ԵԱՔԴ/0127/01/11

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանը

նախագահող դատավոր Լ. Ավետիսյան
քարտուղարությամբ Ե.Կարապետյանի, Հ.Արտաշեսյանի,
Ն. Ղազարյանի
մասնակցությամբ`
մեղադրող Լ. Մանուկյանի
պաշտպաններ Ա. Առաքելյանի, Ս. Մկրտչյանի
ամբաստանյալ Ա.Կիրակոսյանի
օրինական ներկայացուցիչ Ռ. Կիրակոսյանի
տուժող Ա. Ներսեսյանի
տուժողի ներկայացուցիչ Է. Պողոսյանի


2012 թվականի փետրվարի 3-ին, Երևան քաղաքում, դռնբաց դատական նիստում, քննեց քրեական գործն ըստ մեղադրանքի`
1. Սերոբ Հովհաննեսի Բոզոյանի, ծնված 1993 թվականի հունվարի 23-ին, Շիրակի մարզի Փանիկ գյուղում, ազգությամբ հայ, ՀՀ քաղաքացի, ութամյա կրթությամբ, ամուրի, խնամքին ոչ ոք, նախկինում չդատված, չի աշխատել, հաշվառված է Շիրակի մարզի Փանիկ գյուղում, բնակվել է Երևան քաղաքի Վրացական փողոցի 9 շենքի թիվ 6 բնակարանում, մեղադրվում է ՀՀ քրեական օրենսգրքի 175 հոդվածի 2-րդ մասի 1-ին, 2-րդ, 3-րդ, 4-րդ կետերով, կալանքի տակ է 2011 թվականի հունիսի 7-ից,
2. անչափահաս Արման Ռաֆիկի Կիրակոսյանի, ծնված 1993 թվականի օգոստոսի 23-ին, Երևան քաղաքում, ազգությամբ հայ, ՀՀ քաղաքացի, ութամյա կրթությամբ, ամուրի, խնամքին ոչ ոք, չի աշխատել, նախկինում չդատված, հաշվառված և բնակվել է Երևան քաղաքի Բաշինջաղյան փողոցի 196 շենքի թիվ 12 բնակարանում, մեղադրվում է ՀՀ քրեական օրենսգրքի 175 հոդվածի 2-րդ մասի 1-ին, 2-րդ, 3-րդ, 4-րդ կետերով, կալանքի տակ է 2011 թվականի հունիսի 7-ից,

Պ Ա Ր Զ Ե Ց

1.Գործի դատավարական նախապատմությունը.
2011թ. հունիսի 07-ին ՀՀ ոստիկանության ՔԳՎ Երևան քաղաքի ՔՎ Արաբկիրի քննչական բաժնում ՀՀ քրեական օրենսգրքի 175 հոդվածի 2-րդ մասի 1-ին կետով նախատեսված հանցագործության հատկանիշներով հարուցվել է թիվ 14114611 քրեական գործը:
2011թ. հունիսի 10-ին Սերոբ Հովհաննեսի Բոզոյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 175 հոդվածի 2-րդ մասի 1-ին, 3-րդ կետերով, նրա նկատմամբ որպես խափանման միջոց է ընտրվել կալանավորումը:

2011թ. հունիսի 10-ին Արման Ռաֆիկի Կիրակոսյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 175 հոդվածի 2-րդ մասի 1-ին և 3-րդ կետերով, նրա նկատմամբ որպես խափանման միջոց է ընտրվել կալանավորումը:
2011թ. օգոստոսի 16-ին Սերոբ Հովհաննեսի Բոզոյանին առաջադրված մեղադրանքը փոփոխվել և նրան նոր մեղադրանք է առաջադրվել ՀՀ քրեական օրենսգրքի 175 հոդվածի 2-րդ մասի 1-ին, 2-րդ, 3-րդ, 4-րդ կետերով:
2011թ. օգոստոսի 18-ին Արման Ռաֆիկի Կիրակոսյանին առաջադրված մեղադրանքը փոփոխվել և նրան նոր մեղադրանք է առաջադրվել ՀՀ քրեական օրենսգրքի 175 հոդվածի 2-րդ մասի 1-ին, 2-րդ, 3-րդ, 4-րդ կետերով:
2011թ. օգոստոսի 23-ին թիվ 14114611 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
2.Գործի փաստական հանգամանքները.
