Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների
առաջին ատյանի դատարանը

նախագահող դատավոր Լ. Ավետիսյան
քարտուղարությամբ Ե.Կարապետյանի,Ն.Ղազարյանի
մասնակցությամբ
մեղադրող Լ. Մանուկյանի
պաշտպան Հ. Հովհաննիսյանի
տուժողի ներկայացուցիչ Գ. Ավետիսյանի

2011 թվականի հուլիսի 21-ին, Երևան քաղաքում, դռնբաց դատական նիստում, արագացված դատաքննության կարգով, քննեց քրեական գործն ըստ մեղադրանքի Արման Մամիկոնի Ղազարյանի, ծնված 1986 թվականի մայիսի 27-ին, Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուսնալուծված, խնամքին ոչ ոք, չի աշխատել, նախկինում չդատված, հաշվառված և բնակվել է Երևան քաղաքի Լազոյի փողոցի 6 շենքի թիվ 45 բնակարանում, մեղադրվում է ՀՀ քրեական օրենսգրքի 178 հոդվածի 2-րդ մասի 1-ին և 2-րդ կետերով, արգելանքի տակ է 2011 թվականի մայիսի 13-ից,

Պ Ա Ր Զ Ե Ց

1.Գործի դատավարական նախապատմությունը.
2010թ. սեպտեմբերի 18-ին ՀՀ ոստիկանության ՔԳՎ Երևան քաղաքի ՔՎ Քանաքեռ-Զեյթուն քննչական բաժնում ՀՀ քրեական օրենսգրքի 178 հոդվածի 2-րդ մասի 3-րդ կետով նախատեսված հանցագործության հատկանիշներով հարուցվել է թիվ 09120710 քրեական գործը:
2010թ. նոյեմբերի 22-ին Արման Մամիկոնի Ղազարյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 178 հոդվածի 2-րդ մասի 3-րդ կետով, նրա նկատմամբ հայտարարվել է հետախուզում և որպես խափանման միջոց ընտրվել է կալանավորումը:
2011թ. փետրվարի 28-ին թիվ 09120710 քրեական գործից անջատվել է Արման Մամիկոնի Ղազարյանի վերաբերյալ մասը և անջատված մասին շնորհվել է թիվ 09120710/1 համարը:
2011թ. մայիսի 13-ին Արման Մամիկոնի Ղազարյանը հայտնաբերվել և ներկայացվել է Քանաքեռ-Զեյթուն քննչական բաժին, նրա նկատմամբ որպես խափանման միջոց ընտրված կալանավորումը վերահաստատվել է:
2011թ. մայիսի 27-ին Արման Մամիկոնի Ղազարյանին առաջադրված մեղադրանքը փոփոխվել, լրացվել և նրան նոր մեղադրանք է առաջադրվել ՀՀ քրեական օրենսգրքի 177 հոդվածի 2-րդ մասի 1-ին և 2-րդ կետերով:
2011թ. հունիսի 3-ին թիվ 09120710/1 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների առաջին ատյանի դատարան:
2.Գործի փաստական հանգամանքները.
