատուն քաշով չորացված, և խոշոր չափի` 65,2 գրամ քաշով չչորացված ՙմարիխուանա՚ տեսակի թմրամիջոց:
Գ.թ. 40-43

Փորձագետի թիվ 400Ք եզրակացության համաձայն` Գ.Սայադյանի Զ.Սարկավագի 1-ին նրբանցքի 5 տանը կից հողատարածքում հայտնաբերված, առգրավված և փորձաքննության ներկայացված թարմ բույսերի մասնատված հատվածները հանդիսանում են 13.950 գրամ քաշով, վայրի տեսակի կանեփի թփեր /Cannabis Ruderalis L/, պարունակում են թմրալկալոիդ` տետրահիդրոկանաբինոլ, ուստի հանդիսանում են հումք` թմրամիջոց պատրաստելու համար /մարիխուանա, հաշիշ, հաշիշի յուղ/:
Գ.թ. 87-90

Փորձագետի թիվ 0755 եզրակացության համաձայն` Գևորգ Վրեժի Սայադյանի մազի մոտ 1,5սմ երկարությամբ փորձանմուշում հայտնաբերվել են կանաբիսի խմբի թմրամիջոցների թմրալկալոիդների հետքեր:
Գ.թ. 95

Փորձագետի թիվ 201-11 եզրակացության համաձայն` Գևորգ Վրեժի Սայադյանը տառապում է ՙԿանաբինոիդային թմրամոլություն՚ ախտորոշմամբ, սակայն հարկադիր բուժումը հակացուցված է` սոմատիկ ծանր վիճակի պատճառով:
Գ.թ. 138-139

Փորձագետի թիվ 397Ք եզրակացության համաձայն` Գ.Սայադյանի Զ.Սարկավագի 1-ին նրբանցքի 5 տանը կից հողատարածքում և այնտեղ առկա շինությունում հայտնաբերված, առգրավված և փորձաքննության ներկայացված չորացված և չչորացված ՙմարիխուանա՚ տեսակի թմրամիջոցները, և նրա տանը կից հողատարածքից հայտնաբերված կանեփի թփերը, մորֆոլոգիական և քիմիական բաղադրությաբ համընկնում են և, հնարավոր է դրանք ունենան միևնույն ծագման աղբյուր:
Գ.թ. 163-166

Իրեղեն ապացույց ճանաչված և քրեական գործին կցված, Գևորգ Վրեժի Սայադյանի Երևան քաղաքի Զ.Սարկավագի 1-ին նրբանցք 5 տանը կից հողատարածքից և այնտեղ առկա շինությունից հայտնաբերված և առգրավված խոշոր չափի` 16,75 գրամ քաշով չորացված և 65,2 գրամ քաշով չչորացված ՙմարիխուանա՚ տեսակի թմրամիջոցներով, առանձնապես խոշոր չափի` 13.950 գրամ քաշով կանեփի թփերով:
Գ.թ. 173

Դատարանը գտնում է, որ գործով անթույլատրելի և ոչ վերաբերելի ապացույցներ չկան:

4.Դատարանի իրավական վերլուծությունները
Դատարանը հետազոտելով ձեռք բերված ապացույցներն իրենց համակցությամբ, գտնում է, որ ամբաստանյալ Գևորգ Սայադյանի մեղավորությունը ՀՀ քրեական օրենսգրքի 268-րդ հոդվածի 2-րդ մասի 2-րդ և 273-րդ հոդվածի 2-րդ մասի 3-րդ կետերի հատկանիշներով նախատեսված հանցանքներ կատարելու համար առաջադրված մեղադրանքում ապացուցված է, որի համար նա ենթակա է քրեական պատասխանատվության և պատժի:
Պատիժ նշանակելիս դատարանը հաշվի է առնում հանցագործության հանրության համար վտանգավորության աստիճանն ու բնույթը, ինչպես նաև հանցավորի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները:
Ամբաստանյալ Գևորգ Սայադյանի անձը բնութագրող տվյալներ, պատասխանատվությունն ու պատիժը մեղմացնող հանգամանքներ դատարանը հաշվի է առնում այն, որ նա վատառողջ է, ունի հետինֆարկտային կարդիոսկլերոզ, խրոնիկական բրոնխիտ ասթմոիդ կոմպոնենտով, խրոնիկական հեպատիտ:
Ամբաստանյալի պատասխանատվությունն ու պատիժը ծանրացնող հանգամանքներ դատարանը չի արձանագրել:
Դատարանն արձանագրում է նաև, որ առկա է հանցագործությունների ռեցիդիվ և Գևորգ Սայադյանի նկատմամբ պատիժ պետք է նշանակվի ՀՀ քրեական օրենսգրքի 671-րդ հոդվածի համաձայն, այսինքն` նշանակված պատիժը չի կարող պակաս լինել ՀՀ քրեական օրենսգրքի 268-րդ հոդվածի 2-րդ մասի 2-րդ և 273-րդ հոդվածի 2-րդ մասի 3-րդ կետերով նախատեսված առավելագույն պատիժների կեսից:
Անդրադառնալով իրեղեն ապացույցների տնօրինման հարցին, դատարանը գտնում է, որ գործով իրեղեն ապացույց հանդիսացող խոշոր չափի` 16,75 գրամ քաշով չորացված և 65,2 գրամ քաշով չչորացված ՙմարիխուանա՚ տեսակի թմրամիջոցները, առանձնապես խոշոր չափի` 13.950 գրամ քաշով կանեփի թփերը պետք է ոչնչացնել:
Ղեկավարվելով ՀՀ քրեական դատավարության օրենսգրքի 119-րդ, 357-360-րդ, 365-րդ, 369-373-րդ, 379-րդ հոդվածներով, դատարանը`

Վ Ճ Ռ Ե Ց

Գևորգ Վրեժի Սայադյանին մեղավոր ճանաչել ՀՀ քրեական օրենսգրքի 268-րդ հոդվածի 2-րդ մասի 2-րդ և 273-րդ հոդվածի 2-րդ մասի 3-րդ կետերով:
ՀՀ քրեական օրենսգրքի 268-րդ հոդվածի 2-րդ մասի 2-րդ կետով նրա նկատմամբ պատիժ նշանակել ազատազրկում 1 (մեկ) տարի 6 /վեց/ ամիս ժամկետով:
ՀՀ քրեական օրենսգրքի 273-րդ հոդվածի 2-րդ մասի 3-րդ կետով` ազատազրկում 4 /չորս/ տարի ժամկետով:
ՀՀ քրեական օրենսգրքի 66-րդ հոդվածի կանոններով, պատիժները մասնակի գումարելու միջոցով, Գևորգ Վրեժի Սայադյանի նկատմամբ վերջնական պատիժ նշանակել ազատազրկում 4 /չորս/ տարի 6 /վեց/ ամիս ժամկետով:
Պատժի սկիզբը հաշվել 2011 թվականի սեպտեմբերի 06-ից:
Պատիժը պետք է կրի ՀՀ ԱՆ համապատասխան քրեակատարողական հիմնարկում:
Գևորգ Սայադյանի նկատմամբ ընտրված խափանման միջոցը` կալանքը, թողնել անփոփոխ, մինչև դատավճռի օրինական ուժի մեջ մտնելը:
Իրեղեն ապացույց հանդիսացող խոշոր չափի` 16,75 գրամ քաշով չորացված և 65,2 գրամ քաշով չչորացված ՙմարիխուանա՚ տեսակի թմրամիջոցները, առանձնապես խոշոր չափի` 13.950 գրամ քաշով կանեփի թփերը ոչնչացնել:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակման պահից մեկամսյա ժամկետում:






ԴԱՏԱՎՈՐ Ա.ՄԿՐՏՉՅԱՆ