ԵԱՔԴ/0064/01/11





ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԿԵՆՏՐՈՆ ԵՎ ՆՈՐՔ-ՄԱՐԱՇ ՎԱՐՉԱԿԱՆ ՇՐՋԱՆՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԱՌԱՋԻՆ ԱՏՅԱՆԻ ԴԱՏԱՐԱՆ

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«10» ապրիլի 2012թ. ք.Երևան

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը (այսուհետ` Դատարան)

Նախագահող դատավոր Մ.Պապոյան
դատական նիստերի քարտուղարներ Ռ.Ավետյան
Կ.Կարապետյան
մեղադրող Ա.Բոշնաղյան
տուժող Ս.Կոստանյան
պաշտպան Ա.Փարսադանյան

դռնբաց դատական նիստում քննեց քրեական գործն ըստ մեղադրանքի`
Գագիկ Հրանտի Սաֆարյանի` ծնված 1961 թվականի փետրվարի 10-ին ԼՂՀ Ճարտար գյուղում, ազգությամբ հայ, ՀՀ քաղաքացի, բարձրագույն կրթությամբ, ամուսնացած, նախկինում դատապարտված, չի աշխատում, հաշվառված է Կոտայքի մարզի Նոր Գեղի գյուղում, բնակվել է Երևան քաղաքի Խաղաղ Դոնի փողոցի 27-րդ շենքի 220-րդ բնակարանում, մեղադրանք է առաջադրվել ՀՀ քրեական օրենսգրքի 178-րդ հոդվածի 3-րդ մասի 1-ին կետով, արգելանքի տակ է 2011 թվականի փետրվարի 11-ից:
1. Գործի դատավարական նախապատմությունը.
2010 թվականի հուլիսի 20-ին ՀՀ ոստիկանության Արաբկիրի քննչական բաժնի քննիչ Վ.Մկրտչյանի որոշմամբ ՀՀ քրեական օրենսգրքի 178-րդ հոդվածի 3-րդ մասի 1-ին կետով նախատեսված հանցագործության հատկանիշներով հարուցվել և վարույթ է ընդունվել թիվ 14122210 քրեական գործը:
2010 թվականի հոկտեմբերի 19-ին ՀՀ ոստիկանության քննչական գլխավոր վարչության ՀԿԳ քննության վարչության ՀԿԳ ավագ քննիչ Ա.Բայադյանի որոշմամբ թիվ 14122210 քրեական գործն ընդունվել է վարույթ, միացվել թիվ 11115510 քրեական գործին, և նախաքննությունը շարունակվել է 11115510 համարով:
2010 թվականի նոյեմբերի 10-ին ՀՀ ոստիկանության քննչական գլխավոր վարչության ՀԿԳ քննության վարչության պետ Կ.Կարապետյանի որոշմամբ թիվ 11115510 քրեական գործի նախաքննության կատարումը հանձնարարվել է քննչական խմբին, որի կազմում ընդգրկվել են ՀՀ ոստիկանության քննչական գլխավոր վարչության ՀԿԳ քննության վարչության ՀԿԳ ավագ քննիչ Ա.Բայադյանը և քննիչ Ա.Հարությունյանը, քննչական խմբի ղեկավար է նշանակվել ՀԿԳ ավագ քննիչ Ա.Բայադյանը:
2011 թվականի փետրվարի 12-ին ՀՀ ոստիկանության քննչական գլխավոր վարչության ՀԿԳ քննության վարչության 2-րդ բաժնի պետի տեղակալ Ա.Բայադյանի որոշմամբ թիվ 11115510 քրեական գործով Գագիկ Հրանտի Սաֆարյանին մեղադրանք է առաջադրվել ՀՀ քրեական օրենսգրքի 178-րդ հոդվածի 3-րդ մասի 1-ին կետով և 213-րդ հոդվածի 1-ին մասով:
2011 թվականի փետրվարի 12-ին ՀՀ ոստիկանության քննչական գլխավոր վարչության ՀԿԳ քննության վարչության 2-րդ բաժնի պետի տեղակալ Ա.Բայադյանի որոշմամբ թիվ 11115510 քրեական գործով Սերգո Ռոբերտի Աբրահամյանին մեղադրանք է առաջադրվել ՀՀ քրեական օրենսգրքի 178-րդ հոդվածի 3-րդ մասի 1-ին կետով և 325-րդ հոդվածի 1-ին մասով:
2011 թվականի ապրիլի 29-ին ՀՀ ոստիկանության քննչական գլխավոր վարչության ՀԿԳ քննության վարչության 2-րդ բաժնի պետի տեղակալ Ա.Բայադյանի որոշմամբ թիվ 11115510 քրեական գործով Գագիկ Հրանտի Սաֆարյանին առաջադրված մեղադրանքը լրացվել է և նրան նոր մեղադրանք է առաջադրվել ՀՀ քրեական օրենսգրքի 178-րդ հոդվածի 3-րդ մասի 1-ին կետով և 213-րդ հոդվածի 1-ին մասով` այն արարքների համար, որ նա 2008 թվականի հունիս-հուլիս ամիսներին իր ծանոթ Սերգո Ռոբերտի Աբրահամյանի հետ նախնական համաձայնությամբ, խարդախությամբ Սամվել Կոստանյանից կաշառք ստանալու պատրվակով հափշտակել են առանձնապես խոշոր չափերի հասնող` 6.394.710 ՀՀ դրամին համարժեք 21.000 ԱՄՆ դոլար գումար, բացի այդ 2010 թվականի հունիսից մինչև օգոստոս ամիսն ընկած ժամանակահատվաում զբաղվել է վաշխառությամբ: Այսպես. Գագիկ Սաֆարյանը, խարդախությամբ ուրիշի գույքին տիրանալու նպատակով նախնական համաձայնության գալով իր մտերիմ Սերգո Ռոբերտի Աբրահամյանի հետ, իրենց ծանոթի որդուն` Հակոբ Կոստանյանին Երևանի պետական համալսարանի միջազգային հարաբերությունների ֆակուլտետ ընդունելու կեղծ խոստմամբ, վերջինի հորը` բարեկամական և անձնական կապերից ելնելով իրենց անվերապահորեն վստահող Սամվել Կոստանյանին, իրականությունը սխալ ներկայացնելով, փաստերը դիտավորյալ խեղաթյուրելով, իբր համալսարան ընդունելու համար կրթության ոլորտը սպասարկող պաշտոնատար անձանց կաշառք տալու պատրվակով Ս.