Գործ ԵԱՔԴ/0103/01/11







Դ Ա Տ Ա Վ Ճ Ի Ռ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ


11 հոկտեմբերի 2011թ. ք.Երևան


Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը


Նախագահությամբ` դատավոր Մ.Խաչատրյանի
Քարտուղարությամբ` Հ.Արտաշեսյանի
Մասնակցությամբ`
Մեղադրող Վ.Մուրադյանի
Պաշտպան Ռ.Բալոյանի
Տուժող Ա.Ավանոսյան-Հաջի Աբադիի
Տուժողի իրավահաջորդ Զ.Ավանոսյան-Հաջի Աբադիի
Տուժողի և տուժողի
իրավահաջորդի ներկայացուցիչ Ն.Վարդանյանի
Ամբաստանյալ Ա.Գրիգորյանի



Դռնբաց դատական նիստում քննության առավ քրեական գործն ըստ մեղադրանքի`
Արտակ Ռոբերտի Գրիգորյանի` ծնված 17.07.1969թ Երևան քաղաքում, ազգությամբ հայ, ՀՀ քաղաքացի, բարձրագույն կրթությամբ, ամուսնացած, խնամքին երկու երեխա, նախկինում չդատված, աշխատում է ՀՀ ոստիկանության ՃՈ Երևան քաղաքի թիվ 2 հաշվառման քննական բաժանմունքում որպես տեսուչ, բնակվում է Երևան քաղաքի Ա.Խաչատրյան փողոցի 20-րդ շենքի 51 բնակարանում, մեղադրվում է ՀՀ քրեական օրենսգրքի 242-րդ հոդվածի 2-րդ մասով նախատեսված հանցագործության կատարման համար, կալանքի տակ է 2011 թվականի մայիսի 24-ից :
Դատաքննությամբ դատարանը.

Պ Ա Ր Զ Ե Ց

Նախաքննության մարմինը` Արտակ Ռոբերտի Գրիգորյանին ՀՀ քրեական օրենսգրքի 242-րդ հոդվածի 2-րդ մասով մեղադրանք է առաջադրել այն բանում, որ ՙավտոմեքենա վարելով` խախտել է ճանապարհային երթևեկության կանոնները, որն անզգուշությամբ առաջացրել է մարդու մահ:
Այսպես, ՀՀ ոստիկանության ՃՈ Երևան քաղաքի թիվ 2 հաշվառման քննական բաժանմունքի տեսուչ, ոստիկանության ավագ լեյտենանտ Արտակ Գրիգորյանը, 2011թ. մայիսի 24-ին` ժամը 00:30-ի սահմաններում, Երևան քաղաքի Կոմիտասի պողոտայի թիվ 16 շենքի դիմաց իրականացնելով իր վարած` ՙՏոյոտա-Պրադո՚ մակնիշի, 91NN999 պետհամարանիշի ավտոմոբիլի ոչ պատշաճ ու վտանգավոր կառավարում, այն է` ճանապարհի առանցքային զույգ հոծ գծանշման պայմաններում ավտոմոբիլը վարել է մասնակիորեն հանդիպակաց ուղեմասով և տվյալ պայմանների համար սահմանված թույլատրելի առավելագույնը գերազանցող արագությամբ, վրաերթի ենթարկել հետիոտներ Արփա ու Արթուր Զարեհի Ավանոսյան-Հաջի Աբադիներին, տեխնիկական տեսակետից ստեղծել է վթարային իրադրություն ու թույլ տվել ՙՃանապարհային երթևեկության անվտանգության ապահովման մասին՚ ՀՀ օրենքի 23-րդ հոդվածի 3-րդ կետի և Հայաստանի Հանրապետության ճանապարհային երթևեկության կանոնների 2-րդ, 53-րդ և 65-րդ կետերի պահանջներին հակասող գործողություններ, դրանով իսկ պայմանավորել տվյալ վրաերթի առաջացումըª ինքն իրեն զրկելով այն կանխելու տեխնիկական հնարավորությունից:
Վրաերթի հետևանքով Արթուր Զարեհի Ավանոսյան-Հաջի Աբադին, գիտակցության չգալով, նույն օրը մահացել է ՙԱրմենիա՚ բժշկական կենտրոնում, իսկ Արփա Զարեհի Ավանոսյան-Հաջի Աբադիի առողջությանն անզգուշությամբ պատճառվել է միջին ծանրության վնաս՚:
Առաջադրված մեղադրանքում Արտակ Գրիգորյանը նախաքննության փուլում իրեն մեղավոր է ճանաչել և խոստովանական ցուցմունք է տվել այն մասին, որ 2011թ. մայիսի 24-ին` ժամը 0030-ի սահմաններում, առանց բեռի և ուղևորի, տեխնիկապես սարքին վիճակում գտնվող ՙՏոյոտա-Պրադո՚ մակնիշի 91NN999 պետհամարանիշի ավտոմեքենան վարել է Երևան քաղաքի Կոմիտասի պողոտայով` Վաղարշյան փողոցի ուղղությամբ: Նշված ուղղությամբ և արագությամբ ընթանալիս թիվ 16 շենքի դիմաց գիշերային վատ տեսանելիության հետևանքով ուշ է նկատել հետիոտնի համար անցումը չթույլատրվող վայրում փողոցը հատող անչափահասներին ու վրաերթի ենթարկել նրանց: /Հատոր 1, գ.թ. 145-146/ :