Նախնական քննության մարմինն ամբաստանյալ Սերոբ Հովհաննեսի Բոզոյանին մեղադրանք է առաջադրել այն արարքի համար, որ նա ավազակային հարձակում կատարելու վերաբերյալ նախնական համաձայնության գալով անչափահաս Արման Ռաֆիկի Կիրակոսյանի հետ, 2011թ. մայիսի 27-ի լույս 28-ի գիշերը, ժամը 0300-ի սահմաններում նախապես զինված լինելով որպես զենք օգտագործվող առարկաներով` դանակներով, դիմակավորված, ցանկապատի վրայով ցատկելու միջոցով ապօրինի մուտք են գործել Երևանի քաղաքի Կոմիտասի պողոտայի 54/վ հասցեում գտնվող ՙԴԴԴ՚ մարզահամալիրի բակ, այնուհետև բակում գտնվող լողավազանի դռնով` մարզահամալիրի սրահ, որտեղ որպես պահակ աշխատող Արթուր Անդրուշի Ներսեսյանի կյանքի և առողջության համար վտանգավոր բռնություն գործադրելու սպառնալիք տալով, կպչուն ժապավենով կապելով վերջինիս ձեռքերը, մարզահամալիրի առաջին հարկում գտնվող սրահից հափշտակել են չհրկիզվող պահարանը և դիմել փախուստի` ՙԱռնադօ՚ ՍՊԸ-ին պատճառելով խոշոր չափի` 1.083.250 ՀՀ դրամի գույքային վնաս։
Նախնական քննության մարմինն ամբաստանյալ անչափահաս Արման Ռաֆիկի Կիրակոսյանին մեղադրանք է առաջադրել այն արարքի համար, որ նա նա ավազակային հարձակում կատարելու վերաբերյալ նախնական համաձայնության գալով Սերոբ Հովհաննեսի Բոզոյանի հետ 2011թ. մայիսի 27-ի լույս 28-ի գիշերը, ժամը 0300-ի սահմաններում նախապես զինված լինելով որպես զենք օգտագործվող առարկաներով` դանակներով, դիմակավորված, ցանկապատի վրայով ցատկելու միջոցով ապօրինի մուտք են գործել Երևանի քաղաքի Կոմիտասի պողոտայի 54/վ հասցեում գտնվող ՙԴԴԴ՚ մարզահամալիրի բակ, այնուհետև բակում առկա լողավազանի դռնով` մարզահամալիրի սրահ, որտեղ որպես պահակ աշխատող Արթուր Անդրուշի Ներսեսյանի կյանքի և առողջության համար վտանգավոր բռնություն գործադրելու սպառնալիք տալով, կպչուն ժապավենով կապելով վերջինիս ձեռքերը, մարզահամալիրի առաջին հարկում գտնվող սրահից հափշտակել են չհրկիզվող պահարանը և դիմել փախուստի` ՙԱռնադօ՚ ՍՊԸ-ին պատճառելով խոշոր չափի` 1.083.250 ՀՀ դրամի գույքային վնաս։
3.Ապացույցների հետազոտում.
Առաջադրված մեղադրանքում ամբաստանյալ Սերոբ Բոզոյանն իրեն մեղավոր ճանաչեց և հրաժարվելով ցուցմունք տալուց պնդեց նախաքննության ընթացքում տված ցուցմունքը: Միաժամանակ պնդեց, որ հափշտակված գումարը եղել է 450.000 ՀՀ դրամ: Նախաքննության ընթացքում տված խոստովանական ցուցմունքներով հայտնել է, որ հաշվառված է Շիրակի մարզի Փանիկ գյուղում, սակայն շուրջ երկու տարի է ընտանիքի՝ մոր՝ Կարինե Ասլանյանի և քրոջ՝ Ռիմա Բոզոյանի հետ միասին վարձակալական հիմունքներով բնակվում է Երևան քաղաքի Վրացական փողոցի 9 շենքի 6 բնակարանում: 2010թ. աշնանն աշխատանքի է ընդունվել ՙՄԱՊ՚ ընկերությունում որպես բանվոր։ Նշված ընկերությունում է աշխատել նաև Արման Ռաֆիկի Կիրակոսյանը։Ժամանակի ընթացքում իր և Արման Կիրակոսյանի հարաբերությունները մտերմացել են և իրենք սկսել են ընկերության անել։Հայտնել է նաև, որ իր բարեկամ Մուշեղ Գևորգի Դավթյանն աշխատում է Երևան քաղաքի Արաբկիրի վարչական շրջանում գտնվող ՙԴԴԴ՚ սպորտային համալիրում, որպես ադմինիստրատոր։Ինքը հաճախ Մուշեղին տեսնելու նպատակով գնացել է նրա աշխատանքի վայր։Մուշեղին այցելությունների ընթացքում նկատել է, որ նշված սպորտային համալիրում օրվա ընթացքում կուտակված գումարը պահվում է ադմինիստրացիայի զբաղեցրած սենյակում առկա չհրկիզվող պահարանի