գործ No ԵԱՔԴ/0164/01/11

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

25.01.2012թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը

նախագահությամբ` դատավոր Ա.Մկրտչյանի
քարտուղարությամբ` Օ.Կիրակոսյանի
Շ.Վանոյանի
մասնակցությամբ`
մեղադրող Ռ.Խաչատրյանի

ամբաստանյալներ Ա.Սարգսյանի
Ր.Սարգսյանի
Բ.Միրզոյանի

պաշտպան Թ.Բաղդասարյանի
տուժող Ա.Հովհաննիսյանի


Դատարանում, դռնբաց դատական նիստում, քննեց քրեական գործն ըստ մեղադրանքի`
Արմեն Արայի Սարգսյանի /ծնված 04.06.1991թ., ք.Երևան, ազգությամբ հայ, ՀՀ քաղաքացի, չամուսնացած, միջնակարգ կրթությամբ, չի աշխատում, դատվածություն չունեցող, բնակվող` ք.Երևան Ա.Ահարոնյան 61 տուն/:
Մեղադրվում է ՀՀ քրեական օրենսգրքի 258-րդ հոդվածի 3-րդ մասի 1-ին կետով:

Րաֆֆի Արայի Սարգսյանի /ծնված 02.02.1989թ., ք.Երևան, ազգությամբ հայ, ՀՀ քաղաքացի, չամուսնացած, միջնակարգ կրթությամբ, չի աշխատում, չդատված, բնակվող` ք.Երևան Ա.Ահարոնյան 61 տուն/:
Մեղադրվում է ՀՀ քրեական օրենսգրքի 258-րդ հոդվածի 3-րդ մասի 1-ին կետով:

Բորիս Մայիսի Միրզոյանի /ծնված 27.08.1986թ., ք.Երևան, ազգությամբ հայ, ՀՀ քաղաքացի, ամուսնացած, խնամքին 2 մանկահասակ երեխա, բարձրագույն կրթությամբ, չի աշխատում, չդատված, բնակվող` ք.Երևան Գայի 1շենք, բնակարան 104/:
Մեղադրվում է ՀՀ քրեական օրենսգրքի 258-րդ հոդվածի 3-րդ մասի 1-ին կետով:

Պ Ա Ր Զ Ե Ց

Գործի դատավարական նախապատմությունը
2011 թվականի սեպտեմբերի 15-ին տեղի է ունեցել դեպքը:
2011 թվականի սեպտեմբերի 26-ին հարուցվել է թիվ 09114011 քրեական գործը:
2011 թվականի հոկտեմբերի 03-ին Ա.Սարգսյանը ներգրավվել է որպես մեղադրյալ և նրա նկատմամբ խափանման միջոց է ընտրվել կալանքը:
2011 թվականի հոկտեմբերի 03-ին Ր.Սարգսյանը ներգրավվել է որպես մեղադրյալ և նրա նկատմամբ խափանման միջոց է ընտրվել ստորագրություն չհեռանալու մասին:
2011 թվականի հոկտեմբերի 25-ին Բ.Միրզոյանը ներգրավվել է որպես մեղադրյալ և նրա նկատմամբ խափանման միջոց է ընտրվել ստորագրություն չհեռանալու մասին:
2011 թվականի նոյեմբերի 15-ին թիվ 09114011 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:

