գործ No ԵԱՔԴ/0162/01/11

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

26.12.2011թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը

նախագահությամբ` դատավոր Ա.Մկրտչյանի
քարտուղարությամբ` Օ.Կիրակոսյանի
մասնակցությամբ`
մեղադրող Ա.Մնացականյանի
ամբաստանյալ Ա.Դռնոյանի
պաշտպան Ա.Ղազարյանի
տուժողի իրավահաջորդ` Գ.Սարոյանի

Դատարանում, դռնբաց դատական նիստում, արագացված դատաքննության կարգով քննեց քրեական գործն ըստ մեղադրանքի` Արտաշես Ալեքսանդրի Դռնոյանի (ծնված 17.10.1967թ., ազգությամբ հայ,ՀՀ քաղաքացի, բարձրագույն կրթությամբ, ամուսնացած, խնամքին 2 անձ, նախկինում չդատված, չի աշխատում, բնակվում է ք.Երևան, Ռուբինյանց փողոց 26 շենք, 8 բն.):
Մեղադրվում է ՀՀ քրեական օրենսգրքի 242-րդ հոդվածի 2-րդ մասով:

Պ Ա Ր Զ Ե Ց

Գործի դատավարական նախապատմությունը
2011 թվականի օգոտսոսի 12-ին տեղի է ունեցել դեպքը:
2011 թվականի սեպտեմբերի 11-ին հարուցվել է թիվ 60123911 քրեական գործը:
2011 թվականի նոյեմբերի 03-ին Ա.Դռնոյանին մեղադրանք է առաջադրվել ՀՀ քրեական օրենսգրքի 242-րդ հոդվածի 2-րդ մասով և նրա նկատմամբ խափանան միջոց է ընտրվել ստորագրություն չհեռանալու մասին:
2011թ. նոյեմբերի 11-ին թիվ 60123911 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:

Գործի փաստական հանգամանքները
Նախաքննության մարմինն ամբաստանյալ Արտաշես Ալեքսանդրի Դռնոյանին ՀՀ քրեական օրենսգրքի 242-րդ հոդվածի 2-րդ մասով մեղադրանք է առաջադրել այն արարքի համար, որ ՙնա 2011 թվականի օգոստոսի 12-ին, ժամը 09:00-ի սահմաններում, իր անձնական օգտագործման ՙՎԱԶ-2106՚ մակնիշի 21 OS 385 պ/հ ավտոմեքենան վարել է Երևան քաղաքի Դ.Անհաղթ փողոցով` Ռուբինյանց փողոցի կողմից ՙԼամբադա՚ կամրջի ուղղությամբ, իր ուղեմասի առաջին շարքով, մոտ 40 կմ/ժ արագությամբ: Դ.Անհաղթ փողոցի թիվ 9 շենքի դիմացից` իր ընթացքի ուղղության նկատմամբ ձախից դեպի աջ կողմ, կողք-կողքի փողոցը հատող, իր երթևեկության համար վտանգ առաջացրած հետիոտներին նկատելուց հետո, երթևեկության ուղղությունը չփոխելով` ընդհուպ կանգ առնելն արագությունն իջեցնելու դեպքում վրաերթը կանխելու տեխնիկական հնարավորություն ունենալու պայմաններում, կենտրոնանալով իր ընթացագոտի չմտած հետիոտնի ուղղությամբ, ուշադրությունը շեղել է փողոցը ձախից դեպի աջ հատող հետիոտնի նկատմամբ, աջ ուղղությամբ վտանգավոր մանևր է կատարել, ստեղծել է վթարային իրադրություն, որի հետևանքով էլ ավտոմեքենայի առջևի աջ մասով վրաերթի է ենթարկել իր նախնական ընթացագոտին արդեն իսկ ազատած Սամվել Լիպարիտի Սարոյանին և անզգուշությամբ պատճառել մարմնական վնասվածքներ, որը 11.09.2011թ. հիվանդանոցում մահացել է՚:

Արագացված դատական քննություն
Մինչև դատաքննությունն սկսելն ամբաստանյալ Արտաշես Դռնոյանը միջնորդել է դատական քննությունն անցկացնել արագացված կարգով և հայտարարել, որ առաջադրված մեղադրանքը պարզ է, համաձայն է իրեն առաջադրված մեղադրանքին, գիտակցում է արագացված կարգով դատական քննություն անցկացնելու հետևանքները, միջնորդությունը ներկայացրել է կամավոր` պաշտպանի հետ խորհրդակցելուց հետո:
Միջնորդությունը հաստատել է նաև ամբաստանյալի պաշտպան Ա.Ղազարյանը:
Մեղադրող Ա.Մնացականյանը դատական քննության արագացված կարգ կիրառելուն չի առարկել:
Տուժողի իրավահաջորդ Գևորգ Խաչիկի Սարոյանը ևս չի առարկել արագացված դատաքննության կարգ կիրառելուն և հայտնել է, որ պատճառված վնասն ամբողջությամբ հատուցված է և Ա.Դռնոյանից որևէ բողոք կամ պահանջ չունի:
Դատարանը համոզվելով, որ առկա են ՀՀ քրեական դատավարության օրենսգրքի 3751-րդ և 3752-րդ հոդվածներով նախատեսված պայմանները, որոշում է կայացրել արագացված կարգով դատական քննություն անցկացնելու մասին:

Դատարանի իրավական վերլուծությունները
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Արտաշես Դռնոյանի մեղավորությունը ՀՀ քրեական օրենսգրքի 242-րդ հոդվածի 2-րդ մասով նախատեսված հանցանք կատարելու մեջ ապացուցված է, որի համար նա ենթակա է քրեական պատասխանատվության և պատժի:
Պատիժ նշանակելիս դատարանը հաշվի է առնում հանցագործության հանրության համար վտանգավորության աստիճանն ու բնույթը, ինչպես նաև անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները:
Ամբաստանյալ Արտաշես Դռնոյանի անձը բնութագրող տվյալներ, պատասխանատվությունն ու պատիժը մեղմացնող հանգամանքներ դատարանը հաշվի է առնում այն, որ նա նախկինում դատված չէ, բնութագրվում է դրական, խնամքին ունի երկու մանկահասակ երեխա, ընդունել է մեղքը և անկեղծորեն զղջացել է կատարած արարքի համար,դեպքից անմիջապես հետո տուժողին օգնություն է ցույց տվել, լիովին հատուցել է տուժողի իրավահաջորդ Գ.Սարոյանին պատճառված նյութական վնասը:
Ամբաստանյալի պատասխանատվությունը և պատիժը ծանրացնող հանգամանքներ դատարանը չի արձանագրել:
Քննության առնելով դատական փորձաքննությունների համար ծախսված գումարների փոխհատուցման հարցը` դատարանը գտնում է, որ այն ենթակա է բռնագանձման ամբողջությամբ:
Ղեկավարվելով ՀՀ քրեական դատավարության օրենսգրքի 134-րդ, 357-360-րդ, 3753-րդ և 3754-րդ, 379-րդ հոդվածներով, դատարանը

Վ Ճ Ռ Ե Ց

Արտաշես Ալեքսանդրի Դռնոյանին մեղավոր ճանաչել ՀՀ քրեական օրենսգրքի 242-րդ հոդվածի 2-րդ մասով և նրա նկատմամբ պատիժ նշանակել ազատազրկում 1 /մեկ/ տարի ժամկետով` զրկելով տրանսպորտային միջոցներ վարելու իրավունքից` 2 /երկու/ տարի ժամկետով:
Արտաշես Ալեքսանդրի Դռնոյանի նկատմամբ ընտրված խափանման միջոցը` ստորագրություն չհեռանալու մասին, թողնել անփոփոխ, մինչև դատավճռի օրինական ուժի մեջ մտնելը:
Արտաշես Դռնոյանից որպես դատական ծախսեր հօգուտ պետական բյուջեի բռնագանձել 103.500 /հարյուր երեք հազար հինգ հարյուր/ ՀՀ դրամ:
Դատավճիռը, բացի ՀՀ քրեական դատավարության օրենսգրքի 395-րդ հոդվածի 1-ին մասով նախատեսված հիմքից, կարող է բողոքարկվել ՀՀ վերաքննիչ քրեական դատարան` հրապարակման պահից մեկամսյա ժամկետում:





ԴԱՏԱՎՈՐ Ա.ՄԿՐՏՉՅԱՆ