մեջ և որոշել է մի օր, հարմար առիթի դեպքում, գողանալ նշված չհրկիզվող պահարանը։Դրանից հետո ավելի ուշադիր է ուսումնասիրել սպորտային համալիրի տարածքը, պատկերացում կազմել դրա տեղակայման մասին և որոշել, որ սպորտային համալիր կարող է մուտք գործել դրսի կողմի պատուհանների միջոցով կամ դարպասի վրայով։Մտածել է նաև, որ հնարավոր չէ այդ գողությունը կատարել միայնակ, ուստի որոշել է իր մտահղացման մասին հայտնել Արման Կիրակոսյանին: 2011թ. մայիսի 27-ին ժամը 1900-ի սահմաններում, զանգահարել է Արման Կիրակոսյանին և հանդիպել Երևան քաղաքի Վրացական փողոցում: Մոտը եղած 3.000 ՀՀ դրամով օղի և ուտելիք է գնել ու Արման Կիրակոսյանի հետ միասին նստել են շենքերից մեկի բակում գտնվող բացօթյա տաղավարում և սկսել հաց ուտել ու օղի խմել։Այդ ընթացքում ինքը Արման Կիրակոսյանին պատմել է ՙԴԴԴ՚ սպորտային համալիրում գտնվող չհրկիզվող պահարանի և դրա մեջ գտնվող գումարի մասին ու վերջինս աոաջարկել է հափշտակել այն։Ինքը տվել է իր համաձայնությունն ու միասին որոշել են իրենց հետ նախապես վերցնել երկու հատ դանակ՝ սպորտային համալիրում հանդիպող հնարավոր դիմադրությունը կանխելու համար: Դրանից հետո գնացել է տուն, վերցրել երկու հատ դանակ՝ մեկը իր համար, մյուսը՝ Արմանի և մատնահետքեր չթողնելու նպատակով դեղատնից գնելով երկու զույգ բժշկական ձեոնոցներ, սպասել են վերը նշված բակի բացօթյա տաղավարում մինչև գիշերվա ժամը 03-ը և Վրացական փողոցից ոտքով գնացել դեպի ՙԴԴԴ՚ սպորտային համալիր: Տեղ հասնելով, ինքն ու Արման Կիրկաոսյանը ևս մեկ անգամ ուսումնասիրել են սպորտային համալիրի շենքը և տեսնելով, որ դրա պատուհանները փակ են, որոշել են մուտք գործել սպորտային համալիրի դարպասի վրայով: Այնուհետև ինքը և Արմանն իրենց հագին եղած շապիկները փաթաթելով գլուխներին այնպես, որ դեմքերը չերևա, մոտեցել են դարպասին և բարձրանալով դրա վրա, սկզբում ներս է մտել ինքը, ապա` Արման Կիրակոսյանը։Քիչ առաջանալով նկատել են, որ մոտակա սենյակում պահակակետ է, սակայն պահակը քնած է: Առաջ են գնացել ու լողավազանի միջով մոտեցել ադմինիստրացիայի զբաղեցրած սենյակին, որտեղ տեսել են, որ մեկ ուրիշ պահակ պառկած հեոուսատացույց է դիտում: Ինքն ու Արմանը մոտեցել են նշված պահակին, ով իրենց տեսնելով վեր է կացել տեղից, սակայն իրենք հանել են իրենց մոտ եղած դանակները, ի ցույց դրել նրան և ասել, որ եթե ձայն չհանի ու հանգիստ նստի, նրան չեն վնասի։ Այդ լսելով պահակը հանգիստ նստել է իր տեղում: Արման Կիրակոսյանը մոտեցել է նրան, բռնել հագուստի օձիքից և ձեռքում եղած դանակը ուղղել դեպի նա, իսկ ինքը մոտենալով պահակին սկոճով կապել է նրա ձեռքերը, որպեսզի չշարժվի: Դրանից հետո ինքն ու Արման Կիրկոսյանը պահակի հետ միասին բարձրացել են երկրորդ հարկ, սակայն պահակը ասել է, որ քիչ առաջ հյուր է ընդունել և հնարավոր է, որ նա աղմուկ բարձրացնի։ Այդ լսելով իրենք կրկին իջել են աոաջին հարկ, որտեղ ինքը փնտրել և ադմինիստրացիայի սեղանի հետևում գտել է չհրկիզվող պահարանն ու Արման Կիրակոսյանին ասել, որ գնա ու տաքսի գտնի։ Արման Կիրակոսյանը դուրս գալով սպորտային համալիրից, քիչ անց վերադարձել և ասել է, որ տաքսի չկա։Ինքը կրկին նրան առաջարկել է գնալ ու տաքսի գտնել։Քիչ անց Արման Կիրակոսյանը վերադարձել է արդեն տաքսի ավտոմեքենայով, որի մակնիշը և պետհամարանիշը չի հիշում: Պահակից տեղեկանալով, որ մուտքի դռան բանալին դռան վրա է, վերցրել