Աբրահամյանի միջոցով 2008 թվականի հունիս-հուլիս ամիսներին մաս-մաս խաբեությամբ ստացել են առանձնապես խոշոր չափերի` 6.394.710 ՀՀ դրամին համարժեք ընդհանուր 21.000 ԱՄՆ դոլար գումար և հափշտակել այն: Բացի այդ, Գագիկ Սաֆարյանը Երևան քաղաքի Ավան և Նոր-Նորք վարչական շրջանների ընդհանուր իրավասության առաջին ատյանի դատարանի կողմից 2010 թվականի մայիսի 13-ի դատավճռով ՀՀ քրեական օրենսգրքի 178-րդ հոդվածի 2-րդ մասի 2-րդ և 3-րդ կետերով նախատեսված հանցանք կատարելու համար 3 տարի ժամանակով ազատազրկման դատապարտվելով, պատիժը պայմանականորեն չկիրառելուց և երկու տարի ժամանակով փորձաշրջան նշանակելուց հետո, դեռևս փորձաշրջանի ժամկետը չլրացած կատարել է նոր հանցանք: Այն է` Գ.Սաֆարյանը, վաշխառություն կատարելու դիտավորությամբ, Երևան քաղաքի բնակիչ Էմանուել Իվանյանին 2010 թվականի հունիս ամսին ամսական 5 տոկոսով, վերադարձնելու պայմանով որպես պարտք տվել է 4.535.640 ՀՀ դրամին համարժեք 12.000 ԱՄՆ դոլար գումար, որի համար Էմանուել Իվանյանից պահանջել ու 2010 թվականի հունիս-օգոստոս ամիսների համար ստացել է ՀՀ կենտրոնական բանկի կողմից սահմանված բանկային տոկոսի հաշվարկային դրույքի կրկնապատիկը գերազանցող տոկոսներ` ընդհանուր առմամբ 1.200 ԱՄՆ դոլար գումար:
2011 թվականի մայիսի 17-ին ՀՀ ոստիկանության քննչական գլխավոր վարչության ՀԿԳ քննության վարչության 2-րդ բաժնի պետի տեղակալ Ա.Բայադյանի որոշմամբ թիվ 11115510 քրեական գործից անջատվել է մեղադրյալ Գագիկ Հրանտի Սաֆարյանի վերաբերյալ մասը, որին շնորհվել է 11115510/1 համարը:
2011 թվականի մայիսի 26-ին Գագիկ Հրանտի Սաֆարյանի վերաբերյալ թիվ 11115510/1 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան, որտեղ քրեական գործին շնորհվել է ԵԱՔԴ/0064/01/11 համարը:
2011 թվականի մայիսի 27-ին Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի դատավոր Ա.Խաչատրյանի որոշմամբ թիվ ԵԱՔԴ/0064/01/11 քրեական գործն ընդունվել է վարույթ:
2011 թվականի հուլիսի 1-ին Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի որոշմամբ թիվ ԵԱՔԴ/0064/01/11 քրեական գործն ըստ ընդդատության ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան:
2011 թվականի հուլիսի 11-ին Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի դատավոր Մ.Պապոյանի որոշմամբ թիվ ԵԱՔԴ/0064/01/11 քրեական գործն ընդունվել է վարույթ:
2011 թվականի սեպտեմբերի 22-ին Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի որոշմամբ թիվ ԵԱՔԴ/0064/01/11 քրեական գործով Գագիկ Հրանտի Սաֆարյանի նկատմամբ ՀՀ քրեական օրենսգրքի 213-րդ հոդվածի 1-ին մասով քրեական հետապնդումը դադարեցվել է` տուժող Էմանուել Ռոլանդի Իվանյանի հաշտվելու հիմքով:
2. Ապացույցների հետազոտում և գնահատում.
Դատական քննության ընթացքում ամբաստանյալ Գագիկ Սաֆարյանն առաջադրված մեղադրանքում իրեն մեղավոր չճանաչեց և ցուցմունք տվեց այն մասին, որ 2008 թվականի ապրիլին կամ մայիսին Սերգո Աբրահամյանն իր ընկերոջ միջնորդությամբ եկել է իր մոտ և ծանոթացել իր հետ: Մի քանի հանդիպումներից հետո Սերգոն ասել է, որ նրա եղբայր Սամվել Կոստանյանի որդին` Հակոբ Կոստանյանը ցանկանում է ԲՈւՀ ընդունվել և այդ կապակցությամբ իրենից որոշ խորհուրդներ հարցրել: 2008 թվականի հունիս-հուլիս ամիսներին ինքը բիզնեսի մեջ ներդրած շատ մեծ քանակի գումարներ է կորցրել և այդ պատճառով որոշակի պարտքեր ունեցել: Պարտքերից ազատվելու համար ինքը դիմել է Սերգոյին, և Սերգոն մաս-մաս, մի քանի ամսվա ընթացքում իրեն պարտքով տվել է 15.000 ԱՄՆ դոլար: Նշված գումարը տալուց որոշ ժամանակ անց Սերգոն ասել է, որ իրենք պետք է օգնեն, որպեսզի Սամվելի որդին ընդունվի Երևանի պետական համալսարանի միջազգային հարաբերությունների ֆակուլտետ: Ինքը Սերգոյին ուղղություն է ցույց տվել` Հայաստանի պետական ագրարային համալսարանից Երևանի պետական համալսարան տեղափոխվելու կապակցությամբ, որը նախկինում կատարվել է ՀՀ կրթության և գիտության նախարարության թույլտվությամբ, իսկ հետագայում` երկու հաստատությունների ռեկտորների համաձայնությամբ: Հետագայում ինքը ծանոթացել է Սամվելի հետ ու իրենց հարաբերությունները եղել են այնպիսին, որ գումարային խոսակցություն իրենց միջև լինել չէր կարող: 2009 թվականի ապրիլ կամ հունիս ամիսներին, երբ Սերգոյի հետ հանդիպումները քիչ են եղել, և ավելի շատ հեռախոսազրույց է ունեցել Սամվելի հետ, ինքն անընդհատ Սամվելին ասել է, որ նրանք կարող են դիմել, որպեսզի երեխայի գործերը տեղափոխեն Երևանի պետական համալսարան: Դրանից մեկ-երկու ամիս հետո պարզվել է, որ Սամվելը Սերգոյին տվել է 21.000 ԱՄՆ դոլար, որպեսզի Հակոբը ընդունվի Երևանի պետական համալսարան: Ինքը ցանկացել է Սերգոյի ներկայությամբ տալ Սամվելի գումարները, սակայն Սերգոն խուսափել է հանդիպել իրենց: 2009 թվականի օգոստոսի 23-ին ինքը ձերբակալվել է և մոտ 10 ամիս չի կարողացել կապ հաստատել Սերգոյի հետ: «Երևան-Կենտրոն» քրեակատարողական հիմնակից ինքը մի քանի անգամ զանգահարել է Սամվելին և ասել, որ շուտով ինքը