ԵԱՔԴ/0110/01/11
Ո Ր Ո Շ ՈՒ Մ

ԱՆՄԵՂՍՈՒՆԱԿ ՎԻՃԱԿՈՒՄ ՔՐԵԱԿԱՆ ՕՐԵՆՔՈՎ
ՉԹՈՒՅԼԱՏՐՎԱԾ ԱՐԱՐՔ ԿԱՏԱՐԱԾ ԱՆՁԻ ՆԿԱՏՄԱՄԲ ԲԺՇԿԱԿԱՆ
ԲՆՈՒՅԹԻ ՀԱՐԿԱԴՐԱԿԱՆ ՄԻՋՈՑ ԿԻՐԱՌԵԼՈՒ ՄԱՍԻՆ


11 օգոստոսի 2011թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների
առաջին ատյանի դատարանը

նախագահող դատավոր Լ. Ավետիսյան
քարտուղարությամբ Ե. Կարապետյանի
մասնակցությամբ
դատախազ Ռ. խաչատրյանի
Գ.Գրիգորյանի օրինական ներկայացուցիչ Հ. Գրիգորյանի
պաշտպան Ս. Գրիգորյանի
փորձագետ Ս. Թադևոսյանի


դռնբաց դատական նիստում քննեց Գրիգոր Գրիշայի Գրիգորյանի (ծնված 1974 թվականի ապրիլի 23-ին, Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուսնալուծված, նախկինում դատված, դատվածությունը մարված, չի աշխատել, հաշվառված է Երևան քաղաքի Նորքի 2-րդ փողոցի 3-րդ տանը) նկատմամբ բժշկական բնույթի հարկադրական միջոց կիրառելու մասին գործը:
1. Գործի դատավարական նախապատմությունը.
2007թ. հոկտեմբերի 8-ին ՀՀ ոստիկանության Արաբկիրի քննչական բաժանում ՀՀ քրեական օրենսգրքի 112 հոդվածի 2-րդ մասի 1-ին կետով, 235 հոդվածի 1-ին մասով նախատեսված հանցագործության հատկանիշներով հարուցվել է թիվ 14119907 քրեական գործը:
2007թ. հոկտեմբերի 11-ին Գրիգոր Գրիշայի Գրիգորյանը ներգրավվել է որպես մեղադրյալ ՀՀ քրեական օրենսգրքի 34-104 հոդվածի 2-րդ մասի 1-ին կետով և 235 հոդվածի 1-ին մասով այն արարքի համար, որ նա 2007թ. հոկտեմբերի 7-ին, ժամը 23-ի սահմաններում Երևան քաղաքի Կոմիտասի պողոտայի 16 շենքի բակում գործով դեռևս չպարզված անձի հետ ատրճանակներից կրակել է Ջնդի Ամարյանի և նրա աներորդի Ջամալ Ավդալյանի վրա, փորձելով դիտավորությամբ նրանց կյանքից զրկել և դիմել փախուստի£ Կատարվածի արդյունքում Ջ.Ամարյանը ստացել է աջ սրունքի փոքր ոլոքի կոտրվածք, իսկ Ջ.Ավդալյանը աջ ձեռքի և աջ գոտկային շրջանի թափանցող հրազենային վնասվածք£
2007թ. հոկտեմբերի 11-ին Գրիգոր Գրիշայի Գրիգորյանի նկատմամբ հայտարարվել է հետախուզում:
2007թ. հոկտեմբերի 12-ին Գրիգոր Գրիշայի Գրիգորյանի նկատմամբ որպես խափանման միջոց ընտրվել է կալանավորումը:
2010թ. մայիսի 10-ին Գրիգոր Գրիշայի Գրիգորյանը ձերբակալվել է Իսպանիայի իրավապահ մարմինների կողմից:
2010թ. դեկտեմբերի 11-ին Գրիգոր Գրիշայի Գրիգորյանը ներկայացվել է Արաբկիրի քննչական բաժին:
2010թ. դեկտեմբերի 13-ին Գրիգոր Գրիշայի Գրիգորյանի նկատմամբ որպես խափանման միջոց ընտրված կալանքը վերահաստատվել է:
2011թ. մայիսի 23-ին թիվ 14119907 քրեական գործով մեղադրյալ Գրիգոր Գրիշայի Գրիգորյանի նկատմամբ հարուցվել է բժշկական բնույթի հարկադրական միջոցներ կիրառելու վարույթ: Մեղադրյալ Գրիգոր Գրիշայի Գրիգորյանի նկատմամբ ընտրված խափանման միջոցը` կալանավորումը վերացվել է և նրա նկատմամբ որպես անվտանգության միջոց կիրառվել է հատուկ տիպի հոգեբուժական հիվանդանոցում տեղավորելը:
2011թ. հուլիսի 18-ին որոշում է կայացվել անհայտ անձի կողմից Գ.Գրիգորյանի հետ Ջ.Ամարյանի և Ջ.Ավդալյանի նկատմամբ սպանության փորձ կատարելու` ՀՀ քրեական օրենսգրքի 34-104 հոդվածի 2-րդ մասի 1-ին կետի և 235 հոդվածի 1-ին մասի հատկանիշներով մաս անջատելու մասին և շնորհվել է թիվ 14119111 քրեական գործի համարը:
2011 թվականի հուլիսի 26-ին Գրիգոր Գրիշայի Գրիգորյանի նկատմամբ բժշկական բնույթի հարկադրական միջոցներ կիրառելու համար գործն ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների առաջին ատյանի դատարան:
2. Ապացույցների հետազոտում և գնահատում.
Նախնական քննության ընթացքում որպես մեղադրյալ հարցաքննվելիս Գրիգոր Գրիշայի Գրիգորյանն իր ցուցմունքներով հայտնել է, որ առաջադրված մեղադրանքում իրեն մեղավոր չի ճանաչում, քանի որ ինքը չի հիշում, որ երբևէ որևէ մեկի վրա կրակել Է հրազենից, չի ճանաչում տուժողներ Ջ.Ամարյանին և Ջ.Ավդալյանին, միայն աղոտ հիշում Է, որ Մոսկվա քաղաքում ինչ-որ մարդիկ իրեն կտտանքների են ենթարկել:
Տուժող Ջամալ Ավդալյանի ցուցմունքներով այն մասին, որ ինքն ի վիճակի է ճանաչելու, այդ թվում նաև լուսանկարով, իր և Ջ.Ամարյանի վրա դեպքի օրը կրակող անձանցից մեկին, որը շուրջ 27 տարեկան, ճակատի թեթև ճաղատությամբ իր հասակի անձնավորություն է: Ինքը հաստատապես պնդում է, որ Գ.Գրիգորյանն է կրակել դեպքի օրը իրենց վրա, որին 1998-1999թթ. ընթացքում տեսել և ճանաչել է Մոսկվա քաղաքի ՙԲիցևսկի՚ շուկայից, նրա մականունը ՙԱպար՚ է և որ նա բնակվում է Երևանի Նորք թաղամասում: Ինքը հաստատապես պնդում է, որ դեպքի վայրում իր և Ջ.Ամարյանի վրա առաջինը ատրճանակից կրակել է Գրիգոր Գրիգորյանը:
Որպես վկա հարցաքննված Գ.Գրիգորյանի հորաքույր Հայկանուշ Գրիգորյանն իր ցուցմունքով հայտնել է, որ Գ.Գրիգորյանը դեռևս 1998թ-ից Մոսկվա քաղաքում ծանոթ է եղել Ջնդի Ամարյանի հետ, իսկ հետագայում Ջ.Ամարյանը առևանգել է Գ.Գրիգորյանին, մի քանի օր փակել է նրան մի բնակարանում, որտեղ կտտանքների է ենթարկել նրան£ Գ.Գրիգորյանը իրեն բազմիցս ասել է, որ պետք է վրեժ լուծի Ջ.Ամարյանից£
Անձին լուսանկարով ճանաչման ներկայացնելու 09.10.2007թ. արձանագրությամբ այն մասին, որ տուժող Ջամալ Ավդալյանը ներկայացված թվով 4 լուսանկարներից մատնացույց է արել Գ.Գրիգորյանի լուսանկարը, հայտնելով որ դեպքի օրն իրենց վրա կրակող անձանցից մեկը հանդիսացել է Գրիգոր Գրիգորյանը:
Գրիգոր Գրիշայի Գրիգորյանը 02.12.2003թ. հաշվառված է ՀԲԿ Ավանի կլինիկայում և հանդիսանում է 2-րդ խմբի հաշմանդամ /համաձայն թիվ 2937/2110 ամբուլատոր քարտի/:
Գրիգոր Գրիշայի Գրիգորյանը 10.01.05-13.01-05թ. և 05.03.07թ.-13.03.07թ. գտնվել է Նորքի հոգեբուժական կլինիկայում ստացիոնար բուժման մեջ ՙԱնձի օրգանական խանգարում, աֆեկտիվ զառանցական համախտանիշ սուիցիդալ փորձերով՚ և ՙԱնձի շիզոիդ խանգարում, աֆեկտիվ զառանցանքային դեկոմպեսացիաներով, անամնեզում սուիցիդալ փորձեր՚ ախտորոշումներով /համաձայն Նորքի հոգեբուժական կլինիկայի թիվ 68 և թիվ 248 հիվանդության պատմագրերի/:

Համալիր ստացիոնար դատահոգեբուժական և դատահոգեբանական փորձաքննության 2011թ. մայիսի 05-ի թիվ 74 եզրակացության համաձայն, Գրիգոր Գրիշայի Գրիգորյանի մոտ հայտնաբերվել է ՙՀետտրավմատիկ սթրեսային խանգարում անձի խրոնիկական փոփոխություններով և աֆեկտիվ անկայունությամբ գլխուղեղի օրգանական ախտահարման ֆոնի վրա /անամնեզում ինքնասպանության փորձեր/՚: Այդ մասին են վկայում ինչպես անամնետիկ տվյալները, այնպես էլ ներկա հետազոտման արդյունքները: Ինչպես իրավախախտումը կատարելիս, այնպես էլ ներկայումս Գրիգոր Գրիգորյանը գտնվել է վերը նշված հիվանդագին խանգարված վիճակում, որը զրկել և զրկում է նրան իր գործողությունների վտանգավորությունը գիտակցելու և դրանք ղեկավարելու հնարավորությունից: Նախկինում նրա նկատմամբ կիրառված կտտանքները էականորեն ազդել են նրա հոգեկանի վրա, ավելի խորացրել են նրա մոտ առկա հոգեկան հիվանդությունը, որն էլ ակնհայտորեն ազդել է նրա հետագա վարքի և գիտակցության վրա: Ուստի իրեն մեղսագրվող արարքի նկատմամբ Գրիգոր Գրիշայի Գրիգորյանին հարկ է ճանաչել անմեղսունակ: Իր ներկա հոգեկան վիճակով նա չի կարող մասնակցել դատաքննչական գործողություններին, բարձր սոց. վտանգ է ներկայացնում ինչպես իր, այնպես էլ շրջապատի համար, կարիք ունի հարկադրական բուժման հատուկ հսկողության հոգեբուժական բաժանմունքի պայմաններում:
Կրկնակի համալիր ստացիոնար դատահոգեբուժական և դատահոգեբանական փորձաքննության 2011թ. հուլիսի 11-ի թիվ 104 եզրակացության համաձայն, Գրիգոր Գրիշայի Գրիգորյանի մոտ հայտնաբերվել է ՙՀետտրավմատիկ ստրեսային խանգարում անձի խրոնիկական փոփոխություններով և աֆեկտիվ անկայունությամբ գլխուղեղի օրգանական ախտահարման ֆոնի վրա /անամնեզում ինքնասպանության փորձեր/՚: Այդ մասին են վկայում ինչպես անամնետիկ տվյալները, այնպես էլ ներկա հետազոտության արդյունքները: Նրա հոգեկան վիճակի վրա էականապես ազդել են նախկինում նրա նկատմամբ կիրառված կտտանքները, առավել խորացրել նրա մոտ առկա հոգեկան հիվանդությունը, ազդել նրա հետագա վարքի և գիտակցության վրա: Ինչպես իրավախախտումը կատարելիս, այնպես էլ ներկայումս Գրիգոր Գրիգորյանը գտնվել է վերը նշված հիվանդագին խանգարված վիճակում, որը զրկել և զրկում է նրան իր գործողությունների վտանգավորությունը գիտակցելու և դրանք ղեկավարելու հնարավորությունից: ՈՒստի իրեն մեղսագրվող արարքի նկատմամբ Գրիգոր Գրիշայի Գրիգորյանին հարկ է ճանաչել անմեղսունակ: Իր ներկա հոգեկան վիճակով նա չի կարող մասնակցել դատաքննչական գործողություններին, բարձր սոց.վտանգ է ներկայացնում ինչպես իր, այնպես էլ շրջապատի համար, կարիք ունի հարկադրական բուժման հատուկ հսկողության հոգեբուժական բաժանմունքի պայմաններում:
Օրինական ներկայացուցիչ ճանաչելու մասին 2011թ. մայիսի 23-ի որոշման համաձայն` Գրիգոր Գրիշայի Գրիգորյանի օրինական ներկայացուցիչ է ճանաչվել նրա հորաքույրը` Հայկանուշ Գրիգորյանը:
3. Դատարանի իրավական վերլուծությունները.
Վերոգրյալ ապացույցների հիման վրա դատարանը գալիս է այն եզրահանգման, որ Գրիգոր Գրիշայի Գրիգորյանը 2007թ. հոկտեմբերի 7-ին, ժամը 23-ի սահմաններում Երևանի Կոմիտաս պողոտայի 16 շենքի բակում գործով չպարզված անհայտ անձի հետ ատրճանակներից դիտավորությամբ կրակելով Ջնդի Ամարյանի և նրա աներորդի Ջամալ Ավդալյանի վրա, դիմել են փախուստի£ Ջ.Ամարյանը ստացել է աջ սրունքի փոք-ր ոլոքի կոտրվածք, իսկ Ջ.Ավդալյանը աջ ձեռքի և աջ գոտկային շրջանի թափանցող հրազենային վնասվածք£ Այսինքն` Գրիգոր Գրիշայի Գրիգորյանը կատարել է արարքներ, որը համապատասխանում է ՀՀ քրեական օրենսգրքի 34-104 հոդվածի 2-րդ մասի 1-ին կետի և 235 հոդվածի 1-ին մասի հատկանիշներին:
Քննարկելով հանցանքը կատարելու ժամանակ Գրիգոր Գրիշայի Գրիգորյանի մեղսունակության հարցը` դատարանը գտնում է, որ նա տառապում է ՙՀետտրավմատիկ ստրեսային խանգարում անձի խրոնիկական փոփոխություններով և աֆեկտիվ անկայունությամբ գլխուղեղի օրգանական ախտահարման ֆոնի վրա /անամնեզում ինքնասպանության փորձեր/՚ հոգեկան հիվանդությամբ և վերը նշված արարքը կատարելիս գտնվել է անմեղսունակ վիճակում, ինչը նրան զրկել և զրկում է իր գործողությունների վտանգավորությունը գիտակցելու և դրանք ղեկավարելու հնարավորությունից:
ՀՀ քրեական դատավարության օրենսգրքի 463 հոդվածի 4-րդ կետի համաձայն` դատարանը պետք է լուծի նաև այն հարցը, թե անձը կարիք ունի արդյոք իր նկատմամբ բժշկական բնույթի հարկադրական միջոցներ կիրառելու և հատկապես ինչպիսի միջոցներ:
ՀՀ քրեական դատավարության օրենսգրքի 464 հոդվածի 1-ին մասի համաձայն` անձի կողմից քրեական օրենքով չթույլատրված արարքն անմեղսունակության վիճակում կատարելն ապացուցված համարելով, դատարանը որոշում է կայացնում անձին քրեական պատասխանատվությունից և պատժից ազատելու ու նրա նկատմամբ բժշկական բնույթի հարկադրական միջոցներ կիրառելու մասին:
ՀՀ քրեական օրենսգրքի 97 հոդվածի 1-ին մասի 1-ին կետի համաձայն` բժշկական բնույթի հարկադրական միջոցներ դատարանը կարող է նշանակել այն անձի նկատմամբ, ով հանցանքը կատարել է անմեղսունակության վիճակում:
ՀՀ քրեական օրենսգրքի 98 հոդվածի 1-ին մասի համաձայն` բժշկական բնույթի հարկադրանքի միջոցներ են՝
1) հոգեբույժի մոտ արտահիվանդանոցային հսկողությունը և հարկադիր բուժումը
2) հոգեբուժական կազմակերպությունների ընդհանուր հսկողության հոգեբուժական բաժանմունքում հարկադիր բուժումը
3) հոգեբուժական հիվանդանոցի հատուկ տիպի հոգեբուժական բաժանմունքում հարկադիր բուժումը:
ՀՀ քրեական օրենսգրքի 100 հոդվածի 2-րդ մասի համաձայն` հոգեբուժական հիվանդանոցի հատուկ տիպի հոգեբուժական բաժանմունքում դատարանի որոշմամբ հարկադիր բուժում կարող է նշանակվել այն անձի նկատմամբ, ով հոգեկան վիճակով վտանգավոր է իր և այլ անձանց համար և պահանջում է մշտական հսկողություն:
Դատարանը, նկատի ունենալով, որ Գրիգոր Գրիշայի Գրիգորյանը տառապում է հոգեկան հիվանդությամբ, հոգեկան վիճակով վտանգավոր է իր և այլ անձանց համար և պահանջում է մշտական հսկողություն, գտնում է, որ նրան պետք է ազատել քրեական պատասխանատվությունից ու պատժից` նշանակելով հոգեբուժական հիվանդանոցի հատուկ տիպի հոգեբուժական բաժանմունքում հարկադիր բուժում:
Դատարանը գտնում է, որ 2008թ. ապրիլի 1-ի որոշումներով իրեղեն ապացույց ճանաչված և Արաբկիրի քննչական բաժնի իրեղեն ապացույցների պահման սենյակում գտնվող տուժողներ Ջամալ Ավդալյանի և Ջնդի Ամարյանի հագուստների տնօրինման հարցը պետք է թողնել լուծելու մասն անջատված թիվ 14119111 քրեական գործով:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 450, 457 և 462-464 հոդվածներով դատարանը

Ո Ր Ո Շ Ե Ց


Գրիգոր Գրիշայի Գրիգորյանին ազատել քրեական պատասխանատվությունից և պատժից:
Գրիգոր Գրիշայի Գրիգորյանի նկատմամբ նշանակել հարկադիր բուժում հոգեբուժական հիվանդանոցի հատուկ տիպի հոգեբուժական բաժանմունքում:
Գրիգոր Գրիշայի Գրիգորյանի նկատմամբ կիրառված անվտանգության միջոցը` հոգեբուժական հիվանդանոցում տեղավորելը, թողնել անփոփոխ` մինչև որոշման օրինական ուժի մեջ մտնելը:
2008 թվականի ապրիլի 1-ի որոշումներով իրեղեն ապացույց ճանաչված և Արաբկիրի քննչական բաժնի իրեղեն ապացույցների պահման սենյակում գտնվող տուժողներ Ջամալ Ավդալյանի և Ջնդի Ամարյանի հագուստների տնօրինման հարցը թողնել լուծելու մասն անջատված թիվ 14119111 քրեական գործով:
Որոշումը կարող է բողոքարկվել ՀՀ քրեական վերաքննիչ դատարան` հրապարակելու օրվանից մեկամսյա ժամկետում:



ԴԱՏԱՎՈՐ Լ. ԱՎԵՏԻՍՅԱՆ