Գործի փաստական հանգամանքները
Նախաքննության մարմինն ամբաստանյալ Արմեն Սարգսյանին մեղադրանք է առաջադրել ՀՀ քրեական օրենսգրքի 258-րդ հոդվածի 3-րդ մասի 1-ին կետով, այն արարքի համար, որ ՙնա եղբորª Րաֆֆի Սարգսյանի և Բորիս Միրզոյանի հետ, 2011 թվականի սեպտեմբերի 15-ին, ժամը 18.00-ի սահմաններում, Ահարոնյան փողոցի վրա, դիտավորությամբ, կոպիտ կերպով խախտելով հասարակական կարգը, բացահայտ անհարգալից վերաբերմունք դրսևորելով հասարակության նկատմամբ, շուրջ 15 րոպե տևողությամբ, վիճաբանության մեջ են մտել Արտավազդ Հովհաննիսյանի հետ, տվել սեռական բնույթի հայհոյանքներ և բռնություն գործադրել նրա նկատմամբ՚:
Ամբաստանյալ Րաֆֆի Սարգսյանին մեղադրանք է առաջադրվել ՀՀ քրեական օրենսգրքի 258-րդ հոդվածի 3-րդ մասի 1-ին կետով, այն արարքի համար, որ ՙնա Արմեն Սարգսյանի և Բորիս Միրզոյանի հետ 2011 թվականի սեպտեմբերի 15-ին ժամը 18.00-ի սահմաններում, Ահարոնյան փողոցի վրա, դիտավորությամբ, կոպիտ կերպով խախտելով հասարակական կարգը, բացահայտ անհարգալից վերաբերմունք դրսևորելով հասարակության նկատմամբ, շուրջ 15 րոպե տևողությամբ, վիճաբանության մեջ են մտել Արտավազդ Հովհաննիսյանի հետ, տվել սեռական բնույթի հայհոյանքներ և բռնություն գործադրել նրա նկատմամբ՚:
Ամբաստանյալ Բորիս Միրզոյանին մեղադրանք է առաջադրվել ՀՀ քրեական օրենսգրքի 258-րդ հոդվածի 3-րդ մասի 1-ին կետով, այն արարքի համար, որ ՙնա Րաֆֆի և Արմեն Սարգսյանների հետ, 2011 թվականի սեպտեմբերի 15-ին, ժամը 18.00-ի սահմաններում, Ահարոնյան փողոցի վրա, դիտավորությամբ, կոպիտ կերպով խախտելով հասարակական կարգը, բացահայտ անհարգալից վերաբերմունք դրսևորելով հասարակության նկատմամբ, շուրջ 15 րոպե տևողությամբ, վիճաբանության մեջ են մտել Արտավազդ Հովհաննիսյանի հետ, տվել սեռական բնույթի հայհոյանքներ և բռնություն գործադրել նրա նկատմամբ՚:

Ապացույցների հետազոտում
Դատաքննության փուլում ամբաստանյալ Րաֆֆի Սարգսյանը իրեն մեղավոր չճանաչեց և ցուցմունք տվեց այն մասին, որ դեպքի օրը` 2011 թվականի սեպտեմբերի 15-ին, ժանը 18-ի սահմաններում ինքը ոչ ոքի չի հարվածել և հայհոյանքներ չի տվել, Արտավազդ Հովհաննիսյանը, գտնվելով ալկոհոլի ազդեցության տակ, մոտեցել էր իրենց և հարցնում էր, թե ինչ է պատահել, իրենք պատասխանել են որ ոչինչ չի եղել, Ա.Հովհաննիսյանը հայհոյանքներ է տվել և իրենք հրել են նրան` ասելով, որ հեռանա: Ամբաստանյալը պաշտպանական ճառում և վերջին խոսքում ընդունեց մեղքը ու զղջաց կատարած արարքի համար:
Ամբաստանյալ Բորիս Միրզոյանը դատաքննության փուլում իրեն մեղավոր չճանաչեց և ցուցմունք տվեց այն մասին, որ դեպքի օրը` 2011 թվականի սեպտեմբերի 15-ին, ժանը 18-ի սահմաններում մոտեցել է բանջարեղեն վաճառող տարեց տղամարդուն, ներողություն խնդրել և քանի որ վերջինս իրեն վատ էր զգում, փորձել է ուղեկցել նրան տուն, այդ ժամանակ Արտավազդ Հովհաննիսյանը գոռալով քայլել է իր ուղղությամբ և հասնելով իրեն ընկել է իր առջև ու վնասվել: Արա Սարգսյանը մոտեցել է և Ա.Հովհաննիսյանին տարել այդտեղից, քիչ անց վերջինս մոտեցել է իրեն և ասել, որ իր հետ որևէ խնդիր չունի: Ամբաստանյալը պաշտպանական ճառում և վերջին խոսքում զղջաց կատարած արարքի համար:
Ամբաստանյալ Արմեն Սարգսյանը դատաքննության փուլում իրեն մեղավոր չճանաչեց և ցուցմունք տվեց այն մասին, որ դեպքի օրը` 2011 թվականի սեպտեմբերի 15-ին, ժանը 18-ի սահմաններում, աղմուկ լսելով, դուրս է եկել տնից և տեսել է որ հայրը` Արա Սարգսյանը, բարձրաձայն զրուցում է բանջարեղեն վաճառողի հետ, Արա Սարգսյանին տարել են տուն ու հանգստացրել: Վերադառնալով բակ` նկատել է, որ բազմաթիվ մարդիկ են հավաքվել և աղմուկ է, ինքը մոտեցել է Ա.Հովհաննիսյանին և թևից քաշել, որ մի կողմ տանի սակայն վերջինս վայր է ընկել: Ինքը օգնել է նրան կանգնել և հայրը եկել ու տարել է Ա.Հովհաննիսյանին: Ամբաստանյալը նշեց նաև, որ ինքը Ա.Հովհաննիսյանին չի հարվածել և հայհոյանքներ չի տվել: Ամբաստանյալը պաշտպանական ճառում և վերջին խոսքում ընդհունեց մեղքը ու զղջաց կատարած արարքի համար:

Ամբաստանյալներ Ր.Սարգսյանին, Ա.Սարգսյանին և Բ.Միրզոյանին մեղսագրվող արարքը հիմնավորվել է դատաքննությամբ հետազոտված ներքոհիշյալ ապացույցներով.

Ամբաստանյալ Արմեն Սարգսյանը նախաքննության փուլում որպես կասկածյալ ցուցմունք է տվել այն մասին, որ 2011թ. սեպտեմբերի 15-ին, ժանը 18-ի սահմաններում, երբ գտնվել է տանը, փողոցի կողմից լսել է աղմուկի ու վիճաբանության ձայներ: Դուրս գալով փողոց տեսել է, որ հայրըª Արա Սարգսյանը վիճաբանում է իրենց տան դիմաց գտնվող բանջարեղենի խանութի աշխատող Ռաֆիկի հետ: Միջամտել է, հանգստացրել հորը ու տարել տուն: Մոտ 5 րոպեից դուրս է եկել բակ ու տեսել, որ փողոցում իրենց հարևան Արտավազդ Հովհաննիսյանը վիճում է եղբոր Րաֆֆի Սարգսյանի և նրա ընկերոջª Բորիս Միրզոյանի հետ, իսկ հավաքված մարդիկ բաժանում են նրանց: Այդ ժամանակ Ա.Հովհաննիսյանը հայհոյել է իր եղբորը և ինքը վազելով մոտեցել է վերջինիս ու ոտքով հարվածել նրա մեջքին: Հավաքված մարդիկ իրեն ետ են քաշել, չթողնելով, որ կռիվը շարունակվի: Քիչ անց եկել է հայրըª Ա.Սարգսյանը և Ա.հովհաննիսյանին տարել իրենց տունª լվացվելու, քանի որ նրա դեմքից արյուն է եկել: Դրանից հետո, ինքը, եղբայրը և Բ.Միրզոյանը գնացել են իրենց տուն: Իրենց վեճը Ա.Հովհաննիսյանի հետ տևել է մոտ 5 րոպե, որի ժամանակ շրջապատում հավաքված են եղել շատ մարդիկ:
Գ/Թ 72-73