են չհրկիզվող պահարանը, դուրս եկել սպորտային համալիրից և Արմանի օգնությամբ այն տեղադրել վերը նշված տաքսի ավտոմեքենայի մեջ։Այնուհետև պատվիրել են իրենց տանել Քանաքեռ, որպեսզի այնտեղից ուրիշ ավտոմեքենա նստեն` հետքը կորցնելու համար, սակայն հասնելով տեսել է, որ մոտը եղած գումարը չի բավականացնում տաքսու վարորդին վճարելու համար, զանգահարել է իր բարեկամ, Մալաթիա համայնքում բնակվող Դավիթ Բարսեղյանին, ապա գնացել է նրա մոտ` ավտոլվացման կետ և խնդրել իր փոխարեն վճարել տաքսու ուղեվարձը, պատճառաբանելով, որ մոտի գումարը չի բավականացնում։ Քիչ անց հասնելով Դ.Բարսեղյանի մոտ, վերջինս իրենց փոխարեն վճարել է տաքսու ուղեվարձը և իջնելով ավտոմեքենայից իջեցրել են նաև չհրկիզվող պահարանը։ Տաքսի ավտոմեքենայի հեռանալուց հետո ինքը ցանկացել է չհրկիզվող պահարանը տանել Դավիթ Բարսեղյանի ավտոլվացման կետ, սակայն վերջինս հավանաբար հասկանալով, որ դա հափշտակված է, թույլ չի տվել այն մտցնել ավտոլվացման կետ և իրենց առաջարկել Է հեռանալ: Դրանից հետո ինքն ու Արմանը գնացել են ավտոլվացման կետի մոտակայքում գտնվող ավտոկանգառ, գետնից գտել մի քանի հատ երկաթի կտոր և դրանց օգնությամբ բացել չհրկիզվող պահարանը, որի մեջ հայտնաբերել են 440.000 կամ 450.000 ՀՀ դրամ գումար ու ինչ որ փաստաթղթեր։Գումարը հավասար բաժանել են երկուսի միջև, այնուհետև իրենց մոտ եղած դանակները գցել են չհրկիզվող պահարանի մեջ, ձեռնոցները վառել ու գնացել են` յուրաքանչյուրն իրենց տուն։Հայտնել Է, որ հանցանքը կատարել են ինքը և Արման Կիրակոսյանը, այլ հանցակիցներ չկան, հանցագործության մասին այլ անձ չի իմացել։
Առաջադրված մեղադրանքում անչափահաս ամբաստանյալ Արման Կիրակոսյանն իրեն մեղավոր ճանաչեց և հրաժարվելով ցուցմունք տալուց պնդեց նախաքննության ընթացքում տված ցուցմունքը: Միաժամանակ պնդեց, որ հափշտակված գումարը եղել է 450.000 ՀՀ դրամ: Նախաքննության ընթացքում տված խոստովանական ցուցմունքներով հայտնել է, որ հաշվառված և բնակվում Է Երևանի Բաշինջաղյան փողոցի 196 շենքի 12 բնակարանում` ընտանիքի հետ միասին: 2010թ. աշնանն աշխատանքի է ընդունվել ՙՄԱՊ՚ ընկերությունում որպես բանվոր։ Նշված ընկերությունում աշխատել է նաև Սերոբ Բոզոյանը։Ժամանակի ընթացքում իրենք մտերմացել են և սկսել են ընկերություն անել։2011թ. մայիսի 27-ին, ժամը 1900-ի սահմաններում իրեն զանգահարել է Սերոբ Բոզոյանը և առաջարկել հանդիպել: Ինքը համաձայնել է և հանդիպել են Երևան քաղաքի Վրացական փողոցում։Դրանից հետո ինքն ու Սերոբ Բոզոյանը օղի և ուտելիք են գնել ու միասին նստել շենքերից մեկի բակում գտնվող բացօթյա տաղավարում ու սկսել հաց ուտել ու օղի խմել։Այդ ընթացքում Սերոբ Բոզոյանն իրեն պատմել է ՙԴԴԴ՚ սպորտային համալիրում գտնվող չհրկիզվող պահարանի և դրա մեջ գտնվող գումարի մասին: Ինքը նրան առաջարկել է հափշտակել նշված չհրկիզվող պահարանը։ Ստանալով Ս.Բոզոյանի համաձայնությունը, միասին որոշել են իրենց հետ նախապես վերցնել երկու հատ դանակ՝ սպորտային համալիրում հանդիպող հնարավոր դիմադրությունը հաղթահարելու համար և դեղատնից գնել են երկու զույգ բժշկական ձեռնոցներ` մատնահետքեր չթողնելու համար։Այնուհետև սպասել են վերը նշված բակի բացօթյա տաղավարում մինչև գիշերվա ժամը 03-ը և Վրացական փողոցից ոտքով գնացել դեպի ՙԴԴԴ՚ սպորտային համալիր։Տեղ հասնելով, ինքն ու Սերոբ Բոզոյանը ևս մեկ անգամ ուսումնասիրել են սպորտային