Համանման ցուցմունք Արտակ Գրիգորյանը տվեց նաև դատաքննության ժամանակ:
Բացի ամբաստանյալ Արտակ Գրիգորյանի խոստովանական ցուցմունքից նրա մեղավորությունը ՀՀ քրեական օրենսգրքի 242-րդ հոդվածի 2-րդ մասով նախատեսված հանցագործության կատարման մեջ ապացուցված է նաև դատաքննությամբ հետազոտված հետևյալ ապացույցներով :
Գործով տուժող Արփա Զարեհի Ավանոսյան-Հաջի Աբադիի նախաքննական և դատաքննական ցուցմունքներով` այն մասին, որ 2011թ. մայիսի 24-ին` ժամը 0030-ի սահմաններում, եղբոր` Արթուր Զարեհի Ավանոսյան-Հաջի Աբադիի հետ ուղիղ գծով, աջից ձախ փորձել են ՙԱրևելյան Խոհանոց՚ ռեստորանային համալիրի դիմացի հատվածից հատել Կոմիտասի պողոտան: Ճանապարհի մյուս կողմում իրենց սպասել է հայրը` Զարեհ Ավանոսյան-Հաջի Աբադին: Երբ հասել են ճանապարհի կենտրոնական հատված, ձախ կողմից ուժեղ հարված է զգացել ու կորցրել գիտակցությունը: /Հատոր 1, գ.թ. 45-46/ :
Գործով տուժողի իրավահաջորդ Զարեհ Ավանոսյան-Հաջի Աբադիի նախաքննական և դատաքննական ցուցմունքներով` այն մասին, որ Արթուր և Արփա Ավանոսյան-Հաջի Աբադիները հանդիսանում են իր զավակները: 2011թ. մայիսի 24-ին` ժամը 0030-ի սահմաններում, զավակների հետ գնացել է Կոմիտասի պողոտայում տեղակայված ՙԱրևելյան Խոհանոց՚ ռեստորանային համալիրի դիմացի հատված, որտեղ երեխաները պայմանավորված են եղել իրենց ծանոթ Լիաննայի հետ` նախկին շանը նրանից հետ վերցնելու համար: Պայմանավորված վայր գնացել են իր անձնական օգտագործման ՙՎոլցվագեն Պասատ՚ մակնիշի, 21-435 պետհամարանիշի ավտոմեքենայով: Հասնելով ՙԱրևելյան Խոհանոց՚ ռեստորանային համալիրի դիմաց` ավտոմեքենան կանգնեցրել է դիմացի մայթում, իսկ երեխաները, իջնելով մեքենայից, հատել են Կոմիտասի պողոտան և անցել հանդիպակաց մայթ, որտեղ նրանց սպասել է Լիաննան: Այդ ընթացքում գտնվել է ավտոմեքենայի մեջ, իսկ ուշադրությունն ուղղված է եղել երեխաներին: Երեխաները, մոտենալով ռեստորանային համալիրի մուտքի մոտ իրենց սպասող Լիաննային, մի քանի րոպե խոսել են, որից հետո դուստրը գրկել է շանը և որդու հետ առանձնացել: Մի քանի րոպե անց, երբ Լիաննան հեռացել է, տեսել է, որ զավակները դանդաղ քայլերով մուտք են գործել Կոմիտասի պողոտա և նույն տեմպով, ուղիղ գծով, դանդաղ քայլելով հասել են հոծ գծերի մոտ: Հասնելով հոծ գծերի մոտ` երեխաները մի պահ կանգնել են, քանի որ իր ուղեմասով ավտոմեքենաներ են ընթացել: Երբ ուշադրությունն ամբողջությամբ ուղղված է եղել երթևեկությանը, նկատել է, որ Կասյան փողոցի կողմից, Կոմիտասի պողոտա է մուտք գործել ՙՋիպ՚ տեսակի ավտոմեքենա, որը շատ բարձր արագությամբ երթևեկել է հոծ գծերի վրայով: Վերջինիս նկատելուն պես ակնթարթորեն մտածել է, որ այն կարող է վրաերթի ենթարկել երեխաներին: Այդ պատճառով իջել է մեքենեայից ու բղավել ՙուշադրություն՚, սակայն այդ մեքենան, մոտ 150 կմ/ժ արագությամբ ընթանալով հոծ գծերի վրայով, հասել է զավակներին և իր աչքի առջև վրաերթի ենթարկել նրանց: Վրաերթի պահին երեխաները կանգնած են եղել հոծ գծերի վրա` դեմքով դեպի իրեն: Վրաերթից հետո հավաքվել են բազմաթիվ պատահական անցորդներ, ովքեր շտապօգնություն են կանչել: /Հատոր 1, գ.թ. 68-71/ :
Ինչ վերաբերվում է ամբաստանյալի շահերի պաշտպան փաստաբան Ռ.Բալոյանի միջնորդությանը տուժողի իրավահաջորդի Զարեհ Ավանոսյանի դատաքննության ժամանակ տրված ցուցմունքը ապացույցների շարքից հանելուն, ապա դատարանն արձանագրում է հետևյալը.