Ամբաստանյալ Րաֆֆի Սարգսյանը նախաքննության փուլում որպես կասկածյալ ցուցմունք է տվել այն մասին, որ 2011թ. սեպտեմբերի 15-ին, ժանը 18-ի սահմաններում իրեն հյուր է եկել ընկերըª Բորիս Միրզոյանը, միասին դուրս են եկել փողոց ու կանգնել իրենց տնից մոտ 50 մետր հեռավորության վրա: Մոտ 5-10 րոպեից, իրենց տան դիմաց գտնվող բանջարեղենի խանութի մոտից լսել են գոռգոռոցի ձայներ, տեսել են, որ հայրըª Արա Սարգսյանը վիճում է խանութի աշխատող Ռաֆիկի հետ: Մոտեցել են, տեսել է, որ հայրը ոգելից խմիչքի ազդեցության տակ է, խոսակցությունից հասկացել են, որ հայրը Ռաֆիկից նիսյա բանջարեղեն է ուզել, Ռաֆիկը չի տվել, ինչից էլ ծագել է վեճը: Տնից դուրս է եկել եղբայրըª Արմեն Սարգսյանը ու հորը տուն տարել, իսկ ընկերը Բ.Միրզոյանը առանձնացել է Ռաֆիկի հետ զրուցելու: Այդ ժամանակ հարբած վիճակում, հայհոյանքներ տալով իրենց կողմ է եկել Արտավազդ Հովհաննիսյանը, ասելով, թե ինչ է պատահել: Ինքը պատասխանել է, որ ոչինչ չի եղել, իսկ Ա.Հովհաննիսյանը իրեն չլսելով շարունակել է մոտենալ: Երբ Ա.Հովհաննիսյանը հասել է իրեն, ինքը նորից ասել է, որ բան չի եղել ու հետ հրել նրան, ինչից նա ընկել է, իսկ վեր կենալով սկսել է իրեն հայհոյել: Իր ու Ա.հովհաննիսյանի միջև քաշքշուկ է առաջացել: Շրջապատում հավաքված են եղել բավականին մարդիկ, որոնք բաժանել են իրենց: Ա.Հովհաննիսյանը շարունակել է իրեն հայհոյել և այդ ժամանակ վազելով Ա.Հովհաննիսյանին է մոտեցել եղբայրըª Արմեն Սարգսյանը ու ոտքով հարվածել նրա մեջքին: Հավաքված մարդիկ ետ են քաշել նաև Ա.Սարգսյանին, որ կռիվը չշարունակվի: Դրանից հետո, եկել է հայրը, իրեն ու եղբորը ասել, որ գնան տուն, ինքն էլ Ա.Հովհաննիսյանին տարել է լվացվելու, քանի որ իր հրելուց Ա.Հովհաննիսյանը ընկել ու վնասել էր դեմքը և դեմքից արյուն է հոսել: Իրենց վեճը Ա.Հովհաննիսյանի հետ տևել է մոտ 15 րոպե, որի ժամանակ շրջապատում հավաքված են եղել շատ մարդիկ:
Գ/Թ 80-81

Տուժող Արտավազդ Հովհաննիսյանը դատաքննության փուլում ցուցմունք է տվել այն մասին, որ 2011թ. սեպտեմբերի 15-ին, ժամը 19-ի սահմաններում գնացել է իրենց տնից մոտ 100 մետր հեռավորության վրա, Ահարոնյան փողոցում գտնվող բազմաբնակարան շենքª իրենց հարևան Սաքոի հոգեհանգստյան արարողությանը: Նրանց տնից դուրս գալուց հետո կանգնել է նրանց շենքի մոտª փողոցում, ու զրուցել Պետրոսի հետ: Այդ ժամանակ հացի փռի մոտից լսել է աղմուկի ու վեճի ձայներ: Պետրոսի հետ մի քանի քայլ գնացել են այդ կողմ և այնտեղ հավաքվածներին ձայն տալով հարցրել է, թե ինչ է եղել: Հավաքվածների միջից մի տղա պատասխանել է իրեն, բայց չի հիշում ինչ է ասել, որից հետո այդ տղան սկսել է գալ իր կողմ: Այդ պահին թիկունքի կողմից հարվածներ է ստացել գլխին և մեջքին, ինչից ընկել է գետնին ու հավանաբար կորցրել գիտակցությունը, քանի որ չի հիշում ինչ է եղել դրանից հետո: Երբ ուշքի է եկել, ունքը ճղված է եղել և իրեն տարել են լվացվելու շենքի բակի ցայտաղբյուրի մոտ: Ահարոնյան փողոցի բնակիչ Արայիկ Սարգսյանը, իրեն տարել է իրենց բակ, որտեղ ինքը լվացվել ու գնացել է տուն:

Վկա Պետրոս Մկրտչյանը դատաքննությամբ ցուցմունք տվեց այն մասին, որ 2011թ. սեպտեմբերի 15-ին, ժամը 18-ի սահմաններում գնացել է Ահարոնյան 14 շենք Սաքոյի հոգեհանգստյան արարողությանը: Ժամը 18.30-ի սահմաններում դուրս է եկել այդ շենքից ու տեսել, որ Ահարոնյան փողոցի բնակիչ Արտավազդ Հովհաննիսյանը կանգնած է շենքի մոտ, փողոցի մայթեզրին: Մոտեցել է նրան ու սկսել են զրուցել: Քիչ անց հարակից շենքի բակում գտնվող բանջարեղենի խանութի և հացի փռի մոտից լսվել են վիճաբանության ու գոռգոռոցների ձայներ: Ինքն ու Ա.Հովհաննիսյանը քայլել են դեպի այդ ձայների ուղղությամբ, իսկ իրենց ետևից քայլել են նաև շենքի բակում հավաքված մարդիկ, մոտ 10 հոգի: Քայլելուց տեսել են, որ հացի փռի ետևի կողմում մի քանի երիտասարդներ գոռգոռում են ու վիճում: Ա.Հովհաննիսյանի հետ կանգնել են նրանցից մոտ 15 մետր հեռավորության վրա, Ա.Հովհաննիսյանը ձայն է տվել նրանց ասելով. ՙվերջացրեք՚: Այդ երիտասարդներից մեկը, որը եղել է սև շորերով, Ա.Հովհաննիսյանի ասածին ի պատասխան ասել է. ՙբան ունես ասելու ստե արի՚: Ա.Հովհաննիսյանը մոտեցել է այդ տղային, նրանք փորձել են կռվել, բայց այդ պահին մի տղա ընկել է Ա.Հովհաննիսյանի ու սև շորերով տղայի արանքը, որ չկռվեն: Ինչ որ մեկը բռնել է սև շորերով երիտասարդին, իսկ ինքը բռնել է Ա.Հովհաննիսյանին ու սկսել մի կողմ տանել: Այդ պահին մի երիտասարդ ոտքով հարվածել է Ա.Հովհաննիսյանի մեջքին և Ա.Հովհաննիսյանը ընկել է գետնին և այդ պահին մի քանի անգամ ոտքով հարվածել են նրա դեմքին, որից հետո Ա.Հովհաննիսյանը ընկել է գետնին: Ինքը Ա.Հովհաննիսյանին բարձրացրել է գետնից, նրա դեմքից արյուն է հոսել, տարել ու նստեցրել բակի տաղավարում, տանելու ժամանակ ինքն էլ է արյունոտվել և գնացել է շենքի ետևի մասում գտնվող ցայտաղբյուրի մոտ լվացվելու: Լվացվելուց հետո գնացել է տուն:

Վկա Ռաֆիկ Թունյանը դատաքննությամբ ցուցմունք տվեց այն մասին, որ շուրջ 2 ամիս է որպես անհատ ձեռներեց Ահարոնյան 14/4 հասցեում բացել է բանջարեղենի կրպակ: 2011թ. սեպտեմբերի 15-ին, ժամը 18-ի սահմաններում, կրպակի դիմացի տան բնակիչ Արա Սարգսյանը, խմած վիճակում, մոտեցել է իրեն և պարտքով ապրանք ուզել: Ինքը նրան մերժել է ասելով, որ դեռ նախկին պարտքերը չի փակել: Դրանից Ա.Սարգսյանը վրդովվել է, սկսել վիրավորել ու հայհոյել իրեն: Ինքը տոն չի տվել Ա.Սարգսյանին, բացատրել է, որ հեռանա և նա իր հայհոյանքները շարունակելով հեռացել է: Այդ ժամանակ իրեն է մոտեցել մոտ 20-25 տարեկան, սև շորերով մի երիտասարդ, հարցրել, թե ինչ է պատահել, ինքը նրան ասել է եղելությունը: Այդ ժամանակ նշված տղան և իրենց թաղամասի բնակիչ Արտավազդ Հովհաննիսյանը, որը կանգնած է եղել իրենցից մոտ 5 մետր հեռավորության վրա, մի քանի բառ են փոխանակել և այդ տղան ասել է. ՙարի ասեմ՚ և Ա.Հովհաննիսյանը մոտեցել է: Ինքը հասկանալով, որ կռիվ կարող է լինել, կանգնել է Ա.Հովհաննիսյանի ու այդ տղայի արանքում և պահել վերջինիս, որ չհարձակվի Ա.Հովհաննիսյանի վրա: Հանկարծ տեսել է, որ Ա.Հովհաննիսյանը ընկած է գետնին: Դրանից հետո, մոտեցել են մարդիկ, օգնել Ա.Հովհաննիսյանին բարձրանալ գետնից, իսկ ինքը գնացել է տուն: Դատաքննության ժամանակ վկա Ռ.Թունյանը մատնացույց արեց ամբաստանյալ Բորիս Միրզոյանին և նշեց, որ նա է վերը նշված մոտ 20-25 տարեկան սև շորերով երիտասարդը:

Վկա Կարեն Բոչոլյանը նախաքննության փուլում ցուցմունք է տվել այն մասին, որ 2011թ. սեպտեմբերի 15-ին, ժամը 18-ի սահմաններում նստած է եղել իրենց շենքի բակում: Հանկարծ փողոցի վրա գտնվող հացի փռի կողմից լսել է գոռգոռոցների ձայներ: Գնացել է ձայների ուղղությամբ և հացի փռի մոտ կանգնած տեսել իր համադասարանցի Բորիս Միրզոյանին: Նրանից մոտ 7-8 մետր հեռավորության վրա կանգնած է եղել իրենց փողոցի բնակիչª Արտավազդ Հովհաննիսյանը: Ա.Հովհաննիսյանը երևի ինչ-որ բան է ասել Բ.Միրզոյանին, քանի որ, երբ ինքը մոտեցել է լսել է, որ Բ.Միրզոյանը Ա.Հովհաննիսյանին հարցրել է արդյոք իր հետ էր, իսկ վերջինս պատասխանել է, որից հետո նրանք քայլելով սկսել են մոտենալ իրար և փորձել են հարձակվել իրար վրա, հարվածել իրար, իսկ Բ.Միրզոյանը միաժամանակ տվել է հայհոյանքներ: Ինքը միջամտել է, Բ.Միրզոյանին մի քիչ հետ քաշել և քանի որ շրջապատում բավականին շատ մարդ է եղել, նրանք էլ Ա.Հովհաննիսյանին են մի կողմ քաշել: Հանկարծ տեսել է, որ իրենց փողոցի բնակիչներ, եղբայրներª Արմեն և Րաֆֆի Սարգսյանները հարձակվել են Ա.Հովհաննիսյանի վրա ու հայհոյանքներ տալով ծեծել: Բ.Միրզոյանը իր ձեռքից ազատվել է, հարձակվել Ա.Հովհաննիսյանի վրա ու սկսել հայհոյանքներ տալով հարվածել նրան: Ա.Հովհաննիսյանը ընկել է գետնին և նրանք շարունակել են հարվածել գետնին ընկած Ա.Հովհաննիսյանին: Ինքը միջամտել է, մի կողմ քաշել Բ.Միրզոյանին, իսկ հավաքված մարդիկª Արմեն և Րաֆֆի Սարգսյաններին: Այդ ժամանակ եկել է նաև վերջիններիս հայրըª Արա Սարգսյանը և իր տղաներին մի կողմ քաշել: Հավաքվածները Ա.Հովհաննիսյանին բարձրացրել են գետնից ու տարել լվացվելու, քանի որ նա ամբողջովին արյունոտված է եղել: Այդ կռիվը տևել է մոտ 5-10 րոպե, որի ընթացքում Բ.Միրզոյանը, Արմեն և Րաֆֆի Սարգսյանները տվել են հայհոյանքներ և ծեծել Ա.Հովհաննիսյանին: Կռվի ընթացքում փողոցում հավաքված են եղել մոտ 30 հոգի, որոնց մի մասը եղել է շրջապատի բնակիչներ, իսկ մյուս մասը` Սարգիսի հոգեհանգստյան արարողությանը եկած մարդիկ:
Գ/Թ 54-55