համալիրի շենքը և տեսնելով, որ դրա պատուհանները փակ են, որոշել են մուտք գործել սպորտային համալիրի դարպասի վրայով։Այնուհետև իրենց հագին եղած շապիկները փաթաթելով գլուխներին այնպես, որ իրենց դեմքերը չերևա, մոտեցել են դարպասին և բարձրանալով դրա վրա, սկզբում ներս է մտել Սերոբ Բոզոյանը, իսկ նրանից հետո՝ ինքը։Քիչ առաջանալով նկատել են, որ մոտակա սենյակում պահակակետ է, սակայն պահակը քնած է: Առաջ են գնացել ու լողավազանի միջով մոտեցել ադմինիստրացիայի սենյակին, որտեղ տեսել են, որ մեկ այլ պահակ պառկած հեռուսատացույց է դիտում։ Ինքը ու Սերոբ Բոզոյանը մոտեցել են նշված պահակին, ով իրենց տեսնելով վեր է կացել տեղից, սակայն իրենք հանել են իրենց մոտ եղած դանակաները, ի ցույց դրել նրան և ասել, որ եթե ձայն չհանի ու հանգիստ նստի, նրան չեն վնասի։ Այդ լսելով պահակը հանգիստ նստել է իր տեղում, ինքը մոտեցել է նրան, բռնել հագուստի օձիքից և ձեռքում եղած դանակն ուղղել դեպի նա ու ասել, որ ձեռքերն առաջ բերի ու կապել են նրա ձեռքերը, որպեսզի վերջինս չշարժվի: Դրանից հետո պահակի հետ միասին բարձրացել են երկրորդ հարկ, սակայն պահակը ասել է, որ քիչ առաջ հյուր է ընդունել և հնարավոր է, որ նա աղմուկ բարձրացնի։Այդ լսելով իրենք կրկին իջել են առաջին հարկ, որտեղ Սերոբը փնտրել և ադմինիստրացիայի սեղանի հետևում գտել է չհրկիզվող պահարանն ու իրեն ասել, որ գնա տաքսի գտնի։ Ինքը դուրս է եկել սպորտային համալիրից և քիչ անց վերադառնալով ասել, որ տաքսի չկա։ Սերոբը կրկին առաջարկել է գնալ ու տաքսի գտնել։Քիչ անց ինքը վերադարձել է արդեն տաքսի ավտոմեքենայով, որի մակնիշը և պետհամարանիշը չի հիշում։Դրանից հետո Սերոբ Բոզոյանը վերցրել է չհրկիզվող պահարանը, դուրս եկել սպորտային համալիրից և իր օգնությամբ այն տեղադրել վերը նշված տաքսի ավտոմեքենայի մեջ։Այնուհետև տաքսու վարորդին պատվիրել են իրենց տանել Քանաքեռ, որպեսզի այնտեղից ուրիշ ավտոմեքենա նստեն` հետքը կորցնելու համար, սակայն Սերոբը ասել է, որ մոտը եղած գումարը չի բավականացնի տաքսու վարորդին վճարելու համար ու առաջարկել է գնալ իր բարեկամ, Մալաթիա համայնքում բնակվող Դավթի մոտ։Քիչ անց հասել են Դավթի մոտ, վերջինս Սերոբի խնդրանքով իրենց փոխարեն վճարել է տաքսու ուղեվարձը: Իջել են ավտոմեքենայից իրենց հետ իջեցնելով նաև չհրկիզվող պահարանը: Տաքսի ավտոմեքենայի հեռանալուց հետո Սերոբը ցանկացել է չհրկիզվող պահարանը տանել Դավթի ավտոլվացման կետ, սակայն վերջինս, երևի հասկանալով, որ դա հափշտակված է, թույլ չի տվել այն մտցնել ավտոլվացման կետ և իրենց աոաջարկել է հեռանալ։Դրանից հետո ինքն ու Սերոբը գնացել են ավտոլվացման կետի մոտակայքում գտնվող ավտոկանգառ, գետնից գտել են մի քանի հատ երկաթե առարկաներ և դրանց օգնությամբ բացել չհրկիզվող պահարանը, որի մեջ հայտնաբերել են 440.000 կամ 450.000 ՀՀ դրամ գումար ու ինչ որ փաստաթղթեր։Գումարը ինքն ու Սերոբը հավասար բաժանել են երկուսի միջև, այնուհետև իրենց մոտ եղած դանակները գցել են չհրկիզվող պահարանի մեջ, ձեռնոցները վառել ու գնացել են` յուրաքանչյուրն իրենց տուն: Հայտնել է, որ հանցագործությունը կատարել են միայն ինքը և Սերոբ Բոզոյանը, վերջինս իրեն չի հայտնել, թե որտեղից գիտի ՙԴԴԴ՚ սպորտային համալիրում առկա չհրկիզվող պահարանի մասին, այլ հանցակիցներ չեն եղել։
Ամբաստանյալներին առաջադրված մեղադրանքները հիմնավորվել է նաև գործով ձեռք բերված հետևյալ ապացույցներով.