Իրոք, տուժողի իրավահաջորդը դատարանում հարցաքննվել է որպես վկա, նա որպես վկա է հարցաքննվել նաև նախաքննության փուլում :
ՀՀ քրեական դատավարության օրենսգրքի 340-րդ հոդվածի 1-ին մասի համաձայն ՙվկաները հարցաքննվում են միմյանցից անջատ և դեռևս չհարցաքննված վկաների բացակայությամբ՚ : Սույն գործով ուրիշ վկա չի հարցաքննվել, միայն տուժողի իրավահաջորդն է, որ հարցաքննվել է որպես վկա : Հետևաբար նա ուրիշ վայի ներկայությամբ չի հարցաքննվել : Վերջապես տուժողի իրավահաջորդը որպես վկա հարցաքննվելով չի կորցնում իր որպես դատավարության մասնակցի կարգավիճակը : Տուժողի իրավահաջորդի որպես վկա հարցաքննվելը սահմանվում է հատուկ նորմով : Համաձայն ՀՀ քրեական դատավարության օրենսգրքի 80-րդ հոդվածի ՙտուժողի իրավաջորդը կարող է կանչվել որպես վկա՚ : Հետևաբար պաշտպանի այն պնդումը, որ տուժողի իրավահաջորդի որպես վկայի ցուցմունքը պետք է հանել ապացույցների շարքից, քանի որ նա հարցաքննվել է իր դստեր` գործով տուժող Արփա Ավահոսյանի ցուցմունք տալուց հետո, համոզիչ չէ, քանզի նա այդ պահին նույնպես ունեցել է տուժողի իրավահաջորդի կարգավիճակ և գործող քրեական դատավարության օրեսգիրքը սահմանում է, որ ՙվկաները հարցաքննվում են միմյանցից անջատ և դեռևս չհարցաքննված վկաների բացակայությամբ՚ : Սույն գործով ուրիշ վկա չի հարցաքննվել, միակ անձը, որ հարցաքննվել է որպես վկա, դա տուժողի իրավահաջորդն է :
Ինչ վերաբերվում է ՀՀ քրեական դատավարության օրենսգրքի 343-րդ հոդվածի դրույթին, ապա այն վերաբերվում է տուժողի հարցաքննության կարգին, իսկ տուժողի իրավահաջորդի որպես վկա հարցաքննելու խնդիրը կարգավորված է հատուկ նորմով, այն է ՀՀ քրեական դատավարության օրենսգրքի 80-րդ հոդվածով :
Դեպքի վայրի զննության արձանագրությունով, որով հաստատվել է Արտակ Գրիգորյանի կողմից 2011թ. մայիսի 24-ին` ժամը 0030-ի սահմաններում, ՙՏոյոտա-Պրադո՚ մակնիշի, 91NN999 պետհամարանիշի ավտոմեքենայով Երևան քաղաքի Կոմիտասի պողոտայի թիվ 16 շենքի դիմացի հատվածում վրաերթի ենթարկելու վայրը: /Հատոր 1, գ.թ. 3-8/ :
Դատաբժշկական փորձագետի եզրակացություններով` համաձայն որի քաղ. Ար¬թուր Զարեհի Ավանոսյան-Հաջի Աբադիի մահը վրա է հասել գլխուղեղի կենսական, կարևոր ֆունկցիաների սուր խանգարումից, որն էլ պայմանավորված է եղել փակ, բութ, գանգուղեղային վնասվածքով, իսկ Արփա Զարեհի Ավանոսյան-Հաջի Աբադիի առողջությանը պատճառվել է միջին ծանրության վնաս: /Հատոր 1, գ.թ. 84-85, 109-116/ :
Դատամանրաթելային փորձագետի եզրակացությունով` համաձայն որի դեպքի վայրի զննության ժամանակ ՙՏոյոտա-Պրադո՚ մակնիշի, 91NN999 պետհամարանիշի ավտոմեքենայի վարորդի նստատեղից և հենակից հայտնաբերված և առգրավված միկրոմասնիկներն ունեն ընդհանուր սեռային պատկանելություն դեպքին նախորդող պահին Արտակ Գրիգորյանի հագին եղած ջինսե անդրավարտիքի հետ: /Հատոր 1, գ.թ. 117-119/ :
Դատահետքաբանական, դատամանրաթելային, դատաքիմիական և դատաավտո-տեխնիկական համալիր փորձաքննության եզրակացությունով` համաձայն որի փորձաքննությանը ներկայացված ՙՏոյոտա-Պրադո՚ մակնիշի, 91NN999 հ/հ-ի ավտոմոբիլի առջևի ձախ կողմում առկա են մեխանիկական վնասվածքներ, որոնք իրենց բնույթով և համակցությամբ առաջացել են վրաերթի ընթացքում, համեմատաբար փափուկ մակերես ունեցող առարկանների հետ բախումից /որպիսիք հանդիսանում են նաև մարդու մարմինները/ փոխազդեցության մեջ մտնելու հետևանքով:
ՙՏոյոտա-Պրադո՚ մակնիշի, 91NN999 հ/հ-ի ավտոմոբիլի պաշտպանիչ վահանի միջնամասի (պետհամարանիշը ներառյալ) մակերեսների և վերջինիս հարող շրջանների հետազոտությամբ հայտնաբերվել են բնական և քիմիական մանրաթելեր, որոնցից բնական բամբակյա կապտամոխրագույն, կապույտ` տեղ-տեղ անգույն մանրաթելերն ունեն ընդհանուր սեռային պատկանելություն Արթուր Զարեհի Ավանոսյան-Հաջի Աբադիի սվիտերի գործվածքի կազմի մեջ մտնող բնական բամբակյա կապտամոխրագույն և Արփա Զարեհի Ավանոսյան-Հաջի Աբադիի անդրավարտիքի գործվածքի կազմի մեջ մտնող բնական բամբակյա կապույտ` տեղ-տեղ անգույն մանրաթելերի հետ:
Փորձաքննությանը ներկայացված` Արթուր Զարեհի Ավանոսյան-Հաջի Աբադիի հագուստներից` անդրավարտիքի վրա հայտնաբերվել է.