Վկա Ալեքսան Բաբայանը դատաքննությամբ ցուցմունք է տվել այն մասին, որ 2011թ. սեպտեմբերի 15-ին, ժամը 18-ի սահմաններում որդուª իննամյա Արմենի հետ դուրս են եկել տնից ու քայլել դեպի Կ.Ուլնեցի Ահարոնյան փողոցների խաչմերուկª շաուրմա գնելու: Հասնելով Ահարոնյան փողոցի վրա գտնվող հացի փռի մոտ, տեսել է, որ մի տարեց տղամարդ և ինչ որ երիտասարդ գոռգոռում են իրար վրա: Մտել է նրանց միջև, որ թույլ չտա կռիվ լինի: Վիճող երիտասարդին մի կողմ է հրել և հրելու ժամանակ ուսը տեղաշարժվել է, քանի որ այն վնասված է: Թողնելով այդ երիտասարդին գնացել և շենքի մոտ գտնվող ցայտաղբյուրի ջրով լվացել է ուսը, որ ցավը թուլանա, որից հետո ուսը տեղն է գցել: Երբ շրջվել է, տեսել է, որ տարեց տղամարդը ընկած է գետնին և արնահոսում է: Ինքը մոտեցել է վերջինիս, փորձել բարձրացնել, բայց ուսը ցավելու պատճառով միայնակ չի կարողացել: Այդ ժամանակ մոտեցել է մոտ 55 տարեկան մի տղամարդ, միասին բարձրացրել են գետնից ընկած տղամարդուն ու տարել նստեցրել են շենքի բակում գտնվող տաղավարում: Դրանից հետո, ինքը որդու հետ հեռացել է: Հետագայում լսել է, որ տարեց տղամարդուն ծեծել են Արա Սարգսյանի տղաները: Դեպքի ժամանակ շրջապատում հավաքված են եղել բավականին շատ մարդիկ, որոնց մի մասը եղել են շրջապատի բնակիչներ, իսկ մյուս մասը` հոգեհանգստյան արարողության մասնակիցներ:

Վկա Աղավնի Գևորգյանը նախաքննության փուլում ցուցմունք է տվել այն մասին, որ 2011թ. սեպտեմբերի 15-ին ժամը 18-ի սահմաններում, երբ գտնվել է տանը փողոցից լսել է հայհոյանքների և կռվի ձայներ: Դուրս է եկել պատաշգամբ և փողոցի կողմում, հացի փռի մոտ տեսել հավաքված մարդիկ, լսվել են հայհոյանքի ձայները: Մի քանի րոպե կանգնելուց հետո մտել է տուն: Հայհոյանքների ու կռվի ձայները լսվել են մոտ 10 րոպե: Հետագայում իմացել է, որ Ահարոնյան փողոցի վրա գտնվող բանջարեղենի խանութի դիմացի տան բնակիչª Արայիկը վիճել է այդ խանութի աշխատող Ռաֆիկի հետ, որից հետո, փողոցում կռիվ են արել ու հայհոյանքներ տվել Արայիկի տղաները, բայց ում հետ են կռվել ինքը չգիտի:
Գ/Թ 120-121

Դատաբժշկական փորձաքննության 03.10.2011թ. թիվ 2808 եզրակացության համաձայն` Ա.Հովհաննիսյանի ստացած մարմնական վնասվածքներըը աջ ծնկահոդի շրջանի քերծվածքի, ձախ վերին կոպի շրջանի սալջարդ վերքի ձևով, պատճառվել են բութ առարկաներով, հնարավոր է որոշման մեջ նշված ժամկետում, որոնցից քերծվածքը առողջության թեթև վնասի հատկանիշներ չի պարունակում, սալջարդ վերքը պատճառել է առողջությանը թեթև վնաս` առողջության տևական քայքայումով:
Գ/Թ 112-113