Նախնական քննության մարմինն ամբաստանյալ Արման Մամիկոնի Ղազարյանին մեղադրանք է առաջադրել այն արարքի համար, որ նա 28.04.2010թ. Հարություն Մուշեղի Ղազարյանի հետ նախնական համաձայնությամբ, չարաշահելով ՙՖաստ Կրեդիտ՚ ՍՊԸ-ին պատկանող Երևան քաղաքի Ա.Մանուկյան 7 հասցեում գտնվող թիվ 8 գրավատան աշխատակիցների վստահությունը, խաբեությամբ գրավադրել է 62.8 գրամ ընդհանուր քաշով թվով 3 հատ կեղծ ոսկյա շղթաներ, որոնց դիմաց ստացել է 439.000 ՀՀ դրամ գումար և տիրացել դրան՝ ՙՖաստ Կրեդիտ՚ ՍՊԸ-ին պատճառելով զգալի չափերի հասնող` 439.000 ՀՀ դրամի գույքային վնաս։
Դրանից հետո, 21.05.2010թ. Հարություն Մուշեղի Ղազարյանի հետ նախնական համաձայնությամբ, չարաշահելով Երևան քաղաքի Կորյունի 11/10 հասցեում գտնվող ՙԿարմեն՚ Ա/Կ գրավատան աշխատակիցների վստահությունը, խաբեությամբ գրավադրել է 13.9 գրամ քաշով, 8.000 ՀՀ դրամ արժողությամբ մեկ հատ տղամարդու կեղծ ոսկյա մատանի, որի դիմաց ստացել է 93.000 ՀՀ դրամ գումար և տիրացել դրան՝ ՙԿարմեն՚ Ա/Կ գրավատանը պատճառելով զգալի չափերի հասնող` 85.000 ՀՀ դրամի գույքային վնաս։
Այնուհետև, 24.05.2010թ., Հարություն Մուշեղի Ղազարյանի հետ նախնական համաձայնությամբ, չարաշահելով Երևան քաղաքի Կոմիտաս 12 հասցեում գտնվող ՙՊրոֆֆինանս՚ ՓԲԸ-ին պատկանող գրավատան աշխատակիցների վստահությունը, խաբեությամբ գրավադրել է 12.8 գրամ քաշով, 8.000 ՀՀ դրամ արժողությամբ մեկ հատ տղամարդու կեղծ ոսկյա մատանի, որի դիմաց ստացել է 76.000 ՀՀ դրամ գումար և տիրացել դրան՝ ՙՊրոֆֆինանս՚ ՓԲԸ-ին պատճառելով զգալի չափերի հասնող` 68.000 ՀՀ դրամի գույքային վնաս։
27.05.2010թ., Հարություն Մուշեղի Ղազարյանի հետ նախնական համաձայնությամբ, չարաշահելով Երևան քաղաքի Հր.Ներսիսյան 1/124 հասցեում գտնվող ՙՄուսոյան ԱԱԱ՚ ՍՊԸ գրավատան աշխատակիցների վստահությունը, խաբեությամբ գրավադրել է 17.2 գրամ գրամ քաշով, 10.000 ՀՀ դրամ արժողությամբ, խաչի տեսքով մեկ հատ կեղծ ոսկյա կախազարդ, որի դիմաց ստացել է 110.000 ՀՀ դրամ և տիրացել դրան՝ ՙՄուսոյան ԱԱԱ՚ ՍՊԸ գրավատանը պատճառելով զգայի չափերի հասնող` 100.000 ՀՀ դրամի գույքային վնաս։
03.06.2010թ. Հարություն Սուշեղի Ղազարյանի հետ նախնական համաձայնությամբ, չարաշահելով Երևան քաղաքի Հր.Ներսիսյան 1/124 հասցեում գտնվող ՙՄուսոյան ԱԱԱ՚ ՍՊԸ գրավատան աշխատակիցների վստահությունը, խաբեությամբ գրավադրել է 17.8 գրամ քաշով, 10.000 ՀՀ դրամ արժողությամբ, խաչի տեսքով մեկ հատ կեղծ ոսկյա կախազարդ, որի համար գրավատնից ստացել է 115.000 ՀՀ դրամ գումար և տիրացել դրան՝ ՙՄուսոյան ԱԱԱ՚ ՍՊԸ գրավատանը պատճառելով զգալի չափերի հասնող` 105.000 ՀՀ դրամի գույքային վնաս։
24.06.2010թ. Մուշեղ Կիմի Ղազարյանի հետ նախնական համաձայնությամբ, չարաշահելով Երևան քաղաքի Մ.Խորենացու 24 հասցեում գտնվող ՙՖաստ Կրեդիտ՚ ՍՊԸ-ի թիվ 3 գրավատան աշխատակիցների վստահությունր, խաբեությամբ գրավադրել է 96.465 գրամ րնդհանուր քաշով խաչի տեսքով տասներկու հատ կեղծ ոսկյա կախազարդ ու դրա դիմաց ստանալով 640.000 ՀՀ դրամ տիրացել է այդ գումարին, ՙՖաստ Կրեդիտ՚ ՍՊԸ-ի թիվ 3 գրավատանը պատճառելով խոշոր չաիերի հասնող` 640.000 ՀՀ դրամի գույքային վնաս։
3. Արագացված դատական քննություն .