- բաց մոխրագույն ներկանյութի քսվածք, որն ունի ընդհանուր սեռային պատկանելություն փորձաքննությանը տրամադրված ՙՏոյոտա-Պրադո՚ մակնիշի, 91NN999 հ/հ-ի ավտոմոբիլի առջևի հատվածներից վերցված ներկածածկույթի նմուշներում առկա բաց մոխրագույն ներկանյութի շերտերի հետ:
- անգույն, թափանցիկ (լաք) և արծաթագույն մետաղական փայլով, անկանոն ձևի միկրոմասնիկներով ներկանյութի քսվածք, որն ունի ընդհանուր սեռային պատկանելություն փորձաքննությանը տրամադրված ՙՏոյոտա-Պրադո՚ մակնիշի, 91NN999 հ/հ-ի ավտոմոբիլի առջևի հատվածներից վերցված ներկածածկույթի նմուշների` առաջին և երկրորդ շերտերի հետ:
- միաշերտ, սև նյութի հետք, որը հանդիսանում է պոլիմերային նյութի շերտանստվածք:
Փորձաքննությանը ներկայացված` Արթուր Զարեհի Ավանոսյան-Հաջի Աբադիի հագուստներից` անդրավարտիքի վրա հայտնաբերվել են մուգ նավթամթերքների` գուդրոնի հետքեր, որոնք օգտագործվում են ասֆալտի արտադրության մեջ:
Փորձաքննությանը տրամադրված ՙՏոյոտա-Պրադո՚ մակնիշի, 91 NN 999 հ/հ-ի ավտոմոբիլի շարժիչի ծածկոցի վրա հայտնաբերվել են սև նյութի շերտանստվածքներ, որոնք համընկնում են փորձաքննությանը տրամադրված գոտու ճարմանդի կաշվի հետ:
Քրեական գործում առկա այն ելակետային տվյալները, որոնք տեխնիկական տեսակետից համապատասխանում են վրաերթի առաջացման մեխանիզմին, մասնավորապես, տվյալ վրաերթի առաջացման մեխանիզմի վերաբերյալ տուժող Արփա Զարեհի Ավանոսյան-Հաջի Աբադիի ու վկա Ավանոսյան Զարեհ Կարապետի Հաջի Աբադիի ցուցմունքներից բխող հանգամանքները, ըստ որոնց Արփա ու Արթուր Զարեհի Ավանոսյան-Հաջի Աբադիները վրաերթից առաջ Կոմիտասի փողոցը հատելիս են եղել ՙՏոյոտա-Պրադո՚ մակնիշի, 91 NN 999 հ/հ-ի ավտոմոբիլի ընթացքի ուղղությամբ աջից ձախ կողմը, և վրաերթը տեղի է ունեցել ճանապարհի առանցքային գծանշման հատվածում, քանի որ դրանք տեխնիկական տեսակետից համապատասխանում են առաջադրված մյուս տվյալների ամբողջությանը, դատահետքաբանական, դատաքիմիական և մանրաթելերի քրեագիտական հետազոտությունների արդյունքներին, իսկ պատահարի առաջացման վերաբերյալ ՙՏոյոտա-Պրադո՚ մակնիշի, 91 NN 999 հ/հ-ի ավտոմոբիլի վարորդի բացատրությունից բխող հանգամանքները տեխնիկական տեսակետից չեն համապատասխանում տվյալ վրաերթի առաջացման մեխանիզմին:
Առաջադրված պայմաններում ՙՏոյոտա-Պրադո՚ մակնիշի, 91 NN 999 հ/հ-ի ավտոմոբիլի վարորդը, պատահարի պարագաներում իրականացնելով իր վարած ավտոմոբիլի ոչ պատշաճ ու վտանգավոր կառավարում, այն է` ճանապարհի առանցքային զույգ հոծ գծանշման պայմաններում ավտոմոբիլը վարելով մասնակիորեն հանդիպակաց ուղեմասով, որի արդյունքում վրաերթի է ենթարկել հետիոտներ Արփա ու Արթուր Զարեհի Ավանոսյան-Հաջի Աբադիներին, տեխնիկական տեսակետից ստեղծել է վթարային իրադրություն ու թույլ տվել ՙՃանապարհային երթևեկության