դուրս է գալու և նրա պարտքը կվերադարձնի: 2010 թվականի մայիսի 13-ին ինքն ազատվել է կալանքից և մոտ 10 օր չի կարողացել հանդիպել Սամվելին, իսկ մայիսի վերջին ինքն իմացել է, որ Սամվելը դիմել է ոստիկանություն: Դրանից հետո ինքն ամիսներ շարունակ փնտրել է Սերգոյին և նրան գտնելուց հետո ընկերների ներկայությամբ նրան ասել է, որ պատրաստ է Սամվելի գումարն ամբողջությամբ վերականգնել, սակայն այդ ժամանակ ինքն ունեցել է 5.000 ԱՄՆ դոլար: Այնուհետև տասնյակ անգամներ ինքը հանդիպել է Սամվելին և ասել, որ պատրաստ է մինչև 15.000 ԱՄՆ դոլար վճարել, սակայն նա հրաժարվել է և ասել, որ կամ պետք է գումարն ամբողջությամբ վճարեն, կամ պետք է նրան երաշխիք տան: Այդ ժամանակ Էմանուել Իվանյանի հորը վիրահատելու համար գումար է անհրաժեշտ եղել, և Էմանուելը ցանկացել է բնակարանը գրավ դնել ու վարկով գումար վերցնել: Ինքն Էմանուելին ասել է, որ կարող է միջնորդել վարկ ստանալու համար, սակայն նա պատասխանել է, որ գումարն անհրաժեշտ է շատ շտապ: Այդ պատճառով ինքն ու Սամվելը պայմանավորվել են, որպեսզի Էմանուելի բնակարանը որպես գրավի առարկա տրվի Սամվելին, ինչպես նաև ինքը վճարի 5.000 ԱՄՆ դոլար, իսկ մնացածը վճարի ամիսների ընթացքում` պայմանով, որ նա ոստիկանություն ներկայացրած բողոքը ետ վերցնի: Նշված պայմանավորվածությունն ինքը կատարել է, սակայն դրանից հետո իրեն հրավիրել են քննչական բաժին: Այդ ժամանակ ինքը կրկին փնտրել և գտել է Սերգոյին և խնդրել որպեսզի նա ճշմարտությունը հայտնի ոստիկանությանը, սակայն նա հրաժարվել է: 2010 թվականի հունիսի սկզբին ինքը Սամվելին անձամբ տվել է 5.000 և 1.000 ԱՄՆ դոլար, այնուհետև իր կինը 2011 թվականի փետրվարի վերջին կամ մարտի սկզբին, քննչական մարմնի դեպոզիտ հաշվին վճարել է 2.000 ԱՄՆ դոլար: Բացի նշվածից Էմանուելի բնակարանը տրվել է նրան, որի դիմաց ինքն Էմանուելին տվել է 19.000 ԱՄՆ դոլար: Ինքն Էմանուելին նշված գումարը տվել է մաս-մաս, որի առաջին մասը` 5.000 ԱՄՆ դոլարը տվել է բնակարանի առուվաճառքի պայմանագիրը կնքելու օրը:
Սույն քրեական գործի մեղադրանքի հետ առնչվող մեկ այլ քրեական գործով մեղադրյալ Սերգո Աբրահամյանը դատական քննության ընթացքում ցուցմունք տվեց այն մասին, որ Սամվել Կոստանյանի հետ բարեկամներ են և գտնվել են շատ մտերիմ հարաբերությունների մեջ: Սանվելի որդին ցանկացել է ընդունվել Երևանի պետական համալսարան, և Սամվելն իրեն խնդրել է օգնել այդ հարցում: 2008 թվականի ընդունելության քննությունների ժամանակահատվածում ինքը Սամվելի խնդրանքով նրա որդու հարցով գնացել է Սարգիս Աղաբեկյանի մոտ, ով խորհուրդ է տվել գնալ Գագիկ Սաֆարյանի մոտ: Ինքը և Սամվելը «Տրիումֆ» սրճարանում հանդիպել են Գագիկի հետ, և Սամվելը ներկայացրել է որդու հետ կապված իրավիճակը: Պայմանավորվածության համաձայն` հաջորդ օրը` կեսօրին, նույն վայրում իրենք կրկին հանդիպել են, և Գագիկը Սամվելին ասել է, որ կփորձի օգնել նրան: Այդ զրույցի ժամանակ ինքն իրեն վատ է զգացել, որի պատճառով նրանցից առանձնացել է, որպեսզի կողքի կրպակից հանքային ջուր գնի, և մինչև վերադարձել է, նրանց զրույցն արդեն ավարտված է եղել: Դրանից հետո Սամվելն իրեն ասել է, որ իր բացակայության ժամանակ Գագիկը նրան ասել է, որ այդ ժամանակ Սամվելի որդուն չի կարող ընդունել Երևանի պետական համալսարան, սակայն կարող է ընդունել Հայաստանի պետական ագրարային համալսարան, իսկ հետո կօգնի նրան տեղափոխվել Երևանի պետական համալսարան: Դրանից հետո Սամվելն ասել է, որ որդու ընդունվելու համար Գագիկին պետք է տա 21.000 ԱՄՆ դոլար տա: Իր ներկայությամբ «Տրիումֆ» սրճարանում երեք փուլով Սամվելը Գագիկին ծրարով տվել է նշված գումարը: Դրանից հետո Սամվելի որդին ընդունվել է Հայաստանի պետական ագրարային համալսարան: Գագիկը խոստացել է, որ այդ տարվա հունվարից հետո Սամվելի որդու տեղափոխության հարցը կկատարի, սակայն չի կատարել: Այնուհետև Գագիկին ձերբակալել են: Ինքը Սամվելին առաջարկել է կատարվածի մասին հայտնել ոստիկանություն, սակայն նա սկզբում հրաժարվել է` պատճառաբանելով, որ որդին կեղծ ատեստատի հիման վրա է ընդունվել Հայաստանի պետական ագրարային համալսարան և ոստիկանությանը հայտնելու դեպքում որդուն կհեռացնեն համալսարանից:
Տուժող Սամվել Կոստանյանը դատական քննության ընթացքում ցուցմունք տվեց այն մասին, որ ինքը Գագիկ Սաֆարյանի հետ այս գործով կապ չի ունեցել, այլ կապ է ունեցել Սերգո Աբրահամյանի հետ: Իր որդին` Հակոբը պարապել է հայերեն, անգլերեն և պատմություն, սակայն դասախոսների կարծիքով նրա գիտելիքները 2-3 բալով ցածր կգնահատվեին Երևանի պետական համալսարանի միջազգային հարաբերությունների ֆակուլտետ ընդունվելու համար: Այդ պատճառով ինքը ցանկացել է ինչ-որ մեկի միջոցով այդ 2-3 բալը բարձրացնել: Սերգոն իրեն ասել է, որ Հակոբին կարող է ընդունել տալ, կապ չունի նա ինչ գիտելիք ունի: Դրա համար 2008 թվականին ինքը Սերգոյին երեք փուլով տվել է 21.000 ԱՄՆ դոլար: Յուրաքանչյուր անգամ Սերգոն ասել է, որ գումարները տալիս է Գագիկ Սաֆարյանին: Առաջին անգամ գումարը վերցնելիս նա ասել է, որ այն պետք է փոխանցվի նախարարին: Սակայն հայերեն լեզվի կենտրոնացված քննության ժամանակ Հակոբը ոչինչ չի գրել, որի պատճառով ստացել է «0»: Դրանից հետո ինքը Սերգոյից ետ է պահանջել իր տված 21.000 ԱՄՆ դոլարը, սակայն նա գումարը ետ չի տվել: Դրանից հետո Սերգոյի ուղեկցությամբ Հակոբը գործերը հանձնել է Հայաստանի պետական ագրարային համալսարան և ընդունվել այդտեղ: Նշված համալսարան գործերը հանձնելիս ներկայացվել է կեղծ ատեստատ, որը Հակոբին տվել է Սերգոն: Հայաստանի պետական ագրարային համալսարան ընդունվելուց հետո Հակոբը նույն ուսումնական տարվա հունվար ամսին պետք է տեղափոխվեր Երևանի պետական համալսարան, սակայն Սերգոն այն չի արել: Գագիկ Սաֆարյանի անունն ինքը լսել է Սերգոյից, ով ասել է, որ Հակոբի ընդունելության հարցը Գագիկն է կարգավորում: 2009 թվականի գարնանը` Գագիկի հորերղբոր հողարկավության ժամանակ, ինքն առաջին անգամ ծանոթացել է Գագիկի հետ: Դրանից հետո ինքը հանդիպել է Գագիկին, ով իրեն ասել է, որ Սերգոն իրեն խաբել է, Հակոբին համալսարան ընդունելու կապակցությամբ Սերգոն նրան չի դիմել, 21.000 ԱՄՆ դոլար գումարի վերաբերյալ որևէ զրույց չի եղել, այլ որպես պարտք Սերգոն Գագիկին տվել է ընդամենը 15.000 ԱՄՆ դոլար: Դրանից հետո ինքը նշվածի մասին հայտնել է ոստիկանությանը, որից հետո իրեն զանգահարել է Գագիկը և ասել, որ իր գումարը նա անձամբ կվերադարձնի` պայմանով, որ ինքը չբողոքի: Դրանից հետո Գագիկն իրեն վերադարձրել է 6.000 ԱՄՆ դոլար, իսկ 15.000 ԱՄՆ դոլարի փոխարեն իր անվամբ գրանցվել է Էմանուել Իվանյանի` Ջերմուկ քաղաքում գտնվող բնակարանը` պայմանով, որ երեք ամիս հետո նշված գումարը Գագիկը կտա իրեն, որից հետո այդ բնակարանը կվերաձևակերպվի: Իր և Գագիկի հանդիպումների ժամանակ նա երբևէ չի ասել, որ Սերգոն դիմել է նրան, որպեսզի նա զբաղվի Հակոբի` համալսարան ընդունվելու հարցերով:
Վկա Մարի Գևորգյանը դատական քննության ընթացքում ցուցմունք տվեց այն մասին, որ իր որդին` Հակոբ Կոստանյանը ցանկացել է ընդունվել Երևանի պետական համալսարանի միջազգային հարաբերություններ ֆակուլտետ: Իրենք Հակոբի ընդունվելու համար դիմել են Սերգոյին, ով հետաքրքրվել և ասել է, որ դրա համար իրենք պետք է տան 21.000 ԱՄՆ դոլար: Սերգոն նաև ասել է, որ այդ գործն անելու է Գագիկ Սաֆարյանը: Իրենք մի քանի փուլով այդ գումարը տվել են Սերգոյին, սակայն Հակոբը հայերեն լեզվի քննությունից ստացել է «0»: Դրանից հետո իր ամուսինը պահանջել է վերադարձնել իրենց տված գումարը: Սակայն Սերգոն գումարը ետ չի տվել, այլ իր որդուն կեղծ ատեստատով ընդունել է Հայաստանի պետական ագրարային համալսարան և պարտավորվել երեք ամսվա ընթացքում նրան տեղափոխել Երևանի պետական համալսարան: Դրանից հետո իր ամուսինը հանդիպել է Գագիկ Սաֆարյանին, ով ասել է, որ 21.000 ԱՄՆ դոլարից տեղյակ չէ, նա Սերգոյից վերցրել է 15.000 ԱՄՆ դոլար` այն էլ պարտքով: Այնուհետև իր ամուսինը նշվածի վերաբերյալ հայտնել է ոստիկանությանը, որից հետո Գագիկն ասել է, որ 15.000 ԱՄՆ դոլարն անձամբ կվերադարձնի: Գագիկն իրենց վերադարձրել է 6.000 ԱՄՆ դոլար: Իր կարծիքով Գագիկը Սերգոյից 15.000 ԱՄՆ դոլարը վերցնելու ժամանակ իմացել է, որ դա հենց իրենց տված գումարն է, այլապես նա պատրաստակամություն չէր հայտնի այն վերադարձնել իրենց:
Վկա Հակոբ Կոստանյանը դատական քննության ընթացքում ցուցմունք տվեց այն մասին, որ ինքը 2008 թվականին ավարտել է թիվ 82 դպրոցը և պատրաստվել ընդունվել Երևանի պետական համալսարանի միջազգային հարաբերությունների ֆակուլտետ: Իր հայրը Սերգո Աբրահամյանին տվել է 21.000 ԱՄՆ դոլար, որպեսզի ինքն ընդունվի Երևանի պետական համալսարան: Սակայն հայերեն լեզվի քննությունից ինքը ստացել է «0»: Դրանից հետո Սերգոն ասել է, որպեսզի ինքը մաթեմատիկայի քննություն հանձնի և ընդունվի Հայաստանի պետական ագրարային համալսարան: Այդ ժամանակ իր գործերը հանձնելիս ինքը եղել է Սերգոյի հետ: Սերգոն իրեն տվել է թիվ 79 դպրոցի կողմից տրված ատեստատ և ասել, որպեսզի ինքն այն ներկայացնի: Ինքը Գագիկ Սաֆարյանին տեսել Սերգոյի հետ` 2009 թվականի հունվարին: Այդ ժամանակ Գագիկը մի քանի անգամ օգնել է իրեն, որպեսզի ինքը ստանա ընթացիկ քննությունները:
Տուժողի ներկայացուցիչ Գրիգոր Գևորգյանը, որպես վկա, դատական քննության ընթացքում ցուցմունք տվեց այն մասին, որ Սամվել Կոստանյանը Սերգո Աբրահամյանին տվել է 21.000 ԱՄՆ դոլար, որպեսզի Հակոբ Կոստանյանն ընդունվի համալսարան: Սերգո Աբրահամյանի ասելով` նա այդ գումարը պետք է տար Գագիկ Սաֆարյանին, որպեսզի վերջինն այդ գործն աներ: Նշված գումարից 3.000 ԱՄՆ դոլարը տալու ժամանակ` 2008 թվականի ամռանը, Սամվելի տանն ինքը ներկա է եղել, իսկ 18.000 ԱՄՆ դոլարի մասին ինքը լսել է Սամվելից: Սերգոն ասել է, որ այդ 3.000 ԱՄՆ դոլարը պետք է տան կրթության և գիտության նախարարին:
Վկա Էմանուել Իվանյանը դատական քննության ընթացքում ցուցմունք տվեց այն մասին, որ իր հոր վիրահատության համար իրեն շտապ գումար է անհրաժեշտ եղել, ինչի կապակցությամբ ինքը դիմել է Գագիկ Սաֆարյանին: Գագիկն իրեն տվել է 12.000 ԱՄՆ դոլար, որի դիմաց ինքը որպես գրավ առուվաճառքի պայմանագրով Ջերմուկ քաղաքում գտվող բնակարանը ձևակերպել է Սամվել Կոստանյանի անվամբ: Գրավի պայմանագիրը կնքելու փոխարեն առուվաճառքի պայմանագիր կնքելն առաջարկել է Գագիկը: Այդ ժամանակ նշված բնակարանի գինը կազմել է մոտ 30.000 ԱՄՆ դոլար: Գագիկին իրեն ասել է, որ բնակարանը ցանկանում է ձևակերպել Սամվելի անվամբ, քանի որ նրա և Սամվելի միջև պարտք ու պահանջ է եղել: Այնուհետև Սամվելն իրեն ասել է, որ որդուն համալսարան ընդունելու համար նա գումար է տվել Սերգոյին, ով այդ հարցը պետք է կարգավորեր Գագիկի միջոցով, սակայն չի ստացվել: Ինքը պատրաստ է Գագիկի տված գումարը չվերադարձնելու պայմաններում իր բնակարանը պարտքի դիմաց թողնել Սամվելին: Նախնական քննության ընթացքում տված ցուցմունքները հրապարակելուց հետո վկա Էմանուել Իվանյանը հայտնեց, որ այն գրել է իր ձեռքով, ինչ գրվել է ճիշտ է, ինքը դա գրել է կամավոր և պնդում է դրանք: Ինքը չի հասկանում, թե հետագայում իր հետ ինչ կարող է լինել, ինչի պատճառով դատարանում այլ բան է ասում:
Վկա Էմանուել Իվանյանը նախնական քննության ընթացքում ցուցմունք է տվել այն մասին, որ Սամվել Կոստանյանի որդուն` Հակոբ Կոստանյանին ինստիտուտ ընդունելու մասին ինքը լսել է Գագիկ Սաֆարյանից: Ըստ նրա ասելու` նա Հակոբին ընդունել է տվել գյուղինստիտուտ ու հետագայում պետք է տեղափոխեր համալսարան, սակայն դա նրան չի հաջողվել, քանի որ ոստկանությունը նրան ձերբակալել է, և նա Սամվելին փաստացի պարտք է մնացել 21.000 ԱՄՆ դոլար, որը նա վերցրել է Հակոբին ինստիտուտ ընդունելու համար: Սերգո Աբրահամյանն իր հետ խոսակցության ժամանակ ասել է, որ Գագիկը խաբեբա է, Սամվելից գումար է վերցրել, որպեսզի նրա որդուն ինստիտուտ ընդունի, սակայն խոստումը չի կատարել, իսկ գումարներն էլ չի վերադարձրել: Հակոբին ինստիտուտ ընդունելու հետ կապված այլ մանրամասնություններ իրեն հայտնի չէ: Գագիկն իրեն գումարը տվել է հետևյալ պայմանով. նրա տված 12.000 ԱՄՆ դոլարի փոխարեն մեկ տարի անց ինքը նրան պետք է վերադարձներ 19.200 ԱՄՆ դոլար, որից 1.200 ԱՄՆ դոլարը վերադարձրել է: Այդ գումարից ինքը 1.200 ԱՄՆ դոլարը վերադարձրել է Գագիկին, իսկ մնացած 18.000 ԱՄՆ դոլարը, ըստ պայմանավորվածության, պետք է վերադարձներ 2011 թվականի հունիսի 15-ին: Սամվելի հետ առանձին խոսակցության ժամանակ նա իրեն ասել է, որ Գագիկը նրան գումար է պարտք, որը խոստացել է վերադարձնել, սակայն դեռևս չի վերադարձրել, և նա կսպասի ևս երեք ամիս, որից հետո բնակարանը կվաճառի, քանի որ նրան գումար է անհրաժեշտ: Գագիկը բնակարանը Սամվելի անվամբ ձևակերպելը պատճառաբանել է նրան գումար պարտք լինելով: Սամվելի հետ առաջին հանդիպման ժամանակ, որը տեղի է ունեցել Արաբկիրի նոտարական գրասենյակում, Սամվելն իրեն ասել է, որ Գագիկին գումարը տվել է պարտքով, սակայն հետագա երկու հանդիպումների ժամանակ Սամվելը պատմել է, որ Սերգոն և Գագիկը նրա որդուն համալսարան ընդունելու նպատակով նրանից պահանջել և ստացել են 21.000 ԱՄՆ դոլար` պայմանավորվելով, որ սկզբից որդուն կընդունի գյուղակադեմիա, որից հետո` երկրորդ կուրսից կտեղափոխի Երևանի պետական համալսարանի միջազգային հարաբերությունների ֆակուլտետը: Նա գումարը տվել է Սերգոյի միջոցով: Սամվելն իրեն ասել է, որ նա, ծանոթ լինելով Սերգոյին, նույնիսկ բարեկամ լինելով, երեխայի ընդունվելու կապակցությամբ խոսակցությունների ժամանակ Սերգոն առաջարկել է օգնել, նրան ծանոթացրել Գագիկի հետ, իսկ Գագիկը խոստացել է, որ կլուծի այդ հարցը, որ դա նրա համար խնդիր չէ: Այն հանգամանքը, որ Սամվելից գումար է վերցրել երեխային համալսարան ընդունելու համար, ընդունել է նաև Գագիկը իր հետ զրուցելու ընթացքում: Սամվելը իր հետ հեռախոսազրույցների ժամանակ ասել է, որ Գագիկը 21.000 ԱՄՆ դոլարից 6.000 ԱՄՆ դոլարը կանխիկ գումարով ետ է վերադարձրել:
Իրեղեն ապացույց ճանաչելու մասին 2010 թվականի ապրիլի 20-ի որոշման համաձայն` Երևանի թիվ 82 միջնակարգ դպրոցի կողմից 2008 թվականի հունիսի 29-ին տրված թիվ ԱԱ427322 և Երևանի թիվ 79 միջնակարգ դպրոցի կողմից 2008 թվականի հունիսի 28-ին տրված թիվ ԱԱ427291 միջնակարգ ընդհանուր կրթության ատեստատները ճանաչվել են իրեղեն ապացույց:
ՀՀ կենտրոնական բանկի պաշտոնական կայքի (www.cba.am) համաձայն` 2008 թվականի հունիս-հուլիս ամիսներին 1 ԱՄՆ դոլարի ամենացածր փոխարժեքը եղել է 300,95 ՀՀ դրամ:
ՀՀ ոստիկանության ինֆորմացիոն կենտրոնի պահանջագրի համաձայն` Գագիկ Հրանտի Սաֆարյանը`
-2002 թվականի հունիս 12-ին Երևան քաղաքի Մալաթիա-Սեբաստիա համայնքի առաջին ատյանի դատարանի դատավճռով մեղավոր է ճանաչվել Քրեական օրենսգրքի 90-րդ հոդվածի 4-րդ մասով և դատապարտվել ազատազրկման` 6 տարի ժամկետով: Քրեական օրենգրքի 41-րդ հոդվածի կիրառմամբ նշանակված պատիժը պայմանականորեն չի կիրառվել և սահմանվել է փորձաշրջան 2 տարի ժամկետով,
-2005 թվականի դեկտեմբերի 16-ին Տավուշի մարզի առաջին ատյանի դատարանի դատավճռով մեղավոր է ճանաչվել ՀՀ քրեական օրենսգրքի 235-րդ հոդվածի 1-ին մասով և դատապարտվել ազատազրկման` 1 տարի 6 ամիս ժամկետով: ՀՀ քրեական օրենգրքի 70-րդ հոդվածի կիրառմամբ նշանակված պատիժը պայմանականորեն չի կիրառվել և սահմանվել է փորձաշրջան 2 տարի ժամկետով: 2006 թվականի օգոստոսի 10-ին Երևան քաղաքի Ավան և Նոր Նորք համայնքների առաջին ատյանի դատարանի որոշմամբ կիրառվել է 2006 թվականի հուլիս 7-ին ընդունված համաներման որոշումը,
-2006 թվականի դեկտեմբերի 8-ին Սյունիքի մարզի առաջին ատյանի դատարանի որոշմամբ կիրառվել է 2006 թվականի հուլիս 7-ին ընդունված համաներման որոշումը:
Երևան քաղաքի Ավան և Նոր Նորք վարչական շրջանների ընդհանուր իրավասության առաջին ատյանի դատարանի 2010 թվականի մայիսի 13-ի դատավճռի պատճենի համաձայն` Գագիկ Հրանտի Սաֆարյանը մեղավոր է ճանաչվել ՀՀ քրեական օրենսգրքի 178-րդ հոդվածի 2-րդ մասի 2-րդ, 3-րդ կետերով և դատապարտվել ազատազրկման` 3 տարի ժամկետով: ՀՀ քրեական օրենգրքի 70-րդ հոդվածի կիրառմամբ նշանակված պատիժը պայմանականորեն չի կիրառվել և սահմանվել է փորձաշրջան` 2 տարի ժամկետով: Գագիկ Սաֆարյանի նկատմամբ ընտրված խափանման միջոցը` կալանավորումը, վերացվել է և նա ազատ է արձակվել դատարանի դահլիճից: Նշված դատավճռի ներածական մասի համաձայն` Գագիկ Սաֆարյանը արգելանքի տակ է եղել 2009 թվականի օգոստոսի 24-ից:
Թիվ ԱԱ004980 ծննդյան վկայականի պատճենի համաձայն` 1996 թվականի փետրվարի 20-ին ծնված Ռուզաննա Գագիկի Սաֆարյանի հայրը Գագիկ Հրանտի Սաֆարյանն է:
Թիվ ԱԱ166028 ծննդյան վկայականի պատճենի համաձայն` 1998 թվականի նոյեմբերի 11-ին ծնված Արմեն Գագիկի Սաֆարյանի հայրը Գագիկ Հրանտի Սաֆարյանն է:
«Հոգևոր վերածնունդ» հասարակական կազմակերպության նախագահի և Մարտունու շրջանի նախկին ինքնապաշտպանության շտաբի պետի կողմից տրված գրությունների համաձայն` Գագիկ Սաֆարյանը եղել է Արցախյան շարժման «Ղարաբաղ» կոմիտեի ղեկավարներից, ձեռնամուխ է եղել Մարտունու շրջանի ինքնապաշտպանական ջոկատի ստեղծմանը, մասնակցել ինքնապաշտպանական գործողություններին, զբաղվել զենք, զինամթերք, վառելիք և սննդամթերք մատակարարելու աշխատանքներով: Գագիկ Սաֆարյանն Արցախյան պատերազմի ժամանակ և դրանից հետո իր ազգանվեր գործողություններով աջակցել է Արցախի ազատագրական պայքարին և Արցախի պետականության կերտմանը:
2011 թվականի մարտի 16-ի արձանագրության համաձայն` Գագիկ Սաֆարյանի ազգական Արմեն Առուստամյանը ներկայացրել է 2.000 ԱՄՆ դոլար և հայտնել, որ ցանկանում է փոխանցել այն, որպես տուժող Սամվել Կոստանյանին պատճառված վնասի մի մաս:
Գույքի վրա կալանք դնելու մասին 2010 թվականի մայիսի 17-ի որոշման համաձայն` կալանք է դրվել Գագիկ Սաֆարյանի «Սոնի Էրիքսոն» մոդելի բջջային հեռախոսի, հեռախոսային քարտի, 2.100 ԱՄՆ դոլարի և 5.000 ՀՀ դրամի վրա:
Ձերբակալման 2011 թվականի փետրվարի 11-ի արձանագրության համաձայն` 2011 թվականի փետրվարի 11-ին` ժամը 11:30-ին, Գագիկ Հրանտի Սաֆարյանը ձերբակալվել է:
Կալանավորումը որպես խափանման միջոց կիրառելու միջնորդությունը քննության առնելու մասին Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի 2011 թվականի փետրվարի 12-ի որոշման համաձայն` Գագիկ Հրանտի Սաֆարյանի նկատմամբ որպես խափանման միջոց կիրառվել է կալանավորումը, կալանավորման սկիզբը հաշվվել է 2011 թվականի փետրվարի 11-ից:
Այսպիսով, Դատարանը գտնում է, որ մտացածին են և գործով ձեռք բերված օբյեկտիվ տվյալներով հերքվում են ամբաստանյալ Գագիկ Սաֆարյանի ցուցմունքներն այն մասին, որ ինքը Սամվել Կոստանյանի որդուն` Հակոբ Կոստանյանին ԲՈՒՀ ընդունելու կապակցությամբ որևէ գումար չի վերցրել և այն խարդախությամբ չի հափշտակել:
3. Դատարանի իրավական վերլուծությունները.
Վերը նշված ապացույցները վերլուծելու և համադրելու արդյունքում Դատարանը գալիս է այն եզրահանգման, որ Գագիկ Հրանտի Սաֆարյանը, Սերգո Ռոբերտի Աբրահամյանի հետ նախնական համաձայնությամբ, 2008 թվականի հունիս-հուլիս ամիսներին Երևան քաղաքում, ի սկզբանե նպատակ ունենալով տիրանալ ուրիշի գույքին, խաբեությամբ, չարաշահել է Սամվել Կոստանյանի վստահությունը և որպես նրա որդի Հակոբ Կոստանյանի` Երևանի պետական համալսարանի միջազգային հարաբերությունների ֆակուլտետ ընդունվելուն աջակցելու գումար, նրանից վերցրել է առանձնապես խոշոր չափերի` 6.319.950 ՀՀ դրամին համարժեք 21.000 ԱՄՆ դոլար և ապօրինաբար, անհատույց տիրացել դրան: Այսինքն` Գագիկ Հրանտի Սաֆարյանը կատարել է արարք, ինչը համապատասխանում է ՀՀ քրեական օրենսգրքի 178-րդ հոդվածի 3-րդ մասի 1-ին կետի հատկանիշներին:
Ապացուցված է Գագիկ Հրանտի Սաֆարյանի մեղավորությունը ՀՀ քրեական օրենսգրքի 178-րդ հոդվածի 3-րդ մասի 1-ին կետով նախատեսված արարքը կատարելու մեջ:
Գագիկ Սաֆարյանի անձը դրականորեն բնութագրող հանգամանքներ են ամուսնացած լինելը և բարձրագույն կրթություն ունենալը:
Գագիկ Սաֆարյանի պատասխանատվությունն ու պատիժը մեղմացնող հանգամանքներ են խնամքին 14 տարին չլրացած (Արմեն Գագիկի Սաֆարյան` ծնված 1998 թվականի նոյեմբերի 11-ին) և անչափահաս (Ռուզաննա Գագիկի Սաֆարյան` ծնված 1996 թվականի փետրվարի 20-ին) երեխաների առկայությունը, ինչպես նաև տուժողին պատճառած վնասը հարթելուն ուղղված ողջամիտ միջոցներ ձեռնարկելը:
Դատարանը գտնում է, որ Գագիկ Սաֆարյանի պատասխանատվությունն ու պատիժը մեղմացնող հանգամանք պետք է դիտել նաև Արցախյան ազատամարտին մասնակցելը:
Դատարանը միաժամանակ արձանագրում է, որ Գագիկ Սաֆարյանի պատասխանատվությունն ու պատիժը ծանրացնող հանգամանքներ չկան:
Կատարած արարքի համար ամբաստանյալ Գագիկ Սաֆարյանը ենթակա է քրեական պատասխանատվության և պատժի:
Դատարանը, հաշվի առնելով Գագիկ Սաֆարյանի կատարած արարքի` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորեն բնութագրող տվյալները, պատասխանատվությունն ու պատիժը մեղմացնող հանգամանքները, պատասխանատվությունն ու պատիժը ծանրացնող հանգամանքների բացակայությունը, ինչպես նաև այն, որ Գագիկ Սաֆարյանի կատարած արարքի համար ՀՀ քրեական օրենսգրքի 178-րդ հոդվածի 3-րդ մասի սանկցիայով որպես հիմնական պատիժ նախատեսված է միայն ազատազրկում, գտնում է, որ ՀՀ քրեական օրենսգրքի 48-րդ հոդվածով սահմանված պատժի նպատակներն ապահովելու համար նրա նկատմամբ պատիժ պետք է նշանակել ազատազրկման ձևով, որը նա պետք է կրի: Դատարանը միաժամանակ գտնում է, որ Գագիկ Սաֆարյանի նկատմամբ չպետք է նշանակել ՀՀ քրեական օրենսգրքի 178-րդ հոդվածի 3-րդ մասի սանկցիայով նախատեսված լրացուցիչ պատիժը` գույքի բռնագրավումը:
ՀՀ քրեական օրենսգրքի 66-րդ հոդվածի 6-րդ մասի համաձայն` պատիժը նշանակվում է սույն հոդվածի կանոններով, եթե դատավճիռ կայացնելուց հետո պարզվի, որ դատապարտյալը մեղավոր է նաև մեկ այլ հանցանքի համար, որը նա կատարել է նախքան առաջին գործով դատավճիռ կայացնելը: Այս դեպքում վերջնական պատժի ժամկետին հաշվակցվում է առաջին դատավճռով նշանակված պատժի կրած մասը:
Քանի որ ամբաստանյալ Գագիկ Սաֆարյանը Երևան քաղաքի Ավան և Նոր Նորք վարչական շրջանների առաջին ատյանի ընդհանուր իրավասության դատարանի 2010 թվականի մայիսի 13-ի դատավճռով ՀՀ քրեական օրենսգրքի 178-րդ հոդվածի 2-րդ մասի 2-րդ և 3-րդ կետերով դատապարտվել է 3 (երեք) տարի ժամկետով ազատազրկման և ՀՀ քրեական օրենգրքի 70-րդ հոդվածի կիրառմամբ նշանակված պատիժը պայմանականորեն չի կիրառվել և սահմանվել է փորձաշրջան 2 (երկու) տարի ժամկետով (հարկ է նկատել, որ նշանակված պատժից փաստացի կրել է 8 (ութ) ամիս 19 (տասնինը) օրը և մնացել է կրելու 2 (երկու) տարի 3 (երեք) ամիս 11 (տասնմեկ) օր), իսկ սույն քրեական գործով հաստատված արարքը կատարել է 2008 թվականի հունիս-հուլիս ամիսներին, ուստի ՀՀ քրեական օրենսգրքի 66-րդ հոդվածի 6-րդ մասի կիրառմամբ սույն դատավճռով նշանակվելիք պատժին պետք է համակցել Երևան քաղաքի Ավան և Նոր Նորք վարչական շրջանների առաջին ատյանի ընդհանուր իրավասության դատարանի 2010 թվականի մայիսի 13-ի դատավճռով նշանակված պատիժը` 3 (երեք) տարի ժամկետով ազատազրկումը, և վերջնական պատժի ժամկետին հաշվակցել Երևան քաղաքի Ավան և Նոր Նորք վարչական շրջանների առաջին ատյանի ընդհանուր իրավասության դատարանի 2010 թվականի մայիսի 13-ի դատավճռով նշանակված պատիժի կրած մասը` 8 (ութ) ամիս 19 (տասնինը) օրը:
Դատարանը միաժամանակ գտնում է, որ սույն դատավճռով նշանակվելիք և Երևան քաղաքի Ավան և Նոր Նորք վարչական շրջանների առաջին ատյանի ընդհանուր իրավասության դատարանի 2010 թվականի մայիսի 13-ի դատավճռով նշանակված պատիժները պետք է համակցել պատիժները մասնակիորեն գումարելու միջոցով:
ՀՀ քրեական դատավարության օրենսգրքի 138-րդ հոդվածի համաձայն` մեղադրյալին կալանքի տակ պահելու ժամկետը հաշվվում է ձերբակալելիս անձին փաստացի արգելանքի վերցնելու պահից, իսկ ՀՀ քրեական օրենսգրքի 69-րդ հոդվածի 3-րդ մասի համաձայն` մինչև դատավճռի oրինական ուժի մեջ մտնելը կալանքի տակ պահելու ժամկետը հաշվակցվում է ազատազրկման ձևով նշանակված պատժին` մեկ օրը հաշվելով մեկ օրվա դիմաց: Գագիկ Սաֆարյանի պատժի կրման սկիզբը պետք է հաշվել 2011 թվականի փետրվարի 11-ից, քանի որ նա ձերբակալվել է այդ օրը, իսկ 2011 թվականի փետրվարի 12-ին նրա նկատմամբ որպես խափանման միջոց ընտրվել է կալանավորումը:
Դատարանը գտնում է, որ Գագիկ Սաֆարյանի նկատմամբ ընտրված խափանման միջոցը` կալանավորումը, պետք է թողնել անփոփոխ` մինչև դատավճռի օրինական ուժի մեջ մտնելը:
Դատարանը, ղեկավարվելով ՀՀ քրեական դատավարության օրենսգրքի 116-րդ և 119-րդ հոդվածներով, գտնում է, որ դատավճիռն օրինական ուժի մեջ մտնելուց հետո 2010 թվականի ապրիլի 20-ի որոշմամբ իրեղեն ապացույց ճանաչված` Երևանի թիվ 82 միջնակարգ դպրոցի կողմից 2008 թվականի հունիսի 29-ին տրված թիվ ԱԱ427322 և Երևանի թիվ 79 միջնակարգ դպրոցի կողմից 2008 թվականի հունիսի 28-ին տրված թիվ ԱԱ427291 միջնակարգ ընդհանուր կրթության ատեստատների հարցը պետք է թողնել լուծելու թիվ 11115510/1 քրեական գործով:
ՀՀ քրեական դատավարության օրենսգրքի 360-րդ հոդվածի 1-ին մասի 11-րդ կետի համաձայն` դատարանը պետք է լուծի նաև գույքի հնարավոր բռնագրավումն ապահովելու համար գույքի վրա դրված կալանքը վերացնելու հարցը:
Սույն գործով 2010 թվականի մայիսի 17-ին կայացվել է գույքի վրա կալանք դնելու մասին որոշում, համաձայն որի` որոշվել է քաղաքացիական հայցը և դատական ծախսերն ապահովելու նպատակով կալանք դնել Գագիկ Սաֆարյանի «Սոնի Էրիքսոն» մոդելի բջջային հեռախոսի, հեռախոսային քարտի, 2.100 ԱՄՆ դոլարի և 5.000 ՀՀ դրամի վրա: Հարկ է նկատել, որ նշված գումարներից 2.000 ԱՄՆ դոլաը նախնական քննության մարմնին տրմադրել է Գագիկ Սաֆարյանի ազգական Արմեն Առուստամյանը` որպես տուժող Սամվել Կոստանյանին պատճառված վնասի փոխհատուցում, սակայն նախնական քննության մարմինը նշված գումարը Սամվել Կոստանյանին տրամադրելու փոխարեն կալանք է դրել այդ գումարի վրա: Դատարանը, նկատի ունենալով, որ բացակայում է ինչպես նշված գումարի` 2.000 ԱՄՆ դոլարի, այնպես էլ «Սոնի Էրիքսոն» մոդելի բջջային հեռախոսի, հեռախոսային քարտի, 100 ԱՄՆ դոլարի և 5.000 ՀՀ դրամի վրա կալանք դնելուց բխող սահմանափակումների կիրառման անհրաժեշտությունը, գտնում է, որ պետք է վերացնել դրանց վրա դրված կալանքը և 2.000 ԱՄՆ դոլարը տրամադրել Սամվել Կոստանյանին` որպես հանցագործությամբ պատճառված վնասի փոխհատուցում, իսկ «Սոնի Էրիքսոն» մոդելի բջջային հեռախոսը, հեռախոսային քարտը, 100 ԱՄՆ դոլարը և 5.000 ՀՀ դրամը` վերադարձնել Գագիկ Սաֆարյանին:
Դատարանը գտնում է, որ ՀՀ քրեական դատավարության օրենսգրքի 168-րդ հոդվածի 1-ին մաuի 1-ին կետով նախատեսված դատական ծախսերն ամբաստանյալ Գագիկ Սաֆարյանից ենթակա չեն բռնագանձման, քանի որ տուժող Սամվել Կոստանյանի կողմից իր գույքային շահերն անձամբ պաշտպանելու անհնարինության մասին տվյալները բացակայում են: Բռնագանձման ենթակա չեն նաև ՀՀ քրեական դատավարության օրենսգրքի 168-րդ հոդվածի 1-ին մաuի 2-6-րդ կետերով նախատեսված դատական ծախսերը, քանի որ 4-րդ և 6-րդ կետերով նախատեսված դատական ծախսեր ընդհանրապես չկան, իսկ 2-րդ, 3-րդ և 5-րդ կետերով նախատեսված ծախսերի վերաբերյալ տվյալները բացակայում են, ավելին` նման պահանջ Դատարան չի ներկայացվել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 116-րդ, 119-րդ, 168-րդ, 309-րդ, 357-360-րդ, 365-րդ և 369-372-րդ հոդվածներով` Դատարանը
ՎՃՌԵՑ

Գագիկ Հրանտի Սաֆարյանին մեղավոր ճանաչել ՀՀ քրեական օրենսգրքի 178-րդ հոդվածի 3-րդ մասի 1-ին կետով և պատիժ նշանակել ազատազրկում` 4 (չորս) տարի ժամկետով:
ՀՀ քրեական օրենսգրքի 66-րդ հոդվածի 6-րդ մասով սահմանված կարգով` սույն դատավճռով նշանակված պատժին մասնակիորեն գումարել Երևան քաղաքի Ավան և Նոր Նորք վարչական շրջանների ընդհանուր իրավասության առաջին ատյանի դատարանի 2010 թվականի մայիսի 13-ի դատավճռով նշանակված պատիժը` 3 (երեք) տարի ժամկետով ազատազրկումը, և Գագիկ Հրանտի Սաֆարյանի նկատմամբ վերջնական պատիժ նշանակել ազատազրկում` 5 (հինգ) տարի ժամկետով:
Վերջնական պատժի ժամկետին հաշվակցել Երևան քաղաքի Ավան և Նոր Նորք վարչական շրջանների ընդհանուր իրավասության առաջին ատյանի դատարանի 2010 թվականի մայիսի 13-ի դատավճռով նշանակված պատժի կրած մասը` 8 (ութ) ամիս 19 (տասնինը) օրը, և վերջնական պատիժ թողնել կրելու` ազատազրկում` 4 (չորս) տարի 3 (երեք) ամիս 11 (տասնմեկ) օր ժամկետով` պատժի կրման սկիզբը հաշվելով 2011 թվականի փետրվարի 11-ից:
Գագիկ Հրանտի Սաֆարյանի նկատմամբ ընտրված խափանման միջոցը` կալանավորումը, թողնել անփոփոխ` մինչև դատավճռի օրինական ուժի մեջ մտնելը:
Դատավճիռն օրինական ուժի մեջ մտնելուց հետո 2010 թվականի ապրիլի 20-ի որոշմամբ իրեղեն ապացույց ճանաչված` Երևանի թիվ 82 միջնակարգ դպրոցի կողմից 2008 թվականի հունիսի 29-ին տրված թիվ ԱԱ427322 և Երևանի թիվ 79 միջնակարգ դպրոցի կողմից 2008 թվականի հունիսի 28-ին տրված թիվ ԱԱ427291 միջնակարգ ընդհանուր կրթության ատեստատների հարցը թողնել լուծելու թիվ 11115510/1 քրեական գործով:
Դատավճիռն օրինական ուժի մեջ մտնելուց հետո 2010 թվականի մայիսի 17-ի որոշմամբ «Սոնի Էրիքսոն» մոդելի բջջային հեռախոսի, հեռախոսային քարտի, 2.100 ԱՄՆ դոլարի և 5.000 ՀՀ դրամի վրա դրված կալանքը վերացնել և 2.000 ԱՄՆ դոլարը տրամադրել Սամվել Գրիշայի Կոստանյանին` որպես հանցագործությամբ պատճառված վնասի փոխհատուցում, իսկ «Սոնի Էրիքսոն» մոդելի բջջային հեռախոսը, հեռախոսային քարտը, 100 ԱՄՆ դոլարը և 5.000 ՀՀ դրամը վերադարձնել Գագիկ Հրանտի Սաֆարյանին:
Դատական ծախսերի հարցը համարել լուծված:
Դատավճիռը կարող է բողոքարկվել Հայաստանի Հանրապետության քրեական վերաքննիչ դատարան` հրապարակելու օրվանից մեկամսյա ժամկետում:


ԴԱՏԱՎՈՐ Մ.ՊԱՊՈՅԱՆ