Մինչև դատաքննությունն սկսելն ամբաստանյալ Արման Մամիկոնի Ղազարյանը միջնորդեց դատական քննությունն անցկացնել արագացված կարգով և հայտարարեց, որ առաջադրված մեղադրանքն իրեն պարզ է, համաձայն է իրեն առաջադրված մեղադրանքին, գիտակցում է արագացված կարգով դատական քննություն անցկացնելու բնույթն ու հետևանքները, միջնորդությունը ներկայացրել է կամավոր` պաշտպանի հետ խորհրդակցելուց հետո:
Միջնորդությունը հաստատեց նաև ամբաստանյալի պաշտպան Հ.Հովհաննիսյանը:
Մեղադրող Լ.Մանուկյանը դատական քննության արագացված կարգ կիրառելուն չի առարկել:
Տուժողի ներկայացուցիչ Գ.Ավետիսյանը նույնպես արագացված դատական քննություն կիրառելուն չի առարկել: Նման բովանդակությամբ գրավոր դիմում են ներկայացրել նաև տուժողների ներկայացուցիչներ Ա.Մուրադյանը և Լ.Մուսոյանը, հայտնելով նաև, որ ամբաստանյալից որևէ նյութական պահանջ չունեն:
Տուժող ՙՖաստ Կրեդիտ՚ ՍՊԸ-ն ներկայացուցիչ Գ.Ավագյանը հայտնեց նաև, որ իրենց պատճառված վնասից վերականգնվել է 220.000 ՀՀ դրամ, ուստի ինքը փոխելով ներկայացված հայցապահանջը, խնդրում է ամբաստանյալից բռնագանձել մնացած 129.000 ՀՀ դրամը: Ամբաստանյալը ներկայացված հայցն ընդունեց:
Դատարանը հաշվի է առնում նաև, որ ամբաստանյալի կողմից քաղաքացիական հայցի ընդունումը կամավոր է, չի հակասում օրենքին և չի վերաբերում այլ անձանց իրավունքներին:
Դատարանը համոզվելով, որ առկա են ՀՀ քրեական դատավարության օրենսգրքի 3751 և 3752 հոդվածներով նախատեսված պայմանները, որոշում է կայացրել արագացված կարգով դատական քննության անցկացնելու մասին:
4.Դատարանի իրավական վերլուծությունները.
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Արման Մամիկոնի Ղազարյանին առաջադրված մեղադրանքը ՀՀ քրեական օրենսգրքի 178 հոդվածի 2-րդ մասի 1-ին և 2-րդ կետերով հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 178 հոդվածի 2-րդ մասի 1-ին և 2-րդ կետերի հատկանիշներին և արարքի որակումը ճիշտ է:
Ամբաստանյալ Արման Մամիկոնի Ղազարյանի նկատմամբ պատիժ նշանակելիս, դատարանը հաշվի է առնում նրա կատարած արարքի հանրության համար վտանգավորության աստիճանը և բնույթը, ինչպես նաև հանցավորի անձը:
Որպես ամբաստանյալի անձը դրականորեն բնութագրող, պատասխանատվությունը և պատիժը մեղմացնող հանգամանքներ դատարանը հաշվի է առնում այն, որ նա հանցանքն ընդունել և զղջում է կատարածի համար, հատուցել է հանցագործությամբ պատճառված վնասները:
Ամբաստանյալի պատասխանատվությունը և պատիժը ծանրացնող հանգամանքներ չկան:
Կատարած արարքի համար ամբաստանյալ Արման Մամիկոնի Ղազարյանը ենթակա է քրեական պատասխանատվության և պատժի:
Հաշվի առնելով Արման Մամիկոնի Ղազարյանի կատարած արարքի հանրության համար վտանգավորության աստիճանը և բնույթը, նրա անձը, նրան դրականորեն բնութագրող տվյալները, պատասխանատվությունն ու պատիժը մեղմացնող հանգամանքները, պատասխանատվությունը և պատիժը ծանրացնող հանգամանքների բացակայությունը, ինչպես նաև այն, որ ՀՀ քրեական օրենսգրքի 178 հոդվածի 2-րդ մասի սանկցիայով նախատեսված է պատիժ նաև ազատազրկման ձևով, դատարանը գտնում է, որ պատժի նպատակներին հասնելու համար Արման Ղազարյանի նկատմամբ ՀՀ քրեական օրենսգրքի 178 հոդվածի 2-րդ մասի 1-ին և 2-րդ կետերով նախատեսված արարք կատարելու համար պատիժ պետք է նշանակել ազատազրկման ձևով:
ՀՀ Ազգային ժողովի 2011 թվականի մայիսի 26-ի ՙՀամաներում հայտարարելու մասին՚ որոշման 15-րդ կետի համաձայն, ՙՀամաներում հայտարարելու մասին՚ որոշումը կիրառվում է այն անձանց նկատմամբ, ովքեր հանցագործություն են կատարել մինչև 2011 թվականի մայիսի 1-ը ներառյալ: Արման Մամիկոնի Ղազարյանը հանրորեն վտանգավոր վերջին արարքը կատարել է 2010 թվականի հունիսին:
Սույն քրեական գործով բացակայում են համաներման մասին հիշյալ որոշման 9-րդ կետում նշված այն սահմանափակումները, որոնք կարող են արգելք հանդիսանալ Արման Մամիկոնի Ղազարյանի նկատմամբ համաներման ակտի կիրառման համար:
Հիմք ընդունելով վերը նշվածը, դատարանը գտնում է, որ ամբաստանյալ Արման Մամիկոնի Ղազարյանի նկատմամբ կիրառելի է ՀՀ Ազգային Ժողովի 2011 թվականի մայիսի 26-ի ՙՀայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին՚ որոշման 1-ին կետի 1-ին ենթակետը, համաձայն որի պատժից պետք է ազատել առավելագույնը երեք տարի ժամկետով ազատությունից զրկելու հետ կապված պատիժների դատապարտված անձանց:
Ամբաստանյալ Արման Ղազարյանի կողմից քաղաքացիական հայցի կամավոր ընդունելու պայմաններում, դատարանը գտնում է, որ Արման Ղազարյանի դեմ ներկայացված տուժող ՙՖաստ Կրեդիտ՚ ՍՊԸ-ն ներկայացուցիչ Գալուստ Ավագյանի քաղաքացիական հայցի պահանջը պետք է բավարարել և Արման Ղազարյանից հօգուտ ՙՖաստ Կրեդիտ՚ ՍՊ ընկերության, որպես հանցագործությամբ պատճառված վնաս, պետք է բռնագանձել 129.000 ՀՀ դրամ, քանի որ այն չի հակասում օրենքին և չի վերաբերում այլ անձանց իրավունքներին:
Սույն քրեական գործով տուժող ՙՊրոֆֆինանս՚ ՓԲ ընկերության ներկայացուցիչ Էդգար Մալխասյանը ներկայացրել է քաղաքացիական հայց` ամբաստանյալից պահանջելով հանցագործությամբ պատճառված վնասը` 68.000 ՀՀ դրամը: ՀՀ քրեական դատավարության օրենսգրքի 308 հոդվածի 2-րդ մասի համաձայն` քաղաքացիական հայցվորի չներկայանալու դեպքում դատարանը քաղաքացիական հայցը թողնում է առանց քննության` քաղաքացիական հայցվորին իրավունք վերապահելով հայց հարուցել քաղաքացիական դատավարության կարգով։ Քանի որ քաղաքացիական հայցվոր Էդգար Մալխասյանը չի ներկայացել դատական նիստին և չի միջնորդել քաղաքացիական հայցը քննարկել իր բացակայությամբ, ուստի նրա ներկայացրած քաղաքացիական հայցը պետք է թողնել առանց քննության և նրան իրավունք վերապահել քաղաքացիական հայց ներկայացնել քաղաքացիական դատավարության կարգով:
Դատարանը գտնում է, որ տուժողներ ՙԿարմեն՚ Ա/Կ, ՙՄուսոյան ԱԱԱ՚ ՍՊԸ քաղաքացիական հայցերի հարցը պետք է համարել լուծված, քանի որ դատական քննության ժամանակ տուժողների ներկայացուցիչների կողմից դիմումներ է ներկայացվել դատարան այն մասին, որ պատճառված նյութական վնասը վերականգնվել է և ամբաստանյալից որևէ նյութական պահանջ չունեն:
Անդրադառնալով իրեղեն ապացույցների տնօրինման հարցին, դատարանը գտնում է, որ 2011թ. փետրվարի 8-ի որոշմամբ իրեղեն ապացույց ճանաչված և թիվ 09120710 քրեական գործին կցված (18.01.2011թ. Հ.Ղազարյանի Երևան քաղաքի Նոր Նորքի 7-րդ զանգվածի 28 շենքի 3 բնակարանի խուզարկության ժամանակ հայտնաբերված և առգրավված 12 փաթույթ մետաղյա թիթեղները, մեկ հատ լատունե թիթեղը, մեկ հատ շղթան, ժապավենի սև տուփի մեջ լցված մետաղյա կտորները՝ քառակուսի և ուղանկյուն կտրված, ժապավենի սպիտակ տուփի մեջ լցված դեղին, մետաղյա օղակաձև կտորները, մեկ հատ ՙբոռ մեքենան՚, մեկ հատ ոսկերչական գործիք ֆիլերը, մեկ հատ փուքսը, մեկ հատ ոսկերչական կրակայրիչը, Մուշեղ Ղազարյանի կողմից ՙՖաստ Կրեդիտ՚ ՍՊԸ-ին պատկանող գրավատանր գրավադրած 12 կախազարդերը, Արման Ղազարյանի կողմից ՙՄուսոյան ԱԱԱ՚ ՍՊԸ գրավատանր գրավադրված 2 կախազարդերը, Ա/Կ ՙԿարմեն՚ և ՙՊրոֆֆինանս՚ ԲԲԸ-ի գրավատներում գրավադրած տղամարդու թվով 2 մատանիներր, ՙՖաստ Կրեդիտ՚ ՍՊԸ-ին պատկանող գրավատանը գրավադրված թվով 3 շղթաները, Արմեն Կիրակոսյանի անձնագրով ՙՖաստ Կրեդիտ՚ ՍՊԸ-ին պատկանող գրավատանը գրավադրած 2 շղթաներր և 1 տղամարդու մատանին, ՙԻզի Կրեդիտ՚ ՍՊԸ գրավատանը գրավադրած 1 կախազարդը) առարկաների տնօրինման հացը պետք է թողնել լուծելու թիվ 09120710 քրեական գործով։
Ելնելով վերոգրյալից և ղեկավարվելով ՀՀ քրեական դատավարության օրենսգրքի 357-360, 3753 և 3754 հոդվածներով, դատարանը

Վ Ճ Ռ Ե Ց

Արման Մամիկոնի Ղազարյանին մեղավոր ճանաչել ՀՀ քրեական օրենսգրքի 178 հոդվածի 2-րդ մասի 1-ին և 2-րդ կետերով և նրան դատապարտել ազատազրկման երկու (2) տարի վեց (6) ամիս ժամկետով:
Կիրառել ՀՀ Ազգային Ժողովի ՙՀայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին՚ 2011 թվականի մայիսի 26-ի որոշման 1-ին կետի 1-ին ենթակետը և Արման Մամիկոնի Ղազարյանին ազատել պատժի կրումից:
Արման Մամիկոնի Ղազարյանի նկատմամբ ընտրված խափանման միջոցը` կալանավորումը, վերացնել:
Արման Մամիկոնի Ղազարյանին անհապաղ ազատել կալանքից:
Տուժող ՙՖաստ Կրեդիտ՚ ՍՊԸ-ի ներկայացուցիչ Գալուստ Ավետիսյանի քաղաքացիական հայցը բավարարել. Արման Մամիկոնի Ղազարյանից հօգուտ ՙՖաստ Կրեդիտ՚ ՍՊ ընկերության, որպես հանցագործությամբ պատճառված վնաս, բռնագանձել հարյուր քսանիննը հազար (129.000) ՀՀ դրամ:
Տուժող ՙՊրոֆֆինանս՚ ՓԲԸ ներկայացուցիչ Էդգար Մալխասյանին քաղաքացիական դատավարության կարգով քաղաքացիական հայց ներկայացնելու իրավունք վերապահել:
Տուժողներ ՙԿարմեն՚ Ա/Կ և ՙՄուսոյան ԱԱԱ՚ ՍՊ ընկերության քաղաքացիական հայցերի հարցը համարել լուծված:
Իրեղեն ապացույց ճանաչված առարկաների տնօրինման հարցը թողնել լուծելու թիվ 09120710 քրեական գործով։
Դատավճիռը կարող է բողոքարկվել ՀՀ վերաքննիչ քրեական դատարան` հրապարակվելու օրվանից մեկամսյա ժամկետում:
Դատավճիռը չի կարող բողոքարկվել ՀՀ քրեական դատավարության օրենսգրքի 395 հոդվածի 1-ին կետով նախատեսված հիմքով:


ԴԱՏԱՎՈՐ` ստորագրություն
Բնագրի հետ ճիշտ է
ԴԱՏԱՎՈՐ Լ. ԱՎԵՏԻՍՅԱՆ