անվտանգության ապահովման մասին՚ ՀՀ օրենքի 23-րդ հոդվածի 3-րդ կետի և Հայաստանի Հանրապետության ճանապարհային երթևեկության կանոնների 2-րդ ու 53-րդ կետերի պահանջներին հակասող գործողություններ, դրանով իսկ պայմանավորել տվյալ վրաերթի առաջացումնª ինքն իրեն զրկելով այն կանխելու տեխնիկական հնարավորությունից: Բացի այդ, եթե պատահարին նախորդող պահին ՙՏոյոտա-Պրադո՚ մակնիշի, 91 NN 999 հ/հ-ի մակնիշի ավտոմոբիլի վարորդն ավտոմոբիլը վարելիս է եղել տվյալ պայմանների համար սահմանված թույլատրելի առավելագույնը գերազանցող արագությամբ, ապա այդ առումով վերջինիս գործողությունը հակասել է ՃԵԿ-ի 65 կետի պահանջին:
Պատահարի պարագաներում ՙՏոյոտա-Պրադո՚ մակնիշի, 91 NN 999 հ/հ-ի ավտոմոբիլի վարորդը երթևեկության անվտանգությունն ապահովելու և տվյալ վրաերթը կանխելու նպատակով պետք է իրականացներ իր վարած ավտոմոբիլի պատշաճ և անվտանգ կառավարում, այն է` ավտոմոբիլը վարեր իր ընթացքի ուղղության երթևեկելի ուղեմասովª ձեռնպահ մնալով ճանապարհի առանցքային զույգ հոծ գծանշումը հատելուց ու ավտոմոբիլը հանդիպակաց ուղեմաս դուրս բերելուց, ինչի տեխնիկական հնարավորությունը պատահարի պարագաներումՙՏոյոտա-Պրադո՚ մակնիշի, 91 NN 999 հ/հ-ի ավտոմոբիլի վարորդն ունեցել է և, ինչը կատարելով, նա կկանխեր տվյալ վրաերթի առաջացումը:
Առաջադրված պայմաններում ՙՏոյոտա-Պրադո՚ մակնիշի, 91 NN 999 հ/հ-ի ավտոմոբիլի ձախ կողմի առջևի մասը հետվթարային դիրքում գտնվել է շուրջ 0,775 մետր չափով իր ընթացքի ուղղության ուղեմասից դուրս` ըստ ավտոմոբիլի լայնության նշված չափով ճանապարհի առանցքային զույգ հոծ գծանշման վրա և հանդիպակաց ուղեմասում:
Փորձաքննությանը ներկայացված հագուստների և կոշիկների վրա առկա են մեխանիկական վնասվածքներ և հետքեր, կոշիկների ներբաններին` սահքին բնորոշ հետքեր, որոնք իրենց բնույթով և համակցությամբ առաջացել են վրաերթի հետևանքով: /Հատոր 1, գ.թ. 120-133/ :
2011թ. հուլիսի 19-ի որոշմամբ իրեղեն ապացույց ճանաչված` Արթուր ու Արփա Զարեհի Ավանոսյան-Հաջի Աբադիների և Արտակ Գրիգորյանի հագուստներով, մանրաթելերից պատրաստված միկրոպրեպարատներով և ՙՏոյոտա-Պրադո՚ մակնիշի, 91 NN 999 հ/հ-ի ավտոմեքենայով: /Հատոր 1, գ.թ. 134-135/ :
Անդրադառնալով ամբաստանյալի շահերի պաշտպան Ռուբեն Բալոյանի դատաքննության ժամանակ արված միջնորդությանը` ամբաստանյալ Արտակ Գրիգորյանին առաջադրված մեղադրանքը փոփոխելու և մեղադրանքի ծավալից ՙտվյալ պայմանների համար սահմանված թույլատրելի առավելագույնը գերազանցող արագությամբ՚ շարադրանքը հանելուն, դատարանը արձանագրում է հետևյալը.
Պաշտպան Ռ.Բալոյանը իր միջնորդությունը հիմնավորում է հետևյալ ձևով.
ՙԱ.Գրիգորյանը վրաերթի նախորդող պահին տվյալ պայմանների համար սահմանված թույլատրելի առավելագույնը գերազանցող արագությամբ չի երթևեկել քանի որ.