Դատարանի իրավական վերլուծությունները
Դատարանը գործով ձեռք բերված յուրաքանչյուր ապացույց գնահատելով թույլատրելիության վերաբերելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, ղեկավարվելով օրենքով, ներքին համոզմամբ, գտնում է, որ ամբաստանյալներ Արմեն Սարգսյանի, Բորիս Միրզոյանի և Րաֆֆի Սարգսյանի մեղավորությունը ՀՀ քրեական օրենսգրքի 258-րդ հոդվածի 3-րդ մասի 1-ին կետով նախատեսված հանցանք կատարելու մեջ ապացուցված է, որի համար նրանք ենթակա են քրեական պատասխանատվության և պատժի:
Պատիժ նշանակելիս դատարանը հաշվի է առնում հանցագործության հանրության համար վտանգավորության աստիճանն ու բնույթը, ինչպես նաև անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները:
Ամբաստանյալ Արմեն Սարգսյանի անձը բնութագրող տվյալներ, պատասխանատվությունն ու պատիժը մեղմացնող հանգամանքներ դատարանը հաշվի է առնում այն, որ նա ընդունել է մեղքը և անկեղծորեն զղջացել է կատարածի համար, բնութագրվում է դրական:
Ամբաստանյալ Րաֆֆի Սարգսյանի անձը բնութագրող տվյալներ, պատասխանատվությունն ու պատիժը մեղմացնող հանգամանքներ դատարանը հաշվի է առնում այն, որ նա ընդունել է մեղքը և զղջում է կատարածի համար, նախկինում դատված չի եղել, բնութագրվում է դրական:
Ամբաստանյալ Բորիս Միրզոյանի անձը բնութագրող տվյալներ, պատասխանատվությունն ու պատիժը մեղմացնող հանգամանքներ դատարանը հաշվի է առնում այն, որ նա նախկինում դատված չի եղել, բնութագրվում է դրական, խնամքին են գտնվում 2007թ. և 2008թ. ծնված երկու մանկահասակ երեխաները, զղջում է կատարածի համար:
Ամբաստանյալների պատասխանատվությունը և պատիժը ծանրացնող հանգամանքներ դատարանը չի արձանագրել:
Դատարանը գտնում է, որ ամբաստանյալ Արմեն Սարգսյանի նկատմամբ տուգանքի ձևով պատիժ նշանակելը չի կարող ապահովել պատժի նպատակները և նրա նկատմամբ պետք է նշանակվի ազատազրկման ձևով պատիժ:
Ղեկավարվելով ՀՀ քրեական դատավարության օրենսգրքի 357-360-րդ, 365-րդ, 369-373-րդ, 379-րդ հոդվածներով դատարանը

Վ Ճ Ռ Ե Ց

Արմեն Արայի Սարգսյանին մեղավոր ճանաչել ՀՀ քրեական օրենսգրքի 258-րդ հոդվածի 3-րդ մասի 1-ին կետով և նրա նկատմամբ պատիժ նշանակել ազատազրկում 6 /վեց/ ամիս ժամկետով:
Պատժի սկիզբը հաշվել 2011 թվականի սեպտեմբերի 30-ից:
Պատիժը պետք է կրի ՀՀ ԱՆ համապատասխան քրեակատարողական հիմնարկում:
Արմեն Սարգսյանի նկատմամբ ընտրված խափանման միջոցը` կալանքը, թողնել անփոփոխ մինչև դատավճռի օրինական ուժի մեջ մտնելը:

Րաֆֆի Արայի Սարգսյանին մեղավոր ճանաչել ՀՀ քրեական օրենսգրքի 258-րդ հոդվածի 3-րդ մասի 1-ին կետով և նրա նկատմամբ պատիժ նշանակել տուգանք ՀՀ նվազագույն աշխատավարձի երկուհարյուրհիսունապատիկի` 250.000 /երկու հարյուր հիսուն հազար/ ՀՀ դրամի չափով:
Րաֆֆի Սարգսյանի նկատմամբ ընտրված խափանման միջոցը` ստորագրություն չհեռանալու մասին, թողնել անփոփոխ մինչև դատավճռի օրինական ուժի մեջ մտնելը:

Բորիս Մայիսի Միրզոյանին մեղավոր ճանաչել ՀՀ քրեական օրենսգրքի 258-րդ հոդվածի 3-րդ մասի 1-ին կետով և նրա նկատմամբ պատիժ նշանակել տուգանք ՀՀ նվազագույն աշխատավարձի երկուհարյուրհիսունապատիկի` 250.000 /երկու հարյուր
հիսուն հազար/ ՀՀ դրամի չափով:
Բորիս Միրզոյանի նկատմամբ ընտրված խափանման միջոցը` ստորագրություն չհեռանալու մասին, թողնել անփոփոխ մինչև դատավճռի օրինական ուժի մեջ մտնելը:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակման պահից մեկամսյա ժամկետում:





ԴԱՏԱՎՈՐ Ա.ՄԿՐՏՉՅԱՆ