Տուժող Արթուր Ներսեսյանի ցուցմունքով այն մասին, որ 2010թ. նոյեմբեր ամսից աշխատում է Երևան քաղաքի Կոմիտասի պողոտայի 54/վ հասցեում գտնվող ՙԴԴԴ՚ մարզահամալիրում, որպես պահակ։Աշխատանքի բնույթն ու էությունը կայանում է նրանում, որ մարզահամալիրի հյուրերի և աշխատակիցների գնալուց հետո հսկում է համալիրի ներսը: Աշխատանքն օրը մեջ է, սկսվում է երեկոյան ժամը 1700-ին և ավարտվում հաջորդ օրը ժամը 0830-ին։2011թ. մայիսի 27-ին ինքը հերթական անգամ գնացել է աշխատանքի։Արդեն մայիսի 27-ի լույս 28-ի գիշերը ժամը 03-ի սահմաններում ինքը ՙԴԴԴ՚ մարզահամալիրի առաջին հարկի սրահում կիսապառկած վիճակում հեռուստացույց դիտելիս է եղել, երբ նշված սրահի հետևի դռնից վերնաշապիկներով դեմքները փաթաթած, ձեռքերին դանակներ բռնած, երկու երիտասարդ տղաներ հարձակվել են իր վրա ու ասել, որ գլուխը ներքև պահի ու չնայի իրենց, այնուհետև ասել, որ ինքը չշարժվի ու ձայն չհանի, հակառակ դեպքում` դանակով կհարվածեն: Այնուհետև պահանջել են ՙԴԴԴ՚ մարզահամալիրում առկա փողերը։Ինքը նրանց պատասխանել է, որ ընդհամենը պահակ է աշխատում, որ իրենց մոտ գումար չի լինում, քանի որ ադմինիստրացիայի աշխատակիցները գումարները և բանալիները հանձնում են տնօրինությանը։ Պատասխանը լսելով այդ երկու տղաներն իրեն հրելով բարձրացրել են երկրորդ հարկ և իրենից պահանջել երրորդ հարկի բանալիները` տնօրենի սենյակ գնալու համար։ Նրանց պատասխանել է, որ բանալիները նույնպես գտնվում են տնօրենի մոտ: Այդ ժամանակ նրանցից մեկը բռնել է իր հագին եղած վերնաշապիկի օձիքից, դանակը դրել պարանոցին ու պահանջել, որ ձեռքերն առաջ պահի: Ինքը կատարել է նրանց պահանջը և այդ տղաներից ավելի ցածրահասակը ձեռքերը սկոճով կապել է իրար։Այնուհետև նրանք փորձել են քաշել կոտրելով բացել երրորդ հարկի դուռը, սակայն նրանց ասել է, որ այնտեղ հյուրեր կան և կարող է աղմուկ բարձրանալ։ Այդ լսելով տղաներն իրեն կրկին հրելով իջեցրել են առաջին և երկրորդ հարկերի աստիճանահարթակի մոտ։ Նրանցից մեկը դանակը ձեռքին մնացել է իր մոտ, իսկ մյուսն անջատել է աստիճանահարթակի լույսերը և սկսել փնտրել առաջին հարկի ադմինիստրացիայի սեղանի մոտակայքում։Քիչ անց նա ձայն է տվել, իր մոտ գտնվող տղային, ասելով. ՙստե սեյֆ կա՚: Այդ լսելով իր մոտ գտնվող տղան իր հետ միասին իջել է ներքև և ինքը տեսել է, որ չհրկիզվող պահարանը մուտքի դռան մոտ է։Դրանից հետո չհրկիզվող պահարանը գտած տղան իրեն պահող տղային ասել է, որ գնա տաքսի գտնելու։ Վերջինս դուրս է եկել մարզահամալիրից և քիչ անց վերադառնալով հայտնել, որ տաքսի չկա։Չհրկիզվող պահարանը գտած տղան կրկին նրան առաջարկել է գնալ ու տաքսի գտնել և վերջինս կրկին դուրս է եկել մարզահամալիրից։ Քիչ անց իր մոտ մնացած տղան կրկին ասել է, որ երեք րոպե չշարժվի ու ձայն չհանի, աչքերը չբացի, թե չէ դանակով կխփի և չհրկիզվող պահարանը վերցնելով դուրս է եկել: Մոտ երեք րոպե անց ինքը աչքերը բացել է և տեսնելով, որ իր մոտ մարդ չկա, վազել է դռան մոտ, փակել այն և միացրել անվտանգության համակարգը, որը հաղորդագրություն է ուղարկում տնօրենի ձեռքի բջջային հեռախոսին։Քիչ անց զանգահարել է տնօրենը և հարցրել, թե ինչ է պատահել և ինքը նրան պատմել է եղելությունը։Իր վրա հարձակված և չհրկիզվող պահարանը հափշտակած երիտասարդ տղաները եղել են երկու հոգի, նրանց հետ որևէ այլ անձ չի տեսել։Իր վրա հարձակված տղաներն իրեն չեն հարվածել, այլ սպառնացել են, որ ձայն հանելու դեպքում կդանակահարեն։ Այդ սպառնալիքն իրական է ընդունել և շատ է վախեցել, սակայն մարմնական վնասվածքներ չի ստացել։Այդ տղաները բարձրահասակ են եղել, իսկ նրանց հագին եղել է սև գույնի հագուստներ։ Նրանց որևէ այլ կերպ նկարագրել չի կարող։
Տուժողի ներկայացուցիչ էդուարդ Պողոսյանի ցուցմունքով այն մասին, որ 2002 թվականից աշխատում է ՙԱՌՆԱԴՕ՚ ՍՊԸ-ում, որպես տնօրեն։Հայտնել է, որ ՍՊԸ-ի կողմից Երևանի Կոմիտաս պողոտայի 54/վ հասցեում գործող ՙԴԴԴ՚ մարզահամալիրում մատուցվող լողավազանի, ֆիթնեսի և այլ ծառայությունների արդյունքում կուտակված օրվա գումարը պահում են մարզահամալիրի առաջին հարկում գտնվող սրահում։2011թ. մայիսի 27-ի լույս 28-ի գիշերը, ժամը 0315-ից 0330-ն ընկած ժամանակահատվածում իր բջջային հեռախոսին ահազանգ է եկել, խոսել է մարզահամալիրի պահակ Արթուր Ներսեսյանի հետ և տեղեկացել, որ վերջինիս նկատմամբ կատարվել է ավազակային հարձակում ու հափշտակվել է չհրկիզվող պահարանը։95.000 ՀՀ դրամ արժողության չհրկիզվող պահարանում եղել է 988.250 ՀՀ դրամ գումար, այսինքն ՍՊԸ-ին պատճառվել է ընդհանուրը 1.083.250 ՀՀ դրամի գույքային վնաս։Հետագայում ոստիկանաթյունից տեղեկացել է, որ ավազակային հարձակումը կատարել են Սերոբ Բոզոյանը և Արման Կիրակոսյանը։
Առերես հարցաքննության արձանագրություններով, որի ընթացքում տուժողի ներկայացուցիչ էդուարդ Պողոսյանը պնդել է իր ցուցմունքները Սերոբ Բոզոյանին և Արման Կիրակոսյանին առերես։
Առերես հարցաքննության արձանագրությամբ, որի ընթացքում Սերոբ Բոզոյանը պնդել է իր ցուցմունքները Արման Կիրակոսյանին առերես։
Քննչական փորձարարության արձանագրություններով, որի ընթացքում Ս. Բոզոյանը և անչափահաս Ա. Կիրակոսյանը մատնացույց են արել դեպքի վայրը։
Սերոբ Բոզոյանին և անչափահաս Արման Կիրակոսյանին բերման և անձնական խուզարկության ենթարկելու մասին արձանագրություններով։
4.Դատարանի իրավական վերլուծությունները.
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Սերոբ Հովհաննեսի Բոզոյանին առաջադրված մեղադրանքը ՀՀ քրեական օրենսգրքի 175 հոդվածի 2-րդ մասի 1-ին, 2-րդ, 3-րդ, 4-րդ կետերով հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 175 հոդվածի 2-րդ մասի 1-ին, 2-րդ, 3-րդ, 4-րդ կետերի հատկանիշներին և արարքի որակումը ճիշտ է:
Ամբաստանյալ Արման Ռաֆիկի Կիրակոսյանին առաջադրված մեղադրանքը ՀՀ քրեական օրենսգրքի 175 հոդվածի 2-րդ մասի 1-ին, 2-րդ, 3-րդ, 4-րդ կետերով հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 175 հոդվածի 2-րդ մասի 1-ին, 2-րդ, 3-րդ, 4-րդ կետերի հատկանիշներին և արարքի որակումը ճիշտ է:
Ամբաստանյալներ Սերոբ Հովհաննեսի Բոզոյանի, Արման Ռաֆիկի Կիրակոսյանի նկատմամբ պատիժ նշանակելիս, դատարանը հաշվի է առնում նրանց կատարած արարքների հանրության համար վտանգավորության աստիճանը, ինչպես նաև հանցավորների անձը:
Որպես ամբաստանյալ Սերոբ Հովհաննեսի Բոզոյանի անձը դրականորեն բնութագրող, պատասխանատվությունը և պատիժը մեղմացնող հանգամանքներ դատարանը հաշվի է առնում այն, որ նա հանցանքն ընդունել և զղջում է կատարածի համար, նախկինում դատված չի եղել, բնութագրվում է դրական, միակողմանի ծնողազուրկ է, հատուցվել է հանցագործությամբ պատճառված վնասը:
Ամբաստանյալ Սերոբ Բոզոյանի պատասխանատվությունը և պատիժը ծանրացնող հանգամանքներ չկան:
Որպես ամբաստանյալ Արման Ռաֆիկի Կիրակոսյանի անձը դրականորեն բնութագրող, պատասխանատվությունը և պատիժը մեղմացնող հանգամանքներ դատարանը հաշվի է առնում այն, որ նա հանցանքն ընդունել և զղջում է կատարածի համար, հանցանքը կատարելու պահին անչափահաս է եղել, նախկինում դատված չի եղել, հատուցվել է հանցագործությամբ պատճառված վնասը:
Ամբաստանյալ Արման Կիրակոսյանի պատասխանատվությունը և պատիժը ծանրացնող հանգամանքներ չկան:
Կատարած արարքների համար ամբաստանյալներ Սերոբ Հովհաննեսի Բոզոյանը, Արման Ռաֆիկի Կիրակոսյանը ենթակա են քրեական պատասխանատվության և պատժի:
Հաշվի առնելով Սերոբ Հովհաննեսի Բոզոյանի և Արման Ռաֆիկի Կիրակոսյանի կատարած արարքների հանրության համար վտանգավորության աստիճանը և բնույթը, նրանց անձը, ինչպես նաև այն, որ ՀՀ քրեական օրենսգրքի 175 հոդվածի 2-րդ մասի սանկցիայով նախատեսված է պատիժ միայն ազատազրկման ձևով, դատարանը գտնում է, որ պատժի նպատակներին հասնելու համար Սերոբ Բոզոյանի և Արման Կիրակոսյանի նկատմամբ ՀՀ քրեական օրենսգրքի 175 հոդվածի 2-րդ մասի 1-ին, 2-րդ, 3-րդ, 4-րդ կետերով նախատեսված արարք կատարելու համար պատիժ պետք է նշանակել ազատազրկման ձևով, որը նրանք պետք է կրեն ՀՀ ԱՆ համապատասխան քրեակատարողական հիմնարկում, իսկ նրանց նկատմամբ կիրառված խափանման միջոցը պետք է թողնել անփոփոխ, մինչև դատավճռի օրինական ուժի մեջ մտնելը:
Դատարանը քննության առնելով ամբաստանյալների նկատմամբ ՀՀ քրեական օրենսգրքի 175 հոդվածի 2-րդ մասով նախատեսված լրացուցիչ պատիժ` գույքի բռնագրավում նշանակելու հարցը, գտավ, որ նրանց նկատմամբ գույքի բռնագրավում չպետք է նշանակել:
Դատարանը գտնում է, որ տուժող ՙԱռնադօ՚ ՍՊ ընկերության ներկայացուցիչ Էդուարդ Պողոսյանի և տուժող Արթուր Ներսեսյանի քաղաքացիական հայցերի հարցը պետք է համարել լուծված, քանի որ դատական քննության ժամանակ Էդուարդ Պողոսյանը հայտնել է, որ ամբաստանյալների հարազատների կողմից հանցագործությամբ պատճառված վնասն ամբողջությամբ վերականգնվել է և որևէ նյութական պահանջ չունի: Արթուր Ներսեսյանը նույնպես հայտնել է, որ նյութական պահանջ չունի:
Դատարանը գտնում է, որ խուզարկությամբ ամբաստանյալ Սերոբ Հովհաննեսի Բոզոյանի մոտ հայտնաբերված ՙNOKIA՚ տեսակի բջջային հեռախոսը և հեռախոսաքարտը, ակնոցը, ՙLENGINES՚ գրառումով ձեռքի ժամացույցը և 1000 ՀՀ դրամը պետք է վերադարձնել Սերոբ Բոզոյանին: Խուզարկությամբ ամբաստանյալ Արման Ռաֆիկի Կիրակոսյանի մոտ հայտնաբերված ՙBeeline՚ տեսակի բջջային հեռախոսը և հեռախոսաքարտը պետք է վերադարձնել Արման Կիրակոսյանին:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 357-360, 365, 369-372 հոդվածներով, դատարանը

Վ Ճ Ռ Ե Ց

Սերոբ Հովհաննեսի Բոզոյանին մեղավոր ճանաչել ՀՀ քրեական օրենսգրքի 175 հոդվածի 2-րդ մասի 1-ին, 2-րդ, 3-րդ, 4-րդ կետերով և նրան դատապարտել ազատազրկման յոթ (7) տարի ժամկետով` առանց գույքի բռնագրավման:
Պատժի սկիզբը հաշվել 2011 թվականի հունիսի 7-ից:
Պատիժը պետք է կրի ՀՀ ԱՆ համապատասխան քրեակատարողական հիմնարկում:
Սերոբ Հովհաննեսի Բոզոյանի նկատմամբ որպես խափանման միջոց ընտրված կալանավորումը թողնել անփոփոխ, մինչև դատավճռի օրինական ուժի մեջ մտնելը:
Արման Ռաֆիկի Կիրակոսյանին մեղավոր ճանաչել ՀՀ քրեական օրենսգրքի 175 հոդվածի 2-րդ մասի 1-ին, 2-րդ, 3-րդ, 4-րդ կետերով և նրան դատապարտել ազատազրկման վեց (6) տարի վեց (6) ամիս ժամկետով` առանց գույքի բռնագրավման:
Պատժի սկիզբը հաշվել 2011 թվականի հունիսի 7-ից:
Պատիժը պետք է կրի ՀՀ ԱՆ համապատասխան քրեակատարողական հիմնարկում:
Արման Ռաֆիկի Կիրակոսյանի նկատմամբ որպես խափանման միջոց ընտրված կալանավորումը թողնել անփոփոխ, մինչև դատավճռի օրինական ուժի մեջ մտնելը:
Տուժող ՙԱռնադօ՚ ՍՊԸ ներկայացուցիչ Էդուարդ Պողոսյանի և տուժող Արթուր Ներսեսյանի քաղաքացիական հայցերի հարցը համարել լուծված:
Սերոբ Հովհաննեսի Բոզոյանի ՙNOKIA 2700՚ տեսակի բջջային հեռախոսն ու հեռախոսաքարտը, ակնոցը, ՙLENGINES՚ գրառումով ձեռքի ժամացույցը և 1000 ՀՀ դրամը վերադարձնել Սերոբ Բոզոյանին:
Արման Ռաֆիկի Կիրակոսյանի ՙBeeline՚ տեսակի բջջային հեռախոսը և հեռախոսաքարտը վերադարձնել Արման Կիրակոսյանին:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակվելու օրվանից հետո մեկամսյա ժամկետում:

Դատավոր` ստորագրություն
Բնագրի հետ ճիշտ է
Դատավոր Լ. Ավետիսյան