1. Ըստ դեպքի վայրի զննության արձանագրության ՙՏոյոտա-Պրադո՚ մակնիշի ավտոմեքենայի կողմից թողնվել են արգելակման հետքեր համապատասխանաբար 14.6մ և 15.4մ երկարություններով և ավտոմեքենան դեպքից հետո դեպքի տեղից չի տեղաշարժվել /գ.թ 1-6/,
2. Դատաավտոտեխնիկական, դատահետքաբանական, դատաքիմիական և մանրաթելերի քրեագիտական համալիր թիվ 21611108 եզրակացության համաձայն, ՙՏոյոտա-Պրադո՚ մակնիշի ավտոմեքենայի կողմից թողնված արգելակային հետքերին համապատասխանող արագության մեծությունը կազմում է 52կմ/ժ /գ.թ 121-130/ :
3. Համաձայն ՃԵԿ-ի 65-րդ կետի պահանջի. ՙՎարորդը տրանսպորտային միջոցը պետք է վարի սահմանված արագությունը չգերազանցող արագությամբ...՚, քանի որ բնակավայրի սահմաններում` Երևան քաղաքում, արագությունը սահմանափակող ճանապարհային նշանների բացակայության պայմաններում /իսկ այդպիսիք առաջադրված չեն/, բոլոր տրասպորտային միջոցների երթևեկության համար սահմանված թույլատրելի առավելագույն արագությունը, համաձայն ՃԵԿ-ի 68-րդ կետի, 60կմ/ժամն է /գ.թ 121-130/՚ :
Այս պատճառաբանությունները չեն կարող հիմք հանդիսանալ պաշտպանի միջնորդությունը բավարարելու համար, քանզի ՃԵԿ-ի 65-րդ կետը սահմանում է. ՙՎարորդը տրանսպորտային միջոցը պետք է վարի սահմանված արագությունը չգերազանցող արագությամբ` հաշվի առնելով երթևեկության ինտենսիվությունն ու տրանսպորտային միջոցի և բեռի վիճակն ու առանձնահատկությունները, ճանապարհային և օդերևութաբանական պայմանները, մասնավորապես, ճանապարհային ծածկույթի վիճակն ու տեսանելիությունը երթևեկության ուղղությամբ՚ :
Նշված պայմանները ամեն մի կոնկրետ դեպքում պետք է գնահատի վարորդը :
Սույն գործով նախաքննության մարմինը Արտակ Ռոբերտի Գրիգորյանին մեղադրանք է առաջադրել այն բանի համար, որ Արտակ Գրիգորյանը 2011թ. մայիսի 24-ին` ժամը 00 :30-ի սահմաններում, Երևան քաղաքի Կոմիտասի պողոտայի թիվ 16 շենքի դիմաց իրականացնելով իր վարած` ՙՏոյոտա-Պրադո՚ մակնիշի, 91 NN 999 պետհամարանիշի ավտոմոբիլի ոչ պատշաճ ու վտանգավոր կառավարում, որն արտահայտվել է նրանում, որ ՙճանապարհի առանցքային զույգ հոծ գծանշման պայմաններում ավտոմոբիլը վարել է մասնակիորեն հանդիպակաց ուղեմասով և տվյալ պայմանների համար սահմանված թույլատրելի առավելագույնը գերազանցող արագությամբ, վրաերթի ենթարկել հետիոտներին ...՚ :
ՃԵԿ-ի կանոնների 53-րդ կետի համաձայն. ՙԵրկկողմ երթևեկությամբ չորս և ավելի գոտի ունեցող ճանապարհներին արգելվում է դուրս գալ ճանապարհի հանդիպակաց երթևեկության համար նախատեսված կողմը՚ :
Ճանապարհային երթևեկության անվտանգության ապահովման մասին ՀՀ օրենքի 23-րդ հոդվածի 3-րդ կետի ՙՃանապարհայի երթևեկության մասնակիցը պարտավոր է պահպանել Հայաստանի Հանրապետության կառավարության հաստատած ճանապարհային երթևեկության կանոնները, ինչպես նաև ոստիկանության ծառայողների ու երթևեկության կարգավորման համար լիազորված այլ անձանց օրինական պահանջներն ու իր գործողություններով չստեղծել վթարային իրադրություն՚ :
Նշված օրենսդրական ակտերի վերլուծությունը ցույց է տալիս, որ վարորդը չպետք է ստեղծի վթարային իրադրություն և ավտոմեքենայի վարման արագությունն ընտրելիս հաշվի առնել վերը նշված պայմանները :
Սույն գործով ամբաստանյալ Արտակ Գրիգորյանը, ընդհակառակը ավտոմեքենան վարել է մասնակիորեն հանդիպակաց ուղեմասով, ստեղծվել է վթարային իրադրություն և տվյալ պայմանների համար սահմանված թույլատրելի առավելագույնը գերազանցող արագությամբ և վրաերթի ենթարկել հետիոտներ Արփա և Արթուր Զարեհի Ավանոսյան-Հաջի Աբադիներին և տեխնիկական տեսակետից ինքն իրեն զրկել է վրաերթը կանխելու տեխնիկական հնարավորությունից :
Վերոգրյալների հիման վրա դատարանը գտնում է, որ դատաքննությամբ ամբաստանյալ Արտակ Ռոբերտի Գրիգորյանին ՀՀ քրեական օրենսգրքի 242-րդ հոդվածի 2-րդ մասով նախատեսված հանցագործության կատարման համար առաջադրված մեղադրանքում նրա մեղավորությունը ապացուցվեց : Արտակ Գիգորյանը ՀՀ քրեական օրենսգրքի 242-րդ հոդվածի 2-րդ մասով նախատեսված հանցագործության կատարման համար պետք է ենթարկվի քրեական պատասխանատվության և նշանակված պատիժը պետք է կրի :
