ԵԱՔԴ/0093/01/11

Ո Ր Ո Շ ՈՒ Մ

ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ԵՎ ՔՐԵԱԿԱՆ ԳՈՐԾԻ ՎԱՐՈՒՅԹԸ ԿԱՐՃԵԼՈՒ ՄԱՍԻՆ

Երևան քաղաքի Արաբկիր և Քանաքեռ-Զեյթուն վարչական շրջանների
առաջին ատյանի դատարանը

նախագահող դատավոր Լ. Ավետիսյան
քարտուղարությամբ Ն. Ղազարյանի
մասնակցությամբ
մեղադրող Ս. Սարգսյանի
պաշտպան Մ. Բաբայանի
տուժող Դ. Մանուկյանի

2011 թվականի հուլիսի 29-ին, Երևան քաղաքում, դռնբաց դատական նիստում քննեց քրեական գործն ըստ մեղադրանքի`
Նորայր Ալբերտի Հովհաննիսյանի` ծնված 1983թ. մայիսի 31-ին, Երևան քաղաքում, ազգությամբ հայ, ՀՀ քաղաքացի, բարձրագույն կրթությամբ, ամուրի, նախկինում չդատված, ՀՀ ՈԶ 1032 զորամասի պայմանագրային զինծառայող, հաշվառված և բնակվում է Երևան քաղաքի Քանաքեռ 2-րդ նրբ. 15 տանը, մեղադրվում է ՀՀ քրեական օրենսգրքի 118 հոդվածով, որպես խափանման միջոց է ընտրվել ստորագրություն չհեռանալու մասին,
Արման Ալբերտի Հովհաննիսյանի` ծնված 1992թ. փետրվարի 8-ին, Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուրի, նախկինում չդատված, չի աշխատում, հաշվառված և բնակվում է Երևան քաղաքի, Քանաքեռ 2-րդ նրբ. 15 տանը, մեղադրվում է ՀՀ քրեական օրենսգրքի 117 հոդվածով, որպես խափանման միջոց է ընտրվել ստորագրություն չհեռանալու մասին,


Պ Ա Ր Զ Ե Ց

2011թ. ապրիլի 26-ին, ՀՀ ՊՆ ՔԾ 4-րդ կայազորային քննչական բաժնում ՀՀ քրեական օրենսգրքի 118 հոդվածի հատկանիշներով հարուցվել է թիվ 90260711 քրեական գործը:
2011թ. հունիսի 24-ին Նորայր Ալբերտի Հովհաննիսյանը ներգրավվել է որպես մեղադրյալ ՀՀ քրեական օրենսգրքի 118 հոդվածով, այն արարքի համար, որ նա հանդիսանալով ՀՀ ՈԶ 1032 զորամասի պայմանագրային զինծառայող, կոչումով շարքային, 2011թ. ապրիլի 8-ին, ժամը 1030-ի սահմաններում, Երևան քաղաքի Քանաքեռ 2-րդ փողոցի 2-րդ նրբանցքի մոտակայքում վիճաբանության մեջ է մտել Դավիթ Խաչիկի Մանուկյանի հետ, ոտքով հարվածել վերջինիս` պատճառելով առողջության թեթև վնասի հատկանիշներ չպարունակող մարմնական վնասվածք:
2011թ. հունիսի 24-ին Արման Ալբերտի Հովհաննիսյանը ներգրավվել է որպես մեղադրյալ ՀՀ քրեական օրենսգրքի 117 հոդվածով, այն արարքի համար, որ նա 2011թ. ապրիլի 8-ին, ժամը 1030-ի սահմաններում, Երևան քաղաքի Քանաքեռ 2-րդ փողոցի 2-րդ նրբանցքի մոտակայքում վիճաբանության մեջ է մտել Դավիթ Խաչիկի Մանուկյանի հետ և դիտավորությամբ հարվածել վերջինիս գլխին` պատճառելով առողջության թեթև վնասի հատկանիշներ պարունակող մարմնական վնասվածք` առողջության կարճատև քայքայումով:

2011թ. հունիսի 24-ին թիվ 90260711 քրեական գործով Դավիթ Խաչիկի Մանուկյանի նկատմամբ քրեական հետապնդում չի իրականացվել` ընդունված համաներման ակտի հիմքով:
2011թ. հունիսի 30-ին թիվ 90260711 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների առաջին ատյանի դատարան:
Դատաքննության ընթացքում դատարանի որոշմամբ տուժող ճանաչված Դավիթ Խաչիկի Մանուկյանը ներկայացնելով գրավոր դիմում հայտնեց, որ ինքը հաշտվել է ամբաստանյալների հետ և խնդրում է նրանց վերաբերյալ քրեական գործի վարույթը կարճել:
Ամբաստանյալները նույնպես նշեցին, որ հաշտվել են տուժողի հետ և համաձայն են, որպեսզի իրենց նկատմամբ հարուցված քրեական գործի վարույթը կարճվի:
Մեղադրող Ս.Սարգսյանը հայտարարեց ամբաստանյալներ Նորայր Ալբերտի Հովհաննիսյանի և Արման Ալբերտի Հովհաննիսյանի նկատմամբ քրեական հետապնդում իրականացնելուց հրաժարվելու մասին և միջնորդեց քրեական գործի վարույթը կարճել:
ՀՀ քրեական դատավարության օրենսգրքի 35 հոդվածի 1-ին մասի 5-րդ կետի համաձայն, քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե ՀՀ քրեական դատավարության օրենսգրքով նախատեսված դեպքերում տուժողը հաշտվել է մեղադրյալի հետ:
ՀՀ քրեական դատավարության օրենսգրքի 183 հոդվածի 1-ին մասի համաձայն, ՀՀ քրեական օրենսգրքի 117, 118 հոդվածներով նախատեսված հանցագործությունների վերաբերյալ գործերը հարուցվում են ոչ այլ կերպ, քան տուժողի բողոքի հիման վրա, և կասկածյալի կամ մեղադրյալի կամ ամբաստանյալի հետ նրա հաշտվելու դեպքում ենթակա են կարճման: Հաշտությունը թույլատրվում է մինչև դատավճիռ կայացնելու համար դատարանի խորհրդակցական սենյակ հեռանալը:
Նման պայմաններում դատարանը գտնում է, որ թիվ ԵԱՔԴ/0093/01/11 քրեական գործի վարույթը պետք է կարճել և Նորայր Ալբերտի Հովհաննիսյանի և Արման Ալբերտի Հովհաննիսյանի նկատմամբ քրեական հետապնդումը դադարեցնել:
Նկատի ունենալով, որ Դավիթ Խաչիկի Մանուկյանը հանցագործության հետևանքով իրեն պատճառված նյութական վնասի հատուցման պահանջ չի ներկայացրել, դատարանը գտնում է, որ այդ հարցը պետք է համարել լուծված:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 33 հոդվածի 2-րդ մասով, 35 հոդվածի 1-ին մասի 5-րդ կետով, 36, 183, 294 և 313 հոդվածներով, դատարանը

Ո Ր Ո Շ Ե Ց

Նորայր Ալբերտի Հովհաննիսյանի նկատմամբ ՀՀ քրեական օրենսգրքի 118 հոդվածով քրեական հետապնդումը դադարեցնել և թիվ ԵԱՔԴ/0093/01/11 քրեական գործի վարույթը կարճել` ամբաստանյալի հետ տուժող Դավիթ Խաչիկի Մանուկյանի հաշտվելու հիմքով:
Նորայր Ալբերտի Հովհաննիսյանի նկատմամբ ընտրված խափանման միջոցը` չհեռանալու մասին ստորագրությունը, վերացնել:
Արման Ալբերտի Հովհաննիսյանի նկատմամբ ՀՀ քրեական օրենսգրքի 117 հոդվածով քրեական հետապնդումը դադարեցնել և թիվ ԵԱՔԴ/0093/01/11 քրեական գործի վարույթը կարճել` ամբաստանյալի հետ տուժող Դավիթ Խաչիկի Մանուկյանի հաշտվելու հիմքով:
Արման Ալբերտի Հովհաննիսյանի նկատմամբ ընտրված խափանման միջոցը` չհեռանալու մասին ստորագրությունը, վերացնել:
Դավիթ Խաչիկի Մանուկյանին պատճառված նյութական վնասի հատուցման հարցը համարել լուծված:
Որոշումը կարող է բողոքարկվել ՀՀ վերաքննիչ քրեական դատարան` հրապարակվելու օրվանից մեկամսյա ժամկետում:


ԴԱՏԱՎՈՐ` ստորագրություն
Բնագրի հետ ճիշտ է
ԴԱՏԱՎՈՐ Լ. ԱՎԵՏԻՍՅԱՆ