Պատիժ նշանակելիս դատարանը հաշվի է առնում հանցագործության հանրության համար վտանգավորության աստիճանը և բնույթը, ամբաստանյալի անձը բնութագրող տվյալները, ինչպես նաև նրա պատասխանատվությունը մեղմացնող հանգամանքները:
Որպես պատասխանատվությունը և պատիժը մեղմացնող հանգամանք է դիտվում, որ ամբաստանյալի խնամքին է գտնվում երկու երեխա` 2001թ. և 2003թ.ծնված Էմմի և Էվա Գրիգորյանները, ինչպես նաև այն, որ տուժողները ճանապարհը հատել են ոչ հետիոտային անցումային գծերով :
Ամբաստանյալի անձը բնութագրող հանգամանքներից հաշվի է առնվում, որ նա բնութագրվում է դրականորեն, նախկինում դատապարտված չի եղել, դատարանում տվեց ինքնախոստովանական ցուցմունք :
Անդրադառնալով տուժողի և տուժողի իրավահաջորդի ներկայացուցչի հարուցված քաղքացիական հայցի լուծմանը, դատարանը արձանագրում է հետևյալը` տուժողը և տուժողի իրավահաջորդը որպես քաղաքացիական հայցվորներ իրենց ներկայացուցչի միջոցով հայցադիմումով խնդրում են ամբաստանյալ Արտակ Ռոբերտի Գրիգորյանից որպես տուժող Արփա Զարեհի Ավանոսյան-Հաջի Աբադիի և Զարեհ Կարապետի Ավանոսյան-Հաջի Աբադիի գանձել 5.424.760 /հինգ միլիոն չորս հարյուր քսանչորս հազար յոր հարյուր վաթսուն/ ՀՀ դրամ, որից 3.100.000 /երեք միլիոն մեկ հարյուր հազար/ ՀՀ դրամը որպես հուղարկավորության ծախս, 1.924.760 /մեկ միլիոն ինը հարյուր քսանչորս հազար յոթ հարյուր վաթսուն/ ՀՀ դրամը որպես Արփա Ավանոսյան-Հաջի Աբադիի առողջությանը պատճառված վնաս, 400.000 /չորս հարյուր հազար/ ՀՀ դրամը որպես դատական ծախս` փաստաբանի վարձատրության համար :
Ամբաստանյալ Արտակ Գրիգորյանի շահերի պաշտպանը հայցադիմումի վերաբերյալ գրավոր պատասխանում հայցապահանջը ընդունել է 1.624.000 /մեկ միլիոն վեց հարյուր քսանչորս հազար/ ՀՀ դրամի չափով :
Հայցվորի ներկայացուցիչը լրացուցիչ հայցադիմում ներկայացրեց, որով խնդրեց պատասխանող Արտակ Գրիգորյանից հօգուտ տուժողների գանձել նաև Արփա Ավանոսյանի Ջերմուկ առողջարանում սանատոր-կուրորտային բուժման 3 /երեք/ լրիվ կուրսի արժեքը 1.080.000 /մեկ միլիոն ութսուն հազար/ ՀՀ դրամի չափով : Դատաքննության ժամանակ ապացուցվեց, որ այդ բուժումը վերաբերվում է ապագային : Պատասխանող կողմը առարկեց պահանջի դեմ :
Դատարանը գտնում է, որ տուժող Արփա Զարեհի Ավանոսյան-Հաջի Աբադիի առողջությանը պատճառված վնասի հատուցման պահանջի մասով քաղաքացիական հայցը պետք է թողնվի առանց քննության, քաղաքացիական դատավարության կարգով ընթացք տալու համար, քանզի վնասի հատուցման պահանջի մեծ մասը վերաբերվում է ապագայում կատարվելիք ծախսերին :
Ինչ վերաբերվում է 17-ամյա Արթուր Զարեհի Ավանոսյան-Հաջի Աբադիի /գ.թ. 109/ թաղման և հուղարկավորության հետ կապված ծախսերին և փաստաբանին վճարվելիք ծախսերին, ապա դատարանը գտնում է, որ այդ մասով քաղաքացիական հայցը ենթակա է ամբողջությամբ բավարարման հետևյալ պատճառաբանությամբ :
Համաձայն ՀՀ քրեական դատավարության օրենսգրքի 60-րդ հոդվածի ՙՔաղաքացիական հայցվոր է ճանաչվում քրեական գործով վարույթի ընթացքում հայց ներկայացրած ֆիզիկական կամ իրավաբանական անձը, որի նկատմամբ բավարար հիմքեր կան ենթադրելու, որ նրան քրեական օրենսգրքով չթույլատրված արարքով պատճառվել է քրեական դատավարության կարգով հայցման ենթակա գույքային վնաս՚:
ՀՀ քրեական դատավարության օրենսգրքի 61-րդ հոդվածի 2-րդ մասի 2-րդ ենթակետի համաձայն քաղաքացիական հայցվորը իրավունք ունի ստանալ քրեական գործով վարույթի ընթացքում կրած ծախսերի հատուցումը:
ՀՀ քաղաքացիական օրենսգրքի 1087-րդ հոդվածի համաձայն. ՙՏուժողի մահվան հետ կապված վնասի պատասխանատու անձինք պարտավոր են հատուցել հուղարկավորության հետ կապված անհրաժեշտ ծախսերն այն անձին, ով այդ ծախսերը կատարել է: Այդ ծախսերը կատարած քաղաքացիների կողմից հուղարկավորության համար ստացած նպաստները չեն հաշվարկվում վնասների հատուցման հաշվում՚: Հայցադիմումին կցված փաստաթղթերից երևում է, որ իրոք վերը նշված գումարի ծախսերը տուժող կողմը կատարել է երեխայի հուղարկավորության և փաստաբանական ծառայության համար, ինչը դատարանը գնահատում է որպես խելամիտ կատարված ծախսեր: Ինչ վերաբերվում է պաշտպանի միջնորդությանը, որ ամբաստանյալ Արտակ Գրիգորյանը սույն գործով պատշաճ պատասխանող չէ և անհրաժեշտ է որպես պատշաճ պատասխանող ներգրավել ՙՌուսգոստրախ Արմենիա՚ ԱՓԲԸ-ին, ապա դատարանը գտնում է, որ այն հիմնավոր չէ և չի բխում ՀՀ քաղաքացիական օրենսգրքի 1087-րդ հոդվածի պահանջներից, որի դրույթներին արդեն անդրադարձ է կատարվել սույն դատավճռում:
Անդրադառնալով իրեղեն ապացույցնեի ճակատագրի տնօրինմանն, ապա դատարանը գտնում է, որ Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի 17.09.2011թ. որոշմամբ ամբաստանյալ Արտակ Ռոբերտի Գրիգորյանի ՙՏոյոտա Պրադո՚ մակնիշի 91 NN 999 պետհամարանիշի ավտոմեքենայի վրա արգելանքը պետք է պահպանվի մինչև սույն գործով տուժողի իրավահաջորդին /քաղ. հայցվորին/ պատճառված գույքային վնասի լրիվ հատուցումը : Իսկ մնացած իրեղեն ապացույց հանդիսացող հագուստները պետք է վերադարձվի ըստ պատկանելիության :
Արտակ Ռոբերտի Գրիգորյանի վարորդական իրավունքի վկայականը և ՙՏոյոտա Պրադո՚ մակնիշի 91 NN 999 հ/հ ավտոմեքենայի հաշվառման վկայագիրտը /տեխնիկական անձնագիրը/ պետք է հանձնել ՀՀ ոստիկանության ՙՃանապարհային ոստիկանություն՚ ծառայությանը :
Ղեկավարվելով ՀՀ քրեական դատավարության օրենսգրքի 357-360-րդ, 365-րդ, 367-373-րդ հոդվածներով դատարանը

Վ Ճ Ռ Ե Ց

Արտակ Ռոբերտի Գրիգորյանին մեղավոր ճանաչել ՀՀ քրեական օրենսգրքի 242-րդ հոդվածի 2-րդ մասով նախատեսված հանցագործության կատարման համար և դատապարտել ազատազրկման 3 /երեք/ տարի ժամկետով:
Արտակ Ռոբերտի Գրիգորյանին 2 /երկու/ տարի ժամկետով զրկել տրասպորտային միջոցներ վարելու իրավունքից :
Ազատազրկումը կրելու սկիզբը հաշվել 2011 թվականի մայիսի 24-ից :
Ընտրված խափանման միջոց կալանավորումը մինչև դատավճռի ուժի մեջ մտնելը թողնել անփոփոխ :
Ազատազրկումը պետք է կրի ՀՀ ԱՆ համապատասխան հիմնարկում:
Ամբաստանյալ Արտակ Ռոբերտի Գրիգորյանից որպես տուժողի իրավահաջորդ Զարեհ Կարապետի Ավանոսյան-Հաջի Աբադիի գանձել 3.500.000 /երեք միլիոն հինգ հարյուր հազար / ՀՀ դրամ, որից 3.100.000 /երեք միլիոն մեկ հարյուր հազար/ ՀՀ դրամը որպես հուղարկավորության ծախս, իսկ 400.000 /չորս հարյուր հազար/ ՀՀ դրամը որպես դատական ծախս` փաստաբանի վարձատրություն :
Հայցապահանջը Արփա Զարեհի Ավանոսյան-Հաջի Աբադիի առողջության պատճառված վնասի մասով թողնել առանց քննության` Արփա Զարեհի Ավանոսյան-Հաջի Աբադիին իրավունք վերապահել քաղաքացիական դատավարության կարգով լուծելու համար :
Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի 17.09.2011 թվականի որոշմամբ ամբաստանյալ Արտակ Ռոբերտի Գրիգորյանի ՙՏոյոտա Պրադո՚ մակնիշի 91 NN 999 պետհամարանիշի ավտոմեքենայի վրա դրված արգելանքը պահպանել մինչև սույն գործով տուժողի իրավահաջորդին հասցված վերը նշված գումարների չափով վնասի հատուցումը:
Արտակ Ռոբերտի Գրիգորյանի վարորդական իրավունքի վկայականը և ՙՏոյոտա Պրադո՚ մակնիշի 91 NN 999 պետհամարանիշի ավտոմեքենայի հաշվառման վկայագիրը /տեխնիկական անձնագիրը/ հանձնել ՀՀ ոստիկանության ՙՃանապարհային ոստիկանություն՚ ծառայությանը :
Արթուր և Արփա Զարեհի Ավանոսյան-Հաջի Աբադիների հագուստները վերադարձնել տուժողի իրավահաջորդ Զարեհ Կարապետի Ավանոսյան-Հաջի Աբադիին, իսկ Արտակ Գրիգորյանի հագուստները վերադարձնել նրան` ամբաստանյալ Արտակ Ռոբերտի Գրիգորյանին:
Դատավճիռը դատավարության մասնակիցների կողմից 1 /մեկ/ ամսվա ընթացքում վերաքննության կարգով կարող է բողոքարկվել ՀՀ վերաքննիչ քրեական դատարան: